رواية لنحيا الحياة بامل -14
توجهت الى حيث الملتقى شاهدتهم من بعيد ينتظرون وصولي
مركبتين تحمل كل واحدة منهما اثنا عشر شخص
اقتربت بمن تكفل بهذه الرحلة التي تطلب المستقبل العلمي
وقلت :السلام عليكم ابوعلي
اجاب بمرح :هلا ابو حسين اشلونك
ليقول بعدها :ابو حسين ترة الشباب خلصوا لاماكن بالسيارة الاولى والسيارة الثانية بيهة اربع بنات ويا امهاتهن واني وانت واثنين من الشباب
اجبته بأستياء :يمعودة دبرها ما اريد بسارة النسوان والله ما ألي خلك واتقيد وتنعد عليه انفاسي
واذا التفت صدفة كالن يباوع علينة وشيفضهة بالمنطقة
اجاب بمرح :يمعود فك العزوبية البنات كلهن بنات عوائل وخوش بنات وسمعتهن ذهب
اجبته بصدق :الله يوفقهن اني ادرس ماجستير ومرتي تدرس ماجستير والاولاد شنو يدرسون
يمعودة هاي سالفة تعبان
خل اروح اشوف السيارة الثانية بلكي واحد يصير شريف وينطيني مكان
اجاب :لا تحاول كلها ناوي تكظي الطريق ونسة وسوالف ونكت وتعرفهم من ياخذون راحتهم
اجبته :احاول ما خسران خسارة
اجاب :روحي والالب دعايلك
بالفعل حثثت الخطى وتوجهت الى السيارة التي امتلئت شباب وادخلت رأسي وقلت :السلام عليكم شباب
ولأننا اولاد منطقة وحدة حتى من لا اعرفهم يعرفونني
اجابوا بصوت وواحد :االسلام عليكم هلا ابو حسين
اتفضل
اجبت بمرح :والله شاب اني داخل على الله عليكم
اجابوا :ادلل ابو حسين
قلت :اتسون مكان الي بينكم
اجاب احدهم :عيونة الك ابو حسين بس تعرف الوضع
قلت :يمعودين خلونة كل اثنين بكرسي
ليقول لأخر :احنه هسة 14 والسيارة تاخذ 12 يعني ما بيه مجال ابو حسين
قلت بترجي : مو اني اكبركم ما بيكم واحد يصير شريف ويروح بالسيارة الثانية واجي مكانه
اجاب احدهم :ابو حسين لأن انته اكبرن انريدك تتأهل حتى نحضر عرسك روح يمعود يمكن نصيبك بذيج السيارة
ليبدؤا بمزح وضحك وموضوعهم الرئيسي انا
جلسة شباب تمنيت ان اكون فيها
قلت :يلة الله ويياكم امري للرحمان اروح اشوف مستقبلي
اجاب احدهم :لا روح شوف نصيبك ويجي المستقبل
رفعت يدي احيهم وانصرفت
توجهت نحو السيارة الاخرى ليقول حسين المتكفل بالرحلة :ها أبو حسين
قلت :والله خوش لمة شبابا شقندحية (كلمة يمكن تركية بمعنى ملعبين يكثرون المزح والمقالب )
اجاب :مو كتلك ما عندك امل
قلت بأستسلام امري لله وتوجهت نحو السيارة الاخرى ودخلت وقلت :السلام عليكم ليأتني صوت النسوة واحد الشباب وعليكم السلام
انتظرنا فترة واتى اخر شاب
وانطلقت السيارة تحث الخطى نحو العاصمة بغداد
في اول الطريق قضيناها صامتون ألى أن سمعت الشابان الذان يجلسان بقربي يتكلمان عن الفتاة التي ترتدي اسود الجالسة في اخر المركبة
ليقول الاول :هاي مو اخت مؤيد
اجابه الثاني بعد أن استرق نظرة لا يمكن للفتيات التقاطها :اي اخت مؤيد
اجابه الاول :هاي المعيدة بالجامعة مو
اجاب الثاني :اي هي
ليقول الاول بهيام :والله حلو
ليقول الثاني :وخوش بنية شريفة بس حرامات اصغر منه
اجابه الاول :لا مو حرامات حتى اذا اصغر منه هيج ابنية متتفوت
تركتهم يتكلمون عن سنا هذا ما اذكره عنها عندما كانت صغيرة لم أصادفها منذ زمن
جميل أن تبحث الفتاة عن مستقبلها الدراسي بهذا الشكل
كنت مندمج مع نفسي افكر في وضعي ووضع منار واعد نفسي لاستقبال خطابها الذين بالتأكيد سوف تقابل طلباتهم بشكل جدي
منار وزواجها احدى مسؤولياتي التي سوف احرص على أدائها على افضل وجه يرون في
زياد رجل لا مثيل له والايام سوف تثبت لهم أن منار سوف يأتها من هو افضل منه
قطع علي افكاري صوت امرة تقول :اشلونكم يمة علي لتفت الى حيث الصوت فأصدمت
بالعيون العسلية قبل أن اصطدم بالوجه الحنون لام أياد معلمتي في الروضة
فقلت بترحيب :هلا خالة ام اياد اشلونج واشلون اياد وخوانه
اجابت بحنيتها المعروفة:زينين يمة انته اشلونك اهلك بالبيت اشلونهم
اجبتها :الحمد لله بخير
قالت بعتب :هسة يالة فكرت بالماجستير ليش هشكل يمة مو أنت علي المتفوق ما أنسى الطفل الي من اول روضة وهو يعرف جدول الضرب لحد جدول الاربعة
اجبت بضحكة خجلة :شسوي التعليم بيتني الزامي وين مترحين تلكين مدرس ومعلم
اجابت بمرح :والنعم بيتك الي طلع هيج شباب نفتخر بيه
اجبتها بصدق :احنه طلاب ام اياد
اجابت :الله يعزك يمة
قلت :شنو القصة ناوية اتكملين دراسات
اجابت بأبتسامة :ان شاء الله بس مو هسة فد سنة بعد لأن محتاجة أضبط لغة احسن من هسة واجي انافسك بأذن الله
قلت :هلا بيج على راسنة منافستج
وبعدها قلت :لعد شنو القصة
قالت :اجيت وي بيداء بنتي و سنا بنت أبو مؤيد الله يرحمه حتى يقدمون لدورة اللغات
قلت بنخوة :خالة أي شي تحتاجون انتي والبنات ترة اني ابنج واخوهن
قالت :والنعم بيك انته وكل الولد ولد منطقتنا كلكم ولدنة والنعم بيكم
قلت بصدق :على راسنة انتو
قالت :الله يسلم راسكم يمة
والتفت الى اللواتي يجلسن خلفها وبدأت تتكلم معهن لكي توضح لهن هويتي وكالعادة لابد أن تقول أنا ابن فلانة حتى تتضح هويتي لهن
الخالة ام اياد
بالتأكيد تريدون معرفة من هي
هي معلمتي بالروضة تلك المرأة المرتبة التي تشتغل عاملة لرعاية اطفال الروضة بشهادة المتوسطة وكانت تواصل الدراسة حتى أكملت الدراسة الجامعية في كلية الادارة والاقتصاد فرع المحاسبة
لتحصل على وظيفة محاسبة في احدى المستشفيات في المنطقة
تدرج في المستوى الوظيفي والاجتماعي حصلت عليه بجهودها الشخصية أمرأة طموحة وساعدها زوجها العامل الفني في احدى المصانع على تحقيق طموحها فهي دائمة القول كما تقول والدتي لولا أبا اياد لما كانت الأن محاسبة
هذه هي ام اياد
اما من تنعكس صورتها امامي بزجاج السيارة فلها عينان كصفاء لون الشمس
فهل اصابوا ركاب المركبة الاولى عندما قالوا اذهب ربما تجد نصيبك في المركبة الاخرى !!!!!!!!
أستغفر الله وأتوب أليه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
فاصل إعلآني ^_^ / ..
لا احلل مسح اسمي مع على الرواية ..
تجميعي : ♫ معزوفة حنين ♫..
سبحان الله والحمد لله ولا أله ألا الله والله آكبر
الجزء (12)
منذ أن وطئت قدماي ثراه أدركت اني هائم بهواه
عراق
حتى سمائك غيومه كأنها اكوام سكر
عراق اشتقت لكل نسمة هواء
لكل ذرة تراب
اشتقت لعيون الاطفال
اشتقت لضحكات الصبايا في الأسواق
هل تصدقون أن قلت لكم اشتقت لذلك المجنون الذي يقف عند مفترق الطرق في منطقتي ويزعج النساء ويزعجه الأطفال
اشتقت لامي وأحضانها
اشتق لسندي وطيبة قلبه
اشتقت لتلك الأخت الوحيدة وهدوئها
اشتقت واشتقت واشتقت
قررت أن أوفي بقسمي
اقسمت أن وطئت ارض العراق أن اذهب لقطعة الأرض التي ورثتها امي وانزل الى حيث شاطئ دجلة واغترف بيدي واروي عطش السنين
تعاطف معي السائق الذي يقلني ولم يرضى بأجر ِ إضافي على هذا المشوار
وحاول أن يثنني بقوله :خالي على بختك لا تروح تتمرض تشرب الماي من النهر
الناس صايرة تفلتر الماي لو تشتري مي قناني وانته تريد تشرب من دجلة
اجبته بشوق :خالي اني اذا ما اشرب منه راح اتمرض والله اريد شي يرد روحي الي وميي دجلة هو الي راح يرده
اجاب بتعاطف :الغربة صعبة حقك
وقضينا الدرب هو يصف يلي حال العراق وكيف أن الخير كثير ولكن اللصوص ايضا كثر
لايهمني الوضع السياسي حاليا كل ما يهمني أن اصل الى اهلي وأن استنشق اكبر قدر من هواء وطني
عندما وصلت الى ارض امي تنفسسسسسسست بعمق لأن شعرت أن هذه الارض فيها هواء يتكلم بلهجة عراقية وقلت بهيام :االله يا ريحة هلي
كان جواب السائق نظرة متعاطفة
توقفت السيارة في اقرب مكان يمكن التوقف فيه وجدت هناك مركبتين وعلى مسافة ليست ببعيدة منهما ثلاثة رجال
سجدت على الارض وقبلتها وحمدت الله اني عدت لوطني اخذت حفنة تراب واستنشقتها بعمق
وحمدت الله لاني امسكت بيدي تراب وطني
رفعت رأسي لارى زوجين من العيون تراقبني
لم اعرف من امامي ولم يعرفوني
لم اعرفهم لأن قطرات الدموع شوشت الرؤيا عندي
ولم يعرفوني لأن لم اعد ذلك الشاب الهزيل البنية الذي كانوا يلقبونه
عود ثقاب
نهضت وكفكفت الدموع وتماسكت قليلا وقلت بصوت مبحوح :السلام عليكم
اجابو بصوت واحد :وعليكم السلام
قلت :عبالكم مخبل
اجاب احدهم :لا حشاك بس ما تعرفنة
قلت للمتكلم بروح مرحة :مو عدكم عشر عمات ووتنسون ابنهة الوحيد
ليقول همام بصوت فرح :محمد عودان شخاط(اعواد ثقاب) ويتلقفني بأحضانه
آه كم افتقدت السلام بالطريقة العراقية
سوف تقولون جن الرجل نعم اشعر أن كل شيء اليوم خاص بالعراق فقط
والشخص الاخر كان لي معه نفس السلام الحار ولكني لم اعرفه
قال بلوم :شنو ما عرفتني
بمجرد أن نطق تلك الراء التي يحاول اغفاء لثغتها بطريقة رجولية خالصة
قلت :عليييييييي
واعدنا مشهد السلام الذي كان باردا من جهتي
بعد تبادل الإخبار والأشواق وأنا أتكلم معهم وعيني على دجلة وهناك خجل داخلي من أن اقطع الحديث لاغترف من مائها العذب
ولكن همام التقطها قائلا :ادري شنو نحجي وياك وانته عينك على النهر
قلت بخجل :ابو خالد اني نذرت بس اوصل للعراق اجي اهنا قبل لا اروح لاهلي وأشرب من النهر
هسة من رخصتكم اروح اشرب من النهر
والله يخليكم فتحوا ماطور الماي
واسرعت الخطى وسط اعتراضاتهم
وقول علي لي :يمعودة تعال لا تروح تتمرض
رفعت صوتي قائلا :مراح اتمرض راح اطيب بس انته افتح الماطور
اتاني صوت همام :ياماطور راح يأذن المغرب
اسدرت نحوهم وصرخت :فتحوه والله ميت شوق لشوفة المي بالماطور
وبعدها اصبحت بقرب حبيبتي
اقتربت منها اكثر وانثنيت لاغترف من مائها واروي ضمئي ولكن هناك يد منعتني
رفعت نظري ووجدته ذلك الفلاح العجوز الذي كان يرعى ارض والدتي فيما مضى
بدأ السلام بصوت عميق يشبه عمق حضارة العراق
قال :اشلونك ابوي محمد الحمد الله على سلامتك
قلت بهدوء :هلا ابوسالم اشلونك صحتك احاولك
اجاب بأيمان :الحمد الله من الله بخير
وبعدها تبادلت السلام مع سالم
الذي عرض علي عرض جدا مغري عندما قال :تريد تشرب من النهر
قلت اي والله
اشارة الي حيث زورق الصيد الصغير الذي يمتلكه
وقال :تعالي خل اخذك بالبلم لنص النهر هناك الماي اطيب واعذب
قلت بلهفة :يلة يمعود شنو تنتظر
وبالفعل ركبنا البلم بعد أن ودعت ابوسالم ووعدته بلقاء اخر
وتوسطنا النهر ومددت يدي واغترفت منه عددت غرفات رويت بها شوقي
ورششت عددت رشات على وجهي
ازالت كل عناء السفر وألم الغربة من اعماقي
وعدت برفقة سالم الى ضفاف النهر واني كلي نشاط وحيوي
وجدت همام وخالد قد اعدوا وجبة العشاء
ويالة فرحتي عندما رأيت تلك السمكة تتوسط الحلقة واللهب يتراقص حولها بطرب يشبه طرب روحي
لم استطع الكلام فالمنظر كان رائع والتأثر داخلي عميق بقيت أتأمل هذه اللوحة التي افتقدها
نعم هناك مطاعم تعمل السمك المسقوف ولكنه في العراق مختلف
المنظر مختلف والطعم بالتأكيد مختلف
قطع علي تأملاتي صوت همام القائل :خل نصلي المغرب
ذهبنا للضوء بماء ماطور الماء ويالة روعة المنظر ويال شوقي له
توضيت بخشوع وأنا احمد الله على النعمة التي انا فيها
انا في وطني واتوضئ بنهر دجلة
واضع جبيني على ارضه و أؤدي صلاتي فيه
احمدك الاهي
أأمنا همام
وانتهت الصلاة
وتفرق همام وعلي وبقيت اصلي صلاة الشكر واحمد خالقي
توجهت الى حيث يجلسون
في لجة الشوق نسيت السائق
سألتهم عنه اجاب همام : حاولنة بيه يبقة على العشة بس هو ما قبل
قلت :ليش ما انتظرني مو أني متفق وياه يوصلني لاهلي
اجاب همام :هاي كل عقلك سيارتين ما ماليات عينك احنه نوصلك
والرجال راد ينطي الفلوس الزايدة عن اجرته واني ما خليته
قلت :زين سويت الرجال ما قصر وياه ما خليت مكان بغداد ما كتله وديني
اتخليت بغداد مثل قبل واني اكله وديني لفلان منطقة وفلان منطقة طلع الجسر المعلق مسدود والطرق المختصر صايرة اعمدة كونكريتية
اجاب علي :بس بغداد ريحته ترد الروح
قلت بصدق :اي والله بغداد اتحس كلبك ينشرح بيه
وبعدها قلت :اتعمدت اروح لبيتنة ورى صلاة العشاء لأن اعرف امي اتصلي وتقرة قرأن بين صلاة المغرب والعشاء وبعدها تكون فارغة
قلت بشوق :اريد استفرد بامي احس روحي بيه شوق مو طبيعي
اجاب همام :الله يساعدك
اضافت نيران السمك المسقوف دفئ لبرودة المكان الرائعة
برد العراق الجاف
اتذكر كلام ابي رحمه الله يقول برد العراق يضرب بالعظم
بالفعل برد قارص رائع
بدئنا نتناول العشاء وما أن رفعت السمكة حتى وضع مكانها ابريق شاي
قلت وأنا انظر للإبريق :يا يابه اشكد مشتاق لجاي على الجمر
والتفت الى علي وقلت :عاشت ايدك والله
اجاب بمرح :اكل اكل راح تبرد السمجة
وبدئنا الأحاديث التي لا تخلو منها مائدة خاصة ان كانت اجواء الألفة تلفها
قلت :همام انته ازوجت بعد المرحومة مو
اجاب بهدوء :اي ليش انته ما حضرت زواجي
قلت :لا بس قبل لا اسافر بفترة كنت اسمع امي تحجي عن زواجك من ست منى
اجاب :اي ازوجت خالة هذا التحفة
بأشارة الى علي
ليقول علي :مو صوجك صوج الي قنع خالته حتى تقبل بيك
دخلت بينهم وقلت بخبث :اكلك همام بعدهة حلوة
ليتفت همام ويتناول حجر ويقول :اكلك اكل ترة ترجع لاهلك مدمة
قلت بمرح :ما ادري ليش احجاية الحق ينزعل منه
قال :لأن مرات مخربطة تطلع
كانت ضحكاتنا انا وعلي ترن بالمكان وسط نظرات همام المؤنبة المرحة
التفت الى علي وقلت :انته مازوجت
رمقني بنظرة حتى وأن استطعت ان افسرها قررت أن لا ابالي بتفسري
وقلت :امبين من عيونك بعدك
وقلت بعدها :شوف علي اذا انته واذا زياد اثنينكم الكم معزة عندي
وصدكني الي يصير بينكم ما اله داعي
اجاب بهدوء :ماكو شي بينه زياد قرر يطلق منار وراح نرجع مثل قبل
صدمة
حقيقي صدمة
قلت بدهشة :ششنو راح يطلكه كل عقلك تحجي
اجاب بحدة :ليش عجيب واحد يطلك وحدة
اجبته بهدوء :علي شوف لو اخوي زياد مو خوش رجال كان اني ما قبلت بيه رجل لبنت خالي بس زياد والنعم بيه
اجاب :واني مو والنعم بية
قلت :لاوالله والنعم وثلاث تنعام بس ابو حسين الي راح راح وفدوة لعينك فكر بمصلحة اختك
فكر بالرابط الي راح يربط العائلتين فكر بأمي الي تريد من ريحتكم بيته
اجاب بهدوء :اذا تريد تخطب منار انته ما عندي مانع بس زياد لا
قلت بلوم :هذا حجي اطلك وازوج بكيفك والبنية متعرف شنو القصة شو مستسهل الامور زايد عن اللزوم
وبعدها قلت :اذا عندي خاطر عندك فكر بزواج زياد ومنار بشكل جدي
وعوف احقاد الماضي
حاول المقاطعة
ولكني قلت :علي مو زينة اختي بس اكلك اياه
ماكو وحدة بالدنيا تستاهل اشيل حقد لخاطرها والوث روحي بسموم الحقد
والله شنوا بنية ما صارت قسمتي واحقد على عددت اشخاص بسببها واحمل روحي ثقل الحقد ونفسي ذنب الحقد
زينة راحت اكو الف زينة تقبل بعلي لو علي فعلا يريد يفتح صفحة جديد
نهض علي ليرى ابريق الشاي ولكي يتهرب من هذا الحديث الذي يقتنع به ويرفض الاعتراف بالاقتناع
نظرت الى همام الذي قال :معليك بيه هو هاي الايام كلش متساهل مو مثل قبل
خاصة بعد الدورة لأن ماخذة كل وقته
قلت :يادورة
اجاب همام :صار عشرة ايام يروح لبغداد من الصبح على مود دورة حاسوب حتى يقدم للماجستير
قلت بفرح :اها الله يوفقه
ليقول بعدها همام :بهاي العشرة ايام هواي متغير وصفنة اتجيبه وصفنه اتوديه
هو يكول ارهاق واني اكول يفكر بوحدة
قلت بتمني :الله يسمع من حلكك هو لو يشيل زينة من راسه كان كل شي انتهى
اجاب :هو كبرهة براسه زايد عن اللزوم معيش نفسه بمأساة
قلت :هاي اني وانته انفكر هشكل بس هو ماخذه شغلة كرامة مو عشق وهيام
اجاب همام بأشارة من رأسه بمعنى نعم بعد أن اقترب علي من جلستنا وهو يحمل صينية الشاي بأكوابها
اثناء تناول الشاي اتصل همام بزياد ليخبره برغبته بزيارته
وبمجرد أن تصل به ازدادت دقات قلبي كعاشق وعدوه برؤية محبوبتته
وبدأت ارقب همام وعلي بدقة لكي ينتهوا من ارتشاف اكواب الشاي التي بدت لي كبيرة رغم صغر حجمها
انتبه همام لي وقال:يلة خل نروح الولد استو
هاكد ما مشتاق لأهلة
ليقول بعدها بمرح :خلص شوقه لدجلة النهر هسة اجه شوقه لدجلة الام
ركبنا السيارة وسط تعليقات همام وصمت علي و ضحكاتي التي تعقب تعليقات همام
وبدأت الرحلة القصيرة التي وجدتها طويلة
امي اخي اختي
أنا قادم
هل أنبأكم الهواء بوجودي ؟!!!!!!!!!!
&&&&&&&&&&&&&&&&&&&&&&&&&&&&&&&&&&
رميت القنبلة وانتظر العصف الذي يليها
منذ عشرة أيام وأنا أتقلب على جمر
فرصة حقيقية للزواج ومن من
من همام
اتتني على طبق من ذهب ولكن الحواجز عالية وقررت أن أعبرها وأن لم استطع العبور
قررت أن أحطمها
استعنت بأبنة خالتي لرسم الخطط ولكن كل الخطط لم تنفع ولم تأتي بنتيجة
اتصلت بهمام لكي أجد لديه حل
بدا شاردا متهربا مني
فقررت أن اجد حل واغتنم الفرصة
ذهبت الى زوجة اخي الكبير وقلت :ام ياسين اريدهة منج
اجابت بنخوة وهي ابنة الاصول العشائرية العريقة :ادليلي عيوني الج
وما كان امامي الى أن اخبرها بقصتي التي اخفتها العائلة تماما
لتقول بلوم :ليش سكتي انتي شنو ذنبج
اجبت بتأثر :ذني اني ابنية والبنية عار اذا صار بيهة الي صار بيه
اجابت :بس انتي شريفة والي صار بيج قدر رب العالمين ظلم يعاملوج مثل المضيعات شرفهن بالحرام
قلت لكي انهي هذا النقاش الذي لا يغير واقعا ً عشت فيه منذ اول شبابي :ام ياسين راح احجي بس ياريت اتسمعيني للنهاية
وبدأت بتأليف قصة جعلت همام البطل العاشق وأنا البطلة التي يهمها اهلها وسمعتهم
قلت :فد يوم اجاني اتصال من رقم غريب وعادي كتله اخوي غلطان انته
بس رجع اتصل ثاني يوم وكال اني عرفتج انتي سماهر بنت ابو هادي
حاولت اتوهة بس ما فاد
وبقى يتصل ويحجي على اببوي وكرمه واهلي واخلاقهم
والتفت لها وقلت بخجل حاولت ان يبدوا طبيعي :ام ياسين غصبن علي اتعلقت بيه
اجاب بخوف :سماهر وكفتي كلبي والله يذبحوج ويذبحوه اذا عرفوا اخوتج
قلت بخوف :اسمعيني للاخر
اجابت بأستسلام :كملي الله اليستر
اكملت قائلة :عرفت اسمه وعائلته وراد يتقدملي
وقلت بحسرة :وكتها مثل واحد ضربوه على راسه وصحوه من حلم حلووو
اشلون ازوج واني هذا وضعي
ويلحظة تهور قررت اصارحة واذا يريد يتأكد انطيه الأوراق الي انطتني ياه المستشفى وقتها
وضعت زوجة اخي يدها على رأسها وقالت :انفضحنه والله
قلت بحدة :ليش اني شنو مسويه حتى تكلين انفضحنة
انتي هسة تكلين اني مظلومة
ولأن ردت ازوج بالحلال واصارح الرجال الي اختاريته صرت فضيحة عليكم
قالت لتهدئتي :بس سماهر طريقتج غلط شلون أتأمنين تحجين هيج موضوع وي رجال غريب وبالتلفون حتى اذا ابن عائلة شنو ابن العائلة معصوم
قلت بحدة :بالله كلليلي شنو الطريقة الصح انكتم وما احجي وانتظر ابن الحلال الي مراح يجي لأن اخواني المحترمين معتبرين عار ولازم يندفن بالبيت
وكل ما واحد يتقدم يرفوضه من يمهم شنو اني مو بشر ما عندي احساس
وقلت بحدة :الغلط يتعالج بالغلط ام ياسين
قالت بأستسلام :سماهر حبيبتي اني اريد مصلحتج هسة انتي مو فكرتي بية واجيتي
وصارحتيني ليش ما فكرتي من البداية وصارحتني
اخوي سلمان راد يزوج على زوجته كان رشحتج اله وحجيت وياه الموضوع بطريقتي وقنعتة
على الاقل سلمان صايم مصلي حتى من راد يزوج على مرته مو بطر بس زوجته اجتهة حالة
نفسية من جابت اخر طفل الهة وصارت شبه مخبلة حتى متحس بوجوده
اجبتها :هذا الحجي ميفيد هسة اكو واقع اسمه همام الــــ يريد يخطبني
لطمت زوجة اخي على وجهها وقالت :همام ابو النسوان سماهر همام الي كل يوم وي وحدة شكل همام سماهر هاي تاليتج
قلت بثقة :أي همام وغير همام ما اريد وتاليتي اني اعرفه
شلون متصير احسن من وضعي بهذا الشكل
قالت :سماهر اذكري الله
قلت :لا أله الا الله
قالت بعدها :المطلوب شنو
قلت :تحجين وي ابو ياسين ودكليلية كل الي كلته
قالت :اني احجي بس انتي تعرفين اخوج يعني تتحملين الي راح يصير
قلت وأنا انهض :اي اتحمل
اجابت :سماهر راجعي نفسج
اجبت :صاري لي 17 سنة واني اراجع نفسي وطلعت بهاي النتيجة الى مراح اتراجع عنها
وغادرت المكان وسط نظرات زوجة اخي المعترضة
وها أنا انتظر اخي لكي يعطني المقسوم الذي لم يثنني عن قراري
ولكنه تأخر كان حديثي مع زوجة اخي قبل آذن الظهر صلينا العشاء ولم اجد لكلامي معها أي تأثير
هل نست ام تناست لكي تريح زوجها من المشاكل
لايهم هذه الخطوة الاولى أن لم تنفع توجهت الى اخي دون وسيط وليحدث ما يحدث
استلقيت على السرير التهي بقراءة بعض مجلات الموضة التي احرص على شرائها
واندمجت معها وقفزت من سريري برعب عندما اقتحم اخي غرفتي فجئه وامسك رأسي وجرني من شعري بشراسة
ودفع برأسي بقو نحو الحائط وهو يعربد قائلا :فضحتينة الله ياخذج اشلون اخلي عيني بعين همام
همام يا ******* همام يا******** همام الي فضحيته وي غيداء الـ******* على كل لسان
همام الي مزوج منى الي تسو راسج وراس كل وحدة مثلج وما صاينه وما مقدره
وبعدها قال بتصغير :يقدرج انتي الي سويت وياه علاقة من ورة اهلج وبالخفاء وفوكاها انتي وحدة ناقصة اتعرفين شنو ناقصة
ظلم السنين الذي تجسد امامي والاهانة التي عصفت بروحي افقدتني عقلي وقلت بحدة :همام اشرف منكم كلكم على الاقل قبل بوضعي مو مثلكم عاقبتوني على شي ما الي ذنب بيه
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك