رواية لو تنتثر احلامي برجع ارتبها -3
غانم: يعني ليش تعقدين الامور انتي ابي افهم
جواهر: لان مايصير اتصل عليها من تلفونك
سحبها غانم : اقول انثبري بس وهاج قالت مايصير
جواهر بخبث: بتخليني اتصل عليها من تلفون امي والا اهون وماروح وتروح عليك الروحه معاها!
غانم دزها: امشي قدامي يلا معقدههههه آآآوف منج
وجواهر ميته من الضحك على اخوها وهو معصب عليها ..
بوسلطان : هااا خااالد يبه بتروح العزبه معاي؟
خالد:لا يبه اسمح لي اليوم انا عندي اشغااال ولازم اخلصها
بوسلطان: توك جاي من السفر يايبه لازم ترتاح شلك بالشغل الحين
خالد: هههه بعد شنسوي عشان مايروح علينا كل شي بمر خالتي اسلم عليها وبطلع مع الشباب نخلص لنا كم شغله وبنتغدا وبنرد
بوسلطان وهو رايح للباب بيطلع: الله يحفظك يابوك ..
غانم كان طالع من صالتهم بيروح يركب السياره وبما ان بيتهم مقابل بيت جدهم بالضبط ومابينهم الا شارع شاف
جده الي كان ينزل العتب بشوي شوي بيركب السياره مع دريوله بيروح العزبه غانم: جواهر اركببي ورا دقيقه واجيج ... وراح بسرعه عند جده سلم عليه وقاله: يبه انت بروحك والا خالد معاك؟
الجد:لاوالله يابوك ماغير انا والسايق
غانم: بس حلوو خلك هنا ثواني بس اركب سيارتي واجيك بوديك معاي
الجد: يابوك يمكن عندك شغل والا شي
غانم: لاافا عليك جدي ولو عندي شغل أأجله عشانك دقايق انطرني هنا .... وراح بسرعه بيقطع الشارع وكانت جايه سياره مسرعه وفجأه ضرب بريك وهالشي الي خلا جواهر الي كانت تربط خيوط جوتيها ( الله يعزكم ) وصرخت : غاااااااااااااااانم ..
غانم الي حس انه استسلم فجأه وماقدر يتحرك من مكانه لما شاف السياره جايه مسرعه كان يشوف الموت جايه ولايقدر يرده الحمدلله ان السياره وقفت ومابينها وبينه الا شعره وتسويه هو والارض واحد .. نزل راعي السياره : سوري بابا انا مافي سووف
غانم من زود ماهو معصصصصصب كان ممكن يموت بسبب تهور هالهندي كفخه كف قوي على وجهه وصرخ عليه وهو ماسكه من جيبه يجرجره : شلوووون تسوق بهالسرعه بين البيوت ياحيوان
خالد الي جاي يركض بسرعه بعد ماسمع صوت البريك مسك غانم: غانم هد انت ....
التفت غانم بعصبيه لخالد: هالثور هذا كان بيذبحني .. لو شفته شلون يسوق بهالسرعه والله بغى يطحني وبكل وقااااااحه يقول سوري انا ماشفتك
وصل الجد لهم الي كان خايف : اسم الله عليك غانم الحمدلله ماصار لك شي ياولدي .. وهالهندي هذا خلاص خذا جزاه خله يروح ..
غانم: واخليه يروح عادي يبه؟؟؟؟ ممكن يعيدها ويذبح ناس غيري
خالد: غانم تكفى عشان خاطر جدي خله يولي ولاتسويلنا سوالف مع كفيله ..
غانم وهو بعده ماسك الهندي من قميصه بقوه التفت عليه وهزه بقوه وقال بحزم: شسم كفيلك؟؟؟؟
عطاه الهندي اسم الكفيل وطلب منه غانم العنوان بعد وعطاه الهندي وعقب دزه بقوه عالسياره وهو يهدده مايعيدها والا بيتصرف معاه بشكل ثاني .. ركب الهندي السياره وشخط من الخوف ...
خالد: الحمدلله على سلامتك غنوووم والله اني تخرعت من سمعت صوت البريك ..
غانم: هههه الله يسلمك يارجال والله انه خضني من الداخل قلت خلاص انا ميت ميت
خالد: هههه بعد عمر طويييل ان شاءالله .. الا على وين شكلك بتروح ها؟
غانم: أي والله بروح مع جدي والبنات العزبه
خالد: شنو شفتات يعني امس انا واليوم انت ههههه
غانم: ههههه حياك
خالد: ودي بس والله مشغول ..
غانم:شالي يشغلك لاتقول لي ربعك كفايه معاك فالغربه هههههه اعتذر منهم وتعااال
الجد : يلا ياغااانم تأخرنااا
غانم: ان شاءالله ان شاءالله يبه .. ها خويلد؟
خالد: خلاص عجل روح انت مع البنات وانا اخذ جدي واجي ... آآآ اييي الا على طاري البنات في شنطه فالصاله اظها حق وحده منهم خببرك جدتي ماتستخدم شنط هههههه
غانم: اييي يمكن شنطت جواهر تقول ناسيتها من امس .. خلاص جيبها معاك وعطها اياها هناك يلا وراح غانم لسيارته واطلعوا مروا البنات وراحوا العزبه ...
وخالد ضحك ناسيتها من امس هااا هههههه انا ارويج : يلا يبه تعال
الجد : جرجرتوني يمين يسار يمين يسار حددوا أي سياره
خالد: اسمحلي جدي ههههههه
فالعزبه كانوا قاعدين في بيت الشعر والجو باااارد وسوالف ويعلقون شوي على جدهم وهو يذكر لهم مواقفه القديمه ... خذت جواهر شنطتها وطلعت جوالها تشيك الا لقت هالابيات
اعتذرلك حبيبي على اللي صار
لحظه جفا مرت ماهي بقصد
الجزء الرآآبع ~
خالد ~
{ أحيـــان . . من شـدة الفرحـه معـگ / ودي ( أرسم ) للأرض فــم وأقول | اضـحــكي ~
جواهر ~
{ همّـن يطـاولنـي على فـكـة الــريــق .. كــنــه يغنــي لــي عسـى " منـت رايـق ! ~
~
كانوا قاعدين في بيت الشعر والجو باااارد وسوالف ويعلقون شوي على جدهم وهو يذكر لهم مواقفه القديمه ... خذت جواهر شنطتها وطلعت جوالها تشيك الا لقت هالابيات
اعتذرلك حبيبي على اللي صار
لحظه جفا مرت ماهي بقصد
استغربت ماتذكر ان عندها متصل بهالنك .. كتبت من؟
خالد كان قاعد جنب غانم وشوي يعلق معاهم وشوي يندمج في تلفونه اول ماوصله مسج جواهر ... ابتسم بخبث وكتب لها .. شوفيني على يمينج .. ارفعت عينها شافت غانم اخوها كان منمدج يشرح لهم موقفه الي صار له لفت بنظرها لخالد وشافته يشوفها وهو مبتسم انصدمممممت ماتعرف شتسوي .. احذفه والا شسوي فيييه .. اخااف اححذفه ويتكلم والا شي ويدرون انه عندي بيقولون لي شلون ضفتيه .. آآه أي صح شلون ضفته انا؟؟؟ ليكوون ..... معقوله فتش شنطتي وضاف نفسه عندي فاللسته؟؟ حست انها تغلللللي من الغيض
تضايق خالد ماوصله شي منها كتب لها ..
آدري بج الحين انتي معصبه علي
بس عطيني فرصه افهمج كل شي
وزادت غيض لما شافت كلامه .. اكتبت له ..
شتفهمنييييي؟؟؟ انت على بالك بطول عندي باللسته؟
رد عليها خالد متضايق ..
ليش؟ ليكون بتحذفيني؟
جواهر بعصبيه..
طبعا ومن غير تفكير
خالد..
اوكي بس ممكن اعرف ليش؟
جواهر..
ممكن اعرف ليش فتحت شنطتي وفتحت موبايلي وضفت نفسك عندي؟ الله اعلم ماخذيت رقمي بعد
حط له خالد ابتسامه
وكتب طايح من عينج لهالدرجه؟
انحرجت جواهر وحست انها هوست عليه .. سكرت المحادثه وقطت تلفونها بشنطتها وهي تحاول تحاشى تشوف خالد وحدها معصبه عليه وعلى حركته .. يسوي نفسه بريييء مب علي حركاااته هذي ...
ريم بخوف: اشوووا انه ضرب بريك والا كان هرسك هرس
غانم: ربج ستر
تماضر كانت خايفه على غانم .. الحمدلله الي احفظك وسلمك من هالحادث الي ماادري شكان بيصيرلنا اليوم
الجد: روح يبه توضى وصل لك ركعتين اشكر ربك واحمده الي سلمك
غانم يحب راس جده: ان شاءالله يبه .. والتفت لما شاف خالد الي كانت ضايقه فيه الدنيا شهالاسلوب الجاااف
آآآوف: على وين خويلد
خالد: مواعد الشباب وماقدر اتأخر كفايه امس أجلت كل شي
غانم: حسستني انك مهم لهالدرجه غيابك بيأثر على اشغالك ههههههه
ابتسم خالد : يلا فمان الله
حس فيه غانم بس ماحب يضايقه اكثر وقال: سلم لي على فهوود وقول له الوعد في مجلس بوعبدالله
خالد وهو يبتعد: ان شاءالله
التفت جواهر تشوفه وين يروح حسة بتأنيب الضمير .. لكن كابرت وفتحت شيلتها: آآآه اخيرا اقدر افتح شيلتي عن شعري واخلي الهوا يلعب به
في بيت ساره خالة خالد
كانت حصه منسدحه على سرير العنود: عنووده
العنود الي تشوف المجله وبيدها كوب كابتشينو : هلا
حصه: شرايج اليوم نزور جواهر وتماضر ونوره والبنات كلهم
العنود الي فرت صفحة المجله: عندج تلفون نوره اتصلي فيها اذا موجودين وفاضين ليش لا
حصه طلعت موبايلها واتصلت على نوره الي كانت هي الثانيه في غرفتها عالنت: يااامرحبااا
حصه: هلا وغلا نواره شخبارج؟
نوره: بخير حبيبتي عاش من سمع صوتج
حصه: عاشت اياامج شخبار رهوفي؟؟
التفت نوره على سرير بنتها الصغير وقالت: فديييتها نايمه الحين مثل الملاك
حصه: فديييت قلبها زين نواري .. انا وعنودي حدنا متمللين فقلت اكلمج اشوف فاضين اليوم والا بتروحون مكان قلنا نجيكم نتسلى معاكم ونشوف شخباركم
فرحت نوره: يااامرحبااا ومسهلا فيكم بأي وقت لا طبعا احنا على طول فاضين تعرفين الطلعات محرومه علينا الا للضروره هههههههه
ضحكت حصه وقالت: فديتج نونو خلاص خبري البنات واجتمعوا في أي بيت تبونا نجيكم؟
نوره: تعالوا لنا هني بيت عمي سلطان
حصه: خلاص صار .... وسكرت منها والتفت على اختها: جهزي عمرج بنروح لهم اليوم
حذفت عنود المجله: والله؟؟؟ ممم نزين شرايج نسوي سويت نوديه معانا؟
حصه: ليش لا يلا الحقيني المطبخ ...
فالطريق كان خالد يسوق ويسمع لمحمد عبده
لو التمني ينفع الي تمنى
ماكان صرت اليوم نفسي شقيه
اشوف كل مع حبيبه تهنى
وانا حبيب الروح صعب عليه
قلبي بحبك ياحبيبي تعنى
ارحم ياعل ايام عمرك هنيه
آآآه هالاغنيه عـالجرح .. فجأه رن تلفونه ورد: هلا فهود
فهد: وييييينك يااااخي لازم تنقعنا
خالد ببرود: جاي فهد مسافة الطريق بس
فهد: خالد شفيك؟
خالد: مافيني شي انت الي شفيك؟
فهد: علي هالحركات؟؟؟ قول لي خلود شفيك
خالد بضيق: فهد والي يرحم والديك سكر الحين ولاحق عالاسئله الي ماتخلص
سكر فهد من خالد وباله مشغول معاه .. مب عادتك خلود اذا كان هذا اسلوبه يعني متضايق
آآآخ اموت واعرف شالي مضايقك يارفيق عمري والله انه مايستحي ..
ردوا البنات من العزبه وكلن راح بيته الي يريح والي يتسبح
دخلت جواهر غرفتها احذفت شنطتها عالسرير وراحت على طول تسبحت ولبست بجامتها وجففت شعرها الطويل بهوا الاستشوار وخلته مفتوح شوي راحت على سريرها ... خذت تلفونها فتحته وشافت خالد فتحت
محادثته وتمت تشوف التلفون لفتره وعقب حطته عالكومدينا جنبها خذت شنطتها تشوفها .. طلعت بوكها كل شي مكانه خذت الدفتر قلبت اوراقه عالسريع وردته مكانه لمت شعرها وسحبت لاب توبها بتشبك النت ...
في بيت بوسلطان .. كانت الاجواء غير ام سلطان مب مصدقه ان واخيرا بوخالد بيلتفت لعمره شوي وبيتزوج وبيترك حياة العزابيه الي رد لها من 26 سنه !
كانت قاعده مع ولدها بالصاله تنتظر رده عليها عشان تتم الخطبه ..
بوخالد : أي يمه توكلي على الله
ام سلطان: الله يفرحني فيك ياولدي ..
بوخالد: بس هااا يمه عرس كبير وطقطقه ومادري شنو مابي
ام سلطان: ليش يابوخالد ..
بوخالد: قلتيها يمه بوخالد .. رجال شكبري وولدي على وشك الزواج تبيني اسوي عرس وصاله ومادري شنو .. انا مستعد اسوي لكم عشا حريم كبييير وفخم بس تنازلون عن عرس وطقطقه وقولي لهم هالشرط يمه
ام سلطان: بس يابوخالد البنت هذا اول عرسها
بوخالد: مب عشان اول عرس لها لازم تسوي عرس كبيييير وخساير مالها اول ولا تالي اهم شي التوفيق يمه واذا العرس بيفرحها مثل ماقلت لج مستعد اسوي لكم عشا حريم كبير وفخم وكل شي على ذوقها .. بعدين انا ناوي اسوي جدول حلو وناوي احجز لها اول 3 ايام من العرس في افخم فندق فالدوحه وبسفرها احلى البلدان بس عرس كبييير قلت لج لا .. وهذا شرطي الوحيد
ام سلطان: ان شاءالله ان شاءالله يابوخالد بقول لهم شرطك ..
قعد مع ربعه ونسى الي صار مستانس حده يسولف ويضحك معاكم يتحداهم وكل واحد يستلم الثاني
كانت قعده ولا احلى ..
انتبه فهد لخالد الي كان يسولف مع هذا ويضحك مع هذا , ابتسم اكيد نسى الي كان مكدر خاطره وماراح اساله اكثر عشان مااكدر خاطره زياده ..
دخل عليهم رفيقهم خليفه وهو معصب .. سأله واحد منا لشباب : شفيك معصب
خليفه وهو متنرفز قعد جنب خالد عالارض وهو يذف تلفونه قدامه: بعد شفيني هالنااااس خلوا فيني شي
اول امس متصل لي واحد يقول لي بكم بتبيع سيارتك؟ والحين توه مصكر من عندي واحد يقول لي بشتريها بالسعر الي تبيه
التفت خالد له وقال: زين وانت ليش معصب الحين؟؟ بيعها وفك عمرك منها
فهد: أي والله صاااج خويلد بيعها من اول مااحد يقول لك يبيها نفوسهم فيها شلك فيها الله يكفيك شرها
خليفه بعد ماعطاهم نظره قال: زين انا ماابي ابيعها سياارتي وتاعب عليها لين ماضبطتها يجون هم بارده مبرده ياخذونها؟؟؟
احمد: خلوووف بيعها بنفس السعر الي خسرت فيها
خليفه: عيل ببيعها بمليون!
ضحكوا الشباب عليه .. وقال فهد بأستخفاف: شدعووه يااااخي مليون مره وحده وهي ماتسوى ميتين حتى !
خليفه وهو يتسند على ورا: اييي قالوك سيارتك الحتره؟؟؟ عشان تقول لي ماتسوى ميتين !! شرايك انها مسيومه مني ب 300 الف ونص !!
خالد وهو يطبطب على ظهر خليفه: اااوب اووب مب هيييين والله ياخي بييييييييع
احمد: بيعها وفك نفسك شرها وعيون الناس فيها وعطني الفلوس اجيب لك احلى سياره
خليفه وهو مب راضي بالبيعه بس شيسوي امره لله قال: ببيع شسوي ...
الشباب : معوض خييير ياخليفه
من جهه ثانيه جواهر نست هي الثانيه الي صار وكملت يومها طبيعي ولاكأن شي صار واقعدوا يسولفون البنات مع عنود وحصه عن كل شي واتفقوا ان عالاقل يجتمعون معاهم كل اسبوعين مره عشان تقوا علاقتهم اكثر مع بعض لأنهم حبوا البنات واجد ...
وافقت هيا على بوخالد واملكوا وعطاها مهرها عشان تجهز عمرها في 3 شهور خلود وعبدالعزيز سافروا لأن عبدالعزيز عنده كورس في الامارات فحب ان ياخذ زوجته معاه .. تقدموا ناس لحصه وارفضتهم
لانها تحب خالد وعلى امل انها تاخذه وفي نفس الاسبوع تقدموا ناس حق جواهر كانت ممكن توافق لولا ان ابوها رفض لان مايبي بنته تطلع عن عايلتهم وهالشي الي خلا جواهر تضايق مب لانه ردهم لا لانها رافضه هالمبدأ .. بوخالد وخالد ولده بما ان لهم الدور الثاني كااامل لان الجد بو سلطان والجده ام سلطان مالهم الا غرفه وتحت بعد .. قرروا انهم يقسمون الطابق بينهم هم الاثنين قسم مكون من 3 غرف و3حمامات تكرمون وصاله حجمها حلو وفيها مطبخ تحضيري صغير ... و غرفتين وحمامين وصاله كبيره فيها مطبخ تحضيري حق خالد وزوجته مستقبلا عشان كذا شلون اغراض وانزلوا تحت لغرفة الضيوف وناموا فيها اثنينهم لين ماتخلص اقاسمهم فوق .. والباقي حياتهم مستقره مثل ماهي كل هالامور مرت في اسبوعين ...
انسدح خالد على ظهره عالسرير وهو يشوف سقف الغرفه : يبه
بوخالد الي كان يقرا كتاب: هلا ابوي
التفت خالد لأبوه: يبه .. اناا بغيت اتقدم لجواهر الحين
نزل بوخالد نظارته الطبيه وقال : خايف تضيع منك ههههههه
انحرج خالد: هههه الصراحه يبه أي انت شفت بعينك متقدمين لها ناس وزين ان عمي رفضهم
ابتسم بوخالد: لاني مكلمه اصلا وقايل له جواهر حق خالد
قعد خالد على حيله: كلمته؟؟؟؟
ابوه: ايي نعم ولو اني ماكلمته كان ممكن تضيع من يديك
حب خالد ابوه على راسه: الله يطول لي بعمرك يبه دااايما وانت تنقذني في الاوقات الحرجه ههههههه
بوخالد: ههههههههه الله يفرحني فيك ياخالد
ابتسم خالد وقال: آمييييين هههههههههه .. الا اقول يبه ليش ماتبي تسوي عرس كبير
بوخالد: يايبه مالي في هالسوالف العرس الكبير لك انت ان شاءالله
خالد: يعني يبه من كبرك انت الحين اكيد عرسك الاولي كان بسيط ههههههه لازم تعوض
بوخالد: هذاك عرس بسيط والله لو اعوضه بأعراس الدنيا كلها بعد مايتعوض ... سكت بوخالد سرحان وكأنه قاعد يتذكر تفاصيل العرس شلون كانت .. انسدح خالد على ظهره وقال: يبه كلمني عن تفاصيل عرسك شلون
شلون تقدمت لأمي الله يرحمها ودي اعرف والله ...
ابتسم بوخالد وهو حاس بغصه لأنه تذكر المرحومه وقال: لو ماخذيت امك ياخالد كان مادري شبيصير فيني
خالد يسمع بهدوء ويفكر في نفسه الحين .. شلون متعلق في جواهر بشكل يحس انه مايقدر يتخيل فكرة انها كانت بتكون لشخص غيره رغم قساوتها معاه واسلوبها الجااف الا انه متعلق فيها بشكل مب طبيعي .... كمل بوخالد يقول : كان على ايامنا الشباب يتزوجون بدري يعني 17 خلاص هو متزوج وممكن يكون عنده ولد بعد .. فكنت انتظر متى بس اوصل ال 17 عشان اتقدم لها بس ولما وصلت ل17 على طول كلمت اهلي عشان يخطبونها لي وهي طبعا وافقت وابتسم وعقب قال : وخلال شهر واحد بس تزوجنا .. سكت شوي عقب كمل : تخيل على هالنطره هذي كلها كل الي عشته معاها 9 شهور بس
خالد حس بغصه .. لوهله بس حس انه هو تسبب في وفاة امه وانه حرم ابوه من الانسانه الي يحبها وكان ينطرها لين ماخذاها ... قال : يبه هي كانت مريضه لما جابتني او فيها شي؟؟
بوخالد: لا مافيها الا العافيه .. الليله الي قبل ماتجيبك فيها قالت لي دير بالك على الي في بطني اذا ولد ابيه ياخذ اعلومك واذا بنت ابيها عند امي نوره ( الجده ) عاد انا ياخالد مانتبهت ان هذي وصااايه منها وكأنها حاسه انها بتروح .. ابتسم خالد يحس عيونه متروسه دموع وحمد ربه ان الليت مبند ومافي الا اضاءة ابجوره خفيفه ورا ابوه وقال : الله يرحمها .. ياليتها عايشه الحين عشان تخطب لي انت وياها وتستعدون لعرسي انتوا الاثنين
بوخالد حس بكلمات خالد ولده مثل السهم الي خرق قلبه وتم ينزف ماكان يبي كلام مثل هالكلام يطلع من خالد
ماكان يبي يحسسه بهالشي بس ماباليد حيله قال لانه حاس بحزن ولده الي انحرم من شوفة امه ومن حنانها : بس تأكد ياولدي انها الحين فرحانه لك
ابتسم خالد وقال: الله يفرحها بالجنه .. يلا يبه انا بنام شوي باقي ساعه عالصلاه ...
انسدح خالد على جنبه اليمين وعطا ابوه ظهره وهو حاس انه محتااج لأمه الي ماعاش معاها ولا يعرفها الا بالصور بس !!
وترك ابوه الي حس الدنيا ضاقت فيه وهو حاس بضيقة ولده وبنفس الوقت اشتااق لأم خالد ..
اليـوم الثاني
كان يوم الجمعه وبعد الصلاه يجتمعون كلهم في بيت جدهم
كانوا ريم وتماضر يساعدون نوره فالمطبخ وشوي وتدخل عليهم جواهر تساعدهم .. والحريم قاعدين بالصاله والجد وعياله وعيال عياله قاعدين فالمجلس ..
ريم الي كانت تقطع السلطه مع جواهر: بنات بعد مانتغدا ونخلص خل نقول حق عمي محمد يروينا قسمه فوق
نوره: تو الناس ريمي للحين باقي له
ريم: أي بس نشوف المخطط خخخخخخ
تماضر: ويروينا قسم خالد بعد
ريم: خلود مسويله بعد
نوره الي كانت تغسل الصحون : اييي على وشك الزواج وابتسمت وهي تشوف جواهر الي كانت منمدجه فالتطيع ولابهتمه شيقولون ..
دخل عليهم غانم فجأه تغطوا ريم ونوره وتماضر بسرعه خشوا شعورهم .. التفت جواهر: غنووم قول لنا قبل عشان يتغطون البنات
غانم انحرج: هههه سوري والله على بالي بس الخدامات
تماضر دقات قلبها زادت بقوه صاير احلى اليوم شفيه ... ابتسم لها غانم كأنه يسمعها وقال: شخبارج؟
تماضر وخدودها مورده: بخير الله يسلمك .. انت شخبارك؟
غانم بحب: بخير دامج بخير
ريم: بس تسأل عنهااااا واحنا؟؟؟
التفت لها غانم وقال: وانتي شخبارج .. نوره شخبارج؟
ريم + نوره: بخير الحمدلله ...
نوره: هاا تبون الغدا؟
غانم: حدنا ميتين جوع
نوره: خمس دقايق ويجهز
التفت غانم على تماضر وقال: سوي لنا عصير باااارد يبرد علينا ...
سااااحت تماضر من الاحراج وضربتها جواهر بكوعها بقوه : بسسسس لحد يصير فيه شي قومي سوي العصير يلاااا
التفت لها تماضر: يالدفشه وخري عني ... قامت تماضر وجهزت عدة العصير وجواهر وريم يضحكون عليها
بصوت واطي عشان لاتنتبه ..
وجهزوا كل شي وراحوا نوره وتماضر داخل بيتسبحون وبيلبسون جلابياتهم الي جايبينها معهم عشان يبدلون .. وتموا ريم وجواهر فالمطبخ يرتبون السلطه في صحون واستأذنت عقب ريم وراحت .. وقعدت تشرف جواهر عالخدامات وتوها بتطلع الا انتبهت للي كان واقف عند الباب يشوفها قالت بتوتر : ماتعرف تطق الباب؟
خالد بأبتسامه: طقيت بس محد سمعني .. لفت عنه جواهر وحطت جيك العصير في صينيه ومعاه القلاصات
تنهد خالد وقرب منها وقال: جهزي عمرج اليوم انا بخطبج من عمي .. وخذا صينية السلطه وراح المجلس
تجمدت جواهر مكانها ودها تلتفت له تقول لاتتعب وعمرك لاني مابيك ... لكنه راح ولسانها تحس انه انشل عن الكلام مره وحده نزلت دموعها على خدها وراحت بتطلع الا غانم اخوها في وجها: افاااا جوجو تبكي؟؟؟
شفيج؟؟؟ ليش كل هالدموع ها؟
جواهر تسمح دموعها: أي دموع هذي بسبة البصل تعرف عيني حساسه ههههههه
غانم شك فالجواب وتركها دخل المطبخ ياخذ الصحون الباقيه .. اما جواهر كملت طريقها ودخلت من الباب الي ورا على طول على غرفة الضيوف ورمت بنفسها عالسرير عقب قامت سكرت الباب دشت الحمام بتغسل وجهها وطلعت قعدت عالسرير شافت كتاب لاتحزن لعايض القرني .. شسالفه كتاب واشوف من شوي فالحمام اغراض !!! التفت تشوف الغرفه الكومدينا الثاني عليه 3 موبايلات وسماعات تلفون وبوك قربت منهم كانت بتشوف بوك من بس ماقدرت تفتحه لاشعوريا فتحت الدرج وحطت فيه البوك والتلفونات وسماعاتهم داخل الدرج وصكته ... وطلعت الا لقت ريم فالممر : جوجوو شتسويين في هالغرفه؟
جواهر: ماشي كنت اغسل وجهي ليش؟
ريم: هذي غرفة عمي محمد وخالد نازلن فيها لين ماتخلص غرفهم فوق
جواهر حست كأن احد كات ماي بارد عليها .. انصدمت بس ماحبت تبين شي لريم قالت: ادررري بس رحت غرفة جدتي لقيت توته تسبح فالحمـام قلت اجي اغسل وجهي هني لين ماتخلص ...
خلتها ريم وراحت الصاله وراحت جواهر بسسرعه لغرفة جدتها عن لحد يشوفها ... لقت تماضر تمشط شعرها الي يوصل لنص ظهرها : نعيما ياحلوه
تماضر: الله ينعم عليج .. يلا لاتطولين علينا تراني ميته جوع
ولمت شعرها وخذت شيلتها وطلعت ...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك