رواية لو تنتثر احلامي برجع ارتبها -4
خلتها ريم وراحت الصاله وراحت جواهر بسسرعه لغرفة جدتها عن لحد يشوفها ... لقت تماضر تمشط شعرها الي يوصل لنص ظهرها : نعيما ياحلوه
تماضر: الله ينعم عليج .. يلا لاتطولين علينا تراني ميته جوع
ولمت شعرها وخذت شيلتها وطلعت ...
سلطان ( بومحمد) الدنيا مب واسعته من الفرحه : هذي الساعه المباركه ياولدي ياخالد ابوك كلمني قبل
وقلت له ان البنت لك
ابتسم خالد وقال: بس يبه شوفوا البنت شرايها؟
غانم: هذا شي معروف من سنين وهي ماتكلمت معناته ان ماعندها مانع
ابتسم خالد والتفت لعمه الي قال: بس انا ملزوم اخذ رايها ياولدي مايصير بعد هذا شي يدخل فالذمه
محمد: عدل كلامك يبه وانا الحين اشوفها وارد لكم ..
خالد: لااا وين يامحمد مب الحين اسألها لما تردون وخلوها على راحتها اذا سألتها الحين يمكن تنحرج وترد البيت او شي
سلطان: خلاص ياولدي فليل بنرد لك خبر ..
قام خالد وحب راس عمه: عسى عمرك طويل ياعمي ... دقيقه بس وارد لكم طلع خالد في حوش المجلس وطلع تلفونه على طووول اتصل بفهد: فهوووووووووووود
فهد: بسم الله صرقعتني شفيك
خالد: كلمت عمي من شوي وهو موافق ومستانس بس بيشوف راي البنت وبيرد لي خبر الليله
فهد: ايييي من قدك خويلد بعد لو توافق عليك بتصير الفرحه فرحتين هاا هههههه
خالد: بتوافق ان شاءالله .. نزين فهود انا اليوم عازمك وقول حق عبود وباقي الشله لاني مب فاضي اكلمهم
فهد: امححححق عزيمه بس ليش ماتكلمهم حضرتك وتعزمهم او عالاقل مسج انت وين والسنع وين
خالد: احترم نفسك فهيدان انا اعرف السنع والاصول ولاني اعرفففه ماقدر اطول معاك اكثر بروح اقعد مع عمامي وابوي وجدي .. اقلب وجهك ههههههه
فهد: هين ياخويلد ان ماخليت الفاتوره دبببلااااات بتشوف ههههههههههه
سكر خالد التلفون في وجه فهد ودخل المجلس بابتسامه عرييضه مرسومه على وجهه ..
التفت جواهر ورا ابوها شافت اخوانها غانم ومحمد وامها قاعده عالكنبه الي جنبهم .. كانت منحرررررجه حدها وفي نفس الوقت تحس برجفه خوف وغضب في نفس الوقت تضااايقت شالي يبي يوصله خالد
يعني الا يخرب علي حياااتي .. طولت ماردت على ابوها والكل ينتظر ردة فعلها أبوها كان كله أمل انها بترد بالموافقـه .. توها بتكلم بترفففففضه الا ابوها قال : انا ادري انج مب مخيبه املي وامل اخوانج وامج فيج
من وانتي صغيره واحنا متخيلين ان خالد يكون زوج لج لان هو الي بيحفظج وبيعزج وبضمن انه بيحفظج ويصونج ...
تكلمت جواهر بتردد : بس يبه انا ... سكتت شوي تشوف نظراتهم لها قالت وهي منزله راسها : انا موافقه
فرح ابوها والتفت يشوف فرحة اخوانها وامها بهالخبر وقرب من بنته وضمها وقال: الله يوفقج يابنتي تأكدي اني الحين ارتحت واني فرحان لج
دمعت عيون جواهر .. يعني عشان هالشي انتوا بتفرحون بتفرحون على حسابي انا يبه آآآه مكتوب لي مكتوووب .. بس دام هالشي يفرحكم انا اوافق غصب عني ... ودعست وجهها في حضن ابوها تبكي
كانت ضايعه بعالمها بين افكارها افكار تروح وافكار تجي واهلها حواليها فرحانين والكل كان يعلق عليها
وصل الخبر لخالد الي من الفرحه مب قادر يسيطر على مشاعره كان يتمشى في هالجو الحلو على الكورنيش
بأبتسامه حلوه مافارقت محياه والله لأخليج اسعد انسانه بالدنيا ياجواهر والله لأفرحج الله يجمعني بج على خير مب مصدق انها بتصير لي قريب آآآه شعور حلو والله طلع تلفونه من مخباه وكتب لها في البيبي ماسنجر
من ذيك المره ماكتبت لج شي عالبيبي لاني توقعت بتحذفيني
من الحين اقولج مبروك عليج انا وتأكدي انج معاي بتعيشين في سعاده
وارسله لها ... في لحظه كانت جواهر على سريرها فاتحه اللاب توب قدامها ومالها خلق لشي لما وصلها مسج البيبي ماسنجر فتحته وشافته شكاتب واحذفت التلفون وفتحت الماسنجر وقعدت شوي تسولف مع البنات لين ما نامت ..
اليوم الثاني السبت العصر كان غانم واقف في الصاله يسلم على امه وجواهر اخته لانه بيروح دخان خلصت اجازه ..
وبيرد لدوامه الي اسبوع دوام اسبوع اجازه .. ام محمد: الله يحفظك ياوليدي ماوصيك على الطريق عن السرعه
غانم: يمه انتي ماتملين من هالكلام حفظته والله حفظته يعني صار لين سنتين رايح جاي على هالطريق صار مثل شرب الماي عندي والحمدلله انا راكد بسواقتي مب مثل هالمطفوقين
جواهر: الله يحفظك غنوومي وكلمني كل يوم عشان اعطيك الاخبار اول بأول وغمزت له ...
ابتسم غانم بخبث وقال: اكيييد والا لولا الاخبار ماخسرت نفسي وكلمتج
عصبت جواهر : اووكككيييي شوف الي يقولك شي
غمز لها غانم: فديييت جوجو انا ...
ابتسمت جواهر لانها فهمت شيقصد وقالت: افدااك ياخوي ... سلم عليهم وطلع
اقعدت ام محمد: الله يحفظه حبيبي الحين اسبوع مب شايفته
قعدت جواهر: يمه انتي كل اسبوع دوام له تقولين هالكلام المفروض تعودين
ام محمد: الام ماتصبر من شوفة عيالها بكره لي جاج الضنى بتعرفين ... وراحت المطبخ
قعدت جواهر عالكرسي ..: هذا اذا فكرت اجيب عيال منه ...
مرت الايام
تملك خالد جواهر ومن تملكها وهو يحس انه مب سايعته الدنيا وربعه من وناسته كانوا فرحانين له وكل يوم عازمينه في مكان وطلعات معاه والمتزوجين كانوا يعطونه من خبراتهم اما جواهر كانت عكسه كل ماتستانس يذكرونها فيه او يجيبون طاريه لها وترد تضايق مره ثانيه وتعبت وهي تمثل قدامهم انها فرحانه انها بتاخذه ومازالت تمثل .. حصه درت بملكة خالد وانهارت تبكي وهالشي الي خوف امها الي ماكانت تدري عن حب حصه لخالد الا لما شرحت لها حصه بأنهيار كل شي وانقعتها امها انه مب من نصيبها
ومع مرور الايام بدت تقتنع وتتقبل الفكره لكن مازال قلبها متعلق فيه من وهي صغيره تحبه ولاعلمت احد الا لما كبرت قالت لاختها العنود بس وهو ولايدري عن هوا دارها هايم في حب جواهر بنت عمه وكان يكافح لجل يوصل لها وهذا هو وصل وهو اليوم اسعد انسان بالدنيا ...
كملت فرحته وهو يدخل يزف ابوه لزوجته الجديده ( هيا ) الي كانت لابسه فستان عروس اوف وايت ناااعم فيه قصات حلوه ضيق لين تحت وبعدين وسيع وطرحه كلها شغل فخم وراقي رافعه شعرها كله فوق مع بف كبيره ومسكتها كانت ورد اوف وايت حتى كوشتها كانت ناعمه وراقيه جدا .. دخل بوخالد وخالد معاه بابتسامه حلوه كان شكله حلو وكان يحاول بعينه يدور جواهر يبي يشوفها من زماان ماشافها لاكنها كانت متغطيه وقاعده ورا ماكانت تبي حتى تشوفه .. الا لما سمعت تعليقات البنات الي حواليها : ياااي من هالحلو الي مع المعرس؟
الثانيه: اظن هذا ولده ..
وحده ثانيه: ماشاءالله ماكن هاي ابوه وهاي الولد كنهم اخوان
... ايييي ..... ياييي شوفوا ياحلاااته ينن ..... وخري شوي خليني اشوووفه ... تهقون متزوج؟؟؟؟؟؟
اذا متزوج الله يهنيه وااذا لا الله يجعله من نصيبي ... يالهبله قردني هيوووه صارت مرت ابوه واكيد لها راي .... صج انتي تفكيرج جنغل هههههههههههه
ابتسمت جواهر بسخريه على هالتعليقات والتفت تشوف عمها الي كان مستانس صور مع ولده كم صوره
وعقب طلع خالد وقبل مايطلع شاف جدته وسلم عليها وعلى خالته .. وحصه كانت واقفه بعيد مع عنود اختها ودمعت عينها .. عنود: حصه حبيبتي خلاص انسييه بيجيج الي احسن منه
حصه: انا مابي غيره ياعنود تعرفين شنو احبه صعب علي اشوف وحده تاخذه مني
العنود توترت مب عارفه شتقول لها .. هي عارفه ان اختها تموووت فيه تعشقه وكانت طول عمرها تتخيله لها فجأه تنصدم انه يبي بنت عمه وهو يحبها ! قالت لها بهدوء: تعالي خلينا نقول لأمي بنروح البيت
جواهر بعصبيه : آآآآوف ماطيقه ياااربي اكرهه
تماضر بصوت واطي عشان محد يسمعها: شفيييج انتي احمدي ربج تقدم لج واحد مثله رجال وشهم والف من يتمناه
جواهر قطت عمرها عالسرير: يروح يختاره له من هالالف الي يتمنونه شحقه جايني
تماضر: صج انتي الكلام معاج ضاايع سكري الحين بنام وبكره اتصل فيج
جواهر والدمعه في عينها: تكفين توته انا متضايقه حدي احس هالعرس ماراح اتهنى فيه
تماضر: ياجواهر ياحبيبتي كلنا نشوف انه الانسب لج وغير هذا وين بتلقين الي يحبج ويعزج ويقدرج
وفوق هذا كله ولد عمج وتعرفينه زين
جواهر والعبره خانقتها: وانا هذا الي ذابحني .. لاني اعرفه زين واعرف شخصيته عدل واعرف انه مايصلح لي ..
تماضر: اطلب منج طلب؟
جواهر: آمري
تماضر: مايامر عليج ظالم .. سكري الحين وروحي توضي وصلي لج ركعتين ادعي فيهم ان الله يبعد هالافكار من بالج ويريحج ويصخرج له ويصخره لج ويجمع بينكم بخير .. واستعدي بكره العصر بمرج انا وامي بنروح السوق تشترين لج كم غرض تخلصين فيهم نفسج ترى ماباقي الا شهرين بس
مسحت جواهر دمعتها وسحبت عمرها للحمام توضت وصلت ودعت ربها وناامت ...
توعى بوخالد الصبح على صوت هيا الي كانت تقعده بهدوء .. ولما فتح عينه شاف وجه المبتسم
قالت: صباح الخير يابوخالد .. وابتسمت له ابتسامه حلوه
رد لها نفس الابتسامه وقال وفي عينه النوم .. : صباح النور ياعمري ...
قام من النوم اخذ له شور يتنشط وطلع لقا هيا مجهزه له الفوطه في يدها عطته اياها وراحت تجهز له
ثوب وغتره وعقال وازرة مع قلم حلو حق الدوام .. وفتحت الدرج الي تحت واختارت له ساعه اقنر الجديده
وطلعت من الغرفه على مطبخها التحضيري من أول ماخذاها وهي الي كل يوم تقوم بدري عشان تجهز له ريوقه وتسبح وترتب شكلها وعقب تقعده من النوم رتبت الصحون عالطاوله وطلع لها بوخالد وعلى وجه ابتسامة رضى : الله لايحرمني منج ياهيا .. والله غيرتي حياتي صار في الي يهتم فيني ويجهز لي ههههه
حياة العزوبيه كانت صعبه بالنسبه لي خصوصا مع الكبر
ابتسمت هيا وقالت: توك شباب يابوخالد الفرق بسيط بينك وبين خالد ولدك ..
بوخالد: بعد تعرفين قضيت عمري شايل هالبيت كله عن ابوي وامي وفوق هذا كله اربي لي ولد ..
هيا : ونعم التربيه يابوخالد ربيت لك رجال
ضحك بوخالد بهدوء وهو يشرب عصير وقال: بعد عمري والله .. اربي عيالج ان شاءالله
انحرجت هيا وتوردت خدودها وراحت داخل تجهز العود عشان يتدخن ... ابتسم بوخالد وكمل ريوقه وطلع ..
تحت كان خالد مع جده وجدته يسولفون ويضحكون على تعليقات خالد .. وشوي يعصبون عليه لانه
مرات يزودها
الجد: الا بغيت اسألك ياخالد انت كلمت راعي الخيام؟؟
خالد: أي يبه كلمته وامس دفعت له العربون
الجد: قول له نفس المكان الي كان فيه عرس محمد ولد عمك ماشاءالله براحه زينه وواضح مكانها
خالد: ابشر يبه العصر بمره وبتفق معاه على كل شي لاني بروح بخلص لي كم شغله مره وحده وبروح اشيك على بيتي بعد
الجده ام سلطان: الله يفرحني فيك ياوليدي متى بيجي ذاك اليوم بس
ابتسم خالد وقال: قريب يمه قريب ان شاءالله .. ووقف : يلا تامروني بشي .. مابي اتأخر عالدوام
فالسياره كان محمد وزوجته نوره الساعه 10 الصبح يتمشون على كورنيش الدوحه بسيارتهم ويسولفون يضحكون وهم مستمتعين بهالجو الحلو .. نوره بدلع : الحين لو رهوفه معانا مب احسن
محمد بضحك يبي يغايضها: خليها عنج غلطتنا الوحيده ان استعجلنا وجبناها ماستانسنا في أول سنه في حياتنا مع بعض هههههه
نوره التفت على محمد: محممممد احمد ربك شفيييك .. الناس يتمنون يجونهم عيال وانت تقول غلطتنا جبناها عندك اكبر مثال عزيزان اخوي الله يعطيه ان شاءالله .. بعدين فديتها رهوفه شمسويه والله انها عسل مااستحمل غيابها عني بس غصب شسوي
محمد : ههههههههه شفيج عصبتي نواري ياااحياااتي انتي .. اكيد الحمدلله والشكر له مليون مره على هالنعمه امزح معاج وعزوز الله بيعطيه ان شاءالله وبيترس البيت كله صغار بعد شتبين ههههههه
صرخت نوره بخوف : محمــد شوي شوي ................ فتحت عينها بثقل تتفحص المكان حواليها تبي تستوعب هي وين بالضبط .. راسها يعورهاا بشكل مب طبيعي وتحس بآالام في جسمها كامل ردت غمضت عينها وغابت عن الوعـي ...
ام محمد ابتلشت مع رهف الصغيره الي مب راضيه تسكت .. : يابنتي شسوي فيييج .. شلتها وقامت تمشي فيها تبي تسكت لكن مافي فايده ..
جات جواهر بسرعه حق امها لانها كانت فالمطبخ الداخلي وسمعت صوت رهف تصيح جاتهم تركض ..
هاتيها يمه انا اعرف لها ... خذتها من امها وتمت تسكتها بشوي شوي وهي تصيح .. لين عقب هدت شوي وتمت جواهر واقف والبنت في يدها .. وتتمشى بها فالبيت وتكلمها كأنها تكلم وحده كبيره والبنت صااخه وتسمعها .. نزل غانم من الدرج مستعجل وشكله متوتر .. وقفت ام محمد بخوف: غانم شفيك يبه؟؟؟
غانم ماكان يسمع حد كلش كان خايف ودقات قلبه سريعه .. فتح باب الصاله وطلع بدون مايرد على امه الي تركها مكانها محترقه وقلبها مب مطمن .. : لا اله الا الله الله يهديك ياوليدي .. خذت تلفونها اتصلت فيها مايرد .. رد ياغانم رد ..
جواهر قربت من امها : يمه شفيه؟؟
ام محمد بخوف: يابنتي مادري عنه طلع مستعجل اكلمه ومايرد علي والحين اتصل فيه ومايرد بعد .. كلميه فديتج يمكن يرد عليج ... نزلت جواهر رهف في مفرشها بهدووء لانها نايمه وطلعت موبايلها واتصلت في غانم الي مارد عليها .. خافت مب عارفه شتسوي ... التفت على امها بخوف: آآآ يمه.. اتصلتي في ابوي؟؟
ام محمد: يابنتي يمكن ابوج مايدري عن شي واخرعه ...
تمت جواهر في مكانها مب عارفه شتسوي .. فجأه طرى على بالها خالد .. هذا وقتك والحمدلله اني ماحذفتك
اكتبت له في ماسنجر البلاكبيري ..
خالد شصاير؟ غنوم طلع من البيت شكله مايبشر بالخير نكلمه مايرد علينا نتصل فيه مايرد علينا
تكفى قول شصاير امي بتموت من الخوف عليه
خالد الي كان يسوق بسرعه جنونيه .. ماقدر يرد لين ماوصل المستشفى حط تلفونه بمخباه بدون مايشوف من الي كتب له ودخل بسرعه من قسم الطواري ولقى غانم فالممر وعمه سلطان خالد بخوف: ها شصار؟؟
الجزء الـ خ ـآآآمس ~
خالد ~
{ حتى لو زادت عيوبك تبقى آغلى حب ~
جواهر ~
{ الصبــر مالي آنا الآ الصبــر ~
~
خالد الي كان يسوق بسرعه جنونيه .. ماقدر يرد لين ماوصل المستشفى حط تلفونه بمخباه بدون مايشوف من الي كتب له ودخل بسرعه من قسم الطواري ولقى غانم فالممر وعمه سلطان خالد بخوف: ها شصار؟؟
غانم : محمد الحمدلله بخير فيه كسر بيده ورضوض بصدره حطوه مسكن ونايم الحين ...
خالد بخوف: ونوره؟؟؟
غانم: مادري الدكتور الحين عندها داخل ...
وقف معاهم خالد بخوف وعقب تذكر تلفونه طلعه وشاف الي كاتبته جواهر ورد عليها ..
بقولج بس امانه ماتقولين حق امج الا لين مانتأكد من كل شي
ردت عليه جواهر بسرعه
اوكي
كتب لها
محمد ونوره صار لهم حادث .. محمد بخير بس في شوية رضوض وكسر باليد ونوره الحين الدكتور عندها داخل ولما يطلع اقولج شقال
نزلت جواهر التلفون في حظنها بشوي شوي تحس بيغمى عليها .. تحس ودها تصيح ماتعرف شتسوي كانت يدها ترتجف بخفيف تبي توقف تروح غرفتها فوق بس مب قادره .. ماكانت تبي تبين حق امها شي تنهدت بتوتر وخوف وهي تقول : لا اله الا الله ..
ام محمد الي على نار: حد رد عليج يمه؟؟
جواهر بتوتر: لا يمه للحين ..
فالمستشفى كان يمشي بخطوات كلها خوف خايف على بنته وزوجها .. في كل خطوه يخطيها كان يذكر الله فيها ويطلب ان الله يطمن قلبه عليهم ...
عبدالله ( بوعبدالعزيز ) الي هو ابو نوره وهو خايف .. : ها ياخوي بشر شقالوا؟؟
سلطان وباين عليه التعب والخوف : محمد بخير اما نوره للحين عندها الدكتور ياخوي
تنهد بوعبدالعزيز : لا حول ولاقوة الا بالله العلي العظيم .. شوي ويطلع الدكتور ووقف قدامه بوعبدالعزيز على طول .. : بشر دكتور ان شاءالله نوره بخير؟
الدكتور بأبتسامه مطمنه: لا تطمن ان شاءالله بخير بس الضربه كانت قويه شوي وكسرت لها ضلعين هذا بالاضافه الى ان جسمها في رضوض وعالوجه شوي .. وهذا كله بيروح ان شاءالله حتى الكسر بينجبر
بس يبيله وقت ..
بوعبدالعزيز وقلبه يتقطع على بنته : لا اله الا الله .. اقدر اشوفها دكتور؟
الدكتور: طبعا وفتح له الباب : تفضل
رد خالد لتلفونه وكتب لجواهر ..
ابشرج نوره بخير بس شوية رضوض وكسر ضلعين وان شاءالله بتشفى قريب
دخلوا كلهم على محمد الي توعى .. بومحمد: الحمدلله على سلامتك يامحمد
محمد بتعب: الله يسلمك يبه .... شافهم كلهم وعقب قال بتعب : وين نوره؟؟ ......... شلونها هي بخير؟
التفت غانم لخالد وعقب قرب من اخوه وقال: نوره بخير يامحمد تطمن ..
محمد وهو يحاول يقوم من السرير: وينها بروح آشوفها
غانم الي حاول انه يمنع محمد مسكه من كتفه بشوي شوي وقال: لالا وين تروح وهذي حالتك ارتاح انت هي الحين مبنجه ..
محمد بتعب شديييد: بس ابي اشوفها
سلطان ( بو محمد ) : بتشوفها ان شاءالله ياولدي استريح انت ..
خالد يراقبهم بهدوووء قعد جنب عمه يشوف غانم الي كان يساعد محمد في انه يرد لنفس الوضعيه الي كان عليها ...
شوي شوي ويتسرب الخبر لين مادرا الكل .. وامتلا المكان بقرايبهم الي على طول اول مادروا جاوا يتحمدون لهم بالسلامه .. تماضر طول الطريق عيونها مليانه دموع وامها كانت تبكي بخوف على بنتها
وصلوا المستشفى .. ودخلوا وكانت خطواتهم سريعه وتماضر تمشي وتلفت من ورا الغشوه على الغرف تشوف اختها .. لين مالقت غانم فالممر وراحت بسرعه هي وامها .. ام عبدالعزيز: غانم يبه .. وين نوره؟
غانم الي كان سرحان التفت لها على طول وقال: هلا هلا عمتي .. حياج انا اوديج لغرفة نوره
وراحوا وراه لين الغرفه ودخلت امها واختها تماضر ... وقفت امها قريب من السرير والدموع ماليه عينها: ياحبيبتي يانوره ... وتمت تصيح بكتمه عشان ماتقومها ..
اما تماضر حطت يدها فمها مب مستوعبه ان الي قدامها عالسرير هي اختها نوره كان شكلها تعبااان
وفي وجها كدمات بنفسجيه ... كانت تنزل دموعها مب حاسه فيها وتشوف امها الي قلبها تقطع على شكل بنتها كانت تمسح على يدها بالخفيف وهي تشوف واير المغذي في يدها الثانيه ودها تحسس وجها مكان الكدمات بس ماتقدر تخاف تعورها .. دخل عليهم بوعبدالعزيز وشافهم عندها .. وقال : بس يا ام عبدالعزيز مب زين .. نوره ان شاءالله بخير وقريب بترد لبيتها ان شاءالله الدكتور بنفسه مطمني عليها وقايل بس يبيلها وقت
التفت تماضر وعيونها حمر من البكي : يبه هي بتطول على هالحال؟؟؟
بوعبدالعزيز يحضن بنته قال: أي ياحبيبتي يعني يبيلها وقت لين ينجبر الكسر وتخف الكدمات وتروح
.. يلا الحين قوموا معاي نمر بيت سلطان ناخذ الصغيره تودونها معاكم البيت بتقعد عندنا لين ماتطلع امها بالسلامه ..
العنود بخوف : شنو؟؟
ساره امها: أي والله يابنتي اليوم متصله فيني خالتي ام سلطان وقالت لي .. جهزوا عمركم بكره الصبح بنروح المستشفى وقولي حق اختج ..
العنود : ان شاءالله يمه .. وراحت بسرعه غرفة حصه اختها الي كانت تقرا كتاب : حصييص مادريتي؟؟
حصه : شنو؟؟ شصاير؟؟
العنود وهي تنط على سرير حصه قالت: تعرفين محمد اخوه جواهر ومرته نوره؟؟
حصه حست بغصه من جابت طاري جواهر قالت : أي؟؟
العنود: صار لهم حادث اليوم والحين هم فالمستشفى
حصه بخوف: عساهم سالمين؟؟؟
العنود: كسور ورضوض بس .. اتوقع محمد يومين ويطلع بس يقولون نوره شوي مطوله مسكينه
حصه: فديييتها عاد نوره ماتستغني عن بنتها ولابنتها تصبر عنها .. الله يشفيها يارب ويردها لبيتها بالسلامه
العنود: آمين .. نزين تقولج امي جهزي عمرج بكره بنروح المستشفى
حصه: ان شاءالله ...
طلعت العنود وتركت حصه اختها الي ضمة رجلها لنفسها .. تذكرت خالد اكيد بكره بتلتقيه معاه فالمستشفى
رمشت عينها وسمحت لدمعه خانتها ونزلت .. انا ليش للحين افكر فيه صار انسان متزوج ليش افكر فيه ...
انفضت راسها تبي تبعد هالافكار من راسها واسندت ظهرها وردت الافكار من جديد لراسها .. !
دخل خالد الصاله لقا هيا قاعده كانت تتعبث في جوالها وقفت لما دخل خالد وقربت منه: هلا خالد .. ها شخبار نوره ومحمد؟؟
خالد وباين عليه التعب : اهلين .. الحمدلله بخير محمد الدكتور بكره بيرخصه اما نوره مسكينه شكلها مطوله
هيا بخوف: ليش عسى ماهي تعبانه؟؟
خالد: لا بس عشان الكسر والكدمات بس تخف تقدر تطلع .. الله يقومها بالسلامه
هيا : امين يارب .. زين وبنتها مسكينه من بيمسكها؟؟
خالد: اكيد امها والا اختها .. والا يمكن يخلونها عند جواهر
هيا: فديتها رهف .. الله يرد لها امها بالسلامه .. نزين تعشيت؟
خالد بتعب: لا والله على ريوقي الي من الصبح .. في شي اكله؟
هيا: أي مجهزه لك ولابوك عشا .. ابوك تعشا وراح لغرفة المكتب شوي وقلت انزل تحت اشوفك لين تجي عشان احط لك عشاك ..
خالد بأحراج: تسلمين لي والله .. الله يخليج
هيا بابتسامه: ولو .. على ماتبدل لبسك بيكون جاهز ..
دخل خالد غرفته واخذ له شور سريع وطلع جسمه متكسر من التعب ووقفة المستشفى .. نشف شعره ومشطه كله على ورا ولبس جلابيه البيت وطلع الصاله لقى الاكل جاهز قدامه ... واستأذنت منه هيا وراحت غرفتها فوق عند زوجها
اكل خالد شوي بس عشان يسد الجوع وغسل ومن زود التعب انسدح على الكرسي الي بالصاله ونام ..
لين ماطلع الصبح وتوعوا جده وجدته جده كان بغرفته داخل بيجهز عشان يطلع بيروح المستشفى اما جدته بتروح المستشفى بعدين مع هيا لما تخلص ... طلعت الجده للصاله ولمحت خالد الي كان منسدح عالكرسي وغرقاان في نومه قربت منه وبهدوء طبطبت عليه وهي توعيه : خالد يبه ..
خالد الي من زود التعب ماكان يحس بشي حوله فمارد عليها .. ضغطت الجده اكثر عليها وهي توعيه بصوت شوي اعلى : خالد .... خــالد
خالد بتعب: همممممم
ام سلطان: يلا يبه قووم صارت الساعه 8 قوم تسبح واخلص وروح المستشفى مع جدك
فتح خالد عينه بتعب شديد وهو يقول: شلون راحت علي نومه هنااا؟؟؟؟؟ آآآوف
ام سلطان: معليه ياولدي يلا روح داخل اسبح والبس وتعال تريق مع جدك عشان تروح معاه ..
قام خالد من مكانه وراح داخل اخذ له شور وطلع لبس له ثوب وغتره وعقال وطلع لقى جده بالصاله وفي يده فنجال القهوه يتقهوى .. : ها خالد بتروح معي؟
خالد وهو يقعد جنبه: أي انا الي بوديك يبه .. جاهز؟
بوسلطان: وهو يحط الفنجال في الصينيه: أي ... تريق انت
خالد: لا مااشتهي ... ووقف على حيله واشر لجده وهو يقول: يلا بجيب السياره عند الباب ..
فالمستشفى كان خالد واقف عند جده الي قاعد على كرسي وغانم واقف مقابلهم عالباب وبومحمد قاعد بالاستراحه مع بوخالد وبوعبدالعزيز طلعت الجد من عند محمد والا ساره خالة خالد وبناتها توهم جايين
حصه شافت خالد وهو يسلم على خالته وعقب التفت عالبنات يسلم عليهم من بعيد .. وقلبها يدق بقوه راح خالد يمشي قدامهم مع خالته الي كانت تسأله عن نوره ومحمد وبناتها وراهم وحصه معاااهم بس بجسد وروحها في عالم ثاني عالم مافي الا خالد وبس , فجأه تذكرت ان خالد مب لها خلااص صار لوحده ثانيه لما شافت
جواهر قاعده على كرسي قدام غرفة نوره ومعاها تماضر .. قرب خالد من جواهر يسألها عن نوره وهالشي الي خلا حصه تغيض اكثر ودها تمنعه لايقرب منها بس ماتقدر مب من حقها .. خالد: شلونها الحين نوره؟
جواهر تحاشى نظراته : الحمدلله بخير توها واعيه الحين وطلع من عندها الدكتور يقول في تحسن
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك