رواية ملامح الحزن العتيق -5
في مطعم يامال الشام وقريب من كورنيش البحر الاحمر ..
مستحيه ..
وخايفه .
على كثر ماتمنت قرب خالد بليلة حالمة وشاعرية مثل هذي الا انها كارهه الوضع وتتمنى تفز وترجع للبيت ..
قلق مشاري عليها خوفها وخرب عليها يومها كله ..
بلع خالد لقمته بصعوبة وشرب من كاس البيبسي اللي قدامه وهو يطالع فيها
قال : وش دعوة مستحية ..؟ يالله كلي تراني خالد اللي كل يوم يكلمك ويسولف معاك .
طالعته ياكل بارتياح وهو ابعد مايكون عن الشاعريه والجو الحلو واحساسه بوجودها ..!
تذكرت وجه مشاري اللي يحمل تعابير القلق والخوف الحقيقي ..
قالت بخوف : خالد بنرجع .
بلع لقمته بصعوبة وهو يقول :الله يلعنك يامشاري وين نغصت عليّ هه ..
رمى الشوكه من يده وطلع المصاصة من الكاس وشرب البيبسي جرعه وحده ..
دق جوالها وشافت اسم مشاري يزين الشاشة وابتسمت ..
" لازم ارد تطمنه انها بخير ومو مثل ماتوقع "
مد يده ومسك يدها قبل لاتفتح الزر الاخضر قال : طلبتك وعشان خاطري لاتردين عليه ..
: بسس ...
قاطعها وهو مكشر : انا ادري انه مشاري خليه يتعلم ان الوقت هذا خاص بيني وبينك محد له دخل فيه .
: خالد الله يخليك يكفي انه زعلان من خرجتنا مع بعض مايصير اطنشه .
: واذا قلت عشان خاطري ..
لوت فمها وبضيق تركت الجوال اللي الح عليها ودق اكثر من خمس مرات ورى بعض ..
تدري ان مشاري يغلي ومو مطمن ..
وتدري انها زادت قهره قهر ..
سحب جوالها وقفله نهائي .. وعلى شفايفه ابتسامة نصر ..
ابتسم لها قال : سارة تعشي ..!
: ها ... ؟ ممم خلاص شبعت .
: وش اللي شبعتي .. انتي مااكلتي شي حتى تشبعين .
ابتسمت له من ورى قلبها وهي تهز رجلها بتوتر وقلق ..
قالت : ماعليه خالد خلنا نرجع للبيت الله يخليك .
طالع بالساعه واعترض بتكشيرة و: لا سارة بتزعليني منك .. الحين اللي يشوفك مايقول هذي اللي دايما تترجاني وكل شوي تقول تعال تعال .
غمضت بقلق وعدم ارتياح قالت : خالد ماعليه مرة ثانية الايام جاية . بعدين لاتنسى زواجنا خلاص ماباقي عليه شي .
وقفت قالت : بروح اغسل على بال ماتحاسب ..
وقف ومد يده عليها قال : اجلسي بس خمس دقايق وش مستعجلة عليه .
واضطرت انها تذعن لأمره وجلست ..
اخذ جواله ووجهه عليها قال : القمر ليه كذا مكشر ؟
رفعت حاجبها باستغراب ..
لأول مرة خالد يجي على لسانه كلمة غزل ..
انصدمت وهي تطالع بجواله موجهه عليها ويحاول يوزنه على وجهها
: خالد اش قاعد تسوي ؟
: بصور زوجتي فيها شي ... بالله ابتسمي وشيلي هالتكشيرة .
: من جدك ولاتمزح ؟
: لا من جدي مافيها شي اذا اخذت صورة زوجتي معاي .. ابي انام عليها واصبح عليها .
غطت وجهها ووقفت قالت : لو سمحت خلنا نمشي .
: تعالي هنا ... وش فيك زعلتي ..؟
اخذت شنطتها وهي تغلي من الغضب قالت بعصبيه : المفروض انك انت اللي تحرص ان صوري ماتدخل الجوال مو تحطها بيدك .
: وش فيها اذا دخلت الجوال ..؟ ترى هذا جهازي وماراح ابيعه تطمني ولا يمسكه احد غيري ..
فتحت جوالها وعلى طول دق وفتحت الخط على طول : ايوه مشاري هلا والله ..
تنفس مشاري بعمق قال : ليه ماتردين وليه قفلتي الجوال ..؟
: اذا رجعت اقول لك .؟
: سوى لك شي هالوسخ .
: مشاري الحين انا نازلة .. وهمست : تطمن محد يقدر يسوي لي شي وانا اخت مشاري .
تنهد من قلب وبارتياح قال : زين يالله انزلي بسرعه انا برا .
نزلت على بال مايحاسب خالد ولحقها يجري ..
: سارة انتظري دقيقه .. آسف يابنت الحلال .. والله آسف .
: خلاص خالد انا برجع مع مشاري .
مسك يدها قال : تعالي تعالي انا اللي بوصلك مثل ماجبتك لاتنسين اني عطيت ابوك كلمة .
: لا خالد ...
قاطعها : خلاص ياسارة والله آسف اركبي بس معاي .
اضطرت انها تركب سيارته وتتفادى انتباه الناس وعيونهم اللي انغرزت على يده وهي ماسكه معصمها ..
دقت على مشاري قالت : هلا مشاري ماعليه برجع مع خالد للبيت ارجع انت .
: اووووووف .. زين انا وراكم .
: اوكي .
التفتت عليه قالت : بيمشي ورانا لاتسرع اوكي .
تنفس بضيق قال : ياذا مشاري اللي علني من الحين هذا وانا مملك خالص .. اجل وشلون لو انا ماملكنا للحين وش بيسوي .. الحين هو ليه مايبي يفهم انك زووووجتي ياعالم زوجتي وداخل بيني وبينها وكأني ارتكب حرام اذا شفتها ولا قعدت معاها ..
: خالد انت تدري ان ماباقي الا كم شهر واصير زوجتك وفي بيتك يعني محد بيحاسبك على شي بس الحين انا في بيت ابوي ومحد يضمن الدنيا ومشاري معاه حق يخاف عليّ ..
قاطعها : يخاف عليك مني .. وش بسوي لك انا ..؟
: يعني اقل شي من كلام الناس اللي مايرحم ..
: الله يعينك ياخالد طلعت الاخت اخس من الاخو .
: خاااالد
اطبق الصمت على جو السيارة لحد ماوصلوا بيت ابو مشاري ..
نزلت سارة ودخلت البيت وهي في اشد حالات ضيقها .
اما مشاري فجلس في سيارته وهو يتأملها تدخل ومشيتها السريعه تدل على غضبها ...
محد فاهمه ولحد يبغى يفهمه ..
سارة ماتصلح لخالد ولا هو يصلح لها ..
حط راسه على الطارة . .
الدنيا ضايقه فيه ..
بس خلاص .. اليوم راح يحط النقط على الحروف وينهي الموضوع ..
ومصلحتها فوق كل اعتبار ...
سواء صدمتها ولا نفسيتها ولا حياتها بعد كذا واسم مطلقه اللي راح يلازمها لأجلٍ غير مسمى ..!
لو خالد يتوب كان غفرنا وسامحنا ونسينا بس المشكله انه يتمادى يوم عن يوم وسمعته صارت في الحضيض وهو يعتبر متزوج وبعد فترة قصيرة المفروض يدخل بزوجته ...
شغل سيارته وكأنه لو هرب من المكان هذا راح يهرب من التفكير والموضوع كله ..
لف من ورى بيتهم يبي يمسك طريق يودي للمسجد .. لعله اذا قرأ قرآن تهدا نفسه ويدله ربي على الطريق الصحيح الأخف ضرر سواء على سارة ولا امه وابوه ..
اخذ بريك ووقف فجأة بين البيوت ..
هاله المنظر اللي قدامه ..
ماتردد لحظة وحده انه ينزل من السيارة ..
وراح يجري بسرعته كلها ..
وكأن شياطين الأنس والجن اجتمعت قدامه وراح يهجم عليها ويبديها عن بكرة ابيها ..!
اول ماوصله هجم عليه كالأسد مو ناقصه الا الزئير ثم يفترسه بيدينه ورجوله وأسنانه ..
وجه لوجه خالد لكمات عديده .. وضرب في كل مكان قدرت يدينه تطوله ..
ورفسه برجوله بهستيريا ..
مسكه من حلق ثوبه ووقفه ودفه لحد ماثبته على جدار بيت جارهم ابو عدنان .
تكلم خالد وهو مخنوق ونفسه يضيق : م م مشاري بتذبحني .
دمعت عيونه من وجع الموت اللي دنى وقرب بسبب قضبة يد مشاري على حلقه ..
التفت مشاري على عدنان اللي في يده خمسين ريال قال : ارم الفلوس اللي في يدك على الارض ويالله روح على البيت .
تكلم عدنان اللي عمره مايتجاوز 12 سنه وهو يرتجف خوف من مشاري المجنون ..
قال : انا مالي صلاح ..هادي فلوسو اداني هيا وقال انو بكرة حيجيب لي هدية لأنو يحبني .. وكمان قال لاتقول لاحد ..
بثورة مجنون وهيجان غيور على دينه واهله وجيرانه صفعه مشاري على وجهه اكثر ووجه له لكمات مجنونة اقوى ، صعب ان خالد يقدر يقاومها او يردها ..
يمكن تشفي شي قهره من يوم شافه في شقة اخته مع ولد الحارس الافغاني ..
: ياوسخ ماتخاف ربك .. ياواطي تهز عرش ربي جهاراً نهاراً ..
يادنيء .. ياسافل .. ماخذ اختي ليه وانت شاذ تدور الأطفال واشباهك .
تقريباً فش شي من غليله بعد نص ساعه من الضرب المتواصل ولولا حضور ابوه بعد ماناداه عدنان وانقذ خالد منه ولا كان استمر للفجر او لحد مايسكت خالد ويصير جثه هامده ..
: مشاري مجنون انت تسوي بالرجال كذا ..؟ المفروض انا وديناه المستشفى مو نخليه يركب سيارته بهالحال .. الرجال يمكن يموت بسببك .
مسح العرق المتصبب من وجهه بمنديل قال : ماتدري يبه وش مسوي .
رمى ابوه العقال بشماغه على الكنبة ..
قال : علمني سوى شي لاختك ..؟
: لا يبه ماسوى لها شي ..؟ بسسس
: بس ايش بتتكلم ولا لا .
خلاص ماعاد فيها ..
اول كان يداري ويحاول يمهد للموضوع حتى مايرتفع السكر عند ابوه وتصير مضاعفات .. وكان يمهد للموضوع بطريقه احسن من كذا ..
بس اليوم ماعاد فيها أي تردد ..!
حكى مشاري لابوه السالفه ..
وبداية شكوكه ..
وحكاية ولد الحارس وكلام اصحاب خالد عنه وان له باع طويل في الوباء هذا ..
رمى ابو مشاري نفسه على الكنبة باحباط وقهر ..
حط راسه بين يدينه وزفر بآهة موجعه ..
قال بخيبة واحباط : طالما هذا طريقه اش يبغى في بنات الناس .
: يبه خالد ماخطب سارة الا بعد ماتحدى مع واحد من اصحابي لمن قال اني بلغت الهيئة عن رقم السيارة اللي خطفوا اصحابها الولد من الدانوب .. تتذكره ..؟
: ايوه اتذكر .. بس اش دخلك انت بانتقام خالد ..
: هذولا اصحاب خالد .. والمفروض انه معاهم .. ماعرفت بالموضوع هذا الا من احمد صاحبي لمن عرف انه ملك على سارة .
كانت المصيبة عظيمة على الأب والاخ .. ومالها أي تعبير ووصف .
رد ابوه بأسى : لا اله الا الله .. كل هذا يطلع منك ياخالد . والله ان اهله من احسن الناس وابوه انسان فيه خير ويسكن في المسجد اكثر من سكنه في بيته .
: ابتلاء يبه عسى الله يعافينا .
: الله يهديه ويستر على عيال المسلمين . اسمع ياولدي .. كلم سارة امراً مو طلباً انها تقطع مكالماته بدءاً من هذي اللحظة . وطلاقها راح يتم لو على قص رقبتي .
: ابشر يبه .. بس ترى سارة ....
قاطعه ابوه بتفهم : لاتشيل هم سارة .. الايام تعلمها وابن آدم معرض للمشاكل والمصايب .. خلها تاخذ درس في الحياة وتتعب شوي ولا تتعب طول عمرها .
: زين يبه متى بتكلم اهله حتى يطلق سارة .
ضغط ابو مشاري بيدينه على وجهه
قال : خل الامور تهدى الحين .. وان شاء الله مايتم هالزواج ..! الخوف ان خالد يشتكي عليك . ولايفكر ينتقم منك .
: ماراح يشتكي لأنه بيفضح نفسه .. وانا متوكل على ربي لاتخاف عليّ .
***
يوم ثاني ..!
الجو اليوم في جمس ابو بدر غير عن جيمس
بوسعد ...
هناك اميرة ومشاكلها ،
نادية وخوفها ،
وفاطمه ونصايحها ،
ونورة وتعبها وتأوهاتها بين فترة وفترة ،
وسارة ونومها ..
اما الجو هنا ركووود والكل نايم .. كل شوي خلود اللي راميه غطاها من بدري تقوم وتتمطط وتشوف الطريق وساعتها وترجع تناام .
تذكرت انها بتروح لمكان جديد وغريب ..
وجه المديرة نوف وعبوسها ونظراتها لها ..
تذكرت سااارة انها اليوم مو معاها ..
فعلاً وحيدة وغريبة ومالها بهالدنيا حظ ..
وكأن الحظ يمشي بعكس اتجاهها ..
بس خيط الامل ماانقطع وهي تمني نفسها بعمانها واهلها اللي بيوقفون معاها ضد الزمن ..
اخيرا طلع النور وقدرت تشوف القرى اللي يمرون فيها قريه ورى قريه ..
قرية العدل ..
قرية السلام بعدها بمسافه قصيرة ..
وصلوا لقرية السبيل ..
تمنت لو بكيفها وبيدها وتنزل هنا وتروح عند زميلاتها .
قرية عين المها ..قد ايش حلو هالاسم ..
بس خسارة مافيها الا كم بيت وينعدون على الأصابع والغنم فيها اكثر من الناس .
يوم مشرق جديد بس الشمس مختفيه من اول ماقربوا من القرى النائية عن جده ومكه والطايف ..
كل مااقتربوا من القرى القريبة من السبيل والاجواد والجو يزداد جمال وفتنه واغراء ..
الغيوم في السماء ملبده ..
ورذاذ المطر يقطر على السيارة بشكل آسر ..
والمناطق هنا اغلبها فضاء واسع الأشجار وبعض الأعشاب اللي اتلفتها الحيوانات بأكلها .. تزين المكان خاصة انه تشعر من شافها في هالجو بأنها ترقص فرح بالمطر .. ومتأهبه لاستقباله ..!
طالعت في خلود الغرقانه بنومها قالت : خلود .. خلود اصحي شوفي المنظر ..
حركت خلود راسها وهي راسمه على وجهها علامات تدل على الانزعاج وتعكير النوم والمزاج ..
ففضلت شادن انها تتركها تكمل نومها ..
تكلمت سهام قالت : ترى القرى هذي اجواءها حلوة زي اجواء الطايف . اسأليني انا اللي لي سنه وهذي السنة الثانية هنا .. كل فترة وفترة تجي امطار وبكميات كبيرة لدرجة انا نضطر نغيب بالايام حتى مانغرق في السيول .
ردت شادن بفرح غيّر لها مودها اللي قبل شوي : الله يعني بنشوف امطار زي الخلق والناس مو زي امطار جده اللي مانشوفها الا في السنه حسنه على قولتهم ..!!!
ضحكت جواهر قالت : شكلك محبوسة في جده .
: الا اروح لمكه والطايف والمدينه بس مااطول وماقد صادفت امطار الا مرة وحده بالطايف .
: طيب ماقد رحتي للجنوب هناك الامطار شبه يومي .
ردت عليها وهي تتأمل المناطق اللي تقطعها السيارة بسرعه متوسطه : ادري بس ماصارت فرصه اروح هناك ..
تنفست سهام بعمق قالت : بنات تشمون ريحة المطر ..
: فتحت شادن الشباك اللي بجنبها واستنشقت ريح الخزامى والعشب الاخضر وهي مبلله بالرش الخفيف قالت بفرح ونفسية متجدده : نفسي اتمشى هنا ..
ردت سهام المولعه بالمناظر الطبيعيه وريحة المطر : ياليت ابو بدر يوقف هنا .
اما ابو بدر فما كان معاهم .. ذهنه مشغول في المطر لو زاد عن كذا ...
والأفضل انه يرجع اليوم بدري ولا يجلس وينتظر الوضع يمكن المطر يبقى على حاله هذا مجرد رش خفيف لحد مايطلعون ..!
همه كان اكبر من التأمل والتمشيات والاستمتاع بالجو والمنظر ..!!
.. اخيرا وصلوا لقريه الأجواد ..
دقايق وكانت في المدرسه تطبق عبايتها بعد ماوقعت على حضورها ورجعت للغرفه مع البنات زميلاتها ...
في الطابور ..!
المديرة هنا عكس ابلا سميحه .. متجهمه وشرسة من نظراتها ..
ممكن تكون متكبرة وممكن مغرورة وممكن مقهورة من شي وانعكس على تصرفاتها ..
عيونها تقول انها مقهورة وعندها مشكله وتعاني ..
قربت من شادن قالت : بكرة مناوبتك انتي ونوير .
هزت راسها شادن بحاضر وسكتت احتراماً لقوانين الاذاعه والانصات لها .
اخيراً خلص الطابور .
الطالبات دخلوا فصولهن والمدرسات اللي توجهت لفصلها وحصتها الاولى واللي راحت لغرفة المدرسات بانتظار وقت حصتها .
دخلت شادن غرفة المدرسات قالت نوير اللي تجمع دفاتر الطالبات من درج مكتبها : ها ياشادن عسى المدرسة اعجبتك .؟
ابتسمت شادن قالت لها بمحبة واخوة : والله يانوير لسه مااقدر احكم من اول يوم .. يعني تقريبا تشبه مدرسة السبيل بس المديرة فرق كبير الله يذكر ابلا سميحه بالخير ..
ضحكت نوير قالت : ذكرتيني بسارة صاحبتك .. ياليتها معانا كان يصير الجو غير .
: عاد سارة مافيه منها الله يسعدها ..
: آمين يالله حبيبتي عن اذنك انا بروح لفصلي اشوفك في الفسحه ان شاء الله .
: موفقه يارب .
طلعت نوير ودخلت خلود وعيونها منفخه من النوم ونفسها تكمل لولا ان عندها حصة اولى وقواعد تبغى لها تركيز ونشاط ..
قالت بسرعه : شادن الله يخليك صبي لي كوب نسكافيه باخذه معاي للفصل .
: حرام عليك بتاخذين معاك النسكافيه تشهين البنات فيهم .
: والله ..؟ شايفه كذا ..؟
: ايوه مساكين حرام تشهينهم بالريحه .
جلست خلود على الارض قالت : اجل صبي لي بشرب لو رشفتين عشان النوم يروح مني احسني لو اغمض نمت وانا واقفه .
صبت لها شادن نسكافيه من الترمس ومدته عليها قالت : خلود متى فاضية ..؟
: مممممم الرابعه والسادسه بس ..
: الله يعينك
: احنا مدرسات العربي نهلك مو زي التاريخ والجغرافيا ..
: ماعليك مديرتكم ماخلتني على التاريخ والجغرافيا ..
: ليه ..؟
: اعطتني فنية سنة اولى وثاني وثالث .
صرت خلود عيونها قالت : لئيمة . قبل فترة موزعتها بين البنات وماعليهن ضغط ولا شي .
: يالله الله يعين هذي البداية .
: ماعليك بكرة تتعودين عليها .. اوووه تأخرت على البنات والدرس اليوم طويل .. يالله اشوفك شدون .
قطعوا عليها دلال وجواهر وحدتها وقرروا يطلعون في الساحه المكشوفه واللي مايحجبها عن السما ستار او حاجز ..!
اخذوا معاهم القهوة والحلا اللي جابتها خلود وسهام خاصة ان الجو لايفوّت والبنات هنا متعودات على كسر بعض القوانين اذا فيها جو مثل هذا وتغيير للنفسية .!!
***
متحطمه ونفسيتها سيئة لابعد الحدود ..
الى الآن عاجزة تستوعب اللي قاله ابوها لها .
" خالد مايصلح لك ولا ينفعك .. وهي كلمة وحده ياسارة .. مكالمات مافيه وتفكير بخالد انسي ..! "
اخذت الجوال اللي كانت مقفلته من يومين عصيبة مرت عليها وفتحته ..!
يومين ماسمعت صوته والشوق انهكها ..
بالرغم انها المفروض تزعل منه لحركته الا انها سامحته وماتقدر تزعل منه ..
واختلقت له العذر انه خلاص تأسف منها وماكان قاصد زعلها ..
ضمت على الجوال بيدها ..
بداخلها رغبة عارمة انها تتجاوز قوانين ابوها الصارمة بنظرها ..
وتسمع صوته ..!
ضغطت على رقمه بيد طفل خايف من عقاب امه وابوه ..!
دق مرة ومرتين وثلاث وأخيراً انفتح الخط ..
وصلها صوته تعبان .. بـ : الوو نعم ..؟
هو صدق ولا تحلم ..؟
طالعت بالشاشه ..
لا لا صدق الخط مفتوح وسمعته ..
تجاهلت لهجته الحاده والجلفه وسمحت لنفسها بالاستمتاع بصوته وبس ..
حطته على اذنها من جديد وجلست بارتياح عكس قبل ثواني .
همست بخوف وفرح : خاالد .
: ايه خالد وش بغيتي ..؟
: ها ..؟ اش فيك ..؟ تعبان ..؟ ليه صوتك كذا ..؟
: يعني ماتدرين وش فيني ..؟
قالت باحباط ودمعتها بعينها : اكيد ابوي قال لك لاتكلمها .
: ابوك قال لك شي عني .
: لا .
عرف انها ماتدري وش صار بينهم قال : انا كنت تعبان اليومين اللي راحت وحسبتك تدرين .
و بلهفة وخوف : سلامتك حبيبي .. ماتشوف شر .
: الله يسلمك . سارة .
: هلا حبيبي .
: صحيح مشاري هو اللي حشى راس ابوك عليّ ومنعك تكلميني لكن اللي ابيك تعرفينه ان مشاري له غرض من تفريقنا وانك ماتكلميني .
: ها ..؟ لا خالد انت فاهم غلط ..
: اجل وش اللي مو فاهمه .
قالت بكذب محبوك : ابوي يقول لاتتمادين بالمكالمات معاه قبل الزواج . اذا اخذك كلموا بعض على كيفكم .
: اها .. يعني مشاري ماله علاقه .
تذكرت وجه مشاري لو سمعها .. او شافها وهي تكلمه ..
صحيح انها ماارتكبت حرام خالد زوجها شرعاً وقانوناً بس قرار ابوها واخوها ان هالزواج ايام وراح يتفكك وكلٍ يروح في حال سبيله .
حست بتأنيب الضمير والخوف بدا يتسلل لقلبها لمن خطر على بالها غضبه وقهره ونظرة الألم اللي بعيونه اذا عرف انها تكلمه ..
قالت بخوف : طيب خالد انا مضطرة اقفل الحين بعدين ادق عليك .
: اها .. طيب .. على كيفك ياسارة .. خلي مشاري ينفعك ترى انتي الخسرانه .
: خالد اش قاعد تقول وليه كلامك كذا .. ؟
: والله انا عارف مشاري ليه حاقد عليّ .. بس ماابي اقول لك حتى مااخلي صورة اخوك تهتز قدامك .
: مشاري ..؟
: ايه .. المهم مو مشغوله انتي .. يالله يالله مع السلامه .
قفل على طول وهي ورمت الجوال بجنبها ..
وبعقلها ملايين الأسئلة معقول خالد ماسك شي على مشاري عشان كذا مايبيها تكمل معاه بيفرق بينهم حتى ماينفضح ..؟
لا لا لا .. هي تعرف مشاري رجال ..
مشاري مصلي صوام مايحيد عن طريق المسجد ..
عيبه الوحيد الدخان .
والدخان ابتلاء وعادة سيئة لايمكن تقلل من رجولة الرجال او تنزل من قدره وتغير صورته ..!
حياتها متخربطه ..
وعقلها مابين اصدق خالد ولا انكر كلامه واصدق مشاري ..!
تحب خالد وتحلم فيه ..
وتقدر مشاري وتثق فيه ..!
الحياة في نظرها باتت اضيق من ثقب ابرة ..
وعقلها في دوامه ..
يصعب الخلاص من الخروج منها بسهولة ..!
تفكيرها مشتت مابين العقل والقلب ..
والحلم والواقع
..
ضمت مخدتها على صدرها ..
وسمحت لدموعها بالتعبير بطريقتها الخاصة .. لمن تعجز عن التوصل للحقيقه ..
***
ثلاثه ايام مرت عليها في مدرسة الاجواد واليوم هو الرابع ..
كل شي مر عليها عادي مافيه شي يفرق عن طقوس مدرسة السبيل ماعدا القوانين الصارمة اللي تفرضها ابلا نوف على شادن ..
تساءلت عن سبب معاملتها الجافة هذي ومالقت أي تفسير ..
اذا اول يوم قبل نهاية الدوام مرت عليها وقالت لها تمر على كل الفصول تشوف باقي طالبات ولا انصرفوا كلهم من المدرسه ..
ولمن قالت انها مو مناوبه ومناوبتها بكرة ..!
قالت لها بعنجهية : عارفه بس مايمنع انك تساعدين زميلاتك ...
اليوم الثلاثاء ..
وعندها الحصص الاخير فاضية ..
راحت لدورة المياه لأن ماعندها حصص اخيرة وقررت تتوضا عشان تصلي قبل ماينادي ابو بدر ..
البنات يقولون الثلاثاء والأربعاء يمشي بسرعه مايحب يتأخر لو دقايق ويعصب اذا تأخروا .
بعد ماسلمت على يسارها وبدت تستغفر وتسبح التفتت وراها شافت شهد طالبه بالصف الثالث الابتدائي عرفتها من نوير اللي دايماً ترسلها وتناديها اذا بغت شي ..
وباعتبارها صديقة ولدها سامر .تعتبرها بنتها ...
احلى بنت بالمدرسة وأشيك وانظف وأرتب ..
البنات هنا اشكالهم يعني مو مرة انيقات او مرتبات وبعضهم يجون للمدرسة وشعورهم فيها زيت ..
بس شهد تلفت انتباه أي مدرسة في المدرسة شعرها مقصوص قصير مرة وشباصاتها ومريولها وجزمتها ( الله يكرمكم ) وشنطتها مرة انيقه والبنت باين انها مو من اهل القرية او ان اهلها ناس متطورين حبه عن اهل القرية . .
طالعتها شادن وابتسمت لها وهي شبكت اصابعها في بعض قالت بابتسامة بريئة زيها واعتلت خدودها حمرة خجل كونها واقفه قدام مدرسة وهي طالبه ..
: السلام عليكم .
: عليكم السلام ورحمة الله وبركاته .. اهلين ياشهد .
: ابلا شادن .
: هلا حبيبتي بغيتي شي .؟
: ابلا صحيح انتي بنت خالي خالد . .؟
ارتجفت شادت وحست بألم في بطنها ..
فتحت طرحتها عن راسها قالت : تعالي تعالي اجلسي .. قولي لي مين امك اش اسمها ؟
جلست شهد وهي مستحيه قالت : امي فوزية سعد عبدالله ال..
حست ان قلبها تحرك من مكانه قالت بلهفة : يابعد عمري . وجدتك حصة ..؟
: ايوه .. دايما دايما دايما تسألني عنك ..!
: اش تقول .؟
: تقول ابي اشوفها واسلم عليها وابي اعرف اخبار نايف ولد خالد .
طالعت في الساعه قالت : ياعمري سلمي لي عليهم وقولي بكرة ان شاء الله اجيهم .
: اصلاً هي كانت بتجي للمدرسة بس عيا عماد قال شادن تجي عندك بدال ماتروحين لها .
: عماد من ..؟ اخوك ؟
ضحكت شهد بعفوية وبراءة وحطت يدها على فمها قالت : هههههههه لا مو اخوي عماد ولد خالتي شريفه ..
: اها الله يرحمها ..
: ابلا الله يخليك تعالي اليوم عندنا .. شوفي عماد وجدتي وماما وفيصل اخوي .
: ياعمري اليوم مااقدر لأني ماقلت لامي ومااقدر اتأخر عليها تقلق علي ..
: يعني خلاص اخلي ماما تفتح الغرفه حقتك ..؟
: ليه انتم مسوين لي غرفه .؟
: ايوه عماد قال لماما خلي لها الغرفه اللي بجنب غرفتك . اصلا بيت عماد حلو فيه غرف كثير والعاب ومراجيح .
ضحكت شادن لبراءة الطفلة وكلامها الناعم والطفولي ولهجتها المحببه قالت تجاريها : خلاص اذا جيتكم راح العب معاك .
فتحت شهد يدينها ووسعتها قالت : فيه مرجيحه كبيييييييييرة .. حتى ماما ومنال وحنان اذا جو عندنا يلعبون فيها .
: لحظة لحظة مين منال وحنان ..
: بنات خالي ناصر .
: اها .. ياعمري ياشهد كلامك يجنن ...
دخلت نوف الغرفه وشافت شهد تسولف مع شادن وهالها وارعبها المنظر قالت بغيض وهي عاضة على اسنانها
: شهد وش مدخلتس هنا ..؟
ردت شهد ببراءتها المعتادة : ابلا نوف شوفي ابلا شادن تراها بنت خالي وبكرة بتجينا في بيتنا .
طالعت نوف في شادن بنظرة ماقدرت شادن تفسرها : شهد يالله روحي للبيت عشان ماتتأخرين .
طلعت شهد تجري ولحقتها نوف من دون ماتنبس ببنت شفه ..!
اما شادن تجاهلت نوف ولافكرت بكلامها لأن بالها مشغول بشي ثاني وكأن طاقة القدر انفتحت لها ..
" الحمد لله ماتعبت ولاتعنيت ارسل ربي عليّ هالطفلة تختصر لي مشوار ممكن يكون محرج وطويل وصعب عليّ "
تنفست بعمق ولبست طرحتها مرة ثانية وتغطت وشافت خلود تاخذ سلة القهوة اللي جابتها معاها وتطلع لأن البنات سبقوها للسيارة . ولحقتها تجري حتى تتحاشى عصبية ابو بدر وغضبه .
***
بعد مارجعت لبيت امها ..
وحكت لامها تفاصيل يومها ماعدا معاملة نوف لها لأن امها مو ناقصه هم حتى تشيل همها في المدرسة ..
قالت وهي تعدل جلستها على الكنبة بجنب امها
: يمه بروح لهم بكرة وبجلس عندهم لآخر الاسبوع تكفين يمه ..
تنهدت امها وتهديد اخوها وموعده اللي اقترب في بالها ومافارق ذهنها ..
قالت : طيب اجلسي عندهم للجمعه عشان تفتكين من خالك وولده ، بس لااوصيك أي شي يضايقك ولا يعكر عليك على طول ترجعين وماتجلسين دقيقه وحده .
:يمه لاتخافين انا متفاءلة ان شاء الله مافيه الا الخير .. ومن كلام شهد احسهم مشتاقين ولا متحمسين وتعرفين بنتك مو راعية مشاكل يعني مافيه الا الخير بس دعواتك ..
: الله يسترعليك يابنتي .
دست راسها بصدر امها الدافي .. لو تجلس فيه طول عمرها ماتشبع منه .. ومهما كبرت مااكتفت من حضن امها وريحته وحنانها .. !!
دق جوالها وشافت اسم سارة .. بعدت عن امها وعلى طول ردت ..
: اهلين وسهلين باللي تتغلى علينا ومقفلة جوالها لها يومين .
: هلا شادن ماشاء الله شكلك مبسوطه .
: اش فيك انتي صوتك مو عاجبني .
وبخيبه وصلها صوت سارة : ماتدرين عن القرارات الجديدة ..؟
فزت شادن وراحت لغرفتها قالت : سارة اش هالكلام ليه طيب ..؟
شهقت سارة باكية ..
وسردت عليها احداث ليلتها مع خالد في المطعم ..
من محاولته تصويرها ..
لنقاشهم الحاد واعتراضه على خوف مشاري عليها منه . .
وبعدين لمن قفلت جوالها ومكالمتها الباردة له .. وتشكيكه بمشاري ..!
علقت شادن : بصراحه ياسارة ولا تزعلين مني خالد مامعاه حق ابداً وغلطان ولا فيه واحد يقول لزوجته بصورك بالجوال والله لو انها عدوة وهو فيه ذرة نخوة وشهامه مايسويها .. !
: هو تأسف مني وقال لي انه كان يبغاها له عشان يشوفني بكل وقت .. بس مو هذا السبب اللي يخلي ابوي يقرر هالقرار لأني ماقلت لهم .
: طيب يابنت يمكن اهلك شايفين عليه شي يخليهم يطلقونك منه .. انتي بس لا تستعجلين و انتظري الا مايجون ويقولون لك السبب .. والله والله ياسارة لو خالد نصيبك محد يقدر يطلقك منه ولو مو نصيبك لو تموتين مااخذتيه .. استعيني بالله وفوضي له امرك .
: يابرودك ياشادن هذا وانتي تعرفين حبي لخالد ..
: ادري والله ياسارة بس انتي لاتعذبين نفسك .. الموضوع بيد ربي سواء في صالحك ولا ضدك .. تعالي .. ماجاب لك هدية هو ..؟
: لا ليه الهدية ..؟
: ياربي لك الحمد .. فيه واحد جاي يزور خطيبته ويده فاضة صدق ماعنده ذوق ..
: شاااادن مو ناقصتك الله يخليك .
: مممم تجين عندي ولا اجي عندك .
: لا لا بنام تعبانه من البارحه مانمت .. ماعليه شادن مرة ثانية نتقابل .
: اوكي سارونه بس حاولي تهدين نفسك وتفوضين امرك لله .. وادعي ربي يختار لك ..
: ونعم بالله .. المهم انتي اش سويتي وكيف المديرة معاك .
استلمت شادن دورها في الحكي وبدت تسرد لها وش صار لها خلال الأيام اللي راحت ..
وبلغتها الخبر الأهم ان بكرة راح تزور اهلها ..
دعت لها سارة بالتوفيق وردت لها الدعوة وقفلن من بعض بمودة توثق علاقتهن المتينه بعد ارتاحت سارة وكأنها نزلت من الحمل اللي اثقل كاهلها على كتف شادن .. تشيله معها وتساعدها على حمل البقية منه ..!
***
هناك في بريمان ( اسم لاحد السجون في منطقة جده )
في نفس المكان اللي جمع الظلم بالحق ..
البراءة بالاجرام . .
السلام والحرب ..
نفسه المكان اللي ظهر فيه العدل لبعض الناس واختفى عند بعضهم ..
جالس في لوحده ويتخيل لو صالح يعتدي على اخته ولا يسوي لامه شي ..
ياترى كيف و ضعهم بدونه ..
تذكر استنجاد شادن فيه دايماً اذا شافته ووصالح في البيت ..
خوفها من صالح وكرهها له والأكيد انه بسبب ومو من فراغ ..
تنهد لهج لسانه وقلبه بـ ( ياحي ياقيوم برحمتك استغيث اصلح لي شأني كله ولاتكلني الى نفسي طرفة عين )
وقف على حيله وراح لمازن اللي سانده وآزره في محنته بالتذكير بجزاء الصابرين وان الله اذا احب عبده ابتلاه ..
: اش فيك اليوم يانايف ..؟
: افكر باهلي يامازن .. اختي ماادري وش صاير عليها وامي مسكينه تقاوم طغيان صالح وهي ضعيفه ماتعودت على القسوة ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك