رواية قلوب تتراقص على انغام الالم -38

رواية قلوب تتراقص على انغام الالم - غرام

رواية قلوب تتراقص على انغام الالم -38

ليان بكل حماس:ايه والله حتى جدتي .. طلعت من جو الكأبة شوي .. و خاصتن لما دخلت ريناد عندنا- بنبرة لوم:بس عروستنا كأنه كانت زعلانة شوي ..!!

تغيرت ملامح وجه بسام و بكل تردد:عسى ما شر ..

ريناد ابتسمت بكل ثقة ما عندها شي تخاف منه .. و واثقة أن محد حس بألمها ..

و النار ما تحرق غير واطيها ..!!

ليان بعد ما حرقت أعصاب بسام:شايلة هم جنى و صراحة ما كانت الوحيدة كلنا قلوبنا كانت مع جنى ..!!

طلع نفس:أنا قلت لأبوي نأجل .. بس هو قال أن جدتي ما رضت نأجل ..

ليان:ايه والله حلفت على الكل ..-نزلت عيونها ع الأكل:يالله سموا و مدوا يدكم .. – وقفت ليان:نتبادل أماكن رنود ..!!

وقفت ريناد ..

.. يدري إن ريناد مو طايقته وشلون بتوكله ..!!

بسام بكل اندفاع:لاء .. خلك جنبي و عطيني الأكل ..

ليان بإحراج:بس ..!!

ريناد و هي تجلس بكل راحة:أكيد بيتعود علي بصعوبة .. مأخذ عليك ..

جلست ليان وبكل تردد:بس ريناد زوجتك .. و لازم تتعود عليها ..

بسام يدور أي حجة:موب يقولون العروس لازم يدلعونها ..

ريناد مع ابتسامة:هالشي ما يتعب .. بس يبي لك وقت عشان تتعود علي ..

تنهد و همس بخاطره .. "شكلك مطولتها يا ريناد" ..

.._.._.._.._.._..

ناظرت في ساعتها لقتها وحدة الظهر .. طلعت جوالها بتدق عليه رن تلفون البيت ..

ردت لمى بكل طفش:السلام عليكم ..

أم تركي:و عليكم السلام .. شخبارك يا بنتي ؟!

لمى بكل تعجب:الحمد لله بخير .. من معي؟!

أم تركي بكل حيرة:أنا أم تركي .. زوجة عم ريناد ..

لمى تفاجأت:قصدك أم أروى ..؟!

أم تركي:عليك نور .. وصلتي ..

لمى بكل حماس:هلا بك خالتي .. شخبارك أنتي؟!

أم تركي:الحمد لله .. آسفة على اتصالي المفاجأ ..

لمى:لا لا .. وش دعوة تدقين في الوقت اللي يريحك ..

أم تركي بتردد كبير و واضح: صراحة يا بنتي ودي بموعد أجي أزوركم فيه قريب ..!

لمى بكل تعجب:وشلون ..؟!

أم تركي:ما عليه يا بنت العذر و السموحة أنا بغيت أخطب .. و هاذي أول مرة أخطب فيها ..؟!

ابتسمت لمى:لا .. عادي تشرفين في أي وقت ..

أم تركي بكل تردد:اليوم .. عادي ..

لمى و نبرة الإحراج بصوتها:ايه حياكم ..

أم تركي:على خير .. مع السلامة ..

لمى:في أمان الله .. – نزلت السماعة و سكرت الخط .. جلست تفكر لثواني و رجعت تبتسم .. همست:مجنون ..

.._.._.._.._.._..

صرخت ريتاج فـ سينتيا:يووه قلت لك ما أبي غصب هوو ..!

سنتيا بكل خوف و هي تطلع:إن شاء الله ماما ..

زفرت بكل ضيق و هي تجلس على طرف سريرها ..

رن جوالها .. لفت عليه رفعته بكل ضيق .."ما كان ناقصني غيرك" ..

ردت .. مو حب فيه بس عشان تشتت فكرها اللي ذبحها:اهلين ..

فيصل بكل روقان:مساء الحب لأحلى حب ..

ريتاج بكل ضيق:فيصل و ربي موب رايقه ..

زفر:وأنتي دايم كذا موب رايقة و مالك خلق ..؟!

فركت جبينها بأطراف أصابعها بكل توتر:أتكلم جد ..

فيصل بكل هدوء يحاول يسايرها:رتو وش فيك من أسبوعين و أنتي مو على بعضك ..

حست بالعبرة تخنقها و دموعها تخونها .. من سوت سواتها مع جنى و هي مو مرتاح لاء فـ أكل و لا نوم و لا حتى طلعة ..

كل شيء حولها يضيق بها .. و سؤال فيصل فجر عبراتها ...

فيصل و هو يسمع صوت شهقات ريتاج.. بكل خوف:ريتاج وش فيك ..؟!

ريتاج بصوت مخنوق:مخنوقة يا فيصل أحس إني بموت ..!!

فيصل بخوف أكبر:بسم الله عليك .. وش صاير لك ..؟!

ما عندها غيره تفضفض له .. تكلمت و هي تحاول ما تفضح نفسها:عمتي .. – شهقت و نفسها ينكتم من مجرد ما مر طيف جنى على بالها ..

فيصل:عمتك وش فيها ..؟!

ريتاج و هي تأخذ نفس و تحاول تتكلم عشان ترتاح:سويت فيها مقلب .. ما توقعتها بتبالغ فـ ردة فعلها .. – سكتت تأخذ نفس ..

فيصل:طيب وش فيها ..؟!

بلعت ريقها:صار لها حادث .. يعني بسببي ..؟!

فيصل:رتوج ما فهمت و لا كلمة .. وش مقلبه وش حادثة ..؟!

ريتاج:كنا طالعين لمجمع قلت لها عن خبر مو زين .. بسوي مقلب فيها .. راحت بعيد عني تركض و صدمتها السيارة ..- اختنق صوتها:و الحين هي فـ العناية و احتمال تموت ..

همس:لا حول و لا قوة إلا بالله .. – و محاولة يأسه لمواستها:ريتوج .. هذا قضى ربك .. يعني قلتي لها شيء أو ما قلتي .. الحادث مكتوب عليها ..

و بعدين محد يموت قبل يومه ..!!

ريتاج و هي تمسح دموعها .. و تحس براحة نسبية تتملكها ..:لو ما كذبت عليها كان الحين هي بيننا ..

زفر بكل ضيق:طيب .. زعلتي و نزلت دموعك عليها هالشيء بيرجعها ..!!؟

قبلها بـ دقايق فـ الدور الأرضي ..

بعدت سينيتيا بعد ما عطت الأهل خبر عن ريتاج اللي ما تبي تتغدا ..

زفرت ام بدر و بكل ضيق:من صار الحادث لجنى و هالبيت معتفس ..

ابو بدر و هو يمد يده:الأكل موب غصب خلي البنت على راحتها ..

أم بدر:يعني عاجبك صار لها أسبوع ما نزلت تأكل معنا ..؟!

أبو بدر بكل لوم:قبل أمس نزلت وشفتيها ما حطت لقمة فـ فمها ..؟!

أم بدر بكل ضيق:حسبي الله و نعم الوكيل فـ اللي كان السبب ..

أبو بدر و العصبية بصوته:موب مكفيك أنها فـ العناية تتحسبين عليها تبينها تموت ..!!

أم بدر بكل ضيق:و من قال لك إني أتحسب على أختك ..

قطع عليهم نقاشهم الحامي ..

ريان:يمة .. يبه .. اذكروا الله ..

أم بدر و أبو بدر .. بهمس:لا إله إلا الله ..

كمل كلامه حتى يغير الموضوع:وش صار على جدتي ..؟!

أم بدر:فـ غرفتها .. وديت الأكل لها ..؟!

ريان:كلت و إلا ..؟!

أم بدر:ما خلتني أساعدها و لا خلتني أجلس عندها ..

ناظرها أبو بدر بكل لوم ..

أم بدر ترد على نظراته:أغصبها يعني ..؟!

وقف ريان:أنا قايم أتغدى معها و أتأكد أنها خذت علاجاتها ..

أبو بدر و هو يراقب ريان اللي يبعد عنهم:حتى لو رفضت المفروض تجبرينها .. هي تعبانة وراها علاجات و ..

قاطعته:يوووه منك .. تعرف وش قد أمك عنيدة و ما تأكل غير من يد جنى ..!!

لفت على بدر و بكل لوم:وأنت ويا أخوك و ين كنتوا عنها هاا ..؟!

رفع رأسه .. و ناظرها بكل لوم .."جاء دوري" ..

أم بدر:لو كنتوا منتبهين كان نبهتوها و ما غلطت هالغلطة ..!

ناظرها مصدوم .. "وش غلطته .. لايكون درت ..!" ..

أبو بدر:وبعدين معك .. خلاص الكلام فـ هالموضوع انتهى ..

أم بدر بكل عصبية:لو كانوا منتبهين كان ما طحت و صدمتها السيارة ..!!

طلع نفس بكل راحة .. عارف كل اللي صار مع جنى .. و بمجرد ما يسمع غلط يروح فكره لـ سالفة الهيئة ..

أبو بدر:استغفر الله العلي العظيم .. لو .. تفتح باب الشيطان ..

همست بكل ضيق:استغفر الله ..

رن جواله .. طلع من جيبه .. ارتسمت على وجهه ابتسامة باهته .. انسحب بدر من السفرة و هو يرد ..

بدر:هلا والله ..

من وراء السماعة:السلام عليكم ..

بدر بكل إحراج:و عليكم السلام ..

أبو عبدالله:اتصلت أتطمن على أحوالك وأشوف وش صار معك .. ؟!

بدر و الضيق بصوته:عمتي للحين فـ العناية و ..

قاطعه أبو عبد الله:ما عليه يا بدر أدري الموضوع صعب .. و أدري أنك تقول عن إني ما استحي بس مستحيل أخون ثقة ربّ عملي و ...

قاطعه:لاا بالعكس .. جزاك الله الف خير ع اللي سويته .. و أنا آسف ع الإحراج اللي عرضتك له بس كل اللي صار قضاء و قدر ..

أبو عبد الله:اللهم لا اعتراض .. بس احرص أول ما تطلع من المستشفى تجيبها للمكتب ..

زفر بكل ضيق .."خلها تصحى بالأول" ..:إن شاء الله ما يصير اللي تبيه .. –بكل تردد:بس أنا متأكد من براءة عمتي ..

خذا نفس:محد ينظلم بوجود الله سبحانة و تعالى .. و رغم مرور هالمدة الطويلة البنت مُصرة إن عمتك لها طرف و كلها إصرار تأخذ جزاها مثلها ..

زفر بكل ضيق: يصير خير إن شاء الله ..

.._.._.._.._.._..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

لا احلل مسح اسمي من على الرواية ..

تجميعي : ♫ معزوفة حنين ♫..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

نزلت السماعة من أذنها و ظلت مصدومة لدقايق .. دخلت فجر الغرفة و لقت غزل سرحانة و الصدمة واضحة على وجهها ..

فجر و نظرات الاستغراب بعيونها:غزل ..!!

لفت غزل:هااا ..

فجر و هي تجلس:وش فيك؟! - ناظرت يدها:من كنتي تكلمين ؟!

رجعت تناظر لقدام:أروى ..

فجر مع ابتسامة:وكالة رويتر وش عندها؟!

غزل بعد ما بلعت ريقها للحين الصدمة مأثرة فيها:اليوم بتكون عندنا مع أمها ..

فجر بحماس:بيسيرون علينا .. متى وش عندهم؟!

غزل بكل يأس:اليوم العصر .. – بعد لحظات تردد كبير:بيجون يخطبوني ..

فجر و علامات الاستفهام على وجهها:يخطبونك؟!

غزل و نبرة الحزن بصوتها:لـ تركي ..

قربت أكثر و بحماس:والله .. الله يبشرك بالخير ...

رفعت عيونها:بس أنا ما أبي أتزوج ..!!

فجر بخوف:غزل وش فيك ؟! ليش قلب وجهك كذا ؟!

غزل حست بالدنيا تسود في عيونها:ما أبي أتزوج تركي ..

فجر:طيب محد غاصبك عليه .. بس قبل لازم تفكرين زين .. – ما كان جواب غزل غير الصمت ..

فجر تحاول تقنعها:يالله قومي دوري لك لبس زين حتى لو كانوا أهلنا لازم تكشخين ..

ناظرتها غزل بلوم:أنتي أكبر مني ..؟!

قاطعتها:إذا ما جاني نصيبي أقطع عليك نصيبك .. و بعدين أنا توني ما بعد عنست .. و إلا تحطيني حجة هاا ..؟!!

غزل بترجي:والله ما أفكر بالزواج ألحين ..

فجر:كلها كم شهر و بتخلصين ثانويتك .. و بعدين ما تدرين يمكن يغيرون رأيهم .. و يمكن تكون أروى سمعتهم يسولفون يعني مجرد كلام ..

غزل و توترها يزيد:تقول جاية العصر هي مع أمها ..؟!

فجر و هي توقف:قلت لك لا تسبقين الأحداث ..

.._.._.._.._.._..

جالسة على الغدا .. و نظرة السرحان بعيونها ..

أما هو يأكل بكل حماس .. رفع عينه عليها ووقف أكل:جوري .. – رفع صوته أكثر:جووري ..

لفت عليه و هي مفزوعة:خير ..

نواف بلوم:وش فيك ؟! للحين تفكرين بجنى ؟!

جوري و هي تحوس بالملعقة بصحن الرز .. و نبرة الحزن بصوتها:موب سهله علي ..!!

نواف:طيب .. اللي في بطنك وش ذنبه ..؟!

جوري و هي تناظره بنص عين:يعني هو اللي همك .. موب أنا ..؟!

ناظرها بلوم .. :إذا كنتي بخير هو بيكون بخير و إذا طلع هو بخير لا بد تكونين أنتي بخير قبله ..

ابتسمت بدون ما تغلب نظرة الحزن اللي بصوتها:تعرف وشلون تطلع نفسك ..!!

رد لها الابتسامة و رجع يكمل ..

تنهدت بضيق و حاولت تأكل لكن ما قدرت .. فكرها مشغول ..

رجع يكلمها لكن بنبرة قريبة للعصبية:و أخرتها معك ؟!

جوري و عيونها على الأكل و بكل تردد:موب بس جنى اللي شاغلة بالي ...

نواف:وش عندك أجل؟!

جوري:في الملكة .. شفت .. – رجعت تسكت ..

نواف:من؟!

جوري بكل تردد:وحدة من خالاتي ..

طاحت الملعقة من يد نواف:خالتك ..!

.._.._.._.._.._..

واقفة بنص المطبخ .. تأكل الإندومي من غير نفس ..

حست بهزة الجوال فـ جيب بنطلونها .. على طول نزلت الملعقة و طلعته ..

ابتسمت و هي تلمح الاسم و ردت ..

من وراء السماعة .. من غير ما تسلم حتى:حيا الله بنت عمي القاطعة .. !!

ابتسمت لمى:أنا القاطعة ..!!

نهي:قاطعتين بعد .. ما تقولين وينك أمس ..!

لمى فجرت ضحكة:هههههههههههههههههههههههه .. مو توك مكلمتني أمس و قلت لك بروح لملكة صديقتي ..؟!

حكت رأسها بكل غباء:صدق .. متى ..؟!

لمى بكل عفوية:هههههههههههه .. لا صدق عجزتي ..؟!

نهى بكل ضيق:عجزت بي ذا النوف .؟!

لمى و هي تجلس على طاولة الأكل:على طاري نوف .. وش صار عليها هالأسبوع ..؟!

نهى بنبرةأقرب للسخرية:مثل كل أسبوع ..

لمى:الله يعين أختك على نفسها ..

نهى:خلك من أختي .. تعالي اليوم ..

لمى بكل حيرة:اليوم .. مدري ..!!

نهى:وش اللي ما تدرين موب على كيفك . تجين يعني تجين ..!!

لمى بعد تردد كبير:اليوم في شيء مهم ما أقدر أأجله ..؟!

نهى تتصنع العصبية:وش هالشيء اللي أهم مني ..؟!

ابتسمت:أكيد ما في شيء أهم منك .. بس اليوم بيزورونا خطابة ..

نهى بكل حماس:قولي والله ..

لمى:ايه والله .. بس أمانة نهوي .. ما أبي أحد يدري ..

نهى:ايه أكيد سرك فـ بير .. بس من بيخطبون ..

ابتسمت لمى و الإحراج يغطي صوتها:أنا ..

نهى:يا الله مبروك مقدما .. –قاطعتها قبل لاتنطق:عاد تعرسين تنخطبين .. المهم بتجين يعني بتجين ..

لمى:هههههههههههه .. خلاص .. بجي إن شاء الله ...

نهى:يالله موب حاطين قهوة المغرب إلا لما تجين ..

لمى:اووك ..

نهى:يا الله سلام بروح أحط الغداء ..

لمى:مع السلامة ..- نزلت الجوال بعد ما سكرت الخط ..

.._.._.._.._.._..

رجع يرفع الملعقة:يمكن تكونين واهمة ..؟!

هزت جوري رأسها بالنفي وملامح الاستغراب مرسومة على وجهها:آخر مرة شفت أهل أمي فيها كان عمري تسع سنين .. يعني أذكر زين ..

همس في خاطره"ياليتني ما جبتك هنا من الأصل" ..

قطعت تفكيره:شكيت في البداية .. بس لما عرفت أسمها تأكدت ..

نواف:طيب وش اللي تفكرين فيه؟!

جوري:مدري .. من شفتها و بالي مشغول بها ..

نواف:طيب وشلون بتعرفين كل شيئ عنها .. من اسمها بس ..؟!

جوري بكل حماس:موب بس كذا .. بس طلعت خاطبة وحدة من صديقاتي لولدها ..

همس بصوت مسموع:الله لا يعيد هالصديقات ..

جوري:نعم؟!!!

نواف بعصبية:من دخلوا حياتنا و حياتنا منقلبة فوق تحت ..!!

جوري و الزعل واضح بصوتها:لأنك صرت مسئول حقيقي عني صرت تحس فيني .. ثقيلة عليك ..!!

رجع يأخذ نفس:لو ما كانت هالجنى صديقتك كان ما خفتي عليها و بغيت تروحين للإسعاف أمس من الضيقة ..!

و لولا ملكة الأخت الثانية كان ما شفتي خالتك ..!!

جوري بنبرة حزن:زعلان عشان بيكون لي أهل ..!!

تنهد بضيق و همس:استغفر الله العلي العظيم .. – ظل ساكت لخمس دقايق ..

رجع يتكلم بكل هدوء:اسمعي يا جوري .. مشكلة أهلي لحالها يبي لنا وقت ..

حتى نحلها .. اتركي أهلك لحد ما أخلص أنا من أهلي ..

أما إذا بتجينا المشاكل من الجهتين .. صعب كثير ..!!

تعمقت ملامح الحزن على وجهها:أصلا أهلي لو يبوني ما تركوني في البداية .. – بكل تردد:كل اللي أبي أعرف ليش سوو فيني كذا ؟!!!

نواف يحاول يواسيها:ما تدرين وش كانت الظروف وقتها .. اليوم لي شافوك يمكن يتمسكون فيك أكثر .. – حس بالكلام ينفذ منه .. ما عنده حجج أو أي مبررات ..

كملت جوري أكلها .. و هي تصارع عبراتها .. كل الجروح تتفتح بوقت واحد ..!!

.._.._.._.._.._..

واقفة بسيارته قدام باب .. فلة أهله الكبيره ..

يناظر نفسه بمراية السيارة و يضبط شماغة .. للمرة الأولى في حياته ..

يلبس الثوب الأسود .. و الشماغ .. حس بشي موب طبيعي .. همس في خاطره " والله إني كشخة .. لو تشوفني غزل بس ..؟! .. يالله المرة الجاية" ..

نزل مياف من سيارته .. دخل للبيت بكل هدوء .. حس بشيء من الضياع .. صار له عمر ما دخل بيت أهله .. تسع سنين أو عشر ما حط رجله فـ هالبيت ..!!

حتى أهله إذا اشتاق لهم موت سافر برا للمكان اللي يصيفون فيه أو اتفق معهم فـ مكان بعيد عن البيت ..

أكره لحظات حياته قضاها هنا .. رغم أنها حلوة بس بعد اللي سواه أبوه ..

حس أنه يكره كل شيء فـ هالبيت ..!! حتى الهواء ..!

نازلة مع الدرج و كانت طفشانة لأبعد درجة ..

بس أول ما شافت أخوها تبادل كل أحاسيسها و ملامح وجهها تغيرت للحيرة ..

ظلت واقفة متنحة فيه .."هذا هو مياف لاء هذاك ما عنده سكسوكة الا هو بس ..

قطع تفكيرها و هو يبتسم:هااي ..

كانت شاكة أنه هو .. بس أول ما سمعت صوته تأكدت أنه هو ..

ابتسمت وسن و هي تنزل ركض عند أخوها .. سلمت عليه و ضمته:مياااف .. وش مسوي في نفسك ؟!

مياف و هو يستعرض قدامها:وش رايك؟!

وسن بنبرة غرور:شاك بعمرك ..

مياف بغرور أكبر:احم احم ..

ابتسمت و بكل حماس:وش اللي جايبك لهنا ..؟!

مياف بتهديد:أطلع ..

وسن بكل اندفاع:لاء لاء .. –بنظرة شك:الله يحفظ اللي وراء هالتغير ..

مياف و هو رافع يده:الله يخليني لي ..

ضحكت من كل قلبها:هههههههههههههههههههه .. و لي بعد ..

مياف بحماس:يالله يالله روحي جيبي عباتك ..

وسن:على وين؟!

مياف:مدري بس متحمس أطلع .. آخر مرة تمشينا فيها أنا و أنتي .. – بانت بعيونه نظرة تفكير ..!!

وسن بكل لوم:من ثلاث سنوات يوم كنا فـ إيطاليا ..!!

ابتسم:يا الله بسرعة قبل لا أهون ..!!

وسن و هي تطلع لفوق بسرعة:ثواني و أكون عندك ..!!

زفر و الابتسامة ما فارقت وجهه .. بس على طول تلاشت من سمع صوتها ..

..:حيا الله الغريب ..

التفت بكل هدوء:يمة ..!!

ناظرته بكل ضيق:لا تقول يمة .. أنا أولادي ثلاثة بس ..

ناظرها بكل حزن .."و أنا أمي ماتت من زمان ..-تنهد بكل ضيق"الأم اللي ربتني ..!"..

نزلت عبايتها وصرخت:ريتاااااااااااااا ..

جت لها ركض:نعم ماما ..!!!

أم عبد المجيد:خذي عبايتي .. شوفي هذا وش يبي و سكري الباب وراه ..

ابتسم بألم ..

نزلت من فوق بكل حماس و هي تسكر عبايتها المزخرفة بالأصداف ..

ناظرتها أمها و بكل عصبية:على وين ..؟!

وسن بكل تعجب:من متى تسألين ..؟!

علت صوتها أكثر و أعصابها تتوتر أكثر:و أنتي من يدخل هذا البيت ينقلب حالك كذا ..

وسن بنرة ترجي:مام مياف ولدك ..!! ليش تعاملينه كذا ..؟

أم عبد المجيد:ولدي مات من 15 سنة .. و إذا فكرتي تطلعين معه لا تلومين الا نفسك ..

ضربت برجلها الأرض و بضيق أكبر:ماميييييييييي ..!!

أم عبد المجيد بضيق أكبر:بلا مامي بلا زفت .. – نزلت عيونها على مياف:و أنت وش تنتظر هناا يالله اطلع برا ..

ناظرها بألم و هو نادم على قد شعر رأسه لأنه سمع كلام غزل و يبي يرجع العلاقة مع أهله ..

و ابتسم بكل سخرية و هو يطلع ..

.._.._.._.._.._..

رفعت عبايتها فوق رأسها .. طلعت من البيت و قلبها مع أمها ..

لفت يمين و يسار .. ما لقت أحد مار .. ناظرت في ساعتها لقتها ثلاث إلا ربع .. "يا ربي ما عاد بقي شيء على الصلاة يا خوفي يأذن و محد حولي ..

ما في حل غير بابو .. "هندي البقالة .. " .. مشت جمان بخطوات سريعة لحد البقالة لقت الهندي قاعد يسكرها ..

تكلمت و نفسها شبه منقطع:لـ .. لحظة .. بابوووو .. لحظة ..

لف عليها:خير ماما .. ايس في ؟!

جمان و هي تأخذ نفس:بابو الله يخليك أبي تلفون ..

ناظرها بحيرة ..

جمان بنبرة ترجي:ماما أنا كثير تعبان أنا بس يدق على أحد يجي يأخذها للمستشفى ..

بابو:طيب واحد دقيقة بس ..

هزت رأسها .. رجع يفتح البقالة و طلع لها التلفون لعندها ..

.._.._.._.._.._..

ابتسمت أم تركي بإحراج:العذر و السموحة منكم ..

أم ياسر و هي تحط رجل على رجل:و الله أنتم اللي اعذرونا المفروض البنت ما تدخل عندكم الا مرة بس شوفت عينك اهي اللي تدبر كل شيء .. مدري وش بسوي عقبها ..!!

أم تركي:ما شاء الله تبارك الرحمن .. أخلاق و أدب و فوقها جمال ..

ابتسمت لمى بإحراج .. لفت على أختها و همست:وش رأيك تأخذين أروى و تدخلون جوا ..!!

وقفت ألمى و هي تحس بالدنيا تدور فيها تكلمت بصوت هامس و كله تعب:أروى .. تعالي معي ..

أروى ما صدقت خبر نطت و راحت مع ألمى لغرفتها ..

لفت أم تركي على أم ياسر و ابتسمت بإحراج ..

دخلت ألمى و رمت نفسها على السرير ..

ناظرتها أروى بكل حيرة:وش فيك ألوم ؟!

ألمى و هي تمسك رأسها:شكل فيني فقر دم ..!!

أروى و نظرات تفحصية لـ ألمى:بس بحياتك ما شكيت منه .. أنا قصدي وش جاب هالفقر دم ..؟!

لفت ألمى و ضمت المخدة:و لا شيء ..

أروى و هي تأخذ لفة ع المكان بعيونها:يوم تشتكي لي لمى عنك أمس يوم ملكة ريناد .. توقعتها تبالغ مثل كل الخوات الكبار بس يوم شفتك .. اللي قالته و لا شيء ..؟!

ألمى و هي ترجع تجلس بكل تعب:كلكم تبالغون ..

أروى بعصبية:نبالغ في عينك .. شوفي نفسك أول نحيفة الحين صرتي هيكل يمشي .. حتى الدم نشف منك .. شوفي عيونك بس وشلون طالعة لبرا ..

عقدة ملامح وجهها:أروى موب ناقصة ..

أروى بلوم:هذا و إنا صديقات ..- بكل عصبية:أدري لو كانت جمان كنتي بتتكلمين ..

ألمى و هي مغمضة عيونها و تفرك يدها بجيبنها .. الدوخة اليوم مستلمتها:كلكم عندي زي بعض ..

طقت الباب و دخلت بهدوء .. لمى:أروى أخوك عند الباب ..

وقفت أروى:هين ألوم .. إذا كلمتك مرة ثانية عطيني كفين على وجهي موب كف ..- طلعت أروى .. و وجهت لمى نظرات لوم لـ ألمى و طلعت ..

نزلت يدها و همست بتعب:هذا إذا شفتيني مرة ثانية ..

.._.._.._.._.._..

.. منسدحة على السرير .. تتصفح المجلة و سماعات الجوال بأذنها .. لوجين بكل عصبية:و بعدين معك ؟! .. أصلا أنا الغلطانة يوم أتفق مع وحدة خوافة مثلك ..

من وراء السماعة .. ريتاج بكل خوف:جنى إذا صحت بتقول أنا اللي وديتها هناك ..

لوجين:خلها تقول .. أنتي وديتيها بحسن نية .. موب قصدك شيء ..!!

ريتاج:و الكذبة اللي كذبتها .. يوم قلت أنهم لقوا فجر و أختها و إنهم اتفقوا يجتمعون عند نفس البوابة .. أكيد لما تقول لهم .. بيعرفون كل شيء ..؟!

لوجين:سهلة نقول أنها تكذب و تبي تطلع نفسها و تورطك .. يكفي أن محد شافك معها موب كلنا تفرقنا ..

ريتاج و العبرة تخنقها:أنا ما همني كل هذا .. لوجين أنا موب قادرة أنوم ..

لوجين ما عدت تتحمل قلق ريتاج:يوووه .. تو الضمير يصحى ..!!

ريتاج و رجفة الخوف واضحة بصوتها:أنتي بس لو تشوفين الكوابيس اللي كل يوم و الثاني أشوفها .. تكرهين نفسك ..

لوجين بكل سرعة:خلي عنك هالخرابيط بس .. ريتو عندي مكالمة يالله باي باي .. – سكرت الخط من ريتاج و ردت:هلا والله .. و غلا ..

في الدور الأرضي ليان قاعدة عند التلفزيون ..

حاسة بطفش العالم فيها لكن ما بيدها حيلة هالوقت العادة تقضية مع بسام لكن بسام ما عاد ملكها ..

شافت سطام نازل .. فرحت .. وقفت و بحماس:سطام ..

سطام و هو معقد حواجبة:خير؟!

ليان:طالع؟!

سطام و هو يناظرها بنص عين:كلك نظر ..

ليان بكل ترجي:بس خمس دقايق أقعد بسولف معك ..

سطام و هو يجلس:اوووووووف ..

ليان:أبي أطلب منك طلب ..؟

سطام:من أولها .. اخلصي علي وش هو؟!

ليان:بسام ..

سطام بكل عصبية:وش يبي بعد أكثر ما تزوج و فكنا منه ..

ليان و ملامح الحزن على وجهها من ردة فعل سطام:طيب اللي يتزوجون موب يسافرون شهر عسل ..!

سطام:وش أسوي له يعني ؟!

ليان:رتب له سفرة ..

وقف و بنبرة حادة:يا حبيبتي السفر موب لأخوك المعاريس يسافرون عشان يونسون زوجاتهم موب عشان يبهذلونهم واحد مثله عميان يقعد في بيته أبرك ..

وقفت و بكل عصبية:سطام .. هذا كتبت الله و لا تتشمت ..

قاطعها:ما تشمت بس كل واحد يعرف قدر نفسه .. – مشى عنها و طلع من غير ما يعطيها أي بال ..

يتبع ..

👇👇👇