رواية قلوب تتراقص على انغام الالم -68
نزلت أم محمد الطرحة اللي ما غطت غير نص شعرها ..:مساء الخير ..
همس الكل:مساء النور ..
وقفت دينا و بكل قلق:مام .. ما كأنك راجعه بدري ..؟!
زفرت بكل ضيق:زواجهم يطفش و العروس ما شفناها .. أنا وش رايحة لغير كذا ..
عدلت طرف تسريحتها:اووف أنا طالعه لـ غرفتي .. –مشت خطوتين لـ قدام .. رفعت وحدة من رجولها على الدرج ..
لكنها حست بشيء موب طبيعي .. رجعت تلف على بناتها و أولادها و هي تحس بـ خلل فـ عددهم .. طاحت عينها على جمان ..
تسارعت أنفاسها و هي تشوف نفس اللي الإنسانة اللي نغصت عليها عيشتها قبل 18 سنة .. لكنها نسخة مصغرة ..!
ما فكرت كثير و توصلت لـ أنها .."بنتها" .. قربت منهم أكثر:من هاذي ..؟!
ابتسمت وسن بعد ماكنت نظرة التأمل واضحة بعيونها المعلقة فـ جمان:هاذي أختي ماما ..
تعمقت نظرة الصدمة فـ عيونها:نعم ..!
وقف مياف ووقفت معه جمان:أختي جمان .. أختي من أبوي ..
ارتسمت على وجهها ابتسامة استهزاء:أكيد بتكون من أبوك .. بس أنا قايلته .. رجعتك هاذي وراها سر ..؟!
مياف بكل إندفاع:لما دخلت لهالبيت من جديد .. ما كنت اعرف عنها أي شيء ..
قاطعته بكل عصبية:اسمعني زين .. كلها كم يوم و أبوك الهمّ يريحني من وجوده فـ هالدنيا ..
دينا بكل عصبية:مام .. وش هالكلام ..؟!
كملت كلامها و شرارة الشر تطاير من عيونها:أبوك راح يموت و طاري هاللي ما تتسمى راح يموت معه ..-رفعت أصبعها و بكل احتقار:و وجود هالانسانة راح يموت بعد ..
وقف مشاري و أعصابة تتوتر أكثر من كلام أبوه:لو ما صار اللي صار لأبوي ..
كان ألحين هو اللي واقف هنا جنب جمان ..
اتجهت أنظار الكل لـ مشاري ..
كمل كلامه بكل توتر:أبوي زارها هي و أمها من كم أسبوع .. و كان مخطط يجيبها لـ هنا .. بس ما الله كتب ..!
ناظرت فـ عيالها بكل غيض .. الكل ضدها .. محد يفكر يقول كلمة .. يثبت بها وقفته جنبها .. رفعت فستانها الطويل و كملت طريقها لـ فوق ..
راقبت وهج أمها بكل خوف .. دينا بنفس خوفها:لازم أحد يطـ ..
قاطعها محمد و هو يطلع الدرج:خلوها لي ..
زفر عبد المجيد بكل ضيق:مبسوطين حضرتكم ..
مياف .. وسن .. جمان .. سلمى . وجهوا نظرة استغراب لـ مشاري ..
مياف:ليش ما قلت لي ..؟!
مشاري و هو يجلس و الكل يجلس معه:ما كان أبوي يبي أحد يعرف ..حتى محمد ذراعه اليمين فـ الشركة ما كان يدري ..!
وهج:على الأقل قلت لوحدة مننا .. نعرف نتصرف مع أمي لما يجي أبوي لهنا ..
مشاري:و الحين أبوي ما جاء و مياف هو اللي هنا مع جمان .. وروني وش بتسون ..؟!
سلمى بكل هدوء:خلاص محمد بيتفاهم مع أمي .. أصلا ما بيدها شيء هاذي رغبة أبوي الحين و هي تدري أنها ما راح تقدر على شيء ..
دينا بكل ضيق:هذا اللي قدرتي عليه ..-لفت على وسن:و أنتي يا مس وسن .. ساكته ساكته .. و يوم تكلمتي بغيتي تفجرين علينا قنبلة فـ البيت ..
ناظرتها وسن بطرف عينها رجعت تلف على جمان .. و الابتسامة ترتسم من جديد على وجهها:كم عمرك الحين ..؟!
ابتسم بكل إحراج:قريب بدخل الـ 19 ..
وسن بكل حماس:خلصتي الثانوي .. أنا هالسنة خلصت .. ؟!
جمان و الخوف بصوتها من نظرة الكل لها:ايه .. بس مدري عن نتيجة ..
وسن:يوه .. ليه صار لها أسبوع نازلة فـ النت و اختبار القدرات بعد أسبوع ..
مياف بكل ضيق:أمها توفت الأسبوع الماضي ..
ارتسمت نظرة الحزن بعيون وسن .. :سوري ..
إحساس بالذنب تملك .. وهج و دينا و حتى عبد المجبد .."لا أم و لا أب و بعد ما نبي يكون لها أخوان" .. كتمت وهج هالكلمة بخاطرها ..
وسن رجعت تتكلم بحماس:خلاص بعد العشاء .. اطلع لك نتيجتك ..
دينا بكل لوم:يا فضيك يا أختي .. من يفكر بالعشاء بوقت مثل كذا ..
ناظرتها وسن بكل غيض:نموت من الجوع يعني ..؟! ..-رجعت تلف على جمان:عطيني رقم سجلك و إلا ما تعرفينه ..
جمان بكل حماس .. و هي تتناسى وجود الكل:لا حافظته و صمّ بعد ..
طلعت جوالها من جيب بنطلونها .. :أيوه .. عطيني الأرقام ..
جمان:01 ... ****** ..
وسن بكل استغراب:نفس رقمي .. بس الرقمين الأخيرين يفرقون ..
وفر بكل راحة .. مشاري:طبعا لأنكم خوات و مولودين فـ نفس السنة ..
وقف مياف:مشاري بغيتك بكلمة رأس ..
.._.._.._.._.._..
زفرت بكل ضيق .. و سماعة التلفون على أذنها:الله يهديك بس .. روحي نومي من غير وسوسة ..؟!
ريناد بكل خوف:ليان وش وسوسته .. أقولك ما سمعت صوته من الظهر صدقيني فيه شيء ..
فركت ليان جبينها بكل توتر:اليوم كلمني على المغربية .. بس هو ما يبيك تقلقين لأنك طول الوقت تسألينه أسأله توتره و هو خايف يقولك شيء و تقعدين طول ليلك تفكرين فيه ..!!
ريناد بنبرة شك:جد ليون ..؟!
ليان بكل ضيق:أكذب عليك يعني ..
زفرت بكل ضيق:لاء .. بس ..
ليان:شفتي شلون توترين الواحد .. يا ريناد .. بسام محتاج لـ راحة .. و أنتي كذا تشغلينه عليك أكثر ..
زفرت بكل ضيق:خلاص خلاص .. بنوم و أحاول أنسى السالفة ..-بكل تردد:آسفة أشغلتك ..
ناظرت فـ ساعتها:لا عادي .. راكان للحين تحت .. يا الله بسكر لا يطب علي و أنا على التلفون ..
ابتسمت ريناد:تصحبين على خير ..
ليان:تلاقين الخير ..-نزلت سماعة التلفون و بنفس الوقت رفعت جوالها ..
زفرت بكل ضيق و هي تطلب رقم بسام .. هزت رجولها بك توتر"وينك ليه ما ترد ..!!" ..
نزلت الجوال بكل ضيق ..:بكتب له رسالة لو يقراها له صديقه موب مهم .. أهم شيء ما تنكشف كذبتي على ريناد ..!
فتحت مسج جديد .."بسام .. أنا كذبت على ريناد و قلت لها أنك كلمتني و ..
"و قلت لي أنك خايفة تسمعها صوتك وتقلق عليك أكثر طبعا ما صار هالحكي .. بس أبيها تنوم و ترتاح .. لأنها على طول متوترة و أنا خايفة على صحتها و صحة البيبي ..! "
اتسعت ابتسامته و الحروف تتضح قدام عيونه ..
دخل الدكتور بكل حماس:بسااااااام ..!
رفع رأسه:خير يا دكتور ..
قرب منه و هو يشغل .. مصباحه الطبي ..
غمض عيونه بشكل مفاجئي ..
اتسعت ابتسامة الدكتور ..:فيه استجابة ..!
ابتسم:دكتور .. أشوف بس أحس بمثل الضباب على عيوني .. يزيد و يخف ..
ابتسم الدكتور:طبيعي جدا .. بس امش على غرفة الفحص .. أنا لازم أكتب تقريري عنك قبل لا أنهي شفّتي ..
.._.._.._.._.._..
مشى معه لـ يسار الصالة ..
مشاري بكل استغراب:وش اللي عندك و ما قلته قدامهم ..!!
جلس بكل هدوء:وش الأشياء اللي تعرفه عن أم جمان ..؟!
ابتسم مشاري:تصدق شفتها .. نسخة من جمان .. –زفر بكل ضيق و ابتسامته تتلاشى:الله يرحمها ..
مياف بكل استغراب:صدق .. متى شفتها ..؟!
مشاري:المرة الأولى أبوي راح لـ بيتهم و شاف جمان و أمها .. و أنا انتظرته برا ..
بس المرة الثانية زرناها بالصبح و سمح لي أبوي أدخل أسلم ..
مياف:طيب دامك تعرف طريق بيتهم .. ليه ما رحت تطمن عليهم بعد اللي صار لأبوي ..
مشاري بكل تردد:كنت متوتر مع اللي صار لأبوي .. و ما جاء فـ بالي يصير شيء لأم جمان ..
بس أمس رحت و سألت و عرفت أنها توفت و وصلت لـ بيت أم عبد الرحمن .. لكنها طردتني شر طردة ..
زفر بكل ضيق:لو أقول لك وش صار مع هالأنسانة و جمان تكره الدنيا ..!!
مشاري بكل اهتمام:وش صار ..؟!
قطع كلامهم صوت رنة جوال مياف .. رد بكل سرعته أول ما لمح الأسم ..
... مياف بكل لهفة:ها بشر ..؟!
زفر من وراء السماعة بكل ضيق:طلعت التحاليل .. لازم تجي عشان أقدر أشرح لك ..
مياف:خير فيها شيء كايد ..
عبد الملك:ما تقدر تقول .. بس محتاجة لعلاج بأسرع وقت ..!
مياف:طيب تكلم وش فيها ..؟!
تنهد:ما ينفع أبيك تجيني ..
مياف:طيب الحين أنا مع الأهل و جمان معي ..
عبد الملك بكل لوم:سويتها يعني ..
ابتسم مياف:صارت سالفة بس الوضع أهدى من ما توقعت ..
.._.._.._.._.._..
نزلت الجوال بكل توتر ..:يارب يقراها ..
فتح الباب و دخل لـ شقته بكل هدوء ..
وقفت ليان و بعيون كلها ترقب لـ راكان ..
استغرب نظرتها:وش فيك ..؟!
ابتسمت:تأخرت ..؟!
زفر بكل ضيق و هو يقرب منها:حمد قدر يتهرب من أبوي .. و المحاضرة جت من نصيبي ..
زفرت بكل ضيق:تستاهل .. وعد أختك قالت عن كل شيء أنت دايم تسكت .. و تخلي نفسك الغلطان ..
ناظرها بطرف عينه:ترا موب رايق لك .. يكفي ضغط الشغل فـ الصبح و العصر والحين هوشة حمد و أبوي ..!
ليان بنبرة كلها لوم:أنت اللي ضاغط نفسك يعني كان ضروري .. تقبل طلب صديقك ..
راكان:كلها يومين.. و بتخلص هالسالفة ..؟!
رجعت تبتسم:طيب عقب هاليومين نقدر نكمل شهر العسل صح ..؟!
ناظرها بكل استغراب ..:بدري ..!
ليان كلها حماس:اليوم لما كنت فـ بيت أهلي .. كل البنات تجمعوا عشاني و قالوا لي أنهم اتفقوا بداية الأسبوع الجاي يسافرون على الشرقية ..
بلع ريقه بكل توتر:الشرقية ..؟!
ليان:ايه الشرقية ..قريبة و بنفس الوقت نجتمع مع بعض و نستانس ..
راكان:بس هذا شهر عسل المفروض نقضيه لحالنا ..
ليان بكل إصرار:قدامنا العمر كله إن شاء الله .. و بعدين أنا فكرت نروح أنا و أنت و أهلك ..
راكان بكل ضيق:بعد ..!
ليان:ايه .. أبوك رجال كبير وينه وين السفر لحاله مع أمك و أختك ..؟!
و بعدين أنت عندك رصيد إجازات كافي و فوق هذا كله تفرح قلب وعد المسكينة ..
مو معقولة إجازة و تنحبس فـ البيت ..!!
زفر بكل ضيق:بسسس ..!
ليان:لا بس و لا غيره ما لك أي عذر .. حتى الفلوس عندك ..!!
زفر بكل ضيق:خلي هاليومين يعدي على خير ..-وقف:و بعدها نفكر ..-مشى لغرفته و كله أمل هالنقاش ينتهي ..
لحقته و بكل لوم:راكان وش فيك أنت وعدتني ..!!
.._.._.._.._.._..
هزت رجوله بكل توتر:عبد العزيز قم ..
زفر بكل ضيق و هو يبعد المفرش عنه:خير وش فيك ..؟!-رفع راسه للدريشة:حتى الشمس ما طلعت ..!
فجر بكل خوف:الشرطة برا يبونك ..!!
جلس و بكل خوف:شرطة ..!! .. ليه ..؟!
فجر و توترها يزيد:يعني بسأله وش تبي فـ أخوي .. قلت مين قالوا شرطة نبي عبد العزيز الـ**** ..
نفض المفرش بعيد عنه .. لبس ثوب البيت بكل سرعته و طلع لهم ..
فتح الباب و الخوف واضح على وجه:خير ..
..
.
رايحة جاية بالصالة .. من يومين ما ارتاح فكرها و الحين تكمل السالفة مع الشرطة ..!
زفرت بكل ضيق و هي تهمس .."يا رب استرها ..!" ..
..
رجع يدخل ركض لـ غرفته ..
لحقته:عبد العزيز وش صاير ..؟!
سحب ثوبه من على المعلاق:غزل .. يقولون لقوها فـ مستشفى ..؟!
رفعت يدها على صدرها و بكل خوف:وش صاير .. حادث ..؟!
هز رأسه بالنفي:لاء .. يقولون هي اللي رايحة لهم ..-طلع من غرفته و لحقته:أنا الحين بروح و أعرف وش السالفة ..!!
فجر:وين تروح .. انتظرني البس عبايتي ..؟!
زفر بكل ضيق:تستهبلين .. وين تروحين ..؟!
فجر:مستحيل ارتاح إلا لما أشوفها .. ما راح تطلع إلا و رجلي على رجلك ..
عبد العزيز:بكل ضيق:الوقت متأخر و بعدين أبوي يجلس ..
فجر بكل عصبية:أبوي من أمس و هو فـ مزرعة أبو سعد و إلا نسيت ..! .. و الوقت موب عذر ..
همس بكل استسلامية:يا الله استعجلي ...
.._.._.._.._.._..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
صرخت بكل صدمة:الأحد الجاي ..
واقفة قدام التسريحة تمشط شعرها .. نهى بكل برود:ايه .. أجل متى تبينه يتم ..؟!
زفرت بكل ضيق .. نوف:توقعت يطول شوي .. الخميس على الأقل ..؟!
نهى:وش يطول .. مشاري خلص كل أوراقكم .. و بعدين خميس من أحد ما تفرق ..
الحين عطلة و كل الأيام مثل بعض .. و ما عندكم أي حجة أنتي وياه ..؟!
نوف:بس ما شريت و لاشيء ..!!
ناظرتها بطرف عينها:شريت كل شيء ممكن تحتاجينه .. موب أنتي اللي قلتي لي أتقضى عنك ..!
جلست على طرف السرير .. بكل خيبة أمل:بس توقعت عقب شهر أو شهرين ..
نهى و هي تقرب منها:أي شهرين .. أنتي وياه المفروض تكونون هناك من قبل لأن الدراسة هناك تختلف ..
نوف بكل توتر:تتوقعين بتأقلم ..؟!
نهى بكل لوم:ما ظنتي بتختلفين معهم .. انجليزيتك .. فوق التمام من هالأغاني الزفت اللي تسمعينها و غير كذا فيه كثير عرب هناك أتوقع ما راح تلاقين مشكلة ..!
نوف و توترها يزيد:بس شلون بكمل دراستي و أنا للحين فـ الثانوي ..
وقفت:لا تخافين أكيد مشاري تكفل بالموضوع .. قومي ننزل لـ تحت .. نلحق على البنات قبل لا يفقدونا .. ثم خذي لك فـ التأليف ..!
زفرت بكل ضيق و هي تمشي وراها بكل استسلام ..
..
.
..
سهام بكل حماس:حيا الله العروس .. من الحين تغلي و ثقل ..
ابتسمت لها نوف و هي تجلس ..
نهى بكل ربكة:وش تغليه ..! .. أمس سهرنا فـ غرفتنا خذتنا السوالف على قولتهم و اليوم راحت علينا نومة ..
أم سامي:الله يهديكم بس لازم تنظمون نومك و ..-بدت السوالف من قصة النوم إلى ما لا نهاية ..
..
قربت أميرة من عند نوف و همست لها:مشاريوه اشغلني أمس عليك ..
لفت عليه و بكل استغراب:انا ..؟! ليه ..؟!
أمير:مُصر أنك تختارين القصر و كل شيء يخص الزواج ..
زفرت يكل ضيق:قلت له أنا إني ما عندي ميول لهالأشياء ..؟! و لا أعرف شيء ..
زفرت بكل ضيق:ما عليه يكون درس لك .. بكرة لـ تزوجوا بناتك .. ببتوهقين ..
ابتسمت:الله يخلي لي نهوي ..
ناظرتها بكل لوم:خلاص بدبر كل شيء لك و أقول لمشاري أنه ذوقك ..
ابتسمت:يعجبني ذوقك ..
نفخت صدرها بكل غرور:احم .. احم ..
لفت عليهم و بكل فضول .. الجوهرة:وش تتساسرون عليه ..؟!
أميرة تتصنع العصبية:وحدة و مرت أخوها يسولفون وش مدخلك أنتي ..؟!
ناظرتهم بكل غيض:الحمد الله نوف بتسافر و إلا كان بتسحبين علي ..
فجرت ضحكة بكل تلقائية:ههههههههههههههههههههههه .. أنا قايلته جوجو خربت و صارت عربجية مصغرة من نوفا ..
خزتها بكل غيض:لها الشرف تصير مثلي ..
لمى:هههههههههههه .. جنت على نفسها براقش .. الحين نوف على يمينك و الجوهرة على يسارك وش بيفكك منهم ..
أميرة تتصنع الخوف:نوفا بعد عمري مرت أخوي .. جوجو حبيبة قلبي أنتي ..
ضحك الكل على أميرة ..
.._.._.._.._.._..
هزت رجولها بكل توتر:وش هالكلام من أمس و إنا هنا و محد كلمنا ..؟!
زفر بكل ضيق:قال لك الدكتورة يبيلها فحوصات و تحاليل أكثر حتى يتأكدون من اللي فيها ..!!
فجر:كلامها خوفني زود ..
خذا أنفاسه بكل توتر:أرجعك للبيت ترتاحين ..
هزت رأسها بالنفي:مستحيل أرجع من غير ما أشوفها على الأقل ..
..
طلعت الدكتورة من غرفة غزل و الضيق واضح على وجهها ..
قربت منهم:أنتوا أهل المريضة ..؟!
فجر:طمنينا يا دكتورة ..؟!
الدكتورة بكل ضيق:صراحة أنا ما مسكت حالتها إلا اليوم الصبح ..
عبد العزيز:يعني شلون يا دكتورة ..
الدكتورة:أنا بخلي الدكتور اللي مسك حالتها ليلة البارحة يفهمكم على وضعها .. لكن أنا بتابعها من اليوم .. بما أنها رغبتها ..
فجر بكل توتر:طيب وينه الدكتور ..؟!
أشرت لهم على الطريق:من هنا ..
..
.
..
على بعد كم ممر ..
بلع ريقه بكل توتر و الصدمة بعيونها:سرطان ..؟!
عبد الملك و عيونه على الورق:عندنا فـ المملكة أغلب الناس تسميه فقر دم و هو أساس نوع من أنواع السرطان و أقلها فـ مستويات الخطورة ..
لمعة عيون مياف و الخوف بصوته ..:طيب من متى فيها هالشيء ..؟!
زفر بكل ضيق:راجعت ملفها الطبي .. من فترة قريبة دخلت المستشفى و إن ما خاب ظني هذا بداية تحول فقر الدم عندها إلى سرطان .. لكن الدكتورة اللي مسكت حالتها صنفته فقر دم و اكتفت بالمغذيات و الفيتامينات .. كوصفة لها ..
زفر بكل ضيق:طيب وش بيصير لها ..؟!
عبد الملك:المفروض من شهر أو شهر ونص يبدا نقل الدم لها .. يعني مثل عملية تغير الدم .. حتى تجدد صفائح الدم عندها .. بسسس ..-سكت و التردد واضح على وجهه ..
مياف بكل خوف:وش اللي بس ..؟!
زفر بكل ضيق:أنا أفضل أنها تبدا بالعلاج الكيماوي .. اضمن لها لأن المرض انتشر بكل مكان بجسمها .. و تبديل الدم كل نهاية شهر راح يعذبها ..
مياف:طيب ليه لثتها تنزف وش دخلها بالسرطان ..؟!
ابتسم:هاذي من أعراض السرطان اللي قليل اللي يعرفونها .. ع العموم أنا راح أشجع أهلها على العلاج بالكيماوي لأنه الأفضل ..
تنهد بكل حزن:لازم تقنع أهله بهالشيء ..!
عبد الملك بكل حماس:لازم .. عشانك بس ..
ابتسم رغم ملامح الحزن:و علاج الكيماوي كم يأخذ فـ حالتها ..؟!
عبد الملك:أنا موب خبرة فـ هالموضوع .. لكن إذا ما خاب ظني بيأخذ ثلاث أسابيع على الأقل .. غير كم جلسة حتى تتأكد من أنها تشافت ..
زفر بكل ضيق:عبد الملك الله يـ..
قاطعتهم:دكتور لو سمحت ..
لف عليها عبد الملك:خير يا دكتورة ..؟!
زفرت بكل ضيق:أهل المريض اللي استلمتها أمس .. من الفجر و هم هنا يبون يعرفون وش صاير على بنتهم ..!!
عبد الملك:و ليش ما قلتي لهم ..؟!
الدكتورة بكل توتر:أنا بحياتي ما سويت شيء مثل كذا .. و بعدين أنت أكثر خبرة فـ توصيل هالأخبار من غير ما تصدم ..!!
زفر بكل ضيق:طيب هم وينهم ..؟!
ابتسمت بكل إحراج:فـ مكتبك ..؟!
ناظرها بكل لوم:ما شاء الله .. ما في أي مجال للنقاش ..
اتسعت ابتسامتها:طول عمرك الخير و البركة ..
زفر بكل ضيق و هو يبعد .. و مياف وراه ..
.._.._.._.._.._..
جوري بكل لوم:لو أنك مخلينا نروح معها فـ الطيارة كان الحين واصلين ...!!
نواف و عيونه على الطريق:وش هذا .. غيره و إلا ايش ..
ناظرته بنص عين:أنا أغار ..!
ابتسم:طيب نشوف ..
جوري بكل غيض:لا يكون بتسكن معنا ..؟!
نواف يحرق دمها بكل برود:ايه وش فيها .. !!
جوري بكل ضيق:و الله أنا ما أضمن أترك ولدي عندها ..!!
نواف:ليش وش شايفتها سفاحة ..!!
جوري:مرت الابو .. تظل مرت أبو .. و بعدين أنت ما تسمع هالقصص اللي تشيب الراس اللي تذبح و اللي تكب كلوركس ..
نواف:الله .. الله ..!!! .. وش هالكلام الكبير ..!!
جوري:لا كبير و لا مبالغة .. بس أنت موب داري عن الدنيا ..!!
نواف:أنتي مصدقة .. هي أساسا شارطة تكون فـ بيت لحالها ..
جوري بكل تردد:و أنت بتحط لها بيت ..!
نواف:لا طبعا .. شقة صغيرة على قدي و قدها .. أنا ما تعبت نفسي و نقلت هنا عشان أصرف الزيادة فـ راتبي على شقة ..!
ناظرته بنص عين:هذا اللي يتزوج على ثنتين ..!!
نواف بكل لوم:أشوف قناعاتنا تغيرت..؟!
جوري:لا قناعات و لا هم يحزنون .. بس اللي يتزوج أكثر من وحدة لازم يعرف أنه داخل فـ خساير مالية ما لها حد ..
زفر بكل ضيق:من هالناحية صدقتي ..
ابتسمت من وراء النقاب .. دقايق صمت .. صوت المكيف غطاء على الأجواء ..
خذت نفسها بكل حماس و مع كذا التردد واضح بصوتها:أقول نواف ..
نواف و عيونه على الطريق:خير ..!
جوري:أمس دقيت على ليان ..
نواف بكل استغراب:من ليان ..؟!
جوري:صديقتي اللي أم زوجها تصير خالتي ..
نواف:هي موب مسافرة شهر العسل ..!
جوري:لا رجعت من يومين عشان شغل زوجها ..
نواف:اها ..
جوري بكل استغراب:ما سألتني وش المعنى من كلامي ..؟!
زفر بكل ضيق:أكيد خذيتي عنوان خالتك ..
ابتسمت بكل إحراج:ايه ..
نواف:خلاص شوفي يوم فاضي .. أوديك لها ..
جوري بكل تردد:وش رايك اليوم ..؟!
نواف بكل صدمة:اليوم ..!
جوري:ايه .. بنوصل على الظهرية .. و أنت بتأخذ لك ساعة أو ساعتين ترتب وضع دلال و تخلص الكم شغله اللي عندك .. ترتاح ساعتين ثم توديني ..
زفر بكل ضيق:لاء اليوم زحمة ما ينفع ..
جوري:طيب أروح بتاكسي ..
نواف بكل عصبية:وش تاكسيه ..؟!
جوري بكل ضيق:لما كنت فـ الشرقية كنت تخليني أروح و أجي مع التكاسي ..؟!
زفر بكل ضيق:خلاص إذا فضيت وديتك .. و إذا ماحصل خليها يوم ثاني ..
همست بكل استسلامية:إن شاء الله ..
.._.._.._.._.._..
وسن و عيونها على شاشة الاب توب بكل تركيز ..:اممممممممم ..
جالسة جنبها على السرير .. و لابسة وحدة من بيجاماتها .. جمان و الترقب بعيونها:ها بشري ..
لفت عليها وسن بكل صدمة:99 ..!!!
ابتسمت بكل راحة:و الله ... الله يبشرك بالخير ..
نقزت عليها ضمتها:أختي دفررررة ..
اتسعت ابتسامتها و هي تضمها:راح نص الطريق ..
بعدت عنها و بكل حماس:لازم نبداء نذاكر للقدرات ..!
جمان بكل توتر:بس ما حجزت لي مقعد .. أخاف تكون راحت علي ..
سحبت جوالها من على الكامدينة:لا تخافين الحل بيدي ..-فتحت سجل الاتصال و طلبت رقم ..
رنة .. ثنتين .. ثلاث .. من وراء السماعة:هلا و الله و غلا و أخيرا حنيتي علينا ..
وسن:صباحك سكر بيش ..
بشاير:أحلى صباح بصوتك .. أخبارك يالغلا ..؟!
وسن بكل حماس:تمام .. بس خلك مني و من أخباري .. بيشو بغيتك فـ خدمة ..؟!
بشاير:عيوني لك ..
وسن:فيه وحدة .. ما أمداها تسجل قدرات أبيها تختبر معي ..
بشاير:و من هاذي اللي سرقت قلبك مني ..!!
ابتسمت وسن:أنتي وين و أنا وين ..!! .. هاذي أختي ..
بشاير بكل استغراب:أختك .. كل خواتك متخرجات .. و دنو فـ الجامعة ..!
وسن:لاا سالفة طويلة .. لازم تجيني اليوم و أقول لك على كل شيء .. المهم تقدرين تدبرين لها مكان ..
بشاير:يب شور .. تعرفين القاعة اللي راح نختبر فيها مو أي أحد يدخلها .. و أمي قدها .. بس عطيني رقمها أخلي أمي تسجلها ..
وسن:طيب أكتبي عندك .......... ..
زادت نظرة الاستغراب فـ عيون جمان .."من جد ما في شيء يصعب عليهم ..!" ..
وسن:قلبو .. ثانكس سو متش .. أنا اخليك ألحين ..
بشاير:طيب أشوفك العصر ..
وسن:اوووكيه .. يالله باي ..-نزلت السماعة و هي تسكر الخط .. رفعت عيونها على جمان:موضوع القدرات و خلصنا منه ..
وقفت:يا الله خلينا ننزل نفطر .. حدي جوعانة ..
ابتسمت و بكل تردد:لا ما راح أنزل ..
جلست على طرف السرير:ليه ..!؟
جمان بكل توتر:للحين ما اعرف وش راي أمك فيني ..؟!
وسن بكل ضيق:ما سمعتي محمد امس .. قال خلاص لا عاد أحد يفتح الموضوع مع امي و خلوا كل شيء يمشي طبيعي ..
جمان:بس حتى ولو هذا بيتها .. ما لي الحق أجلس هنا ..-بكل لوم:لو إني رحت مع مياف أمس ..!
زفرت بكل ضيق:مياف كلها كم أسبوع و يرجع هنا .. و بعدين هذا بيت أبوك و للمعلومية ترها مو بأسم أمي .. عشان تقولين بيتها و حقها و مدري ايش ..!
هزت رأسها بالنفي:بس حتى ولو .. ما لي الحق أتصرف بحرية تضايقها ..!
وسن بكل ضيق:أووف منك على طول معقدة الأمور ..!
طقت الباب و دخلت:صباح الخير ..
وسن بكل ضيق:صباح النور ..
دخلت دينا و بكل استغراب:وسن معصبة غريبة .. قلت اليوم ما راح نشوف غير الابتسامة دامها لقت غيرنا ..!
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك