رواية بقراري ضيعت نفسي واحبابي -12
راحت فاتن أما فيصل ظل بمكانه.... تذكر خواته، بمجرد ما يتخيل أن سجى جالسه مع واحد يعصب.... كيف لو صار واقع" الدنيا دين يا فيصل ومثل ما تسوي ببنت الناس فيه من يسوي لأختكـ "....
ـ : بدكـ شي استاز
فيصل: لا... ولا أقولكـ هات لي قهوه ساده
الويتر: تكرم استاز
راح الويتر وجا زياد وشاف فيصل جالس لحاله وسرحان....
زياد: مساء الخير
فيصل: مساء النور
زياد: ليه جالس لحالكـ
فيصل: الحلوه راحت
جا الويتر وقال: وهي أحلى اهوه لأحلى شب
زياد: أبغى موكا
الويتر: تكرم استاز
زياد: فيصل وش فيكـ سرحان
فيصل: مدري بس قلبي مقبوض
زياد: خير اللهم أجعله خير... من وشو مقبوض
فيصل: من فاتن هذي... بس أجلس معها أتذكر خواتي... خايف أنهن مثلها
زياد: لا توسوس ولا شي... أمكـ مربيه خواتكـ عدل
فيصل: مدري أنا خايف وبس
زياد: الحين كذا وخايف كيف لو تروح شقق واستراحات
فيصل: اعوذوا بالله... ما بقى الا هي
بعد ربع ساعة طلع فيصل من المجمع وراح البيت وشاف أمه بالصالة....
جلس بطفش وقال: سلام يمه
أم فيصل: وعليكم السلام... وأخيرا جيت من زمان احتريكـ
فيصل: خير يمه وش بغيتي
أمه: كل خير... فيصل يمه ما تفكر بالزواج
فيصل يكره لحظة الخجل لأن وجهه يحمر بسرعة.... ومجرد ما سمع كلمة زواج جت بباله فاتن الحلوه.... أعمارهم متقاربه وأفكارهم وحده.... فرصة يقول لأمه عنها بس مو عارف كيف يبدأ....
أم فيصل شافت وجه ولدها محمر قالت: فيصل وجهكـ وابتسامتكـ تقول أنكـ راضي
فيصل يناظر أي شي إلا وجه أمه: عادي
فتحت سجى باب غرفتها وشافت أمها جالسة مع أخوها وواضح أن عندهم موضوع خاص.... وقفت تسمع إذا يستاهل الموضوع تسمعه ولا تطنشه....
أم فيصل: طيب قلي وش رايكـ بديمه
فيصل: ديمه بنت خالي
أمه: ايوه... حلوه ومزيونه ونعرفها
نزل فيصل عينه للأرض وهو يقارن بين فاتن وديمه.... في فرق بين الثنتين وفرق كبير بعد....
انشدت أعصاب أم فيصل وسجى.... أم فيصل تبي تفرح بولدها وببنت أختها وسجى تبي تبشر ديمه وتفرحها....
رفع فيصل نظره لأمه وقال: شمعنى ديمه يمه
أمه: أحسن شي فيها أنها بنتنا ونعرف أخلاقها... نعرف من هم أهلها... وإذا على أبوكـ مراح يعارض
فيصل: أبوي ماله دخل... طول عمره ما يدري عني جت على زواجي يعني
ناظرت أم فيصل ولدها بصدمة.... نفس الكلام قاله أبوه من قبل ونتيجتها تطلقت: فيصل لا تسوي شي من ورا أبوكـ.... تراه سواها قبلكـ وأخرتها أنا تطلقت ودفعت الثمن معكـ ومع أختكـ
فيصل: طيب خلينا من أبوي الحين... واللي تطلبينه صعب
أمه: ليه وش فيها ديمه... أنت شايف عليها شي
فيصل: ايوه شايف شي وأنتم ما تدرون عنه
أمه: وش شايف
وقف فيصل: ديمه يا أمي مثل أختي... كيف تبين تزوجيني وحده ما أعتبرها إلا أخت لي
حطت سجى يدها بفمها.... وش رد ديمه لما تعرف راي فيصل فيها وهي تموت فيه.... رجعت الغرفة ما تبي تسمع أي شي زيادة.... جلست وهي محتاره كيف تقول لديمه عن فيصل هي تعرف أنها تحبه وبانيه أحلام كبيرة معه....
في بيت أبو راكان....
طلعت شوق من جناحها وريحة عطرها سابقتها.... وقفت عند باب الأصنيصل وجت عينها بجناح رياض.... ابتسمت بخبث وراحت لجناح أمها وخذت مفتاح جناح أخوها....
دخلت عليه وهو كان يتفرج ع التلفزيون.... انبسط لما سمع الباب فتح.... أخيرا في أحد تذكره، استغرب لما شاف أخته جايه....
شوق: هاااي روورووو
رياض: رورو!!... شايفتني بزر ويا وجهتس
شوق: هههههه أنا أدلعكـ يا المفهي
رياض: محد طلب منتس تدلعيني
شوق وهي تدور قدامه بدلع: رياض وش رايكـ بعباتي... شريتها من (..) تجنن صح
ناظرها رياض وهو عارف أنها تبي تقهره.... أبعد نظره عنها وما قال شي لأنه متوقع ردها....
شوق: غريبه وش عنده الشيخ رياض ساكت... ـ ما شافت رد وكملت: ما تصدق كيف أنا عايشه بحريه واااو... أطلع أدخل ألبس ومحد يقولي شي... تدري ليه لأنكـ معاق... هههههههه والله ارتحت منكـ، كنت مثل العظم بالبلعوم وشلته... صحيح مصائب قوم عند قوم فوائد
رياض وهو يناظر التلفزيون: انتبهي لحالتس بس... ترا الشباب يدورون أشكالتس بالسوق... ومو عشان أنا مقدر عليتس تفرحين... لا تنسين اللي بالسماء يراقبتس ويحاسبتس على كل شي
شوق: لا تخاف محد يقدر علي... وخلكـ على تلفزيونكـ ويخب عليكـ... ولا أقولكـ خلني أغير لكـ القناة
حطت له على قناة مسكره وقالت: هذي زينه ناظر الألوان حتى تعتمي وجد أفتكـ منكـ ههههههههه
طلعت من الجناح وهي مبسوطه.... التفتت لما سمعت صوت راكان: شوق ليه ما قفلتي الجناح
شوق: سوري نسيت
راكان: شوق... أبعدي عن رياض لأكسر رجلتس
شوق وهي عند باب الأصنصيل: ما تقدر... وبعدين خلني اخذ حقي منه... حشا صاير لي مثل الحجر بالجزمه
عصب راكان: شووق
دخلت شوق الأصنصيل وأشرت بيدها: باااي
راح راكان لجناح أخوه ودخل: مرحبا رياض
رياض: مرحبتين
راكان: متى صحيت توقعتكـ نايم
رياض: صار لي ساعة من صحيت... بس جت أختكـ الهبله تقرقر على راسي وطلعت
راكان: ما عليكـ من حكيها يا رياض
رياض: الله يهديها بس... أمي موجوده
راكان: ايوه جالسه تتقهوى مع أبوي... وهذا أنا جيت لكـ عشان ننزل نتقهوى معهم
فتح باب الأصنصيل وابتسمت أم راكان لما شافت عيالها جو.... ما تدري وش ها الحنان اللي نزل براكان وخلاه يقوم بأخوه....
راكان وهو يدف الكرسي المتحركـ: وهذا رياض جا
أبو راكان: حيا الله رياض
رياض: الله يحيكـ... شلونكـ يبه
أبو راكان: نحمده على كل حال... وأنت وش مسوي اليوم إن شاء الله أحسن
رياض: ما تغير شي... بس الحمد لله
أم راكان: راكان مدد أخوكـ ع الصوفا
رياض: لا يمه مليت وأنا متمدد خليني جالس شوي
أبو راكان: رياض
رياض: سم يبه
أبو راكان: سم الله عدوكـ... اليوم الصبح كلمت دكتور بنويوركـ مختص بـ....
قاطعه رياض: كفايه يبه... أنا ما عاد أبغى مستشفيات طفشت والله
أبوه: بس هذا دكتور شاطر... وناس كثير تعالجوا تحت يده
أمه: أنت ما خليتنا ندور علاجكـ... كلها اسبوعين ورجعتنا
رياض: يبه يمه أنا سلمت أمري لربي... لأن كل التحاليل أثبتت إني سليم... ما تدري يمكن أنا مسوي شي غلط وربي يعاقبني عليه
راكان: خلاص يبه يمه أتركوا رياض براحته... على فكره رياض ربعكـ بيجونكـ
ابتسم رياض: جد !!
راكان: ايوه أنا شفتهم بالصدفه وقالوا يبون يشوفونكـ وأنا وعدتهم ع الخميس... مناسب الخميس ولا
رياض: أكيد مناسب... متى بيجون
راكان: الساعة 10 بالليل... ـ رفع البسكوت: تبي بسكوت
رياض: ايوه
بدا راكان يستهبل على رياض ويكلمه مثل الطفل.... ورياض يضحكـ عليه لأنه متغير 180 درجه....
بعد أسبوع أبو ديمة مع بنته وسجى بنت أخته بالفيصليه....
ديمه: سجوو ناظري الساعة هنا
سجى: رووعه
ديمة: مدري وش أختار للبنت
سجى: وش المناسبه
ديمة: عيد ميلاد
سجى: لما تهدينها ساعة بتكون هدية حلوه... أممم حتى ألاكسسوار هدية حلوه... وأساسا الهدية بقيمتها المعنويه مو المادية... حتى لو تكون بوكيه ورد
ديمه: صح كلامتس والبوكيه بيكون مع الهدية
أبو ديمة: يللا يا بنات وش قررتن عليه
ديمه: الساعة بتكون أحلى هدية... يللا سجوو خلينا ندخل... ـ والتفتت لأبوها: يبه وش فيكـ منت داخل معنا... ترا محد بيدفع غيركـ
أبو ديمة: هههه أنتن يبغي لكن ساعة عشان تختارن شي... وأنا بحتريكن بره
دخلت سجى وديمة المحل أما أبو ديمة جلس على الكرسي وهو يناظر اللي حوله.... انتبه لما شاف فيصل يتمشى مع بنت.... وتفاجئ لما شاف البنت كاشفه وجهها وما عرف أنها فاتن....
بالليل رجع فيصل لبيتهم.... دخل الصالة وشافها فاضيه راح المطبخ....
فيصل: سلااام على أحلى أم فيصل
أم فيصل: ههههه وعليكم السلام... وينكـ فيه طول اليوم حتى ما تعشيت معنا
فيصل: راح علي الوقت وأنا جالس مع الشباب... وتعشينا سوا
أم فيصل: بما أنكـ تعشيت رح لخالكـ تراه يسأل عنكـ وبالمرة جب معكـ أختكـ
ناظر ساعته وقال: طيب أنا طالع وإذا تبين شي اتصلي علي
ديمه بصدمة: ايــــــــش
سجى: اللي سمعتيه
ديمه: من قالتس... كيف عرفتي
سجى: سمعته بأذني يا ديمه
جلست ديمه تبكي.... قربت منها سجى وقالت: خلاص يا ديمه... أنسي فيصل لأنه عمره ما فكر فيتس
ديمه تبكي: حرااام والله حرام
سجى: ما تدرين يا ديمه... يمكن فيصل ما يناسب لتس
ما ردت عليها ديمه ورن جوالها: هلا خاله
ـ : ............
سجى: طيب خاله... ثواني وجايه
سكرت الخط وقالت: ديموو أنا بمشي الحين... أهدي شوي ولا تفكري بشي
ديمه بصوت باكي: لا تتركيني سجوو... نامي عندي اليوم
سجى: لا أمي تبيني وأرسلت فيصل ياخذني... وأنتي محتاجه تجلسي لوحدتس شوي... خليتس قويه يا ديموو لا تضعفي... ما تدرين إن شاء الله ربي يرزقتس برجال أحسن من فيصل
جلس فيصل مع خاله بالمجلس....
فيصل: خير يا خالي تقول أمي أنكـ تبيني
أبو ديمه: فيصل وينكـ اليوم الساعة 7
فيصل: مع الشباب
أبو ديمه: ما له داعي الكذب يا فيصل... لأني شفتكـ بالمجمع ومعكـ بنت كاشفه وجهها
نزل فيصل عينه وما رد....
أبو ديمه: تراضاها لوحده من خواتكـ يا فيصل
فيصل: لا طبعا... وأنا أساسا نويت أتركـ ذا البنت
أبو ديمه: يعني فيه غيرها
فيصل: لا يا خالي ما أعرف غيرها
أبو ديمه: طيب ليه فجأة قلت بتتركها
فيصل: لا مو فجأة... من فتره وأنا مقرر أتركها
أبو ديمه: ليه
فيصل: ظروفها نفس ظروفي... وزياده على كذا أسمها
أبو ديمه: وش فيه
فيصل: أسمها فاتن بنت تركي العالي... وخفت أنها تقرب لي من أهل أبوي
أبو ديمه: بالله عليكـ... وأختكـ اللي بالدمام مو أسمها فاتن
وقف فيصل من صدمته: لا يكون... لا ما يصير... أذبحها والله أذبحها
أبو ديمه: فيصل أسمعني شوي... رح البيت ولا تقول لأمكـ أي حاجه الين أتأكد
فيصل: وكيف تتأكد
أبو ديمه: بسأل ربع أبوكـ... يمكن هو هنا وجايب خواتكـ ولاهي عنهن
فيصل: ايوه يرحم والديكـ
طلع فيصل مع أخته وراح البيت وهو يفكر.... وما قدر ينام الا وجه الفجر....
انبسط رياض لما شاف ربعه جايين عشانه.... بعكسهم هم تفاجأو لما شافوا شكله بالكرسي المتحركـ وراكان يدفه.... ناظروه بشفقه لأنه معاق بشكل تام.... سلم عليهم راكان وطلع....
بعد ساعتين وهم يسولفون معه طلعوا.... إلا مهند اللي قرب من رياض وقال: رياض في حرمه أبي أسألكـ عنها
رياض: وش أسمها
مهند: البندري بنت عبد العزيز العاصي... وش تقرب لكم
رياض: ما أعرف وحده بها الأسم
مهند: توقعتها عمتكـ
رياض: لا أبوي ما عنده خوات
مهند" بس أبوكـ هو خالي ": مدري أنا سمعت ها الأسم قلت يمكن تقرب لكـ... ـ قال يستهبل: خسارة كنت ناوي أخطبها
رياض: هههه والنعم والله
ودعه مهند وطلع أما رياض ظل يفكر بأسم البندري.... مر عليه ها الأسم من قبل بس متى.... تذكرها هي نفسها اللي جت لهم الصباح وتكلمت عن حلالها هي وأختها.... وكانت تبي وظيفه، ولما سأل أبوه قال أنها أخته بالرضاعة....
كمل بخاطره" وش صلتها بمهند.. يمكن هي أمه.. لا ما لي إلا خالتي وضحى أسألها "....
بعد يومين....
سكر فيصل الخط وراح لبيت خاله.... ودق عليه: هلا خالي أنا عند الباب
أبو ديمة: طيب أنا جاي
طلع أبو ديمه وراح له فيصل: خالي وش صار... وش عرفت
أبو ديمه: فيصل أركب سيارتكـ والحقني
فيصل: ليه
أبو ديمه وهو يركب سيارته: الحقني وبعدين أقولكـ
مشى فيصل ورا خاله الين وقفوا عند بيت.... نزلوا من سياراتهم....
فيصل: من بيته هذا
أبو ديمه: الحين تعرف
دق أبو ديمه الجرس وفتحت الخدامة الباب.... : بابا هنا
هزت الخدامة راسها وبعدت عشان يدخلون....
أبو ديمه: فيصل أدخل
فيصل: ليه
أبو ديمه: إذا تبي تعرف وش صار أدخل
فيصل: بتدخل معي
أبو ديمه: لا
بعد محاولات دخل فيصل وهو ما يدري وش ينتظره.... دخلت الخدامة وقالت لأبو فيصل عن ضيف يبي يشوفه.... نزل أبو فيصل وشاف بناته جالسات بالصالة....
دانة: بابا ليه ما قلت لي من قبل بيجيكـ ضيف... كان سويت لكم حلا
أبو فيصل: ذا الضيف جا بدون موعد... قولي للخدامة تسوي قهوة... ـ ناظر حوله: وين أميرة عنكم
فاتن تغطي عليها: فوق تكلم عمها... يبه ترا عمتي جايه قريب عندنا
أبو فيصل: حياها الله
راح أبو فيصل المجلس ودخل: السلام عليكم
وقف فيصل: وعل... ـ قال بصدمه: أبوووي!!
أبوه: حيا الله فيصل شلونكـ
فيصل مو عارف وش يقول: كيف ما يصير
أبوه: فيصل وش فيكـ
ما أهتم فيصل من أبوه ودخل داخل.... يبي يتأكد من شي واحد.... وصل للصالة وأبوه وراه، جت عين فيصل بعين فاتن اللي جايه من المطبخ.... ناظرها من فوق الين تحت وهو مصدوم....
ناظرته فاتن وكانت صدمتها أكبر: ففـ..فيصل
فيصل ما توقع البنت اللي يعرفها ومصادقها تكون أخته من أمه وأبوه.... تذكر كلام ربعه عن ها النوعيه من البنات وثار دمه.... تقدم من أخته وعطاها كف وقال: يا قليلة الحيا يا مسودت الوجه... ـ شد شعرها وقال: فضحتيني لا باركـ الله فيتس
مسكت فاتن يده: آآي أتركني
أبو فيصل: ؟؟؟؟؟؟؟؟؟؟
دانه خافت على أختها لأنها عارفه بسوالفها.... والأكيد أن أخوها فيصل كشف فاتن....
تقدم أبو فيصل ومسكـ ذراع ولده: فيصل وش فيكـ
لف فيصل لأبوه وهو يجر شعر أخته: للأسف يا يبه ما عرفت تربيها... ـ ناظر أخته وصرخ: تخليني أنا أحكي عنتس عند الشباب يا مـ.###... ـ رمها بالأرض ورفع صبعه وقال بتهديد: أن لمحتتس بمجمع ولا بمطعم... والله ثم والله لا يكون آخر يوم بحياتس يا حـ.##
طلع من البيت وركب السيارة ومشى ألف.... ومو مهتم من خاله اللي يدق عليه....
طلع فيصل وتقدم أبوه لفاتن ومسكـ ذراعها.... ناوي يكمل اللي بداه فيصل....
أبو فيصل: فاتن... وش مسويه أنطقي
فاتن تبكي....
جلست دانة ع الكنب وهي ترتجف ودقات قلبها تزيد.... من خوفها على أختها تعبت ومحتاجه أدويتها.... ومو قادره تنطق....
أبو فيصل تأكد أن بنته مسويه شي غلط.... عشان كذا تبكي وما تدافع عن نفسها....
مسكها بيدينه الثنتين وهزها: فاااتن وش مسويه
فاتن ترتجف ودموعها تنزل: مـ..ماسو..يت.. ششـ..ـي
نزلت أميرة وهي رايقة ع الآخر.... استغربت لما شافت خالها يصرخ على بنته وهي تبكي.... ناظرت دانه اللي ترتجف ووجها محمر....
ركضت أميرة لها: داااانه
قربت منها وهي عارفه وش فيها.... ناظرت خالها اللي ماسكـ بنته وقالت بخوف: خالي دانه تعبانه... دانه تعبانه
دف أبو فيصل بنته للأرض وقال: حسابكـ بعدين
راح لبنته الثانيه وعرف أن الحبوب ما يفيدها الحين.... ناظر بنت أخته وقال: أميرة هاتي عباتها بسرعه
لبسوها عباتها وراحوا فيها المستشفى.... إلا فاتن اللي راحت غرفتها وظلت تبكي الين دخلت عليها أميرة.... أما دانة حالتها معروفه مهدئ وتنويم....
في بيت أبو راكان....
سكرت شوق الخط بعد ما تأكدت أن صاحباتها جايات بالطريق.... طلعت من جناحها وراحت لجناح أمها....
أم راكان كانت جالسه قبال الكومدينه.... وعندها المصففه السورية تسوي شعرها....
شوق: ماما وين رايحه
أم راكان: أم ريان مسويه حفله بمناسبة تخرج ولدها... تجين معي شوشو
شوق: نوو مامي... بيجون صاحباتي عندي وبنسهر سوا الليله
أم راكان: على راحتس
الكل التفت لما طق الباب ودخلت كبيرة الخدم....
سحر: اعزريني مدام... بس رفئات الست شوء ايجو
شوق: اوكي أنا رايحه... سحر طلعي صاحباتي لغرفتي وسوي اللي قلت لتس عليه
سحر: تكرمي ست شوء
طلعت شوق.... وبعد دقايق وقفت أم راكان بعد ما خلصت المصففه مايا منها.... ناظرت أم راكان شكلها بفخر.... بتفاجئ صاحباتها على شكلها الجديد.... من بعد عملية شد البشرة بوجهها.... وبعد ما شالت الشحم ببطنها، تغير شكلها 180 درجة....
خذت أم راكان أغراضها وقالت: خلاص يا مايا شيلي أغراضتس واقفلي الغرفة... أنا بطلع أخاف أتأخر ع الناس
مايا: تكرمي مدام
طلعت أم راكان وهي واثقة كثير بمايا لأنها تشتغل عندها من 5 سنين.... طلعت من جناحها وشافت راكان يفتح باب جناحه....
صفر راكان لما شاف شكل أمه: فضيعه يم راكان... صغرتي عشرين سنه
نفخت أم راكان ريشها: هههه كل الناس تقول إني صغيرة... بس أبوكـ اللي ما يشوف
راكان: ما عليتس من أبوي... هو عارف أنتس حلوه بس ما يحكي
أم راكان: ما علينا... وش عندكـ جاي
راكان: سلامتس... بس بتروش وبرتاح شوي وبطلع للشباب... وأنتي عندتس حفله اليوم
أم راكان: ايوه يللا لا تأخرني
دخلت أم راكان لجناح رياض وتطمنت عليه وطلعت.... تأكد راكان أن أمه دخلت الأصنصيل وانبسط لأنه تذكر شي مهم.... راح لجناح أمه ودخل.... شاف مايا تجمع الأغراض.... ناظرها وعلى وجهه أكبر ابتسامه....
مايا اللي كانت تجمع الأغراض.... سمعت صوت الباب يفتح ظنت أنها أم راكان نست شي ورجعت تأخذه.... التفتت وشافت راكان واقف يراقبها.... من بسمته ونظرته عرفت وش يبي....
دخلت شوق جناحها وابتسمت لما شافت البنات جالسات عندها....
شوق: هاااي صبايا
الكل: هااي شوشو
ابتهال: شوشو وش عندكـ ع البارتي اليوم
جلست شوق: ولاشي بس قلت أغير المود... ونعملها حفلة بالبيجامات
أماني: ايه والله... يللا متى تبدا الحفله
شوق: خلينا نرقص شوي
خذت الريموت وشغلت الأغاني.... بدوا البنات بالرقص والهبال....
جلست هناء وهي تشرب عصير وقالت: أقول بنات وش رايكن نسوي رومانسيين... ونرقص كلاسيكـ
أماني: ايوه... شوشو عندتس أغاني أجنبيه
شوق وهي تناظر السيديات اللي عندها: لا ماظن... يمكن عند أخوي راكان بروح أشوف
طلعت من جناحها وراحت لجناح أخوها.... لأنها عارفه أنه يموت ع الأغاني الأجنبيه وهي بغرفة بنومه.... فتحت الباب وحط يدها بفمها لما شافت راكان مع مايا.... ظلت ثواني تستوعب وبعدها سكرت الباب.... راحت تحوس بأغراض أخوها حتى تنسى اللي شافته....
طلع لها راكان وهو معصب: شوق وش جابتس
شوق: ابغى أغاني أجنبيه
راكان: تدلين الباب
شوق: ايوه
راكان: أجل فارقي
ابتسمت شوق: اوكي... الليله أقول لأمي وأبوي عن اللي شفته
انقهر راكان، مسكت شي كبير عليه.... مسكها لما شافها بتروح: شوووق... أن نطقتي بكلمة قتلتس
شوق: عطني السيديات
راكان: أحلمي
شوق: اوكي تفاهم مع أبوي
راكان: على بالتس إني خايف من أمتس وأبوتس... لا يا شاطره العبي غيرها لأن مايا زوجتي
تفاجأت شوق: زوجتكـ!! ييع جد ما عندكـ ذوق... متزوج وحده كبر جدتي
راكان: شي ما يخصتس... يللا فارقي
مايا اللي سمعت كل شي.... طلعت وهي لافه الروب على جسمها....: شو في
ناظرتها شوق: وأنتي بعد ما عزيناتس وعديناتس وحدتن منا... تجازينا وتلعبين على راكان يا فـ.##
سكتت من بعد كف أخوها وقال: اووص وقص بالسانتس يا اللي ما تستحين... انقلعي برة يللا
طلعت شوق وهي مقهوره.... تذكرت صاحباتها مستحيل تدخل لهم بها الشكل.... دخلت لجناح أمها تهدي أعصابها.... ابتسمت لأنها ناويه تقول لأمها وأبوها عن راكان.... راحت لصاحباتها ولا كأن شي صار....
فيصل بسيارته، ازعجه رنين جواله.... ناظر الشاشه وشاف رقم أمه.... مجروح، مقهور ومعصب على أخته وماله بال يكلم أمه.... يخاف يغلط عليها بدون ما يقصد.... رمى الجوال جنبه وما أهتم فيه.... تذكر لما كان جالس مع ربعه بالاستراحه....
أسامة: وش أسمها اللي شابكـ معها
فيصل: وش عليكـ منها
أسامه: بالله تنكت أنت وخشتكـ
فيصل: مالكـ دخل
زياد: لا تلومه توه جديد ما يعرف
فيصل: وش اللي ما أعرفه
زياد: ما تعرف أن اللي كلمتكـ يعني كلمت غيركـ
فيصل: لا فتووونه ما تعرف غيري
أنفجروا ضحكـ عليه....
فيصل: ضحكتوا بلا سنون وش فيكم
زياد: بو التروووكـ وش فيكـ... لا يكون صدقتها
فيصل: وليه ما أصدقها
زياد ينبه فيصل حتى ما يصدق البنت وتطلع خاينه.... فقال: فيصل حط في بالكـ أن البنت اللي كلمتكـ يعني كلمت غيركـ طيب... لاحظ طريقة حكيها كيف هي جريئه معكـ وتدلع عليكـ... حتى خجلها تحسه مصطنع
أسامه خاف على فيصل لأنهم هم اللي اقنعوه يسوي مثلهم.... فقال يكمل مع زياد: بالله عليكـ بنت كاشفه وجهها وتتمشى معكـ قدام خلق الله... هذي ما تستاهل حد يناظرها... بس أنت خذ المسأله تسليه مو تصدق أنها تحبكـ وما تعرف غيركـ
زياد: غيركـ شبعان فيها
ثار دم فيصل لما تذكر ذاكـ اليوم وزاد السرعة وشياطين الأرض قباله.... ما انتبه أنه قطع الإشاره إلا لما سمع هرن سيارة مسرعة.... اللي صدمته وتقلبت السياره فيه.... دقايق وتجمعت الناس حوالين سيارته....
.
.
.
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
في بيت أبو راكان
ـ : متزووووج!!
شوق: ايوه يبه... راكان متزوج
أم راكان: من قالتس
شوق: هو قالي بس قولي من زوجته
أمها: من
شوق: مايا
أم راكان بصدمه: وشووو
شوق: صدقيني يمه حتى إني كنت......
أبو راكان: شوق روحي نادي أخوتس بسرعه
طلعت شوق من المكتب، توها بتدخل الأصنصيل دخل راكان.... فتح باب الاصنصيل وقالت شوق: راكااان... رح لداادي يبيك بالمكتب
راكان: لااا تكفين والله إني ميت خوف... أنقلعي وأنتي ساكته
داخل راكان المكتب وما استغرب هجوم أبوه عليه.... ناظرهم ببرود وهم اللي معصبين....
راكان: بالهداوه يا يبه لا يصير لكـ شي
أم راكان: وما لقيت إلا الـ.## مايا
راكان: خلاص يمه لا تتعبين حالتس...
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك