رواية بقراري ضيعت نفسي واحبابي -8
جلست وقال تركي: بنوو وش فيتس
البندري: ما فيني حاجه
حط تركي يده على كتفها وقال: واللي بظهرتس وش تسمينه
غرقت عيونها دموع وسكتت....
استغرب تركي ردة فعلها وقال: من سعد
بكت البندري: والله ما كان كذا... والله كان يحبني ويقولي بنوتي... وأنا ما أقوله الا بابا سعد
مسح تركي دموعها وقال: ليه وش اللي غيره عليكم
البندري: زوجته هي السبب... من تزوجها صار يكرهنا ويبي يتخلص مننا بأي طريقة
تركي: الله يسامحهم... خلاص بنوو لا تبكين أنا موجود وكلنا حولتس... لا تخافين منتي وحيده
لما شافها تمسح دموعها حب يلطف الجو وقال: وش جبتي لي من المدرسة
ابتسمت البندري ووقفت عند شنطتها.... طلعت سنيكرس وعطته اياها....
تركي: سنيكرس حلوو... بس يا البخيله جايبه لي واحد وصغير
البندري: ما يبيعون الا هذا... واساسا أنا شريت لكـ اثنين... بس الحين اشتهيت الثاني
تركي: لا مو على كيفتس... أبيهم اثنينهم
البندري وهي تحركـ السنيكرس بيدها: لا يعني لا
قام تركي وراها وهي تضحكـ وتركض.... وهو مبسوط باللعب معها لأنه يحسها بزره.... فجأة وقفت البندري ومثلت الألم....
جلست البندري وهي تضغط بطنها: آآي... آآي بطني
خاف تركي وقرب منها: بنوو وش فيتس
البندري ماسكة نفسها لا تضحكـ: بطني يألمني
تركي بيموت من الخوف ومو عارف وش يسوي.... قال والخوف واضح بصوته: وش تبين، وش أسوي لتس... تبين مويه ولا آخذتس للطبيب
ابتسمت البندري: لا أبي سنيكرس
ضحكـ تركي على حركاتها: هههههههههه... خلاص خذيه ما عاد أبيه أخاف أتسمم
ضحكت البندري: يكون أحسن
شالها تركي فجأة ودار فيها وقال: أموووت أنا ع الدلوعه
ضحكت عليه وهي مبسوطه....
ها الذكرى خلته طول الوقت يناظر السقف وهو مبتسم.... وصوت ضحكها بأذنه، رجع للواقع وهو يسمع صوت غادة وبنته.... خذ التلفون واتصل ببيت أم سعد....
كانت جالسه مع صديقات أختها.... تسولف وتضحكـ معهم رن التلفون وردت: ههههههه... ـ وبدلع: هلا
تضحكـ.... البندري تضحكـ يعني مبسوطة ببعده.... وهو اللي مقطع حاله عشانها....
تركي: كيف حالتس يا بنوو
تفاجات البندري: تر... ـ قطعت كلمتها وقالت: دقيقة... ـ وقفت وقالت: عن أذنكن
طلعت من عندهم وجلست بالصالة....
البندري: الوو
تركي: هلا... كيف حالتس
البندري: طيبه... وفيصل بخير
تركي: بندري أبغى أشوف فيصل
البندري خافت: ايش
تركي: أبغى أشوفه يا بندري... أنا بالرياض الحين لا تحرمين فيصل مني
دمعت عيونها لأنها خايفه أنه يتراجع عن كلمته.... وياخذه منها: وبتاخذه مني
تركي: لا طبعا... بس أبغاه معي اليوم وبرجعه لتس بالليل... لأني قريب مسافر
ارتاحت شوي: ومتى بتجي
تركي: الحين إذا هو جاهز
البندري: طيب تعال
تركي: طيب فمان الله
سكر الخط ولبس وطلع من الغرفة.... سمع صوت غادة بالحمام وراح لها....
غادة: فتووونه... يللا حبيبتي تعالي
فاتن تلعب بالمويه وتضحكـ....
تركي: أنا طالع تبين شي
التفتت غادة: وين رايح... ـ شافت نظرته وقالت: ما أبغى شي
طلع تركي أما غادة بعد ما روشت فاتن ولبستها.... جلست بالصالة ويدها بخدها.... أي عروس هي اللي طلع زوجها وتركها لحالها.... أن قالت لأهلها يا ويلها وأن كلمت تركي هم يا ويلها.... خذت الريموت تتسلى بالتلفزيون....
وصل تركي لبيت أم سعد ودق الجرس.... انفتح الباب وطلع فيصل.... قرب تركي وشال ولده وباسه.... لمح يدها وهي تحط الشنطة عند الباب....
تركي: فصولي شلونكـ
فيصل: ثين... بابا أبي اتوونه
تركي: هههه طيب بتشوف فتوونه
دمعت عيونها لما سمعته يضحكـ مع ولده.... وقالت: تركي... يا تركي
التفت لجهة الباب وقال: سمي
البندري: متى بترجع فيصل
تركي: الساعة 9 أو 10 تقريبا
البندري: جب فيصل لبيت أخوي
سكرت الباب ودخلت وهي تبكي على حظها.... طلعت مشاعل من عند صديقاتها وشافت أختها تبكي....
مشاعل: بنوو وش فيتس
وقفت البندري وضمت أختها: ليه يطلقني تركي وأنا بنت خالته... مو حرام عليه يسوي فيني كذا
مشاعل: بنوو وش ها الحكي... صار لكـ أكثر من 5 أشهر وأنتي مطلقه... ليه ها البكي الحين ووين فيصل
بعدت البندري عن أختها لأنها مراح تفهمها.... وقالت: خذه أبوه
مشاعل: من متى
البندري: من شوي
مشاعل: هو اللي اتصل من شوي
البندري: ايوه قال أنه بالرياض ويبي ولده
مشاعل: وهذا ما يعرف يتصل على بسام... ولا يظن أنتس للحين زوجته
البندري: لأنه يعاني مثلي
مشاعل ما تبي البندري تعيش بوهم فقالت: ومن قالتس... هو متزوج بنت عمه
ما ردت البندري....
مشاعل: اتركي عنتس تركي وتعالي أجلسي معنا
البندري: لا منيب رايقه... باتصل بدلال
ركب تركي سيارته مع ولده ومشى للشقة.... استغربت غادة من الولد اللي مع زوجها....
ركض فيصل لما شاف أخته: اتوونه
رفعت فاتن يديها لأخوها: أأأ...أأ
ناظرت غادة بتركي اللي جلس بالأرض يلعب مع عياله.... هجموا عليه عياله وهو يضحكـ معهم ويدغدغهم....
غادة: من ولده هذا
تركي: ولدي
غادة: عندكـ ولد
تركي متمددت ع الأرض وهو رافع بنته ومبتسم لها: ايوه
غادة: بس عمي قال أن ولدكـ ميت
تركي وفيصل يضغط على حضنه: هذا هو قبالتس حي ويلعب
انقهرت غادة: كذبت علينا يا تركي... وقلت أنكـ متزوج من سنه... وولدكـ عمره 3 أو 4 سنوات
عدل تركي جلسته والتفت لها وقال: ايوه كذبت وأنا متزوج من 5 سنين... وأن عرفوا أهلي بها الشي لأكون رامي عليتس يمين الطلاق
راحت لغرفتها وبكت دم بدل الدمع.... لأنها تذكرت كلام أمها اللي ما كانت راضيه بها الزواج....
ناظر تركي لخيالها اللي راح وتنهد" لو بنوو تحلي كان من زمان أنا مسرحتس "....
فيصل: بابا أبي واااوه
وقف تركي وطلع مع عياله يتمشى فيهم.... وبعدها ناظر ساعته وراح المطعم وشرا وجبات ورجع للشقة.... دخل وشاف غادة جالسه وجنبها شنطها....
وقفت غادة: طلقني
تركي: ايش
غادة: مالي قعده معكـ دقيقه وحده طلقني
طنشها تركي وعطا ولده وجبته.... وجلس بالأرض معه ومع فاتن اللي تاكل بطاطس....
انقهرت غادة وقربت: وش تسوي
تركي: ارقص... وش رايتس يعني بتعشى
غادة: ودني بيت هلي... ما أبغى أجلس معكـ
تركي: يصير خير تعشي قبل
غادة ودها تخنقه: ما أبغى عشا ودني لهلي
تركي: ما تبين عشا براحتس بس جهزي أغراض العيال برجعهم لأمهم... ونرجع الشرقية
وصل تركي لبيت بسام ودق الجرس.... فتح بسام الباب: هلا تركي وش أخباركـ
تركي: نحمده على كل حال... كيف حالكـ أنت
بسام: بخير... تفضل
تركي: دام فضلكـ... بس أنا جايب العيال لأني راجع الشرقية
بسام: كأنكـ هونت عن السفر
تركي: لا منيب مسافر
بسام: طيب متى ترجع تاخذ فتوونه
تركي: مدري... يمكن تطول عندكم
نزل تركي عياله مع شنطهم وقال: يللا مع السلامة
بسام: انتبه للطريق
تركي وهو يركب سيارته: لا توصي
دخل بسام وهو شايل فاتن والشنط.... ركض فيصل لأمه وضمته ودمعت عيونها.... خذت فاتن ومسكت يد فيصل وجلست معهم....
مشاعل: غريبه جاب فاتن
بسام: مدري عنه بس يمكن تجلس عندها فترة طويله
مشاعل: يا ليت
وصل تركي الدمام وراح لبيت عمه.... نزلت غادة وهي مقهوره حتى ما كلف على نفسه يراضيها.... يبغاها من الله ورمها بيت أهلها ومشى.... دخل بيت أبوه والكل استغرب....
مها: تركي!!
أم يوسف: وش جابكـ
تركي وهو رايح فوق: أسألوا بنت العم
ابتسم تركي وأخيرا نفذ خطته وبيتركـ غادة معلقه....
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
باليوم الثاني عصب أبو يوسف لما عرف باللي سواه ولده....
أبو يوسف: دام ما تبيها ليه تزوجتها
تركي مطنش: أنت قلت لي تزوجها وأنا تزوجتها... مو هذا اللي تبيه
يوسف: بس يا تركي مو عدل اللي تسويه... هذي بنت عمكـ كيف ترفضها كذا
أبو يوسف: طلقها يا تركي
أم يوسف: وشوو
أبو يوسف: غادة بنتي وأنا ما أرضاها لها
تركي: وأنت تبيني أتزوج وأطلق طول عمري... طلاق منيب مطلق يا يبه
أبو يوسف: مو على كيفكـ... لحظه وش سالفة ولدكـ
ناظر تركي أبوه: يعني سوتها غادة
أبو يوسف: ومهددها ما تتكلم... ما تسـ...
قاطعه تركي وهو يوقف: يبه طلاق منيب مطلق... ولاني مرجعها بتركها معلقه واللي تبي تسويه سوه
طلع تركي ولا كأنه يسمع حد....
مر أسبوع وتركي على حاله.... ناس كثير كلموه عشان بنت عمه.... وهو راكب راسه يتركها معلقه....
بالشركة....
سعد كان له علاقات عمل مع أبو يوسف.... وبعد الإجتماع طلع أبو يوسف وعياله وسعد من الغرفة بالشركة.... تركي شاف سعد يطلع مسكـ ذراعه وقاله: انتظر شوي
سكر تركي الباب والتفت لسعد: وش قصدكـ لما قلت لي يا ولد الخاله
ابتسم سعد: ليه ما تدري أن أمي خالتكـ
تركي بصدمة: خالتي!!
سعد: ما قالكـ أبوكـ أن لكـ خالة ساكنه بالرياض... واللي هي أمي
تركي مازال مذهول: أمكـ هي خالتي
سعد: ايوه
تركي: تكذب
سعد: إذا مو مصدقني رح أسأل أبوكـ... وشف وش يقول
تركي: وليه أمكـ ما قالت لي... ولا هي ما تعرفني
ناظر سعد تركي وفهم تركي نظرته مهدد أمه ما تتكلم....
عصب تركي: ويوم أنكـ تدري ليه ما قلت لي
سعد مبسوط: إذا أبوكـ ما قالكـ ليه أنا أقول
طلع تركي معصب من الغرفة ومن الشركة وركب سيارته.... رفع جواله ودق على بسام وما رد عليه.... دق على خويه بدر وطلب منه يتحقق من كلام سعد....
وصل الفيلا ودخل الصالة.... شافته أم يوسف وتوها بتقوله أن غادة طالبه الطلاق.... سكتت لأنه طنشها وراح غرفته وتمدد ع السرير يحاول ينام بس ما قدر.... يفكر بالكلام اللي دار بينه وبين سعد...." توكـ تدري يا تركي أن أم سعد خالتكـ... ليه أبوي ما قالي عنها.. لا يمكن سعد يكذب.. لا أكيد يكذب.. بس وش استفاد من كذبته ".....
قطع أفكارة لما رن التلفون ورد....: الوو
صديقه بدر: هلا تركي
تركي: هلا فيكـ هاه ما قلت لي وش صار
بدر: كلام سعد صحيح
تركي: جد!! من قالكـ
بدر: بسام وقال أنهم توهم يعرفون من فترة
تركي: طيب أنا بتصرف
بدر: وش بتسوي
تركي: بواجه أبوي
بدر: بس انتبه لا يطول صوتكـ عليه... هو أبوكـ بالنهاية
تنرفز تركي لأن بدر يعيد عليه كلام أمه: بس مو من حقه يبعدني عن خالتي من بعد ما توفت أمي... حرام والله أنا عايش أكثر من 8 سنين بالرياض ومدري أن لي خاله... وبالآخر تطلع زوجتي بنتها
بدر: مدري وش أقولكـ بس مالكـ نيه تزورها
تركي: أكيد بروح لها بس بعد ما أواجه أبوي... تبي شي
بدر: سلامتكـ
تركي: فمان الله
سكر تركي الخط وجهز شنطته ونزل تحت.... دخل الصالة وسمع أبوه يتناقش مع زوجته وولده يوسف....
أبو يوسف: محد قاله يتزوج بنت فقارى... أنا بعد ها العمر أحط يدي بيد ناس هـ..##
تركي مقهور: هـ..## وهـ..## يبه أنت تعرف سعد العاصي
أبو يوسف: ايوه
جلس تركي: لو هو جا وخطب مها بتزوجه اياها
أبوه: أكيد والنعم بولد العاصي
ناظر تركي بعيون أبوه: إذا أنت موافق تعطيه بنتكـ... ليه تغصبني أطلق أخته جت علي أنا
يوسف بصدمة: أنت متزوج أخت سعد
تركي: ايوه، والله لو إني عارف أنها بنت خالتي... كان تحلمون تشوفون وجهي هنا... بس آآخ كله من أمي اللي موصيتني ما أرفع صوتي بوجودكـ يا يبه... لأنها عارفه أنكـ بتعاملني مثل ما تعاملها
يوسف: لحظه سعد ولد خالتكـ!!
تركي بقهر واضح: إيوه... ـ ناظر أبوه: يبه ليه ما قلت لي عن خالتي منى... من كم سنة وأنا عايش بالرياض ومدري أن لي خاله... ليه تحرمني منها... إذا أنت تزوجت مغصوب وش ذنبي عشان أدفع الثمن... تطلقني من بنت خالتي عشان تزوجني من بنت عمي... ليه تخليني أعيش مثلكـ
الكل ساكت ومذهول من اللي صار لتركي.... محد قادر يرد لأن الحق مع تركي....
تركي كمل كلامه: تذكر يا يبه أنكـ ظلمتني كثير... بس مهما سويت وحاولت أرضيكـ بظل بعينكـ ولد الخدامة... ـ وقف وقال: تمنيتكـ تعاملني مثل يوسف وخالد بس الظاهر نجوم السماء أقرب لي... ـ ناظر أبوه: أنا برجع الرياض لخالتي وياليت محد يكلمني... ـ مشى لباب بدون ما يناظرهم وقال: أنساني يا يبه وأنسى وجودي... فمان الله
طلع تركي للتهوية وتوه بيركب سيارته سمع أبوه يناديه.... والتفت له...
أبو يوسف: أسمعني يا تركي... لا تظن إني أكرهكـ وشايل بخاطري عليكـ... بس بغيت أشوفكـ قوي عشان تقدر تدافع عن حقكـ... لأن عيال الحرام لعبوا عليكـ وخلوكـ خربان مثلهم
تركي: يبه أنا مقدر أكون مثل يوسف وخالد... يبه اخواني ما شوفكـ تضرب أمهم... عشت بجحيم وأنا صغير حتى بعد وفاة أمي ما سلمت من زوجتكـ... والحين تبيني أكون مثل اخواني تأخرت كثير
حط أبو يوسف يده على كتف ولده: عارف... تركي لو إني عارف أنكـ متزوج بنت خالتكـ... كان مستحيل غصبتكـ تطلقها بس اللي صار صار... الحين رح لعند خالتكـ وأجلس عندها المدة اللي تبي... بس فكر ببنت عمكـ، أنا ما أغصبكـ عليها... إذا ما تبيها طلقها بس لا تتركها معلقه
تركي: طيب... فمان الله
ركب سيارته ومشى للرياض وهو مبسوط بأم سعد.... اللي طلعت له وهو جد محتاج لها....
باليوم الثاني....
جلست أم سعد لحالها بالصالة.... ناظرت بالساعة صار لهم ساعتين طالعين وتاركينها مع العيال.... جت لها الخدامة من بعد ما فتحت الباب....
الخدامة: ماما بابا توركي يبي أنتي
تهلل وجه أم سعد أكيد عرف أنها خالته وجا يشوفها.... وقفت وراحت المجلس وقالت للخدامة تدخله لها....
دخل تركي المجلس وناظرها.... كان يستغرب من نظراتها له وكأنها تحبه.... دمعت عيونه لأن انتبه أن لها عيون أمه....
أم سعد شافته طول وهو يناظرها.... عرفت أنه تذكر أختها وقالت: هلا بتركي هلا بريحة الغالية
تركي: يمه... ـ راح لها وحب راسها ويدها.... قال ودموعه على خده: ليه ما قلتي لي يا يمه ليــه
قالها يمه وبكت.... ضمته بقوة وكأنها أول مرة تشوفه.... وبعد الدموع....
قال تركي: وينتس عني من 28 سنة... وينتس عني بعد ما توفت أختس... ليه تركتيني عند أبوي وما سألتي عني
أم سعد تمسح دموعها: حشى ما نسيتكـ... بس يا تركي، تعرف شلون بسام يتفاهم مع ولدي سعد... هذا أبو سعد مع أبوكـ، يا ما رحنا الشرقية عشانكـ بس أبوكـ ما رضى... وما يبيكـ تعيش بعيد عنه والشرع معه
تركي: وليه أنتي ما قلتي لي... أنا متزوج بنتس من 5 سنين وأنتي عارفه كل شي وساكته
أم سعد: من سعد يا تركي... قال بيرميني بدار العجز إذا قلت لأحد
تركي: لو أنتس قايله لي كان والله حطيتس بعيوني والله
أم سعد: ما تقصر يا يمه... قلي الحين وش أخباركـ
تركي: يمه أبغى أقولتس أشياء كثيرة... بس مقدر اخذ راحتي هنا تعالي بيتي
أم سعد: مدري يا يمه أحسها صعبه شوي
تركي: شدعوه أنتي بتجين بيتي مو شقة عزابيه... وبجيب لتس خدامة وأي حاجه تبينها بجيبها لتس... بس الله يخليتس تعالي بيتي أنا مالي غيرتس... لا تحرميني منتس يمه
دخلوا بسام ومشاعل والبندري البيت.... استغربت البندري لما شافت عيالها نايمين لحالهم....
البندري وهي تصحي ولدها: وين أمي
مشاعل سمعت صوت حد بالمجلس: الظاهر عندنا ضيف
بسام: كأني شفت سيارة تركي برة
راح المجلس وطل عليهم وشافهم يضحكون سوا.... رجع الصالة وقالهم بوجود تركي....
انفطر قلب البندري، صار وجود تركي لأمها مو لها.... حاولت تلهي نفسها عن الدموع ولبست ولدها.... اللي راح للمجلس وقطع سوالف أبوه....
فيصل: بابا
فتح تركي يدينه لولده وقال: هلا بفيصل هلا بحبيبي والله
جلس تركي عند أم سعد ساعة ونص وبعدها استاذن.... وما طلع من عندها الا بعد ما وعدته تجي بيته يومين....
دخلت أم سعد للصالة وشافتهم ساكتين....
شافها بسام: هاه عمتي وش أخبار تركي
أم سعد عارفه أن البندري تنتظر الجواب.... ومتلهفه لأخبار تركي.... قالت حتى ما تتعلق بنتها بشي مستحيل....: الحمد لله بخير ونعمه... مبسوط مع زوجته وقريب يسافرون
مثل ما توقعوا انحسبت البندري وهي تخفي دموعها عنهم....
بعد كم يوم....
تركي كان جالس جنب أم سعد ببيته....
أم سعد: هاه يمه متى توديني البيت
تركي: بعد ساعة
أم سعد: ما قلت لي وش ناوي مع بنت عمكـ
تركي: مدري
أم سعد: رجعها يا يمه
تركي: أرجعها!!... بعد كل اللي قلت لتس تقولين أرجعها
أم سعد: كفاية ظلم يا تركي... ظلمت بنتي لما تزوجتها بالسر وظلمتها لما طلقتها وهي مالها ذنب... وظلمت بنت عمكـ لما تزوجتها وأنت ما تبيها فلا تظلمها وتطلقها
تركي: بس يا أمي أنا...
قاطعته أم سعد: لا تقول تحب بنتي... لا خلاص أنسى بنوو لأنها ما تحلكـ الا بعد ما تتزوج غيركـ وإذا تطلقت أرجع تزوجها
نزل تركي راسه: آآه ما يهون علي أشوف البندري مع رجال ثاني
حطت أم سعد يدها على كتفه: هذا شرع الله يا يمه... رح صلح أموركـ مع زوجتكـ وجبها لي... نفسي أشوفها
تركي: يصير خير
بعد ساعة، دخل تركي لبيت خالته.... وهو ماسكـ يدها يوصلها المجلس عشان تدخل.... سلم عليها وطلع للتهوية.... وقف مكانه لما شاف البندري طلعت تركض وتحاول تمسكـ ولدها اللي يركض ورا الكوره.... طلع فيصل للشارع يلحق كورته.... التفتت البندري لما لمحت حد واقف يراقبها....
البندري بخوف: تركي فيصل طلع للشارع... الحق عليه بسرعه
طلع تركي للشارع ووقف مكانه لما شاف ولده بوسط الشارع.... وسيارة جايه وقريبه منه.... الرجال بسيارته فجأة طلع له بزر يركض وضغط برجله ع الفرامل.... وحاول يوقف قد ما يقدر....
البندري واقفه عند الباب.... حطت يدها بفمها لما سمعت صوت السيارة.... امتلات عيونها دموع لما شافت تركي دخل وهو شايل ولده ومغطيه الدم.... بس كل هذا وهم لأن تركي شاف ولده انحنى وخذ كورته.... ورجع ببساطة لأبوه، تركي شاف ولده جاي له.... أنهار على ركبته وسجد وهو يردد: ألف الحمد لله لكـ يا رب... ألف الحمد لله لكـ يا رب
رفع راسه وشاف ولده قباله.... ضمه وهو يمسح شعره وظهره.... وقف لما سمع الرجال اللي نزل من سيارته وقال: سلامات ما جا له شي
تركي: لا الحمد لله... العذر والسموحه
الرجال: الحمد لله، يخي أمسكوا بزارينكم... ما يسوى عليكـ لو مات قدام عينكـ
تركي: طيب عن أذنكـ
دخل تركي وارتاحت البندري لما شاف ولدها عند أبوه.... خذته وضمته وهي تفحصه....
ناظرها تركي وقلبه مفطور عليها.... محروم منها لأسباب تافهه.... قال: وحشتيني يا بنوو
التفتت البندري واستغربت لما شافته يراقبها.... قالت بقهر: نعم وش تبي... أنت دمرتني يا تركي أطلع برة... أنا أكرهكـ، أكرهكـ
راحت داخل وهي تمسح دموعها....
سند تركي ظهره للجدار وكلمتها تتردد بأذنه...." أنا أكرهكـ، أكرهكـ ".... تنهد تركي" تكرهيني.. وأنا أحبتس وأحب الأرض اللي تمشين عليها.. بس آخ الفاس طاح بالراس.. وما عاد ينفع الندم "....
بعد اسبوع....
رن التلفون ورد تركي: الو
ـ :.......
تركي: كيف ومتى
ـ :........
تركي: أنا جاي فمان الله
راح المستشفى وسأل عنها وراح لغرفتها.... شاف بسام وسعد عند الباب.... قرب من بسام وقال: بسام وش فيها أمي
نزل بسام عينه: أدعي لها يا تركي
ثار تركي: كيف أدعي لها... ليه وش مسوين لها ومنوو زعلها
ناظر بسام سعد بقهر وفهم تركي.... توه بيتكلم الا ومروا من عندهم الممرضات مع الدكتور ودخلوا غرفة أم سعد....
كلها دقايق وطلع الدكتور.... نزل عينه وهز راسه....
تركي: لاااا
دف الدكتور ودخل الغرفة وراح عندها.... وقال: يمه حاكيني يمه أنا تركي... يمه لا تتركيني أنا محتاجتس لا تتركيني
هزها مسكـ يدها وما ردت عليه.... حط راسه بصدرها وبكى كأنه طفل.... مسكه بسام وسعد وصرخ: اتركوني معها... خلوني مع أمي
سحبوه وطلعوه بره.... ضم تركي بسام وهو يبكي: ماتت أمي يا بسام... ماتت أمي الثانية
بسام طبطب على ظهره: الله يرحمها... قل الله يرحمها
سعد: تركي ليه تبكي كنكـ بزر... قل الله يرحمها
رد تركي عليه ببقس بوجهه.... قال بقهر: كل تبن، كله منكـ أنت... أنت اللي ذبحتها، حسبي الله عليكـ
بسام: تركي يللا تعال معي... يللا مشينا
طلعوا وتركوا سعد لحاله....
أول أيام العزاء.... تركي وبسام وسعد عند الرجال ببيت سعد.... البندري وأختها وزوجة أخوها وأهلها عند النسوان.... البندري مقطعه نفسها بكي وأختها تهديها....
انتهى أول يوم ورجع تركي لشقة بدر وما شافه.... أكل الشاورما اللي شراها وتمدد ع السرير.... فكر بالبندري أكيد مقطعه نفسها بكي، من يواسيها غير أن عيالها عندها.... فكر يتصل عليها وخذ التلفون.... بس أنه تراجع ونام....
باليوم الثاني....
دخل يوسف وخالد وسلموا ع الرجال وجلسوا.... خالد يدور تركي بعيونه وما شافه....
ناظرهم بسام والتفت لسعد وقال: سعد... من هذول
سعد: اخوان تركي
بسام بصدمة: ايش
سعد: ايوه اخوانه... ولو هم عارفين أن اخوهم متزوج بنت خالته... كان تركي ما طلقها
بسام: أنا بروح أقول لهم
مسكه سعد: ليه تقولهم... تركي وطلق أختي وهي ما تحله... وش تستفيد لو قلت لهم
سكت بسام....
سعد: لو يبي أبو تركي كان سأل من بنته تركي متزوج... بس ما يفيد شي الحين
بسام: وعشانكـ عطيته أختكـ وأنت عارف أن أهله ما يدرون... هذا هو وعياله وزوجته يدفعون الثمن
سعد: ما يخصكـ
تقدموا خالد ويوسف لسعد وبعد السؤال عن الأحوال.... قال يوسف: بو راكان
سعد: سم
يوسف: سم الله عدوكـ... وين تركي ما جا
سعد: أمس كان موجود بس مدري وش فيه ما جا اليوم
يوسف: اهاا باتصل عليه وبشوف وش فيه... أحسن الله عزاكم
بشقة بدر....
طلع تركي من الغرفة وجلس بالصالة وهو حاط يده ببطنه....
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك