رواية دموع اسقطت حصون القصور -30

رواية دموع اسقطت حصون القصور -30

نوره بتأيد :صادقين اهم شي الهنوف تشوفونها وذا كماليات يهتمون لها مالنا دخل فيها

لمياء :هذا الي صار..

اذن الظهر رقن البنات فوق صلن وانزلو الغداء يغرف تغدو الجماعه وكلن تسهل الي بيروح يتمشى في البلاد والي بيروح للبر

ام فهد بعجله :لمياء امشينا ابوتس يحترينا برى نادي نوف ومنيره وياله ..

لمياء تشرب علبة البيبسي بسرعه :ياله ياله جينا.. احذفته على ساره واضحكت

ساره اصرخت وهي تنفضه من فستانها اليموني لا ينكب عليه :هين انا درايه مهيب امخليه حقها..

نوره تدخل عليها وبسرعه :ساره بسرعه خلينا انرتب المكان ونغسل عشان نلحقهم بدري..

وقفت ساره :خلاص خلي علي المجلس والمقلط وانتي روحي مع الشغاله

اركضت للمغسلة المطبخ تغسل يدها صوت ارجاجيل برى اكيد امي زعلت غسلت يدها وراحت للفوطه تمسح يديها باب المطبخ الخارجي ينفتح لفت لمياء بسرعه للباب تشوف ارتاحت عقب ماشافته منيصير ولد اختها غزيل معه سفرة الاكل حقت الرجاجيل

لمياء تجي وتاخذ منه السفره :سلم منيصير ماعيدت علي

منصور يحبها مع خدها ويتفلت منها

لمياء :ياخي شوي بسالك

منصور بيبكي :هديني بروح معهم بيخلوني

هدته وراح يركض برى وقف عند الباب حط الصحن الي معه شافها منزله راسها وتوخر باقي رز باخر تنورتها وتبعده بعجله

نهاية البارت الثامن عشر

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

لا احلل مسح اسمي من على الرواية ..

تجميعي : ♫ معزوفة حنين ♫..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

البارت التاسع عشر

ارفعت راسها بسرعه عقب ماخلصت عقدت حواجبها بضيقه وكره وبنظرة قهره طنشته ولفت منه داخله لداخل البيت

دخل يده من ورى ارقبته امسحها بتوتر .. وانفخ بفمه بضيقه كل شي كامل كل شي الزين الي اتمناه وابيه تنفس بقهر ولف راجع لمواقف السيارت

ام فهد تهاوش لمياء عقب ماركبت ومشو :اخر من يركب انتي مستحيل تغيرين

نوف تناظرها وتحرك حواجبها لفت منهم لمياء تناظر لبرى كاشخ كأنه معرس غميزته واضحه حتى وهو مايضحك تجذب الرجال كيف وحده كانت تحمل له في قلبها شي كااانت.. تسندت على السيت غمضت يونها بالم وبصوت واطي تسمعه منيره المنسدحه على السيت مثلها غنتها من قلب مجروح

لاردك الله لا ولا اطلب ترد لي

ادعي عليك بعثره في صلاتي

عثره تشلك مابعدها تقومي

يالي نقضت عهودنا الماضياتي

منيره ببتسامه عفويه:حلو صوتتس والكلمات توجع

لمياء تلف لها وفي عينها دمعها تلمع بالم : قد سمعتها بالجوال واعجبتني...

منيره بدون لاتشك :ارسليها لي انكنها عندك

لمياء وبيدها الجوال وبسرحان :مسحتها ..

نوف بدفاشه تطقها :منتب وجه شي زين

لمياء تزحف صوب الباب لاصقه فيه :موب انتي الي تقولين حظي.. لفت لامها وكلمتها ..يمه تكفين بنزل مع فهد

ام فهد :فهد معه امساعد

لمياء بقهر :اووف ماعندهم سيارتهم..

ام فهد :اطرده مفلح زاحمهم ..

لمياء بقرف ويقولونها برواقان كأنهم مستانسين عليه اي شي يسويه يعجبهم ومافيه شي.. كرهي لك بس

منيره :عسى موب ريحة بنتي

نوف :ااااه وينك يامبارك

ناظرت لها لمياء وصدت عنها حظتس يانوف

الساعه ثلاث العصر خلصت نوره وساره ترتيب اغراضهن صكن البيبان واطلعو يركبون في السياره

ام راشد قدام : صكيتو كل البيبان

نوره:ايه فديتتس الا باب حجرتس

ام راشد براعه :ليه جعل امحق

راشد يركب ويسكر بابه :خلاص نمشي

ام راشد :لا اصبر وحده تروح اتسكرها

سااره :هههههههه يمه تكذب عليس

نوره تضحك :امزح عمه ابي اشوف قد ايش غاليه عندتس

راشد بدون صبر :يعني نمشي

ام راشد :ايه امش امش

مشو من النعيريه على العشاء بيصلون لرماح

.........................

مغمضه عيونها والخبيره تضع لمساتها الاخيره وترفع يدها

سوار :تمااام الهنوف مابتطالعي في وشك بالمرايه الا بعد مانخلص من كل حاجياتك

الهنوف ببرود بااطراف اصابعها:مافيه مشكله كم الساعه الحين

سواار تناظر ساعتها :تسعه بتمام تفضلي لغرفة التبديل اذا بتسمحي

قامت معها والبست فستان الزفاف الابيض ادخلت عليها موضي والنايفه اضحكن بفرحه من شكلها الجميله وهن يتكلمن وش بيسون اهلهم برى ناظرتهم بقلق يتكلمن بشي وانا احس بشي ثاني ياحظها لمياء مشالله كلهم اكيد هناك تعبت عيونها بالدموع من غير شعوور

النايفه براعه :الهنوف لاتصيحين مكياجتس حرام

موضي بحنان :وش فيتس كل هذا خوف..

الهنوف ترفرف برموشها تخفي دموعها : مرتبكه شوي ..

راحت موضي تزبط زفتها كلاسكيه منوعه بصوت العصافير وانغام موسيقيه اختارت موضي القصر بليلته الرومنسيه حمراء وطوالات المعازيم شموع على ضوء القمر ليون اخوها سلطان

وقفت الهنوف على الدرج ونظرها على الصاله كل شي خيالي ماخلت موضي شي ماسوته حتى البدر في ليلة كماله جايبته مجسم في نص الصاله يضي بالونه المعروفه ويوقف شوي عشان يعكس لون احمر مناسب لجواء الصاله

بداءت الموسيقى تنفست بهدؤ ورجلها تخطو اول خطوه على الدرج نزلت بفستانها الكت طالبته النايفه من برى بتصميم فستان باسكال باغنية بحبك انا بحبك ونفس ستايل الطرحه

اشرت لها النايفه من جنب الكوشه تبتسم ابتسمت بهدؤ.. وين امي وين خواتي وين البنات وين اهلي في عالم موب عالمي

وقفت في نص الطريق مثل مابغت النايفه ناظرت للمعازيم ودارت بخفيف حولين نفسها بدقه حست بدموعها تخونها غمضت وافتحتها بسرعه

ام بندر:مشالله تبارك الله

نواار بنتها بنبهار :تجنن لايق فستان عليها مررره

ناظرت لهن الجوهره بحقد

ام بندر بطيبة قلب :انااا معجبني عليها اكثر طويله وخصرها ادق ولاقاصر زين اسم الله عليها مدري وين لقوها موب تجي في حفلاتنا..

الجوهره بدون شعوور :اسكتن الزين موب كل شي ..ناظرنها بصدمه ناظرت لهن بقرف وقفت وراحت لطاوله بلحالها

بعد ماوصلت للكوشه لفت لناس وجلست بتعب

النايفه :ليش تجلسين قومي تونا

الهنوف برهاق :ارحميني تعبت الحمدالله الي تم كل شي هنا ويكفي

ام سلطان ترقى الكوشه عليهم وقفت لها الهنوف سلمت عليها ومن بعدها رقو المعازيم

ام سلطان جنبها وبحبور :ماظن احد بيجيب مثلتس في عيال عمه

الهنوف بخجل وبربكه :تسلمين كلن فيه خير وبركه

موضي تصغي على امها :بيجون الرجاجيل ودتس تجلسين معها

ام سلطاان تقوم :لا بنزل تحت..

موضي توقف وتاخذ المايك حيت الحظور بفرح اخوها وعطتهم علم بدخول الرجال الي تغطى والي اقعد على ماهو عليه

الهنوف برجفه :موضي

موضي تلف طرحتها :لبيه

الهنوف بصوت مهتز :لاتبعدون مني

موضي :ماعليس شر الا سلطان قدتس بتحملين ههههه

الهنوف تسمع صفير باذانها توترت بقوه ماتدرون بالي في قلبي والله اني اتمنى اني في ليله جديده واني مابعد شفته.. راحت موضي بسرعه انفتحت بوابة القصر ادخلو وقفت ويدها تزحلق من على المسكه من التعرق

تشوف الناس من حوله معه بس ماميزت الا هو ببشته الاسود وطوله الفارع افتحت فمها بخفيف تاخذ نفس وتهدي من خفقان قلبها اوصل لها وقف قدامها ماقدرت ترفع اعيونها له كانها اول مره تشوفه

سلطان وعينه تدور على وجهها وبروقان باسها على راسها بوسه طويله

تنفست بتوتر متاكده انها بتعجبه ومتاكده انه يتظاهر قدام العالم الي قدامه

الجوهره بقهر :جازت له مطول..

الحريم الي جنبها لفو لها مافهمو قصدها وارجعو يناظرون

ابعد عنها عشان الي معه ووقف جنبها

وقف ابو سلطان قدامها تقدمت منه حبت راسه

ابو سلطان ببتسامة اعجاب :مبروك ياحظه سلطان بذالزين

اسكتت بخجل وراسها مازلت منزلته تحت

ناصر الي ادخل عقب ماقنع سلطان ان ماعليه حرج لاشافها واهم شي الشرع ويبي يسلم عليها وافق له سلطان وخلاه يدخل

ناصر وعيونه تناظرها :مبروك مرت اخوي الحفله.. ولا مهوب عرس العرس راح

الهنوف بصدمه ارفعت راسها له كيف يدخلونه كانه رجال حطت نفسها عادي وابتسمت :الله يبارك فيك

ابو سلطان :يالله اترخص منتس بروح لجده اليله جالسن علشانتس يابوتس

سلطان يصد من ابوه وبصوت هادي:مهوب لازم ياابو سلمان تكلف على عمرك وتجلس علشان احد..

ابو سلطان يناظره ويتنهد:الهنوف تبي من يوقف معها في ذاليله

سلطان بسخريه: الهنوف مهيب بحاجتك..

ابو سلطان يناظره بقهر وحسره:في امان الله ..لف منهم واطلع وناصر يغمز لها ابتسمت له الحق ابوه وسلطان لف لها عقب ماجلسو

سلطان ويده في يدها :احلى عروس راتها عيني..

الهنوف بحمرار لفت تدور البنات ماجو شافت المصوره تقرب منهم لفت له بتوتر

الهنوف :عادي تصور

سلطان :تصور الصور الي تشوفها بعيونها بس..(يقصد ماتقول له سوى كذا او تمشيه على كيفها بوضعية الصور)

الهنوف وعيونها تشع بالفرح احسن يالنايفه رايحه تجيب مصوره وانا مادريت

المصوره ببتسامه معجبه :سيدي بدك ناخز صور اليك هااسه

سلطان يوقف ويوقف الهنوف معه :اخذي... خذت المصوره وضعية لها وصورتهم وعينها ماتنزل من سلطان البارد ويلف بنظره للحضور والمنصه خاليه من اي احد فرصه عشان تاخذ المصوره الصور لهم ناظرت الهنوف للمصوره محاوله تلفت نظره لابتسامتها الواسعه وهي تناظره بشغف واعجاب وتقرب منه بحذر وتلتقط صور وكانها تاخذ صور له وحده

الهنوف تناظرها بهدؤ

وبدون شعور لفت لسلطان :مانزلت عينها منك..

سلطان ناظر للمصوره شوي ولف للهنوف وببتسامه هاديه:تغارين ..

الهنوف ترف برموشها بهدؤ وساكته

سلطان بصوت مبحوح:اخليها تنزل..

الهنوف تبلع ريقها بتعب وترص على شفايفها تمنع رجفتها:ايه خلها تنزل ..

سلطان يلف للمصوره وبنظره هاديه وأمره :انزلي لتحت ..لفت المصوره برتباك وانزلت

سلطان يلف للهنوف ناظرها شوي باينه بملامحها الارهاق والتعب رطب شفايفه ولف لاامه المقبله عليه ابتسم لها وقفت عنده حب راسها وخشمها ويدها

ام سلطان بفرحه غامره :مبرووك

سلطان : الله يبارك بعمرتس ويخليتس

ام سلطان تأشر للمطربه تبداء بالترحيب وتغني..وبدات بصوتها الصاخب

النايفه تمسكه مع يده وتلفها وراها باست خده :مبروك يبه..

سلطان بحنان ويده على ظهرها :الحين ذكرتي الكلمه...

النايفه بضحك :بس توني رضيت عليك ولا قبل الهنوف تجي اقولها لك دايم صح

سلطان يضحك :صح وليش يوم جات الهنوف ماقلتيها.!!

النايفه ببتسامه صادقه :والله استحي منها.. قربت منه وشاورته والهنوف تناظر لهم ..احس انها بتزعل اذا شافتني اقول يبه بس تبي لعيالها

سلطان بنظرة عطف وحنيه ضمها لصدره وابعدها عنه شوي:الهنوف تفكيرها مهوب محدود يمكن تفرح منها اكثر من اي كلمه..

ماقدرت تمنع دمعه تنزل من عينها بغيره من النايفه اول مره اصدق ان فيه غيره تقهر لهالدرجه بين حريم ارتجفت شفايفها بألم انا منجذبه له غصب عني جذااب ووسامه غير طبيعيه امسحت دمعتها بسرعه لتبان لناس وبداخلها وجع..

موضي تقرب منهم سلطان وهو يفك يده من النايفه الي ابعدت ويمدها لموضي سلم عليها وضمها وهي تبارك له

قربو منهم عماته وبعض الحريم الي سلمو عليه باليد وصافحهم والهنوف واقفه بهدؤ بمكانها كن الامر مايعنيها ..

النايفه :سلطان طلبتك بس بعض الصور كذكرى.. دام الناس انزلو..

سلطان :لا خذت صور تكفي..

النايفه برجى :بعد اكثر..

سلطان يناظر للهنوف ويرجع يناظر لنايفه:نبهي عليها تجي تصور..

دق قلبها بقوه وناظرته يناظر لقدام ومعقد حواجبه ..

الهنوف بصوت مرتجف :ماابي اصور

سلطان يرفع يده لجبهته ويرص عليها بتعب:لازم تحملي..

الهنوف وبنبرة بكاء:لاترقى..رجعها

سلطان يلف لها وبهدؤ رافع حاجبه اليسار:وش سالفتتس..

صدت منه وارمشت بسرعه تخفي المها مابيها تقربني منك يكفي الي في قلبي لك ..انا ياسلطان احبك ..ارفعت اصابعها لتحت عينها وامسحت دموعها الخفيفه..

سلطان ببرود:ماتبين تصورين معي..قوليها صريحه ترى ماهمتني..

الهنوفبصدمه لتفسيره الغلط هزت راسها بلا وبتعب

قربها منه برقه بحظنه من جنب ويده محوطه بها دنق راسه له وهمس له .. مهوب لازم ترتاحين لقربي مهوب لازم.. هز راسه للمصوره تصور ناظرته بنظره جانبيه وارجعت تناظر الكاميره او بالاصح المصوره المتوتره حط اطراف اصابعه على ذقنها وارفعه له

الهنوف تكلم بسرعه:خلاص صور الي تبي ..عادي لو تجلس المصوره ..

ناظرها بهدؤ ممزوج بستغراب اخفاه في داخله ..اتركها ويده تحاوط كتفها..أشر للمصوره بمعنى خلاص

موضي :خلاص اكتفيت

سلطان :ايه صورت الي فيه الكفايه..

النايفه :بلى صورتين

سلطان ببتسامه بارده:تحكي مشاعر واحاسيس كثيره

لفت الهنوف له ناظرته وعقب صدت منه وهو يناظرها

حط يده على اكتافها :كأنتس ماصدقتي

هزت راسها بلا بدون اهتمام

سلطان :اهاا ماتصدقين الا الي تبين..

لف للمصوره الي واقفه وتناظرهم اشر لها تصور حط يده من تحت اكتوفها وقربها لها بقوه وظهرها ملاصق لصدره لصق خده بخدها وصورتهم المصوره

لف لها من قريب وكلمها :ابتسمي الى ان تبين صفت اسنانتس

لفت له شافته قريب ولفت عنه:ماقدر بتصير موب حلوه

سلطان ببتسامه :كل شي منتس حلو.. ابتسمي اشوف.. انغزها من جنبها اضحكت بدون شعور

اشر للمصوره تستعد نزل فمه وباسها على خدها وهي مبتسمه صورتهم

سلطان برسميه في كلامه :هذي بتصدقينها يمكن!! امسكها مع يدها جاو خواته يترجونه يتاخر شوي ارفض توسلاتهن انزل من الكوشه ويده بيدها بتملك ويمشي بشويش لااجل تكون بجنبه وراسه لها يناظر خطواتها وراسها المرفوع فوق بهدؤ اسمع اصوات تصفير وتصفيق وكلمات اعجاب متمنين لهم حياة سعيده ابتسم غصب عنه بعد ماسمع وحده تكلم بصوت عالي بجنب الممشى.. واضح انه مجبور عليها ومايحبها.. لف لصوتها اعرف نظرة عمته الحاقد ومعليه صوتها بتسمعه لف للهنوف بيشوف ردة فعلها ناظرته وابتسمت بسخريه أطلعو برى للبوابه وقف لموضي الي وراهم ومنحرجه من كلمة عمتهم الي من شافتهم وهي ماخذه اول كرسي بجنب الممشى عشان تقول كلمتها

موضي بتردد:سلطان بتروح مكان

سلطان :لا.. لف للهنوف.. روحي فوق البسي عباتتس ونزلي لي تحت ...روحي معها موضي

موضي :ابشر دقايق.؟!

رقو فوق وهو يناظرها بتامل حرك شفايفه بتفكير واطلع لبرى

بعد ماوصلو لفوق وادخلو لغرفة التبديل

موضي بحراج:لاتفسخين فستانتس

الهنوف بستغراب:ليش صعبه اطلع فيه من هنا

موضي ببتسامه:سلطان ارسل لي يطلب مني اقولتس لاتفسخينه

الهنوف ترطب شفايفها وببتسامة استهزاء:من اعيوني الي يطلبه اخوتس

موضي بتوتر:عرفتيها الحرمه صح..

الهنوف تنهد بتعب:ايه عرفتها وماهمني كلامها..اذا اقدر اطلع الحين

موضي بتاكيد:اكيد سلطان بعد مستعجل..

عند الحريم النايفه عند صديقاتها بالثانوي اصواتهم تنسمع لاخر القاعه

ام بندر :مشالله شكله يحبها

ام سلطان تبيها توصل الكلام للجوهره :ايه ماخذها من حب ومن زمان

ام بندر:الله يهنيهم يارب

ام سلطان :جزاتس الله خير ..وين خلود ماشفتها

ام بندر:تكمل الماجستير برى ..الا ياأم سلطان مارديتو علينا بالنسبه لنايفه

ام سلطان :انت تعلمين معزتتس عندي بدتهم كلهم..بس اصبري علينا شوي

ام بندر :تسلمين والله في قلبي مثل الي في قلبتس ..من زمان وبندر يطلب واحده من خوات سلطان موضي ربي وافقها مابعد بغاء العرس والنايفه مايبيها تفوته

ام سلطان :ابستشيرها وبرد الخبر لاخوها وبتوافق انشالله بندر مافيه مثله

ام بندر:انشالله جعلها من نصيب بيتي.. ناظرت لنايفه الي تسولف كنها منفلته من زمان عن العرب ابتسمت لرقت ذالبنت

..............

اوصلو ارماح على اذان المغرب رتبو عفشهم الي بالمطبخ والي بخيامهم حوالي عشر خيام مستاجره لجماعتهم خيمة لبوفهد واهله وخيمه لهم مطبخ وخيام الثاني موزعها بعيده شوي عن حوش الابل الي قريب من خيام ابو فهد

لمياء بعد ماغيرت ملابسها البست دراعه موف غامق استرتش وبرقعها واطلعت برى الجوء هادي ماوصل الى خالتي نمشه وعيالها خيامهم مع الخيام المتشهله ومافيه احد برى

ام فهد :لمياء افرشي فرشه برى وحطي عليها القهوه بيصلون الرجاجيل وبيجون عليها

لمياء :ابشري ..سيريتا

سيريتا الي خايفه تحط عيونها بعيون لمياء عقب ماجاتها تصيح وتطقها من سالفة الرجال تعذرت منها وقالت انه عادي عندهم حسبته بس يبي يصير صديق مافي معلوم صير مشكله

ام فهد :يالله ان اقول افرشيها انتي ليش تنادينها

لمياء بزهق:يمه بغبر خلي منيره بمسك بنتها

لفت عنها ام فهد بقهر وهي تروح للوايت افرشتها الشغاله وحطت عليها زمااازم القهوه والقدوع

صلو الرجاجيل واجلسو ابو فهد وابو مفلح وفهد ومساعد ومفلح جاتهم ام مفلح واجلست عندهم وام فهد ونوف.. ومنيره ترقد بنتها وارقدت معها مواصله من امس ولمياء اجلست في الخيمه

ابو فهد متحمس:والله اني حاطن فيها فوق الالفين روسيه اصلييه

فهد يشاور مساعد :لاتكلمو في السلاح ماسكتو تروح معي لرعيان

مساعد يقوم :مشينا ..راحو والرجاجيل مندمجين

ابو مفلح :يارجال مبذا نوعهن نوعهن منقطع له سنه

مفلح:لا يبه لاتكذب توني شايفها

ابو مفلح بضحكه ممسوكه :يالله جعلك القوم لا تدبل تسبدي وانت تكذب

مفلح :ههههههههههاي لا والله صادق ابوي يابوفهد قد لها سنه مابعد جات

ابو فهد منقهر وبصوت عالي :لمياااااء

فزت من مكانها احذفت الجوال ووقفت عند باب الخييمه

ابو فهد :جيبي البندق عانيها ورى فراشي

لفت لمياء وراحت لفراشه شافتها شالتها يالله ماثقلها الله يستر مافيها شي تحاملت بيديها الثنتين ورفعتها وقفت عند باب الخيمه ونبهت ابوها بوهقه وراعه

لمياء وهي تحاول ترفعها ازياده لاتطيح :يييبه بتطيح ..

فر مفلح بسرعه واركض لها امسكها وارفعها من يديها بسهوله :عنتس لاتحشرينا بالي فيها..

لمياءء ببرود: امنيتي ..لوها بيدي قضيتها فيك ..

مفلح بهدؤ وسخريه:شيليها زين ثمن حققي امنيتس..

لمياء تناظر لهم وهم منشغلين عنهم :راعي سجون ماعليك شرهه..

ناظرها بسرعه رافع حاجبه:حسافه صرت راعي سجون لعيونتس... لف عنها وهي تناظره بتعجب ورفعت حاجب مشكلتك والله..

راح لهم فكها ابو فهد وفضى الي فيها من الرصاص واطلع صح عليه شاريها من واحد لاقيه في رماح في وحده من روحاتها لبله

ام فهد :اهناك سياره جاتكم يمكنهم الراشد

نوف :شكلها هي..

ابو مفلح :اي اي هاذي هي..

مفلح سرحان موب يمهم طردت مساعد لايركب معنا السياره من سبايبها من شفتها ونفسي في راس خشمي جميله على نعومة ماألبست لا لا خلاص انا مستحيل ارجع افاتحهم بالموضوع مره ثانيه تافف بتشتت قدني بصك الثلاثين ووظيفه وبيت جاهز وش احتري مادور البنت الي تناسبني..

ابو مفلح بضيقه :امفلح انت تسمعني.. قم

مفلح رافع راسه بهدؤ :لبيك

ابو مفلح :قم الرجاجيل جاوك وانت جالس جب لنا مراكي وزود قهوه..

ارفع راسه السياره بلى سيارة راشد هذا رجاجيل :الله يهديك يبه مبلى راشد يجيب المركى بنفسه..

ابو فهد بضحكه :انا الي بجيبه

مفلح وهو يفز يقوم :لا والله اني امزح ..راح يجيبهن والسياره توقف عندهم انزلن البنات وراحن للخيام وراشد ينزل عند فرشة الرجاجيل وقعدت معه امه

لمياء بفرحه :اخيرن مابغيتو

ساره :اجل جالسه بلحالتس موب معهم

لمياء بملل:اي والله

نووره تجلس بتعب:لمياء ماعليتس امر ابي وساده شكلي برقد جنب منيره

لمياء :ابشررري

ساره :لمياء وين خيمتنا بروح انحط اغراضنا

لمياء :اخذو الخيمه اقرب وحده اصبري بجي معتس

اطلعن برى وساره تكلم راشد يوقف عندهم سيارتهم

ساره توقف داخل الخيمه :شين البر بدونها اول مره نروح مهيب معنا

لمياء :اسكتي بس اليوم امي خاطرها ماش عقب ماكلمتها تبارك لها بالعيد.. يالله حبوني انا

ساره وهي تناظر الخيمه بستهبال :ايه اسمحا امرتس بنحبتس ..عزتي لنا

لمياء بغرور: كان بساعدتس ذلحين بتعشى وبرقد قايمين من صبح

ساره : لاغرفتوه نادوني

لمياء :لا وش دعوه بجيب لتس والقمتس

ساره :لا وش داعي ذاه كله جيبيه ونا بلقم نفسي خخخخخخخ

اطلعت لمياء لهم اسمعتهم يصلون وراشد يأم بهم الصلاه راحت للمطبخ نوف عند الشغالات الي تجمعن وامها تصلي في الخيمه

نوف :انا بروح اعلم منيره تجيتس اغررفي العشاء

لمياء :بغرفه واروح ارقد ترى مالي دخل

نوف وهي تطلع :الله لايحدني عليتس

وقفت عند الشغاله الي ترتب صحون للعشاء

لمياء:صحن اكبر هذا صغير

سيريتا:لا هذا كبير كلو رجال مافي اكل

لمياء بغضب:اغرفي وانتي ساكته ترى النفس مهيب عليتس طيبه..

ادخل للخيمه وامسكها مع رقبتها اصرخت بقوه من الحركه ولفت له بسرعه

فهد يضحك:خخخخخخخخخ يارخمه

لمياء بعصبيه:الونه داخل فيني سكني وش بتسوي

فهد :ههههههه

مفلح واقف برى الخيمه :فهد العشاء جاهز الشيبان يبونه

لمياء بقرف:قله جاهز بكيته

فهد ماسمعها :يالله بسرعه...

اغرفت عشاهم واغرفت للحريم الي ودوه لهم الشغالت في خيمة مجلس النسوان

فهد ومعه صحن العشاء وقدامه مفلح يمشي:وش فيكم عندكم صوت صراخ

فهد يضحك: بلى لمياء مروعها

اسكت وهو يجلس على المركى

راشد :تعشى يامال الشحم

مفلح يرفع يده: بس ماكل في اسياره على تسدبي لذلحين

ابو مفلح :خله ل.. لايقوم كلا صحن كله وقعدنا بلى اناظره

مفلح :هههههه جعلني مابكيك يبه والله انك نكوتي

ابو مفلح يبتسم :اجل مثلك نفسك اهناه

ابو فهد :لاتظلمه دايمن ومفلح يضحك الله لايغير عليه

مسااعد :لا حيك ماشفته ياخال في رمضان انتجنبه.. متغير ذالايام والله الحمد بفضل دعباتي المستمره

راشد :هههههههه اصدق مساعد هو المزوح

فهد :وانا منيب مزاح

مفلح :ياليل البزارين

منيره تقوم تمغط يديها:غرفتو العشاء

لمياء تناظرها بستهزاءوتفرش فراشها :لا.. اخيرن قمتي عشان نغرفه

منيره توقف دزت لمياء لين طاحت على فراشها واطلعت برى

لمياء بقهر وقفت ثاني مره وانفضت الفراش وهي تدخل فيه كل منه خلى نفسي في راس خشمي ليته ماجاء

نوره :بترقدين

لمياء :ايه

ادخلت عليهم ساره :وين يالحبيبه بترقدين

لميا بقرف:ايه برقد

ساره :توى السمره تبداء وش مرقدتس

لمياء ملقيتهم ظهرها ومتلحفه :ابي ارقد..مواصلين اليوم

ساره :كيفتس العيال كلهم برى شابين ضوء وقاعدين عليها

لمياء هذا الي مابيه كلهم عليها اسكتت ماردت عليها

اطلعت ساره ونوره توقف وراءها وتقرب وبهدؤ:لمياء اذا كذا منعزله في الخيمه من قبل نجي والى ذلحين عشانه ماراح تستانسين

لمياء بهدؤ:مهوب عشانه

نوره بتاكيد:الا عشانه حتى نظرتس له مليانه غيض يفهمها العميان

لمياء بصدق:اصلن انتهى من كل شي يخصني من اليوم الي شك فيني..

نوره بقهر :صحح غلطته يالمياء.. وترى مهوب بس انتي الي حسيتي حتى هو مارتاح الى عقب مارح لرجال الي اادخل عليكم واسوى معه مشكله انتي اخبر وش سوى عقبها والحمدالله الي فكه..

لمياء:محد قال رح له ...

نوره بصدمه: هذا الي قدرتي عليه..!!

اسكتت لمياء وعيونها شاطحه بذرا الخيمه راعي سجون اكرهك مهما سويت

يتبع ,,,

👇👇👇