رواية دموع اسقطت حصون القصور -31
اطلعت ساره ونوره توقف وراءها وتقرب وبهدؤ:لمياء اذا كذا منعزله في الخيمه من قبل نجي والى ذلحين عشانه ماراح تستانسين
لمياء بهدؤ:مهوب عشانه
نوره بتاكيد:الا عشانه حتى نظرتس له مليانه غيض يفهمها العميان
لمياء بصدق:اصلن انتهى من كل شي يخصني من اليوم الي شك فيني..
نوره بقهر :صحح غلطته يالمياء.. وترى مهوب بس انتي الي حسيتي حتى هو مارتاح الى عقب مارح لرجال الي اادخل عليكم واسوى معه مشكله انتي اخبر وش سوى عقبها والحمدالله الي فكه..
لمياء:محد قال رح له ...
نوره بصدمه: هذا الي قدرتي عليه..!!
اسكتت لمياء وعيونها شاطحه بذرا الخيمه راعي سجون اكرهك مهما سويت
...........
اجلست على كنب الغرفه ببيتهم الي في الرياض وهو واقف يفسخ بشته خلص ولف لها
سلطان بأمر :وقفي..
وقفت وعيونها تطالع لبرى بشرود
سلطان يقرب منها وبعقدة حاجب :انتي وش صاير لتس..
الهنوف ترفع عيونها له معقده حواجبها بعدم فهم
سلطان بقهر :قدامي انسانه بارده كان مافيها حياه فهميني هذا مفتعل او ايش ..
الهنوف تبلع ريقها:مافيني شي..
تافف بقهر ويديه على خصره :وريني الى اي حد ماثره فيتس كلماتها..
الهنوف تلف له وعبرتها تشق حلقها بوجع انا متت موب بس اهتميت:ماثرت فيني عادي..
ناظرها بحقد وعينه تمسح وجهها الجامد والمتعب انفخ بفمه وقربها من صدره ضامها بهدؤ
الهنوف ترجف شفايفها بالم وبضعف:صدقو انا عرسان جدد
اتركها ولف وبنظره هاديه :موب يهم يصدقون ولا لا المهم اني شفتتس بفستان الزفاف مثل كل بنت وماهضمت حقتس بااحلامكن الي تمنن..
الهنوف بدموع ماقدرت تصبر:انا منيب مثلهن انا اليوم بلحالي ابي اشوف امي ولااحد من اهلي انا اليوم محرومه منيب سعيده
تنفس بهدؤ وعمق: لا هذا عاد موب في يدي..
اشهقت بهدؤ وامسحت دموعها لف لها وناظر فيها وهي تمسح دموعها حط يده على اكتافها وبهدؤ:اهلي مايكفون.. وانا وين..؟؟
الهنوف بالم :انت سلطان اهلك بس اما انا ... اسكتت ماكملت
سلطان يزم شفايفه موب معجبه ردها انفخ بفمه وبتردد تساءل: اول مره دخلت عليتس..واليوم نفس الشعور.. لف بعيونه لها وهي صدت
الهنوف ودموعها ترجع تنزل كله منك خذيتني من اهلي وبعدتني منهم وحيده وهم مجتمعين منعتني عنهم متسلط غيرت مشاعري غصب عني لك وانت ماتستاهل متعجرف.. حبيتك وانت ماتحبني .. وتسالني بعد.. وبقهر ارفعت وحده من حواجبها:كلهن من اتعس لحظات حياتي..
رص باظافره على عضدها بقسوه ورص على اسنانه حست باالوجع عضت شفايفها بالم طاحت منها المسكه ويدها ترتفع لفمها تمنع صوت شهقاتها
الهنوف بالم:عورررتني,,
رص عليها بقوه وغيض وعقب فكها وببرود مصطنع :لازم تكملين اجل الدراما هاذي اليله نفس ليلتتس التعيسه...
راحت عنه بسرعه للحمام والفستان يسحب من وراءها ينهي ليله عاشت بدايتها في شقق رماح ...
نهاية البارت التاسع عشر
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البارت العشرون
سمعت صوت الفجر ياذن حاولت تخلص نفسها منه بدون لايحس مافي فايده محوطها بيديه تنهدت وعودت تغمض عيونها برهاق
اسمعت الاقامه اندمت انها ماقومته وبهدؤ:سلطاااان..
سلطان بتململ:همممم
الهنوف :اقامو وانت نايم
ابعد عنها وهو منسدح على ظهره ومدد يديه على السرير مغمض عيونه
اقعدت وهزته :الصلاه فاتك بس قوم صلها هناه
مغمض عيونه وراقد بعمق ترددت تقومه مره ثانيه وقفت خلاص اهم شي علمته صلت الفجر البست بجامه واطلعت برى بالصاله مافي بلكونه هنا الفله على شوارع موب مثل ذيك في مزارع.. تمشت شوي في البيت النور اطلع ارجعت للغرفه تقومه قبل تشرق الشمس
ادخلت شافته راقد للحين قربت منه مدت يدها ورجعتها مره ثانيه خلاص بخليه لين يقوم بنفسه تاففت بتشرق الشمس بقومه والي يصير يصير
هزته بخفيف ماقام ارجعت تهزه اقوى من الاوله فتح عيونه وارجع يغمضها بثقل
الهنوف تنفس بتوتر علت صوتها :بتشرق الشمس ماقمت.. هزته بقوه من كتوفه
الهنوف بخوف لايعصب:الفجر بيفوتك لاتمثل النوم..
افتح عيونه ناظرها بقهر واصرخ عليها بغيض:خلاااص ابعدي عني بقوم..اقلقتيني..
ارجعت ورى شوي ناظرته بعتب اجلست على كرسي التسريحه ويديها على عيونها صاحت بهدؤ ودموعها على خدها بغزاره مالومتس ياعين لابكيتي تعبت من القدر لازانت شانت ..ماعرفت للحياه معه ماوضحت لي.. انا ابين احبه عشان يحبني ولا اواصل كرهي له عشان يخليني ولا اموت قهر وانا اشوف قلبي يتصرف من وراي غصب عني..
تنهد بتوتر انفخ بفمه ووقف مشى لها اجلس قدامها ويده تسحب يدها من عيونها ابعدت يدها من يده ورجعتها لوجهها وانحبت بقوه
سلطان بعطف:انا تعبان يومين مارقدت فلا تشرهين علي..
هزت راسها وبشهقه:ابيك تقوم لصلاه بس..
سلطان ببتسامه حنونه:وتصيحين عشان صرخت عليتس ..تحملي شوي..
هدت شوي ونزلت راسها:انا بعد تعبانه صحت غصب عني كل شي تجمع علي..
اسحبها من يديها بهدؤ الى ان انزلت قدامه على ركبها ابتسم :طيب نسيت هديتس ياالله يمديتس..
الهنوف برتباك من حركاته وصوته الهادي:اذا سفر ..انا مابي اسافر وماعليك من كلام الناس اجلس في البيت مع اهلك احلى من سفر برى.. وبتردد..اذا سافرت نفسيتي بتتعب اكثر..
سلطان ينزل عيونه لتحت ويزم شفايفه:السفر ذالمره صوب ارماح
الهنوف وعيونها تعبى دموع مره ثانيه وصوتها يروح وبعدم تصديق :وشلون يعني..؟؟
سلطان وكأنه مجبور:يعني جهزي نفستس من هناه الى الظهر يالله يمدي ترتبين وضعتس..
احذفت نفسها عليه واجهشت بالبكاء وهو يضمها برقه ومبتسم بألم
ارفعت نفسها وامسحت دموعها :لبى روحك لا خلا ولاعدم...
سلطان ببتسامة هاديه:بصلي وبروح لجده مع الوالد ونكمل العيد عند الي ماحضره بالرياض.. وقف وراح للحمام وقف من مكانها بفرحه بخليها مفاجاه لهم طلعت شنطتها ورتبت الاغراض بسرعه وبحماس صلى وخلص اادخل عليها وهي ترتب بحيويه ونشاط مابدى اي كلمه البس لبسه الرسمي وخذا بشته وقف عند باب الجناح
سلطان ببتسامه افرد يدينه لها بخفيف :تعالي سلمي علي قبل اروح..
ابتسمت ابتسامه حلوه ومشت له بسرعه احضنته اول مره من خذته من كل قلبها وبكل رضاها ضمها بقوه وتنهد ابعدها عنه..
الهنوف :تروح وترجع بالسلامه
سلطان ويده بيديها : الله يسلمتس ..باس يدها واطلع عقبه من الجناح..
ابتسمت بألم ونزلت عيونها تحت ابلعت ريقها ليته صدق يحبني بس مشكله لايحب ولا يكره حطت يدها على عينها ورصتها بقووه خلاص هدي هدي ماله داعي تحرقتس الدموع..ابعدته من تفكيرها وتذكرت اهلها تنهدت براحه لفت بسرعه تكمل اغراضها
بعد ماصلو الفجر اجلسو على الضوء الشيبان وراشد.. مفلح ومساعد وفهد والبنات راقدات تقلبت على فراشها ماجاءها النوم وخرت الحاف وقفت البست برقعها والجلال واطلعت لهم الشيبان واقفين عند حوش الابل والحريم جالسات يشربون حليب
لمياء تجلس جنب امها لفت لها امها وبحنان :وش فيتس قمتي..
لمياء بصوت خفيف عشان راشد :طار مني النوم
جاءهم سلم وصبحهم بالخير واجلس جنب راشد في الجهه الثانيه من المركى وعم الهدؤ
ام راشد بحنيه :وينتس امس ماسمرتي معهم مستانسين..
ارفع راسه لها وعقب لفه وعيونه في جهتهم
لمياء بحراج :جعله دوم ..تعبت ورحت ارقد اعوضها اليوم انشالله
ام راشد:انشالله
ام مفلح جايبه الفطور حطته عندهم وراحت تجلس جنب ام فهد
ام مفلح :انتي هناه وش قومتس رقدتي امس ماسمرتي معهم
اضحك فجاءه عقب كلام امه لفو له مستغربين
راشد :وش فيك..
مفلح بحراج:ذالراعي بغى يطيح وامسكه ابو فهد ..
محد صدقه بس مشوها له وام مفلح تلف لمياء وتنشدها مره ثانيه ارفعت لمياء عيونها له بسرعه شافته مبتسم ياأكل ويناظرهم صدت عنه وكلمت خالتها نفس عذر ام راشد
يتكلم هو راشد بصوت خفيف والشيبان جالسين يفطرون حست بالملل راحت لساره بخيمتهم شافتها قايمه تفرش اسنانها
لمياء برتياح:اشوى كنت بقومتس
خلصت ولفت صوبها تكلمها:توني قايمه قمتي بدري
لمياء :اي عقب الفجر مارقدت
ساره :قومتس الرقاد بدري ..بلبس وبجي
لمياء تطلع :ترى في خيمة المطبخ ..وين نوره
ساره :في خيمتها اسمع صوتها قايمه لاتروحين لها احذري تحسبينها نفسي
لمياء تطلع :منيب خبل ..
راحت لخواتها راقدات قومتهن :قومن امحق نسوان ان الي اقومكن
نوف مطنشتها وراقده ومنيره وخرت الحاف وقامت اطلعت لمياء لخيمة المطبخ جهزت الفطور واحترتهم يجونها تجمعن البنات عندها بعده كل وحده راحت تلبس اليوم توه ثاني العيد وجماعتهم بادين يوصلون لهم
البست لمياء تنوره فيروزي حرير سيده بشك خفيف اسود متدرج من الجنب وجلال نفس الون وكحل بحدود العين سايل وكحل من داخل فيروزي بس..
اطلعت برى الساعه عشر شافت نوره و ساره جالسات عند الحريم الكبار في مجلس الحريم
ساااره :بدري تاخرتن وين خواتس
لمياء :والله انا يااختي ناس مانرضى بتزين الخفيف
سااره :قومي بس صبي القهوه ..حاطه مكياج كويتي مشالله...
لمياء تقوم وهي تضحك اجلست عند دلال القهوه وقهوة خالاتها جان خواتها من عقبه وهي غاسله يدها من القهوه وطالعه هي وساره بررى ارجعت تطل براسها للخيمه :نوره تروحين معنا..!!
نوره بتعب:لا عاجزه امشي.. ارجعت لمياء لساره وقعدن يمشن
لمياء بحالميه :رووووعه الجوء خيال
سساره :اي والله يارب يجي مطر
لمياء بتفكير :شكله بيجي مطر الغيوم سوادء وهذا يبشر بسقوط امطار سريعه وكثيفه..
ساره : صدقتي لازم نرجع بدري للخيام
لمياء : انا طويله بتعلق في الشجر وانتي وحظتس ان نشتي رجلي ترى برفستس هديني هههه
ساره :ههههه يقولون القصار سباق
شافن سيارات ددسن ثنتين وصالون عايله متجهه للخيام
لمياء :من الي جاو شكله مبروك من جوء والمطر يرش
ساره تناظرهم:شكلهم ام عمر وولدها ..واهل وفاء ومشاعل وابراهيم واهله
لمياء تلف لها :نرجع
ساره تكمل مشيها قدام :يعني وش بتسوين بهم قدامهم البنات وخيامهم
كملن مشي وهن يسولفون متحمسات من الايام الي في رمضان يعلمهم ابوهم بالامطار الي تنزل في البر عليه والارض ذلحين باديه تخضر تحمسو كلهم يطلعون له
............
واقفه برى وعبايتها في يدها لفت للبنات :ياله اشوفكم على خير
الجميع :على خير انشالله
النايفه :هذا نعتبره شهر العسل..
الهنوف تبتسم :ايه شهر العسل روحت له من زمان...
ام سلطان :سلمي لنا على اهلتس كلهم..
الهنوف :الله يسلمتس من الشر ..البست عباتها واركبت السياره اطلعت السياره برى البيت
الهنوف تناظر ورى:هذي تبعنا
السايق:ايه وامرنا به طويل العمر
الهنوف ببتسامه ماجاء في بالي أخذ معي شي واول مره اروح لهم من زمان.. اتبعتهم سياره كبيره فيه بعض العانيات والكراميات وخيمة شعر سوادء
على اذان الظهر اوصلت لهم الرياض من ارماح قريبه مهيب مثل النعيريه
شافت الخيام وبزران برى والرجاجيل واقفين المطر يرش صوته على سقف السياره وقفت عند الاخيام انزلت ماشافت احد نادت شغالتهم
سيريتا بفرحه :ماما هنوف وش اخبار انتا
الهنوف ببتسامه :الحمدالله كيفكم انتو
الشغاله :الحمدالله
الهنوف :سيريتا روحي عند رجال هذا شيلو اغراض .. راحت الشغاله ومعها الشغالات عند راعي السياره الكبيره
والهنوف وقفت برى خيمتهم فاضيه وفيه خيمه ثانيه مليانه اصوات الحريم ترددت تروح
لمياء :وش ذا السياره الكبيره..امشي الناس في حال وانا كن منب معهم
ساره تمشي معها :كيفس ابي ابعدتس من الشغل
ارجعن وقفت شوي تناظر المره منزله عباتها وعليها بس طرحه على اكتافها وشعرها مفتوح ولابسه فستان شيفون اخضر فاتح مزموم من تحت الصدر
لمياء بدموع :الهنوف
لفت لها بسرعه وشافتها يااه من زمان عنهم اركضت لها لمياء ضمن بعض واقعدن يصيحن
لمياء تصيح بقهر وشوق:الهنوووف من رحتي وانا حياتي متلخبطه..
الهنوف تضحك وهي تشهق:اعتمدي على نفستس..
لمييا ءتصيح بقوه وتضمها هدتها الهنوف وناظرت في ساره الي تمسح ادموعها قربت منها وضمتها
ساره :وش علومتس
الهنوف وعيونها تعبى بدموع من شافت ساره وكلامها في ايطاليا يرن باذنها الى الحين :الحمدالله كل شي زين وش اخبار مدرستس
ساره بضحكه :لا الحمدالله كل شي زين
ادخلن الخيمه ولمياء مازالت تمسح دموعها
ساره :لمياء خلاص اذا شافتتس امتس كذا وش بتسوي اجل هي
الهنوف تمسح على ظهر لمياء :خلاص فديتس لوه بيدي ماخليتكم ولا ساعه..
ادخلت نوره وهي تناظر اشكلهن في شي غريب وبستغراب:وش فيكم وش فيتس لمياء
ساره تضحك:ماش اثر عليتس الحمل في ذاكرتتس
الهنوف بصيحه وفرحه :حامل ماعلمتوني
لفت لها نوره بسرعه ناظرت فيها وهي تحط يدها على فمها:الهنوووف
وقفت لها الهنووف سلمت عليها بحراره
نوره :يالخاينه مفاجاءه
الهنووف بفرحه:والله مفاجاهء لي بعد انا ..حملتي النوري
نووره :ههههه حملت وانتي
الهنوف بهدؤ:لا انا توني ..لمياء روحو نادو امي مستحيه اروح لهم
وقفت لمياء وساره تكلمت بسرعه :تعالي
لفت لها لمياء:خير
ساره توقف وتروح لها :اتروحين بذالزين اجلسي رتبي شكلتس بروح انا
الهنوف :هههههه كحلتس سايل ارفعو براقعكم خلوني اشبع منكم احس اني سنين ماشفتكم ارفعت نوره برقعها ولمياء افسخته مره وحده
لمياء :جعله يسعده الي خلاتس تجين بتفرح امي
الهنوف بصدق:امين
ساره وهي واقفه عند باب خيمة الحريم وعندها ام فهد :وش فيكم
ساره :خاله الهنوف جات ..
ام فهد والعبره تخنقها راحت بسرعه وخلت ساره ادخلت عليهم بخيمتهم شافتها جالسه بين لمياء ونوره هذي بنتي هذي الهنوف
لفت الهنوف للباب الي ادخلت معه امها فزت بسرعه وبكت بصوت عالي
ام فهد تضمها :حبيبتي والله وش اخبارتس
الهنوف تصيح وساكته وتشهق بقوه
نوف ومنيره اطلعن برى الخيمه :ساره وش فيكم
ساره تضحك :الهنوف جات
البنات بفرحه راحت لخيمتهم
ادخلت ساره للحريم سلمت على البنات الي توهم جايات وقعدت تصب القهوه لهن
ام مفلح :ساره وين راحو
ساره تقصر صوتها :الهنوف جت وراحو يسلمون عليها
ام مفلح بفرحه :الحمدالله .. لفت بخجل للحريم ماصبرت تجلس وقامت رايحه لهم
ادخلت عليهم والبنات ملتفات حولها
ام مفلح :مرحباا يالله حيها
وقفت لها الهنوف ضمتها وخالتها ترحب بها وتسلم عليها بحفاووه
ام مفلح بحنان :وش علومتس اربتس مستانسه
الهنوف ودموعها مازلت في عيونها :الحمدالله تطمنو ..ابي بعد ابوي مشتاقه له
ام فهد :بكلمه يجي لمياء جيبي الجوال
لمياء توقف :معادهم بحابيني ذلحين
نوف :انا عزلت منتس وبكرهتس
الهنوف :ههههههه عارفتها تدلع عليكم
ام فهد وهي تناظر لمياء الي دخلت مع شق الحريم :خلوها تدلع
ابتسمن البنات وام مفلح نزلت راسها اي مجال في لمياء تحسس منه لذلحين منقهره من ولدها
دقو لبو فهد الي جاء وجاء معه فهد
ابو فهد بحنان وشوق :يامرحبااااا بهنوف الجيد
الهنوف تمالكت نفسها قدام ابوها حبت راسها وخشمه وهو ضمها له برحمه :وش لونتس وانا ابوتس
الهنوف يتحشرج صوتها :الحمدالله انت وش لونك
ابو فهد :طيب بشوفتكن مرتاحات
بناته كلهن :الله يخليك لنا ..سلم عليها فهد حب راسها..
الهنوف:منيب فيه اقهرك خذيت راحتك..
فهد يضحك:من رحتي مدري وش جاني على لمياء خذيت دروستس وقعدت اقهرها
لمياء :حولت علي
فهد :ههههه اثرتس يالهنوف تستانسين اذا قهرتي توني اجرب شعورتس
الهنوف :هههههههههه..وين هبه تغيرت!!..
منيره :راقده ومثل ماهي اللهم انها زانت ازياده
الهنوف تضحك:بعد ازياده على زينها..
منيره بفرحه: جعلتس بعدهم ..
ارجع فهد وابو فهد لخيمة الرجاجيل صلو الظهر وراحن البنات وخالتهن لخيمة الحريم سلمت عليهم الهنوف وهن يقزنها من اسفلها لعلوها
ساره تشاور الهنوف:يناظرونتس من قلب
الهنوف ببتسامه :خليهم حتى انا بعد ابي اقعد اناظرهم
ساره :هههه اجل بخليكم تاخذون راحتكم
الهنوف تلف لها :وش سويتي في المدرسه
ساره تلخبط متدري ليه اذا طرو المدرسه:زينه الحمدالله
الهنوف بستغراب:وش فيتس شكلتس مارتحتي فيها
ساره بصراحه :بالعكس اول مره اشتاق ارجع ادرس مره ثانيه
الهنوف:حلووو وش اخبار نوره بالعرس تغيرت
ساره :اول عرسها توهم جداد على بعض لابد من المشاكل حتى نفسيتها تغيرت الى اسوء بس الحين مشالله مرتاحه ..وبتردد..انتي ماتعودتي
الهنوف:بعدين اقولتس مايصلح هنا
قوموهم للغداء قامن الحريم والبنات اجلسن تجمعن وبنات جماعتهم يسالنها عن حياتهم ويسولفون عن بنات الشيوخ
الهنوف تلف على لمياء :متى بتجي غزيل
لمياء :يمكن تجي بكره اذا على كلام رجلها ماغير رايه
الهنوف بشوق:ياربي مشتاقه لمنصور وصباء يالبى قلبها
لمياء :تجنن اكبرت
الهنوف بضحكه:ذكرتيني ببنت موضي اسم الله عليها كلامها موب على سنها تهبل وشعرها مجعد من ذلحين هههه
لمياء :هههههههه يمكن لوه ناعم يروحون اتجعده تبي تصير مثلهم
الهنوف ببتسامه:لاتوقعين انهم نفس الي نسمع عنهم ترى بسيطين حتى بعض الاحيان تحسين ان هاذولا مثلنا لا يتباهون ولايتكابرون حبيتهم من قلب
لمياء :ماقد مره شفتي احد من الشيوخ
الهنوف برتباك : يوم الزفاف ودي كان االارض تنشق وتبلعني
لمياء بحماس:يبي لنا جلسه غير ذي
بعد العصر افرشو فرشه برى تجمعو الرجاجيل في جههة المجلس ونسوان عند جهتن في فرشه ثانيه
الهنوف مبسوطه :دورو لنا سياره انروح عليها انتمشى
وفاء :اروح على صالون يكفي
مشاعل اختها :لا لا نبي سياره مفتوحه نركب فوق
لمياء :اهبي تعرف تختار
مشاعل :هههه اصبرو بشوف ددسن
ساره : من الي بتسوق
نوره :انا الي بسوق بكن جيبن سياره بس
مشاعل توقف :بروح لااحمد بيوافق انشالله
راحت والبنات يتجمعن ورى الخيام ينتظرونها شافن السياره وفيها مشاعل يسوق بها احمد اخوها ..
انزل والبنات يركبن فيها
احمد براعه :وين فوق
البنات اضحكن واسكتن
مشاعل بترجاي:نبي نستانس الجوء حلو
احمد تردد وبعدين:كيفكم
ادخلت نوره داخل ودخلت معها منيره وبنتها ونوف
الهنوف فوق السياره :منيره جيبي هبه منتب صاحيه جيبيها ماسلمت عليها..
لمياء بزهق:بعدين فااااضيه
الهنوف بعناد :لا جيبيها فوق معنا
مدتها لها منيره خذتها الهنوف وقعدت تبوسها مشت نوره بشويش الى ان ابعدت من الخيام اقعدن يتمشن مرت عليهن سيارة فيها حريم ورجالهم
لمياء براعه :ياويلي فضحي منهم
الهنوف وهبه في حظنها :ليه وش فيهها تخيلي انا داخل وانسي..
ساره :ههههه روعه المنظر بس برد..
مشاعل تزحف صوب الهنوف الي لابسه ملفح صوف على كتوفها..
الهنوف تضحك:قامن يتزاحفن..
وفاء ترتجف:برد والله ماتوقعنا بيبرد كذا
لمياء :عشان فوق
ساره :خلاص خلوها توقف بندخل
مشاعل تطق قزازة السياره عشان يوقفون
وقفت نوره وافتحت الدريشه :هلا
وفااء :برد ببنزل ..انزلن البنات كلهن واركبن داخل
نوف بزهق:زحمه ليتنا درينا مقصدكم كذا والله مانوقف
ساره :اشوى انتس مادريتي
شغلت نوره السياره حاولت اتحرك وبخوف:بنات شكلنا غرزنا
لمياء تقدم جسمها: حاولي ماسرع وغرزنا
نوره برتباك :اصبرو شوي ..حاولت فيها والكفرات تحفر في الارض زياده
نوف:انزلو دفوها انا ماقدر .. انزلن دفنها مافيه فايده..
الهنوف :دقو على احد دام الوقت..
مشاعل :بدق على احمد
نوره بسرعه :لاتكفين بيزعل علينا وانا بعد السبب.. بدق على مفلح يطلعها ولا يدري اخوتس
وفاء:لا عادي ..
نوره :لا الله يرضى عليتس بدق انا ..دقت نوره على مفلح كلمته وجاءهم على سيارته الجيب
لمياء تلفلف شفايفها :بيهايط ذلحين..
ساره فيها الضحكه بس امسكتها الموقف مايساعد انزل ووقف عندهن
مفلح ببتسامه حلوه :وين الهنوف
الهنوف :مرحبا ابو سعد
مفلح :هلا ومسهلا وش اعلومتس
الهنوف :طيبه طاب حالك..وش لونك انت.. سلم عليها وتحفاها اركب في سيارتهن افتح الباب وطلع راسه لهن
مفلح بضحكه :دفن يامال الشحم..
تضاحكن البنات وقربن يدفن
ساره بقهر:لمياء دفي لعنبو ذالراس
قربت من السياره وحطت يدها على باب من ورى بس وناظرتهن
الهنوف:مشالله وخري بس ثقلتي
لمياء ترفع حواجبها بخبث: قربت ابي لامشت نطيت فوق
صدت عنها الهنوف وقعدن يدفن مشت السياره ونطت لمياء في الصندوق الى ان اركبت وزينت جلستها متربعه وهي تضحك على البنات يناظرنها ومنقهرات
وقف بعيد عن مكان التغريزه واطلع
مفلح بصدمه :خير..اشوف السياره ثاقله
لمياء :مهيب سيارتك..
مفلح : انزلي معهن يالله..
لمياء بغرور :منيب نازله..
مفلح :انزلي وروحي وقفي معهن مثل ماوقفن هن..
لمياء :لاصرت احمد طعت كلامك..
خلاها على عنادها شاف البنات يمشن صوبه راح لسياره اركبها ومشى وهي فيها
وقفن البنات ويضحكن على شكلها الخايف
سااره :وين موديها
نوف تضحك:تستاهل كان انزلت شكلها كان اتعاند
منيره :عزتي لها خوافه مهيب على شكلها
اقعدن البنات في مكانهن والهنوف راحت تمشي لمكان السياره تشوف التغريزه
الهنوف بصوت عالي :مايحد كان اناديه ماش نوره منتب سواقه
ساره تناظر معها :معلقه بس
الهنوف تجلس في مكان الكفر :دافي مكانها الارض بارده
ساره تجلس جنبها :من كثر مادرات الكفرات ولعت شراره
ابتسمت الهنوف خذت عود وارسمت به على الارض
ساره :كم تقادريتس في المواد الراسبه فيها
الهنوف ويدها تشخبط في الارض:كلها مقبول ..وابتسمت
ساره :هههههه المشكله كان امذكرتها يعني بلى مراجعه ..
الهنوف ببتسامه :ذاكرت بس ..يعني.. اشوفه يدخل يطلع .. ارفعت راسها لها.. تقدرين تقولين اذاكر بس برتباك وتوتر ومضر بالنفسيه هذا الي درسناه صح
ساره تناظر بشخابيطها :الاشيا الحلوه نحب نتذكرهاو تجينا حتى في الخيال بدون شعور درسنا هذا صح..
الهنوف بستغراب من كلامها :مافهمتتس..!!
ساره تاشر للارض ناظرت الهنوف ابتسمت بخجل وعقب اضحكت :كتبته ماحسيت والله..
ساره بهدؤ:تذكرين تلفونتس لي في ايطاليا..
الهنوف تهز راسها باسى :اشين لحظات عمري ماعمري حسيت بالغبينه والقهر مثل ذيك الايام
سااره :فضفضي..
الهنوف تنهد وبالم :حسيت بايطاليا بالكره له وانا اشوفه يمد يده علي بغطرسه وبقوه كم مره ابيت وانا عيني حزينه اغلب لقاتنا تنتهي بضرب واهانه يمكن بعد انا ماخفي عليتس اطول الساني عليه وهذا الي بس اقدر عليه حتى عقب ماجينا في بداية معرفتي بهله يناظرني من فوق ..ابتسمت اتعرفيني ماداني ذالنظره فماصبر ارد عليه من قلب بكلام يسم
ساره :انا قلت لتس خليه وعيشي حياتس..
الهنوف وصوتها تخنقه العبره وبسرحان :ماقدرت ساره هو انسان ماعرف اعبر لتس عنه عصبي شايف نفسه متكبر وحنون وفيه رحمه لفت لساره وكملت اذا اظهر جانب شخصيته كلام معسول عطف وحنيه وكانه عاشق احس انه متعلق فيني حتى نظرته تغيرني عشان كذا ماقدر اصبر واطنشه يخليني غصب ادخل معه بالكلام ماقدرت اعيش منعزله يقهرني بثقته وينرفزني ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك