رواية دموع اسقطت حصون القصور -40

رواية دموع اسقطت حصون القصور -40

صيته تفتح الباب بقوه الى ان اصقع الجدار وطلع صدى شافته يوم جاءها يركض اصرخت وانحاشت

اطلعت مضاوي اتوقف عند الباب وهي تشوفه يلحقها في الصور اطلعت واطلع وراءها في الشارع

سعود يوقف منفشل نزل اشماغه المتعوصم به

ام راشد ببتسامه:يالله حيه ابو حسن

سعود منزل عيونه ويسترق النظرات :الله يحيش ..كيف حالش..

ام راشد:زان حالك ...وين بيت ام فارس

ساره تناظره بقهر من عقب سالفة صيته لها

سعود:موب حولكم انا بوديكم لها

ساره بهدؤ:يمه انا برجع

ام راشد:ليه وسعود قده خلاص بيودينا

سعود:كيفش اهم شي الوالده انا بوديها توسع صدرها عند جماعتها...

لفت عنهم ساره وارجعت مرت المحطه شرت لهم خبز وجبن ومشروبات واقعدت تنقى بعض الكاكاوات خلصت واطلعت وهو يوقف يعبي بنزين

سعود عقب ماشافها لف السياره ومشى لها..

حست بالقهر وهي تشوفه يمشي بتجاها مايفهم هذا وبكل مره يتعرض لي بالشارع

سعود بصوت هادي وهو يقرب منها :ترى الكلام الي اوصلش من صيته حطته من بالها..

ساره :مافيه دخان من غير نار..انا غريبه عنكم مايجوز اتطلعون علي كلام موب في صالحي ولا صالحك..

سعود:حقش علي وانتاسف منش

ساره توقف وتلف له :من قبل اليوم والكلام الي اتروحه مع مضاوي كله مايبين وراءه رجال يخاف على سمعته وسمعت الي يسلم عليها..

سعود:والله مشكلتش انش فهمتيها كيذيه..انا عايش عند ربعي كلهم كذاته لاحبو بينو مشاعرهم وش ذنبي لاحبيتش وعبرت عن مشاعري مثلهم..

ناظرته بصدمه لفت منه برتباك وكملت طريقها بسرعه

....................

افتحت فمها بصدمه وخوف :متى صار ذالكلام..!!

ابو فهد بتعب:امس دق علي مفلح وعلمني..روحت لهم المركز بعد الظهر قد عمر طالع ويقول مفلح انه سافر وعطاني اورقتس

لمياء بنهيار في داخلها تطلقت ومفلح بعد الي جايب اورقتي ودرى انه ممسوك في عمارة ***** بانت بملامحها الهم والتعب والهزيمه لنفسها

ام فهد تناظرها وبقهر:الله لايوفقه ..لعنبوه ماستحى على وجهه

ابو فهد: سافر عقب اسواته توى اخوي مضحي جايني يتاكد من ذالكلام ويتشره علي الي وافقت عليه من البدايه...لف للمياء .. علمتس بسواته وانا ماودي بس عشان يسمح خاطرتس منه..

لمياء بقلة حيله:سامح من زمان ..رقت فوق افتحت الباب بتعب صكته وصاحت بقهر طلقني قدام مفلح يهون عندي انهم ماسكينه ولا طلقني قدام مفلح اكيد يتهزاء فيني ..اجلست ويديها على راسها وتصيح بضعف

الشغاله واقفه عند باب الصاله:ماما بابا مفلح برى يبغى انتي...

ام فهد تقوم وتطلع لها برى دخلته مجلس الحريم اجلس وهي تلف بتطلع تجيب القهوه

مفلح بسرعه :لاتجبون لي شي انا بقولتس شي وماشي ...

ام فهد ترجع :عسى خير ...

مفلح بهدؤ:الخير عندالله ..انا ياخاله زعلني الكلام الي طلعوه على لمياء ولا ارضاني

ام فهد بخوف:ليه وش الكلام الي يقولونه..

مفلح يرفع راسه لها:ماعليتس امر نادي ابو فهد قبل..

قامت ام فهد اتناديه ومفلح ياخذ نفس ابعد منه التوتر وهو يشوف ابو فهد يدخل عليه قام له حب راسه واجلسو

ابو فهد بهم:وش صاير ياولدي

مفلح منزل راسه:العرب يقولون ان لمياء معه يومه في الشقه اموديها عقب مامسكوه ودرى كلن في سالفته وطلقها ..

ام فهد بحزن وبكى:ياويلي والله انها عندي كل وقتها..

ابو فهد بقهر وغيض:جعله مايجزاه خير ..خرب عليها مستقبلها

ام فهد تعبر:لو تدري بعد بذالكلام وش بيصير فيها

مفلح يعكف شفايفه بندم يالله الخيره..

ابو فهد منزل راسه :معاد احدن متقدم لها وهو يسمع ذالسوالف..

مفلح بفرحه عض شفايفه تحنحن وبهدؤ:انا الي بتقدم لها..

ابو فهد بضيقه صد منه:منتب ملزوم تغطي غلط غيرك.. تجبر نفسك على شي ماتبيه وربي انشالله بيعينها..

ام فهد بسرعه:اذا اظروفك زانت ماعليه..

ابو فهد يلف عليها وبقهر:ماعليتس من الرجال لاتحدينه على شي مايبيه

مفلح ببتسامة راحه:اي والله انها زانت واني ماخليتها اعياف ..انا طالبها ابيها لنفسي موب لشي ثاني..

ابو فهد بتردد:مادمت قدمت نفسك فانا منيب رادك

مفلح يوقف:افضل لو انملك الحين نقطع الحكي عنها...ولاتبين لحد انها تحسست من ذالمشكله..

ام فهد :اذا قدرت تجيب شيخ جب هاالحين..

مفلح بهدؤ:اخاف ترفض...

ابو فهد يوقف:لاااا انا متاكد انها مهيب رافضه ترفض وجايها رجال طيب شرواك..

مفلح :تسلم شرواك الطيب..اجل بروح اجيب المملك

اطلع منهم وابو فهد يلف على مرته

ابو فهد:علميها مافيه رفض الحمدالله الي ربي ارزقها بواحد مثل مفلح وبه شكه بعرسها مره ثانيه

ام فهد تقوم منه وترقى فوق لها افتحت الباب شافتها تصلي العشاء انتظرتها لين خلصت

ام فهد تقرب منها وتوقف عندها وبتردد:شوفي ابوتس بيروح يصلي العشاء ذلحين لاجاء هو والي معه خلتس جاهزه

نهاية البارت التاسع والعشرون

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

لا احلل مسح اسمي من على الرواية ..

تجميعي : ♫ معزوفة حنين ♫..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

البارت الثلاثون

لمياء ترفع عيونها المنفخه من البكى لامها وبستغراب:من الي معه

ام فهد تلف بعيونها منها وبتردد:مفلح يبي يملك عليتس ..وابوتس امحذرني لاترفضين واكيد ان فيتس عقل وتفكرين صح

لمياء بصدمه واستنكار :انتو موب صاحين توني مطلقه انتو الي فيكم عقل..

ام فهد بعصبيه خفيفه:العرب طلعو عليتس كلام وانتس رايحه مع عمر لشقق ...وش رايتس انهون من مفلح ونخليتس اتعيشين عانس

لمياء تنزل دموعها بغبينه وذل:وليش يطلعون علي كلام وانا ماسويت شي ...انتو عاد روحتو وقلتو لمفلح تعال استر عليها من كلام الناس..

ام فهد وهي تفتح الباب:لا هو الي جاء وقاله لنا....

حطت يدها على راسها وبكت بالم يارب وش اسوي اكيد انه مثل ذالناس صدق وجاء بيستر علي موب واثق فيني بكت بقهر وانسدحت على سجادتها

بعد ماصلو العشاء جاء الشيخ وقع مفلح وودو الكتاب لها فوق بعد مارفضت انها تنزل رقى لها ابوها

ابو فهد يفتح الباب ادخل بسرعه عدلت جلستها وهي تشوف في نظرته الجديه

ابو فهد ياشر على مكانها بدون كلام ناظرها بقوه وكانه ناقد عليها وقعت بسرعه وحطت القلم..لف منها واطلع ناظرت الباب وراءه اسرعت وقفلته وقلبها ينبض بقوه انا متحلمه الحين بقوم بقوم

ادخل عليهم بالدفتر ومفلح يناظر في فمه وش بيقول

ابو فهد:الله يوفقهم ويبارك لهم

عض على شفايفه بدون شعور اخيراااا

سلم عليهم الشيخ واطلع مع مفلح الي بيوصله هو ومحمد اركب الشيخ قدام ومحمد ورى

الشيخ :مبروك ..جمع الله بينكم بخير

مفلح بفرحه :الله يبارك فيك ويجزاك خير

محمد بضحكه:متى نويت العرس

مفلح :هههه ان الله راد بكره

محمد :ههههههههههاي

..........

ترددت تدق عليه خايفه لايعطيني مفصول ولا مغلق عقبها كيف بهدئ

النايفه :وش اتفكرين فيه

الهنوف ببتسامه قلقه :افكر فيتس

النايفه :ماظنيت ...

ام سلطان :منتب وجه خير ينويفه يوم طلعتي من عزلتس راح سلطان

اطلعت النايفه في اليوم الي مشى فيه سلطان لشمال تاسفت من امها وانها خلاص رضت ببندر وزعلانه على نفسها والي سوته

الهنوف:راح وبيجي انشالله

النايفه تصغي لها وبهدؤ:ليش انتي كذا قلقه صاير شي

الهنوف تلف لها وبتصريفه:تعالي علميني ..الحين اقتنعتي بكلامي ولا هذا تمويه لموجه جديده

النايفه بتعب واحراج:لا انفشلت من نفسي وانحرجت والله يالهنوف من طلعتي من الحجره وانا احس اني مصدومه من نفسي كيف وهمت نفسي والمشكله انه تملك واانا قدني بعد متملكه

الهنوف:زين يعني مقتنعه

النايفه :ايه الله لايوفقه كان خاطبني يبي يصرف اموره

الهنوف : استغفري ... كلن راح في طريق

النايفه تنهد بالم : استغفر الله بس هو السبب مشكلتي مع سلطان وخلاني اتلفظ عليه.. نزلت عيونها بندم وقامت رايحه لحجرتها لفت الهنوف على خالتها الي انسدحت ونامت خذت الجوال وارسلت له بدون شعور

سلطان داخل الاسطبل ومحمد جنبه

محمد بستغراب:يعني قد لنا شهر من سحبت المكليه منه ومختومه لك ومادرى انها قدها لك

سلطان يدخل يديه بجيوبه:ايه يتوعد العمال ذالخايس خوفهم واخلفوني

محمد :علموكم اهناك

سلطان :ايه ..دق علي مـ...اسمع صوت الرساله بجيبه وطلعه افتح الرساله قراءها وناظر لمحمد الي يناظره تحرك من قدامه واطلع برى

افتحها وببتسامه وعيونه تلتهم الحروف بشوق

البارحه راسي تصافق طواريه

والنوم ماله يمت العين حروه

يلعب في راسي صوت صلف المشاريه

ماهمني شهره ولا جمع ثروه

همي وغمي واحدن يوم القايه

يتل قلبي في الهوى من عراويه

تل الرشى دلو الثلاثين عروه

يتله الي حامي القيض حاديه

قلتها وكل اناء ينضح بمافيه

وفي العمر يبلغ العز ذروه

واليوم ذاه يااوله وين تاليه

والنوم مالها يمت العين حروه

تنهد ببتسامه وش كنت ياسلطان وش صار حالك الحين انا اجل الي احس بضعف من ذالحكا بس هاذي جات من واحدن اغليه..

ارسل لها وادخل على محمد الي ابتسم عقب ماشافه داخل

سلطان:اشوفك تبوسم

محمد ببتسامه :اييييه دريت ان سلطان بن نايف اقفى

سلطان :وش قوم سلطان بن نايف مايقفى لخاطر الهنوف..

ابتسم محمد وهو يتذكر شكلها عند الوايت ابهرتهم بجمالها وشعرها ونعومتها فاز بها سلطان والوني داري انه يوم خلاني احرك انه مايبيني اشوفها..

خذت جوالها بتردد خايفه جعل يسقى لشفته واقف عند الباب..افتحت الرساله

(خاني القصيد مالقيته يعبر عن شوقي لتس

احبتس يابعد شوف سلطان)

تنهدت براحه والابتسامه تشق حلقها تنفست بعمق رقت لحجرتها افتحت الجوال على رسالته وحطتها قدام عيونها وهي تحاول تنام

.........

صيته :ابلا ساره شوي لوسمحتي

فاطمه:هاذي وش تبي بش كل شوي جايتش

ساره بزهق:وش اسوي بها شكلي بصقعها بالحكي وانفك..قامت واطلعت لها

ساره :نعم ياصيته

صيته بفشله:اانا اسفه ياستاذه هو يعلمني وانا الي روحت وانقلت لش الحكي ..ترى هو زعلان علي الى وقتش هذا

ساره :معليه اسفتس مقبول ...بس شرط انتس معاد تجين عندي ولعاد تنقلين حكي مره ثانيه

صيته براحه:ابشري عى خشمي ...بس تراهو قال تعذري لي منها

سار بضيقه :صيته

صيته بخوف:خلاص اكذب عليش ماقال

ساره :انا عارفه انه ماقال فهمت حركاتس ..لفت منها وادخلت

ارجعت صيته لخوياتها

هيا:وش قالت لش

صيته :ياليتني مافزعت له واروحت استسمح منها

هيا:ويلش منه لتزعل عليش وهو السبب

صيته :معلي منه وش دخلني ليش يتكلم عندي وانا ماعندي صبر

هيا:كيفش انشالله يشدش وانا اعاين ويخبز وجهش

النايفه بفرحه :طيب دقايق ..صكت التلفون ولفت للهنوف..روحي البسي لتس اجلال نواف بيدخل

ام سلطان :هاتس اجلالي ..لفيه عليتس

خذته الهنوف لفته وغيرت مكانها

تحنحن نواف وادخل عليهم

نواف :السلام عليكم

ردو السلام وهن يقومن يسلمون عليه ضمته النايفه بفرحه راح لامه والنايفه ماسكه يده حب راسها ويدها وضمها

واجلس جنبها في الصاله الشعبيه وقدامهم القهوه

الهنوف:الحمدالله على السلامه

نواف:الله يسلمتس ..وش لونكم

الهنوف:بخير الحمدالله.. مبروك الشهاده

نواف يبتسم:الله يبارك فيتس ..وش دراتس انها معي اخافني خليتها..

الهنوف بضحكه:بعد تروح عشانها وترجع بدونها

نواف:ههههه لا توبه الحمدالله قدها في الشنطه

ام سلطان بحنان:وش سويت في ذالوقت الي راح كله

نواف :ابد صمت عند اخوياي وافطر عندهم ,,وابركه قعدت اذاكر موادي وجبت فيها درجات مرتفعه ارفعت نسبتي مع اني راسب

النايفه :كلها ابركات سلطان

نواف :وينه ادق مايرد...لف للهنوف..هو موجود

الهنوف:رايح لشمال...مدت له فنجال القهوه وخذاه منها

نواف :ايه ..هااا وش اخبار عرستس يالنايفه

ام سلطان :عرسها في عيد الحج

النايفه :اقريب مره ..انتو الخسرانين بروح واخليتس يمه

ام سلطان تناظر الهنوف وببتسامه :روحي انا عندي الهنوف تسواتس..

نواف :الام مالها الابنتها الهنوف مرت سلطان

الهنوف بهدؤ:انا بنت لخالتي ومره لسلطان..

نزل راسه ببتسامه وهو يحرك الفنجال بيده

ام سلطان :جعل ربي يسعدتس .. وناظرت النايفه ..النايفه اتروح قدني سامحه منها

النايفه:بس ماعلي منكم بجيكم حتى لو سامحين

نواف يضحك :ياحليلكم والله اني اشتقت لكم واشتقت لبيتنا

ام سلطان :وانا بعد اشتقنا لك ولشوفك الحمدالله على ذالساعه

نواف :وينه انويصر لذلحين يروح لهم

النايفه :ايه حتى خميس وجمعه مايجي

نواف :هذا لو ياخذ له وحده من الرياض ويحبها معادبكم شايفينه

النايفه بخبث تناظر الهنوف:الا صدق الهنوف انتي تحبين اخوي سلطان..

افتح نواف عينه عليها بزجره

النايفه تضحك :يالله جاوبي

الهنوف ببتسامه:ماهوب لازم تعرفين جوابي لقد اعرفه سلطان..

نواف يبتسم وبنظره خاطفه لها وبعد استقر نظره لنايفه

ام سلطان :لو حنى سالين النايفه كان قالت حبيبي واحبه

نواف :والبنات مثل بعض يايمه

النايفه :ههههه لاتقلبون علي...

مد فنجاله للهنوف وهزه بمعنى بس ووقف

نواف :بروح اتروش وانام تعبان لاجاء سلطان قوموني

ام سلطان :نوم العوافي ...خذ راحتك

رقى فوق والهنوف تلف لنايفه

الهنوف بقهر :وش عندتس ياحماره تساليني قدامه

النايفه :هههههه والله بشوف وش بتسوين

ام سلطان تقبصها :تحسبينها خبل مثلتس

النايفه .اااي يمه ماحبتس القباصي

الهنوف:ههههه والله انتس تستاهلينها ...بروح اصلي لاتنتظروني على الغداء

ام سلطان :ليه...

الهنوف:بس فديتتس..ودي ارقد شوي راسي يوجعني

ام سلطان :سلامتتس اجل.. وبتردد..يمه ماحللتي اخاف حملتس يحتاج اعلاج..

الهنوف بملل :لا ...انشالله قريب

ام سلطان :انشالله ... شوفت ولد سلطان هذا منى عيني وسعدها

الهنوف بهدؤ:الله كريم ..رقت لحجرتها افسخت اجلالها احذفته على السرير صلت ونامت على طول امس اليل ماقدرت ترقد

نوره بفرحه وصدمه:يمه تكلمين جد.ماصدق ماصدق

ام مفلح بتفكير :لذلحين وانا مستغربه تطلقت من عمر ثم تملكت مفلح..

نوره بتحفز وبدون صبر:اساليه شوفي..

ام مفلح :توه مابعد جاء علمتني خالتتس نوره ..تملك لاقال لابوتس ولا احد درى ..!!

نوره بحماس :بجي انشالله بكره ...وبساله بالتفاصيل..

ام مفلح :طيب اجل مع السلامه ..

صكته من امها وابتسمت ياسبحان الله

محمد :من زماااااان ماشفتك تسذا مبسوط..

مفلح يتنهد براحه:ايه من عرفتها وانا منيب مبسوط اوله عقدت لي حياتي عقب حبيتها عقب راحت مني

محمد :يوه المشكله..اثره الحب تسذا

مفلح يناظر لشارع وبتفكير:بس اتعقب اقولها احبتس..

محمد براعه:وش صاب عقلك ولو بتجيب لها النفسيه..

مفلح يلف له ويبتسم:لابردت حرتي فيها وذوقتها ماذقت من قلة الحيله ..وبحماس..يالله لو تدري وش كثر اشوفها بعد ذالي صار

محمد:صراحه الحظ جاء في صفك...

مفلح يمسح وجهه:والله مدريت ان اموري الحمدالله بتزبط كذا ..اول بروح اصلي ركعتين انشالله ان ربي بيغفر لي ثمن شكر..

محمد وهو يتراخى في كرسيه:وصل شكر اني خويك

مفلح :بخليها اربع لك.. والله ان اخليها اربع ركعات

محمد يضحك:لوني داري كان تشرطت

......

لمياء بتشتت:مدري قمت والحال منعفس..وش تبيني اسوي ارفض

سميره بستغراب:صراحه شي لايصدق يعني يوم الاربعاء رايحه متزوجه عمر ويوم السبت مفلح خطيبتس الاول

لمياء تنهد بتعب:احس اني متلخبطه ..تطلقت من عمر تزوجت مفلح في نفس الوقت مدري ليش ارجع يطلبني..خايفه ان امي داق عليها ومستفزعه به تسويها امي..

سميره تقوم وتقومها :قومي معي نتمشى شوي وانسي السالفه الله يكتب كل شي في صالحتس

لمياء توقف:ايه هذا الي يبرد الخاطر...

سميره:لو فكرتي في الامر بغض النظر عن مفلح ..الحمدالله الي فكتس من عمر وسواياه

لمياء بضياع:الا لو فكرتي اني ضايعه من كل ناحيه ...

نواف بنزعاج :روحي جيبيه بشوفه

النايفه بتردد:اصبر الى ان تجي امي

نواف بعناد :لا ذلحين وش معني لين تجي امي

الهنوف بضحكه :وش فيها يالنايفه ..لفت لنواف ..عقد مكتوب عليها اسمها واسمه بس الكبت عليها صورته

نواف :هههههه ايه قولي كذا وش فيها لاشفت اسمتس...

النايفه تناظر الهنوف بغيض العقد الاسم متداخله مع بعضها وصورة رجل وامراءه متعانقين

الهنوف تبتسم:خلاص اجل شوفها وقت الزفه هذيك الحزه هي موب صوب احد

نواف :اجل سمحنا شكل السالفه فيها ان..ارفع راسه لامه المقبله عليهم ..يالله حي بنت خالد

ام سلطان تجلس جنبه على المركى:الله يحيك..وش ذالمكان الزين

الهنوف:الجوء حلو ودافي وفرشنا في الحديقه اشرح

ام سلطان بمتنان:كنت عارفه انه انتي الي مسويه هالجو..ومطلعتنا من ملل البيت

النايفه :وبعد هي الي مزينه هاالحلو اذا تبين تمدحين.

نواف:اشوف كنتس غايره

النايفه :والله اشملوني معها

نواف:يعني الحين طالبه منهم يفرشون الفرشه ومزبطه القهوه وكل شي على الكيف ونشملتس معها ماسويتي شي..

النايفه بمرح:وش اسوي عاد احب المدح..

نواف:نمدحتس ابعيد من خشمتس يالرفله..قومي ردي على التلفون بس

راحت لطاوله جنبهم وردت على تلفون الاسلكي

النايفه :الو ..

امن البيت:طويلة العمر..نطلب الامير سلطان

النايفه:خارج البيت

امن البيت:الامر ضروري ..عندنا عمال طالبينه والامر ضروري..

النايفه :عمال اي شركه

امن البيت :عمال مصنع الاعلاف في الخرج تبع سلطان واخوانه ..

النايفه :اذا جاء بيجيهم

امن البيت يكلم الي وراءه مدام السيد موجوده ارجع وكلم النايفه:تفضلي طويلة العمر واحد منهم بيكلمتس.. خذاه العامل المصري وكلمها

النايفه بزهق :انا موب مدام السيد

العامل بقلق:الامر خارج من سيطرتنا ..اذا مدام السيد هناء لو سمحتي يعني ادينا اياها

النايفه تبعد السماعه :الهنوف هنا عمال طالبين سلطان ولا مدامه اذا كنه موب موجود

الهنوف ترفع حواجبها :وش ذالعمال ..!!

النايفه:يقولون مصنع سلطان واخوانه

الهنوف بهدؤ:الله يهديتس وش يدخلني في ذالامور

النايفه :يقولون ياهو يامدامه

الهنوف برتباك:ولا عليه امر نواف يروح لهم

ناظر لها نواف شوي ووقف

نواف يلبس حذيانه :انا بطلع لهم ..اطلع والنايفه تسكره وترجع تجلس عندهم

الهنوف:يعني بالله يوم تعطينه وجه وتناديني هذا شي مايخصني خاصه بوجود نواف

ام سلطان :لاتشرهين عليها...

النايفه :وش يعني هذا حلالتس بعد انتي

الهنوف بعتب :لعاد تعودين ذالكلام وخاصه قدام اخوانتس رجاء يالنايفه حتى لوتمزحين

ام سلطان :الله يكملتس بعقلتس يابنتي ...

النايفه :والله اذا كذا عيب ومنقود توبه

ابتسمت لها الهنوف وتكلمت في نفسها يعني مصنعه واخوانه وانا الي اتصرف فيه وبعد نواف جالس اخاف يكرهني ويحسب اني ابي فلوسهم ولاشي..

غابت الشمس اذان المغرب من مسجد البيت يرتفع قامن لداخل خاصه ان الجوء ابرد

ادخلن والهنوف تروح لحجرتها ناظرت اسمه ودقت

افتحت الباب وادخلت وهو مايزال يرن حست بالقلق من تاخره بالرد وفي اخر لحظه رد

سلطان بهدؤ:مرحبا عد مادق قلب سلطان لهنوفه

الهنوف تنفخ براحه وببتسامه:تبقى وتدوم نبضاته ..وش اخبارك

سلطان:كل شي زين .. من صوبتس يابعد شوفي

الهنوف بحب وبصدق:خايفه حتى النوم ماتهنى فيه وانت بعيد هذا اذا نمت..وبرجى.. لاتطول

سلطان يتنهد :لاتجفى عينتس النوم تحاتيني...

الهنوف:حتى لو غصبت عيني تحدتني وظلت ساهره

سلطان يزم شفايفه بهدؤ ومشاعر تخالج احاسيسه شوق لعيونها الي اسحرته وملكة مشاعره

الهنوف بصوت هادي:معي.. سلطان

سلطان بشوق:معتس بس ذوبتني حكاويتس ...ومدري متى يزين كل شي واجي

الهنوف ببسمه:انشالله في اقرب فرصه ..نواف يدق عليك يقول ماترد اقلقتني..

سلطان :نواف قد هو عندكم..!!

الهنوف تنهد:ايه ..اوصل قبل يومين

سلطان بترقب:جاب لشهادته طاري...

الهنوف:ابشر بها قدها معه...

سلطان براحه:زين زين ..بحاول اني اجي باسرع وقت ..خلال الاسبوع الجاي

الهنوف بحسره :ماطولها وينا وين الاسبوع توه ماجاء...

سلطان بسرعه:بيجي انشالله بيجي ..سلمي لي عليهم في امان الله

صكه منها والتفت على محمد

سلطان ببرود متجاهل وجود بندر اخوه:وليه يجي معك..

بندر:انا اخوك مهما طال الزمن ولاقصر

سلطان بستهزاء:لااااا ..تعرف تحكاء بعد!!..

محمد:اسمحو لي عندي شغل

سلطان :وش تبي ياأخوي طيب

بندر:ابيك اترجع لي الاسطبل وتاخذ حق نواف وانا اخذ حقي ..

سلطان ببتسامه واثقه:لابعيدن من شاربك ..ليه ماوصلتك رسالتي...معاد لك حق روح حقق لك واحد ثاني ابمجهودك ...

بندر:انا مانكر انك انت الي ساعدت في تكوينه وعطيتنا اساسيات العمل فيه الى ان صار كذا بس هذا قسمه بيني وبين نواف وابوي الي مزينه لنا يعني لي فيه حق

سلطان يلف منه :كل كلامك صح بس انت تعديت حدودك مستفيد من تهاون ابوك معك في تصرفاتك الصبيانيه ..وحذرتك وقتها بس شوفت عينك عاندت وهاذا انا نفذت الي قلت لك عليه..مشى منه متجه الى مكتبه الرئيسي

..............

الساعه 11 الظهر

ساره بصدمه:تقولينه صادقه

الهنوف تضحك :والله اني فرحت لها

ساره :انا كنت شاكه انه يبيها سبحان الله الي رجعها له ..

الهنوف :الى الحين وانا ابيها اتعلمني ولاترد على اتصالي

ساره:لا لا الي بيشوف يوم السمره بيدري انه يحبها معليتس منها اكيد فرحانه

الهنوف:الله يستر وش اخباركم انتو وش اخبار خالتي مبسوطه معكم

ساره بتردد:ايه مبسوطه.. الهنوف ودي اسالتس

الهنوف:سمي

ساره :فيه واحد من المدينه الي ادرس فيها صار لي كم موقف معه اذا جاء واخطبني اوافق

الهنوف :يعني موقف يوسع صدرتس ومافيه عيب

ساره تنهد:بعضه انقد عليه وكانه يمون بس استانس به

الهنوف:ههههههه وش اصله..

ساره :من اهل قريتهم الـ...

يتبع ,,,

👇👇👇