رواية قصور من طين -18
أم نايف: علمي علمك تقول صديقة مهره وأنا شاكه فهالشيء ماظنيت مهره تعرف مثلها أعوذ بالله شفتي وش لابسه
سميره : الله يهديها ويصلحها
حياة وهي مقبله من وراها : وش تســــــوين مختليه بخالتي من وراي هااااا
سميره : ههههه وش أسوي أحبها أكثر منك
حياة تسلم عليها وتضربها بخفه على كتفها: تستاهل ام نايف الحب كله
غاليه: يــوه وشوله تسلمون أبي أفهم كل يوم مع بعض فالمدرسه وبعد تسلمون مامليتوا من بعض!!
وتقرب منها وتبعد حياة عنها وتحظنها بقوه وتقول بشوق: يــــامرحبا والله ومسهلا ،، والله لك وحشه غير طبيعيه حرام عليك ست شهور ياالظالمه مانشوفك
سميره والدموع مغرقتها على الحب اللامعقول عند هالناس تقول: والله والله غصب عني مشتاقتلكم أكثر من كل شيء لكن ماباليد حيله
مهره توها تدخل تشوف دموع سميره : الله الله جات سميره بأفلامها معها ياللااا يااللااا بياع كلينكس بياع كلينكس بنص ريال بنص ريال
وتوجه يمها وتحظنها بحظن مشتـــــاق : وحشتيني مـــوت
سميره : فديت روحك ياروحي والله أنا أكثر كيفك وكيف التخرج معك
مهره : ههههههه ذكرتيني وأنا كنت بنسى ،، مالت عليهم غاليه وحياة محد نسوني اني خريجه ،،الإمتحانات قربت ولحد دلعني واهتم فيني منهم بس خالتي جعلني قبلها واصلا فديتها على الفاضي والمليان مهتمه لكن ذاالثنتين السوسات محد عطاني وجه منهم ،، أقولهم ياناس ياعالم تراني بلغتنا سن الرشد والأهم باقي كم اسبوع واتخرج لكن هم مالت عليهم مكبرين ذاالروس!!
غاليه وهي تلاعب دانه : هااه وش يعني تخرجتي!! بتنضمين إلى فئة هلمـواا إلى النوم خليك في كليتك أبركلك على الأقل ملتهيه في شي
سميره : يلعن أم التحطيــم ياشيخه
مهره وتاخذ دانه وتبوسها بقوه خلتها تصيح : ههههههه لاماعليك متعوده لاتاخذين فبالك ،، المهم شخبارك أنتي وشخبارالتدريس وياك
سميره : لحول ذبحتي بنيتي ماصارت بوسه يالمشفوووحه
حياة: ههههه عز الله ،، مسكينه أختي بس مطيحه تبويس فذالبزارين اللي فالنت لو يدرون بشكل بوستها كان حرموا مره ثانيه يشتهرون
غاليه: شوفوا أنا أدري إن هذي تلميحات مالها داعي لكن أنا مارح أعطيكم وجه لأني مابي أتنرفز هذا أولا ثانيا لأن هذي حكمة ربي ثالثا لأني متحمسه عـ الأكشنات اللي بتصير بعد شوي
أم نايف تدخل المطبخ بعد ماودت القهوه وكنها مستعجله : يابنات البنت جالسه بلحالها عيب عليكم أنتوا قاعدين تضحكون وتسولفون وهي مرتزه كنها جنيه لحالها
سميره: بنات من هذي صدق؟ شكلها مايطمن مره
حياة تمشيبها وهي ماسكه يدها: بعدين أقولك صادقه خالتي تأخرنا عليها
سميره: لاجد وش هالتكشاخ كلـه عليكم ،، ياحبيلكم كل هذا عشاني ياجعلني مابكيكم
حياة : لاتستانسين مب عشانك منتب غريبه ،، عشـانها
ودخلوا كلهم مع بعض وسلموا عليها أول بما إنها فطرف المجلس ولاعت كبودهم من شكلها واحتارت هي أي فيهم مهره ،، تقدموا لصدر المجلس عشان يسلمون على أم راشد وراحت غاليه تناديها تجلس معهم بما انها أجرأ وحده فيهم ..
نهى بدلع ماله داعي: لا حرام عليك والله مستحيه
غاليه تناظرها بعيون مكذبه : لااا وش مستحيه عادي كلنا فري وبتقدرين تاخذين راحتك
نهى: انتي مهره؟
غاليه : امممم مب قلتي تعرفينها ياللااا وريني شطارتك
نهى بحرج درت إنها نغزه وقالت : لااا أعرفها بالصيت لكن الشكل ماعرفه ،، أكيد أنتي صح؟؟
غاليه: لااا مب أنا ياللااا تعالي
وتقفي غاليه متعمده وحستبها تمشي وراها ،، جلست غاليه على الأرض وحطت دلة القهوه قدامها وقالتلهم كلهم يجلسون معها أريح وألّم ،، وبالفعل الكل جلسوا على الأرض إلا أم عبدالله وأم راشد بحكم إنهم مايقوون عليها بتعور ركبهم ونهى بحكم البرستيج تبعها ..
وسوالف عند هم كلهم مالها آخر مادخلوا نهى فيها بأي شكل من الأشكال ،، حاقرينها بعمد ليـــن خلوها تكره عمرها وقالت بهمس وهي توطي راسها لسميره اللي جابها الحظ الزين جنبها : لو سمحتي اختي وين مهره ؟؟
سميره بدهشه: هااا
نهى: وش فيك ماتسمعين أقول وين مهره فيهم الصراحه شاكه إنها ياهذي ياهذي " وتشر على حياة ومهره" لأنهم يتشابهون كثير
سميره بحسن نيه تشر على مهره : هذي
نهى تتسند وبإبتسامه خبيثه تقول بصوت عالي: مهره
مهره دق قلبها بقوه وطالعت غاليه على طول وبعدين ناظرتها وقالت : هلاا
نهى: ممكن تجين جنبي شوي
مهره تناظر غاليه كنها تتوسل لها تساعدها : ايه أكيد ليش لاااا
قامت مهره وقلبها يدق بقوه غير طبيعيه الخوف متمكن منها بشكل ،، ماعملت حساب أبد انها بتجلس معاها لحالها،، مشت بثقه عكس الي بداخلها وصلت عندها وناظرتها بجفاف وجلست بعيد عنها شوي وقالت بهــدوء : هلا
نهى بإبتسامة انتصار: هلابك وراك كني باكلك اقربي تراني حبوبه
مهره بجديه: لامرتاحه كذا
نهى: اممم اوكيه
مهره: وهذا انتي جيتي ممكن أعرف وش وراك؟
نهى: صدقيني ماوراي شي مجرد تعارف ليش مكبره الموضوع !!
مهره: خلاص تعرفتي
نهى : لا بعدني بسم الله من جيت وانا مع ذاالعجز
مهره بثوره: لو سمحتي احفظي لسانك
نهى بابتسامه مستفزه: واااو عصبتي
مهره تتسند : ابي اعرف الحين شتبين
نهى: صدقيني مابي شي حبيتك من سمعت عنك وقلت إلا أعرفها من قرب
مهره :حليلك انتي كل من سمعتي عنه رحتي تركضين له !!
نهى عرفت انها نغزه توقف وتغير الموضوع: ياللاااا أنا ماشيه مشكورين على الكرم ماقصرتوا .. ولاتحاتين ميمي أوعدك بزياره ثانيه
وتشر على الكل بكفها بحيث تشملهم كلهم وتقول بميوعه : بـــاااااااااي
وتاخذ عبايتها وتطلع وتقول مهره بصوت عالي : فكـــــــــه
ويطالعها الكل وتقولها خالتها أم نايف بـ استغراب: روحي ودعي ضيفتك مايصير تطلع منها واليها!!
مهره: تخسي والله ماروح وراها مثل مادخلت تعرف تطلع
ام عبدالله بغل: ايه والله تخسي مب لبس اللي عليها عزالله بيعاقبنا ربي اليوم
ام راشد: الله يصلحها ويهديها
ام نايف: دامك ماتبينها وشوله تعرفينها
مهره :والله ماعـر...
غاليه تقاطعها منقذه للموقف:لايمه هي مب ماتبيها بس ماتعجبها تصرفاتها..
اما برا فالسور واقفه بالشكل اللي دخلت فيه تنتظر السياره تجيها ،، طلعت جوالها اللي كان يرن وقالت : هلا عيوني
-- : هلابك طلعتي
نهى: ايه انا فالسور الحين
--: وهااه سبع ولاضبع
نهى: لاهذا ولاهذا تونا ماتوصلت لشي بسم الله من جيت اول شي لطعوني ساعه تحت وبعدين يوم جاو جلسوني مع عجز الحمدلله والشكر
--: ماشفتي نايف ؟
نهى: مدري شفت واحد اول مادخلت حسيت انه هو مثل ماوصفته لي،، شكله وسيم حيل ،، نحيف اسمر بسكسوكه وعيونه غايره
--: اوك نكمل فالسياره انا فالمكان اللي نزلتك فيه يااللااا اطلعي
وتطلع نهى وتشوف نور السياره من بعيد ووتمشي ليــن وصلت وركبت بنفس الغنج اللي نزلت به،،..
نهى:هـااااي خلودي
خالد: اهلين كيفك
نهى: بخير بس الصراحه الصراحه احسن شي طلعتبه من هالزياره اني شفت نايف وااو شكله يجنن حرام تنتقم منه شكله طيوب
خالد ببرود: انتي الطيوبه ماتعرفينه كثري ،، المهم وش سويتي مع مهره
نهى: نفس ماقلتلك من شوي ماصار شي عليه القيمه لكن استغربت !! معطيهم أكبر من حقهم بكثيــــر ،، حتى مهره مب بذاك الجمال اللي يذبح صح انها مملوحه وجسمها حلو وطولها احلى لكن ماتستاهل هالسالفه كلها والله انصدمت يوم شفتها ،، حتى بيتهم ووووععع متصدع ومصدي وحالته حاله
خالد: والله هذول الناس مايسوون ظفر رجلي ،، لكن انا قلتلك نايف والله ليشوف مني شي يعاف نفسه
نهى:اللي اعرفه منك انه نقيب يعني المفروض تخاف منه!!
خالد:خله يوريني شطارته استقوى علي ذاك الزمان يومه توه ملازم ودخلني السجن على باله يقدر علي لكن قلتها والله لأنتقم منه وخله يوريني وش بتسوي رتبته ..
\
:
بعد صلاة العشاء فـ الفور سيزون جالس سعيـد على احد الطاولات الفخمه ويهز رجله بتوتر بين عليه انه ينتظرله احد ،، عيونه معلقه على مدخل المطعم ينتظر بربكه الطله اللي ياما وياما ضناه الشوق لعناقها ،، شوي تهلـل وجهه وإستبشر باللي دخل لتوه وقف عشان يدله على مكانه إلادق جواله ....
.
.
يتبع
":":":":":":":":"
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
﴿ الجزء الثالث عشر ﴾
.
.
بعد صلاة العشاء فـ الفور سيزون جالس سعيـد على احد الطاولات الفخمه ويهز رجوله بتوتر بين عليه انه ينتظرله احد ،، عيونه معلقه على مدخل المطعم ينتظر بربكه الطله اللي ياما وياما ضناه الشوق لعناقها ،، شوي تهلـل وجهه وإستبشر باللي دخل لتوه وقف عشان يدله على مكانه إلادق جواله وكان " الوالد يتصل بك" رد عليه على طول وقال وهو يشؤ بيده : هلا يبه انا شفتك شفتك وجه يسار الله يطولي بعمرك ..
سكر منه وثواني الا هو واصل لعنده حب راسه وعدل له الكرسي اللي جنبه عشان يجلس على قرب منه .. وبعدين جلس هو فمكانه..
سعيد والإبتساامه شاقه الحلق: حياالله ابــو سعيـد
سالم بشبه ابتسامه: الله يحييك ويبقيك ،، لايسمعك سلمان تقول ابو سعيد ويقوم الدنيا ولايقعدها ..
سعيد بابتسامه لامثــيل لها: لاااا أنت اليوم ملكي وأقول اللي ابي ،، ابو سعيد ابو سلمان ابو صيته ولاحنان كلــه على كيفي اليوم
سالم بنظره تلمع: بتذلنا اليوم مع ذاالعشاء ،، هههههه يابوك كلكم عيالي وكلكم فقلبي..
تغلغلت الكلمه فـ أنحاء سعيـد " يابوك" الله أول مره يسمعها منه ..
سعيد بعد سجه لثواني: الله لايخلينا منك يبه ويديمك تاج على روسنا
سالم: ماقلتلي وش مناسبة هالعزيمه ؟
سعيد: أبد طال عمرك سلامتك .. قلت فخاطري ياولد قدلك خمس سنين متوظف ولاقد ذوقت أبوك من راتبك استح على وجهك هذا ابوك وحقه عليك فعاد جات ذاالعزيمه..
سالم مبتسم: مع اني متحفظ على الوظيفه بعيد عني لكن حلو منك انك فكرت فيني محد قد سواها فيكم
سعيد: جعلني مابكيك يبه انت اللي دافن عمرك فالشغل كنه بيطير ولاانا ودي من زمان
سالم بنظرة عتاب: يارجال خل منك المعاذير!! يعني لوجيتني وقلت يايبه تراني عازمك عالعشا برفض والله اني افرح بالساعه اللي اجلسها معكم
سعيد بحرج: بس انت لشفتني كنك مروع ،، تعصب وتجي حالتك حاله فمن كذا كنت أتحاشاك عشان مازعلك ولاانرفزك
سالم بلـوم: طيب تعالي خذ مافي خاطري قول ليه يايبه وش بلاك علي ؟ وش في خاطرك من صوبي ؟ مب تفرح بالهوشه وتصد مره
سعيد بحرج أكثر: مدري يبه حسيت انك بتصدني وبتصدني والله احيانا احس انك كارهني
سالم : يابـوك محد يكره عياله واناكنت متضايق منك عشان وظيفتك لكن فكرت فحكيك أمس وقلت كل واحد حر فحياته الحلال حلالكم والخير خيركم وفالأخير انتوا اللي تحددون مصيركم
سعيد يقوم بفرح ويبوس راسه بقـوه : أيــواااه هذا الكلام اللي ابيه ،،خلني انام واقوم مثل الناس
سالم يضحك: وانت عازمني على هواء أمحـــق كرم وين العشا !!
سعيد وهو يناوله المنيو: افـــااا عليك أكل المملكه كله تحت أمرك
\
:
فبيت عبدالله الحريم واقفين عند الباب يودعون ام راشد وبنتها وقالبتها ام نايف مناحه ،،
أم نايف وهي حاظنه سميره: حبيبتي عشان خاطري لاتقاطعيني كثر اللي راح
سميره فوسط دموعها: والله مب بيدي ياخاله مب بيدي تكفيـــن ادعيلي بقرب الفرج
غاليه وهي تمسح دموعها: الله يحفظك ياعمري وين مالقيتي بوجهك
حياة اللي ميته ضحك عليهم: والله انكم تضحكـوني الحمدلله اللي يشوفكم كنها بتموت ماعليكم لكم مني اجيبلكم اخبارها كل يوم
مهره والدمعه متعلقه: وش عليـك أنتي كل يوم معك فالمدرسه لكن احنا من السنه للسنه لين نشوفهم
حياة: سميره لاتحسبين كل هذا حب لك بس عشانك صديقتي فيحبونك كل ذاالحب
سميره وهي تغطي وجهها وتاخذ بنتها منها مع ضربه خفيفه على كتفها: مـــاتضحــك .. " وتكلم أمها اللي جلست من كثر الوقفه".. ياللااا يمه محمد تأخرنا عليه
وتطلع سميره معاها أمها مودعين ببحر الطيــب اللي ماينتهي ومحيطات الحب التي لاتنضب
وبدعاء صـادق من القلب ان يفك ربي ضيقتهم ويحل أزمتهم..
رجعوا البنات مره ثانيه لعند أم عبدالله فالمجلس يكملون جلستهم ..
في الجهه الثانيه عند اللي مافارقت عقله من شافها ،، مبهت وتايه والأفكار توديه وتجيبه ،، محتار بهاالبنت مو معقول مهره تعرف احد بهالإنحطاط ،، يميـن وشمال قاعد يلفبه عقله ،، قرر يبرد فضوله ويتصل على غاليه يسألها ..
نايف بجديه من دون لايسلم : غاليه البسي جلالك وتعالي بسرعه فالملحق بدون أي نقاش
غاليه ماعجبهاالكلام:وش تعالي وبسرعه على كيفك انا!! مابي عجزانه اطلع تبي انت تعال
نايف بشد: ياالله ياغاليه عجلي علي والله مب مروق لك
غاليه تناظر مهره: لحـول هذا وانت توك خاطب قلبتك مهره علينا اجل لعرست وش بتسوي
نايف طفش: بتجين ولاشلون
غاليه تضحك: اصبر اصبر باخذ جلالي واجيك لاينطق فيك عرق
وتسكر غاليه منه وتقوم تاخذ جْلالها وتطلع له الملحق ..
غاليه: السلاااموو عليكووم
نايف وعيونه فالجوال: عليكم
غاليه: هيـــه عرب ترانا مسلمين زيكم ردوا السلام زين
نايف وتو عيونه فمكانها: لاإله إلا الله .. جات بطولة لسانها معها .. عليكم السلام ورحمة الله وبركاته
غاليه: أيـــون عاوزاك كده ذرب وبعدين مناديني عشان تمقل فالجوال يعني بوجودي يكون شكله غير فيه شي يتجدد لما أكون موجوده هااا
نايف وهو ينطل الجوال ورا ظهره وبابتسامه متملله: نكسره لعيونك وش بعد تبين.. المهم من اللي كان عندكم اليوم؟
غاليه كنها تفكر: من اللي كان عندنا من اللي كان عندنا ،، اممم ام راشد وسميره بنت ام راشد ودانه بنت سميره بنت ام راشد وتاتي شغالة ام راشد
نايف يضرب على راسه : ياالله ياربي لاتبلا الحبيب ببلوه مثل اختي ،، تعرفين اني ماقصدهم اقصد من البنت اللي كانت عندكم قبل العشاء
غاليه: اوووه مشاء الله رادار واانت من قبل العشا وانت فيه ،الله يخلف على رجلي الي من عصر ماشفته
نايف بقلة صبر: يعني مستحيل تتمين الموضوع نفسه لازم تدخلين وتطلعين وتروحين وتجين ،، أنا سؤالي محدد من البنت اللي كانت عندكم؟؟
غاليه بربكه: وش يهمك فيه مليون الف بنت قد دخلت بيتنا وش معنى هذي اللي سألت عنها
نايف: كذا طنت فراسي
غاليه: لامافي شي اسمه كذا
نايف: صراحه ماعجبتني شكلها ومنظرها مايبشر بخير ومااحب مثل هالأشكال تدخل بيتنا لاواللي زادني تقول جايه لمهره وين تعرف مهره هالمنحطات منه قوليلي ؟؟
غاليه بجديه: كنك تلمح لشيء !!
نايف: لاألمح ولاتلمحين ،، البنت هذي مادخلت مخي وحاس ان وراها شي واذا ماقلتيلي من وين تعرفها مهره لايكون لي تصرف ثاني
غاليه وهي تقوم متنرفزه : تصرف مثل أيش ؟؟ بتبطل عن الخطبه مثلاً احسن مهره ماتستاهل واحد مثلك يشك فيها من أول المشوار
نايف هزته الكلمه : انا ماقلت شكيت فيها انا عارف مهره وعارف اخلاقها زين لكن ياغاليه انا شفت شي لو شافه اي رجال عنده حميه على اهله بيسوي مثلي ،، لالبسها ولاعبايتها ولافتنتها شي لايرضي الله ولارسوله!!
غاليه وتوها واقفه : لاتطمن اهلك يدلون درب السنع ومب مهره اللي ينخاف عليها .."وتبتسم له" ..ارقد وآمن وانا اختك هذي البنت دخلت غصب فحياتنا وبتطلع غصب ولاطيب ان شاء الله اهم شي لاتحاتي ترا السالفه كلها سالفة بنات ماتستاهل .." وتقول وهي تمشي" .. وترى قلت لمهره انك خطبتها بغت تطير من الفرحه لكن قالت بتستخير أول وبعد ثلاث ايام بتردلك العلم..
نايف يتسند بأريحيه غير مقتنع فيها: الله يكتب اللي فيه الخير وقوليلها تنتبه على عمرها ترى قلبي ماكلني عليها..
\
:
مستلقيه على سريرها تدور رقم سلمى صديقتها ،، ابتسمت لشوفة رقمها تحس دوم مقصره فحقها وهي اقرب لها من اختها ،، لكن احيانا الدنيا تاخذك من اعز أحبابك وتبعدك عنهم غصب عنك ضغطت الزر الأخضر وانتظرت يوصل صوتها العذب اللي اشتاقله كل جزء من أجزاءها ..
سلمى قبل لاتسلم: لوانك داريه اني بسكر الخط فوجهك كان ماتهقويتي تكلميـن ،، اسبوعين يالظالمه لاشوفك ولااسمع صوتك !!
صيته برقه: هههههه والله حقك على راسي لكن الظروف والله خذتني عنك ولاوالله انك على بالي دوم..
سلمى بنبرة عتب: مرّه بايـن !!
صيته: تشكيـن فغلاك عندي !! حرام عليك ان كنتي صاحيه ياخبله تسوين وتستوين تراك
سلمى بسعاده مخفيه: ايه يااللااا طلعي طلعي الغلا دلعيني اشوف
صيته : ههههه لاخلاص خليها للزمن يمكن نحتاجها بعدين
سلمى: وشي ؟
صيته: ههههههه مدري
سلمى: هههه حبيلك
صيته: ههههه مابه شي جديد ، المهم كيفك نسيتيني حتى السلام
سلمى : والله عايشه فذاالدنيا لألحين مابعد مت
صيته : لاحـول الله يطول فعمرك ياعسل ويفرحني فيك وفعيالك
سلمى بضحكه مدويّه: يــــوك اجل بتموتين وانتي مابعد فرحتي فيني ،، انتي اللي كيفك ووش الدنيا بك
صيته : حالي مثل حالك عايشه والله يعينا عليها بخيـــر
سلمى بتنهيده: آميـن ياعمري آمين ،، هااا وش رايك تجيني ولاأجيك
صيته تشوف ساعتها: لاحول ذاالحزه خافي ربك ،،إلا بكره اشوفك فالجامعه ان شاء الله وش رايك؟؟
سلمى : لاماحب لقاءات الجامعه احسها محدوده نص ساعه ولاساعه نجلسها مع بعض الا وتجي المحاظرات البيـت أشرح وأمرح وبعديـن بكره علي كويز وماقدر اشوفك خليها فالبيت اجيك ولاتجيني
صيته : علــى راحتك ياقلبي وانتي اللي تعالي عجزانه اطلع ،، واجل ماعطلك عن مذاكرتك يااللااا روحي ذاكري وشدي حيلك خلينا نفلح ونتخرج ..
سلمى : أيّـــــــوه يالتخرج الله يجيبك على خيـر
صيته : هههههه هانت ياعمري كلها كم اسبوع ونقول للكتب باي باي
سلمى: من بؤك لباب السما ،، خلاص اجل عيوني اخليك الحين وبكره اذا الله راد اشوفك
صيته: على خيـر ياعمري فمان الله والله يوفقك
وسكرت صيته من خويتها بقلب عامر بالحب شافت مكتبها والمذكرات المرجده عليـه وقالت تقوم تشوف موادها اللي ماتدري وش قصتها ،، وجهت لها بالرغم من الهم اللي يسكنها لكـن قالت أغلبه قبل لايغلبني وخلت وسيلتها المذاكره خذت لها ملزمه وقلم أحمر وراحت على الكنبه وبدت مشوارها بصحبة الملازم..
\
:
عالساعه 12:30 تو بندر داخل البيت وشكله مختلف تماما ،، مضبط السكسوكه ومسوي صنفره لوجهه وطالع وجهه منور دخل الصاله وفيده كيسه من وجوه وفاليد الثانيه علبة جاتو طلع فوق على طول لما ماشاف فيه احد فالصاله والأنوار طافيه ،، وجه لجناحه بشـــوق ودخل على طول وحصل غاليه مستلقيه على الكنب تتفرج على التلفزيون طالعته بإبتسامه وقامت له والفضول يسبقها تبي تشوف وش هالكيكه ووش الكيس اللي فيده ..
بندر بفرحه مو سايعته يتلفت يمين ويسار بسرعه : السلام عليــكم
غاليه: مرحبتين حبيبي وينك من عصر ماشفتك
بندر: احلــى اشتقتيلي
غاليه ببسمه: مـــوت كني مهبوله ادور وين عقلي
بندر يطالعها مستغرب ويحط اللي فيده على الطاوله : امممم كنك ناسيه !!
غاليه ترفع حاجب : وشو
بندر: لاجـد ناسيه ولاتستهبلين!!
غاليه: والله وشو مدري عن ايش تتكلم
بندر يتحطم وتختفي الإبتسامه: كم التاريخ اليوم ؟؟
غاليه تضرب على راسها بقووه : يــــــوه آسفه ياعمري والله آسفه اليوم جوونا بيت ام راشد ونسيت ..
بندر ياخذ الرموت بدون وعي ويجلس على الكنبه ويغير فالقنوات بإحباااط : عادي مب شي جديد عليك..
غاليه تبوس على راسه وتجلس عند ركبته : حبيبي والله آسفه مب قصدي
بندر يلف بوجهه عنها وزعلان من قلب : تعبت من كثر ماتأسفين أجيـك متلهف ومشتاق تام لنا سنتين وقلت أكيد هي بعد مستعده وفرحانه مثلي وادخل ولااااكن شي يعنيك
غاليه تلف بوجهه يمها : بندر ياعمري انت والله اني ناسيه مو قاصده شي لاتكبر الموضوع وبعدين والله يافرحتي اكثر من فرحتك والله يتمها علينا مليون سنه ..
وتقوم وتطلع وتجيب صحون وسكين وشوكتين وتاخذ من الثلاجه عصير ربيع بالتفاح مع اكواب بقاعده وترجع لغرفتها مره ثانيه ..
حطتها على الطاوله وطلعت الكيكه وحطتها جنبها وجابت الشموع من الدرج وشغلتها وراحت تطفي الأنوار وهذا كله وبندر يشخل عينه لها بكبر مايبيها تعرف انه منتبه لها وكل احاسيسه معاها .. اما هي بعد ماطفت الأنوار راحت يمه باسته على خده وقالت : كل سنه وانت طيب ووووكل عام وانت حبيبي ..
ولما شافت انه ماعطاها وجه بعد هذا كله قالت: خلااااص والله ماعيدها وإن اعلق التقويم فرقبتي واسجل كل يوم وش يعنيه عندك عشان احتفل به قبلك ،، ياللااااا عاااد بلا دلع وش بعد تبي غير ذااه !!
بندر بعيون مشتاقه : شوفي بس عشان هاليوم يعنيلي الكثير بسامحك لكن ان عدتيها يااااويلك مني ..
وكملت غاليه الليله مع زوجها بحب وتناست الموضوع اللي كانت بتقدم عليه او بالأحرى اجلته لأجل غير مسمى ..
\
:
مرت ثلاث اسابيع على الكـل كما لمح البصر ،، بدت امتحانات مهره وباقيلها يومين وتخلص،، وصيته وحنان باقيلهم اسبوع ..
مضت كما الريح تمشي اما تترك خلفها آثاراً مفرحه أو تترك آثار مريبه او قد لاتترك خلفها سوى الخواء ..
حياة .. لاجديد في حياتها روتينها اليومي من البيت الى المدرسه ومن المدرسه الى البيت ولازال في نفسها تفاؤل ماتدري من ايش ..
مهره .. غرقانه في غرفتها المليانه بالكتب والجسم بدا ينحف والوجه بدا يصفر ،، وافقت على نايف طبعاً وقرروا الملكه بعد ماتستلم وثيقتها وترتاح بأسبوعين،، ومكالمات نهى من الوقت للثاني تقلب جوها عليها ،، كثير تطنشها وقليل ترد عليها واحيانا تحول تلفونها لموجود دايم ترسلها مسجات على انها بتزورها بعد الإمتاحانات ..
غاليه.. لألحين تفكر فالسالفه نفسها وتحاول تتخير الوقت المناسب لكن فالأخير قررت أول مايعطلون تبدا مشوارها ..
بندر.. روتين الإمتحانات قلت الطلعات والسهرات وكثر تواجده فالبيت .
سلطان.. خلص امتحاناته اليوم وقاعد يهيت فشوارع الرياض يقول " احسـهااا مشتاقتلي موووت"
نايف.. لازالت في نفسه نهى خايف من كونها تنفيذ خالد لتهديده ،، مستعجل حيــل على الملكه وجاه احباط يوم قالوا بعد استلام الوثيقه بأسبوعين لأنه هذا معناته بيجلس ثلاث اسابيع او اكثر
عبدالله.. يطلع من البيت الفجر مايرجع الا10:30الليــل مهدود حيله والكل محتار وين يكون كل هالوقت ..
صيته .. بعد هي غرقانه فالمذاكره وموكله امر ابوها لسعيـد اللي طمنها ان الأمور ماشيه تمام لألحين .
حنان .. على حالها ثانويه عامه مثل غيرها ،، اهماال وغير مبالاه وثقه عميـــــاااء!!
سعيد.. تقرب من ابوه كثيــــــر وصار يجلس معاه ويسولف معاه انزاحت أغلب الحواجز وباقي شوي وتنزاح باقيها ..
سلمان .. رجع من سفرته وماعجبه الحااال اللي تغير بين ابوه وسعيد وبدت خلايا الغيره تشتغل عند والله يستر ..
سميره .. رجع زوجها من السفر وورّاها انواع الذل والهوان على آخر مكالمه كلمتها اياه وصار العن من اول ..
محمد.. باذل كل جهده في الإمتحانات ،، يبي يجيب النسبه اللي تدخله التخصص اللي يتمناه ومتفائل حيـــل خاصه بعد امتحان القدرات اللي جاب فيها نسبة مشرفه 97%
\
:
وجا اليوم اللي تخرجت فيه مهره .. توها جايه من الكليه وقالبه البيت أنواع الصرااااخ والضحك ،، اول مادخلت قعدت ترقص وتهز رقبه وتلحن : وخلصنااا وعلى الله اتكلنا،، وخلصــناااا وعلى الله اتكلنا .. هلا هلا هلااا
ويمسكها اخوها سلطان اللي كان جايبها ويرقص هو وياها جنوبي ويغنون بصوت عالي: ووخلصنــــاااا وعلى الله اتكلنا وخلصناااا وعلى الله اتكلنا
وتطلع خالتهم وجدتهم تجر خاطاها على صوتهم ،، وتطالعهم خالتهم بابتسامه والدموع غرقت فعيونها اما جدتهم مبتسمه وماتدري وش السالفه
فقالت : يادافع البلااا وش بلاكم ياعيالي عسا منتب مساخيـن
ويقربون منها ويرقصون قدامها ويعلـون الصوت بقــــوه وهي تدزهم بيدينها على ورا
وتقول : لااا عز الله انهبلووا عيال ولدي الله يخلف علي فيهم
وتقرب ام نايف من مهره وتوقفها وتحظنها بقووه وتقول: ياعمري هناااك الخلاص وعقبال مانفرح بنتيجتك
مهره تبوسها بصوت على خدها : هناااك خير ياخاله وان شاء الله ناجحه ومتخرجه اهم شي لاتحاتين تراك ربيتي مره..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك