رواية قصور من طين -19
فقالت : يادافع البلااا وش بلاكم ياعيالي عسا منتب مساخيـن
ويقربون منها ويرقصون قدامها ويعلـون الصوت بقــــوه وهي تدزهم بيدينها على ورا
وتقول : لااا عز الله انهبلووا عيال ولدي الله يخلف علي فيهم
وتقرب ام نايف من مهره وتوقفها وتحظنها بقووه وتقول: ياعمري هناااك الخلاص وعقبال مانفرح بنتيجتك
مهره تبوسها بصوت على خدها : هناااك خير ياخاله وان شاء الله ناجحه ومتخرجه اهم شي لاتحاتين تراك ربيتي مره..
ام نايف تمسح دموعها اللي خانتها: الله يفرحني فيكم جميــع ويجي اليوم اللي اتطمن عليكم فيه
سلطان يضحك : ياالله يارب متى بتخرج عشان اشوف غلاي يارب
ام عبدالله : الحين انتوا وش بلاكم
مهره تضحك هي وسلطان ضحكه مدويه وتروح وتبوس خشمها : ابد سلامتك السالفه ومافيها اني تخرجت
ام عبدالله : ووش يعني؟
مهره بابتسامه: يعني خلاص مب رايحه ادرس مره ثانيه
ام عبدالله: يعني مثل غاليه
مهره تضحك : ايه نفداك خلاص بلازم جنبك فالبيت
أم عبدالله بضحكه: بعدي والله بنيتي واحذريني تصيرين مثل غاليه مانشوفها الا فعصير هـ المره تغدي مره
ام نايف تروح السالفه : اجل اليوم لازم نحتفل
سلطان:لاااا مب اليوم خلوها عاد لين تخلص حياة وبندر دواماتهم ونحتفل مره وحده
مهره : لااا ياخاله خليها لين اتأكد من النجاح واستلم الوثيقه
سلطان: يابنت الحلال خليها مع الملكه مره وحده وشوله تخسرينا
ام عبدالله لما سمعت تخسرينا قطت فالسالفه وقالت : امنعونا من الخساير ترى ربي بيحاسبنا
مهره بهمس: ههههههههه طيب والله انك ماتدرين وش السالفه
ام عبدالله : هااااه وش تقولين ؟
مهره وهي تقوم : لااا سلامتك بس اقول بروح اقوم غاليه صفرت واجد اليوم
ام عبدالله : مب اليوم بس إلا كل يوم الله يهديها ويصلحها
\
:
بعد المغرب جالسين فالجلسات الخارجيه لستاربكس ويخططون لسفره ثانيه اشباعاً للرغبات اللي صارت الهم الأول والأخير لهم ..
فهاد : ياخي والله لتذكرت ذيك الأجسام والطول اعافها وألعن اليوم اللي جمعني فيها
سلمان : ياشيــخ طلقها وعيش حياتك حر ،، شوفني انا ماخذ راحتي فكل شي لااعاف احد ولااحد يعافني ..
فهاد : بيصير ان شاء الله لكن خلنا نذلها قبل
سلمان: امم تصدق احس شي قاعد يدور من وراي بين ابوي وسعيد والله بديت اقلق
فهاد: ليه وش خلاك تقول هالكلام
سلمان: علاقتهم بدت تقوى مب مثل قبل ، اول مايتدانون ابوي لشافه وده انه ملبخه لكن الحين تعال شوف الضحك والسوالف ويتجاهلوني كثير كني مب موجود
فهاد : رجال وش كبرك وتغار!!
سلمان: مااغار مالت عليك لكن قربه منه بيفتح لنا ابواب احنا في غنى عنها
فهاد: مثل
سلمان: انت تعرف سعيد مسوي فيها رجال وراعي نخوه بيقعد ينق على راس ابوي ليمن يرجع حلال عيال عمي لهم ،، ونص الخير اللي احنا فيه الا وش نصه ثلاثة ارباعه لهم يعني بنصفي على الحديده..
فهاد : لااااا يارجال عدل ولابدل
سلمان: إلا هذا اللي مخوفني
فهاد: وابوك رخمه عشان يسمع كلامه !! ترى ابوك مب هين
سلمان: اخاف يضعف
فهاد: مستحيل
سلمان: مابرتاح لين ارجع على العرش
فهاد: هههههه اجل بتشن الحرب !!
سلمان : بتشوف وش بسوي
فهاد : اهم شي سفراتنا ووناستنا ماتتأثر
!!!!!!
:
عارف من اول يوم امتحنت فيه مهره متى بتخلص ،، وكان يعد الليالي عشان يجي هاليوم اللي بعده بتتوالى الأيام وبيجي اليوم الموعود ،، هو حاليا فـ الفيصليه يبي يشتريلها هديه لكن محتار وش ياخذ ،، دخل محلات المجمع كلها ولاطلع بشي اصلا مايعرف وش ياخذ فالنهايه فقد الأمل وجلس على أحد الكراسي ودق على غاليه المنقذ الأول له ..
غاليه : هلااا
نايف: اسمعي بقولك شي وياويلك ان علقتي
غاليه تضحك: هااا مب معلقه قول
نايف: احلفي
غاليه : هههه والله ماقول شي
نايف: انا الحين فالفيصليه ابي اشتري هديه لمهره ودخلت كل المحلات اللي دايم تروحيلها بس مالقيت شي اجيبه
غاليه كاتمه ضحكتها: طيب انت وش تبي بالضبط
نايف: وش دارني عنك انتي وش رايك ؟
غاليه: انا رايي مب لازم اصلا كلها كم اسبوع وبتجيبلها الشكبه خلاص تكفي
نايف : مايخالف الحين وفالملكه زيادة الخير خيرين
غاليه : ولوووو الرجال يشّبك من الحين !!!
نايف: ياحليلك تحسبيني مااعرف ،، المهم يااللااا قوليلي وش اجيب
غاليه : طيب جيبلها عطر من أي محل من بودي شوب ولا وجوه وغلفه تغليف حلو وجيب معاه باقة ورد وحلاو من اوبرا او سعد الدين
نايف : طيب وش عطره اجيب ماعرف ذوقها
غاليه: لحووول كل شي اعلمك انا ،، جيب على ذوقك انت عشان تجي ملامسه للقلب اكثر
نايف يضحك : اقووول لايكثر ياللااا ظفي وجهك
غاليه: لاااااه خذيت غايتك مني وخلاص ظفي وجهك ماعليه سنعك عندي ان ماقلت لها انك بتجيبلها هديه وخربت عليك المفاجأه
نايف: عااادي من قال اني ابيها تكون مفاجأه أحسن علميها عشان تتهيأ نفسياً اخاف تموت علي من الصدمه
غاليه : وععععع ماتضحــك ياللااا ياللااا رح اشتر هديتك ياروميو ،، قال ايش يبي يسوي رومانسي يابن الحلال الرومانسيه شرق وانت غرب
نايف يقلدها : وععععععع ماتضحك ياللااا انقلعي وسلميني عليها
غاليه : ايه تبطي عظم ،، مع السلامه
وسكرت غاليه من اخوها وراحت ركض كعادتها الخبر توه طالع من الفرن وخايفه عليه لايبرد ،، دخلت غرفة مهره بقوه وحصلت ظلااام دامس بس انوار المكيف اللي تلمع وسطه ..
شغلت الأنوار وقفلت المكيف وراحت لعند مهره وسحبت البطانيه بقوه منها الشيء اللي صحاها بخوف ..
مهره وهي تطالعها بنص عين:وجع بعد وجع بعد وجع معلمتك كم مره لعاد تدخلين علي هالدخله اللي السخيفه
غاليه تضحك بشكل مستفز: اقول لايكثر قومي صلي الله يحييك
مهره : لااله إلا الله وش دخلك فيني بصلي متى ماابي
غاليه : لامب على كيفك ربي بيحاسبني عشاني ماقومتك
مهره: الله وش معنى هاليوم اللي بتقوميني فيه للصلاة ولاصرت زينه اليوم عشاني ابي ارتاح غامصك انك تشوفيني نايمه براحه وانتي لااا
غاليه : ههههههه ايوااااه جبتيها انا انسانه حسوده ماحب اشوف غيري مرتاح في راسك شي ؟؟!!
مهره وهي تقوم وتحط يدها على وجه غاليه كنها تدزها: داريه من زمااان مايحتاج تعلميني
غاليه تضحك بحنان وتبوسها على خدينها وتقول: هناك الخلاص يادبه اعوذ بالله من جيتي وانتي ميته على فراشك
مهره: ههههه هناك خير والله نمت ماحسيت بعمري ،، الظهر صليته مع العصر ثقل فجسمي غير طبيعي ولااالخموول الله لايوريك
غاليه: ايه لازم عيوني أنستي الراحه ونمتي وانتي عارفه ماوراك هم بكره
مهره : يــووووه مب بس بكره إلا العمر كله ياالله ياغاليه انتي فرحتي مثلي يوم تخرجتي أحس اني الوحيده المتخرجه اليوم فرحتي ماتعادلها فرحه على الأرض كلها
غاليه: ههههههه حبيلك عاد وش دارك انك تخرجتي كونك حامله بنيه ولاولد
مهره: مالت عليك الله يكفيني شرك ،، إن شاء الله بنجح وبتخرج مع مرتبة الشرف بعد
وتفز تبي تروح تتوضأ وتقول : أنتي بس فكينا من عينك وكل شي بيمشي تمام
غاليه: هههههه طيب حاليا ممكن افكك لكن بعدين ماأظمن لك نفسي
وتمدلها مهره لسانها بإبتسامه وتدخل تتوضأ أما غاليه شافت اللاب توب فشنطته على المكتب فقالت تقوم تتعبث فيه شوي لين تخلص مهره صلاه .. وجهت يم المكتب وفتحت الشنطه وطلعته منها ،، شغلته وثواني الا وصورة طفلة رضيعه منسابه على ذراع امها بشكل يثير كل الأحاسيس تزين واجهة الجهاز ، ماقدرت تمسك نفسها قربت شفايفها من الشاشه وباستها بقـووه وتغارقت دموعها ، طلعت مهره وشافتها وكملت طريقها للسجاده بدون ماتتكلم أي كلمه ماحبت تقطع عليها لحظات حلوه في اعتقادها قاعده تمر فيها غاليه وهي فالأصل لحظات قاتله بالنسبه لها ،، أصعب شي بالنسبه لها لما تشعر بمدى حاجتها لشيء يسمى طفل يملأ حياتها بهجه ويزيدها رووح،، بددت اللحظه وفتحت المستندات على طول قعدت تتأمل المجلدات وأي واحد تفتحه ،، حصلت مجلد محطوط عليه علامه حمراء مثل علامة المشغول فالمسنجر وكان اسمه (( طال السفر )) بالطبع جذبها الإسم وفتحته ،، حصلت ملفات وورد كثيره وصور عجزت تميزها من كثرها ،، شدها ملف معنون بـ (( نايف الآه )) جات بتفتحه إلا جاها صوت مهره من وراها يصرخ يقول : لااااا
التفتت لها وقالت : اقول ظفي وجهك بفتحه ماعلي منك
مهره وهي تشيل اللاب من قدامها : مب على كيفك الجهاز كله تحت أمرك الا هالمجلد لاتقربينه
غاليه وترفع حواجبها: خلي جهازك لك بس مابي الا هالمجلد
مهره : تمنياتي لكي بأحلام سعيده
غاليه: طيب يامهره وانا اللي جايتك بخبر طازه ولااخبي عليك شي وانتي تسوين فيني كذا
مهره تقفل الجهاز وترجعه مكانه: عاادي محد قالك لاتخبين علي شي
غاليه توقف: أصلاً الشرهه مب عليك الشرهه علي اللي معطتك أنتي وياه وجه ،، لاوبعد يبي يجيبلك هديه كن به وجهٍ يستاهل
مهره تمسك بطنها من الضحك وتقول: يووووه مشكلتك شفافيتك الزايده الحين انا عرفت وش كنتي بتقولين لي ،، نايف يبي يجيبلي هديه!!
غاليه تحط يدها على خدها وتبي تطلع : والله انك ماتستاهلين الا تراب فال وجهك
مهره : اقول خير قولي لأخوك مابي شي خله يمرح لين نتملك
غاليه تطلع وتقول وهي ملقيتها مقفاها بصوت عالي : قلته قدرك تراب فال وجهك
وتضحك مهره بحب على سوالف بنت عمها الحنون ، صاحبة القلب اللي ياما احتواهم بحب
وياما امتص حزنهم وآهاتهم بحناان وبدلها بالضحكه الي تملا محياهم ،،
صاحبة القلب اللي فيه الكثيــر من الألم والوفير من الوجع لكن يخصها لحالها واللي حولها ملزومه تسكنهم الفرحه وتمدهم بالسعاده ..
راحت مهره تمشط شعرها وشيكت على جوالها اللي حصلت فيه 7 مسد كول من نهى ورساله مكتوب فيها ( مبروك ياقلبي وعقبال ماتفرحين بالنتيجه وأكيد هذي يبيلها هديه انتظريني بعد يومين بكون عندك . سي يو و آي لوف يو)
" ماااالت عليك " قالتها مهره وهي تمسح الرساله وتنطل بالجوال على السرير ونزلت ..
\
:
بعد صلاة العشاء فبيت سالم كانت حسناء جالسه لحالها في الصاله تتفرج على التلفزيون وقدامها بريق الشاهي وشمعدان المكسرات ،، شوي إلا دخل عليها ولدها سعيد باس راسها وجلس جنبها ..
سعيد: وين خواتي عنك اجل؟؟
حسناء بدون لاتطالعه: اظن انهم فغرفهم يمكن انهم يذاكرون
سعيد يطالع المكسرات ويرد يطالعها وبأسف يقول: ا يـــه تظنين مشاء الله مشاء الله
حسناء بلامبالاه: شوف عندك سوالف مثل الناس قولها ولاجلستي تعذرك
سعيد يناظرها بحرّه يوقف : لااا طال عمرك جلستك تعذرني ..
ويقفي منها وتوقفه امه تقول : سعيد اصبر بقولك كلمتين قبل لاتروح
سعيد يعطيها وجهه ويوقف بكل احترام ويقول : لبيـك
حسناء : أنا لاحظت والكل ملاحظ قربك من ابوك الفتره الأخيره وهذا شي طيب لكن اسمع كلامن يوصلك ويتعداك ،، ان علمني الطير انك مسوي حركاتك الملتويه معاه والله ثم والله ان تشوف مني شي عمرك ماشفته
سعيد مبهت وعلامات التعجب كلها مرسومه على وجهه: وش يعني مافهمت
حسناء : لااا انت فاهم وعارف وش اقصد زين ،، بس أسمع طاري انك تفكر مجرد التفكير انك تفتح معاه موضوع جدتك وعيال عمك او تجر اي كلام منه مثل ماقلت بخليك تكره اليوم اللي حملتك فيه
سعيد وبدت تتأكد شكوكه يبتسم ويقول: افاااا عليك يمه ليه مانيب ولدك وعلى قلبك ،، لالا لاتخافين مستحيل اخرب حياتنا بيدي من اغلى عندي منك مستحيل اسوي شي يزعلك !!
حسناء ترجع للتلفزيون: بس قلتلك أنبهك وجاك العلم ..
ومشى عنها سعيد وثقل على قلبه بكبر الكوون من بحر المشاكل اللي لقى نفسه غرقان فيه ،، يمشي وهو مغمض عيونه بخفه ويشد النفس لداخله كنه يبي يسترخي ،، وصل للباب الرسمي يبي يطلع وقابله اخوه سلمان ناظره بنظره وطلع وسفهه ،، لحقه سلمان ولفه من كتفه بقوه وقال : انا ابي اعرف شي واحد بس ،، أنت وش شايف نفسك عليه !!!
سعيد يبعد يده ببرود : انت تشوف اني شايف نفسي
سلمان: بقـــوه
سعيد بهدوء مستفز: اممم طيب وجهة نظر وانا احترم وجهات النظر مافي أي اشكاليه عندي
سلمان يحاول يسيطر على اعصابه: لاجد سعيد احاول القى أي مبرر يبرر لي غرورك ولاألقى نص مبرر ،، اول شي مافي أي مقوم من مقومات الجمال ثاني شي تشتغل مع العامه موظف حكومي ثالث شي وهو الأهم طرار يعني مستحيل يمر شهرين بدون لاتجيني تمد يدك
سعيد نـــار تغلي فقلبه لكن لازال محتفظ بتوازنه: كل فلوسك اللي خذيتها منك آخر الشهر تنردلك ريال ريال لاتحاتي مع انها فلوس ابوي لكن بعد نردها لك منة الله ولامنة خلقه ، أما سالفة الجمال والشغل مع العامه فهذي بعد وجهة نظر واحترمها ..ومعليش ياخوي ياسندي مضطر مضطر اني اخليك ولاكان احلى اوقاتي اقضيها معاك ..
ويمشي عنه بسرعه خايف من كلمه زياده ممكن تثور كل البراكين اللي فداخله ،، ركب سيارته بدون لايلتفت وراه شغلها ومضى في طريقه،، تايه في امه وحبها لنفسها الغير طبيعي واخوه وتفكيره المتدني " مقومات الجمال الله عليك ياسلمان قد المرجله تقاس بالجمال" ،، شغل الراديو وابحر مع ابوه وراحته الجزئيه من العلاقه اللي توصل لها حاليا وبداية رحلة التأكد من الشكوك تشغله ،، ذكر ربه ودعاه يعجل بالفرج ..
أما هناك عند سلمان دخل وعيونه مليانه شرار ووجهه ينطق بالغضب حصل امه جالسه فالصاله وبصوت عالي يقول: والله ان مافكيتيني من ولدك ذاه لأمسيه فالمقبره فيوم
حسناء تبتسم له وتقول: افااا عليك حبيبي تخلي سعيــــد يثورك
سلمان يجلس ويهدا شوي: يمه يستفزني ببروده
حسناء : اسفهه يابن الحلال لاتلقيه بال
سلمان: لاااا هالأيام المفروض البال كله له
حسناء تضحك: اناا اقول دايم محد طلعلي من عيالي غيرك وحنان،، لاتخاف توني مكلمته وقال مستحيل يسوي شي يغضبني عليه
سلمان مستغرب: الله من متى سعيد يهتم لأحد لا لا تلقينه يخطط لشي لكن يستغفلك
حسناء ترفع حاجب: معقوله
سلمان : أكيــد مب لله هالقرب شوفي وش يخطط له
حسناء: عالعموم أنا حذرته وياويله ان شميت ريحه بس
سلمان: وانا بعد بحاول ارجعهم مثل اول كنا مرتاحين اكثر
حسناء: مايخالف سلمتك الخيط والمخيط سو اللي تبي بس اهم شي مزنه وعيالها مايتمتعون
\
:
فبيت عبدالله وقت العشاء كان الكل مجتمع ماعدا عبدالله وولده نايف وسلطان اللي متعود يتعشى مع ربعه من خلص الإمتاحانات ،، جالس بندر وياهم فالصاله ينتظر الخبز عشان تكمل سفرتهم ، جات غاليه بسلة الخبز ووراها الشغاله بـ جيك الشبانيا (( شبانيا السعوديه)) والتموا حول السفره المليانه بكل اصناف الأكل ،، كان عشاهم سلطات وصينية بطاطس مع شوي مرقوق عشان ام عبدالله بحكم انها ماتحب خرابيطهم على حد قولها ،، قرب الكل من الأكل وبندر يطالع السفره وعيونه مفتوحه عالآخر وبشراهه قاعد يناظر الأكل من زمااان مامتلت السفره مثل كذا
قال وعيونه مافارقت زبديات السلطات ينتظرها تفتح: ولووو مشاء الله عامره اليوم السفره ولااا بعد شمبانيا لااا ناويلنا على نيه اليوم
مهره تبادر: احم احم بركاتي ،، خلصت من هنا وعشيتكم من هنا
غاليه تشهق: وجــع بندر والله انها كذابه انا اللي مسويه كل ذاه
مهره: ههههه بس لاتكذبين بعد انتي ترى انا اللي ملحت السلطات
حياة تناظر مهره وتبتسم بنغزه: طيب طيب من اللي سواا المرقوقه هاااا
مهره تضحك : أماااا ذي مافيه مجال للكذب " وتطالع اخوها" لااا ماعليك ترى مرتك سنعه هي اللي سوت كل ذاا
ام عبدالله تتكلم والأكل ففمها : عســاه دووم ذاالسنع ،
ام نايف تبتسم لبنتها: ايه ذي البنت اللي ابيها ينشد فيها الظهر
بندر يضربها على ظهرها بخفه: يووه وش بلاكم على حبيبتي غوالي ماعليك منهم انا داري من زمان انك سنعه لايهمونك
مهره تسوي كنها بتشرق: لاحووول يابن الحلال خل المره تعشا
غاليه بحيا: يااالله ياعوني لاترحمني منه
ام نايف : المفروض مدام الإجازه جايه كل يوم المطبخ على وحده غدا وعشا مب يجي الصيف ويخلص وانتوا ماطبيتوه
حياة: انا عني ابشري لكن هذولي الثنتين ينخاف منهم
غاليه تبتسم: اممم انا صراحه على حسب مزاجي ، اخاف ادخله وانا ضايقه احط بدال الملح سكر
مهره : وانا صراحه نسخه من بنت عمي اخااف عليكم من المستشفيات
ام عبدالله : ياماال الصلاااح قايلته ابشروا بقلها
وباللمه الطيبه والسوالف اللي تشرح الصدر وبالحب والخير كملوا عشاهم وقاموا البنات يشيلون الصواني وقام الباقي يغسلون يديهم ،، ربع ساعه إلا وعبدالله داخل وبعده بدقايق جا نايف ..
اجتمع الكل فالصاله والبنات كلهم طلعوا فوق ..
عند اللي مجتمعيـن كانت ام عبدالله تقول لولدها: يمك تعشيت ولانجيبلك شوي مريقيقة كايفه مسويتها بنتك
عبدالله بتعب يبعد شماغه ويتسند وبإبتسامه يقول: لانفداك متعشي
ام نايف : وانت لك شهر تطلع من الصبح ماتجي إلا عشر من الليل ولجيت تقول متعشي نفسي اعرف وينك فيه كل ذالوقت
نايف: هلا والله بدينا بشغلات الحريم يمه.. حركات امي ذي مب هينه
بندر :ههههههه ايه وش على بالك خالتي ماتشوف عمي مطيح عندها من قبل ماتولد
ام عبدالله : قولوا مشاء الله ياعيالي ترى ماينظل المال إلا اصحابه
عبدالله يقوم بخمول وهو مبتسم ويقول: يااللااا تمسون على خير
الكل : وانت من اهل الخير
ويطلع الدرج يبي يتوجه لغرفته وتلحقه زوجته على طول وطبعاً ماسلمت من تعليقات العيال اللي ماتنتهي ،، فكان نايف يقول: ياالله لحقته العجوز ،، يابنت الحلال بيرقد لاتروحيله تشغلينه
بندر : يارجال خلها كل عجوز تفرح بشايبها
وهي طبعاً مالقتلهم بال من الحيا اللي يسبقها لفوق لحظات واختفت من عيونهم ..
أما عندهم فقامت أم عبدالله بثقل تبي تروح لغرفتها وفزولها العيال بسرعه يساعدونها ، راح معاها بندر يوصلها لغرفتها ودخل معاها ..أما نايف استغل دخلة بندر وبسرعه راح الملحق يجيب الكيس وباقة الورد وكلم غاليه عشان تنزله ،، ثواني وغاليه نازله وبضحكه عاليه تقول: هلااا بروميو اللي انا اخته لي27سنه معه ولاجابلي هديه ومهيران من سمع طاري ان عندها شي راح يجمح يجيبلها
نايف يضحك ويدزها من جبينها: مايحتاج عندك رجل يجيبلك محد مطاولني فحياتي غيرك
غاليه : هيهيهي اقول جيب بس خلني اروح اقهرها شوي
نايف : هيــــه اسمع بس طاري انك مسويتلها شي مايردك إلا المقبره
غاليه وهي تخطف الكيسه وتطلع فوق: وآسفــاااه على اخوي ، امحق سند
ويضحك نايف بحب ويطلع لملحقه ينتظر سلطان ويقضي معاه باقي ليله ..
أما داخل عند أم عبدالله وبندر ،، جلس بندر بطلب منها وهي راحت يم دولابها وخذت صندوق بني قديـم أكل عليه الزمن وشرب وجات وجلست قباله ..
نزلت الصندوق قدامها على الأرض وفتحته وطلعت منه فلوس كثيره محطوطه بشكل عشوائي
ومدتها له وقالت : عدها
بندر: وش ذي ؟؟
ام عبدالله : دراهم وش شايف؟؟
بندر: ههههه أدري انها دراهم لكن وشيله؟
ام عبدالله : عدها بالأول بعدين اقولك
ويعدها بندر بطريقه سريعه فأقل من عشر ثواني ثم يقول وهو يناولها اياها : هذي الله يطولي فعمرك عشر آلاف ريال
ام عبدالله تسكر يدينه عليها : خلاص خلها معك
بندر يرفع حاجبه ويقول بطيبه: ليه مب محاتاجها والله
ام عبدالله بعفويه: مهب لك يمك ،،بس انا متعوده كل ماجاتني همكه اتصدق بها عن جدك وابوك وكنت اعطيها عمك عبدالله لكن عمك مشغول ذالأيام فعاد عطيتك اياها وابيك توزعها انت..
بندر بإبتسامه عريضه: ياامــال الجنه يمه ابشري على خشمي لكن انتي عندك ناس محددين تبين تعطينهم ولاانا اوزع مني وإلي
ام عبدالله تفتح الصندوق وتطلع منه ورقه بيضاء قديمه شوي مصفوطه: لاوانا امك هذولي الناس مكتوبه اساميهم ووين بيوتهم متعودين من حياة ابوك الله يغفرله نعطيهم كل زمان ..
بندر يشر على خشمه بإصبعه وياخذ الورقه بيمناه: على خشمي غاليه والطلب رخيص
ام عبدالله : عليه الشحم يعني ارقد وآمن؟؟
بندر: افاااا عليك ارقدي وآااامني نفداك
ام عبدالله : هاخلاص فديتك جَّود الفلوس والورقه وتوكل على الله لحجرتك معاد إلا خير بتسنن وبرقد..
بندر يقوم ويحب راسها : رقاد العوافي ان شاء الله ،، تصبحين على خير
ويطلع بندر ويسكر عليها الباب ،، شاف محد فالصاله فقال اكيد نايف فالملحق شاف الساعه وحصلها توها على موعد نومته فقرر يطلع يجلس شوي مع نايف ..
وفوق عند مهره واقفه غاليه عند الباب وحاطه يدها ورا ظهرها ومن صبح تحاول تقهرها لكن مهره مسويــه أكبر بارده ومظهره ان الموضوع مايهمها لكن فداخلها سوالف شووق ووله..
غاليه محتره عالآخر : يعني تبين تقنعيني إنك مب مهتمه ياشيخه روحي ماتذكرين يوم خطبك شوي وتطيرين من الفرحه لو مالحقنا عليك
مهره تغمز لها : شوفي صحيح اني استانست لكن هذا مايعني اني بطير عشانه ،، تبين تعطيني اللي معك خير وبركه ماتبين عاااادي والقلب يوسع أكثر
غاليه : تدرين شي واحد قاهرني مدري وش اللي محبب اخوي فيك!!
مهره : نفس الشي مب قاهرني الا شوي ويقتلني وش الي محبب اخوي فيك !!
غاليه تقرب منها وتنطل الكيس والباقه على السرير وتغمزلها: القلب ومايهوى ياعيوني
مهره تضحك : مشكله اللي يبووون يقهروني والله ينرحموووون
غاليه تمدلها لسانها وتقول وهي طالعه: أقووول تمنياتي لكي بأحلام سعيده هذا ان قدرتي تنامين ..
مهره تقوم بسرعه وراها وتقفل الباب عليها ورتجع تعيش أحلامها مع الكيس وصاحب الكيس واللي فداخل الكيس ..
لما طلعت غاليه من مهره كانت بتتوجه لغرفتها لكن شافت غرفة حياة مفتوحه شوي ،، رجعلها الطاري والفكره اللي قدلها اسابيع مؤجله ، قالت بعد بتأجلها خايفه بندر يطلع الحين ويخرب عليها لكن قررت تنهي الموضوع الليله ،،
دخلت الغرفه بعفويه مقصوده بدون لاتطق الباب وشافت حياة مستلقيه على السرير لابسه نظاراتها وتقرالها كتاب رفعت عيونها لها وابتسمت برقه وشالت النظارات وحطتها فوسط الكتاب وسكرته وحطته جنبها .. قربت غاليه منها وتربعت قبالها وبمرح قالت: هااا وش تقرا مثقفتنا اليوم؟؟
حياة تطالع الكتاب ثم تقول: كيف تؤثر على الآخرين ..
غاليه : اهااا وحلو؟؟
حياة: اممم تستفيدين منه
غاليه : مثل ايش
حياة: يقولك مثلاً فيه نقد يسمى نقد ونقد يسمى تغذيه راجعه ،، فالنقد انك مثلاً تتهجمين على طالبه عندك بالكلام على طوول يعني تقولين لها ليش ماحليتي الواجب كل يوم تجيني ماحليتيه وكل يوم تنسين دفتر ودايم تنسين كتاب فهذا يؤثر سلباً على الطالبه فبتكرهك وتكره الماده وتكره المرسه كلها ،، لكن لو قلتي لو انك حليتي الواجب هذا بيساعدك على فهم الدرس ، لو انك تهتمين بوجود اغراضك كامله كان هذا اقوى في تحصيلك للدرجات واحترام معلمتك لك فبكذا هي بتستحي على عمرها من هالأسلوب الجميل وبتحاول تسوي الشي اللي يرضي معلمتها وعلى هذاا قيسي كل تعاملاتك فالحياه
غاليه: حلو يعني النقد اذا ماسير بطريقه صحيحه فبيكون أكبر دمار
حياة: ايوااااه هذي هي ببساطه
غاليه : اهاااا طيب
وسكتوا ثنتينهم لثواني ونزلوا عيونهم بتوتر
ثم طالعوا بعض فنفس اللحظه وقالت غاليه بشوق : وش اخبارك ؟
حياة ترمش عيونها بنعاس وتبستم بألم : اممم مب بخير بعدك
غاليه تحط يدها الثنتين على كفها وبعتب تقول: ماتركتك وربي ويشهد علي ربي يادنياي بدونك مالها لون وانتي اللي تحسستي من كلامي بقوه
حياة تلف بوجهها عنها وتستلم لحكايات المطر بسهوله: جرحتيني ياغاليه فعز حاجتي لك والله ماهقيتها منك جرحك غيــر ياغاليه غير
غاليه بضيق تمسك دموعها بالقيود : لاتقولين جرحتيني ،، وش كنتي تبيني اسوي وانا اشوفك تموتين قدام عيني اجي اطبطب عليك واقولك ياالله موتي وانا اللي بدفنك هااااه يااللااا قولي وش تبيني اسوي وانا اشوف دنيتك مليتيها سواد وكن الحياه بتوقف هناك فيومهم
حياة مستسلمه بكل قواها للأمطار مافي أي رد سوى الحكايات ..
غاليه تلف بوجهها يمها : حياة عيوني أنتي تعرفين اكره شي بدنياي اشوف الحزن طاويك
انتي حياه متى بتفهمين حياه لكل اللي حولك ،، ربي خذا فهد وخذا جودي لكن شوفي من خلالك خلالك خوانك واختك وامك غاليه ووخالتك ووانا كل هذووول خلاهم لك ربي ماخذا منك إلا وهو بيعطيك
حياة تقاطعها: يكفوني هم عن العالم كله
غاليه : بس هم راحوا ياحياه افهمي راحوا خلاص لمتى بتحصرين نفسك فبوتقتهم
حياة تقول بصوت تقطعه الشهقات: أنتو متى بتفهموني انا جالسه الحين وميقنه انهم فأي لحظه بيدخل فهد وشايل جودي على كتفه،، يقولي ياويلك تنامين قبل لاأجي وجودي حبيبتي نايمه فحظنه وانا اشيلها على صدري هذاا اوديها وارجع احظنه بيدي هذوول ياالله ياغاليه ويــن انا وانتو وين متى بتحسين فيني متى ياغاليه متى ..
وتغرق في بحرها وغاليه تمسح دموعها قبل لاتفضحها ،،
قربت أكثر عندها وحطت راسها على صدرها ومسحت بحنانها كله على راسها وقالت: حياتي انتي والله حاسه فيك وعارفه مب بالساهل تعيشين من دونهم لكن حبيبتي هذا مقدر ومكتوب عليك من قبل ماتنخلقين بتعترضين على حكمة ربك!! وكم مره اقولك الله سبحانه مايبتلي الا عبده اللي يحبه يبي يشوف صبره لوين ولأي حد..
حياة تدفن راسها بصدرغاليه بلاشعور منها وتطوق خصرها بذراعها وتقول بصوت مبحوح:الله كريم ياغاليه الله كريم ،، بس انتي هذاك اليوم كنتي قاسيه معي
غاليه ويدها تشتغل: عاد انتي المفروض تعذريني انا انسانه ماعندي اسلوب اللي في قلبي على لساني
حياة تبتسم وسط الدموع: بس شوفي وش سويتي فيني
غاليه : يااللااا عاد بلادلع هذا انتي رجعتي بعدها حياه اللي الكل يعرفها
حياة: ظاهرياً بس
غاليه : وانا واثقه انك بتقدرين تتغلبين على نفسك ،، تدرين لتذكرت هذاك الكلام احيانا استغرب انك زعلتي منه بس لأنه لامسك بقوه وحسيتي بصحته فبكذا تأثرتي لأن كل اللي سويته هزه خفيفه وكم كلمه فالعظم
حياة تضحك بحزن: صح صح ولاجبتي صور الحادث ولاجبتي ملابسهم المليانه دم !!
غاليه: هههههه بس المفروض تشكريني مب تزعلين علي بالله عليك مب فقتي بعد هاللي سويته
حياة: امممم يمكن
غاليه وهي تلعب بشعرها : مب يمكن إلا أكيد..
ووالسكون سيد الموقف للحظات كانوا مستمتعين فيها لأبعد درجه،، حياة مسدله كل قواها على حظن غاليه وغاليه تبتسم بحنان وهي تمسح على شعرها ..
غاليه: حياه
حياة: هلااا
غاليه: ممكن تبعدين
حياة بضحكه خفيفه: امم لاااا ماصدقت على الله
غاليه: ههههه اقول ابعدي وراي رجل تلقينه ألحين منتفخ زي الزير
حياة وهي تبعد : ههههههه لااجل مدامه عشان اخوي روحي الله يستر عليك
غاليه تنزل من السرير وتمد يدينها تمسح دموع حياة وبإبتسامه تنسي الوجع: صافي يالبن
حياة بنظره فاتنه: حليب يافراوله
غاليه: هههههههه يوووه بتموت مهره لو تدري بهالجلسه
حياة تضحك: لااجل لاتقوليلها اخاف على اختي
غاليه وهي تطلع: ياحليلك تبيني افوت على نفسي هالمتعه يكفي انها قاهرتني ببرودها خليني بعد انا اقهرها
حياة تقول بصوت عالي بعد ماطلعت: اما ذي عجله عليها
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك