رواية قصور من طين -21

رواية قصور من طين -21

بحركه مثلثه والكم الثاني يوصل بين الكتفين بقطعة نحاس رقسقه ملتويه مشغوله وقصير شوي من قدام وذيل طويـــل وراه ..موديله كان بديع جداً ..

غاليه تلمس قماشه: الله يجنن

حياة تطالع اخوها: وش رايك ؟

بندر يضحك: انتوا شايفينه حلو

مهره: ايه

بندر: خلاص حلو بس مب كنه عاري شوي

غاليه : لاا وين عاري عشان الكم !!

بندر: إلا عاري عضودها كلها بتطلع وظهرها شوفي اغلبه بيطلع ياويلك ان شافتك امي غاليه عز الله بتذبحك

مهره تضحك: لااماعليك مب مخليتها تشوفه الا ذاك الليل عشان أحطها قدام الأمر الواقع

بندر: انتوا ادرى ،، المهم مهره وش موضوعك ؟؟

مهره تنزل الفستان فكيسته بربكه وتجلس قريب منه وتقول: بقول بس لو سمحت مابيك تعصب ..

بندر : ليه وش مهببه

مهره بخوف: ماهببت شي والله

بندر: طيب اخلصي علي وقوولي

مهره: السالفه ومافيها أنا كانت تجيني ازعاجات من رقم ماعرفه ورديت عليه وحصلتها بنت ولقيت انها تعرف اسمي وتعرف حياتي كلها ،، أنا فالبدايه حسبتها وحده من صديقاتي تسوي فيني مقلب وصرت ارد عليها بعد الحاح اتصالاتها ،، لكن فيوم تفاجأت إنها تقولي اني بجيك فالبيت وخفت وقلتلها مابي اشوف رقعة وجهك لكن هي عاندت وجات ولما شفتها حصلت وحده أول مره فحياتي كلها أشوفها والمنظر الحمدلله رب العالمين لايرضي الله ولارسوله واليوم عااد تمادت اكثر وارسلتلي ام ام اس حقيره مره وعاد خفت منها حيــل قلت مدام وصلت معها المواصيل لهااالدرجه مب بعيده عنها تسوي فيني شي

بندر رافع حواجبه ثنتينها ويحاول يسيطر على اعصابه كثر مايقدر ،، أما حياة وغاليه الذهوول سيدهم من بدت تتكلم مهره مستغربين ليش قالت وليش ماعلمتهم ووليش ماحطت عندهم خبر انها بتوصل الموضوع لبندر ..

بندر لازال يحاول: طيب ليش ماقلتي من البدايه

مهره: والله كنت احسبها وحده من صديقاتي

بندر: طيب بعد الزياره ماعرفتي منهي !! كان قلتي بعد ماشفتيها بهذاك المنظر

مهره شوي وتدمع: مدري جات الإمتاحانات وانشغلت ماجات فبالي

بندر: طيب فرضاً سوتلك مصيبه ولابلوه وش كان بتسوين بعد ماجات فبالك !!

حياة تهدي الوضع: طيب هذي هي قالتلك خلاص

بندر يطالع حياة وغاليه بنفس النظره محمله باللوم: وكنتوا تدرون !!

حياة: بعد إنا وش درانا بنواياها قلنا بنشوف وش آخرتها وكنا نبي نحل الموضوع بينا لكن مدام السالفه وصلتلك ورنا كيف بتحلها

غاليه تتدخل: واحنا ترى خايفين تكون من طرف خالد

بندر بغيظ: ووش دخل خالد بعد؟!!

غاليه بربكه مشوبه بالندم على الإستعجال: هااااه ،، ايه خالد انت داري اكيد بكرهه لنايف اخوي ويبي ينتقم منه فمهره عااد قلنا يمكن من طرفه

بندر يعصب بقوه: كلاااام حريم يعني وماتخافون الله تظلمون الرجال

غاليه تتلعثم وكرهت نفسها على الموقف اللي حطت عمرها فيه فقالت: اسمع يابن الحلال السالفه ومافيها ان خالد هدد نايف بأنه يحرمه من مهره ويسوي فيها الويل عاد طلعتلنا نهى وقلنا اكيد انها من طريقه يعني مب كلام حريم على قولك إلا متأكدين ميه بالميه

بندر يوقف متنرفز: وذااا الكلب يحسب الدنيا على كيفه ليه مهره ماوراها رجاجيل لااا وبعد يطري اسمها على لسانه ياماااال القطع .. ماعليه ياخويلد دواك عندي انا ..

ويطالع مهره وعيونه شابه ظو: وين جوالك ويــنه؟؟

وتمده مهره به ويدها ترتعش وقالها تطلع رقم نهى وطلعته ومدته مره ثانيه ،، وتطالعهم غاليه وهي تحرك عيونها لفوق ،، فهموها على طول وشالوا أكياسهم وطلعوا فوق ،، جلس بندر والنار تطلع من جوفه وغاليه قربت منه حيــل وقالت: وش ناوي تسوي؟؟

بندر معصب: ابعدي مني مالك دخل خلاص الموضوع جا فيدي مابيكم تسألون عنه مره ثانيه سمعتيني ؟؟؟

وسكتت غاليه وجلست بهدوء كنها مب موجوده وطبعاً ماأثر فيها الكلام كانت عاذرته من اللي فيه ،، شافته يراود نفسه يضغط على الزر ولامايضغط حوالي عشر دقايق وهو يتأمل الجوال وفالنهايه طلع جواله وسجل الرقم ونطل الجوال على غاليه وقالها تعطيه مهره مع بحر من التحذيرات ...

قده بيطلع فوق إلا دق تلفون البيت وراح رد لقاه المطعم طلعلهم خذا العشا وعطاه غاليه من دون لايطالعها وكمل طريقه لجناحه ..

اما فوق بعد ماطلعت حياة ومهره ماتكلموا ولاكلمه كل وحده دخلت غرفتها لين جاتهم غاليه بالعشا والجوال وتجمعوا فالصاله الفوقيه ..

غاليه تعاتب مهره: وهي ناقصه بعد تعلمين بندر ماالقيتي إلا هو عااد !!

مهره خلاص خانقتها العبره: وش اسوي من اقول له يعني

حياة: كان خليتي الموضوع علينا واحنا بنحله لازم تدخلين رجال فالسالفه

مهره: ياشيخه وش بنسوي احنا !! وش فيدينا أصلاً إلا الحمدلله اني علمته خلوووني ارتاااح

غاليه: عساه يصلح الدنيا مايخربها

مهره وهي تشوف جوالها: والله على بالي يوم خذا جوالي خلاص مب شايفته مره

غاليه: حتى انا توقعت هالشي لكن هو جلس ساعه يتأمله بعدين خذا الرقم ونطله علي ،، تهيييي هاوشني بسبتك مالت عليك كنك تستاهلين

حياة تضحك: واااااء احسن تغيير كل حياتكم كلام حب وعشق خلوها تبهرها شوي

مهره فواديها: ظنكم وش بيسوي معها

حياة : أتوقع بيكملها

غاليه ترفع حاجبها: أما يكلمها لذبحها هي وياه

حياة: ههههههه يابنت مب من زينها

مهره: أشووووف فيها يوم يارب ياكريم

فالجهه الثانيه من البيت ،، تحت فالملحق عند العيال قاعدين يتابعون لهم فلم درامي وكان ممل جداً فنظر نايف بسبب افتقاده لعنصر القتل والقتيل والرشااشات والمسدسات على حد قوله ..

نايف وكان معاه الريموت يغير على mbc ويحط على الميوت ويقول: بكيفي سعودي ..

سلطان يستقعد ويثور بقوه: وجــع ٍ آجعك رجع على الفلم يامال البلا

نايف يحط الريموت ورا ظهره: تبطي عظــم حبيبي

سلطان يمسك راسه : ياااالله يانايف والله متابعه

نايف: مب من زينه الحمدلله مدري وش معجبك فيه لارمي ولاذبح بس دموع وحب وومدري وشو الحمدلله والشكر

سلطان : ياااااااااا.. ليه تحسبني مثلك مافيني قلب وحياتي ودنياي الدم

نايف يموت من الضحك: ياخي تدري شكلك يخبل وانت متنرفز سلطان يابن عمي ارضى بالأمر الواقع الفلم خلاص مب مرجعه انسى حبيبي

سلطان: حبتك القراده قول آمين .. مدري وش حظي النحس اللي خلاني اجلس معك اليوم ولاكل يوم متهني مع ربعي ومفتك من خشتك

نايف : ههههههههههههه إلا صدق وش جايبك ذاالحزه ؟؟

سلطان: قلتلك حظي النحس من اولها وديت خواتي للسوق وجيت وكملتها عاد انت وجلست معك

نايف يضحك : إلا على طاري تعرف الكوفي شوب حقنا

سلطان: أي واحد من كثرها عندي ماعرف وشهي حتى من كثرها مولي عليها العماميل

نايف: هيهيهيهي الكوفي شوب ماغيره اللي دايم نروحله اللي كله سعوديين

سلطان يتذكر: أيـــه وش فيه؟

نايف: رحت اليوم له اقف على الأطلال وتعرفت على واحد من اللي يخدمون وخذيت رقمه بعد

سلطان مبتسم: والله

نايف: ايه وجهه سفر وقلت مايحتاج الرجّال شكله أجودي قلت خلني اتعرف عليه اغتني منكم ولاكون لارحت يقهويني ببلااش

سلطان: ههههههه قول انك لاف وداير عشان البلاش لاتقعد تسويلي فيها مرجله

نايف يضحك: لااوالله صدق الرجال مايحتاج بين عليه الصلاااح

سلطان: طيب انت ادرى بالوجيه

نايف يطفي التلفزيون: أقووول اخمد اخمد الله يوجهها بخير

بعد خمس ايام ،، بالتحديد يوم الأربعاء في وقت تحتل فيه الشمس الصداره ،، فالمكان اللي اطلقنا عليه اسم مدرسه ..

البنات لهم ربع ساعه من بدوا يطلعون من قاعات الإمتحان والفرحه مو سايعتهم وكن محد يمشي على الأرض غيرهم ،، آخر يوم لهم فالإمتحانات وآخر يوم لهم فالثانويه،، نهاية مرحله عمريه من حياتهم ونهاية مديره ومعلمه ومريول ..

كانت تمشي حسناء ومساعدتها بسرعه من بينهم خايفه لاتنكشف مع ان مافيه احد بيكشفها لكن الحرامي على راسه خياله ،، وحنان ترقب الموقف من بعيد تستعد للحظه المميته ،، توجهت حسناء واللي معها بسرعه يم دورات المياه وحصلتها مسكره بخفيف مثل مابغت ،، فتحتها بقوه وحصلت الشي مرتب على نفس اللي خططت له .. حياة ونوره !!

يتبع

":":":":":":"

" عندما يكيد بك الظلم كـ قنبلة موقوته !! "

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

لا احلل مسح اسمي من على الرواية ..

تجميعي : ♫ معزوفة حنين ♫..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

﴿ الجزء الخامس عشر ﴾

بعد خمس ايام ،، بالتحديد يوم الأربعاء في وقت تحتل فيه الشمس الصداره ،، فالمكان اللي اطلقنا عليه اسم مدرسه ..

البنات لهم ربع ساعه من بدوا يطلعون من قاعات الإمتحان والفرحه مو سايعتهم ، وكن محد يمشي على الأرض غيرهم ،، آخر يوم لهم فالإمتحانات وآخر يوم لهم فالثانويه،، نهاية مرحله عمريه من حياتهم ونهاية مديره ومعلمه ومريول ..

مساعدتها ماقدرت تتحمل قوة الموقف حطت يدها على وجهها وغمضت بقوه ،،

صرخت نوره بعنف وقعدت فالزاويه تبكي وتمثل الخوف والصدمه ،، أما حياة تناظر الأطراف الثلاثه بذهول مميت مب فاهمه وش السالفه ..

دخلت حسناء وناظرتها كنها مصدومه فيها وقالت بصراخ وهي تسكر الباب كأنها خايفه من الفضيحه: اخخخ عليك يالتربيه ،،، احنا نربي وانتي تهدمين وينك يامربية الأجيال ويامعلمة النشء ، كل شي كنت اتوقعه منك الا هالشي وصلت بك المواصيل لهاالدرجه من الإنحطاط ..لااااا الصراحه شي تعدا حدوده !!

حياة لامجيب مصنمه في مكانها ولاحركه ولاحتى رمشه فقط الدموع تنهمر شلالات لاإراديه والذهول هو هو والألم أعمق هالمره ..

حسناء تتوجه لنوره هي ووصيفتها اقصد مساعدتها ويشيلونها ويهدونها وتروح المساعده معاها وتجلس حسناء عند حياة تكمل باقي الخطه ..

حسناء تناظرها بإحتقار: بنت فعمر بنتك حرام عليك خافي ربك تسوين بهاالسوايا ماتخافين تخفس بك الأرض ياالله كيف تستصيغين نفسك ابي اعرف ،، الله يعافينا مما ابتلاك الله يعافينا مما ابتلاك!!

وفهاللحظه تدخل سميره صدفه تتوضى للضحى إلا شافتهم ثنتينهم واقفين ،، حسناء بجبروت عظيم وحياة فالوسط والدموع تسولف ،، ولما شافت حياة لحالها خافت وعرفت ان فيها شي من قبل حسناء وجاتها حاله تعصب غير طبيعيه ،، وجهت يمها وشافتها كما الصنم واقفه ومسكتها من يدها برصه قويه خلتها تصحى وتحس بااللي ارسلته لتوها ..

قالت سميره بقوه : خير ياابله حسناء وش السالفه هالمره ؟

حسناء تلوي شفايفها: اسأليها صراحه استحي اقول!!

سميره ارتابت وقالت برعشه مخفيه: وش دبرتي اليوم !!

حسناء تمثل البياض : ايش وش دبرت ،، ماعرف وش تقصدين انتي!!

حياة تنهار وتطيح على الأرض بغير شعور وتبكي بحراره وحرقه وتقول بصوت مقطع : حسبي الله ونعم الوكيل حسبي الله ونعم الوكيل

حسناء بصلابه: ايه بدت حركات التمسكان لاتحسبين الموضوع بيعدي كذا مثل اللي طاف ،، سكتنا مره على بالنا بتستحين وبتلمين نفسك لكن هالمره جات قويه ياحياه وصراحه احنا يهمنا سمعة مدرستنا ونخاف عليها اسمحولي اذا وصلت الموضوع لمكتب الإشراف!!

سميره جالسه تبي توقف حياة ماحبتها تكون بهالضعف قدامها قالت بقوه: اسمعي ياحسناء والله لايصير فيها شي اني انا اللي اعلم عمها والمره اللي طافت عدت لكن هالمره مب معديه

حسناء وهي تقفي: اممم مادري صراحه عن ايش تتكلمين ،، ولو سمحتي حياة مابيك تطلعين لين تجي احد المشرفات ..

وتوقف سميره حياة بكل قوتها وحاولت فيها تسكت لكن حياة وجعها هالمره كان اعظم ،، جابتها عند المغسله وغسلت وجهها غصب عشان تروح الدموع وتقدر تطلع من هالمكان الدنيء ،، ضمتها من ذراعها ومشت بها لين وصلوا لمكتبهم ،، جلسوا ثنتينهم وتوسدت حياة يدها على الطاوله وقالت بصوت مبحوح: والله ماسويت شي والله ياسميره نوره اللي جاتني وقالت لي اجي هي اللي حاولت تعتدي علي " ويغوص صوتها" والله ياسميره انها حتى ......

وتنقطع الأحبال الصوتيه وهي تتذكر قوة الموقف ،، وسميره تربت عليها بهدوء ظاهري والدهشه مسيطره عليها من الكلام اللي فهمته "قويه قويه هالمره ياحسناء،، والله قويه "

كلمات تتقطع بداخلها وقالت بهدووء: حياة اسكتي وفهميني زين عشان نعرف وش نقول .

حياة تمسح دموعها وبصوت بالكاد يسمع: انا مادخلت لجنه اليوم عشان عندي تصحيح ،، يوم مضى نص الوقت على الإمتحان طقت نوره الباب وكانت تبيني اطلع لها برا ،، طلعت انا والله بحسن نيه مافي بالي أي شي ،، قالتلي ابله حياة ابي اقولك شي مهم مره عن ابله حسناء والسالفه اللي سوتها لك المره اللي طافت بس خايفه اوقف هنا اخاف تشوفني ،، قلت مايخالف تعالي ادخلي هنا وتكلمي ،، قالت لاا مستحيه من الأبلات إلا تعالي انتي فدورات المياه أأمن مكان ومحد حاس فينا،، وعاد انا خبل صدقتها وقلت البنيه اكيد مرتعبه ويمكن هالمكان يكون صدق امان بالنسبه لها ..

سميره مشدوده عالآخر: طيب انتي غبيه كان وديتيها المعامل ولاالمكتبه ضاقت الأماكن كلها يعني

حياة : والله ماجا على بالي اغتريت بالسالفه وقلت بس بلقى عليها شي وقلت بورح معها..

وسكتت ورجعت الدموع لكن هالمره بحر..

سميره بشد: حياة حبيبتي لاتبكين كملي وش صار كون نلقالك مخرج

حياة وبشهقات تكاد تقتلها: يووه ياسميره وين المخرج فهذي ،، حسبي الله ونعم الوكيل حسبي الله عليها..

سميره: حسبي الله عليها كان اعراض الناس لعبه فيدينها

حياة: مابها مخرج إلا من رب العالمين

سميره بعطف باذخ: طيب وش السواة؟؟

حياة: سواة الله ابرك ،، والله خايفه من الفصل هالمره

سميره: لااا تفاءلي خير

حياة بغصه: والله كنت متفائله وشوفي وش صارلي ،، مامداني فرحتلي يومين الا جات ونغصت علي الله ينغص عليها فحياتها..

وفهاللحظه دخلت عليهم طالبه تقول من عند الباب: ابله حياة الإداره طالبينك ..

ارتجفت حياة وشافت سميره بحركه لاإراديه والدموع ملت عيونها

قالت سميره وهي تمسح دموعها: لااا مابيهاا خليك قويه حياتي الله معاك انتي قويه به وهو الشاهد على سواتهم ،، لاتكونين ضعيفه ويقدرون عليك خلي ثقتك بنفسك تعميهم فاهمتني..

حياة ترتب شكلها وتمسح وجهها وتوقف وتقولها برجا: تعالي معي تكفين

سميره توقف معاها: طيب ياللاا مشينا مع اني عارفه بنطرد بنطرد لكن يااللااا لجل عين

عصر اليوم نفسه شابكه النت وفاتحه صفحة وورد وكتبت ..

ساكنة

هادئه

تدثرني فـ إنزواء

تغتالني بصمت

وتميتني الموتة البطيئه

هي الأيام راحله ونرحل معها في دروب الأماني

كل صباح ننسج أمنية غلفها اليقين علّها تكون في المساء

فلا نتيقن !!

وكل مساء ننسج أمنية غلفتها الشكوك علّها تكون في الصباح

فلانتيقن أيضا!!

لايقيـن إذن ! !

مسرحية بلهـــاء اعيش فيها واشارك فيها ..انعم بها

أعتيقة أصبحت !!

أشاب رأسي

أم اني شجرة خريفيه تنظر يد الربيع تنتشلها من رفاتها

بحق لاأعلم من أكون

أمل يراودني عن نفسي وأخشى

وحلم يسكنني وأرتعش

أأيأس أم أني يئست وانتهى

فتنة تثير السواد بداخلي وتقضي على ماتبقى من الوان بيضاء

يارب كل شيء ومليكه أعني على نفسي وبدد احزاني

راحله

الأيام

وأخشى

الرحيـــل الى لاشيء !!

تنهدت بعمق ورجعت تقراها مره ثانيه .. ابتسمت بألم وسيفت الملف وسكرت اللاب كله ،،

اليوم اول يوم لها في الإجازه وأول يوم تقضيه بدون مذاكره وبالطبع كان ممل جداَ وفراغ كبير يملاه ،، تذكرت اليوم حنان آخر يوم لها بالإمتحانات قالت بتقوم تتطمن عليها مهما كان اختها الصغيره وواجب عليها تقرب منها ..

طلعت من غرفتها وتوجهت لغرفة حنان طقت الباب وسمعت صوت حنان من داخل تضحك بدلع دخلت على طول لأنها لو انتظرتها لين تقول تعالي بتجلس للصبح عند الباب ،، دخلت وحصلتها منسدحه على بطنها وتحرك رجولها شافتها حنان وارتبكت وقامت عدلت جلستها

وقالت : اوكي نوني حبيبي بعدين اكلمك وولاتحاتين جزاك محفوظ

- ههههههه اموت فيك يااللااا بااي

وتسكر منها وتحط الجوال وتقعد تطالع صيته بإحتقار وتقول: وانتي من أذنلك تدخلين ؟؟

صيته تجلس وفبالها هواجيس على آخر الكلام : والله غرفة اختي وادخل على كيفي..

حنان تضحك بإستهزاء: الله من متى !!!

صيته: وشو اللي من متى؟

حنان: من متى وانتي اختي!!

صيته: اسمعي حنان انا مب جايه اتهاوش ولااتخانق جايتك اباركلك بالخلاص واهنيك لاتقلبين الجو لو سمحتي ..

حنان: ياااااي مطيبها اختي ،، عالعموم مشكوره وماقصرتي خلاص اديتي المهمه؟؟

صيته توقف بزعل: والله انك ماتستاهلين حتى الكلام .. الشرهه مب عليك الشرهه على اللي جالسن معك..

حنان ببرود: اقوووول ظفي وجهك بس معاد بقى إلا هي اجلس مع هالأشكال !!

صيته تلف عليها تحاول تمسك أعصابها وتطالع لبسها: الله اعلم من اللي مايتشرف بالثاني

شوفي لبسك وشوفي طبايعك بعدين تعالي تكلمي ..

حنان تتنرفز وتكلمها وهي قدها بتطلع: هيــه هيــه روحي شوفي حيااه وش سوينابها اليوم عز الله ماتت ولاعاد هيب حيه ..

وتوقف صيته مبلمه من سمعت الطاري وتلف مصدومه وتغلغل يدها في شعرها بلاشعور وتقول كنها تبي احد يكذّب مروور الإسم عليها : حيااه وش سويتوا بعد !!!

حنان تقوم لعندها عند الباب وتمسكها من كتفها وتدفها تبي تطلعها وبالفعل طلعتها وسكرت الباب وقفلته وتفتحه مره ثانيه وتقول بضحكه ساخره: اقوول ماتت خلااص .

وتسكر الباب عليها وتترك صيته تتخبط بين ذهولها وصدماتــها الي عيت تنتهي من امها ..

" يــــامرحبا والله اني اقوله صادق "

سعيد: البقى البقى يابو مرحبا ،، شلونك نفداك عساك طيب

نايف : بخير الله يرضى عليك شخباركم انتو عساكم طيبين

سعيد: يسرك الحال الله يطول فعمرك هااا مابه تسييره قريبه ولاشي

نايف يضحك: افاااا عليك قايلك الأطلال يبيلها علووم لكن ذالمره انت اللي بتجينا عشاك اليوم عندنا ..

سعيد: الله يغنيك ويكثر خيرك

نايف: لاااا لزوم تعشا عندنا والله مابه احد الا انا وابوي وعيال عمي مابه احدغريب ..

سعيد: الله يرضى عليك مانبي نكلف عليكم

نايف: يارجّال مابه كلافه راعي بيت تراك .. خلاص نفداك قول تم ..

سعيد: ابشر ولايهمك بس عاد مب اليوم خلها بظروفها

نايف: على راحتك بس لزوم نضيفك

سعيد: وصلت الله يغنيكم ويكثر خيركم

نايف: خلاص اسمع ترى ملكتي يوم الخميس الجاي ان شاء الله ونبيك تشرفنا

سعيد يضحك : ياهووووووه اجل بتملك مشاء الله اثرك بتفلح

نايف: هههههههههههه الله يجيب الفلاح ويعدي هالإسبوع على خير

سعيد: الله يوفقك ويكتبلك اللي فيه الصالح

نايف: ومن يقول ومن يقوول تامرنا شي يطولي بعمرك

سعيد: سلامة روحك الله يرضى عليك

نايف: لاتقاطعنا ياخوك

سعيد: ولايهمك بجلس على قلبك لين تقول ياليتني ماعرفته

نايف: والله انه شهد شرف لي معرفتك الله لايحرمنا منك ..

سعيد: الله يسلمك ويضى عليك هافمان الله وسلمني على العيال

نايف: سلامن وصل الله يحفظك وياقاك

دخلت عليها ولقتها متدثره فبطانيتها بقوه ولاجزء منها طالع والأنوار طافيه والغرف مظلمه إلا من خيوط اشعة الشمس الناعسه اللي تسللت خلسه من بين الستاير ،، قربت منها وحاولت تبعد اللحاف عن وجهها لكن شكلها متلحفه من قلب .. لكن غاليه كانت اقوى منها ابعدته بقوووه وشافت منظر هالها بمعنى الكلمه .. حصلت حياة وجهها مزرق وشفايفها جـــافه وجسمها بـــارد حيـــل قامت منتفضه وصارت تهزها بقوه فضيعه وحياة مامن مجيب،، تحسست نِفَسْها ولقت نفس بسيط يطلع منها وحطت يدها على قلبها والدقات ضعيفه حيــــــل

طلعت بسرعة برق ونزلت تحت تسبق خطاها وخذت كل درجه بدرجتين شافت الصاله مافيها إلا امها وجدتها وقالت ودموعها تسبقها : ويـــن بندر وينه

ام نايف تفز مرتاعه وام عبدالله مهب اقل منها ..

أم نايف تقرب منها: وش فيك وش فيك عسى ماشر؟

غاليه تمتم وتقفي منهم للملحق: حياة يمه حياة

وتطلع للملحق بسرعه خاطفه وتحصل بندر جالس لحاله يتفرج على التلفزيون وتقول بصياح : انت وينك اختك بتموت وانت قااااعدلي هنا !!!!

بندر يوقف بخووف : اخّووو الحياااه منهي حياة ولامهوور ؟؟

غاليه تركض لداخل : حيــاااه بسرعه تعال البنت بتموت علينا

ويروحون ركض لفوق وانفاسهم تسبقهم وصلوا فوق وحصلوا الباقي عندها وام عبدالله جالسه على السرير وحاطه راس حياة على حظنها وقاعده تقرا عليها بدموع قاتله ..

وصلها بندر وشاف وجهها وصابته رعشه قالهم يجيبون عبايتها وقال لغاليه تجي معه..

مهره والدموع ماكلتها : ماابي انا برووح حرام عليكم ..

بندر معصب: مهره مب وقتك خلاص غاليه تكفي وبنكلمكم نطمنكم عليها

ام نايف برجا وبحر على خدها: لااا وين اخلي بنيتي كذاا ..

ام عبدالله : البنت مغشي عليها وانتوا تعازمون اخلص ود اختك لاتموت علينا ..

ويشيلها بندر بخفه بعد مالبسوها عبايتها وتنزل معاه غاليه بعد مالبست عبايتها ..

بعد ماطلعت من حنان صارت تهوجس بااللي سووه فحياة وكيف انها ممكن تعرف ،، على كثر المشاكل اللي يسوونها لها لكن هالمره حست إنها في العظم ،، خافت من قلب وقالت تنزل تتحرى عنه ..

نزلت وحصلت امها لابسه عبايتها وجالسه على الكنب كنها تنتظرلها احد ..

باست راسها وجلست على الكنبه اللي جنبها وقالت: كيفك يمه عساك مبسوطه

حسناء بثقه: اكيد مبسوطه وليش ماانبسط !!

صيته بابتسامه مزيفه: خلصتوا دوامكم ولابعدكم

حسناء: لابعدنا يمكن باقي اسبوعين على بال ماتطلع نتايج الثانويه العامه وتوصلنا شهاداتهم ونسلمها يمكن اسبوعين او اكثر

صيته : اهااا الله يعين ،، بتطليعين ؟؟

حسناء: وش شايفه لابسه عباتي يعني وش بسوي

صيته : لااا قلت يمكن جايه

حسناء : لابروح تبين تروحين معي

صيته: وين ؟؟

حسناء : اجتماع لنساء الأعمال فقاعة الفور سيزون

صيته بإبتسامه ساخره: لااا وش يوديني لهناك ،، إلا صدق سمعت ان في سالفه جديده مع حياة !!

حسناء تضحك : يووووه امداه الخبر ينتشر!!

صيته: حنان قالتلي وقلت اجي آخذ العلم الأكيد منك

حسناء تتمسكن : الله يعافينا ولايبتلينا اعووذ بالله من هالأشكال ماكنت اصدق صراحه ان فيه مثل هالناس لكن اليوم شفت بعيني واعووووذ بالله الله يكفينا شرهم وأذاهم..

صيته تمسك اعصابها: وش شفتي يمه !!

حسناء: يووه وش ماشفت الله يستر علينا وعليها ماحب اتكلم فأعراض الناس .

صيته مازالت الأعصاب قيد الترويض: يمه تكفين قوليلي متشوقه اسمع السالفه

حسناء : بس خذت جزاها الكلبه وتحمد ربها ان البنت تنازلت ولاكان بيقام عليها الحد

صيته تشهق : وش حده !!!

حسناء: يووه والله اني استحي اقوول توك صغيره على ذاالكلام ونعمه ان المشرفات كانوا طيبات معها واكتفوا بالنقل التأديبي ولااا المفروض يشهرون بها ويعلمون عليها الجهات المختصه ..

صيته توقف معصبه : وكنه مب انتي اللي مدبره الموضوع كله قالتلي حنان ترى انكم انتوا اللي مدبرين السالفه خافي الله يمه خافيه ترى ان دامتلك الدنيا اليوم مب دايمتلك بكره

تبلين على خلق الله وتقذفين المحصنات وتنتظرين الخير يهل عليك

حسناء توقف ببرووود وتمرر كفها على خد صيته بجمود وتقول: اقول وش رايك تروحين تصلين وتدعين ربك وتقولين يااارب اخذ امي وفك العالم منها ،، حبيبتي لاتنسين اني امك زين حياتي ..

وتقفي عنها وتطلع تاركه وراها دنيا من الغيض وسوالف قهر ..

رقت لغرفتها وسكرت عليها الباب ورمت نفسها على السرير بتعب وآهات تهد الجبال وودعت حياة وحياتها الحي القيوم ..

يتبع ,,,

👇👇👇