رواية قصور من طين -22
صيته توقف معصبه : وكنه مب انتي اللي مدبره الموضوع كله قالتلي حنان ترى انكم انتوا اللي مدبرين السالفه خافي الله يمه خافيه ترى ان دامتلك الدنيا اليوم مب دايمتلك بكره
تبلين على خلق الله وتقذفين المحصنات وتنتظرين الخير يهل عليك
حسناء توقف ببرووود وتمرر كفها على خد صيته بجمود وتقول: اقول وش رايك تروحين تصلين وتدعين ربك وتقولين يااارب اخذ امي وفك العالم منها ،، حبيبتي لاتنسين اني امك زين حياتي ..
وتقفي عنها وتطلع تاركه وراها دنيا من الغيض وسوالف قهر ..
رقت لغرفتها وسكرت عليها الباب ورمت نفسها على السرير بتعب وآهات تهد الجبال وودعت حياة وحياتها الحي القيوم ..
\
:
(( مب معناته ارسلتيلي اخوك يهددني فهذا معناته اني بنفك عنك .. لاحياتي لاأنتي ولااخوك تخوفوني كثير اشكال مثلكم مرت علي لكن انا اللي افوز بالنهايه .. انتي شكلك عارفه البير وغطاه وعارفه السالفه كلها وانا من طرف مين وهذا بيسهل علي اشيااء كثيره .. واكيد عارفه ان خلودي مب سهل ولاانا اقل منه سهوله فـ عندك ثلاث خيارات بالترتيب .. أولهم تقابلينه ثانيهم تكلمينه ثالثهم ترفضين وتحملي المسؤوليه لأن مب ناوين نتركك فحالك جايبين راسك جايبينه غصب ولاطيب فأحسنلك واحسنلنا اقصري الموضوع وخلي الدعوه فري .. وشوفي لو حاولتي مثلاً تعطين الرقم الهيئه او أي حد يطلعلك صاحب الرقم فأبي اقولك لاتعبين نفسك لأن الرقم سوا ومب بإسم احد وفلحظه اقدر امحيه من الوجود .. لك اسبوع بالكثير تفكرين فيه ويوم الخميس الجاي بكلمك اشوف وش قررتي يعني عطيتك مهله اسبوع ويوم بعد لاتنسينها اوكيه .. ))
\
:
" لااا ازاي تتأخروا كدا البت كانت هتروح فيها "
بندر : عاد ماشفناها دكتور المهم هي وش جاها
الدكتور: واللهِ الأعراض اعراض انهيار عصبي .. لكن أولي هي تعرضت لصدمه النهارده؟؟
بندر يرفع حاجبه: لااا ابد ماشفت شي !!
الدكتور: عالعموم احنا إديناها مهديء وكم ابره لكن ارقووك يااستاز ابعدوها عن اية انفعالات اصل الخنأه وضيق التنفس مش كل مره بتعدي ..
بندر : خير ان شاء الله ومتى تطلعونها ؟؟
الدكتور: عالأأل لحد الساعه حيدعشرمن الليل ..
بندر وهو يصافحه: الله يعطيك العافيه دكتور
ويمشي منه ويدخل عليهم فالغرفه ويلقا حياة نايمه على السرير مثل الملااك .. ملامحها محدده بالتعب وكل اجزائها موجــعه ..
قرب منها وانحنى عليها وصار يمسح على شعرها بحناااان يسع الكون كلـه .. باس راسها وخانته دمعه مريره مسحها بطرف شماغه وجلس .. وهذا كله وغاليه ترقبه بهدوء ودموعها حره طليقه لاقيود ولاسلاسل اليوم يومها واليوم يوم تحريرها ..
مسكت كفه بهدوء وصارت تمسح عليها بحب وصاروا اثنينهم يرقبون حياة بسكــون ..
قال بندر بحزن يشتت الصمت : هي صايرلها شي اليوم ؟؟
غاليه: والله مدري ماشفتها من جات من المدرسه جيت بصحيها للصلاة وحصلتها على الحال اللي شفتها فيه .. إلا وش قال الدكتور
بندر يحط يده ورا رقبته ويتعنز بتعب: يقول انهيار عصبي
غاليه تشهق : وشو انهيار عصبي !!!!
شوي إلا انفتح الباب بــقوه مرتجفه دخل منه سلطان وعمه عبدالله ووجهه اسود من الروعه حتى منها ماعاد قدر يتكلم صار يلهث ويشر بيديه علامة وش فيها .. خافوا عليه من هالحاله قرب منه بندر وجلسه على اقرب كرسي وقال : ارتاح نفداك مابها إلا العافيه شفها قدامك غزال..
سلطان بخوف: وش جاها !!
بندر : علمي علمكم لكن الدكتور طمنا يقول الليل بتطلع عن شاء الله
عبدالله يهدا شوي ويذكر ربه ويقوم يمها ويبوس راسها ويقول: ماهقيتها منك حياتي اهون عليك كذاا تطيحين وتروعيني عليك !!
غاليه مبتسمه بحب كبير لحنان ابوها اللي ماينتهي وتقول من تحت النقاب: يبه هي معطينها مسكن ماتحس فيك ..
عبدالله يمسح على راسها : الله يقومها بالسلاامه يابوها ..
غاليه تلطف الجو: هااااه الله يخلف علي وانا بنتك ماقد اهتميت فيني كثرهااا !!
عبدالله يطالعها بنظرة حب كفتها واخرستها ،، طالع بندر وقاله : كلمت البيت تراهم يشرقون ويغرقون عليها..
بندر يضرب راسه بيديه : يوووه نسيت والله
ويطلع جواله ويكلم على جوال مهره اللي على طول ردت وبصوت متقطع جاه صوتها طمنها على اختها وقالها تطمن اللي حولها ..
:
نزلت من السياره ومشت بخطوات مشتاقه يم باب القصر الباذخ .. دقت الجرس وثواني إلا الباب المذهب مفتوح ..
فتحتلها الشغاله وسألتها عن صيته وقالتلها إنها فوق .. دخلت وجلست فالصاله وقالتلها تناديها لها ..
طلعت الشغاله لصيته وبلغتها بالضيفه اللي جات لها لبست اقرب شي لها وعدلت شعرها وحطت قلوس ناتشورال ونزلت ..
دخلت الصاله وكانت البنت جالسه بعبايتها ومعطتها مقفاها عرفتها من شعرها
وقالت : مرحبــا مرحبـــا مرحبا والله ومسهلاااا
وتوجه يمها بشوووق كبير وتلمها بقوه كبيره وجلست هي وياها على نفس الكنبه ..
صيته : حيا الله سلمى
سلمى بضحكه : الله يحييك ويبقيك
صيته : ياكافي مابغت تجي هالزياره من متى وانا اطرك !!
سلمى : ههههههه يااللاا هذا انا جيت ..
صيته : اغلى من دخل وربي شاهد..
سلمى مبتسمه : الله يسلمك القلوب عند بعضها
صيته : أقول ريحيني كنا قالبينها رسميات ومدح ومديح !!
سلمى بضحكه رنّانه : وش اسويبك انتي اللي قاعده تمدحين وتعرفيني انا اذووب عند المدح ..
صيته توقف وتمدلها يدها : عارفتك مشفوحه ماشفتي خير .. اقول تعالي خلينا نطلع فوق فغرفتي ناخذ راحتنا اكثر..
سلمى توقف وتاخذ نقابها وشنطتها من على الكنبه : احسن بعد
\
:
" طيب انت مب ماخذ قرض على راتب زوجتك ؟؟ "
فهّاد : عز الله امّحقت بركته ..
سلمان : وراك ؟؟
فهاد: مدري وش راح فيه ،، صرت اسحب منه شوي شوي لين مابقى منه غير عشرالاف ريال..
سلمان: اووووف يالداشر من مية الف مابقى منها غير عشره !!
فهاد : والله اني منقهر كنت ابي ادخل في ذالأسهم لكن حظي دايم شين !!
سلمان : مايخالف ادخل بذاالعشره تنفع ..
فهاد : لاااايارجال وش اسافر به !!
سلمان: الله يعني كل مره تسافر بشي الله يسلم سالم بن سلطان البنك الممول..
فهاد يضحك : ايه بس عاد ذاالمره ابي اتمتع بفلوسها ابي احس بحرقتها عليها !!
سلمان يضحك : والله ان المرَيَه في حالها وش تبي منها ؟؟!!
فهاد: ياااخي قاهرتني ببرودها هذااا تشوفني كني جدار قدامها !!
سلمان : ياسلااام عليك مدخل اخوها السجن وتبيها تحوفبك وتروفبك !!
فهاد يتلخبط : اقوول غير الموضوع ترى سيرتهم تجيبلي الهم ..
\
:
أذن المغرب وبيت عبدالله تملاه الكآبه والحزن على حال حياة .. والقلوب تلهث قبل الألسن بالدعاء لها ..
قامت ام عبدالله بمساعدة مهره وراحت تصلي وام نايف قامت هي الثانيه تبي تتوجه لربها إلا دق التلفون وراحت ترد ..
أم نايف: الو
..: السلام عليكم
ام نايف: عليكم السلام ياهلا
..: حيااالله خالتي شخبارك
ام نايف بعد ماميزت الصوت ولامس وجدانها: ياااهلاا وغلااا ببنيتي شلونك نفداك وشلون بنيتك ومويمتك؟؟
سميره : ابشرك بخير وعافيه خالتي فديتك مابي اطول حياة قريبه عندك
ام نايف بحزن: لااوالله يابنتي حياة تعبت علينا شوي ووداها اخوها للمستشفى
سميره تشهق : وش فيها !!!
ام نايف : لاحبيبتي مافيها شي بس جاها هبوط وراحت تاخذ غذايه وشوي وجايه
سميره بألم : حسبي الله ونعم الوكيل حسبي الله عليها جعلها تشوف فعيالها يوم يارب يامجيب الدعوات فذاالساعة المباركه بين الأذان والإقامه تورينا فيها يوم يااارب..
ام نايف مستغربه : سميره منهي يمك ؟؟!!
سميره تتلخبط : اسألي حياة وهي تقولك لاتخلونها ياخاله تراهي محتاجه لكم والله.. ابخليك الحين الله يحفظك ..
وتسكر سميره وتخلف وراها ام نايف متخبطه وغرقانه فلجة الأسئله ..
\
:
صيته : يعني كم قدلكم ماشفتوه
سلمى : يوووه يمكن حول الشهرين..
صيته: اوووف ولاحتى جا يسلم على امك وابوك..
سلمى : ولاحتى شمينا ريحته كله يكلم تلفون ويسم بدنا شوي ويسكر..
صيته : اعووذ بالله الله يعينكم عليه..
سلمى : إلا الله يعين مرته عليه احنا مانشوفه الا من السنه للسنه لكن ذيك المسكينه صدق مبهذلها ..
صيته مشدوده : ليش ماتروحين لها تونسينها حرام يستفرد بها ..
سلمى مرتعبه: لاااا الله يرحم والديك مب ناقصته انا .. بس تدرين صيته على كثر حبي لها وكثر ماهي طيبه معانا لكن ماتعجبني شخصيتها أبد .. يعني مافي أي شي يجبرها على انها تصبر على فهادووه لكن مع ذلك جالسه عنده وموريها انواع الذل .. احيانا اقول يمكن عشان بنتها صابره بس هي مشاء الله عليها مدرسه وقادره يعني مب محتاجته فأدنى شي ..
صيته : ااممم ماتدرين وش في قلبها يمكن تحبه ..
سلمى تضحك بسخريه: يؤ من بيحب ذاك عز الله حتى ظله ينحاش منه !!
صيته : البيوت اسرار حبيبتي ماتدرين وش فخطر العالم .. خلينا منهم الحين ..ابي اوريك صور حفل التخرج طلعت وطالعه جنــااان ..
سلمى تصفق بفرحهه : واااو طلعت حقتك ياحظك انا بعدها ماطلعت كل يوم يقولون بكره..
صيته وهي تجيب الألبوم من الدرج وتحطه قدامها : ان شاء الله تطلع ،،" وبإبتسامه" يااللااا شوفيني وانا حلوه ..
سلمى : ههههههه طيب بس بشرط احلى صوره آخذها ذكرى ..
صيته : ايه معليه تحلمي ..
سلمى : لااوالله من جد صيته عطيني وحده ترى البيت فاضي مابه إلا انا ومي وابوي وبعدين بحطها فالخزنه يعني محد مهوب يمها ..
صيته بسذاجه : اوكي بس لازم تعطيني انتي بعد ..
سلمى بفرحه: شووور
\
:
الساعه 11:15 مساءً
الكل ملتم بحب حول حياة ويحالون فيها تاكل وهي رافضه ومكتفيه بالصمت المميت .. والدموع ماليه محاجرها لكن مو راضيه تنزل ..
ام عبدالله تكلم ولدها : يمك اقرا عليها كون ربي يفك عنها ..
ويحط يده على راسها ويبدا في القرايه ..
مهره تمسح على راسها من الجهه الثانيه: حياتي والله محتاجتلك لاتسوين بعمرك كذا..
وتجي ام نايف من المطبخ بكوب عصير طازج وتقوم مهره منها وتجلس مكانها ..
وتمده لحياة وحياة نفس الرد ..
قربت منها حد النفس وهمست فأذنها : حبيتي ترى عرفت السالفه كلها لاتشيـــلين هم خلي املك بالله قوي وارمي الموضوع ورا ظهرك ..
وتطالعها حياة بذهول وترجع لنفس صمتها وترجع ام نايف لمحاولاتها وفالأخير رضت تشربه بتعب ..
قامت مهره بوجع وطلعت فوق لغرفتها رمت نفسها على السرير بألم وراحت في بحر التفكير والمشكله اللي انصبت على راسها صب .. " يارب مالي سواك ارتجي " تنهدت بعمق وهي تقول هالكلمه وخذت جوالها وارسلت مسج لبندر على انه يطلعلها ،، ثواني الا وهو داخل عليها بإبتسامه عذبه ..
بندر : مرحباا
مهره تستقعد زين وبحزن تقول : مرحبتين
بندر: هاااا وش فينا بعد حياة وشفتيها غزال وش بعد فيك ؟؟!!
مهره : بندر وش سويت مع نهى ؟؟
بندر تتغير ملامحه: قلت مابي احد يسألني عن الموضوع..
مهره : ماسألتك ابي اتطمن بس ناظر وش ارسلتلي .. " وتناوله الجوال وهي حاطه على المسج"
ويقراها بندر وعيونه يطلع منها شرااار وعروقه شوي وتنطق ويهمس بلعن وشتم
وقالها : الجوال هذا خلاص انسيه بجيبلك رقم ثاني وابن الكلب خويلد لي تصرف ثاني معه ..
مهره خانقتها العبره: طيب هي تقول يوم الخميس الجاي والخميس مكلتي اخاف تسوي شي..
بندر يوقف: ولاايهمك وراك رجّال
وتسكت مهره مرتابه وقلبها يقولها كلام ثاني ..
\
:
فـ شقه من احد شقق الفسوق جالس على احد الكنبات وهي جنبه يتابع وياها الموضوع وركبه مية شيطان لما عرف انها فضحت الموضوع ..
خالد : انتي الحين من امرك انك تقوليلها انك من طرفي؟
نهى بدلع : خلودي حياتي بالعكس هذا شي بيخوفها وييسر علينا الموضوع..
خالد: عند بابا ياماما ،، تحسبينها من اشكالك تفرح بالصيده لاحياتي انتي كذا خربتي الموضوع من اوله لتاليه !!
نهى تنحني عليه: لاحبيبي لاتتشاءم انا قد مره خيبت ظنك ؟؟
خالد بكبر: لااا
نهى : اوكي خلاص خلها علي وبجيب راسها وان ماقدرت عليها بقدر على نايف انت ماتبيهم يفرحون ببعض صح .. خلاص مالك إلا اللي يسرك ..
خالد مبتسم ويلمسها بجور: بنشوف !!!
\
:
اليوم اللي بعده ،، يوم الخميس بالتحديد الساعه 4 العصر ..
دخلت على حياة وحصلتها مستلقيه على السرير تقرا قرآن وللأمطار حكايه على خد الطهر ..
جلست جنبها ولمتها بذراعها الأيمن .. ابتسمت لها حياة بتعب وسكرت المصحف وخبت وجهها بكفينها وراحت فنوبة مقطعه من البكاء اللاااشعوري .. ضمتها خالتها وخلتها تصيح على راحتها وحياة منقطعه في نوبتها .. تبكي الوجع وتبكي الظلم ،، شهقاتها تطلع جاره وراها الف آهه والف جرح عيا يداويها الزمان .. تدثرت بصدر خالتها كنها تستقي الأمان من هالصدر الحنون وهالقلب الرحوم اللي دومه يرويها ويسقيها كل ماضاقت بها الدنيا .. شمت فيها ريحة امها اللي راحت وخلتها بدنيا ماترحم .. حست بحاجتها لقلبها ولروحها ولنفسها .. اندفنت اكثر وتعمقت اكثر وزادت شهقاتها اكثر ..
أبعدتها خالتها بحنان ومسحت دموعها بكفينها الحنونه وقالت لها بحب أكبر من كل شي: حبيبتي خلاص الموضوع منحل منحل ..
حياة بصوت متقطع : وين منحل ياخاله هذي عيت تتركني فحالي والله مدري وش مسويتبها حرام عليها هذي ماتخاف ربها تتبلا على خلق الله ..
ام نايف تستدرج: انتي عارفه انها ماتخاف منه ولاكان ماسوت بلاويها كلها !!
حياة بألم : والله ياخاله كل شي يهون إلا سالفة اليوم حسبي الله عليها ضاقت عليها البلاوي كلها وجات تتهمني مع سلقه من سلقاتها !!
ام نايف بذهول مخفي بعد مادخل الموضوع فمخها وترجمه على ان فيه سالفة شرف وتقول : انتي ماعليك انا بسنع الموضوع انتي لاتحاتين ..
حياة بوجع : خلاص خاله انتهى الموضوع ،، البنت تنازلت يازعم انها طيبه وقالوا بنستر عليك وبنكتفي بلفت النظر والنقل التأديبي ..
ام نايف بهدوء: يقالها طيبه الحين !! ياالللااا كون فيه خيره هالنقل تفتكين منها ومن شرها أما السالفه مب معديه كذا على خير إذا ماوقفناها عند حدها الله يستر وش بعد بتسوي !!
حياة: خاله تكفين لاتقولين لحد خلي ملكة مهور تعدي على خير..
ام نايف : لاحياتي ولايهمك انا اللي بلاحي الموضوع بنفسي .. لاتحاتين حبيتي..
حياة : اهم شي عمي مايدري
ام نايف : لااا ولايهمك
حياة: بس نفسي اعرف وش ذاالكره كله ؟!!
ام نايف: النقص ياحياة وش تقولين فيه !
حياة: لاااجد خالتي احنا نعرف من زمان انها تكرهكم انتي وامي الله يبيح منها لكن مانعرف وش السبب !!
ام نايف : السالفه ومافيها عشان عمك سالم كان بياخذني لكن سالم كان يعرف ابوها اللي كان يشتغل عند ابوك الله يرحمه وتزوجها بإلحاح منه وهي لما درت إني كنت باخذه صارت تكرهني كره العمى وتكره امك عشانها اختي وكرهت خالتي عشانها كانت تميل لنا اكثر منها .. حتى بعد ماتزوجت عمك عبدالله بعد الكره والحقد باقي ومتأصل ... مَره ناقصه بمعنى الكلمه .. يعني انا تزوجت وهي تزوجت وجونا العيال وكلن راح فحاله لكن هي لازالت محتفظه بالزمان الأول ..
حياة متفاجأه : الله لهالدرجه يعني هي ماعندها ثقه فنفسها ولاشلون !!
ام نايف تقوم تبي تطلع : الله يعافينا مما ابتلاها .. ومثل ماقلتلك السالفه خليها ورا ظهرك اليوم بكره بالكثير تكون منحله ..
\
:
بعد المغرب دق على سلطان وقاله يمره البيت عشان يروح معاه المشوار يجسره شوي .. دخل تحمم ولبس الثوب والشماغ وتعطر ووطلع من غرفته عشان ينتظره برا ..
قابل جدته اللي كانت جالسه تقرا مايدتها بعد الصلاه ..
دنق على راسها وقالها : ادعيلي يمه بروح مشوار فيه الحياه والموت..
طالعته بخوف : ياكافي الشر وش موته ترى مانيب عايفتك ياوليدي يكفي ابوك ..
محمد يبتسم بحب: جعلني فداك ادعيلي وبس وبرجعلك إن ربي كتبلي رجعه..
أم راشد تقول بريبه : الله يوفقك ياوليدي ويكتبلك اللي فيه الخير ويسخرلك مابين السموات والأرض..
ويطرق سلطان برا ويسمعه محمد ويروح يبي يطلع ويقول: الله كريم واجلسي ادعيلي زي ذاالدعوات لين اجيك طيب ..
ويطلع ويسكر الباب وعيون ظناها الشوق والحب والحنين تقول بهمس : جعل ملايكة الرحمن تباريك .. الله يحفظك وياقاك ياامك ..
\
:
" تعرف وين بيت عمك سالم "
قالتها ان نايف لولدها بهدووء وسكتت تنتظره يجاوب ..
نايف منصدم وبدهشه يقول: ليه ؟!!
ام نايف: من غير ليه تعرفه ولالا ؟؟
نايف بذهول: كني اذكره بس مب متأكد
ام نايف: خلاص بروح اجيب عباتي وابيك توديني له ووالله لحد يدري اني اريحه لاني امك ولاني اعرفك ..
نايف يرفع حاجب: تقولينه صادقه !!
ام نايف: لا امزح معك .. ايه اقوله صادقه ولاتسألني ليه وماليه سالفه كان من زمان تتم وبتم اليوم إن شاء الله ..
\
:
يتبع
":":":":":":":":"
" عندما تحيك الفرحه مساحات أقنعه "
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
﴿ الجزء السادس عشر ﴾
.
.
الليالي ماأعترضها هم قاسي
ولاعرفها قلب ناسي
وكنا حنا أهل هذيك القلوب
كنا نستغرب ..!!
وضوح الحزن في بعض العيون ..
كنا نتساءل عن أسبابه.. ياترى وش جابه !!
ليــن دارت هـ الليالي .. وذوقتنا مرها من بعد حالي
آآآه .. ياما علمتنا هـ الليالي ..
علمتنا كيف نبكي .. كيف نشكي ..
كيف نحكي عن ليالينا القديمه .. عن ذكريات حميمه ..
كنها ماضي دفيــــن ..
عودتنا هـ الليالي على السكوت ،،
عودتنا لما نحزن .. لما نهتم ..
مانبــوح !!
يكفينا السكوت ..!؛!
علمتنا لما نلقى لحظه حلوه .. مانخليها تفــوت .؛.
جننتنا هـ الليالي ..
صرنا منها في ذهول .؛.
إن صبرنا وإلتزمنا بما نقول ،،
أو جزعنا ورحنا ندور عن حلول ،،
كلها صارت سوا ..
كلها صارت خوا ..
دوم والله متعبتنا .. هـ الليالي
ومذوقتنا مرها من بعد حالي
.. وفي النهايه ..
أعترف .؛.؛.
علمتني هـ الليالي كيف أقسى ..كيف أنسى ..
علمتني كيف أحن .. وكيف ألين
علمتني كيف أصبر لما يزداد الأنين ..
لما يشتد الحنيـن .. لـ شخص غالي .. بس غايب..
وصار شوفه مستحيل ..
وهذا يعني ..
علمتني هـ الليالي
كيف أرضى
بالرحيـ ـ ـ ـ ـ ـل .. **
:
:
دخلوا حي قديم وفوضوي شوي فيه البيوت عتيقه وتشربت من الزمان حد الإكتفاء والشوارع فاضت منها الدنيا ..
وبعد فرفره عشر دقايق وصلوا عند البيت المقصود ..
فقال سلطان : متأكد انه هذا ؟
محمد: ايه على وصفهم هذا هو ..
سلطان يطفي السياره: طيب ياللاا نزلنا..
محمد متردد: اخاف يفشلنا يقول جاييني بزارين..
سلطان يبتسم : المرجله مرجلة عقل مب مرجلة سن ..
محمد : ليته يدري..
سلطان يفتح الباب وينزل: يارجال تعوذ من ابليس ومب صاير الا اللي ربي كاتبه ..
وينزلون ثنينهم ويوجهون يم الباب .. ويدق سلطان الباب ويصد هو ومحمد لين سمعوا صوت الباب ينفتح وجاهم صوت رجال معتق بالزمن يقول : مرحبا..
ويلتفتوله ويسلمون عليه ويحبون راسه ويقول سلطان : طال عمرك هذا بيت ابوناصر ؟
الشايب: وصلتوا حياكم الله تفضلوا ..
ويدخلون العيال ويجلسهم في دكه متصدعه الأنحاء مرتفعه عن الأرض شوي ويحوطها النخل شامخ وقدامها بخطوتين بيت صغير تضاريسه بالكاد باينه ينم عن الحاله الكسيفه للي ساكنين بين انحائه.. ويدخل ابوناصر داخل البيت ويرجع يرحب بهم ويجلس ..
ابو ناصر: حيااالله عيالي..
محمد بابتسامة مرتابه : الله يبقيك شلونك ياعم عساك بخير ؟؟
ابو ناصر: بخير يامال الخير..
محمد: شلون عجوزك عساها طيبه؟؟
ابو ناصر مبتسم : عجوزي فنت الله يغفرلها ويرحمها مات ولدها ولحقته بعد شهرين توجدت جعل كل هبوب تهب عليها جنه ..
وشهق محمد شهقه كتمها بسرعه وغمض يحاول يداري صدمته وعبرته الي كادت تنذر بالخذلان ..
وقال سلطان فهاللحظه يقطع الموقف: هامن اللي جالس معك الحين نفداك؟!!
ابوناصر: ماغير انا وبنيت وليدي جعلني ماخلا منها ..
شوي إلا جاهم صوت دق من داخل البيت ..قام ابوناصر ورجعلهم بصينية القهوه والقدوع ،،
تقهوواا وسوالف تتخلل الإرتشاف وابو ناصر لألحين مايدري منهم !!
بعد القهوه قام يبي يجيب الشاهي لوما حلفوا عليه العيال انهم مايذوقونه إلا بعد مايسمع وش عندهم .. رجع مكانه وجلس بثقل ..
وقال سلطان : يااابو ناصر جايينك اليوم طلاّب وغايتنا ماتردنا خايبين
ابوناصر بفخر زاهي : ابشروا بعزكم وانا ابو ناصر..كان حاجتكم عندي فعز الله ماتطلعون وفخطركم شي..
محمد: طبعا انت ماتعرف من احنا وانا داري لقولك من انا بتطردني على طول لكن طال عمرك ابيك تسمع السالفه زين وترى العفو من سلوم الرجاجيل ..
وسكت ابوناصر كنه فهم وش المراد .. والتزم السكون ينتظرهم يحكون ..
ويناظر سلطان محمد يشجعه على الكلام ..
محمد: انا يطولي بعمرك محمد بن راشد ولد راشد خوي ولدك ناصر الله يغفرله ويبيح منه ..
ابو ناصر بشده يقاطعه: قصدك ذبّاح ولدي ناصر !!
محمد: والله ثم والله ان ابوي بري من دمه مثل براءة الذيب من دم يوسف
ابوناصر يوقف مقاطع للمره الثانيه كنه عرف المغزى: كانكم تبون العفو فأنا ناذر ماتقرلي عين لين اشوف دمه سايلن قدام عيني فلا تتعبون عماركم والله يستر علينا وعليكم لو دفعتوا ملايين الدنيا كلها ماتعوضني عن حياة ولدي ..
ويوقفون العيال قدامه ويقرب منه سلطان ويجلسه ويقول: ابشر نفداك والله ان تشوف دم قاتله سايلن قدامك لكن ماهقى انك بترضى تزهق نفس بريه !!
ابوناصر : لااله إلا الله .. وين بري منه والكل شايفه عنده وهو بنفسه اللي قال انه ذبحه !!
محمد: صدقت طال عمرك لكن ابوي شال ذنب غيره ،، فهاد هو اللي ذبحه وهو شالها عنه
ابوناصر: ماظن عليه قِل صِح !!
محمد: عاد انتخابه وصار اللي صار.
ابوناصر: مانيب مجنون اصدق !!
محمد شوي وتدمع عينه يقول بترجي: ياعم العفو عند المقدره وترى الرسول عليه الصلاة والسلام عفا ..
ابوناصريغلي : مانيب الرسول ..
سلطان يفحمه: لكنك تسير على درب الرسول !!
ابوناصر يوقف معصب ويقفي منهم معلن إنتهاء النقاش وانتهاء المقابله بأكملها ويقول وهو ملقيهم ظهره: البيت بيتكم يامرحبا ويامسهلا ..
ويدخل ويخليهم يتخبطون برا .. قاموا وثقل على قلوبهم ... ومحمد مثل ماتوقع محاوله باءت بالفشل وأمل بائس تغلغل فـ قلبه .. ركبوا السياره ومضوا في طريقهم والصمت ملازمه ومحاولات من سلطان لإقناعه بعدم اليأس والقنوط من رحمة الله ..
اما فالبيت المثقل بالحزن .. بعد مادخل حصل بنت ولده " ساره" قاعده تتسمع من ورا الباب وش قاعدين يقولون شافته واستحت وجلست جنبه بعد ماناظرها وجلس ..
وقالت : والله مب عادتي اتسمع بس شفت صوتكم علا وجيت اسمع وش فيكم ..
ويسكت جدها شوي يحاول يهدأ ثم يقول: يحسبون دمه رخيص !!
ساره: لاتلومه يبه ترى بعد اهو دم ابوه مب رخيص !
ابوناصر: الا يستاهل ماسوا سواته الا وهو بايعن نفسه ...
ساره بحنيه: يبه سألتك بالله انت مقتنع ان ابو محمد هو اللي قتل ابوي ؟؟!!
ابوناصر:......
ساره: تهقى ولدك بيذبح اخوه ؟؟!!
يتبع ...
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك