رواية ولد الفقر وبنت الهوامير -2
مسكينه شكلها طيبه مره الله يكون بعونها عند جدتها كيف بيكون مستقبلها ومين اللي يصرف عليهم
وراح فيها ولا شاف الا الساعه 4 واخيرا نام
وصحى الصباح وشاف رساله من نوره
((تصدق وربي ارتحت لك بس تكفى خلك على الوعد الى قلت لك))
رد نايف
(ولايهمك يالله انا رايح الدوام)
وصارت العلاقه بينهم كلها رسايل برسايل فقط
رسائل سواليف ونكت واستهبال ويخشون بموضوع ويطلعون بموضوع
الى ان دامت علاقتهم 6 اشهر وهم على الرسايل
الى ان جاءت المفاجئه !!!!!
لا احلل مسح اسمي من على الرواية ..
تجميعي : ♫ معزوفة حنين ♫..
نوره: الو
نايف : مرحبا
نوره: كيفك عاش من سمع صوتك
نايف : دقيقة صمت
تمام كيفك عاشت ايامك >>غصب قالها
نوره : اوكى نايف حبيت اسمع صوتك نكمل السواليف بالرسايل
نايف: خليك معى شوى <<اول مره يسمع صوت بنت
نوره : اوكى
راحت السواليف بسرعه كلها سواليف عاديه بس كانت روعه والاجمل من السواليف ان كل طرف ينظر للطرف الثانى بنظرف شفقه واخوه وهذا اللى كان مخلى كل طرف يهتم بالثاني
جاء الليل
وارسل نايف رساله
نوره سبق وكلمتى شباب او احد كلمك ؟؟
سؤاله كان عفوي وكان مستغرب من اسلوبها
نوره ترد
والله العظيم انك اول واحد اكلمه ولعلمك انا الوحيده في العائله وبين صديقاتى كلهم اللى تراسل وتكلم ومعك بس وربي
نايف: ارتاح وفي نفس الوقت يأنبه ضميره
ارسل رساله
طيب يانوره ماابي اخربك واحمل نفسي ذنوب واحمل ذنب حنا في غنى عنها ايش رايك نقطع بعض
نوره : ترد برساله
ادرى والله انه طريق حرام واوعدك نتوب بس خلك معى هالفتره بس تكفى
نايف محتار يخليها لانه يخاف من الله وفي نفس الوقت لقى انسانه يستانس معها ويعاملها كانها اخته فجلس يضبط لنفسه ^_^ ويقول دامنا مانتكلم بالحرام ولانسوى شي غلط عادى
نايف:اوكى ولايهمك
استمرت علاقتهم سنه زياده اجمل مافي علاقتهم ان مافيه احد يدرى عن علاقته بنوره حتى اقرب الناس له محمد واحمد ونوره نفس الكلام
فكانت علاقتهم خااصه جدا معا انها كانت يوميا رسائل وفي الاسبوع مكالمه فقط
وسواليفهم دائما لاتتعدى الخطوط الحمراء مثل سواليف الاخ مع اخته
اخيرا قرر نايف يدخل مع اكبر باب للخطوط الحمراء وارسل رساله لنوره
الرساله: مساء الورد نوره ابي اخطبك وايش رايك
نوره : دقيقة صمت واستغراب وتحولت العلاقه من دلع الى جد علما انها كانت تحبه جدا
ترد عليه : اهلين يانايف بكلمك
نايف : اوكى
ويدق عليها نايف بسرعه
نايف : سلام
نوره وعليكم السلام
نايف: وشفيك ليش سؤالي فيه شي
نوره : تسكت شوى وترد يانايف وربي انى اموت فيك واعزك واقدرك واتمناك اليوم قبل بكره بس ماتوقع اهلى يوافقون مستحيل مره
نايف: وانا بعد شعور متبادل وربي طيب بجرب واشوف ماتقولين اول انك يتيمه وماعندك احد
نوره: مستحيل يعنى مستحيل وتقفل الجوال
نايف: الو الو استغرب وجلس يفكر يعنى الشغله ماغير طقطقه يانوره
نوره قفلت الجوال وجلست تبكي فتحت على نفسها الف باب هى في غنى عنها وجالسه تفكر اولا اسوى شي حرام ثانيا حبيت واحد مو من مستوانا ثالثا علقته فينى وهو مو ناقص هموم يكفيه انه يتيم
جلست الليل كله تبكي الين وصلتها رساله من نايف
الرساله : الله يسامحك يانوره وانسي اللى صار واللى بينى وبينك انتهى
نوره : ترد بسرعه برساله
يانايف لاتخلينى تكفى ووعد اعلمك بكل شي
نايف رجع يدق ولاترد يبي يعرف وش كل شي الفضول عنده شغال وبعد محاولات فاشله
نام وكانت اخس نومه عرفها في حياته
المشكله ان الحب نساه هم وضعه ونساه حياته كلها واصبح الحب اكبر هم ومصدر السعاده والحزن له
اغليه واظن قلبه حيل يغلينى ==ومن حب باقول كان الله في عونه
انقطع من نوره تقريبا اسبوع كانت كانها سنه كان متعمد مايرسل ولايدق وهى نفس الوضع مادقت ولا ارسلت
بعد اسبوع ارسلت رساله طويله تعلمه بكل شي اسمها وعنوانها وانها اللى حطت الرقم بالسياره يعنى من طقطق الى السلام عليكم وفي نهاية الرساله تقول عرفت الحين ليش قلت مستحيل ؟
قرى الرساله نايف مره ومرتين وثلاث
وارسل لها رساله : اوكى عرفتك وعرفتينى اوكى تحبينى ولا لا ولو وافق ابوك توفقي ولا لا
تقرا الرساله نوره وتقولى بقلبها مستحيل يوافق ابوي
وارسلت رساله: وربي احبك واتمناك زوجى يانايف ولي الشرف وانا موافقه بس ابوى مستحيل يوافق واخوانى والاهل كلهم
عرف نايف السبب واهم سبب الوضع المادى مافيه 1% مقارنه بينهم اما من ناحية النسب فكان نسبهم يشرف
ارسل رساله لنوره: اوكى انسي الموضوع انا طالع الحين
طلع نايف وجلس يفكر وش الحل وش يسوى يقطع العلاقه مستحيل يخطب البنت مستحيل يكمل معها زيادة الطين بله والمشكله مايقدر يشكى لاحد
اخيرا قرر يرسل جدته تشوف نوره وتجس النبض وعلم جدته قال لها يمه ابي اخطب بنتهم نوره
الجده : ياوليدي ماتنفع لك عاداتهم وتقاليدهم غير عنا وش تبي فيهم
نايف : يمه انتى شوفيها واجلسي معهم وماعليك
الجده : تونى عندهم قبل اسبوع اعرفهم زين وبنتهم دلوعه حيل بلبسها وكلامها ماتنفع لك مره
نايف : استغرب كيف تعامل نوره معه وبين طبعها مع اهلها واللى يعرفها وقال لامه اوكى تكفين روحى لهم بكره وشوفيها ثانى مره يمكن تغيرت
الجده : ههههههه تغيرت في اسبوع ولايهمك انا رايحه لهم هاليومين وارد لك خبر
نايف: عسانى مانحرم منك يمه ويبوسها على راسها ويطلع
ويشوف جده برى ويلمح له ونفس الكلام يقول جده هذولا ناس لهم عادات وطبايع وتقاليد ماشين عليها غير عنا وتلقى الصغار والكبار نفس بعض ابعد عنهم والواحد يناظر على قده
نايف : يبوس راس جده ويطلع المزرعه
واخذ عهد على نفسه يسوى المستحيل ومايفقد الامل مهما كانت الصعوبات
وتجيه رساله من نوره
وينك يانايف اخبارك وعلومك
نايف يقرى الرساله ويضحك
ويرد : اهلين يانوره انا تمام الله يسلمك وربي انك على البال وين مااروح
نوره: ياليت يانايف نرجع مثل اول وتبعد فكرة الزواج تكفى عشانى
نايف: من عيونى بس انا اخذت على نفسي عهد اسوى اللى اقدر عليه
نوره : اوكى بس خلنا نسولف وابعد فكرة الزواج
نايف : اوكى
ورجع الوضع طبيعي نفس اول ومر اسبوع شهر شهرين وفي الاخير
لا احلل مسح اسمي من على الرواية ..
تجميعي : ♫ معزوفة حنين ♫..
وبالاخير قرر نايف يخطبها
وكلم ابوه (جده) جده كان غاسل يده منهم بس مايبي يخليها بخاطر نايف وقال ولايهمك اليوم نروح لهم ونشوف
راحوا بعد صلاة العشاء وكانت النتيجه متوقعه بالرفض جمله وتفصيل حتى مافيه كلمة نفكر ونرد لكم خبر او مجرد تفكير بنفس الوقت
خرج نايف وهو مكسور الخاطر وجده يقول انا قايلك بس ماسمعت كلامى احرجت نفسك على الفاضي
نايف تذكر المثل اللى يقول من اجل تكرم مدينه ومافقد الامل
كلم نوره وعلمها واستغرب ان ابوها حتى ماعلمهم ولا قال لهم شي قال بحاول ثانى مره وثالث مره
نوره كانت تدرى ان ابوها ماكان وافق وفي نفس الوقت ماتبي نايف يتركها لانها تحبه
دارت الايام وراح نايف لابو نوره القصر ودار بينهم هالكلام كان خايف ومرتبك في البدايه
نايف: كيف حالك يبو فهد (ابو نوره)
ابو نوره: تمام اخبارك واخبار ابوك
نايف : الله يسلمك حنا بخير والامور تمام <<مسوى اخلاق
ابو نوره : وش مسوى عساك مرتاح ماشوفك تجى مع ابوك
نايف : ابشرك طيب و متوظف بشركه وبالنسبه للجيات مع ابوى ماعندى فرصه وتعرف شغل الشركات
ودارت بينهم سواليف ابو نوره شاف اسلوب نايف وشاف الرزانه وعقليته مو مثل الشباب اللى بعمره واعجب فيه
وبعدها فتح الموضوع نايف
وقال انا جيتك اول مره ومعاي ابوى وخطبنا بنتك ورفضت والحين جيتك وابي اخطب بنتك
اذا كان فيه سبب غير الفلوس معاك حق واذا مافيه .. ابو نوره قطع كلامه وقال : يانايف افهم الزواج عندنا له تقاليد وشروط وله عواقب كثيره ماتعرفها وبنتى ماراح تتحمل عيشتكم وبكسب فيها ذنب
روح واخطب اي بنت وانا اتكفل بزواجك كامل
قال نايف: يبو نوره الفلوس تروح وتجى والفلوس ماتغير الا اللئام وانت كريم وانشاء الله ماغيرتك الفلوس <<يسلك له
ابو نوره : انت وش تبي بنسبنا لاتعرفنا ولا تعرف عاداتنا وطبايعنا وعيشتنا
نايف: وانا وش ابي فيها اللى ابيه بنتكم تعيش معنا معززه مكرمه وانت خذ رايها لاتقطع نصيبها على شان عادات وتقاليد ماامر فيها الاسلام
ابو نوره :انشاء الله خير برد لك خبر خلال اسبوع
وطلع نايف من عنده مستانس على الاقل فيه تجاوب معه وهو طالع من الباب سمع صوت يناديه ومو متاكد من الصوت بس مالتفت لايمين ولايسار
بعدها جاته رساله من نوره :ليش ماوقفت كنت ابي اشوفك
نايف : يقرها ويضحك ::ويرد عليها:: انتى فاضيه من جد
نوره : طيب وش صار معك
نايف: الامور تمام وابوك تجاوب معى وقال بيرد لي خبر تكفين يانوره حاولى تكونى قريبه من ابوك لاتخليه يفكر ويقرر لحاله
نوره: من عيونى والله يكتب اللى فيه خير انتبه على نفسك
نوره استانست مره وماتدرى وش تسوى وتدعى ان الله يتمم على خير
في العصر كانت عائلة نوره جالسين كلهم فتح الموضوع ابو نوره وقال لهم السالفه وش رايكم
الام قالت : وين نودى وجيهنا من الناس وش بيقولون الناس
فهد: يبه اقصر الموضوع وخل الولد يشوف له ناس على قدهم
نوره تسمع كلام اهلها وتبكي بدون شعور وتروح غرفتها
ابوها يناديها نوره تعالي
ويقول خلونى انا ونوره اطلعوا
ويسأل نوره : وشفيك يابنتى وش اللى مزعلك
نوره : يبه الولد امه كلمتنى اكثر من مره وتمدحه والولد فيه دين وطيب وكل شي فيه
ابوها : وانتى وش عرفك
نوره: شوف امه وبتحكم عليه مافيه اطيب منها واخلاقها عاليه ومحترمه ودائما تمدحه
ابو نوره : طيب يابنتى هذولا غير عنا بكل شي شوفي حالتهم وماراح تصبرين معه شهر
نوره: يبه وشفيها حالتهم ساترين انفسهم وعايشين حالهم حالنا عمرك سمعت عنهم شي غير الفقر اللى هم فيه وفقرهم مو مثل اول
ابو نوره : خلينى اسال عنه ويصير خير
نوره : اوكى بس وانت تسال عنه شوف فيه احد من الجماعه مثله
ابو نوره : يبتسم لانه يعرف شباب اللى بعمره ومن جماعته داجين واخر همهم الزواج وتحمل المسؤوليه
بعد فتره وبعد ماسال عنه ابو نوره كانت النتائج طيبه طلع الولد راعي صلاه وعاقل ومواظب على دوامه وسمعته طيبه
وفي الاخير وافق بس بشروط
نوره : من الفرحه ارسلت لنايف تقريبا 50 رساله كلها احبك للابد
ونايف سمع الخبر وكأنه مثل الحلم بغى يغمى عليه من الفرحه بس ماقالت له الشروط لان الشروط كانت من امها
والشروط يسكنها في بيت غير بيتهم وثانى شرط يكون حفل الزواج بقاعه كبيره والمهر 100الف غالي والذهب يعنى شروط صعبه
سمع الشروط نايف وقال جمله المعوفه من اجل عين تكرم مدينه
اتصل عليه ابو نوره وخلاه يجى ومعاه ابوه وعلمه بالشروط ووافق نايف وجده كان اكثر المتفائلين رغم وضعهم المادي السيئ
طلع نايف وقال لجده لاتشيل هم يبه ماتضيق الا وتفرج
قال جده :اكيد وانا ابوك والله يكون بعونك
مر تقريبا شهر كان من اجمل ايام العمر لنايف ونوره يكفيهم ان حبهم اصبح شريف وغايته الزواج فكان هالشي مصدر تفائل وسعاده لاتوصف
وبعد هالشهر جاء اتصال مفاجئ واتصال جاء بوقته
اتصال من القاعده الجويه بقبول نايف فيها
ابتسم الحظ لنايف وماخلا احد الا وعلمه من الفرحه رواتبها عاليه ويقدر يرتب اموره كامله
تقدم وطابق اوراقه وتوضف وبعد شهرين سحب قرض مبلغ 100 الف
وراح لابوه(لجده) وقال نبي نخطب نوره ونسوى الملكه
وبالفعل راح ومعه ابوه وخطب نوره وانتهت وحددو الملكه وكانت الامور على احسن حال
وظيفة نايف كانت الدافع المعنوى تخليه يتكلم معهم وهو رافع راسه
بعدها بدا نايف يبنى بيت في المزرعه كبير لهم
ورجعت الامور بعد الخطوبه للعاده القديمه رسايل وسواليف مع نوره كانت متعة الرسايل و المكالمات حاليا احلى بكثير من قبل لدرجة ان السواليف تغيرت للمستقبل
كان حبهم طاهر وسامى بعيد عن المصالح وعن التجاوزات في المحضور وبحكم الاختلافات بينهم في التربيه الا ان صفاتهم الاساسيه كانت مستركه
بعد فتره تقريبا شهرين تم تحديد افراد من القاعده الجويه للعمل في الشرقيه وكان نايف من من اللى طلع اسمه يروح الشرقيه
بس قبل يروح علم نوره يبي يستعجل على الملكه وكلم ابوه وامه تكلمهم يحددون يوم ملكه وصارت الامور تمام تم تقديم الملكه وحجز القاعه وتم ترتيب الامور بسرعه
وكانت الملكه في قاعة افراح كانه زواج نايف كان يبغاها مختصره بس اهل نوره رفضوا وقالوا عاداتنا كذا لازم نسوى كذا
كلم نايف وابوه قرايبهم واصحابه وعلمهم
واهل نوره بكل تاكيد كلموا قرايبهم الهوامير خصوصا ان ابو نوره كان له منصب وكلهم يحبونهم ^_^ هذا من غير فلوسه ومكانته الاجتماعيه
المهم صارت الملكه في اليوم المحدد
نايف ماكان يهتم بجماعه نورة ويجاملهم حتى اخوها فهد في الملكه اسلوبهم وسواليفهم ماكانت تعجب نايف مهما وصل من مواصيل يبقى الفرق بينهم كبير
المهم انها انتهت مراسيم الملكه بنجاح من جهة نايف ونوره ومافيه اسعد منهم على وجه الارض
بس نايف ماكان يدري ان جماعة نوره كانوا متضايقين مره لدرجه ان بعضهم يقول
شكل هالولد سحر ابو فهد والبعض يقول هذا الزواج مارتحت له وحاس فيه شي واللى يقول لو لاحضتوا كيف ابو فهد مستحى مره وكان كلامهم كله حش بحش وكله اوهام وحسد
ومع تجمعهم والقال والقيل نادوا فهد وجلسوا يعبون راسه انت ليش توافق وهذا شكله سوى شي في ابوك ومن هالكلام لدرجة ان فهد صار معهم
وكلموا ابو فهد وقالوا له خل الولد يفسخ الملكه حرام عليك لاتظلم بنتك
البنت صغيره وماتعرف مصلحتها وانت المسؤول وكل هالكلام ونايف ونوره مايدرون عن شي
حتى بعضهم من الحسد والتكبر راح يشوف بيت نايف وكيف عيشتهم ويبغى يسأل عنهم وجلس يضبط اي شي سلبي على شان يقوله لابو فهد بس مالقى شي غير الفقر اللى كان واضح في مزرعتهم وبيتهم
وفيه بعد شخص كان يبغى يتزوج نوره وكان موظف ومستواه فوق الممتاز وكان ابو هالولد يقول رجع لهم فلوسهم وهذا ولدى جاهز لاتحرج نفسك ولاتهدم مكانتك يبو فهد
كان الضغط على ابو فهد من الرجال والحريم بس اللى كان يمنعه لما يشوف نوره مبسوطه يقول اكسر خاطرها على شان اجاملهم فكان هالشي حاجز وماوضحه لهم
لا احلل مسح اسمي من على الرواية ..
تجميعي : ♫ معزوفة حنين ♫..
نايف سافر الشرقيه وكان ينزل الرياض في الاسبوعين 4 ايام وكل مانزل تقوله نوره يجي بيتهم بس يرفض لانه كان يستحى ومو متعود فكانت علاقته بنوره جوال وهدايا من بعيد وكان في نفس الوقت يبنى البيت
والشي الاخر كان اذا نزل الرياض يطلع جده وجدته يمشيهم ويوصلهم قرايبهم فكان يقضي الاجازه مع الاهل حتى محمد واحمد اصدقاء الطفوله كان تواصله معهم جوال او نادرا يشوفهم
نايف كان يسابق الوقت وكان يفكر اذا ضبط وضعه المادى وتزوج يجيب نوره معاه في الشرقيه لانه سبق وكلم جده ورفض جده قال مستحيل نطلع من الرياض
استمر نايف بوظيفته راح من الوقت الى حد الان تقريبا 8 اشهر ونايف باقي مايدري هو يكمل البيت او يسدد القرض او يساعد اهله او مصاريف له كانت علية مسؤولايات هى السبب في تاخير زواجه
الى ان جاء يوم وسمعت نوره بعض الكلام من الخدامه ان امها تكلمت مع ابوها يحاولون يدورون طريقه وتاكدت نوره لان امها دائما تسالها نايف وش سوى وزى كذا كانت تسأل عنه وكأنها مهتمه
وكلمت نوره نايف
نوره: سلام يانايف
نايف: وعليكم السلام ياهلا والله غريبه داقه اخر الليل
نوره: ابد عندى اختبار وقلت اسمع صوتك اخبارك وعلومك
نايف: تمام الله يسلمك اخبارك انتى ......نوره : طيبه
ويخش نايف بخشاته الخنفشاريه
نايف : اقول نونو وش هالرسايل انتى وفيسك ترينى حفظت غرفتك هههههههههه
نوره : ههههههههههههههههه باقي البيت كله بكره <<كانت تحب التصوير مره
وبعد سواليف وضحك نوره تبي تخش بالموضوع بس مالقت فرصه الا لما قال نايف
الشهر الجاي الزواج تجهزى كان يمزح
قالت نوره : تكفى بسرعه
نايف : استغرب وين نوره الحياويه قال ليش فيه شي
نوره : لا بس تكفى ترانى سمعت كلام بس مو متأكده
وتعلم نايف بالسالفه
نايف سكت وقال انشاء الله اسوى اللى اقدر عليه لاتشيلي هم
نوره : اترك البيت مو مشكله والمهر اقدر اساعدك فيه
نايف : يانوره الشغله مو المهر بس الحين ورانا قاعدة افراح وذهب وهدايا وشهر العسل والتزامات ثانيه يعنى يبغالنا اقل شي 200 الف ولا معاي الحين الا 70 الف انشاء الله ماتنتهى السنه هذي الا وانا مرتب كل شي
فليها لبى روحك ولاتشيلي هم
ويغير الموضوع ويسألها عن الاختبارات وسواليف وقفل نايف وقبل ينام
جلس يفكر ويقول يلعن ابو الحب كيف ينسيك همومك كلها ويشغل بالك فكر ياخذ قرض ثانى ويستعجل بس خاف يبنى حياته كلها ديون بديون بعدها نام بعد تفكير طويل
ولما جاء الصباح كلم خويه وقال خويه ياشيخ خذ قرض ثانى كلنا عايشين على القروض ويمديك تسددهم على هونك
وبالفعل انطلق نايف بعد الدوام وطلب قرض ثانى ووافق البنك واخذ اجازه وراح الرياض ولما نزل الرياض وصل الخبر لابو نوره وماعرف كيف ياخر الزواج
كلم شخص يكلم المدير بالقاعده الجويه وقال له عندكم دورات خارجيه ومتى وكم اطول دوره
وكانت الدوره باقي عليها يومين ويسافرون فرنسا دورة عسكريه مدتها 6 اشهر
تم ترتيب الدوره ووضع اسم نايف معهم علما ان كانت هالدورات مايدخلها الواحد الا بواسطه بس ماكان حب في نايف بس كانوا يبغون يصرفونه
ولما وصل نايف الرياض من بكره تفاجا باتصال من الدوام يطلبونه يحضر ومعاه كل مايلزم لانها دورة خارجيه اعتذر وهدد بالفصل يقولون اذا ماحضرت اعتبر نفسك مفصول
راح نايف لابو نوره وقال له الوضع قال ابو نوره : الله يحفظك والزواج انشاء الله اذا رجعت لاتستعجل مستقبلك اهم
نايف ارتاح من كلام ابو نوره مايدري انه ورى هالامور كلها
وجات نوره وسلمت على نايف وكانت اول مره يشوفها لان في المكله كان مستحى ومرتبك وعطاها هديه بااسمها وكاتب فيها
فمان الله ياعشق ٍ تعلمته على يدك==وصار اجمل ليالي العمر في عينى وفي عينك
احبك نايف
نوره كانت مجهزه هديه على شكل درع وكاتبه فيها بيت شعر
سموك نايف وانت نايف على اسمك = عسى الولي يحفظك ياروح نوره
احبك للابد
قبل يطلع نوره جالسه تبكي وقال لها انتبهى على نفسك واذا طولت تعالى فرنسا وزواج بلا مهر وشروط وكلام فاضي
نوره :ههههههههههههه ودموعها على خدها لا انشاء الله ترجع بالسلامه
نايف: هههههههه انشاء الله بس هناك تعرفين فرنسا فلة وماحولك احد
نوره : ههههههههههههه اجل مستانس هاه
نايف :^_^ بقوه لا والله لبى عيونك لا مستانس ولاهم يحزنون وكيف استانس وانتى هنا وامى وابوى
نوره : ^_^ فديتك
نايف : انتبهى على نفسك واذا احتجتى اي شي كلمينى وتكفين استانسي وانشاء الله تروح 6 اشهر كانها شهر
نوره : من عيونى وانتبه على نفسك
و ينتهى الوداع كانه ثوانى
بعدها راح وجلس في بيتهم ويسولف مع امه وابوه ويعلمهم عن السفر ويسالونه وين فرنسا ومن اللى يسكن فيها ^_^ ويروح الليل كله سواليف ولانام الا مع الفجر
بعدها سافر مع الظهر وسافر والعبره بعيونه على فرقاهم على فراق اهله وفراق نوره شعور مايجربه الا اللي مر بهذي التجربه
وصل فرنسا من اليوم الثانى تغير الجو عليه والعالم واول مره يسافر للخارج وفوق هذا كله حس بفراق كبير لانه كان يوميا يكلم نوره ورسايل ولاول مره من يوم عرف نوره ينقطع عنها يومين
استمر على هذا الوضع شهر وماكان فيه فرصه يكلم نوره او جده وجدته بحكم الدورة كانت مغلقه
في بيت ابو نوره كانت الاوضاع متحركه وكانت تعرف نوره من الخدامه وش جالسين يسوون بس في نفس الوقت ماتعرف وش تسوى
الى ان جلست مع اهلها جلسه خاصه وبدا ابو نوره يتكلم
ابو نوره: يابنتى انا فكرت وتعبت من التفكير وانتى شايفه ابوك باخر عمره وخايف عليك ازوجك واحد واظلمك معه
نوره : في حالة صمت
ابو نوره : يابنتى خلى الولد يشوف له ناس على قده ماراح تعرفين مصلحتك اكثر منا
وتكلم ام نوره : يانوره ولد خالك اصرف لك من لحمك ودمك وراح يعزك وامه تقول انه يحبك
اخوها فهد : لاتشيلي هم الملكه حنا بنفسخها بطريقتنا
وخالها وعمتها وكلهم كانوا معارضين وكان تفكيرهم نفس التفكير
نوره : تصيح وش معنى ماتكلمتوا الا الحين ليش وافقتوا من البدايه
ابو نوره : يابنتى غلطه ونبي نصلحها
نوره : وهى تبكي هذي احلى غلطه يبه تكفى يبه
وتروح من عندهم وهى تبكي
يناديها ابوها ولاترد عليه وتروح غرفتها وتقفل عليها
ابوها كان يبي يغير رأيه بس اللى كان حواليه ام نوره وفهد اخوها وبعض القرايب قدرو يبعدون تفكيره وخلوه على كلامه الاول
بعدها بدت سواليفهم كيف يفسخون الملكه بدون مايعرف نايف وينهون كل شي قبل يرجع وبحكم علاقاتهم ومكانتهم يقدرون وباسرع وقت
بس فهد قال لهم انا بسافر باريس واخليه يوقع على ورقة الطلاق انتو بس قفلوا الموضوع واتفقوا مع فيصل يحدد يوم الخطوبه
كل هالامور استمرت تقريبا شهر
بعدها نايف كلم نوره من الشوق اللى فيه بغى يصيح من الفرحه بعكس نوره سمعت صوته وماعرفت تكبت مشاعرها كانت دموعها قريبه
وسواليف وضحك ويعلمها عن الدوره ووين ساكن من بداية السفر
نوره تبي تعلم نايف بس خايفه تعلمه ويسحب على الدوره ويضيع مستقبله وفي نفس الوقت ماتبي تسكت على شان لايزعل عليها ويقول ليش ماعلمتينى
في الاخير تقول نوره جمله عفويه
نوره : حبيبي ان فرقتنا الظروف ماراح انساك لين اموت
نايف : بعيد الشر عنك لبى عيونك وانشاء الله ماتفرقنا الظروف
كان يرد بعفويه مايدرى وش كانت تقصد
بعدها ينهى المكالمه وشعوره كان لايوصف من الفرحه بعدها يكلم جده ويسلم عليه وياخذ اخباره ويكلم امه ويسولف معها ويقفل
كان يوم سعيد على نايف
استمر نايف على هالوضع كل اسبوعين يكلمهم مكالمه طويله وياخذ اخبارهم
وبعد مرور 4 اشهر وقبل يطلع نايف من مقر الدوره كان ناوي يروح ويتصل نوره تفاجأ باتصال
نايف : الو
فهد : هلا نايف
نايف : ياهلا والله من انت ؟
فهد : اذا شفتنى بتعرفنى وينك ؟
ويعلمه وين مكانه ومرة ساعه الا وفهد وخاله موجودين عنده بالفندق
ويسلمون عليه وسواليف وضحك نايف تفاجأ من اسلوبهم واستانس مره وكانت هاليومين اجازه عند نايف من الدوره راحوا وغيرو جو وباليوم الثانى
فهد طلع ورقه بيضا
فهد : خذ يانايف نبيك توقع هنا
نايف : ليش سلامات
فهد : وش سلامات ههههه الوالد يبي يضبط نقلك الرياض بمجرد تنزل السعوديه تداوم بالرياض
خال فهد : شوف كيف النسب ولا بلاش
نايف : ههههههههه من بدري يرحم اهلك
ويسولفون وبعد ساعه يطلعون من عنده
في نفس اليوم اتصل نايف على نوره مقفل وكرر الاتصال 100مره نفس الكلام
فهد كان سارق جوال نوره على شان ماتعلمه وبدون ماتعرف وعطاها جوال جديد يقول انشاء الله اطلع شريحتك اذا رجعت من السفر
ورجع فهد وضبط الورقه على انها ورقة طلاق
وقال لنوره رحنا لنايف وقلنا له ولد خالها يحبها والقريب اولى من البعيد ووافق
نوره كانت في حالى صدمه ودخلت المستشفى اسبوع كامل وهى تبكي ومو مصدقه
وبعد خروج نوره حدد الخطوبه والملكه بيوم على شان يطلعون نوره من جو الحزن بحكم انها كانت دلوعه حيل والحب كان مستنزفها بالتفكير والسهر الا ان نايف اثر فيها كثير وهذا اللى كان مخلى طبعها مختلف عن اهلها
اتصل نايف على امه وقال لها تروح تشوف نوره وشفيها وبالفعل راحت جدته بس ماشافت نوره وسألت عنها وقالوا لها بالسوق
وكلم نايف ثانى مره وقالت جدته يقولون في السوق مافيها شي
بس كان قلبه ناغزه قال تكفين يمه بكره بعد روحى لهم بدق عليك بكره
وتروح جدته ويقولون لها طلعت الشاليه مع البنات
ويكلم نايف وتعلمه امه انها بالشاليه مع البنات نايف كان مستغرب معقوله نوره مبسوطه وسوق وشاليهات وماتكلم ولا تسأل عنه
مر تقريبا شهرين اللى كانت اخر ايام الدوره بدون مايسمع صوت نوره اويعرف اخبارها وكانت الشهرين كانها سنه
وقبل اخر يوم في الدوره كان مع نايف صديق فرنسي وكان يسولف معه ويرتاح له كثير ومعجب فيه وبصفاته واسلوبه معهم وكان يفضله على العرب
كان الفرنسي مستشار في الدوره وكان رجل اعمال متخصص في العطورات وسبق وقدم لنايف عرض يكون وكيل معتمد له بالسعوديه وعطاه عرض مغري ولكن نايف قال بفكر وارد لك خبر
نزل السعوديه وجايب معه الهدايا اشكال وانواع وفرحته لاتوصف بالرجوع مع انه كان خايف وحاس ان فيه شي
دخل البيت ولقى جده وجدته بانتظاره وسلم عليهم سلام ودموعهم بشوفت نايف كان غصب عنهم فهو الابن الوحيد وبار فيهم والعائل لهم بعد الله
بعد السلام والسواليف دخل نايف غرفته وشاف هدية نوره باقي في مكانها ناظر فيها ورجع يسأل جدته
نايف : يمه ماجاتك نوره ولا كلمت
الجده: انت غير ملابسك وارتاح وبالليل اعلمك كل شي
نايف : لا علمينى الحين فيها شي
الجده : لا والله مافيها شي بس بقول لك بعد ماترتاح
نايف : لا مرتاح علمينى ولا رحت لها البيت الحين
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك