رواية ولد الفقر وبنت الهوامير -3
نزل السعوديه وجايب معه الهدايا اشكال وانواع وفرحته لاتوصف بالرجوع مع انه كان خايف وحاس ان فيه شي
دخل البيت ولقى جده وجدته بانتظاره وسلم عليهم سلام ودموعهم بشوفت نايف كان غصب عنهم فهو الابن الوحيد وبار فيهم والعائل لهم بعد الله
بعد السلام والسواليف دخل نايف غرفته وشاف هدية نوره باقي في مكانها ناظر فيها ورجع يسأل جدته
نايف : يمه ماجاتك نوره ولا كلمت
الجده: انت غير ملابسك وارتاح وبالليل اعلمك كل شي
نايف : لا علمينى الحين فيها شي
الجده : لا والله مافيها شي بس بقول لك بعد ماترتاح
نايف : لا مرتاح علمينى ولا رحت لها البيت الحين
لا احلل مسح اسمي من على الرواية ..
تجميعي : ♫ معزوفة حنين ♫..
واعذابي عرسها يوم الخميس = الموافق تسعه سبعه عرسها
الجده : طيب تعالى اجلس ياوليدي
اسمع يانايف مالنا بذي الدنيا غيرك ينفعنا ويوقف معنا ويساعدنا بعد الله غيرك
نايف : ايه
الجده : عائلة ابو نوره مايصلحون لنا لاتناسبهم ولانقرب منهم وياما سبيتهم وياما ذميتهم وشفيك ناشب فيهم
نايف : ايه اختصري ياايمه يرحم اهلك
الجده : ابو نوره جانا قبل اسبوع وعطا ابوك شيك 200 الف وقال لاعاد نجيهم ولايجونا ويادار مادخلك شر
ونوره انخطبت لولد خالها ووافقت عليه وانتهى كل شي هذولا ياوليدي ماعندهم كلمه ولا عندهم مبدأ ومايستحون مره
وعسى فيها خيره
نايف : ساكت وماعرف وش يقول طيب انا ماطلقتها ونوره ماقالت لي هالكلام
الجده : ورقة الطلاق موجوده مع ابوك البنت تعرف بكل شي
نايف : متأكده يمه سالتيها ؟؟ شفتيها ؟؟ ولا بس كلام
الجده : ايه متأكده اتركهم وبدال البنت الف بنت
طلع نايف ومن الصدمه ماعرف وش يقول
تذكر الايام وتذكر الوعود اللى بينهم وتذكر التضحيات اللى سواها والتعب لعيونها
طلع وجلس بالمزرعه دموعه كانت جافه من القهر جلس تقريبا ثلاث ساعات وهو جالس يفكر
ورجع البيت وشاف ورقت الطلاق وعرف انه استغل بطريقهة فهد اخو نوره
مالقى من يشتكى له او يسمعه اصدقائه كل واحد بديره ومافيه احدا حوله
راح لغرفته ونام
صحى من النوم اخر الليل وجلس يقلب يفكر ويشوف الهدايا جمعها كلها راح يبغى يحرقها بس كان الوقت متاخر وهون
دخل الصاله ولقى جده جالس يصلي وبعد ماخلص صلاته جلس يسولف له عن فرنسا وكيف الحياه هناك
كان يسولف بدون نفس
قال جده روح نام الحين وبكره تعلمنى بكل شي
مضى على الوضع يومين بالاخير قرر نايف يروح لبيت نوره يمكن يشوفها بالغلط طالعه
وراح اول مره مالقى احد ولاسياره عند البيت وراح واخذ له لفه طويله ورجع ولقى السواق
وقف عنده وسأله عن فهد قال طلع
وقال ابو فهد وينه؟؟ قال السواق في البيت وقال ونوره قال بالبيت
قال للسواق لحظه بعطيك شي
راح السيارة وكتب ورقه
انساك هذي سابع المستحيلات = والمستحيل ارجع معك رافع الراس
( ليتك بس قايله انك تحبين ولد خالك ليتك قايله لي انك ماتبينى ليتك بس طمنتينى عليك بكلمه او قلتى مع السلامه
نايف ال ......
وداعا للابد
بعدها قال للسواق خذ هذي عطها نوره لاتخلى احد يشوفها وعطاها بخشيش 100 ريال
راح نايف وقال للسواق اذا عطيتها دق علي وعلمنى
وصلت الرساله لنوره بعد المغرب واول ماقرت الرساله راح للغرفه تقراها اول مره وثانى مره وثالث مره
انهارت وهى تصيح وعرفت انها كانت ضحية سكرت عليها الغرفه
ولما جات الساعه 11 ام نوره تناديها ولاردت عليها تدق الباب ماترد
نادت ابو نوره ويدقون ماتفتح الباب بالاخير نادو السواقين وكسروا الباب
ولقو نوره مغمى عليها والرساله جنبها
شالوها المستشفى كان مغمى عليها وفي حالة تشنج
كشفوا عليها بالمستشفى اكتشوا انها شاربة 6 حبات بنادول طريقتها تعتبر محاولة الانتحار
دخلوها العنايه تحت الملاحضة لان حالتها كانت خطيره
ورجع الدكتور يسال ابو نوره
الدكتور: هل المصابه مريضه نفسيا
ابو نوره: لا والحمد لله
الدكتور : استخدامها للحبوب كان من نفسها ولا فيه احد نصحها فيها
ابونوره : ماندرى بس كانت عاديه وماتشتكى من شي لين وصلتها رساله من خطيبها الاول
الدكتور : من الافضل لك تبلغ الشرطه لان لو تكررت مثل هذي احتمال تفارق الحياه الحمد لله ان انكم قدرتوا تلحقون عليها
ابو نوره : زين انشاء الله تطلع بالسلامه ولكل حادثه حديث
ابو نوره طلع معصب من المستشفى وكلم صديق له وعلمه بالسالفه صديقه كان واصل بالعسكريه قال ولايهمك انشاء الله نبحث عنه وناخذ عليه تعهد
من بكره نايف يتصل على السواق ويعلمه السواق بكل شي انه كسر الباب ولقى نوره مغمى عليها وشالوها المستشفى
قفل نايف وكان ردت فعل معاكسه انبسط وارتاح بشكل غير طبيعي لان كان متوقع انها توصلها الرساله ومايكون في اي تجاوب ولاعاد يعرف شي عنها
بدا يشغل مخه ويفكر وش يسوى وفكر يزورها بالمستشفى
راح ولبس ثوبه ورسم وهو طالع تفاجا بسيارة الشرطه عند الباب
سألهم خير وش عندكم
العسكري : انت نايف ال.....
نايف : ايه امر
العسكري : اطلع معنا او الحقنا المركز الحين
شالوا ثباته ولحقهم المركز دخل المركز
الملازم اللى كان مستلم ماكان يدرى وش السالفه مجرد بلاغ بدون محضر
سال نايف وش السالفه قال مدرى
شوى ويجي الضابط اتصال ويعرف كل شي
بعدها سأل نايف
وش مسوى في بنت الناس وليش تحرضها على الانتحار ؟
نايف : ابتسم ايش
الضابط : يعيد عليه السؤال
نايف : يضحك ويقول الله واكبر تحريض على الانتحار مره وحده
الضابط : عطنى السالفه كامله
نايف : اسمع قبل اعطيك السالفه توعدنى وعد توقف معى وقفة اخ لاخوه
الضابط : انشاء الله ان كنت مظلوم
ويبدا نايف يسرد له السالفه كامله من البدايه الى النهايه
انها زوجته وسبق وملك عليها وانه سافر ورجع وكل شي متغير ورجع وعطاها رساله لاكثر بس بصوره مفصله
الضابط : بعد ماسمع كلام نايف كله
طيب انت طلقتها ولا لا ؟؟
نايف : لا والله ماطلقتها ولافكرت ولا احد قال لي شي
الضابط : ابشر ولايهمك
اتصل على شيخ وسأله عن حكمها الشرعي رد عليه الشيخ قال تعتبر زوجتة نايف وحرام عليهم مثل كذا
نايف انبسط بس تذكر كلام جدته ان زوجها نهاية الاسبوع
وعلم الضابط بالسالفه وسأل الشيخ
قال الشيخ خله يجينى ويجيب مايثبت وبحول الله يصير خير
الضابط : تعال انت ياشيخ لان عندى امر الحين مايطلع
وافق الشيخ وجاء بعد ساعتين
قال الشيخ لنايف وين اوراقك ومايثبت كلامك قال موجوده بالبيت قال وين بيتكم انا بروح اجيبها
وصف له البيت واتصل نايف على ابوه يطلع الاوراق وبالفعل جاب الاوراق كامله ومعاها الورقه اللى وقع عليها نايف بالطلاق ومختمه من المحكمه
رجع الشيخ وقال لنايف بس انت مطلقها ووضح له السالفه كامله
قال على كذا ماراح يفض النزاع بينكم ويبين الحقيقه الا البنت موافق
نايف استغرب وماعنده شي يخسره قال موافق
ووقع على التعهد وطلع بكفالة المطوع
ابو نوره وفهد وخالهم والعائله كامله بالمستشفى عند نوره
ابو نوره : انا قايل لكم فكوا فينا من افكاركم والولد ابن حلال ومتربي ونعرف اهله
وتقاطعه ام نوره الحين تقول هالكلام الزواج يبو نوره بعد ثلاثة ايام لاتسمعك البنت
ابو نوره : كلها منك ومن ولد اخوك
فهد : يبه مايصلح هالكلام اهدى كلها يومين وترجع نوره مثل ماكانت
ابو نوره : وانت بعد معهم مايهمك غير سمعتك ونفسك بس
فهد : يطلع من الغرفه ويتصل على فيصل ويعلمه ان نوره بالمستشفى
فيصل : هلا فهد وينك يالقاطع
فهد : اسمع نوره بالمستشفى تعبانه تعال على شان يشوفك ابوى
فيصل : ليش سلامات
فهد : انت تعال وتعرف بالسالفه
فيصل : بجيكم وقت ثانى لانى الحين ارتب اثاث البيت تكفى صرفنى لاتعلمهم انى ادرى بالسالفه
فهد : اوكى مع السلامه
بعد انتهاء الزياره رجعوا البيت كلهم وماجلس عند نوره غير الخدامه لان المرافقه كانت ممنوعه بس كان وجود الخدامه اذا صار شي جديد تعلمهم
جاء من بكره واول ماصحى نايف مع الصباح دق على الشيخ وقال بشر وش سويت
الشيخ : يالله صباح خير ^_^
نايف : معليش طال عمرك بس مابقى غير يومين وش الحل
الشيخ : انت تعال المحكمه واعلمك
راح المحكمه نايف ولقى الشيخ وعرفه على قاضي خبره في المشاكل الاسريه وعلمه بالسالفه كامله وعطاه الاوراق وعلمه ان الزواج باقي عليه يومين
بس الشيخ قال للقاضي احتمال يتاجل الزواج لان البنت في المستشفى على كلام نايف
قال القاضي :دقايق واستدعى السكرتى وقال له كلم ابو نوره وخله يجينا او يرسل احد مع وكالة وينوب عنه
وعطاهم نايف رقم البيت
بعدها تم الاتصال بعد محاولات رد فهد وعلمه السكرتى باستدعاء ابوه للمحكمه للاهميه
فهد : ليش سلامات
السكرتى : فيه شخص رافع عليكم قضيه
فهد : منهو ؟ وعلى اي اساس
السكرتى : انت تعال وتعرف السالفه
فهد راح لابوه ويعلمه بالسالفه
ابو نوره : اتصل على اللى سوى عقد الطلاق وقال شوف المشكله وخلصها ورد لي خبر
فهد : يبه اروح لهم
ابو نوره : لا انت روح الظهر انت وامك لنوره يقولون حالتها الحين مستقره
وبعد ربع ساعه يتصل على ابو نوره اللى صديقه اللى بالمحكمه ويقول له : يبو نوره المشكله كبيره واللى رافع عليك قضيه مالقى غير القاضي حسن مانقدر عليه ولا نقدر نكلمه
ابو نوره قال روح للي رافع القضيه وخله يكلمنى حاول تناديه على جنب
وبالفعل راح لنايف وقال فيه واحد يبي يكلمك
نايف : مرحبا
ابو نوره : نايف اسمع اسحب قضيتك لا اوديك في ستين داهيه
نايف : من انت طيب
ابو نوره : انا ابو نوره اسحب قضيتك وخلك في حالك لاتخلينى انكد عليك حياتك وافصلك من العسكريه وارجعك مثل ماكنت
نايف : يعنى انت تهددنى الحين
ابو نوره : ايه اهددك اذا تبي مصلحتك ومصلحت اهلك ابعد عن طريقنا
نايف : شوف والله لو لا غلات نوره ماعرفت ولاتشرفت بمعرفتكم لا انت ولا عائلتكم وماراح اسحب قضيتى
ابو نوره : نوره ماتبيك وانا ابوها انت تفهم انت
نايف : خلها تقولى هالكلام واوعدك اسحب القضيه وماعاد تسمع طاري نايف بعد اليوم
ابو نوره : نوره بالمستشفى وانت السبب
نايف : لا انتو السبب
ابو نوره : ماعليه اسحب قضيتك ويصير خير
نايف : اوكى اجل الزواج وباجل القضيه لوقت ثانى
ابو نوره : حنا اجلناه شهر
نايف : وش اللى يضمن كلامك
ابو نوره : تعال البيت واوريك الدعوات
بعدها راح نايف للشيخ وعلمه بالسالفه قال ماعليك منه لاتاجلها الحق معاك بس نايف قال خلنا نروح بيته ونتاكد
بعدها راحوا للقاضي وقالوا له المطوع حنا مظطرين نطلع اجلها لوقت ثانى ياشيخ وبحكم علاقته بالقاضي وافق
وكلها ساعه تقريبا ونايف عند القصر
اول مادق الجرس طلع لهم الحارس ومعاه الدعوات وكان التاريخ مؤجل شهر صحيح
ارتاح نايف وعزم المطوع ورفض وتعذر باشغاله ووادعه وراح لبيته
المطوع ماراح البيت اول ماراح نايف رجع للقصر ودق الجرس وطلب ابو نوره يقابله وسمح له بالدخول وخش بالضيافه في انتظار ابو نوره
انتظر 10 دقايق وجاء ابو نوره وسلم عليه وعرفه بنفسه
لا احلل مسح اسمي من على الرواية ..
تجميعي : ♫ معزوفة حنين ♫..
البارت الاخير
اول ماراح نايف رجع للقصر ودق الجرس وطلب ابو نوره يقابله وسمح له بالدخول وخش بالضيافه في انتظار ابو نوره
انتظر 10 دقايق وجاء ابو نوره وسلم عليه وعرفه بنفسه
المطوع: اسمع يبو نوره انا جيت افتح معك موضوع ويعلم الله مالي مصلوح سوى الاجر والثواب من الله
ابو نوره : تفضل خير انشاء الله
المطوع : انا كنت مع نايف ال فلان وعرفت منه السالفه كامله ومن راي انك ارتكبت ذنب وانت كبير بالعمر وتعرف هالامور كلها
ابو نوره : ياشيخ الولد ماله نصيب والبنت وامها واخوانها والاهل كلهم رافضين هالشي
المطوع : لا يبو نوره اللى اعرفه ان الولد يحب البنت والبنت بعد تحبه وهم اهم شي مايهم الباقين
ابو نوره : البنت ياشيخ صغيره وحنا استعجلنا بالقرار وحكمنا بالعاطفه
المطوع : بالعكس انتو بالبدايه حكمتوا بالعقل الولد اخلاقه عسل وسمعته حسب ماسمعت ممتازه وولد قد المسؤوليه ويعتمد عليه
سكت ابو نوره ماتكلم
المطوع : يبو نوره لاتنظر للولد من جهة وحده شوف الايجابيات فيه صدقنى لو عندى بنت كان زوجته وانا مطمئن على بنتى
ابو نوره : شوف ياشيخ الامور ماصارت مثل اول
المطوع : ليش
ابو نوره : حنا عطينا فيصل كلمه وخطبنا له نوره وهم غالين علينا وولدهم نفس الكلام تتمناه كل بنت
المطوع : بس اللى سويته غلط وحرام عليك وربي بيحاسبك على اللى سويته
ابو نوره : ليش وانا وش سويت خلعت بنتى وخطبت لها ولد خالها وين الحرام فيه
المطوع : يبو نوره انت خلعت بنتك بدون موافقة زوجها الاول ثانيا بدون مايعرف ثالثا هى تعتبر مالزالت على ذمة نايف
ابو نوره : طيب عادى بنخلى نايف يعرف ويطلقها وانتهى الموضوع
المطوع : طيب واذا رفض نايف
ابو نوره : لا مو على كيفه
المطوع : اسمع يبو نوره الولد بالامانه انت ماتبغاه لسبب معين ولا عشان ماتبي ترد خطيبها الثانى وعندك احراج منهم
ابو نوره : ايه هذا اهم سبب انا عطيتهم كلمه وحددنا الزواج وماباقي غير شهر والدعوات طبعها فيصل وانتهى كل شي
المطوع : طيب ليش ماتخلى بنتك اللى تحدد مصيرها وتختار نايف او ولد خالها وبكذا اي واحد من الطرفين بيرضى بقرار بنتك
ابو نوره يسكت شوى
المطوع : صدقنى هذا افضل شي وماراح تخسر شي
ابو نوره : انشاء الله يوم يومين واشوف
المطوع : هذا رقمى واتصل على ان قالت بنتك ماتبي نايف اوعدك اخلى نايف ينسى كل شي بينكم وبينه ويبعد عنكم وان كانت موافقه فانصحك يبو نوره لاتظلم بنتك وتظلم نفسك
ابو نوره : خير انشاء الله ارد لك خبر ولايهمك
طلع المطوع وهو متفائل مره ولا علم نايف انه كان عند ابو نوره وراح بيته
فهد وفيصل ومعاهم ولد عمتهم داخلين البيت وشافهم ابو نوره وناداهم الضيافه
سلموا عليه واخذ اخبارهم وسواليف بعدها فتح ابو نوره الموضوع
ابو نوره : شوف يافيصل انا ماعتبرك الا مثل فهد وانت عزيز وغالي ومثل ماانت شايف خطبتك لبنتى وكنت اول شخص مبارك لك
وادرى انك تعبت وجهزت القصر واتعبت نفسك بامور كثيره وبتجهيزات زواجك بس انا كنت مقصر مع بنتى وظلمتها
فيصل وفهد وخالد : كلهم كانوا في لحظة استغراب مرره
فيصل : ليش ظلمتها وكيف
ابو نوره : انا مااخذت رايها واستعجلت بقراري
فهد : بس هى موافقه يبه وانا سالتها
ابو نوره : وافقة لان حنا كذبنا عليها وطلقناها من زوجها بالكذب وحرام علينا
اسمع يافيصل انا ماراح اقول شي انا بخلى نوره اللى تحدد مصيرها
فيصل : اوكى ياخالى ولايهمك وانا موافق
طلع ابو نوره وخلاهم لحالهم بالضيافه واول ماطلع تكلم فهد
فهد : لاتشيل هم يافيصل انا راح اضبط كل شي
خالد : لا يانايف خلى نوره براحتها ولا ايش رايك يافيصل
فيصل : وين براحتها ياخالد انا احبها من وانا بسادس ابتدائي وانا ولد خالها تكفى يافهد تكفى
فهد : ولايهمك راح اكون مع الوالد وبكلمها معه
استخار ابو نوره في نفس اليوم يطبق كلام المطوع ولا يبقى على كلامه وبالاخير كانت الاستخاره انه يطبق كلام الشيخ
وبعد يومين وبعد ماطلعت نوره من المستشفى نادها ابو نوره بالصاله وكانت امها وفهد موجودين
ابو نوره: تعالى يابنتى اجلسي
وتجلس نوره ويبدا ابو نوره يكلمها عن فيصل ومستواه الوظيفي وسمعته عند الناس وبحكم قرابته منها وكثير من الاشياء اللى تخص فيصل
وبدا يتكلم عن نايف وعن مستقبلها وكل شي يخص نايف
كان يتكلم كمقارنه بين الاثنين وبالاخير قال لها هاه وش رايك ؟؟
نوره : يبه ان كان نايف باقي يبينى انا ماابي غير نايف
امها تتكلم : حنا ماخلصنا من سالفة هالجيران وولدهم
فهد : يانوره نايف مايبغاك وفيصل يحبك وفيصل تعب وهو يجهز للزواج
نوره : يبه براحتك انا قلت اللى عندى ان كان نايف يبينى انا ماابي غيره
ابو نوره : اجل خلاص انسي فيصل نهائيا وانا بكلم خالك وفيصل يكنسلون الزواج وبكلم نايف
ام نوره : وش تقول يبو نوره صاحى انت خلاص مافيه احد الا وعرف بزواج نوره وفيصل
فهد : يبه ليش مانعطى نوره فرصه تفكر فيصل يحبها والله
ابو نوره : ماجاب لي الظغط والتفكير غيركم ياثنين خلاص قلت لكم زواج فيصل من نوره انتهى
حنا ظلمنا الولد ووافقنا عليه والولد يستاهل وماراح يغير قراري غير نوره وبراحتها
نوره قامت عند ابوها وعطت ابوها بوسه على خده وقالت الله لايحرمنى منك يبه وباسته على راسه وراحت غرفتها
ام نوره وفهد متفشلين مره من العالم ومايدرون وش يسوون
تقوم ام نوره من مكانها وتكلم ابو نوره ماراح نجلس بالرياض نبي نسافر وين نودى وجيهنا من الناس
ابو نوره : اقول ياحرمه خلى منك الهذره انا بكلمهم وانتى خليك وعلى انك ماتدرين عن شي
فهد : لا يبه انا بسافر ماراح اجلس وين اودى وجهى من فيصل واخوياي والجماعه
ابو نوره : اجل خذ امك معك وسافر وين ماتبي
فهد : يبه تكفى خلنى اكلم نايف بحاول فيه
ابو نوره : تحاول ليش تحسبنى مزوج نايف نوره بالغصب البنت تبغاه وهو يبغاها وهو ولد كفو افضل من ولد خالك الف مره
ويطول الكلام والسوالف ورغم المحاولات مافيه فائده ابو نوره اخذ موقف بعد الاستخاره وبعد كلام نوره ولافكر يغير قراره
وبالليل اجتمعوا العائله كامله ونفس الكلام كان كلامهم كلهم عن زواج وبقي ابو نوره على كلامه ولكن المفاجأه ان قرارهم كان واحد
ان تزوج نايف نوره ماراح يحضرون الزواج كلهم ومع ذلك بقي ابو نوره على قراره
بعد ماطلعوا راح ابو نوره لنوره وكان يكلمها وهو متردد ويشوف باقي فيه امل تغير قرارها بس نوره كانت تتكلم وهى تعرف انها فرصتها الاخيره
وقالت لبوها : يبه الاهل بيزعلون يوم يومين شهر وبعدين ترجعون مثل اول بس انا راح اعيش حياتى كلها مع فيصل كلها هم ونكد مااحبه ولا ابغاه
تكفى يابوى خلك معى انا ماوافقة على فيصل الا عشانك وتضم ابوها وتبوسه على راسه
من بكره اتصل ابو نوره على المطوع العصر وقال ابيك تجينى انت ونايف اليوم بعد العشاء
المطوع اتصل على نايف وعلمه ان ابو نوره قال لهم يجون واتفقوا قبل العشاء الوعد عند المحطه على شان يخشون سوى عند ابو نوره
نايف ماكان يدري عن شي وكان فاقد الامل مره مر عليه اسبوع كله فرضيات وسوسه وتفكير
المهم
اجتمع نايف بالمطوع وسلام وسواليف عن الحال والدنيا وراحوا بيت ابو نوره المطوع ماتكلم ولاعلم نايف بشي
خشوا القصر ولقاهم ابو نوره وكان استقباله متغير 180 درجه نايف كان مستغرب مره اول مره يشوف ابو نوره يمزح معهم ويسولف
وبعد سواليف قال ابو نوره : اسمع نايف المطوع الله يجزاه خير جانى البيت وصار بينى وبينه كلام الضاهر علمك فيه
نايف : لا والله ماقال لي شي تفضل
ابو نوره : اوكى المهم الرجال الله يجزاه خير خلانى استخير واعدل قراري عنك بس قبل اعلمك وش صار ابي اسالك
انت باقي تبغى نوره اذا فسخت خطوبتها من ولد خالها
نايف : والله يبو نوره لو لا غلاة نوره وحبي لها ماكان سببت لكم احراجات يبو نوره ان ماتزوجت بنوره والله احتمال ماعاد اتزوج
وعلى شان اكون معك صادق ابوى وامى وكل اللى اعرفه يقولون ابعد عنكم بس والله ماقدرت تعبت وعجزت ابعد لين تقولى نوره ابعد عنكم
ابو نوره : اجل شوف يانايف صار بينى وبين خطيبها والجماعه البارح اجتماع طويل وخسرتهم كلهم على شان نوره بعلمك بالسالفه بوقتها
توعدنى تحافظ على نوره توعدنى تخليها بعيونك انا خسرت الجماعه وقدر اخسر الدنيا اهم شي تكون نوره مبسوطه
نايف : تطمن انشاء الله اعتبرها اختى وامى وصديقتى وزوجتى واوعدك وعد رجال مااخيب ظنظ فينى
المطوع : اجل نقول الف مبروك يانايف
ويقوم نايف ويسلم عليهم ويبوس راس ابو نوره ويسلم على المطوع
وقبل لايطلعون قال لهم ابو نوره يسحب قضيته من المحكمه وقال لنايف ابيك تجينى مع ابوك بكره
طلع نايف ومن الفرحه وده يشيل المطوع وقال للمطوع والله مانسى وقفتك معى والله يبض وجهك
المطوع : ايش دعة وانا اخوك بس لاتنسى تعزمنى لزواجك
نايف : افا عليك يمكن انسى ابوى وامى بس مستحيل انساك هههههههههه الله يحيك
ويروح نايف البيت ويعلم امه وابوه كانت فرحته لاتوصف كانه بحلم وده يعلم العالم كلهم
واحلى مافي ذا اليوم ان كان صديقه محمد توه جاي من السفر وراح يعلمه
نوره نفس الكلام مبسوطه ورجعت الابتسامه والفرحه بس كانت خايفه تحس انه بيصير شي عايشه بفرحه وخوف
من بكره راح نايف وجده لابو نوره وحددو الموعد الزواج واتفقوا على كل شي وعلمهم ابو نوره ان الجماعه ماراح يحضرون يعنى مافيه داعى لقاعة افراح كبيره
جد نايف كان متضايق بس مايدري وش يقول من جهة نايف مبسوط ومن جهة تفرقت عائلة ابو نوره
بعد تقريبا ساعتين طلع نايف وجده وتكلم نايف وقال يابوي هذا حال الدنيا ناس تنبسط وناس تضايق لاتشيل هم وراح بسوالف مع جده يحاول يدخله جو الفرح ^_^
كل هالاحداث ونايف مابعد كلم نوره ولا شافها
نايف اخذ اجازه من العمل ثلاثة اشهر طبعا بواسطه ورتب اموره وسوى دعوات زواج وحجز قاعة افراح كبيره
وبالفعل صار الزواج اللى حضر جميع اصدقاء نايف وجيرانهم وجماعتهم وزملائه بالدوام وكان حضور كبير مره
ومن عائلة ابو نوره حضروا الجماعه كلهم ماعدا فهد وامه وخالهم ابو فيصل وعائلته وكثير من اصدقائهم ومعاريفهم والسبب اللى خلاهم يجون عم نوره تكلم معهم قال على الاقل نحضر قدام الناس مايصلح ابو نوره لحاله
واجمل مافي حضورهم ان كلهم طلعو بعد الزواج مبسوطين من الاستقبال والحفاوة من جماعة نايف
كان زواج ناجح بكل ماتعنيه الكلمه واول مره يصير زواج مثل هالزواج
وهم طالعين من القصر كان الموكب كبير مره اكثر من 50 سياره تمشي مع سيارة العرسان للفندق لدرجه انهم سببو قلق للسيارات وزحمه للعالم
اول مادخلوا الفندق نوره تناظر بنايف تقريبا ربع ساعه مو مصدقه وهو نفس الكلام مع انها شافته بالزفه بس كانت تشوفه وكانها بحلم
ويمسك يدها نايف وهى تبكى كانت تبكى وتتذكر سواليفهم وكل الاحداث تقريبا ثلاث سنوات واكثر وهم في حب احزانه اكثر من افراحه
حب صعب بكل تفاصيله وبكل مراحله وبكل معوقاته وتحقق بالنجاح بتوفيق من الله
جلسوا يسولفون وكل واحد يعلم الثانى بكل شي صار معه من اخر مكالمه كانت بينهم ايام الدوره بفرنسا جلسوا يسولفون الى الساعه 12 الظهر
وبالليل كانت رحلتهم لفرنسا كان نايف حاجز بنفس المدينه اللى كانت الدوره فيها وسبق وكلم خويه الفرنسي يعلمه انه جاي فرنسا
وقبل يسافرون راح البيت يسلمون على اهل نايف امه وابوه ويوداعهم وراحوا لبيت ابو نوره يسلمون عليهم
وبالفعل توكلوا على الله وسافروا فرنسا شهر العسل
خلاصة القصة
بعد شهر العسل رجع نايف ونوره وعاش مع امه وابوه بنفس البيت وبعد فتره انتقلوا الى بيتهم الجديد بنفس المزرعه
عاش نايف ونوره حياة سعيده ورزقهم الله بثلاثة اطفال وكانت حياتهم مثاليه جدا وكثير يحسدونهم على عيشتهم
ابو نوره وجماعته رجعت علاقتهم ببعض مثل اول وحياه طبيعيه
ام نوره صارت تعز نايف وامه وابوه وتغيرت معاملتها وصارت تجى عند نوره باستمرار والسبب لما شافت نوره مبسوطه بحياتها
نوره كانت تعامل جد نايف وجدته احلى معامله وهم نفس الكلام
نوره رجعت علاقتها بعائلتها كامله طبيعيه ومثل اول
ولكن المفاجاة بعد 15 سنه راح نايف البيت ولقى نوره نايمه
^_^
امزح معكم كنت ابي اموت نوره هههههههههه
انتهت القصه
قصة كانت بدايتها غلط وتحولت الى معاناه ثم مشاكل ثم فرح وزواج مثالي
اعتذر منكم لتاخرى اولا ثانيا لاختصاري القصه وتجاوز بعض الاحداث
الى اللقاء واشكركم على تواجدكم وعلى متابعتكم وبعدكم عن النقد ^_^
تجميع ♫ معزوفة حنين ♫ ..
اللهم لك الحمد حتى ترضى وإذا رضيت وبعد الرضى ,,, اضف تعليقك