رواية ضحية رجلين -52
اليوم الثاني ...
شهد عازمة شروق لبيتها ....
شروق : ودي أحضر وأخاف أمي تعرف تسوي لي سالفة
شهد : قولي لها أحضر زواج وحدة من صديقاتي
شروق : المشكلة أنها تعرفهم كلهم بتقول بأحضر معك
شهد : مشكلة والله ممم أقول قولي لها الصراحة ما ضنتي بتمنعك
شروق : بأشوف
شهد : لا رجعتي قولي لها عشان بعد بكرة نمرك أنا وسامي
ناخذك للمشغل
شروق : اوكي يصير خير ...
................................... ............... ......
أم وليد : والله مايحجزون في فندق
أم نايف : خليهم ياخذون راحتهم
أم وليد : راحتهم هنا البيت كبير وبرى ملاحق ضيوف
حاطينها لمين إن شاء الله
أم نايف : بس هم يبون لحالهم
أم وليد :والله نايف ومرته وبنته مايقعدون
في مكان غير بيتي
أم نايف : دقي عليه وقولي له دامك محلفه
أم وليد : دقي أنتي وخليني أكلمه
أم نايف تدق على نايف اللي رد على طول : هلا بالغالية
أم نايف : هلا حبيبي وينك فيه ؟
نايف : في الفندق ليه ؟؟
أم نايف : أها خذ مرت خالك تبي تكلمك
نايف :هاتيها
أم وليد ": السلام عليكم
نايف : وعليكم السلام هلا خالتي وش أخبارك
أم وليد : ماني بخير
نايف : أفا ليه ؟؟
أم وليد : رايح تحجز في فندق وما تجي عندنا
نايف انحرج : والله أخاف أضايق عليكم ولا شي
أم وليد : بلا كلام فاضي تلغي الحجز وتجي لعندي اللحين
نايف : لا يا خالتي وراكم عرس ومانبي نضيق عليكم
أم وليد : لا تخليني أحلف أني بأزعل عليك
نايف : لا خلاص كلش إلا زعلك خلاص الليلة نكون عندكم
أم وليد : يله أجل سلم لي على اللي عندك
نايف : يوصل ..
أم وليد : فمان الله
نايف : مع السلامه ...
سمر : وش فيه ؟؟
نايف : عسى ما فتحتي الشناط
سمر : لا ليش
نايف : بنلغي الحجز ونروح بيت خالي
سمر : لا ما اتفقنا كذا
نايف : حالفة تزعل علي
سمر : يالله ما أحب كذا أحسه بنضايقهم
نايف : وش نسوي هي تبي
سمر : ومتى
نايف :الليله .. يله أنا نازل اللغي الحجز ..
سمر : أمرنا لله
................................... ...
أم روان : روان هنادي ماجت من الرياض
روان: توني مكلمتها تقول بكرة فالليل بيكونون هنا
أم روان : بيطولون في جدة
روان :لا بس بيحضرون ويروحون الجمعه
ام روان : معذورة دوام رجلها ... إلا ما سألتي بتجي أمها
روان : تقول لا لأن أبوها تعبان وبتجلس عنده لكن تقول بتدق تبارك
أم روان : والله حسافة كان ودي تجي بس مرة ثانية
روان : وش مرة ثانية !!
أم روان :ههه لا في مناسبة ثانية بسم الله عليك
روان : اشوى راح فكري بعيد ...
أم روان : ههه أقول قومي شوفي الشغالة رتبت الملحق قبل لا
يجي نايف ولا لا ؟؟؟
روان : إن شاء الله ...
قامت روان تشوف إذا رتبو الملحق ولا لقت كل شي مرتب
رجعت وقالت لهم يدخنونه واجب الضيافة عليهم ...
وراحت تشوف أشغالها وتخفي توترها بسبب قرب زواجها
الأول لأن مع محمد مالحقت تسوي زواج لأنه خربها ....
...................
في الليل جى نايف ومرته وجلسو في ملحقهم ...
اليوم الثالث ...
العصر ..
في غرفة روان كانو البنات كلهم مجتمعين يحضرون
ليلة ما قبل الزواج ....
رغد تدخل :بنات سمح لي وليد أشوف غرفتهم
لمى تقوم من مكانها : والله
جمانه تسكر المجلة : يله نروح نشوفها ...
روان : لا والله محد يدخلها قبلي
رغد : دخلت وشفتها ....
لميا:ورى ما ناديتني
رغد : قلت أول شي أنا بعدين أنتم
لمى : يا نذلة طيب يله بنات نروح نشوفها ....
قامو كلهم رايحين يشوفون جناح وليد اللي غير كل شي فيه
لأستقبال العروسة روان ....
دخلو البنات وانبهروا بالتصميم اللي ابدع فيه صراحة سعد مو وليد ..
لكن الغرفة شراكة بينهم وبراي روان لكن هي ما شافتها بعد ما صلحو كل شي ...
كان كل شي روعه .....
لميا : عادي أصير الزوجة الثانية ..
رغد : تخيلي عشان تذبحك روان ...
جمانه: بنات جد ذوق تتوقعون وليد اللي مختارة
لمى : يمكن أحد معاه ...
رغد : يله عطيناكم وجه أطلعو
جمانه : مالت
رغد: عليك يله لو يدري وليد آآآه يذبحكم
طلعو البنات وراحو يجلسون مع روان ....
...........
في الفندق بجدة :
هنادي : تكفى سلمان
سلمان:تلقينها مشغوله مو فاضية لك
هنادي : تكفىىىىىىىى
سلمان : وش رايك نطلع نتمشى على البحر
هنادي : سلمان لا تضيع الموضوع أبي أروح لها يله يا طلبه لا تردها
سلمان يتنهد : طيب
هنادي ابتسمت له :كنها من دون نفس
سلمان : لانك ازعجتيني
هنادي : لو ما أزعجتك ما وافقت
سلمان : طيب دقي شوفي وين بيتهم عشان أوصلك
هنادي :ماخذه الوصف من اسبوع بس خلنا ننزل
سلمان : والله أنكم حريم داهيات أعوذ بلله
هنادي :خلك منا يله لبس
سلمان يقوم : أمري لله ..
......
في مجلس الرجال كان المتواجدين هم :
(أبو وليد , أبو روان . أبو نايف . أبو تركي ,تركي,نايف .وليد ,بندر,عبدالله)
أبو تركي :قم بندر رح لأمك قلها بنمشي
أبو وليد : تو الناس تعشو
أبو تركي : لا خلنا نرجع البيت نتريح بكرة زواج وليد
أبو وليد : طيب صلو العشا وروحو
أبو تركي : لا هناك أزين مرة ثانيه يله قم نادهم قل أبوي مستعجل
بندر يقوم : إن شاء الله ويروح لداخل حتى يقول لهم يمشون ...
وتجهزوا البنات بسرعه لأن أبوهم قال بسرعه لو يتأخرون بيسوي لهم سالفة .
طلعو وراحو ومعهم تركي ...
عبدالله ضاق صدره لأن بندر راح فقال أحسن أتمشى في الحديقة وطلع من المجلس وكان باب الشارع مفتوح فشاف سيارة غريبه راح يشوف من هذولي اللي جاين لهم راح وشاف حرمة تنزل من السيارة استغرب من تكون ..
هنادي :هذا بيت محمد عبدالعزيز
عبدالله: ايه من تبين ..
هنادي : أنا صديقة روان
عبدالله: اها ادخلي جو
هنادي : محد في طريقي ..
عبدالله : لحظة اجي معك
هنادي تأشر لسلمان أن هذا البيت عشان يروح اما بندر بيسوي حركات الرجاجيل صرخ له ووقف سلمان عشان يدخل لأن عيب يوصل لبابهم وما يضيفيونه وكأن البيت بيته أما هنادي أعجبها موقف هالولد اللي ماتعرف من يكون
عبدالله :ادخل جوا
سلمان : لا يا رجال وراي مشاوير ..
(عذر الرجايل هالأيام لسألتيهم وين رايحين قالو مشاوير ..)
عبدالله:طيب أصبر ...
ركض عبدالله تارك هنادي في حيرتها لا تكون غلطانه في البيت
دقيقة إلا شافت رجالين جايين ولا واحد ألتفت لها لكن راحو لسلمان
يجبرونه ينزل يتقهوى أما هي مشت مع عبدالله ودخلها جو وكان في وجهها أم روان سلمو على بالأحضان
بعد السؤال عن الحال ..
راحت هنادي تسلم على الباقين الللي هم أم نايف وأم وليد
سلمت عليهم وجلست وهي منحرجه منهم ...
لكن انحرجت أكثر لم نزلت جمانه من الدرج
وتذكرت أخوها بدر وسواياه معها
جمانه تفاجأة بوجود هنادي بس ما بين شي على وجهها سلمت عليها بسرعه وأستأذنت أن بتقول لروان أنها وصلت ولا في الحقيقة تبي تهرب من نظرات هنادي اللي تطالعها بنظرة غريبة ما فهمتها ....
جمانه دخلت غرفة روان : روان هنادي تحت ..
روان :والله وناسه
نورة :وين جالسة
جمانه : في الصالة تحت
روان : تكفين ناديها لهينا
جمانه : لا استحي روحي قولي لها أنتي ..
روان : لا جمانه تكفين روحي قولي لها
نورة : في اختراع اسمه الجوال
روان : بس ما تدل البيت أول مرة تجي لهينا
جمانه : انزلي انتي
روان : امري لله ..
طلعت روان ونزلت تحت وسلمت على هنادي بحرارة لدرجة دمعت عيونها
استأذنو من الموجودين عشان يرقون فوق ...
لكن هنادي ما حبت ترقى لغرفتها لأن أكيد جمانه بتكون موجودة هناك وهي ماتبي تجلس معها فقالت لروان يجلسون في أي مكان الا فوق فراحو للمجلس الحريم ...
هنادي : في ولد صغير دخلني مدري منهو
روان : أكيد عبدالله لأن بندر راح
هنادي :من عبدالله ؟؟
روان : ولد عمتي سارة
هنادي :اخو نورة وجمانه
روان :ايه
هنادي : يا حليلة كم عمره
روان :ظنتي 13 والله مدري بس أنه في أولا متوسط
ليه وش مسوي لك
جلست هنادي تقول لها وش سوى عند الباب لحد ما جى الرجالين ودخلها جوا
روان : من الرجالين
هنادي :واحد حاط دقن والثاني سكسوكة خفيفة
روان : اها هذا نايف والثاني زوجي
هنادي :ههه زوجي من اللحين
روان : أكيد وش بعد ...
جلسو يسولفون لم دق سلمان على هنادي يسالها إذا كانت بتطول ولا لا
قالت لها بتجلس للعشا بس هو رفض لان بيطر يقعدونه معهم
فستأذنت ووعدتها تكون عندها من بدري بكرة ..
وطلعت مع سلمان اللي يالله قدر يطلع من الرجاجيل اللي يبونه يجلس يتعشى معهم
راح هو وهنادي للبحر يتمشون ....
وطول الوقت هنادي تتكلم عن بيتهم وكيف هو حلو ومرتب وواسع ووووإلخ
سلمان:هنادي أدري أنك متضايقة من الجلسه مع أهلي
هنادي : مو قصدي كذا لا بس أسولف لك عن بيتهم
سلمان : كلها سنة وننتقل لبيتنا
هنادي : والله مو قصدي شي
سلمان : بس أنا حاس فيك أنك تتضايقين من أمي وخاصة نجود
هنادي :خلاص تعودت عليها وأصلا هي طبعها كذا مو علي بس ...
سلمان : الله يهديها ..
................................... ..............
سامي : ها شروق بتروح العرس؟
شهد : ايه بس قالت لخالتي أنها وحدة من بنات الجامعه
عازمتها
سامي :وصدقت
شهد : أكيد بتصدق
سامي :وبنمرها بكرة
شهد : ايه
سامي : طيب متى أنتم بتروحون هناك
شهد : أنا وأمي وعمتي بنروح هناك بنشوف التجهيزات لم العصر
ونرجع نتجهز ونروح في حدود 8 بعد العشا على طول ...
سامي : أجل خلو السواق يوديكم ما أبي أتأخرعلى الرجاجيل
شهد : على راحتك
سامي :بكرة مشاوير
شهد : اكيد أنت زوج أخت المعرس ..
سامي : الله يعينا عليك بكرة ...
..........................
الساعة 1 الليل الكل نام في البيت ..
إلا أم روان اللي جالسه مع بنتها توصيها على وليد ولا تفرط فيه
وروان متوترة وامها تزيدها توتر بس لازم تسمعها لأنها أكيد بتستفيد
خلصت من محاظرة امها وطلعت رايحة لغرفتها
وراحت تنام جمب نورة بس وين تنام وهي كذا متوترة قامت وصلت ركعتين ودعت ان الله يوفقها بكرة وييسر زواجها مع وليد لم ارتاحت حطت راسها ونامت ..
الساعة 4 ونص الفجر ...
صحت روان بقوة مروعه وقامت نورة : بسم الله وشفيك ..
روان : حلم حلم
نورة : بسم الله عليك وش حلمه
روان قلبها طبول من الحلم المزعج اللي شافته :حلم شين شين
نورة : بسم الله عليك بأجيب لك موية
روان : لا لا اجلسي ما أبي
نورة : عشانك متوترة حلمتي
روان دمعتها على الباب :مدري مدري
نورة :تعوذي من ابليس وارجعي نامي ولا تفكرين في بكرة
روان ترجع تنسدح وغمضت عيونها وتفكر في الحلم الغريب اللي جاها ومو متطمنه
أما نورة رجعت تكمل نومها لم شافت روان رجعت لطبيعتها ...
............
الصباح الساعه 9 ...
دخلت شهد البيت وتفسخ عبايتها وعلى الصالة على طول :
الســــــــــــــلام عليكم ...
نايف نزل راسه بسرعه أما وليد رد : وعليكم بس توكلي
شهد تفشلت ورجعت تلبس عبايتها عشان بتمر من عندهم
وراحت لهم :هلا نايف وش أخبارك
نايف : الحمد لله وش أخبارك انتي
شهد : الحمد طيبه ...
وليد : قم نايف نطلع شكل شهد اللحين بتقوم كل البيت
قام نايف وهو مبتسم وطلعو برى لكن شهد مسكت وليد :
وليد : ها
شهد : ورا وجهك مصفر
وليد : والله مصفر
شهد : ما نمت زين
وليد:أي والله ما نمت زين
شهد : متحمس على العرس لهدرجة
وليد : وش أسوي لازم هالشي
شهد : طالع كنك مريض
وليد: لا تحطميني الليلة عرسي
شهد : ماعليه رح نم لك ساعتين وبأقومك يمكن يتعدل وجهك
وليد : تقوميني مو تسحبين
شهد : ما عليك أنا بأقومك ما بنسى معرسنا
وليد : بأروح لنايف أقوله ينتظرني برى
شهد : يله
طلع وليد أما شهد راحت فوق عشان تقوم اهل البيت ....
شافت نورة طالعه من غرفة روان ولافة عليها الجلال تحسبا من مرور وليد
شهد : هلا والله
نورة تتقدم لشهد بعد ماسلمو على بعض ...
شهد : روان قامت
نورة : لا خليها أمس قامت الفجر مرتاعه تقول حلمت حلم شين
شهد : تلقينها متوترة عشان الزواج
نورة : أنا قلت كذا بس مدري طول الليل تتكلم بكلام غير مفهوم كأنها
أحد يضربها وهي تصارخ ومدري أيش
شهد : نويرلا تخوفيني
نورة : وش أسوي هذا اللي صار
شهد : تلقينه حلم عادي واحنا مكبرين السالفة وأصلا اللي ينام وهو متوتر يشوف حلوم شينة إلا وين جمانه ...
نورة :مع أمي نايمه
شهد :وأبوك وين نام
نورة : في الملاحق اللي برى
شهد : اها ....
احم احم يا ولد ...
نورة تغطت باجلال
ووليد مر من عندهم رايح لغرفته المؤقته ...
نورة : عسى بيرقد
شهد : أنا قلت له وجهه مصفر ما نام زين قلت نم ساعتين وأقومك
نورة :ايه يمديه ينام تونا على الظهر إلا وين العيال
شهد : مع الشغالة تحت ...
نورة : أفطرتي
شهد : لا والله قمت وجيت على طول هنا
نورة : أجل نصبر لم يقومون كلهم ونفطر
شهد : اوكي ..
بعد ساعة تقريبا الكل قام وفصلو الفطور رجال وحريم ..
وكان الجو لمه ووناسه خاصه لم تكون في مناسبة والكل قايم يفطر ...
الكل يسولف مع اللي جمبه وإزعاج فيصل وسديم اللي كل شوي متضاربين وسمر تفكك فيهم ...
شهد : يووووووه نسيته
سمر :وش ؟
شهد : وليد قال ساعتين وأقومه اللحين الساعة 11 ونص
نورة : يا ويلك قومي ترى خلقة متوتر بيعصب عليك
شهد قامت بسرعه دخلت على وليد ما لقته في السرير لكن سمعت صوت الموية في الحمام ثواني اللي هو طالع يمسح وجهه بالفوطة :والله أنك لعابه
شهد : والله أسفة ما حسيت بالوقت
وليد : زين اني مركد الساعة ولا ما قمت إلا الليل
شهد تصرف : بتفطر ؟؟
وليد : وش رايك يعني؟؟!!
شهد : أسأل
وليد : اطلعي البس
شهد : زين طلعنا ...
نزلت شهد تحت معهم ....
روان متوترة من تعليقات جمانه عليها اللي في الأخير سكتتها عمتها ...
بعد الفطور الكل انتشر في البيت يشوف شغله ..
بعد اذان الظهر راحت شهد وأم نايف وأم وليد القاعه يشوفون الترتيبات كيف صايرة ويطمنون أن كل شي صاير اوكي ...
الساعه 2 ونص رجعو عشان الغدا ...
بعد أذان العصر جى سامي وخذ شهد عشان يروحون ياخذون شروق ويروحون المشغل اللي حاجزين فيه ..
أما الباقين حاجزين 4 كوافيرات يجونهم البيت ...
ووحدة خاصة في العروس اللي ماراح تتجهز إلا بعد صلاة العشا ..
جت هنادي معهم ودفعت معهم عشان تتصلح معهم لانها ماحجزت ...
على أذان العشا جى بيت أبو تركي معهم وهم جاهزين وخالصين ..
عشان يمشون مع بعض للقاعه ...
اما الرجايل تجمعو وراحو للقاعه لأن الرجال يبدون مراسيم الزواج مبكر ...
على الساعة 9 الكل في القاعة ينتظرون المعازم اللي ماراح يجون إلا
11 أو 10 ونص ....
روان بدت تشتغل عليها الكوافيرة بحذر ودقة لأنها عروس ...
الكل كان فرحان بهالمناسبة السعيدة ...
لمى كانت الأنعم بين البنات بفستانها الوردي الناعم ومكياجها الخفيف
ولميا جذابه بفستانها الغريب الشكل بلون الموف وصبغة خصل شعرها البنفسجي
الغامق وتسريحتها الغريبة ...ومكياجها الاغرب ...
اللي ضحك عليها تركي لم قال بس ...
جنان كانت هادية بفستانها ومكياجها ...
نورة كانت رسمية في كل شي ....
وجمانه بالوانها الأورنج الفاتح اللي يتدرج للغامق طلعها حلوة ومريحة للنظر ..!
رغد كانت ألونها طفولية ومصغرها مره ..
شهد كانت الأفخم بينهم بكل شي بحكم أنها أخت المعرس ...
بفستانها الذهبي ومكياجها الخليجي الثقيل ..
الساعة 11 ونص كانت الصالة تقريبا امتلت بالمعازيم ...
والطق والرقص هو سيد المكان واللي ما قعدت ابدا هي لميا
كل شوي تقوم ترقص ...
شهد ما جلست أبدا تسلم على هذي وذيك وتعرف هذي على ذيك!!
أم روان وأم وليد شاقات الحلق من الضحك والفرحة بها المناسبة ...
سمر كانت الناس تطالعها لأن فستانها بدرجات البني
نفس فستان بنتها الصغيرة سديم
وهي حركة من سمر انها فصلت لبنتها مثل فستانها ...
شهد تروح للبنات : قومو ارقصــــوا
جنان : لا وين استحي
شهد : يا شينك بس يله لمى قومي شوي لميا ما شاء الله ما قعدت
لمى : لا ما برقص إلا إذا قامو كلهم
شهد: يله عاد بلا دلع
جمانه : بارقص بس بشرط ..
شهد : وش ؟؟
جمانه :ترقصين معي ..
شهد : كلكم مو انتي بس
جمانه تطالعهم : نقوم ..
كل وحدة تطالع الثانية تنتظرها تقوم اول لكن شهد ما انتظرتهم سحبت جمانه ورغد
وجنان قامت معهم ولحقتهم لمى ونورة ودخلو مع اللي يرقصون ...
.....
عند الرجال وليد نشف حلقة من كثر ما يردد عبارة :
الله يبارك فيك
كان التوتر واصل حدة والود ودة ياخذ روان بدون كل الصجة ..
سعد كل شوي معلق على وليد ووليد يسكته بما انه مجرب قبله ..
سعد : عادي أدخل معك
وليد : جرب وشوف وش يجيك
سعد : ما راح اطالع زوجتك بأطالع في الحريم
وليد :هذا وأنت متزوج
سعد : ذكرتني تراها ما جت
وليد : ليه ؟؟
سعد : تقول ما دقو يعزموني
وليد : بس معطيك بطاقة لها
سعد : تقول ما دقو علي وحرصو أني أجي
وليد : يا شينها تحسب ما ورانا الا هي
سعد : وليد ها تراها مرتي
وليد : أنت اللي فتحت الموضوع ..
سعد : خلاص سكرناه ..
سكتت شوي سعد ثم قال :وليد
وليد :همم
سعد بصوت هادي : تحبها ؟؟
وليد حمق : سعيد ترى جد بتتصفق \
اما سعد مات من الضحك على شكل وليد المعصب ..
ثواني إلا وليد ضحك معه ..
...........
هنادي : باقي ربع ساعة وتطلعين لهم ...
روان : خايفة اطيح في الدرج
هنادي : حتى يوم عرسي خايفه مره بس الدرج اللي بتنزلين منه عادي زي درج البيت مو رفيع مرة ..
روان : الله يستر ... تصدقين اني أمس حلمت حلم شين
هنادي : أقول لا تخربين على عمرك حلمتي وخلصنا لا تقولينه لأحد دامه شين
روان : بس خايفة منه
هنادي تغير الموضوع : روان والله اني اكتشفت أنك قمر
روان : ههه تسلمين
هنادي : والله بسم الله عليك طالعه تجننننين ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك