رواية طحت طيحه في هواكم -16

رواية طحت طيحه في هواكم -16

حمد : اووه زين حصلتي التلفون .. ما أدري وين حطيته ..

حصه : حصلته في حجرك..

حمد : زين زين ..

حصه : امممم انزين بو شهاب طلبتك طلبه قول تم ..

حمد : أول ارمسي خلاف بقول تم

حصه : احلف بس عيل شو الفايده ..

حمد : عيل كيفج.. طلبج مرفوووض ..

مانع : افااا بس يا بو شهاب ..حصوه ينفع انا أقول تم ..

حصه : امممممممم لا

مانع : ويا راسج .. عيل طلبج هب مرفوض وبس إلا مرفوض رفضا تاما ..

حصه : احلف ويا ويهك

مانع : طع هاي .. ايييه أنا أكبر عنج ..

حمد : اوووه منكم .. صدعتونا ..

وييلسون في الصاله .. ويشربون جاهي

حصه : دخيلك يا حمد ..

حمد : شو بلاج .. حشرتينا ..

حصه : ابغي......

حمد : شو تبغين بعد ؟؟

مانع : ههههههه تبغي طراااق

حصه : ( تطالع مانع بنظره ) طنش تعش .. المهم الحين ..حمد ابغيك تحوطني..

حمد : (بإستهزاء ) يالله انزين اركبي السياره

حصه : اوهوووه حمد عااد أتكلم ويااك جد..

مانع : عبالي عم ..

حصه : يا ربي .. أخ مانع ممكن تسكت شوي أبغي رمس اخويه شوي..

مانع : ان شاء الله .. على أمرج الشيخه ..

حصه : ( بتكبر ) هاه حمد شو قلت..

حمد : قلت سيري ييبيلنا عصير أحسن ..

مانع : وييييو مب جنه قفطوهم..

حصه : حمد زين جيه خليت العواذل يغلطوون ..

مانع : اونه.. عواذل قالت ..

حصه : حمد شوفه..

حمد : لا إلاه إلا الله ..

مانع : محمد رسول الله ..

حصه : افااا يا بو شهاب .. والله ما هقيتها منك ..وين رمسك هااذيج .. يوم تقوول ( من متى أوعد ولا أوفي ) تحيد ولا أذكرك ..

تذكر حمد السالفه وما هانت عليه اخته ..

حمد : يصير خير .. عقب المغرب بنسير ..

حصه : والله .. فديت اخويه انا

مانع : لا لا ما شيء حواطه .. انا ورايه شغل وابغي حمد يسير فيايه ..

حصه : مانع عااد لا تتنيحس عليّه .. ما شيء باجي عن المدرسه خلنا نستانس شوي ..

مانع : خلاص خلاص .. والله ما في داعي تحبين ايدي .. غمضتيني ..

حصه : ويا راسك .. ما عندي سالفه احب ايدك .. جيه خلص الشغل

مانع : لج الشرف أصلا ..

حمد : أقوول بتسكتوون ولا الشوو ..

مانع : أنا عني بسكت .. بس سكّت اختك .. هيه اللي تتحرش فيّه

حصه : آآآآخ بس .. الحين انا اللي أتحرش فيك ..

مانع : أبدااا .. يالله بو شهاب بخليك الحين .. تامر بشيء

حمد : على وين ؟؟ ما شيء سيره ..

مانع : بسير البيت .. من أصبحت أهوم عنه ..

حصه : هيه زين .. برايك ..

حمد : شو برايه .. البيت ما بيطير .. تعال تحوّط فيانا ..

حصه : شوو يتحوّط فيانا ؟؟ لا لا خليه يسير بيتهم أحسن

مانع : حلفي بس .. لا يكون يالس عراسج ولا شيء .. عيل عنادا فيج بسير .. لا وراكب السياره قبلج بعد ...

ويدش عليهم علاوي .. ويسير يسلم على مانع ..

حمد : علي بتسير فيانا ..

علاوي : وين ؟؟

حمد : نتحوّط ..

علاوي : هيه بسير ..

حصه : هيه ما شاء الله .. وانته ربيع من خطف .. لا ما شيء سيره ..

مانع : ويا ويهج .. عاد كله ولا بو حسن .. هذا شيخج .. لا وراكب السياره قبلي و قبلج بعد

حصه : حلووه هااي أنا طالبه هالحواطه وانتوا راكبين قبلي..

حمد : خلي عنج الحين .. عقب المغرب تزهبي وقولي حق شميم تتزهب بعد .. وان ما رييتج زاهبه .. ما شيء حواطه

حصه : نذاله يعني ؟!!

حمد : شيء من هالقبيل ..

مانع : يالله بو شهاب قمنا نسير العزبه ابويه يبغي يرااوينااا البكره اللي شارنها ..

حمد : يالله ..

ويظهرون الشباب ويروحون عزبه بو مانع .. وسارت حصه وسوّت تلفون لشمه وخبرتها ان عقب المغرب ظاهرين من البيت .. البنااااااات استانسن من الخاطر .. وعكس هالشيء بالظبط هوه جو بيت ثاني بن محمد .. جو مكهرب ام راشد نفسيتها تعبانه شوي .. وميره ومهره متغربلات ويا المدرسه .. مع ان ميره حاسه ان مهره فيها شيء .. يعني كاتمه في قلبها شيء .. وهالشيء مخلي مهره يوم عن يوم تتعب .. بس ميره حاولت ما تبين هالشيء جدام مهره ...

وعقب المغرب ..

تحوطوا كلهم وخطفول على الشيشه واشترولهم بيبسي وحلاوه وجبس وهالأشياء وخطفوا على عرقوب ويلسوا يسولفون ..

وفجأة يصيح تلفون حمد .. قام حمد من محله وسار عنهم بعيد شوي ويلس

حمد : مرحبا

مها : مرحبتين .. هلا والله

حمد : هلا بييج

( حمد من النوع اللي هب متعود يكلم بنات .. ومن الأصل ما يحب يكلمهن .. وكان طول الوقت يكلمها من ورا خاطره )

مها : شحالك ؟؟

حمد : بخير وسهاله

مها : عساه دوم ..

حمد : أجمعين ..

مها : انزين شوي شوي .. ليش عايف دنياك

حمد : والله ما أدلج أسألي عمرج ..

مها : بسم الله عليّه ما أحيدني مسويه شيء ..

حمد : .........

مها : بلاك ..

حمد : ما بلايه شيء .. خير اختي شيء تبين .. قلنالج ان هذا هب تلفون شمه

مها : ادري انزين

حمد : عيل يوم تعرفين ليش ترديين تتصلين ..

مها : ............ انزين ببند بس بغيت اعرف شيء

حمد : خير

مها : شو إسمك ؟؟

حمد : وانتي شو تبيبه اسمي ؟؟

وشوي ان مانع يزقره من بعيد

مها : اهااا بو شهاب .. عاشت الأسامي والله

حمد : عاشت ايامج .. تبين شيء ثاني .. كم عمري .. وين بيتنا .. وكم رقمه وكيف شكلي ..

مها : شوي شوي عليّه .. انته ليش عصبي وايد ..

حمد : ...........

مها : شكلي أزعجتك بهالإتصال .. السموحه عيل

حمد : ( في خاطره : توج تعرفين انج ازعاج ) بالحل

مها : مع السلامه

حمد : فمان الله ..

ووصل مانع عنده .. وهم يمشون وسايريين صوب البنات

مانع : قم قم .. ردينا البيت .. اميه مسوتلي تلفون ومحتشره .. ههههههه اونه يالرغيد

حمد : صدقها انزين ..

مانع : لا والله .. ومنو قايل البيت ما بيطير .. لا تنكر .. في شاهد

حمد : اذا كنت تطري حصه .. ففي دقيقه بجلب مخها ..

مانع : وأنا أقول الأخت ظاهره على منووه ..

حمد : هههههه يالله اركب اركب .. ورانا سيره الهير بعدنا ..

ووصّلوا قوم حمد شمه الهير وهم ردوا البيت .. مانع خذ سيارته وسار البيت .. وعلى الساعه 11 فليل حمد سار الميلس اللي برع.. امه رقدت وعلاوي كان راقد في السياره وكمل رقاده في البيت .. وحصه سارت المطبخ تييب العصير و الكيك اللي مسوتنه .. وعقب ما خلصت ودته الميلس .. كان حمد منسدح على الغنفه ويالس يجلب في هالقنوات .. سارت حصه صوبه وعطته كيكه وكوب عصير ..

حمد : هههههه وين منصور عن هالكيك ..

حصه : الحماار ما بيذوق من كيكي ..

حمد : هههههه خلاص انزين .. يالله قومي عطيني جهازالفيديو من فوق ..

سارت حصه ويابت جهاز الفيديو وعطته حمد ..

وقام حمد وطلع من تحت الغنفه شريط فيديو ..

حصه : حممممممد شو هالشريط ؟؟ وليش داسنه تحت ..

حمد : اقول كلي واكرمينا بسكوتج ..

حصه : شوفوا .. أونه يسكتّني .. انته قد هالحركه ..

ويخش ايده في قصة حصه وينفشها

حمد : قدهاا وقدود...

وقام وحط الشريط في الفيديو ..

حمد : 123 استعدااااااااد

ويدق على فص التشغيل ..

حصه : اللللللللللللللله ما فيه حيله النيسان ...

حمد : اووهووه بتسكتين ولا ارووغج برع ..

حصه : لا لا دخيلك لا تروغني .. اسكت أحسن ..

حمد : يكون أحسن ..

وعقب عشر دقايق تقريبا ..

حمد : اييه انتي بدال ما تبحلقين في السيايير والويلات تعالي ..

حصه : ( ما خوزت عينها عن التلفزيون )هااه شو تبغي ..

حمد : شو هااه بعد .. العرب يقوولون نعم

حصه : نعم ..

حمد: تعالي دلكي راسي .. راسي يعورني

حصه : انزييين

وتقوم حصه وتيلس عدال اخوها من بعد ما كانت يالسه تحت.. ويلست تدلك اخوها ..

وعقب خمس دقايق .. يدش عليهم مانع فجأة ..

مانع : يحظك والله .. اقول حصيص تعالي دلكيني

حصه : خليت التدليك لحرمك النحسه ..

مانع : ايه انتي .. ما أسمح لج

حصه : اونه ما يرضى عليها .. من الحين ؟؟!!

مانع : طبعا ما أرضى عليها ..

حمد : ( يصد صوب مانع ) ها الرغيد من وين ياي ؟؟

مانع : من بيت اليران ..من وين يعني ؟؟..

حمد : شيء طيب الصراحه

مانع : حوووه حصيص ..

حصه : (وبعدها ما خوزت عينها عن التلفزيون) خير خير .. حشرتنا تراك

مانع : سيري ييبيلي كيك .. وعصير همبا بارد

حصه : انزين بسير اصبر دقيقه .. دقيقه بس

مانع : دقيقه بس ..

حمد : انزبن خل عنك الكيك وما كيك ..شو قالتلك خالتيه ؟؟

مانع : الله الله عالجيب ..

حصه : هههههه لا تغير السالفه باباتي ...

حمد : شو تبينه يقول يعني .. ان امه قالتله يالرغيد ..

مانع : اقول حبيبي .. خليك في التلفزيون أحسن

حصه : ههههههه حليلك والله

مانع : عيل شو رايكم ان اميه ما قالتليه شيء ..

حصه : احلف ..

مانع : والله ..

حمد : غريبه ..

مانع : خخخخ حصلتها راقده

حمد : قول جيه من قبل ..

وشوي تلفون حمد يصيح ..

حمد : هلا والله من شوي نطريك

منصور : بخير ولا ...

حمد : حصه مسويه كيكه .. انمااا ايه ..

حصه : احم احم

منصور : احلف بس .. وانا اقول شو موصلني جدام باب بيتكم

حمد : هههه ويا راسك ..

منصور : انزين صدق انا جدام باب البيت ..

حمد : ( معصب ) منو يايبنك ؟

منصور : هههههه بلاك .. لا تزيغ سويلم وخلّود يايبيني فياهم..

حمد : هيه عبالي بعد ياي بروحك ..

منصور : ارتاح عيل..

حمد : وين داركم بالظبط

منصور : تونا داشين حارتكم..

حمد : اوكيه .. نترياكم ..

ويبند حمد عنه ..

حمد : حصيص سيري داخل شباب بيوون ..

حصه : اووووف وشو يايبنهم الحين بعد ..

مانع : يالله يالله جلبي ويهج وبندي الباب وراج عشان هوا المكيف ما يطلع برع ..

حصه : شوف انا بطلع بس عسبة حمد قالي ولا والله هب عشان سواد عيونك ..

حمد : زين زين .. يالله شلي هالعيشه ووديها المطبخ وانتي مروحه

وتشل حصه الاكل وتسير المطبخ .. وقبل لا يدخلون قوم منصور..

خالد : منصور وين مطبخكم ..بشرب ماي.. باكل دوايه لين الحين ما كلته ..

منصور : سيده جدامك.. ويالذكي ليش ما كلت الدوا في السياره يوم عندك الماي ..

خالد : يوم حطيت يديه في مخبايه تذكرته ..

منصور : ما عليه انته سير الحين المطبخ .. سيده جدامك

خالد : اوكيه بس متأكد أنه فاضي ؟؟

منصور : أكيد فاضي .. منو هالمتفيج اللي بيتعبل في المطبخ هالوقت

خالد : عقووولتك..

دش منصور ويا سويلم الميلس وسار خالد المطبخ .. كان ليت المطبخ شغال .. ويوم توه بيدخل شاف حصه واقفه وعاطيتنه ظهرها وشيلتها كانت شوي وبتطيح عن راسها وكانت قصتها الطويله طايحه على طرف ويهها .. وكانت تقطع الكيك عسب تطرشه الميلس .. اول ما انتبه خالد بعمره رد على طرف المطبخ من برع .. وشوي يسمع حصه تغني حد مثلي بات مشجنه مالت ميحد .. وكان صوتها روووعه بمعنى الكلمه .. وشوي تغني تدري اني موت أحبك .. حصه كانت وايد مندمجه بالغنيه .. ومب منتبهه لحد لأن أصلا خالد كان يمشي بدون صوت لأنه كان حافي .. وغصبا عنه تم خالد يسمع حصه وهيه تغني .. بس وفي لحظه تخيل ان حد يشوفه بهالموقف.. شو بياخذ فكره عنه .. وأصلا هوه بعد ما يرضاها على اخت ربيعه .. ويوم توه بيرد الميلس .. يته نوبه السعال واللي مفروض ياخذ دواها .. حاول خالد ايوود عمره عن لاتسمعه حصه .. وحاول يتحرك .. بس هالمره كان سعاله ثجيل وايد .. وما قدر يقبظ عمره أكثر من جيه .. حط ايده على ثمه وتم يسعل ..

هنيه فزت حصه محلها .. زاغت .. ما عرفت من وين ايي هالصوت .. ردت شيلتها على راسها وتحجبت ..ويوم يت بتطلع شافت كندوره بيضه جدامها وخالد كان عاطنها ظهره ومتساند على اليدار وموخي تحت ويسااعل .. هنيه انصدمت حصه وما عرفت شو تسوي .. بس أكيد أول شيء سوته هوه انها تغشت .. كان باين عليه انه مب من خوانها .. كان خالد يسعل ويسعل حتى ويهه غدا احمر .. ربعت حصه صوب الثلاجه وصبت ماي وربعت صوب خالد

حصه : تفضل اخويه .. اشرب مااي ..

انتبه خالد لها يوّد الكوب من ايدها وشرب الماي وشوي وخفّت السعله .. طلّع دواه من مخباه وكله ..

كانت حصه .. منصدمه على ما تعرف شو يستوي جدامها .. ما تعرف اذا هيه في حلم ولا بعلم .. ومنو هذا وشو يسوي هنيه وتساؤلات وااايد .. بس اللي قطعه ..

خالد : مشكوره على الماي

حصه : العفو ..

حصه ما خوزت عينها عنه والسبه الصدمه بعكسه هوه اللي ما رفع عينه عن الأرض من الموقف اللي استوى ...

رد خالد الميلس وردت حصه تقطع الكيك وهيه مب مستوعه شو اللي استوى قبل شويه .. خالد يمشي وهوه ينتفض .. لان السعال من يومين فيه ولا طاع يخف ويوم عن يوم يزيد واليوم تأكد انه زاااد بدرجه فظيعه .. وان الدوا ما ياب فيه .. الشباب ما سمعوا سعال خالد .. كانوا حاطين شريط مال السيايير ومطوليين عليه وصوت الويلات واصل برع الميلس ..

دش خالد عليهم وكلهم زاغوا من شكله مع انه سلم عليهم عادي ..

منصور : بسم الله .. خلوووود بلاه ويهك جيه ..

سالم : شو يااك ؟؟

خالد : ما شيء بس السعاال غربلني ..

حمد : شو كاظنك ؟؟ ليش ما تسير المستشفى ؟؟

سالم : سار وأنا اللي مودنه بعد ... بس أشوف حاله نفس ماهوه .. لا وبعد زاااد

مانع : انزين سير مستشفى ولا عياده ثانيه ..

خالد : ( بنبره فيها كحه ) يصير خير (( وكح مرتين ))

منصور : شو يصير خير ؟؟ يا خي طالع شكلك والله تزيغ...

خالد : ( يفلع منصور بالمخده ) سير ول ويا راااسك ... (( ويفتر صوب التلفزيون ويشوف النيسان يشل عتايرين )) روووح ما فيك حيله يا النيساان ..

وشوي يصيح تلفون حمد ..

حمد : الو

حصه : هلا حمد

(( كانت حصه ترمسه وقلبها وشوي بيطلع من محله .. كانت تبغي تتأكد إذا خالد قال شيء حق حمد ))

حمد : هلا

(( ارتاحت حصه يوم شافت مزاجه حلو وحاولت تغير الموضوع))

حصه :أقول حمد تعال المطبخ وشل الكيك ووده الميلس

حمد : ومن متى وانتي في المطبخ ؟؟

حصه : (بإستهبال ) هاه .. لا توني يايه .. ليش؟؟

حمد : خلاص خلاص ما شيء ..

حصه : انزين ما بتي تشل الكيك؟؟

حمد : بيي ..

حصه : اوكيه انا بسير داخل .. بتحصل الصينيه على الطاوله اللي عدال الثلاجه ..

حمد : اوكيه ..

طلع حمد من الميلس وسار المطبخ ويابلهم الكيك ...

وأول ما دخل الميلس ..

منصور : عنك عنك ..

حمد : لا والله .. يوم يبته تبغي تشله عنيه ..

منصور : لا يا انتيليجنت قصدي عنك صحن كيك .. ولا انته برايك امبوووني ما بشل الصينيه عنك .....ههههههههه

حمد : هههه عبالي بتفزعلي بعد ..

ويحط سعيد الصينيه على الطاوله .. وتموا الشباب ياكلون ..

وننتقل لبيت سالم بن محمد......

رفيعه طايحه على الشبريه ومشغله لابتوبها ويالسه تسمع شله عيضه ( من تكون ) وكانت حاطه اللابتوب على الطاوله اللي عدالها .. ويلست رفيعه تشوف روضه اللي كانت راقده عدالها .. كانت روضه لاويه على دبدوب حمد وراقده .... افترت عين رفيعه على الدبدوب .. وتذكرت سالفه الستي وابتسمت ..

وفي جهه ثانيه من العالم وبالتحديد في شارع من شوارع أمريكا .. حارب يمشي ولابس جاكيت وخاش ايده في مخباه .. وكان يفكر فيها.. هيه في مهره .. حس بتأنيب الظمير على اللي سواه.. هيه روحها تعبانه واللي سواه أكيد زادها .. الله واعلم اذا الله بيكتبلها تعيش في هالدنيا ولا لا .. ليش يعذبها وهيه روحها متعذبه .. ليش ؟؟ ليش ؟؟

كان وده يبند عينه ويرد يفتحهن ويحصل عمره في دبي وبالتحديد جدام مهره عسب يستسمح منها ... بس ما في اليد حيله ..

ما دريت إني معذب في هواك ... ولا دريت إني على شانك بكيت

يا حبيبي مالي في الدنيا سواك ... يعل ربي يحفظك دامك حييت

وإن صبرت إصبر على قلب غلاك ... ما رخصبك في الهوى لأنك وفيت

وإنتظرني بشوق ملهف يا ملاك ... يا أعز محب في حبه إرتميت

ما أصعب فرقاك ولا بيدي جفاك ... ما نسيت ولا على بعدك قويت

لا اتكدر يا بعد عمري كفاك ... أعرف جروحك بنظره لو خفيت

في كدركم تنتزع روحي فداك ... والسبايب غلطتي لأني جفيت

مالي غيرك مول في الدنيا عداك ... أطلبك تسمح خطايه لي خطيت

وننقل لبيت ثاني بن محمد .. وعلى الساعه وحده وثلث بتوقيت دبي .. مهره يالسه على الدري .. كان التعب باين عليها .. ما كانت ترقد الليالي والسبه الألم والدويات والسبب الرئيسي حارب ..

صاحبي من دونك العالم صعيب ... يسكنه حزن ويغشاه السكون

الفرح عن دنيتي أصبح غريب ... والسعاده صاحبي صارت شجون

من ملكت القلب وانت لي قريب ... شخص أحبه وأعشقه حد الجنون

كل أحزاني بقربك بقربك لي تطيب ... يا بعد روحي ويا خلي الحنون

كنت أظن إني وسط قلبك حبيب ... ترخص الدنيا على شاني تهون

كيف تبكيني وعن عيني تغيب ... كيف هان الحب يا خلي الحنون

وتقوم مهره وتسير حجرة ميره .. كانت ميره توها بترقد ..

ميره : ليش ما رقدتي ؟؟

مهره : ما ياني الرقاد ..

ميره : ما ياج الرقاد ولا شيء يعورج ..

مهره : لا مـ ـ ـ ـا شـ ـيء يـ ـعـ ـ ورنـ ــ ــ ـي..

ويغمى عليها وتطيح على الأرض ..

ميره : ( تبغم – تصارخ ) مهره

وتسير ميره صوبها .. وتحط ايدها تحت راس مهر وتحاول توعيها بس ما قدرت .. وتمت ميره تزاقر على امها ... امها وابوها زاغوا .. وربعوا صوب حجره مهره ..

ميره : ( وهيه تصيح ) الحقوا ما اعرف شو استوابها ..

وهنيه حست ام راشد براسها يدور وحاولت تتقبظ بشي لين ما وصلت الشبريه ويلست عليها .. ميره شوي تصد على امها وشوي على مهره ما تعرف شو تسوي ولا عند منو تسير ..

بو راشد : سيري زقري اخوج بسرعه

وربعت ميره صوب حجره راشد .. راشد كان قافل حجرته وراقد

وتمت ميره تدق على رااشد بقوو وتزقره وراشد رقاده ثجيل حتى صريخ ميره ما سمعه يوم كانت تزقر امها وابوها ..

نش راشد وفتح لها الباب..

راشد : اووووف شو تبين حشرتينا..

ميره : راشد دخيلك تعال .. ما اعرف شو استوى بمهره ..

ويسير راشد حجره ميره وحصل ابوه عدال مهره وامه يالسه على الشبريه وشكلها تعبان ..

راشد : بسم الله شو مستوي ..

بو راشد : سير تلبس بسرعه و دخل سيارتك داخل البيت .. يالله بسرعه

راشد : ان شاء الله ..

سار راشد وتلبس بسرع ه ودخل سيارته داخل البيت

وفي هالوقت حاولوا يلبسون مهره عباتها وشيلتها .. وبعدين

شل بو راشد بنته ونزل تحت ونزلت وياه ميره ..

ويوم ركّبوا مهر السياره ..

ميره : ابويه أسير وياكم ..

بو راشد : لا يا بنتي .. انتي يلسي عند امج وداري عليها .. وانا وراشد عند اختج

ميره : ان شاء الله .. بس دخيلك يا بويه طمنا عليها ..

بو راشد : ان شاء الله بنتي ..

سارت ميره عند امها وروحوا قوم بو راشد المستشفى ..

وفي المستشفى وبعد ما طلع الدكتور من عند مهره وتمت النيرس داخل .. وهوه نفس الدكتور المواطن اللي يعالجها ..

بو راشد : هاه دكتور بشّر ..

الدكتور : ما فيه إلا كل خير .. بس بنتك ومن المعلومات اللي قالتلي عنها النيرس .. أنها من يومين ما كلت دواها .. وانته طال عمرك تعرف أن دواها وايد مهم لها وخاصه في حالتها ..

بو راشد : يا دكتور هيه هب بس مقاطعه الدوا ..إلا مقاطعه العيشه بعد ..

الدكتور : وهذا بعد سبب من الأسباب .. هب زين عليها .. هالشيء يمكن يؤدي لشيء مب في مصلحتها ..

راشد : شو تقصد ؟؟

الدكتور : يا أخ راشد .. اختك مثل ما تعرف فيها مرض .. الله واعلم إذا الله بيكتب لها تعيش ولا لا .. وهالشيء بيد ربك .. ونحن الحين نسوي اللي علينا .. ومدة علاجها ثمان شهور والدواء والأكل وطبعا إذا التزمت عليه على الأقل في امل أنها تشفى .. ومقاطعتها للدوا والأكل بيؤدي أن المرض بسيطر على جسمها .. وفي ذيج الساعه ما بيكون عندنا حيله ..

راشد : يا دكتور دخيلك سو اللي تقدر عليه .. دخيلك يا دكتور

بو راشد : وإذا كان لازمنكم فلوس حق دوا ولا شيء تراني حاظر..

الدكتور : دام فضلك الشيخ ... ما يحتاي والله الشيخ زايد ما قّصر ما خلا دوا ولا جهاز ما يابه ..الله يطول بعمره ويديمه لنا .. وانته يا اخويه راشد .. بحاول أسوي كل اللي أقدر عليه وما بقصر فيها والياقي عليكم .. يعني اقنعوها تاكل وتلتزم بالدوا ..

بو راشد وراشد : ان شاء الله

راشد : انزين وشو حالها الحين ؟؟

الدكتور : الحين الحمد لله .. عطيناها الدوا والحين السستر عندها ..

بو راشد : يعني تقدر ترد ويانا ..

الدكتور : هيه نعم ..

راشد : مشكور يا دكتور

الدكتور : العفو الشيخ .. هذا واجبنا

بو راشد : تسلم يا ولدي

الدكتور : الله يسلمك الوالد .. يالله أنا بترخص منكم .. تامرونا بشيء

بو راشد : سلامتك

راشد : سلامتك وما تقصر

الدكتور : مع السلامه

وروح الدكتور وهوه يمشي بطّل اللبس ماله وعطاه للنيرس اللي تمشي وقالها توديه غرفته وتيبله غترته وعقاله .. تريا النيرس اللي يابتله الغتره والعقال .. وكمل طريجه وهوه يلبسهن..

بو راشد : الله سخر هالريال الطيب لنا ..

راشد : هيه والله .. الله يعطيه على قد نيته

ويدشون قوم بو راشد وراشد داخل وعقب ما ارتاحت مهره ردوا كلهم البيت .. وكانت الساعه ثلاث وربع ..

ويوم توهم داشين البيت ..

مهره : اسمحلي يا بويه ... تعبتك ويايه

بو راشد : ( يحبها عراسها ) لا تعبتيني ولا شيء .. بس بتتعبيني إذا ما كلتي دواج واذا ما تاكلين..

مهره : ان شاء الله يا بويه ..

يتبع ,,,

👇👇👇