رواية طحت طيحه في هواكم -17
وروح الدكتور وهوه يمشي بطّل اللبس ماله وعطاه للنيرس اللي تمشي وقالها توديه غرفته وتيبله غترته وعقاله .. تريا النيرس اللي يابتله الغتره والعقال .. وكمل طريجه وهوه يلبسهن..
بو راشد : الله سخر هالريال الطيب لنا ..
راشد : هيه والله .. الله يعطيه على قد نيته
ويدشون قوم بو راشد وراشد داخل وعقب ما ارتاحت مهره ردوا كلهم البيت .. وكانت الساعه ثلاث وربع ..
ويوم توهم داشين البيت ..
مهره : اسمحلي يا بويه ... تعبتك ويايه
بو راشد : ( يحبها عراسها ) لا تعبتيني ولا شيء .. بس بتتعبيني إذا ما كلتي دواج واذا ما تاكلين..
مهره : ان شاء الله يا بويه ..
سار بو راشد حجرته .. وسار راشد ومهره حجرهم وعلى آخر الدري
مهره : واسمحلي بعد انته يا راشد .. تعبتك
راشد : ( يظربها على راسها ) تعبتيني ونص .. وبتتعبيني أكثر إذا كلتي دواج والتزمتي به
مهره : فالك طيب ..
راشد : يالله تصبحين على خير ..
مهره : وانته من أهله ..
ودخل راشد حجرته .. وسارت مهره حجرتها بس يوم توها بتدخل تذكرت ميره.. عقّت مهره عباتها وشيلتها وسارت حجرة اختها .. ويوم دخلت ما حصلت ميره .. دورتها في الدور الفوقي كله وما حصلتها .. ويوم نزلت وسارت حجرة الضيوف بعد ما حصلتها .. وسارت المطبخ التحظيري وبعد ما حصلتها .. ويوم سارت الصاله حصلت ميره يالسه على الغنفه ومتربعه وحاطه راسها على الغنفه وراقده .. كانت تترياهم ورقدت ...
يلست مهره عدال ميره .. ومسحت على راسها .. انتبهت مير لأختها .. نشّت ميره ولوت على اختها ..
مهره : هههههه شو هالحب اللي نزل مره وحده ..
ظربت ميره مهره على ظهرها ..
ميره : جب حب .. انتي آخر من يرمس يا الحماره
مهره : بسم الله وأنا شو سويت ..
ميره : أبداا ما سويتي شيء .. المهم الحين.. شو تاااااانسين؟
مهره : ههههه أرقص على ريل ..
ميره : الحمد لله ..
مهره : واميه شحالها .؟؟
ميره : الحمد لله بخير ورقدت عقب ما طمنها ابويه عنج..
مهره : الحمد لله .. صح ؟؟شو مرقدنج في الصاله .. خلصن الحجر ؟؟
ميره : ويا راسج .. كنت أترياكم ..
مهره : حلفي بس .. عيل شو رايج اننا من ربع ساعه واصلين لا وخطفنا جدام الصاله ورمسنا .. هذا كله وما حسيتي ؟؟
ميره : امممم لا..
مهره : انزين خليينا ندور شيء ناكله .. من البارحه ما كلت شيء
ميره : صباح الليل ... حد ياكل الساعه ثلاث ونص
مهره : قومي قومي .. طااعوا منو يرمس بس
وسارن المطبخ التحظيري وسون 2 نودلز ولسن ياكلن ويسولفن في المطبخ ..
ووصلت الساعه اربع الفير .. ترين البنات الصلاه .. وعقب ما صلّن رقدن ..
وبالباجر على الساعه 10 الضحى نشن ... وعقب ما نزلن تحت وتريقن يلسن ويا امهم وابوهم وراشد وميوود والشويبه محمد ..
محمد : هااه بنيتي شو تحسين بعمرج الحين ..
مهره : الحمد لله فديتك .. أخير اليوم
بو راشد : كلتي دواج ولا بعدج ..
مهره : أكيد كلته..
بو راشد : هيه جيه أباااج ..
ميره : خلصتوااا .. بس تتنشدون عن أخبار الأخت .. وأنا ماشاء الله بنت البطه السوده
ام راشد : هههههههه يا ويلي عليج بس..
راشد : يالله عيل أترخص منكم الحين ..
ام راشد : وين وين ؟؟
راشد : اميه .. تراني قلتلج البارحه اني بسير العين ..
بو راشد : عندك شغله هناك ؟؟
راشد : بسير ويا غيث صوب ربيعنا علووه ياي من العمره وما سرنا نسلم عليه ..
بو راشد : حلييله رد السلام عليه ..
راشد : سلامن يبلغ ..
ام راشد : هاالله هالله في عمرك .. وعن السرعه ..
راشد : هههه ان شاء الله
ميره ( حاطه ايدها على خواصرها ) : نعم نعم نعم .. ما شيء حتى نحن نبغي نسير نتحوط
ام راشد : هيه والله يا بو راشد .. شو رايك نسير على اختي ام حمد بالمره ونقيل عندهم ..
مهره : هيه يا بويه دخيلك وافق .. خلنا نشم هوا شوي .. دومنا محكورين في هالبيت ..
بو راشد : ان شاء الله فديتج .. على امرج
مهره : فديت روحك انا ..
ميره : ليش انتوا جيه ؟؟ انا طالبه السيره
راشد : وحليلهم يغارون ..
بو راشد : وانته يا بويه شو رايك تعزم ويانا ؟؟
محمد : لا لا ورايه شغل
بو راشد : العزبه الخداااديم بيعابلونها .. انته سر ويانا
محمد : لا يا ولدي.. هاذيلا ما يعرفون مونتهم عدل .. أنا بيلس هنيه ما عليه شر ..
مهره : دخيلك يا يدي .. سر ويانا .. نحن ما بنبات هناك ... ما يظر يوم واحد ما تسير لها العزبه ..
ميره : ها يدي شو قلت ؟؟
محمد : شو أقول بعد.. يصير خير
راشد : يالله عيل خلصوا مونتكم بسرعه .. لازم أكون عند الريال قبل الغدا
ام راشد : ان شاء الله يا ولدي ..
بو راشد يركز على مايد اللي طايح على الغنفه ويشوف التلفزيون بدون ما يتحرك..
بو راشد : ميرووه شوفي اخووج بلاه صااخ
وتسير ميره تشوف اخوها ..
ميره : هههههه رقد
ام راشد : فديته من الساعه خمس ناااش يدابج ..
بو راشد : ما عاليه خلوه راقد لين نروح ..
ام راشد : مهره سوي لبنت خالتج حصه وقوليلها اننا بنيهم ..
مهره : ان شاء الله اميه
وهنيه قام راشد من محله ويلس عدال مهره ..
مهره : بلاك؟؟
راشد : ما بلايه شيء ..حرام يعني .. كنت يالس تحت ويلست فوق الغنفه ظهري عورني
مهره : اهااا ..
( أصلا راشد لا عوره ظهره ولا شيء.. من أول ما سمع طاري حصه ارتبش )
اتصلت مهره على بيت خالتها .. بس الصدمه ان اللي شله غيث..
مهره : السلام عليكم
غيث : وعليكم السلام والرحمه
غيث : منو ويايه؟؟
مهره : ( متردده ) أنـ ـ ـ ـا مـ ـ هـ ـ ـره
غيث : مهره بنت خالوه حمده .. ولا غلطان
مهره : هيه انا
غيث : يا مرحبا بج والله .. شحالج؟
مهره : بخير الحمد لله
غيث : عساه دووم .. بس بغيت أتخبرج ؟؟
مهره : خير ان شاء الله
غيث : رووويشد وينه عنج .. قوليله اني من متى أسويله وكله مقطووع
مهره ( تصد على راشد ) : وين تلفونك ؟
غيث : أحيده عند ميوود يلعب سنيك ..
ويسير راشد صوب مايد ويحصل التلفون تحته .. وما فيه ولا نقطه ارسال
مهره : جان بتسوي له الحين سوله التلفون عنده ..
غيث : اوكيه .. بغيتي حصيص .؟؟
مهره : هيه اذا ما عليك امر..
غيث : افااا .. دقيقه بس ..
ويوطي غيث السماعه ويزقر على حصه ..
وشوي أن حصه توصل وترمس مهره ..
وفي نفس الوقت كان غيث يرمس راشد .. وكان غيث يالس عدال حصه ..
حصه ( متحمسه ) : يا مرحبا يا مرحبا الساااااع والله .. هلا بالغلا كله ..
مهره : احم احم .. اخجلتي تواضعي ..شحالج الشيخه ..
وهنيه كان غيث يرمس راشد .. وراشد في عالم ثاني يتسمع لحصه وهيه ترمس..
غيث : حوووووه انا ارمسك.. وين وصلت ؟؟
راشد : هاه .. وياك وياك ؟؟
غيث : باين .. انزين شو رايك الحين ؟؟
راشد : رايي في شو؟
غيث : ويا راسك وانا من الصبح أرمس منووو .. أطريلك سيارتي .. شو رايك ابيعها واشتري نيسان وسط؟؟
ونرد لحصه ومهره :
حصه : قولي والله .. حلفي ..دخيلج ارمسي صدق
مهره : والله العظيم
حصه : دخيلج عيدي كل اللي قلتيه مره ثانيه ..
مهره : الحين بنظهر وبني عندكم العين ..
حصه : الله .. والله أني مستااااانسه لدرجه ماا تتصورينها ..
مهره : انزين يالله بخليج .. بسير اتلبس وأخلص شغليه .. ميرووه سبقتني .. وبعد بالمره بسوي حق رفووع إذا بتخاويينا
حصه : بعد رفوووع ..صدق وناسه .. يالله يالله مع السلامه ..
مهره : مع السلامه ..
سوت مهره تلفون لرفيعه وقالت انهم بيسيرون العين وبيردون دبي عقب المغرب ..
وعزمتها هيه وامها ..وشاورت رفيعه امها .. امها وافقت وبذالك رفيعه وامها بتسير وياهم ..
وعقب ما خلصوا .. ساروا الشباب في سيارتين .. سياره بي ام يسوقها بو راشد ووياه حرمته وابوه محمد ومايد .. وسيارة استيشن يسوقها راشد ووياه خواته وام حارب ورفيعه ..اما اليازيه وخليفه من البارحه ساروا يتكشتون وساروا صوب دبا ..
وفي الدرب .. وفي سياره راشد .. وبالتحديد جدام منطقه بيت خالته بعشر دقايق ..
حاطين أغاني وربشه في السياره .. وشوي راشد يشوف سياره نيسان تديّم له وراه .. قصّر راشد على المسجل ووقف السياره على طرف الشارع .. ووقف النيسان وراه .. نزل راشد ونزلوا الشباب من السياره .. كانوا مانع وحمد .. وعقب ما سلموا على بعض ..
كانت ام حارب يالسه جدام.. ومهره وراها .. وميره الطرف الثاني وفي النص رفيعه .. وحمد ومانع كانوا واقفين عدال باب ميره .. وبالتحديد عدال مانع.. والسياره طبعا مخفي
حمد : يا مرحبابك والله
مانع : نورت البلاد بو سنيده
ميره ( في قلبها ) : بوجودك .. وهيه من استويت منوره ..
راشد : هههههه تسلمولي والله
حمد : وين وين؟؟
راشد : والله سايرين بيتكم ..
حمد : احلف بس وانا آخر من يعلم ..
راشد : وانته من متى تهوم .؟؟
حمد : امم تقريبا من الساعه تسع ..
راشد : عيل مخبرين هلك عالساعه 10 .. وتعاال .. غيثووه من البارحه يدري ..
حمد : هههههه ومن البارحه العصر ما شفته..
راشد : حشى .. ويالسين في بيت واحد ..ههههه
مانع : شو ياي بروحك ولا؟؟
راشد : الأهل كلهم ويايه .. ابويه سبقنا .. أكيد وصل ..
مانع : السلام عليكم ياللي في السياره ..
حمد : يا مرحابكن والله ..
رفيعه متيبسه محلها .. ما تصدق ان بينها وبين حمد بس متر وشوي.. ولو الود ودها جان نزلت من السياره وقالتله .. الله يحييك.. بس الثقل زين..هههههه
ام حارب : الله يحييكم عيالي .. علومكم لاخليت منكم ؟؟
هنيه حمد ومانع استغربوا.. منو هاي ؟؟؟
مانع : بخير يعلج بخير ..
حمد : بخير وعافيه ربي يسلمج..
راشد (بصوت واطي) : هاذي حرمة عمي ..
هنيه حمد افترت عينه صوب الدريشه .. يا ربي .. أمووووت وأعرف منو ورا هالدريشه ..
ورفيعه طاحت عينها على حمد .. وهنيه تمت تدقق فيه عدل .. كان لابس كندوره بيج وغتره نفس اللون ..
ومانع .. آآآخ يا مانع لو تعرف انته عدال منو واقف .. جان لزقت في الدريشه لزق .. بس يالله المخفي يلعب دوور ..ههههههه
راشد : يالله عيل .. بخليكم .. بنتشاوف في بيتكم يا حمد ..
حمد : ان شاء الله ..
مانع : نحن بنسير بعدنا البيت بييب اميه عندكم لأنها بروحها في البيت وابويه من الفير سارح المزرعه ..
راشد : ان شاء الله خير ..
حمد : يالله عيل .. الله يحفظكم..
ويركب راشد سيارته ويسير صوب بيت حمد .. وحمد ومانع ساروا اييبون ام مانع ..
وفي بيت قوم منصور ..
منصور : امييييييييييه ..
بس محد يرد عليه ..
ويسير حجرتها وما يحصلها .. وسار حجره شمه .. كانت شمه يالسه تسحي عنوود ..
منصور : شميم .. وين اميه
شمه : سارت بيت خالتيه عفرا
منصور : انزين سويلها وخليها تي بسرعه..
شمه : شو تبابها إلا من ربع ساعه ظاهره
منصور : قوليلها تي عسبة نسير بيت اميه
شمه : غريبه ؟؟ هالوقت
منصور : يا ربي منج يا الله رمسيها وقوليلها ... هبابنا نوصل .. الساعه بتوصل 11 ونص ..
شمه : انزين ..
وتسوي شمه تلفون لأمها اللي كانت في بيت اختها .. وبيت اختها عدالها .. واختها هيه ام سويلم .. واختها عذابه هيه ام خالد .. وصلت ام منصور البيت عقب خمس دقايق .. وكان منصور توه نازل من الدري..
منصور : توج يايه .. يالله يا اميه .. العرب يتريوونا ..
ام منصور : اي عرب .. شو سالفتك؟؟
منصور : اميه .. حمد مسولي تلفون وقالي اييبكم .. وهناك خالتي حمده وعيالها كلهم ووياها بعد ام حارب وعزمونا عالغدا
ام منصور : زين زين .. يالله خمس دقايق وبزهب ..
منصور : يالله انزين انا اترياكم ..
ام منصور : وانته بتودينا ؟
منصور : هيه..
ام منصور : خل عنك .. حمد بيهزبك
منصور يطالع امه وكله خقه ..
منصور : احم احم .. هوه قالي هاتهم ..
ام منصور : على قولتك .. يالله بسير اتلبس
وسارت ام منصور وتلبست وركبوا السياره وطلعوا من الهير ... ويوم وصلوا حصلوا السيايير ما شاء الله .. سيارتين مالت قوم راشد .. من غير سياره حمد وسياره مانع وسياره غيث وسياره مالت قوم حمد للعايله .. سياره حمد ومانع وراشد في الحوي داخل البيت .. والباجيات في الكراااجات اللي برع ..
الشباب في الميلس .. ما عدا غيث وراشد اللي ساروا صوب ربيعهم يسلمون عليه.. وأصروا على الشباب ايوون وياهم بس تعذرواا ..
والحريم يالسات في الصاله.. البنات على طرف والحرمات على طرف وكله سوالف وظحك ..
وعقب الصلاه .. سارن البنات ( ميره + مهره + رفيعه + حصه + شمه ) المطبخ عسبة يعابلن الغدا والسلطات وهالامور ..
وعقب ما تأكدن أن كل شيء جاهز .. ردن مهره وحصه وشمه البيت وتمن ميره ورفيعه في المطبخ ..
ميره : اقول رفووع شلي جيك اللبن وأنا بشل الدهن وجيك الماي ..
رفيعه : اوكيه ..
شلت رفيعه صينيه اللبن وتريت ميره تطلع جيك الماي من الثلاجه .. تجدمت رفيعه وقالت تظهر تترياها عند باب المطبخ .. وفي نفس الوقت كان حمد حادر المطبخ .. كان يعابل في التلفون .. وكان ياي يقول للبشكارات يحطن الغدا .. ورفيعه كانت تمشي وصاده وراها.. وفجأة تدعم حمد .. وينجب اللبن على حمد .. وحمد مايعرف شو السالفه .. شهق حمد .. لأنه ما عرف شو اللي استوى ولأن اللبن بارد .. وفي نفس الوقت شهقت رفيعه اللي ما تعرف شو ياب هالمخلوق جدامها .. لا وحمد بعد... يالفظيحه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الجزء السادس عشر
شكل حمد كان يهلّك من الظحك .. وتلفونه تسبح باللبن .. غدا لونه أبيض .. ونعاله خايس وكندورته خايسه بكبرها .. ميره من شافت حمد سيده اندست ورا الثلاجه .. وحمد ما شاف ميره يعني كان ماخذ راحته الأخ.. رفيعه نزلت راسها .. ويوم رفعت راسها شافت حمد يبتسم لها .. ردت رفيعه ونزلت راسها .. ومن الموقف اللي استوى حتى رفيعه ما حسّت بعمرها .. يعني نست انها هب متغشيه .. بس كانت متحجبه .. وكانت شاله الصينيه وكانت لابسه كندوره ورديه وشيله نفس اللون .. رفيعه يوم نزلت راسها استحت وبانن غمازياتها ..
حمد في خاطره : فديت هالغمازيات والله .. والله واحلويتي يا رفيعه ..
وحب حمد ينرفزها شوي ..
حمد : اوووف زين جيه .. الحين كيف بسير عند الرياييل
هنيه رفيعه تلومت وزاغت من جديه حمد ..
رفيعه : ( بنبره فيها خوف ) إسمحلي .. والله ما شفتك ..
حمد : هالطول وهالعرض وما شفتيني ..
رفيعه : ......................
حمد ويوم شافها طفرت ..
حمد : ههههه أتمصخر وياج .. تفداج الكندوره ويفداج التلفون ويفداج النعال ... وكلي أنا افداج ..
رفيعه : ( وصلت حدها من المستحى ) مـ ــ ـــ شـ ــ ـكور .. بقول حق حصه تييبلك كندوره
حمد : ما يحتااي الشيخه .. امبوني بتسبح عقب الغدا .. بس خلاص .. الحين بتسبح ..
رفيعه : ...........
طلعت رفيعه من المطبخ بعد ما حطت الصينيه على الطاوله وتم حمد في المطبخ .. سارت رفيعه ونست ان في وحده اسمها ميره مندسه في المطبخ .. سار حمد صوب الثلاجه بيشرب ماي .. هنيه ميره تيبست مكانها .. ما عرفت شو تسوي .. تقرب حمد وشرب ماي .. وشوي تدش البشكاره.. ويصد حمد صوبها ..
البشكاره حاطه ايدها على خدها وتشوف منظر اللبن .. وهيه مستقطعه ..
البشكاره : اوووف منو سوي جبي لبن ؟؟
حمد : هههه شوي شوي عن تطلع عيونج ..
البشكاره : بابا حمد .. ليش جبي لبن .؟.؟. الحين ماما موزه سوي جنجال حق أنا .. لبن ما في .. لبن فيه بس واحد جيك ..
حمد : لعنبووووووها من رمسه .. شوي شوي على عمرج ..
البشكاره : شو هازا مشكل ..
حمد ( سرح ) وأحلى مشكل بعد
البشكاره : الحين شو سوي ؟؟ ما في لبن ..
حمد : نفااد .. فدوه عن راسها .. امم قولي حق ماما موزه حمد جبي لبن .. اوكيه ..
البشكاره : زين ..
حمد : والحين جلبي ويهج وازقريلي حصيص ..
البشكاره : اوكيه بابا ..
سارت البشكاره وزقرت حصه .. وطول الوقت ميره ميوده عمرها ... وفي قلبها دق طبوول ..ههههه
وشوي أن حصه تدخل ..
حصه : اووب اووب اووب .. منو جاب اللبن
حمد : حصيص أبغيج تييبين ثيابي بسير أتسبح بسرعه قبل لا يتغدون
حصه : اوكيه .. بس منو جاب اللبن .. (ويوم انتبهت لحمد) طلعت هاذيج الظحكه .. اللي من الخاطر ..
حمد : حلفي بس .. قايللج نكته أنا
حصه : لا .. بس شكلك ههههههههه
حمد : ويا راسج .. يالله استعيلي الرياييل في الميلس
حصه: بس فضيحه تدخل البيت جيه ..
حمد : يالذكيه بدخل من الباب اللي ورا ماال المطبخ الداخلي .. وعقب بسير حجره الضيوف وبتسبح هناك .. فهمتي ولا ..
حصه : عيل ليش زاقرني ..
حمد : عسب تتيبيلي ثياب من حجرتيه وتحطينهن في الحجره اللي بتسبح فيها ..
حصه : اهااا ..
حمد : لا اها ولا اهيي سيري بسرعه .. أنا سيده بسير الحجره .. واترياج هناك ..
حصه : اوجييه ..
طلع حمد وسار صوب الباب اللي يودي المطبخ .. وتحت حصه في المطبخ لأنها أمها قالتلها تييب لومي من الثلاجه .. سارت حصه صوب الثلاجه .. وأول ما شافت ميره ..
حصه : ميرووووه .. شو تسوين هنيه ؟؟ وليش مندسه ورا الثلاجه ..
ميره : هاااه .. لا ما شيء بس اخووج كان داش المطبخ ..
حصه : واندسيتي ورا الثلاجه ..
ميره : ( تبتسم ) عليج لمبه ..
حصه : وشفتي شكله وهوه خايس لبن ..ههههه
ميره : لا ما شفته .. يالذكيه شقايل بشوفه وانا مندسه هنيه ..
حصه : هههههه مستغربه شقايل انجب عليه هههههههه
ميره : ( حاولت تغطي على اللي شافته ) يمكن زل ولا شيء..
حصه : واي نت .. انزين يالله نسير داخل .. اووه تعالي نسيت اميه مطرشتني اييب لومي
ميره : انتي ظهري كمن حبه وأنا بقصهن ..
وعقب ما خلصن ردن الفله ..
ويوم دخلن الصاله .. كانت توها رفيعه داخله .. كانت رفيعه يايه من الحمام اللي عدال المطبخ .. كانت تغسل كندورتها .. كانت خايسه لبن من تحت .. وكان شكل الكندوره باين انها مغسوله .. بس مب وايد ..
حصه : هااه وينج ؟؟
رفيعه : هنيه .. ما تشوفيني يعني ..
حصه : ههه ويا راسج .. أطري من وين يايه ؟؟
رفيعه : كنت أغسل كندورتيه..
ميره : ( تستهبل ) وشو مخيسنها ؟؟
رفيعه : هاه .. ما أدري شو مخيسنها ..
حصه : هههه كل واحد مخيس من صوبه .. وسارت حصه حجره حمد عسب تييبله ثياب..
وعقب الغدا ..
ميره ورفيعه يتغسلن صوب المغاسل ..
ميره : رفيعه ..
رفيعه : خير ..
ميره : كلي أنا أفداج ..
هنيه استقطعت رفيعه .. وانتبهت ان ميره كانت موجوده في المطبخ ..
رفيعه : هااه ..شو؟؟
ميره : ههههه
وتتدش مهره عليهن ..
مهره : بلاكن انتن ..
رفيعه : لا فديتج ما بلانا شيء ..
مهره : زين .. يوم بتخلصن تقوولكن حصه كل وحده تاخذلها كوب جاهي وتسير فوق ..
رفيعه : اوكيه الحين بنسير ..
وعقب ماسارن فوق ..
حصه : ههههههههه حلفي..
رفيعه : انتن خلن هالسالفه عنكن الحين .. لازم تحشن .. مهرووه كلتي دواج ؟؟
ظربت مهره بإيدها على يبهتها ..
مهره : اوووووووه نسيت ..
ميره : سيري قبل لا يسوييلج ابويه عرس ..
سارت مهره وصبت لها ماي اللي كان فوق الطاوله ..
رفيعه : وين شمامي؟؟
حصه : قالت بتعطي عنوودي دواها وبتي ..
وعند الشباب ...
منصور : أقول يدي شو رايك تسير عزبتنا ؟؟
محمد : والله ما عندي خلاف ..
منصور : عيل خلاص .. اليوم بسير فياك العزبه ..
محمد : بسير وياك وويا هالرغود ..
حمد : هههه ومنو هالرغود ..
محمد : انته وربيعك .. أشهد أن منصور شيخكم ..
منصور : كح كح ..
مانع : يا خي شوي شوي عن يطيح فجك ..
منصور : ههههه أشفق على حالكم والله ..
حمد : أقول يدي ما نروم نسير فياك .. عندنا شغله ..
ويدور محمد عصاته..
مانع : لا لا افااا يا يدي ما تتحمل مصخره .. حموود يقص عليك ..
منصور : يقصون عليك يدي ..
حمد : بصوت واطي ويتحلف لمنصور .. (( براويك ))
محمد : الشووو .. الشوو ؟؟ يالله قوم راوني
منصور : خخخخخ يدي لطشها قبلي ..
مانع : يدي شوف شوف .. منصور يرمس من وراك .. يقول الشيبه مقصه ..
ويصد الشيبه صوب منصور .. ومنصور اللي ما رام يدافع عن نفسه ..
منصور : والله يقصون عليك ..
ويصيح تلفون حمد .. بان على حمد أنه متضيج .. وقام من محله وسار نص الحوي .. وبالتحديد جدام سيارته ..
حمد : ( متضيج ) خير الشيخه شو تبين ؟؟؟
مها : بسم الله .. العرب يسلمون قبل
حمد : السلام عليج .. ارتحتي ..
مها : وعليك السلام .. وما ارتحت .. من ورا خاطرك طلعت ..
حمد : من ورا خاطري ولا جدامه.. عراسج هوه
مها : حمد شو بلاك عليّه .. متضيج وتحط حرتك فيّه ..
حمد : يا هي حاله ..
مها : حمد .. ممكن تسمعني ؟؟
حمد : خير
مها : حمد والله اني هب راعية حركات .. انا طحت عليك بالغلط .. بس أسلوبك جذبني لك .. صدقني
حمد : انزين وشو تبغيني أسوي ..
مها : ممكن تتقبلني كـ ربيعه ..
حمد : السموحه .. بس أنا هب راعي هالحركات ..
مها : أي حركات ؟؟ أنا ما قلت لك اطلع ويايه ولا مواعدتنك .. بس في التلفون .. انته ليش مكبر الموضوع ..
حمد : خلصتي كلامج ؟؟
مها : هيه .. واتريا جوابك ..
حمد : انزين .. اسمعي يا بنت الناس ..اللي تسوينه غلط .. وانتي تعرفين أنه غلط .. وما أعرف ليش مصره ترتكبين هالغلط .. هالشيء مب لصالحج .. وخذيها نصيحه
مها : حمد .. أنا هب ياهل .. وأعرف الصح من الغلط .. ما في داعي تنصحني ..
حمد : اوكيه .. لا تقبلين نصيحتي .. بس حبيت أقولج انسي رقمي.. وانسيني ولا تعلقين في بالج أمل لو المووت توصليله .. وياليت ما تتصلين مره ثانيه ..
مها : لحـــ .......
وبند التلفون في ويهها .. وشوي أن مسج واصلنه ..
(( ظلنّي في ظليلك .. مدخل الله دخيلك ..لاتعذب خليلك .. دامني عاشقّنـــك ... مها ))
مسح حمد الرساله ورد الميلس ..
مانع : هااه بو شهاب خير ان شاء الله ..
حمد : ( يحاول يبتسم ) سلامتك والله ..
منصور : هاه يدي ؟؟ متى تبانا نسير ..
محمد : عقب صالة العصر ان شاء الله ..
منصور : غايته ..
مانع : اقول يدي.. وين عمي بو راشد ؟؟
محمد : والله يا ولدي يقوول ساير يسلم على بو هادف وبيرد ..
وعقب الصلاه ساروا كل الشباب العزبه .. والحريم سارن يسلمن على يران موزه اللي رادين من الهند ..
يعني البيت مافيه غير البنات .. حتى ميود وعلاوي ساروا العزبه ويا الشباب .. وعنود سارت ويا امها صوب الحرمه ..
والحين البنات كلهن يالسات في البيت وبالتحديد في الصاله اللي فوق ..
حصه : وفضالنا البيت ..
ميره : وبدا الشيطان يوسوس في راس حصيص ..
مهره : والله يعينا ..
رفيعه : الله يستر بس!!
شمه : ههههه حرام عليكن بلاكن عليها .. ما قالت شيء انزين ..
حصه : شدراني ابهن ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك