رواية طحت طيحه في هواكم -18
يعني البيت مافيه غير البنات .. حتى ميود وعلاوي ساروا العزبه ويا الشباب .. وعنود سارت ويا امها صوب الحرمه ..
والحين البنات كلهن يالسات في البيت وبالتحديد في الصاله اللي فوق ..
حصه : وفضالنا البيت ..
ميره : وبدا الشيطان يوسوس في راس حصيص ..
مهره : والله يعينا ..
رفيعه : الله يستر بس!!
شمه : ههههه حرام عليكن بلاكن عليها .. ما قالت شيء انزين ..
حصه : شدراني ابهن ..
مهره : شو رايكن نسير نيلس فوق العرقوب ..
حصه : لا .. بنيلس عقب .. بس الحين بنسوي شيء ثاني ..
ميره : قولي يا ام الدسايس ..
حصه : ترينّي بسير وبيي
وتيود ميروه من ايدها ..
ميره : ايه وين بتوديني ؟؟
حصه : ههههه باكلج ونزلن تحت وسارن صوب الميلس ..
ميره : ليش يبتينا هنيه ؟؟
حصه : صبري علّيه انتي
وتسير صوب الغنفه وتطلع من تحتها الشريط ..
ميره : شو هالشريط ..
حصه : شريط الأحلام... قومي بسرعه خلينا نسيرلهن
ويوم وصلن الصاله ..
حصه : يالله عحجره حمد ..
رفيعه : هاه .. شو بتسوين ؟؟
حصه : انتن تعالن ..
وسار حصه الحجره ولحقنها البنات.. أول ما دشن الحجره حصلنها مزبله .. الفراش مب مرتب .. والكبت نص بيبانه مفتوحات .. والتواليت ( التسريحه ) مبهدله مشط هناك وعطر غطاته طايحه تحت وغتره طايحه عدال الشبريه وسده الشبريه مفتوحه .. بالمختصر المفيد .. حجره مبهدله وحالتها حاله
سارت حصه صوب التلفزيون وحطت الشريط في الفيديو..
ويلست رفيعه فوق الشبريه ووياها شمه .. وميره ومهره وحصه تحت .. ويلسن يشوفن شريط السيايير .. رفيعه مب مهتمه بالشريط .. تمت تشوف حجره حمد وتتمنظر فيها .. وطاحت عينها على دفتر كان على طاولة عدال الشبريه .. كل البنات مشغولات في الفلم ومحد منتبه .. قامت رفيعه ويابت الدفتر .. تساندت رفيعه على الشبريه وحطت الدفتر جدامها .. فتحت أول صفحه وشافت شخابيط .. ( اقول بو شهاب طلبتك طلبه .. بدال ما تتغزل وما أدري الشو .. أبغيك تكتب قصيده في نادي العين .. والله انه يستاهل .. يالله أترا القصيده .. منصور ) ظحكت رفيعه على رمسه منصور .. ويوم جلبت الصفحه شافت هالقصيده
صوبتني بنت مزيونه ... صوبتني وثر مصطابه
صوبتني نظرة اعيونه ... يوم فيّه شل بهدابه
أشهد أنا النفس محزونه ... عفت زادي مول ما هنا به
شب الوسط ليوف بركونه ... وسط قلبي نار لهّابه
وزرع قلبي هافت غصونه ... والسبب م الحب وعذابه
المحبه عوق ومهونه ... خص كان صغير نبدا به
وتمت تقرا القصايد .. ويوم لاحظت ان الفلم بيخلص عقّت الكتاب في السده بسرعه
ميره : والله روووووووعه ..
مهره : عنلاتكن.. أنا ما أحب هالسوالف وخليتني أتعلق فيها ..
حصه : ههههه حد قالج شوفي
شمه : أحلى شيء النيسان الوسط الذهبي .. يخبل ..
ميره : هاه رفوع .. شو رايج في الشريط ..
رفيعه : الفلم؟؟ هيه وايد حلو..
حصه : يالله عيل بسرعه بسير أرد الفلم وبرد .. اذا درا حمد بيدفني في نص الحوي ..
مهره : تستاهلين ههههه .. يوم قلتلج نسير العرقوب أحسن ..
ميره : ويا روسكن ما شيء باجي عن الصلاه .. بس باجي ساعه إلا ربع ..
وعقب ما رتبن أمورهن سارن فوق العرقوب .. طبعا عقب ما ترخصن من الحريم .. وقاللهن أول ما يأذن يردن البيت ..
سارن البنات ويلسن فوق العرقوب .. ويلسن يسولفن .. كان العرقوب بعيد عن الشارع شوي .. يعني محد بيلاحظهن ... بس في واحد لاحظهن .. كان راكب سياره بي ام .. ومعمايه كامل .. نزل الدرايش اللي ورا وشغل المسجل .. وكانت غنيه عالي مستواه وطول عليها عالآخر.. وتم يحاوط جدامهن ..
مهره : يعلني بلا شيفته .. والله ما عنده سالفه ..
ميره : ( تغني ويا الجسمي ) كل الحسن في عيونه وويه ومحياه ..
رفيعه : والله انج متفيجه ميره هانم ..
حصه : هههه الأخت ارتبشت .. لا قومي ارقصي بعد ..
قامت ميره تسوي عمرها بتقوم ترقص
حصه : ما صدقت الاخت .. هيه هيه .. قري عن يشوفج هالخايس ويقول عيبتهن السالفه ..
ميره : ويا راسج وتحيديني راعية هالحركات .. كنت أتمصخر بس..
شمه : افففف لاعت جبدي من هالغنيه .. حط غيرها ..
رفيعه : اسمكين انكن ... قومن خلنا نرد البيت قبل لا يرد ..
مهره : ما في داعي حبيبتي .. هكووه رد ..
حصه : صبري .. أول ما يروح بنروح ..
رفيعه : استعدن ..
اول ما روح .. نزلن البنات بسرعه وحاولن يسرعن حركتهن عسب يظيعنه .. ووصلن البيت بسلام ... ويوم وصلن ... شافن كل الشباب ردوا من العزبه
حصه : وااااااااا خيبتيه ..
ميره : بسم الله.. بلاج؟؟
حصه : لو درا حمد ولا غيث عن سيرتنا للعرقوب .. هالمره صدق بيدفنونا .. بس هالمره في نص الحاره ..
رفيعه : انزين ليش ؟؟ نحن ما سوينا شيء غلط ..
حصه : هاهاهاهي هاذيلا ما عندهم غلط ولا هب غلط .. بس هم ما يدانون فكره سيره العرقوب من الأصل ..
مهره : والحل يعني ؟؟
شمه : اممم أنا عندي الحل ..
رفيعه : قولي ..
شمه : انتن تريني تحت الكراج وانا بستطلع الأمر ..
حصه : أوكييييه بس بسرعه ....
دشّت شمه داخل البيت وردت وطلعت بسرعه ..
ميره : ليش رديتي؟؟
شمه : غيثوه يرمس بالتلفون في الحوي
حصه : ياااويلنا ..
وشوي يسمعن الأذان وعرفن انهم الحين بيظهرون ..
ويترابعن البنات صوب السكه ..
حصه : اوووووووب الحمد لله ..
رفيعه : هههههه اشكالنا تظحك ..
شمه : اووووووووش اسكتن .. بيسمعونا .. وشوي ان الشباب يطلعون من البيت ويركبون سياييرهم ويروحون المسيد .... دخلن البنات شوي شوي .. وتمن يتظاحكن على أشكااااالهن ..
وعقب وما صلوا المغرب .. تزهبوا العرب لردة دبي ...
وفي دبي وبالتحديد في حجرة ميره .. وبالتحديد على الساعه تسع..
رفيعه : يالله بخليكن ..
مهره : وين وين ؟؟
رفيعه : شو وين بعد.. برد البيت ..
ميره : ليش انزين ؟؟
رفيعه : حلفي بس .. ولا شو رايج ارقد هنيه بعد ..
مهره : وليش لا ؟؟
رفيعه : ماماتي .. لا تنسين ان باااجر .. مدرسه .. ميم.. دال .. راء .. سين .. هاااء
... وبمعنى آخر .. اس .. سي .. اتش ..دبل اووه .. إل.. سكووول ..
ميره : وشو يعني ؟؟
رفيعه : يعني .. رقاد من وقت .. ونشه من وقت .. وتصبيحي على ويه براين اللي ما عنده سالفه ..
مهره : حمدي ربج بس.. انتي اهون عنا .. نحن ثنويه عامه ..
رفيعه : هيه والله الله يعيينكن ...
ميره : آآ مين ..
رفيعه : وهالله هالله في النسبه اللي تبيض الويه .. تسمعني ولا ... بس هب تغلبن نسبتي ..
ميره : عنبووووووه وانتي حد يروم يوصلج . حد ايييب 92.5 شراتج .. لعنبوووووج كلتي الكتب ذييج السنه ..
رفيعه : خمسه وخميسه في عين الحسوود .. قولي ما شاء الله .. وييه وييه .. ظمنت رسوبي هالسنه ..
ميره : ههههههههه
مهره : لا ان شاء الله فال الله ولا فالج .. بتنجحين ان شاء الله ..
ميره : انا بودي عبينا وشيلنا عند البشكاره ..
مهره : وودي كندورتيه وياج
وطلعت ميره وسارت صوب البشكاره ..
رفيعه : مهرووه .. ابغيج تشدين حيلج انتي واختج .. ارمسكم صدق .. خلو عمي ثاني وعموه حمده يستانسون ..
مهره : ( تنزل راسها ) ان الله كتبلي اعيش لين ذاااك اليوم ..
رفيعه : ( معصبه ) ايه مهاري شو هالرمسه بعد .. ان الله راد بتعيشين لين ذاك اليوم .. وبتتمين عايشه لين الله يكتب لج .. خلي عنج هالرمسه .. والله يا مهرووه ان سمعت هالرمسه تطلع منج مره ثانيه .. صدقيني .. ما بتشوفيني يوم في هالبيت وانسي ان عندج بنت عم اسمها رفوع .. ( قامت رفوع بتطلع من الحجره )
مهره : رفيعه ..
وقفت رفيعه محلها بعد ما فتحت نص الباب ..
مهره : ادعيلنا بالنسبه الحلوه ..
رفيعه تصد وراها وتبتسم لمهره ..
رفيعه : بس لا تحلمين انج توصلين نسبتي ..
وطلعت رفيعه وسارت بيتهم ويا بشكاارتهم ..
وباليوم الثاني نشوا كلهم نشوا عالساعه ست الصبح ... وروحن ميره ومهره المدرسه وشلوا وياهم ميوود عسب يخطفونه على الروضه مالته .. وما بقا غير راشد وام راشد يالسين .. وبو راشد سرح ويا ابووه محمد صوب التله عندهم ركض ..
راشد : ( يحب راس امه ) يالله اميه بخليج ..
ام راشد : الله يحفظك .. بس يا ولدي بغيتك تودي اختك المستشفى .. اليوم موعدها ..
راشد : والدريول ؟؟
ام راشد : الدريول ابغيه يوديني بقظي لي حايه وبرد ..
راشد : اوكيه .. اول ما برد من الكليه بوديها .. لان عالساعه ست عندي شغله ..
ام راشد : يصير خير ..
راشد طلع من البيت ويرد يدخل ... ويسير صوب الطاوله وخذ اوراقه ورد وطلع ..
وفي المدرسه ...
ميره في صف ومهره في صف ..
ميره كان عليهم احتياط ..كانت يالسه على الطاوله تشخبط .. وشوي ان ربيعتها فاطمه تي عندها.. ومهره تكره هالانسانه كره .. وايد شايفه عمرها وترمس من طرف خشمها..
فاطمه : اقول ميره ..
ميره : ( من ورا خاطرها ) قولي ..
فاطمه : صدق اختج فيها سرطاان ..
ميره : ( منصدمه ) ومنو قالج ؟؟
فاطمه ساكنه في منطقه بعيده عن منطقه قوم ميره .. كيف وصلها الخبر؟؟
فاطمه : بعد ربج.. الحين صدق ولا ؟؟
ميره : هيه صدق وان شاء الله بيخووز عنها ..
فاطمه : ههههه ما شاء الله عندج أمل .. زين زين .. يا ماما السرطان معروووفه نهايته .. تعرفين شو معنى نهايته يعني الموووت ..
ميره : ( بصوت عالي ) جــــــــــــــــــــــــ ــــــــــــــــــب .. ( وتطلع من الصف بدون ما تستأذن الأبله وبندت الباب وراها بقووو.. وسارت الحماام وتمت تصييح .. )
شافتها الابله اللي كانت واقفه عليهم .. وتغيظت ..
الابله : فاطمه شو بلاها ميره ؟؟
فاطمه : ( بكل براااءه ) ما أدري .. كنت أسولف وياها .. وفجأة قامت وعصبت ..
الابله : بنات انا بسير عند الاداره شوي وبرد .. ما أبغي حد منكن يطلع برع .. ولا أبغي ازعااج .. عدالكن صفووووف تدرس..
البنات : ان شاء الله ..
ميره وهيه سايره الحمام شافتها مهره اللي كاان عليها عربي .. زاغت على اختها .. شافتها تمشي بسرعه وشكلها متظيجه .. حتى كل البنات صدن صوبها ..
سارت مهره صوب الابله ..
مهره : لو سمحتي أبله ..
الابله : نعم يا مهره ..
ميره : ممكن أسير الحماام ؟؟
الابله : عقب شوي .. الحين في جزئيه مهمه ..
ميره : دخيلج يا ابله ... اختي شيء بلاها ولازم أشوفها..
الابله : امممم انزين .. بسرعه ولا تتأخرين ..
طلعت مهره من الصف وسارت الحمام ..
وأول ما دشت شافت الحمام فاضي .. بس في باب مبند .. سارت مهره ودقت الباب ..
بس اللي في الحمام ما رد ..
مهره : ميره ...
ميره : ..........
مهره : ميره .. أدريبج انج داخل .. عشان خاطري فتحي الباب ..
وتفتح ميره الباب .. وكان شكلها انها صايحه بقووو بعد ..
مهره : شو بلااااااج؟؟ ليش تصيحين ..
ميره : .... ما شيء ..
مهره : لا شيء .. محد بيصيح بلا سبب ..
ميره : السخيفه مظيجتبي هيه ورمستها الخايسه ..
مهره : ههههه فاطمه ..شو قالتلج بعد ؟؟
ميره : ما شيء ما شيء ... خلاص ردي الصف الحين ...
مهره : لا هب راده لين ما تقوليلي شو السالفه ..
وشوي ان المساعده تدش الحماام ..
المساعده : ميره ... المديره تبغيج..
مهره : المدييييييره .. ليش ؟؟ ميره شو سويتي ؟؟
ميره : ما سويت شيء ... انتي ردي الصف الحين وبعدين بخبرج ..
مهره : امم اوكيه .. بس انتي جيه ما بتخليني انتبه في الحصه ..
ميره : انتبهي احسن لج .. اليوم خذنا جزئيه العربي وكانت صعبه شوي ويبالها تركيز..
مهره : اممممممم بحاول ..
وطلعن البنات وسارت مهره صفها وسارت ميره الاداره ..
وأول ما دشت شافت الابله اللي كانت واقفه عليهم يالسه والمديره جدامها ..
ميره : نعم ..
المديره : يلسي يا ميره .. بغيت أرمسج..
ميره : ان شاء الله..
ويلست ميره مجابل ابلتها ..
المديره : ممكن تفسريلي اللي سويتيه ؟؟
ميره : يالنسبه لشووو ؟؟
الابله : أولا بالنسبه للكلمه اللي قلتيها .. ثانيا بالنسبه ظهورج من الصف من غير اذن .. ثالثا : بالنسبه لتبنيدج البااب بقوو .. وانتي تعرفين انا ورا هالباب ابله يفضّل عليج احترامها ..
ميره : .............
المديره : ممكن اعرف ليش؟؟
وقالت ميره السالفه للأبله وللمديره .. ويوم تفهمن السالفه ..
المديره : الله يشفي اختج ان شاء الله ..
الابله : نحن مقدرين شعورج يا ميره .. بس اللي سويتيه غلط .. انا وفهمت السالفه .. بس ربيعاتج والمدرسه يوم بيعرفوون باللي سويتيه .. بياخذوون فكره غلط ..
ميره : اعترف ان اللي سويته غلط .. بس والله انها نرفزتني .. حاولت أيوّد عمري .. لاكن الرمسه اللي عقتها عليّه محد يراضابها ..
المديره : أعرف يا ميره .. بس مره ثانيه اذا حاولت فاطمه تنرفزبج ولا شيء قوليلي ولا قولي لأبله هدى ونحن بنتصرف..
ميره : ان شاء الله ..
الابله : يالله عيل يا ميره خلينا نرد الصف..
ميره : انشاء الله..
وطلعن الابله وميره من الاداره وسارن الصف.. ويوم دشن حصلن البنات مرتبشات وفاطمه كانت تظحك بصوت عالي ويالسه على الطاوله ..
الابله : فاااااطمه ..
نزلت فاطمه من على الطاوله بسرعه ويلست محلها .. والبنات يلسن محلهن ..
الابله : حبيبتي ميره يلسي مكانج
ميره : انشاء الله ..
الابله : ( معصبه وعينها على فاطمه وتأشر لها ) اطلعي برع ..
كانت الابله متظيجه من فاطمه علىاللي سوته في ميره .. وعلى الحركات اللي تسويها في الصف وما رامت تيّود عمرها من انها تطردها ...
عاندت فاطمه وما طلعت ..
الابله : تسمعين ولا لا ؟؟ قلتلج اطلعي برع ..
فاطمه : ( تشوف الابله وبكل احتقاار ) مب ظاااااهره ..
الابله : سالفه عنااد يعني ...
فاطمه : سميها مثل ما تبين ..
الابله : صدق انج قليـــ...... ( ويودّت عمرها )
الابله : عايشه ازقري المديره بسرعه ..
عايشه : ان شاء الله ابله ..
وبعد ما يت المديره وتفاهمت ويا فاطمه كانت ميره طول الوقت منزله راسها ..
المديره : فاطمه .. لبسي عباتج وهاتي شنطج والحقيني عالاداره ..
قامت فاطمه وبكل بروود وشلت عباتها وشنطتها وقبل لا تطلع حطت عينها في عين ميره .. وكاانت نظراتها كلها تهديد وحقد وشر .. وروحت عالاداره ..
وهذا أول يوم في المدرسه ... وعقب ما خلص الدوام ردوا البيت..
وفي السياره التهت مهره عن ميره .. وما سألتها .. ويوم وصلوا البيت .. قالت ام راشد لمهره أنها لازمت تتجهز على الساعه خمس لان راشد بيمر عليها ..
وفي بيت منصور ..
عنووووود : ماما ...أبغي اروووح مدرسه ..
شمه : هههههههه لاحقه على العثره ..
ام منصور : اووووف يالعنيد .. كلتيلي جبدي تراج .. قلنالج بنوديج السنه اليايه ..
عنود : لا الحين .. ابغي أسير ( وتمت تصيح ) وشوي أن منصور طالع من حجرته ..
منصور : بلاكم على عنودي ... منو مصيحنها ؟؟
شمه : الأخت تبغي تسير المدرسه ..
منصور : هههههه لاحقه ماماتي ..
ام منصور : شمه .. طالعي منو يانا .. أسمع صوت سياره ..
منصور : هذا خالد ويااه سويلم ..
ويسمعون دق على الباب..
ام منصور : وااااابويه عليكم .. جيه تدقون الباب .. هذا بيت خالتكم هب بيت اليران ..
سويلم : ههههههه السلام عليكم ..
خالد : هههه شحالكم ؟؟
( سالم ولد خاله منصور ..عمره 19 وفي كليه الطيراان .. وخالد ولد خالته بعد بس أكبر من سويلم بخمس شهور .. ويشتغل الصبح و يدرس في الجامعه مسائي )
وعقب ما سلموا ..
ام منصور : بنتي..سيري هاتي عصير لعيال خالتج ..
سالم : ما يحتاي والله هب عطشانين ..
خالد : ارمس عن عمرك .. أنا عطشان ههههه
منصور : وهاتي جيك بالمره حق دموع عنوووودي البطرانه .. خخخخخخ
ويصدون صوب عنود اللي مندسه عند امها..
خالد : هاااه حبوبه .. بلاااااااج .. وانتي دومج تصيحين ...
سالم : هههههههه خالتي هاذي ما ينفع تسمونها عنووود .. ظالمين هالاسم واايد ..
منصور : حدك عاااد .. هااي حبيبتي محد يقولها شيء ..
خالد : هههههه يا ويلي بس..
سالم : الحمد لله يوم اختك جيه .. عيل سلامي شو تقول عنها .. أصغر عنها ولسانها أطول عني ..
منصور : خخخخخ لازم .. ظاهره على اخوها ..
سالم : ويا راسك .. دوووم تقطعني وأنا البريء
وتموا الكل يتظاحكون .. حتى عنودي اللي كانت تصيح ظحكت ..
وفي بيت سالم بن محمد .. وبعد صلاة المغرب .. رفيعه يالسه في حجرتها وبالتحديد تحت علىالأرض.. حاطه اللابتوووب جدامها والأوراق منيه ومناك .. ومشغله غنيه ومرتبشه وتحل واجباتها .. وشوي تكتب وإلا القلم مخلص .. تعايزت تسير تفتح الكبت وتطلع القلامه من الصندووق.. كانت حاطه قلم في شنطتها مالت الإيد .. سارت ويابت شنطتها وحطتها عدالها .. كانت شنطتها نصها أوراق .. ومعظمها فواتيير .. وشويه أوراق مشخبطه فيهن .. طلعتهن كلهن جدامها وقالت ترتب شنطتها دام ان لها بارض.. وبالمره تبدل الشنطه.. كانت تتسّمع غنيه للحين أحبها مالت نبيل شعيل .. ويالسه تغني وياه .. وشوي ان روضه تدش عليها ..
روضه يوم شافت أوراق وقلامه تخبلت واستانست ..
روضه : أبااا اكتب..
رفيعه : يودي .. ( وطلعت ورقه مجسوووفه وعطتها لروضه وعطتها القلم اللي كان في الشنطه ) ..
وعقب ما خلصت رفيعه ترتيب .. تمت ترتب أوراقها مالت الكليه وتيمعهن في مكان واحد ..
وروضه فتحت الورقه وتمت تشخبط على ظهر الورقه .. ويوم شافت الورقه ما منها فايده .. جلبتها وتمت تشخبط جدام .. رفيعه مرتبشه ولا شافت الورقه اللي في ايد روضه .. بس أول رد صدر منها أول ما شافت أن الورقه غريبه عليها .. خذت الورقه من ايد روضه وتمت روضه تصيح .. وعطتها رفيعه ورقه ثانيه ..
رفيعه : يالله حبيبي.. شلي الورقه والقلم وشخبطي في الصاله ..
كانت رفيعه تبا تطلع روضه عسب تقرااا الورقه في هدووووء تام .. وعقب ما طلعت روووضه .. سارت رفيعه صوب الكمبيوتر وحطت ميووت ( صامت ) .. وعقب طاحت على الشبريه ..
فتحت رفيعه الورقه و كان فيهاااا ..........
تستحي مني وذابحني خجلها ... والخجل في عيونها زوّد حلاها
كلمةٍ في شفاها وعيّت تقلها ... ما قوت تنطق أحبك في شفاها
اعسل في حروفها ومحلى عسلها ... والغزل في عيونها وقلبي قراها
من مثلها في العذاري من مثلها ... توّها في حسنها بأول صباها
الله اللي جابها وجت في مهلها ... جتني ولا همها قول اقرباها
في الرموش أسكنتها وقلبي كفلها ... عن عيون الناس تجرحها باذاها
غاليه عندي ولا برضا زعلها ... وافيه عندي وأنا كلي فداها
والله إني ما أبي بنت بدلها ... ليتها لو كان تدري عن غلاها
وليتني يا ناس واحد من أهلها ... لاجل تهنى عيني بشوفة مناها
الخجوله آه ويلي من خجلها ... موت والله والخجل زوّد حلاها
وهنيه حست رفيعه بأن هالخط مب غريب عليها .. وين شايفتنه ؟؟ وين شايفته ؟؟ هيه .. في دفتر حمد .. يعني الرساله من حمد ..
هنيه رفيعه ما صدقت عمرها .. أنا غاليه على حمد .. لا ما أصدق .. فديتك والله !!!! لا بس .. شو كان يقصد ب (( ما قوت تنطق أحبك في شفاها )) يعني يعرف أني أحبه .. لا لا ما أظن .. يمكن بس عشان يظبط القافيه .. هيييه أكيد عشاان جيه .. مب مهم هذا كله المهم أن حمد يفكر فّيه وانا هامتنه .. يكفي بس انه قالي هالرمسه .. يااا ويل حالي أنا ..
وقبظت الدبدووووووب وحظنته بقوووو .. ويلست تتذكر موقفها مع حمد .. وشوي انها تفتح عينها وتفج ايدها عن الدبدووب وقلبها يدق طبوووول ... وقالت :::: لا يكوووووون؟!!!::::
سارت رفيعه بسرع صوب التلفون .. وسوت حق بيت عمرها ..
وشلته البشكاره ..
البشكاره : هلووو
رفيعه : (تبغي تسكت البشاره ) بخير الحمد لله .. وين ميره ؟؟
البشكاره : آوووت ..
رفيعه : ووووير؟؟
in the middle of the house.. البشكاره :
رفيعه : ويا راسج قولي في الحوي وخلصينا .. انزين سيري ازقريها بسرعه .. قوليلها ضرووري . .
what ?? البشكاره :
say to mera that someone wanna her in the phone.. رفيعه :يالله تعينا بعونتك..
البشكاره : اوكيه .. ويت ..
رفيعه : سيري يعلني بلا رطينج .. تعرف انجليزي أخير عني .. بس براوويج .. اصبري عليه لين آخذ شهاده .. ان ما بهدلتج ..
تأخرت ميره شوي لأن امها طرشتها ..
ميره : هلا ااااااا والله ..
رفيعه : اسكتي ويا ويهج .. عشر دقايق وانا اتريا ..
ميره : ههههههه يالله . تفداني ..
رفيعه : خليج من هالسالفه الحين .. بغيت أتخبرج؟!!
ميره : عن ..
رفيعه : دخيلج قولي هيه .. اترجااج
ميره : هيه
رفيعه : شو هيه .. بعدني ما سألتج ..
ميره : انزيين أسألي
رفيعه : اوكيه .. بس خذي الوضوع بجديه
ميره : اممم بحاول ..
رفيعه : ذااك اليووووم ..
ميره : أي يوم..
رفيعه : يوم اللبن ينجب عــ.....
ميره : على حمد وخيستيه وفداااج بكله ..
رفيعه : اووووووو متفيجه تراج .. اتخبرج عني يوم جبيت عليه
ميره : بلاج؟؟
رفيعه : ( متردده ) كـ ـنت متــغـ ـ ـشـ ــ ـيه ؟؟؟؟
ميره : ههههه والحبيبه ما كانت بحاسيتها ؟؟
رفيعه : هااه
ميره : قصدي ما كنتي بكل قواج الحسيّه ؟؟
رفيعه : ما أدري .. بس انتي جاوبيني
ميره : انتي تستهبلين ولا الشوو .. صدق ما تعرفين ؟؟
رفيعه : والله العظيم ما أعرف .. حلفتيني بربي ..
ميره : اممم انزين صدقتج ..
رفيعه : عيل ارمسي ..
ميره : الله يسلمج كنتي بلا ....
رفيعه : دخيلج لا تقولينها..
ميره : عراحتج
رفيعه : غربلااااات العدو .. يالفضيحه .. شو بيقول عني ؟؟ يا ويلي حالي .. شو أسوي الحين ؟؟
مهره : ههههههههه لا تخافين .. حسيت أنه استانس لانه شافج بلا غشوه ..
رفيعه : ميرووه عن هالرمسااات ..
مهره : مشكلتج وحليها ..
رفيعه : اممم انزين خلاص.. بخليج الحين ..سلمي على عمووه وعمي وعلى مهاري ..
مهره : يوووووصل ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك