رواية طحت طيحه في هواكم -21
وروح حمد وطلع من السنتر بكبره وسار الباركنج تحت وتريا مانع لين ما يدفع الحساب وبعدبن ردوا العين... وفي الطريج قال حمد لمانع كل السالفه .. وطبعا قالها عسب إصرار مانع أنه يعرف ..
وباليوم الثاني
وفي بيت ثاني بن محمد ....
راشد وميره وام راشد يالسين في الصاله يشربون جاهي ..ومهره تتسبح ..
راشد : اميه ..
ام رشد : خير .......
راشد : أبغي أعرس ..
ام راشد : ( مستانسه ) هاذي الساعه المباركه يا ولدي..
ميره : ( مب مستوعبه ) هاااه .. بتعرس؟؟
راشد : هيه بعرس .. عندج مانع؟؟
ومن ياب طاري مانع الاخت تلخبطت ..
ميره : لا لا .. ما عندي مانع
ام راشد : ان شاء الله من باجر بدورلك حرمه ...
راشد : ما في داعي الشيخه .. الحرمه موجوده ..
ميره وام راشد : منييييييه ؟؟
راشد : اخت ربيعي ..
ام راشد : منو من ربعك ..
راشد : منصور بن علي ..
ام راشد : ولد منو ؟؟
راشد : ولد علي بن معضد ..
ميره تذكرت ان هالاسم مب غريب عليها .. علي بن معضد .. لاااااااااااااا مستحيل ..
ميره : ( معصبه ) فطييييييييييييييم ..
راشد : أظني ..
ميره : لا .. دخيلك يا راشد شلها من بالك .. دخيلك ..
ام راشد : شو ياج عالولد ..
راشد : وليش ان شاء الله ...
ميره : ( عصبيه واصله حدها ) جان تبغي تدفني في قبري .. خذها.. يعلني بلا شيفتها
وتقوم وتسير حجرتها وقفلت على عمرها الباب وتمت تصييييييح ..
راشد : اووووف .. ما عليج منها ..
ام راشد : ان زين يا ولدي .. هاتلي رقم بيتهم من ربيعك..
راشد : ان شاء الله .. ويالله الحين تامرييني بشيء ..
ام راشد : لا فديتك .. بس وين بتسير ؟؟
راشد : هههههه بسير أرقد بعد وين بسير
ام راشد : هيه.. برايك عيل ..
دش راشد حجرته .. وقف جدام المنظره .. وتم يطالع عمره .. آآآآآآخ من خل ٍ ظلوم .. بعت الدنيا لأجل أشريه .. راح بنصيبه وخلاني مهموووم .. راح ومن بعده الدنيا ظلام .. وش حياتي من بعد خلي الحبيب .. حياتي مالها معنى والموووت محتوووم ..
راشد ما يبغي يعرس .. بس سوا هالشيء عسب يثبت لحصه انه مثل ما باااعها . هوه بعد باعها .. ومثل ما هيه اشترت هوا غيره .. هوه بعد بيشتري هوا غيرها ... آآآه يالدنيا بس ..
مهره طلعت من حجرتها وهي لافه شعرها بفوده وقبل لاتنزل سمعت ميره تصيح بصوت ينسمع .. زاغت مهره وربعت صوب ميره .... بس الباب مبند ..
مهره : ميره .. مياري .. فجي الباب ..
ميره : .........
مهره : وغلاتي عند تفجين ...
وشوي أن الباب ينفتح ... كان شكل ميره يبين انها صايحه من مده وصياح من الخاطر بعد ..
مهره : بلاج ؟؟
وقالت ميره السالفه لمهره.. بس مهره تقبلت الموضوع عادي .. لأنها ما تعرف فاطمه مثل ما ميره تعرفها .. وما عاشرتها عدل .. وما عرفت شخصيتها وتصرفاتها ..
مهره : انزين.. وشو يعني؟؟
ميره : ( معصبه ) شو يعني ؟؟ مهره انتي ما تعرفينها شرات ما أعرفها .. مهره هالبنت أكرهها ..
مهره : تكرهينها ؟؟ اوكيه اكرهيهها براحتج .. بس اخوووج .. ليش تهدمين مستقبله ..
ميره : أنا اللي أهدم مستقبله .. هوه اللي يهدم مستقبله بإيده .. ومن بعد ما ياخذها بتهدم بيتنا .. تعرفين شو بيهدم بيتنا .. بس والله ثم والله .. ما أخليه ياخذها لو على قص رقبتيه .. وطلعت من الحجره وسارت عند راشد .. وأول ما فتح الباب .. شافها واقفه ..
راشد : خير..
ميره : الخيير بويهك .. بس حبيت أقولك شيء ..
راشد : قولي وخلصينا .. راسي يعورني برقد ..
ميره : حبيت أقولك انك لو خذت هاذي اللي يسمونها فاطمه .. انسى ان عندك اخت .. اصلا بتنساني اوووووريدي لأني ما بكون في هالحياه.. وخذها نصيحه مني .. ابعد عن هالبنت ..
راشد : عطيني سبب مقنع ..
ميره : لأني أكرهها .. تعرف شو يعني أكرهها .. لأنها خرااب دار .. واذا دشت هالبيت .. محد بيتم فيه ...
راشد : سوي اللي تبينه .. انا باخذها باخذها .. رضيتي ولا ..لا
ميره : خذها .. يعلني بلاها .. خلها تنفعك ..
وشوي أن ذاك الطراق العدل على سطار ميره .. مهره أول ما شافته يعطيها الطراق شهقت وحطت ايدها على ثمها من الصدمه ... يودت ميره خدها والدموع ينزلن من عيونها ..
ميره : لا تعرفني ولا اعرفك من عقب اليوم .. لا انته اخويه ولا انا اختك فهمت ولا ..
وروحت حجرتها وقفلت الباب ..
راشد : نفااااااااااااااااااااااد ..
ورد راشد ودخل حجرته .. وتساند على الباب .. رفع ايده اللي ظرب ابها ميره ..
ليش؟؟ ليش ظربتها ليش ؟؟ والله ما كنت أقصد .. بس رمستها حدتني على هالشيء .. وليش أسوي عمري أبغي هاي اللي ما تتسمى .. وأنا ما أبغيها .. ليش أبين للناس أني أبغيها بس أنا و الود ودي ما خذتها .. خسرت أختي والسبه انتي يا حصه .. انتي اللي خليتيني أسوي هالشيء .. بعتي هوايه واشترتي هوا خالد .. بس أنا بعد ببيعج .. وبشتري هوا غيرج .. ميره .. أكيد بتهدا عقب اللي استوى .. يمكن كانت معصبه من شيء وحطت غيظها فيه .. بس يالله عاذرنها .. بس شو قصدها يوم قالت خراب بيوت وان يت البيت محد بيتم فيه .. يمكن متظاربه وياها ولا شيء .. عسب جيه ..
مهره وعقب اللي شافته سارت حجرتها .. فرشت سيادتها .. وصلت لها ركعتين وعقب ما خلصت ..
مهره : (( ليش يا ربي؟؟ ليش على آخر أيام حياتي الكل يفترق .. حارب وابتعد .. وما أظن راح ألحق على ردته .. ميره وراشد اتظاربوا .. على شيء بعده ما استوى .. بس رمسه .الله يهدييج يا ميره .. ويالله يا رب جان في زواج راشد من فاطمه خير فخليه ينتهي على خير .. واذا كاان ما وراه إلا المصايب فيا رب أبعدنا عنها .. )) .....
مر اسبوع وفي هالأسبوه خطب راشد فاطمه .. ويا يوم النتايج .. النتايج بتظهر الساعه 10 الضحى على الانترنت .. والحين الساعه تسع .. والكل على ناااااااار .. الانترنت في حجرة راشد ... ومهره هيه اللي بتطلع النتايج .. لأن ميره من هاذاك اليوم ما دشت حجرة .. ولا حتى كلمته.. وراشد أصلا ما كان في البيت ... أما أم راشد يالسه في الصاله ويا محمد الشيبه .. وجريب العشر نزلت مهره تربع من فوق ..
مهره : اميه اميه..
ام راشد : ( زايغه ) بلاج .. شو مستوي ..
مهره : نجحت يا اميه نجحت .. وتلوي على امها وعلى يدها ..
ام راشد : مبروك يا بنتي مبروك.. واختج ؟؟
مهره : وميره بعد نجحت ..
ام راشد : فديتكن لا خليت منكن بس .. مبرروووك ..
مهره : الله يبارك فيج ..
محمد : بالبركه ان شاءالله
مهره : ( تحب راس يدها ) فديتك يا يدي .. الفضل كله يعود لله ثم لدعواتكم .. انته واميه وابويه والكل ..
ام راشد : وكم النسبه ..
مهره : أعجبج يا اميه .. 85.3
ام راشد : واختج؟؟
مهره : ميرووه يابت 76.8
ام راشد : الحمد لله على النعمه ...
مهره : بخلييكم.. بسير أبشر مياري
وربعت مهره فوق .. وتدخل على ميره .. كانت ميره قابظه دفتر وتشخط فيه ..
مهره : مبرووووووك يا ميرووه .. نجحنا ...
ميره : ( بإستهزاء ) وشو يعني ؟؟
مهره : ( منصدمه من ردة فعل ميره ) يعني نجحنا ..
وشوي أن راشد يدخل وهوه مستانس ..
راشد : خبرتني اميه عن النجاح ... مبروك مهاري ..
مهره : الله يبارك فيك ..
راشد : ومبروووووووك يا ميرووه ..
تمت ميره حاطه عينها على الدفتر وتشخط فيه ولا جنه حد رمسها .. ولا اهتمت أصلا ..
راشد : وكم يابت فطيم ؟؟
وهنيه اشتطت ميره.. عقت الدفتر من ايدها على الطاوله .. وقامت وطلعت من الحجره ...
راشد : بلاها هاي .. المهم ما قلتيلي .. .. نجحت ولا ؟؟
مهره : يابت دوووووووور ثاني ..
راشد : في كم ماده ...
مهره : في الدين
راشد : ههههه دين .. لايكون خطيبتي يهوديه وأنا ما أدري .. بس يالله الله يوفجها ..
(وسكت شوي ورد يكمل كلامه ).. وحصه بنت خالوه عليا..
مهره : الحمد لله نجحت ويابت 81 بالظبط ..
راشد : زين ... وطلع من الحجره وسار حجرته
وفي العين ..
الكل مستانس على حصه.. وبالأخص خالد ..
وعلى العصر .. غيث توه ياي من برع .. الكل كان يالس في الصاله.. خالته ام مانع ومانع وحمد وامه وعلاوي .. وكانوا يسولفون ويظحكون ..اما حصه كانت سايره حجرة غيث تشغل المكيف لأنه سوا تلفون وقالها تشغل المكيف لأنه أول ما بيي بيرقد .. وهيه تأخرت شوي لأن فراش الشبريه كان مبهدل وتمت ترتبه ..وغيث تم يالس وياهم شوي وعقب ..
غيث : يالله عيل بخليكم .. بسير أرقد ..
وسار صوب امه وحبها على راسها .. وسار حجرته .. كانت حصه توها طالعه من الحجره ..
حصه : بترقد الحين ..
غيث: ان شاء الله .. ووعيني قبل أذان المغرب
حصه : من عيوني غناتي ..
حب غيث حصه على راسها ودخل يرقد ..
وجريب المغرب .. كانوا كلهم يالسين برع ..
ام حمد : حصوه فديتج .. سيري وعي اخووج .. ما شيء باجي عن الصلاه ..
حصه : ان شاء الله ..
سارت حصه توعي غيث وتموا الباجين يسولفون .. بس هب لمده طويله .. لأنهم سمعوا حصه تباغم بصوت عالي.. وكلهم ربعوا صوبها يشوفون شو بلاها .....
الجزء الثامن عشر
سارت حصه توعي غيث وتموا الباجين يسولفون .. بس هب لمده طويله .. لأنهم سمعوا حصه تباغم بصوت عالي.. وكلهم ربعوا صوبها يشوفون شو بلاها .....
وأول من سار هم مانع وحمد بما انهم شباب ويرومون يركظون .. اما ام حمد وام مانع كانن يركظن بس هب شرات الشباب .. دشوا حمد ومانع حجرة غيث .. حصلوا حصه تباغم وحاطه ايدها على ويهها وتصيح ..
مانع : شو بلاااج حصوه .. شو مستووي ؟؟
حصه : ( بنبره متقطعه ) غيث ما أدري شو بلاه ؟؟ ما يتحرك .. ما يتحرك
ساروا مانع وحمد ويلسوا عدال غيث .. أول ما مسك مانع ايد غيث حصلها بارده ثلج .. مع ان الحجره مب بارده وايد .. واصلا هوه كان متلحف .. حط حمد اذنه على قلب غيث .. تريا صوت النبض .. تريا احسااسه بدقات قلب اخوووه .. بس للأسف .. ما حس بشيء ... خلاص ... غيث مات .. راحت روحه عند ربه .. كان غيث حاط القرآن عدال راسه .. وصلن ام حمد وام مانع .. شافن حصه يالسه ومتسانده على الأرض وحاطه ايدها على ويهها وتصيح بهدووووء .. أما حمد كان لاوي على اخوه وهوه يصيح .. وغيث ميّود حمد وصاد صوي اليدار ويصيح ..
ام حمد : بسم الله .. بلاكم شو مستوي …
امن مانع : شو بلاكم ؟؟
ام حمد : يالله منكم .. لين الحين ما وعيتوا خويكم .. الصلاة جربت وهوه بعده مرقد ..
(( وتتقرب من غيث )) بس قبل لا تجرب زخها حمد من ايدها ..
حمد : خلاص يا اميه .. غيث ماااااااااااااااااااااااا ااات .. ترحمي عليه ..
ام حمد : عنلاتك .. شو هاالرمسه بعد .. لاتفاول على اخوك .. غيث راقد .. ورقاده دوم ثجيل ..
مانع : لا يا خالتيه.. غيث هب عندج .. غيث عند ربه .. ترحمي عليه انتي بس ..
ام حمد : خوزوا عنيه خلوني أوعيه … كلكم مافيكم نفع ..
وتتجرب من غيث …
وحصه بعدها تصيح .. ومانع سكت وهوه يشوف حالة خالته .. وحمد ما بيديه حيله .. واام مانع يالسه عدال حصه وميوده راسها وتصيح ..
ام حمد : غيث .. حبيبي .. نش فديتك الصلاة.. قم يالله ..
ام حمد : غيث .. يالله عااااد .. ترا صلاة المغرب فواتة .. قم وليدي قم ..
غيث : ( يصيح ) اميه .. بس عاااد .. خلاص غيث ماااات ..
ام حمد : لا ما مـ ـــ ــ ــ ــ ـات ( ويغمى عليها )
قاموا حمد ومانع وشلوا ام حمد وودوها حجره حصه ..
ويوم طلع حمد ..
حمد : مانع … خلك عند غيث وأنا بسوي للشرطه ..
مانع : ان شاء الله …
نزل حمد ويلس على الدري اللي برع مال الفله .. وتم يصيح .. ومانع سار حجرة غيث .. وقال لأمه تسير عند ام حمد .. وحصه بعدها يالسه محلها .. وتصيح بس بهدوووووووووء وبدون أي صوت ..
ييلس مانع جدامها ..
مانع : حصووه .. سيري عند امج .. الحين بييون الرياييل بيشلونه .. سيري الحجره الثانيه ..
ترفع حصه راسها : يشلونه .. لااااا حرام عليهم … ( وتصيح بقو )
يحط مانع ايده على ركبتها ..
مانع : دخيلج يا حصه لا تزيديني فوق ما فيه .. جان تبين غيث يرتاح في قبره .. ترحمي عليه ..
حصه : الله يرحمه ..
مانع :قومي لا خليت منج هاتي قرآن وقري عليه قبل لا يشلونه ..
وتقوم حصه .. ويساعدها مانع .. وتسير وتيلس عدال غيث وتحبه على يبهته .. وتشل القرآن اللي عداله .. وتمت تقرا على روحه .. وشوي أن حمد يدخل ..
حمد : يالله حصه .. الشرطه يت .. سيري الحجره الثانيه ..
تبند حصه المصحف وتحطه عدال راس غيث … وتلوي على اخووها .. وهيه تصيح ..
نزل حمد عند الشرطه .. و يود مانع حصه من ايدها ..
مانع : يالله يا حصه … سيري حجرتج ..
وتقوم حصه متثاجله .. ويوصلها لين الباب .. وبعدين رد مانع وحب غيث على راسه ولحف ويهه .. يت الشرطه وكملت اجراءاتها .. ويا الدكتور عسب يعرف سبب الوفاة .. وطلعت وفاة طبيعيه .. وشلوا غيث وياهم وساروا حمد ومانع وياهم .. أول ما شلوا غيث .. سارت حصه حجرته .. وطاحت علىالمكان اللي كان راقد عليه .. وتلحفت بلحافه .. وتمت تصيح بهدوووووووء تام .. وشوي أنها تعدل يلستها .. وتقبظ القرآن وتمت تقراه ..
وهاذي هيه الحال .. نشت ام حمد وعقب مووت تأقلمت ويا الوضع ..وطول وقتها صيااااح .. وام مانع ملازمتنها .. وحصه من شلوا غيث وهيه في حجرته .. أول ما دروا قوم ثاني بن محمد .. قرروا يسيرون العين وفي يومها ساروا .. واللي سبقهم راشد .. كان مب مصدق ان ربيعه الروح بالروح وولد خالته مات .. كان طااااااااير بالسياره … وزخنه 3 رادارات .. وهوه ولا همه ولا راداار .. كان همه الوحيد أنه يشوف غيث .. وصل البيت .. حصل حمد ومانع ومنصور وسالم وخالد يالسين في الصاله وساكتين ومشغلين التلفزيون على قناة القرآن.. دش راشد ومب مستوعب الموقف اللي هوه فيه .. دش الميلس .. شاف حمد متساند على الغنفه وراد براسه ورا .. وحاط ايده على راسه .. ومانع منزل راسه .. وشابك ايده وفعينه دمعه .. ومنصور وخالد وسالم حالهم من حال الباجيين ..
ويوم انتبهوا لراشد وقفوا وساروا صوبه وسلموا عليه ..
راشد : عيل وين غيث؟؟
كلهم انصدمواااااا من سؤاله ..
مانع : غيث؟؟؟
راشد : هيه غيث .. جيه كمن غيث عندكم ..
حمد : غيث عطاك عمره يا راشد .. غيث رااح
راشد : ( يضحك ) أكيد انتوا تتمصخرووووون .. غيث ما فيه شيء اليوم العصر مرمسنه ..
مانع : وهوه متوفي المغرب ..
راشد : ( في عينه دمعه على وشك انها تطيح ) شووووووو ؟؟ لا .. لا لا …أكيد تتمصخرون ..
حمد : ( معصب وقابظ راشد من جتوفه ويهزه بقو ) غيث مااااااات .. خلاص يا راشد … غيث راح .. مات يا راشد مات ..
( ويلوي على راشد ويصيح )
راشد : ( هب مستوعب بعده ) وكيف مات ..؟؟
مانع : وهوه راقد ..
ييلس راشد على الغنفه وهوه منزل راسه وحاط ايده على ويهه .. لاكنه ما صاح .... ويرد يرفع راسه ….
راشد : ومتى بتصلون عليه..
حمد : عقب نص ساعه بنسير ..
من الحاله اللي صابت راشد .. حتى صياح ما صاحه على غيث .. مب مستوعب أن ربيع عمره وولد خالته يموووووووووووت .. وتم راشد على هالحال .. لا صياح ولا شيء .. لين ما ساروا وصلوا على غيث .. ومب لين هالوقت وبس ... مر شهر .. ولا ذرف راشد دمعه وحده على غيث .. مب لأن ما يهمه .. بالعكس.. لأن الواحد من زود ما تحبه واذا صار للي تحبه شيء لاسمح الله .. حتى من الحزن اللي فيك ما تقدر تذرف دمعه وحده ولو كان حزن الدنيا كله فيك .. عكس حصه .. حصه دومها في حجرتها وتقرا قرآن .. والظهر تسير حجرة غيث وتيلس فيها شوي .. تتذكره .. تشم ريحته .. تتخيله في الحجره .. ما أقول غير الله يعيينها .. بس حالها أخير شوي عن قبل .. قبل ما كانت تطلع من الحجره نهائيا .. حتى الأكل ما تاكله .. بس الحين شوي شوي بدت تتحسن ...
ونرد لدبي ...
مهره يالسه على دري الفله .. وبالتحديد عقب صلاة المغرب .. يالسه تشوف هالدنيا شو سوت في حالها ... شكل مهره مجلوب 180 درجه .. ضعفت... ويهها شاحب ... السواد اللي تحت عيونها ... حتى نفسيتها ما سلمت .. وشوي تشوف سياره تدخل ... سياره هب غريبه عليها.. وهنيه مهره هب مصدقه عمرها .. نست ان اليوم حارب بيوصل دبي .. نشت مهره وما تعرف شو تسوي .. وشوي ان حارب ينزل .. وشافته ام راشد اللي كانت في المطبخ ... وسلمت عليه .. من بعيد ...
ام راشد : مهره فديتج سيري قربي بولد عمج .. أنا بييكم عقب شوي .. سيري لا خليت منج ..
سار حارب صوب مهره ووقف جدامها .. اما ام راشد ردت المطبخ
حارب : سلام عليج بنت عمي
مهره : وعليم السلام والرحمه..
حارب : شحالج الشيخه ؟؟
مهره : بخير الحمد الله ...
حارب : عساه دوم وهب يوم .. ومبروووووك النجاح
مهره : الله يبارك فيك.. والحمـ ـ ـدلله على السلامه
حارب : ربي يسلمج ان شاء الله ..
مهره : اقرب داخل ..
حارب : جريب
وتدخل مهره البيت وتقرب بحارب ..
يلس حارب .. بس في لحظته رد ووقف .. لانه ما استوعب اللي شافه في النور ..
حارب : مهروه بلاج غديتي جيه .. شو يااااااااج ؟؟
ما حبت مهره ترد عليه .. لان اذا قالتله المرض .. أكيد بيستهم ..
مهره : .................
حارب : أرمسج أنا .. بلاج ؟؟
مهره : ما بلايه شيء ..
حارب : ما بلايه شيءوويهج جيه .. عيل شو اذا بلاج ؟؟
مهره :.................
حارب : تاكلين دواج ولا قلعتيه ...
مهره : لا والله اني آكله ..
حارب : عيل ..
مهره : تعرف انته التعب وايام الدراسه .. والايام اللي عدت علينا من بعد مووووت غيث ..
حارب : ( منصعق من اللي سمعه ) شو ؟؟؟ موت غيث ؟؟؟
هنيه انصدمت مهره أن حارب ما يعرف شيء عن وفاة غيث ..
حارب : غيث بن سهيل ما غيره ..
مهره : هـ ـ ــيـ ـ ـه
حارب : كيف مات ؟؟ ومتى؟؟ وليش محد خبرني ؟؟
مهره : .......................
عصب حارب ...
حارب : يالله أنا بخليج .. ( ويطلع من الفله ويركب سيارته ويروح )
تمت مهره مستهمه .. ما تعرف اللي ناوي عليه حارب ... وشوي أن ام راشدتدخل البيت ...
ام راشد : وينه ولد عمج؟؟
مهره : روّح ..
ام راشد : شو عايلنه هالولد ..
وشوي أن مهره ما تحس بعمرها الا وطايحه تحت ..
زاغت ام راشد وتمت تزاقر ميره .. وشوي ميره تنزل .. ويالسه تلعب بإيديها
ميره : شو يا اميه ؟؟ بلاج محتشره .. ( ويوم رفعت راسها ) مهررررررررره
وتربع صوب مهره ..
ميره : بلاها يا اميه ؟؟
ام راشد : شدراني يا بنتي .. ما أدري شو حل بها ؟؟
ميره : ما عليها شر ان شاء الله .. قال الدكتوور أن بتصيبها هالحاله مره ثانيه ... وقال لازم نخليها ترتاح في حجرتها لين ما تنش روحها ..
ام راشد : عيل يالله خلينا نوديها فوق ..
ميره : بس انتي يا اميه مافييج شده ... ارتاحي .. بحاول أمشّيها روحي ..
وشوي أن راشد يدش ..
راشد : خير ان شاء الله شو مستوي ..
ام راشد : ما حصل إلا كل خير .. بس يا ولدي فازع اختك وودوا خويتكم فوق .. وهنيه تضيجت ميره .. ما كانت تبغي تشاركه في شيء ... بس هالمره بتعديها عسبه اختها مهره بس .. ولا ميره ما تتحمل تيلس وياه في مكان واحد ...
حاولوا راشد وميره يوصلون مهره لحجرتها .. بس بما ان حجرة ميره اقرب ودوها هناك .. سدحوها على الشبريه .. ولحفوها زين ..
راشد : شو بلاها ؟؟؟
ميره ما سوت سالفه له ..
جان يتضيج راشد ويزخها من جتفها ..
راشد : أرمسج أنا انزين ..
ميره : ( ما سوتله سالفه أبداا )
راشد : لين متى هالحال يعني ؟؟ ارمسي
ميره : لين ما تخلي الاخت فاطمه بنت علي تولي ..
راشد : جب يالله .. وانا فطيم باخذها باخذها ... رضيتي ولا انرظيتي ..
ويطلع من الحجره ويسير حجرته .. يلس على الشبريه .. وعقب خمس دقايق تقريبا ... رفع راسه .. طاحت عينه على عمره يوم جابل منظره الكبت ..
كان هب مهتم بعمره .. حتى لحيته غلظت ولا حلقها .. وويه هب شراة قبل .. التعب كان باين عليه .. و......... ( وشوي يسمع ميره تصارخ ) ويطلع من الحجره ..
راشد شو مستوي ..
ميره : مهره.. ما أدري شو بلاها .. تتنتفض وعرقانه ..
وشوي أن ام راشد واصله ..
ام راشد : بلاج يا بنتي .. شو يااج .. شي ياها اختج..
ويدخلون كلهم عليها ..
كانت مهره عرقانه .. وكانت فيها حمى واشتدت واااايد واااااااايد .. لدرجه انها كانت تنتفض محلها ... كلهم زاخوا عليها .. ولاحظوا بعد أن تنفسها صعب شي .. كانت تسحب نصخها بصعوبه ..
راشد : يالله يا اميخ بسرعه .. لبسوها عباتها .. أنا بجدم السياره وبييكم ..
وينزل راشد ويجدم سيارته .. ويرد ويركب فوق .. وينزلّون مهره تحت .. ويركبونها السياره .. وميره سارت وياها .. لأن مايد محد عنده .. وبعد لأن ام راشد ما ترووم للركيظ في المستشفيات ...
وصلوا المستشفى ..
دخلوا مهره الحجره وتموا راشد وميره برع .. ويلس راد ويلست ميره بعيد شوي ..
وفي العين .. يدش حارب الميلس.. بس ما حصل حد ..
يلس وسوا تلفون لحمد .. حمد ما كان في البيت .. كان في الدرب ويا مانع ..
حمد : مرحباااا الساع
حارب : مرحبابك زود بو شهاب .. وين انته ؟؟
حمد : والله عقب خمس دقايق جي بوصل البيت .. ليش؟؟
حارب : لأني الحين في ميلسكم ..
حمد : احلف .. ( ويرد ويشوف الرقم ولاحظ انه داخل البلاد هب من برع ) يا حيك .. متى ييت .. وليش ما خبرتنا عسب نستقبلك ..
حارب : والله من ساعتين جيه واصل وسيده ياي صوبكم ..
حمد : هاذي الساعه المباركه ..
حارب : تسلم بو شهاب ..
حمد : اوكيه عيل .. تريانا .. الحين بنوصل ..
حارب : اوكييه .. مع السلامه ..
ويبندون عن بعض .. وعقب سبع دقايق جيه وصلوا حمد ومانع .. دشوا الميلس وسلموا عليه ..
وعقب التنشّيد عن الأخبار والعلوم .. رمس حارب عن اللي في خاطره ..
حارب : حمد ... صدق الرمسه اللي سمعتها ..
حمد : (( مستغرب )) أي رمسه ؟؟
حارب : غيث ..
وهنيه حمد حس بشيء يقبظ قلبه ..
مانع : غيث؟؟!!
حمد : خير ان شاء الله .. شو السالفه ؟؟
حارب : غيث توفى؟؟
حمد : ( منزل راسه ) الله يرحمه ..
حارب : يعني الرمسه اللي وصلتني صح ؟؟ ليش يا حمد .. ليش ما حد خبرني .. ولا طلعتوني من الحسبه .. ليش محد عبرني وقالي .. ليش ؟؟
حمد : اسمحلنا والله .. ما رمنا نخبرك عسب تركز في دراستك و ما تشغل بالك في شيء ثاني ..
حارب : ( عينه تدمع ) وحاد قالك ان غيث أهم عندي من الدراسه ؟؟ ما تعرف شعوري يوم دريت بالسالفه .. حسيت أني غريب .. حسيت أني هب واحد منكم وفيكم... حسيت أني آخر من يهمكم في هالدنيا ...
حمد : ( بنبره حزن ) بس يا حارب بس.. لا تزيدني .. دخيلك اسمحلنا .. خلاص يا حارب رمستنا عن غيث الحين ما بتنفعنا ولا بترجعه .. ترحم عليه يا حارب .. ترحم عليه
حارب هنيه حس انه قلب مواجع حمد .. ذكره بأخوووه .. وحس بالذنب .. ومارام يتحمل شكل حمد جيه منهار..
حارب : الله يرحمه ويغمد روحه الجنه .. اسمحلي يا حمد جان كدرتك ولا غثيتك .. بس تخيل ان حد قريب منك يمووت وانته ما تدري متى ماات وكيف مات ..
حمد : خلاص يا حارب .. الله يرحمه يا رب
حارب : ويرحم امة المسلمين يا رب..
ونرد لدبي .. وبالتحديد في المستشفى ..
ميره وراشد بعدهم يتريوون .. ولا حد طمنهم عليها ..مهره من ساعه في الغرفه ... السسترات يدشن ويطلعن ويوم يسألونهن ما يعطونهن جواب واحد ...
نش راشد .. تضيج من هالحاله .. من ساعه اخته في الحجره ولا يدري عنها شيء ..
وشاف نيرس توها بتدخل ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك