رواية طحت طيحه في هواكم -22
حارب : الله يرحمه ويغمد روحه الجنه .. اسمحلي يا حمد جان كدرتك ولا غثيتك .. بس تخيل ان حد قريب منك يمووت وانته ما تدري متى ماات وكيف مات ..
حمد : خلاص يا حارب .. الله يرحمه يا رب
حارب : ويرحم امة المسلمين يا رب..
ونرد لدبي .. وبالتحديد في المستشفى ..
ميره وراشد بعدهم يتريوون .. ولا حد طمنهم عليها ..مهره من ساعه في الغرفه ... السسترات يدشن ويطلعن ويوم يسألونهن ما يعطونهن جواب واحد ...
نش راشد .. تضيج من هالحاله .. من ساعه اخته في الحجره ولا يدري عنها شيء ..
وشاف نيرس توها بتدخل ..
راشد : لو سمحتي .. ممكن أعرف شو السالفه ؟؟ شو حال ختيه الحين ..
النيرس : أنا ما بأدر أأولك شيي .. الدكتور هوّه بنفسوا حيكلمكووو ..
راشد : خير خير ... ما تقدرين .. لا يكون الشور عندج وأنا ما أدري.. رمسه توصلج وتتعداج.. الحين تدخلين وتشوفين حال اختي وتخبريني .. ولا والله ثم والله بتشوفين شيء ما شفتيه ..
النيرس : طيب يا أخي .. شو بااك معصب؟؟
راشد : سيري سيري يالله
وتدش النيرس وهيه تتحرطم .. وعقب شوي تطلع النيرس ..
راشد : شوووو ؟؟
النيرس : تعااا معي لتشوووف الدكتور بنفسك ..
ويسير راشد صوب الدكتور ..
النيرس : مرحبا دكتووور أحمد
الدكتور : مرحبا ...
ويوم انتبه أن راشد وراها قام ووقف
الدكتور : مرحبا الساع .. تفضل يا راشد..
راشد : زاد فضلك ( وييلس مجابل الدكتور )
النيرس : دكتور أحمد ..
الدكتور : نعم
النيرس : تفضل شوف فايل المريضه .. وتأكيد التحليل راح يجهز بعش ربع ساعه ..
الدكتور : اوكيه مشكوره .. والحين سيري تابعي حالة المريضه
النيرس : ان شاء الله ..
وتطلع النيرس ويتم راشد والدكتور بروحهم ..
الدكتور : شحالك ؟؟
راشد : تماام الحمد لله ..
الدكتور : دووم ان شاء الله .. وشخبار ابووك ... يعله بخير ..؟؟
راشد : بخير وسهاله الحمد لله ..
الدكتور : الحمد لله
راشد : دكـ ـ ـ ـتـ ـ ـور
الدكتور : أعرف يا راشد .. أعرف انك بتتخبر عن اختك وشو حالها الحين ..
راشد : هيه والله يا دكتور .. هب حاله هاي من ساعه هيه داخل ولا نعرف عنها شيء ..
الدكتور : اسمحلنا والله .. بس اداره المنتدى منبهه النيرسات أنهن ما يعطن أي معلومات عن حاله المرضى .. ولازم تاخذ اذن مني قبل .. وهيه توها إلا يتني لانها من الصبح يالسه تتابع حاله اختك ..
راشد : شو تباني أقول بس .. الحمد لله على كل حال والحين ما قلتلي عن حالها ..
الدكتور : الحمد لله الحين حالتها استقرت .. ويمكن حالها ينتكس في أي لحظه وسوينا تحليل لها .. وعرفنا النتيجه .. والحين سوينالها تحليل ثاني عسب نتأكد
راشد : تتأكدون من شو
الدكتور : نتأكد من النتيجه اللي ظهرت لنا في التحليل الأول
راشد : انزين شو النتيجه اللي طلعت ..
الدكتور : والله ما أعرف أقولك يا راشد ..أول ما أتأكد من الخبر برد عليك .. والحين عادي تدخل عليها .. بس ما شيء طلعه .. من الحين أقولك ..
راشد : يعني شو ؟؟ بتنومونها عندكم ... أكيد يا دكتور ان حالتها فيها شيء .. ولا ما بتخلونها عندكم..
الدكتور : أنا ما قلت جيه .. مثل ما قلتلك أن حالها يمكن ينتكس في أي لحظه لا سمح الله ... فلازم تبقى هنيه عسب نراقبها ونتابعها ..
راشد : انزين دكتور ...ورفجه بو خليفه أن اول ما توصلك التحاليل تخبرني ..
الدكتور : ان شاء الله يا راشد .. ما طلبت الساع
راشد : تسلم والله .. وبخليك الحين .. بسير أشوف اختي
الدكتور : الله يحفظك .. بس اصبر شوي بكتبلك ورقه عسب يدخلونك .. لأنهم ما بيدخلونك منيه والدرب ... لازم ورقه من الدكتور المسؤول ..
راشد : اسميهم عباله ..
ويسير راشد ويوم توه بيدخل سمع النيرس تزقره ..
النيرس : لا لا يا اخي .. ما بيجوز تدخل ..
راشد : لا الله يجووز عكيفج هوه .. ( ويطلعلها الورقه ويفتحها ويعطيها اياها ) هااه اقري .. وعقب ما تخلصين يا ريت تعقين الورقه في الزباله لأن ما يصحش توصخين الممر .. يالله يا ميره جان بتدشين .. ( ويدش راشد ولا عليه من حد لأن صدق وصل حده .. وبرد حرته في هالنيرس )
ويدخلون على مهره اللي كانت شبه راقده وأول ما سمعت صوتهم حاولت تفتح عينها .. وتتجرب ميره منها ..
ميره : الحمد لله على السلامه ..
مهره : ( بصعوبه ) الله يسلمج
راشد : سلامات مهاري ما تشوفين شر ...
مهره : الشر ما اييك
ونرد للعين ..
في الميلس حارب وحمد .. ومانع سار سيارته بييب شيء وبيرد
حارب : شو هذا ؟؟
حمد : هاذي رساله ....
حارب : رساله ؟؟؟
حمد : هيه نعم رساله ..
حارب : منو امنووه ؟؟
حمد : ما ادري والله ..
حارب : وكيف وصلتك ..
حمد : الله يسلمك ريتها في سيارتك ذاك اليوم يوم وصلتك المطار ..
وتذكر حارب االورده .. وقال أكيد أن الرساله كانت ويا الورده .. بس ما لاحظها ..
ويوم توه بيفجها صاح تلفونه .... وفي نفس الوقت رد مانع من برع
راشد : مرحبا
حارب : مرحبتين .. هلا والله
راشد : علوومك .. توها تخبرني اميه انك رديت .. متى رديت ؟؟
حارب : بخير الحمد لله .. وانا في البلاد من ثلاث ساعات جيه ..
راشد : الحمد لله على السلامه عيل ..
حارب : الله يسلمك والله ... هااه وين داارك ؟؟
راشد : المستشفى ...
حارب : ( منصدم ) مستشفى ؟؟ خير ان شاء الله ؟؟ شو مستوي ؟؟
راشد : الله يسلمك مهره تعبت علينا ويبناها هنيه ..
حارب : يالله يالله .. الحين ياينك ..
ويطلعون حمد وحارب ومانع من العين حارب بسيارته .. ومانع وحمد في سياره مانع ..
وحارب في سيارته زايغ على مهره .. وتذكر الرساله .. بس ما همته ..
وفي دبي .. وعقب عشرين دقيقه تقريبا ....
الدكتور يدخل ..
الدكتور : السلام عليكم
الكل : وعليكم السلام ..
راشد : هاه يا دكتور .. طلعن النتايج..؟؟؟
الدكتور : هيه طلعن .. والحين يا مهره شو تحسيين ؟؟
مهره : الحمد لله .. بس راسي يعورني شوي ..
الدكتور : ما عليه .. الحين بقول للنيرس تييب لج حبه عوار الراس ..
مهره : تسلم ..
راشد : دكتوووور .... شو النتايج ؟؟
الدكتور : هاذن في الفايل اللي في ايدي .. من شوي ياي من عندهم
راشد : وشو حصلت ؟؟
الدكتور : الله يسلمكم ما عرف كيف أبتدي لكم ..
وهنيه الكل زااااغ وتم على أعصابه ..
الدكتور : وصلتني النتيجه .. وهذا ثاني تحليل .. وتأكدنا من النتيجه اميه بالميه ..
راشد : يعني ..
الدكتور : يعني أن كل الخلايا اللي في جسم الاخت مهره استوت فري... يعني ولا خليه في جسمها مسيطر عليه السرطان .. يعني اختك ردت لحالتها الطبيعيه .. وبفضل الله وبفضل تعاونكم قدرنا نقظي على هالمرض .. وهالحاله اللي فيها الحين حاله طبيعيه .. والحمى اللي يتها كانت مجرد صراع بين السرطان وجسمها .. والوقت اللي كانت محمومه فيه كان وقت اختفاء كل خلايا السرطان من جسمها .. والحمد لله أنها قدرت تتجاوز هالحمى لانها وايد خطيره ..
كان الدكتور يرمس والكل منصدم .. وكانت كل كلمه تبري جرح من جروح مهره .. اما ميره حالتها ما تنوصف ... كانت كلمه ميته من الفرح شويه عليها .. وحتى راشد .. كلهم استانسوا وتموا يحمدون ربهم ويشكرون الدكتور .. والدكتور استانس لانه أنقذ رووح انسانه .. حاول قد ما يقدر يساعدها .. والحمدلله ان الله شفاها وردها شرات قبل .. مهره اللي نفسيتها حلوه ومرحه ...
وصلوا حمد وحارب ومانع المستشفى ..
حارب يمشي بسرعه ومستعيل .. وحمد ومانع وراه
وتخبر حارب عن الغرفه وسار لها هوه وحمد ..
ويوم وصلوا شافوا راشد توه طالع من الحجره وهوه يظحك ..
حارب : راشد .. طمني .. شو ؟؟
راشد : السلام عليكم قبل ..
وعقب ما سلموا ..
راشد : الحمد لله .. مهره الحين ما فيها شيء ..خلاص تعافت وتشافت ..
وهنيه حارب كان لو الود وده يحب راس راشد .. بس ثقل شوي عسب ما يشك راشد في شيء..
حارب وحمد ومانع : تستاهل سلامتها يا راشد ..
راشد : الله يسلمكم حبايبي ..
وساروا كلهم صوب استراحة المستشفى ..
وطلع مانع من الاستراحه وسار صوب ثلاجه الماي بيشتري ماي .. ويوم وصل حس بقشعريره .. شاف ميره عند الثلاجه ..
مانع : السلام عليج
ميره : ( ما انتبهت لمانع .. وما صدقت اللي تشوفه ) وعليكم السلام
مانع : شحالج ؟
ميره : بخير الحمد لله ..
مانع : عساه دووم ..
ميره : تسلم ...
مانع : .......... ميره
ميره :......
مانع : باجر الساعه 10 فليل بسويلج تلفون عالبيت .. بغيت أرمسج في سالفه..
ميره : ( مب مستوعبه ) ترمسني انا ؟؟
مانع : هيه انتي .. عندج أنا ؟؟ ( يقصد عند مانع ؟؟)
ميره : ( الود ودها تظحك ) لا لا ما أقدر
مانع : ليش ان زين .. انتي ما ترمسين واحد ما تعرفينه .. أنا ولد خالتج ........
ميره : لا لا .. ما أقدر .. إخاف أهلي يدرون ..
مانع : لا ما بيدرون .. .. وأصلا أنا ما بطول وياج خمس دقايق بس..
ميره من طبعها فضووووووووووووليه .. ولازم تعرف شو يبغي مانع منها ..
ميره : انزيـ ـ ــ ـن
مانع : خلاص عيل .. باجر عالساعه 10 ان شاء الله
ميره : اوكيه : بس بشرط .. اذا زدت عن الخمس دقايق ببند
مانع : هههههه ما عليه .. بندي في ويهي جان تبين ..
ميره : ان شاء الله ما طلبت الساع .. يالله عيل بخليك ..
مانع : ههه .. الله يحفظج
وترد ميره الحجره .. وهيه طايره من الفرح .. خبر مهره وخبر مانع في نفس الوقت... يالله ما أحلى هاليووووووووووووووووووووو وووووووووم ...
ام راشد أول ما درت عاد انتوا توقعوا رده فعلها .. وبو راشد وعايله سالم بن محمد وبالأخص و عايله سهيل وقوم منصور كلهم استانسوا وفرحوا ...
وهالفرحه غطت شوي على الحاله اللي صابتهم بعد مووت غيث ..
وحتى حصه استانست .. وقرروا قوم ام حمد وام مانع وقوم ام غيث ومنصور اييون يسلمون على مهره بالباجر الضحى وبالمره يباتون يوم لانهم من فتره قاطعين عنهم ..
ردت مهره البيت .. وقرروا يسوون عزيمه عسلامة مهره .. وانقظى اليوم على خير ....
وعلى المغرب وكالعاده الشباب يالسين في الميلس يسولفون والبنات في الصاله اللي فوق .. والحريم في الصاله اللي تحت ...
وعند الشباب .. الكل يسولف .. إلا راشد .. تم يطالع كل الموجودين .. وافتقد ربيعه .. غيث .. المفروض في هالوقت يكون يالس عداله ويسولف وياه.. نش راشد وطلع .. حس بعمره ظاااايج .. طلع من الميلس وركب سيارته وروّح .. وقف عدال عرقوب قريب ووقف السياره على طرف الشارع .. نزل راشد .. ولا إراديا طاحت دمعه من عينه .. غصبا عنه .. وتم يسترجع راشد أيامه ويا غيث .. والدمووع شوي شوي تطيح من عينه ..
وفجأة يصيح تلفونه.. مسح راشد دموعه وركب السياره وهلاباب مبطل وخذ التلفون وشاف الرقم.. رقم غريب ..
راشد : الووو
..... : الووو
انصدم راشد ..
راشد : منو ويايه ؟؟
...... : افا يا راشد .. ما عرفتني ..
راشد : إسمحيلي والله ما عرفتج ..
...... : أنا فـ ـ ـاطمـ ـه ...
راشد : أي فاطمه ؟؟
فاطمه : خطيبتك.. ليش ؟؟ وفي غيري يعني
هنيه انصدم أكثر .. كيف تجرات تسوي هالحركه ...
راشد : هــ هلا ..
فاطمه : بلاك .. صوتك مب طبيعي..
راشد : ما فيه شيء ..
فاطمه : اممم زين عيل .......
راشد ما كان له بارض يرمس حد ..
راشد : اوكيه بخليج الحين
فاطمه : ( بسرعه ) ليش ؟؟
راشد : تعبان شوي ..
فاطمه : سلامتك من التعب الغالي ..
راشد : الله يسلمج .. يالله عيل بخليج
فاطمه : الله يحفظك .. بس
راشد : شوو
فاطمه : اتصلي متى ما فضيت
راشد : بحاول .. يالله مع السلامه
فاطمه : مع السلامه ..
بند راشد التلفون وهوه ما يعرف شو السالفه ؟؟ على أي اساااس تسويله تلفون .. هب قواة ويه عليها .. لا واونه اتصلي متى ما فضيت .. ما شيء شغل أسويلج .. تبطين ما سويتلج ..
رد راشد البيت وكمل يلسته ويا الشباب .. والبنات بعدهن يسولفن .. وحتى الحريم ..
وعلى الساعه عشر صاح تلفون البيت عند الحريم ..وشلته ام راشد ..
ام راشد : مرحبا
مانع : مـــــم مرحبا
ام راشد : منو الريال ؟
مانع : أنا مانع ..
ام راشد : هيه مانع .. يا حيك .. شحالك ؟؟
مانع : بخير يعلج بخير .. ( وهنيه تلخبط مانع .. ما كان متوقع ان ام راشد بتشل التلفون ... ) عيل وين اميه عنج .. تلفونها مقطوع ..أظني ما فيه ارسال )
ام راشد : يمكن يا ولديه .. .. صبر عليه بخبرها
وتزقر ام راشد ام مانع ..
وتم مانع يرمس امه .. اييب لها سالفه منيه وسالفه مناك ... لين ما عيز وقرر يبند ..
وبهالحال .. ميره التهت بالبنات وما لاحظت الساعه ولا هيه تتريا هاللحظه من البارحه.. ومانع ابتلش ويا العيايز .. الله يصبرك يامانع ..
وعند البنات .. يسولفن وكانن في نفس الوقت يحاولن يغيرن نفسيه حصه .. وشوي أن تلفون رفيعه يرن..
شافت رفيعه الرقم .. غريب .. فقررت ما ترد .. وشوي ويوصلها مسج ..(( ردي يا رفيعه .. أبغيج ضروري ) ..ورد وصاح التلفون مره ثانيه .. فقررت تشله .. يمكن وحده من ربايعها مغيره رقمها ولا شيء ..
رفيعه : الووووو
......... : هلا رفيعه
رفيعه : أهلين
......... : شحالج ..
رفيعه : بخير وسهاله .. شخبارج انتي ..
......... : لو انج بعيد عن حياتي بكووون بخير
رفيعه : ( منصدمه ) نعم ...
وتطلع رفيعه من الصاله وتسير حجره ميره ..
......... : مثل ما قلت .. ابتعدي عن حياتي
رفيعه : ومنو انتي عسب أبتعد وانا حتى ما أعرفج ولا أعرف اسمج
......... : أنا مهايه .. وأقوووووووولج خليج عن حمد بعيد ..
رفيعه : ( انصدت أكثر ) حمد...
......... : هيه حمد ... مره رمسني عنج .. وأنا تحرييت عنج .. وطلعت رقمج من تحت الأرض...
رفيعه : وشو تبين مني الحين ؟؟
......... : تبتعدين عن حمد .. انا أحبه وما ابغيه يفكر في غيري .. تسمعين ولا ..
رفيعه : لا ما سمعت .. وفي عمري ما كنت قريبه منه عسب أبتعد على قولتج ...
......... : ولو انج ب قريبه على قولج جان ما فكر فيج ...
رفيعه : والله مشكلته ويحلها بروحه .. أنا مالي خص..
......... : هيه انتي.. احترمي نفسج ولا ترمسين عنه جيه
رفيعه : الحمد لله محشمه عمري قبلج بعد جان ما تتدرين .. وحمد خليه لج .. وبندت في ويهها .. وتمت رفيعه تصيح .. انصدمت في حمد.. انصدمت في الانسان اللي حبته وسكن قلبها .. انصدمت فيه صدمه قويه .. قويه لدرجه أنها ما بتسامحه عليها ... سوت رفيعه تلفون للبيت وقالت يطرشون البشكاره عسب بترد البيت .. وأول ما عرفن البنات احتشرن .. بس هيه قالت لهن انها تعبانه وتبغي ترتاح .. طلعت رفيعه من البيت .. وبالصدفه حمد توه ياي ..
حمد : السلام عليج
رفيعه : وعليكم السلام
حمد : شحالج ؟؟
رفيعه : ( من ورا خاطرها ..) بخير
تعجب حمد من اسلوبها في الرد ...
حمد : عسى ما شر ... شو بلاج.؟؟
رفيعه : ما بلايه شيء .. ولهالدرجه أنا أهمك ..
حمد : ( معصب ) شو هالرمسه اللي ترمسينها ... شو أهمك وما اهمك؟؟
رفيعه : ( بإستهزاء ) ما يبالها تفسير .. خل حبيبه القلب مهايه تقولك السالفه ..
وهنيه انصدم حمد .. حس أن رمستها سجين على قلبه.. مهااا .. شو يخصها في السالفه ..وكيف عرفت رفيعه ..
روحت رفيعه سيده بعد جملتها الاخيره .. بس حمد زخها من ايدها يبغي يعرف السالفه ..
حمد : بلاج .. انزين فهميني الموضوع ..
وتفج رفيعه ايدها بقو وتقوله (( فجني )) وروحت بيتهم .. وخلت حمد مهموووم وما يعرف كل اللي يدور حوله ..
=======
ملاحظات:
بالنسبه لمرض مهره ......اقرا هالمقال..انا اؤمن بقدره الله سبحانه وتعالى ..وانه المعجزات ممكن تستوي بارادته ....وانا مب معترضه على شفائها المفاجئ ..انا اعتراضي على طريقة العلاج ...بس.....خصه الانه الدويه ممب ممكن انه البنت تاخذها في البيت....وهذا هو المقال عن اللوكيميا او سرطان الدم....
اللّوكيميا:
السرطان ليس مرضاً واحداً، لكن إلى حد ما مجموعة من الأمراض التي تتسبب بتطور الخلايا على نحو شاذ حتى لا تعمل بشكل مناسب. اللوكيميا هي أحد هذه الأمراض - سرطان كرات الدم البيضاء . وتبدأ اللوكيميا في نخاع العظم ويمكن أن تنتشر إلى الأجزاء الأخرى من الجسم، والأطفال والبالغين يمكن ان يصابوا باللوكيميا. ولا يوجد أسباب دقيقة معروفة للوكيميا حتى الآن إلا في حالات نادرة تكون ناتجة عن بعض الأمراض الوراثية أوالإصابة ببعض الفيروسات أو التعرض لكيماويات.
أنواع من اللوكيميا
(1) اللوكيميا اللمفاوية الحادة:
اللوكيميا هذه تتطور من الخلايا الليمفاوية الموجودة في النخاع العظمي فتتكاثر بسرعة بالغة ولا تنضج بشكل مناسب. يمكن ان يؤثر هذا المرض على الأطفال أو البالغين، لكنه اكثر شيوعاً في الأطفال ونسبة الشفاء منها عالية تصل إلى 90% في الأطفال.
(2) اللوكيميا اللمفاوية المزمنة:
اللوكيميا هذه تتطور أيضاً من الخلايا الليمفاوية. وتبدو الخلايا في هذا النوع من اللوكيميا ناضجة لكن بعضاً منها غير عادي. الخلايا تعيش لزمن طويل جداً مما يؤدي إلى كثرة مفرطة لكرات الدم البيضاء. هذا النوع يحدث تقريباً فقط في البالغين وهو أكثر أمراض اللوكيميا شيوعاً لدى البالغين ونادراً ما يؤثر بشكل مباشر على حياة المريض ويمكن أن يبقى المريض مصاباً بهذا الداء لسنوات عديدة دون أن يشعر بأعراض من أثر هذا المرض.
(3) اللوكيميا النقوية الحادة (مايلوجينوس:
وتسمى اللوكيميا النخاعية الشوكية، هذا النوع يتطور من نوعين من كرات الدم البيضاء (إما جرانلوسيتيز أو مونوسيتيز). ويمكن أن يحدث في الأطفال أو البالغين.
(4) اللوكيميا النقوية (ميلوجينوس) المزمنة:
نوع آخر من اللوكيميا النخاعية الشوكية، كرات الدم البضاء في هذا النوع (جرانلوسيتيز أو مونوسيتيز) تتطور على نحو شاذ. نوع اللوكيميا هذا نادر جداً في الأطفال لكنه غير نادر في البالين.
أعراض اللوكيميا:
أعراض اللوكيميا الشائعة قد تتضمن الحمى، الضعف والإعياء، فقدان الشهية أو الوزن، الغدد اللمفاوية المتورمة، الكدمة السهلة أو النزيف، تورم أو نزيف من اللثة، العرق الليلي، وآلام العظام أو المفاصل. وقد تكون الأعراض بسيطة في البداية ولكنها تصبح اسوأ تدريجياً خصوصاً في الحالات الحادة. ويجب أن تستشير طبيبك إذا احسست بمثل هذه الأعراض.
علاجات اللوكيميا
البالغين والأطفال يمكن أن يشفوا بإذن الله من اللوكيميا والكثير يمكن أن يُعالج، والعلاجات النموذجية تتضمن:
(أ)العلاج الكيميائي - أدوية معطاة عن طريق حقن خلال الوريد أو بالفم لقتل خلايا السرطان، والعلاج الكيميائي هو العلاج الرئيسي لكل أنواع اللوكيميا.
(ب)العلاج البيولوجي - وهذا عبارة عن أدوية تؤثر علي حيوية اللوكيميا، مثل الإنترفيون (مضاد للفيروسات) وجليفيك ويتاح استخدامهما لبعض أشكال اللوكيميا، وهناك أدوية أخرى في طور التجربة والتطوير.
(ج)العلاج بالإشعاع - الطاقة العالية للإشعاع يمكن أن تستخدم لقتل خلايا السرطان.
(د)زرع النخاع - تجمع الخلايا السليمة من نخاع المريض قبل العلاج الكيميائي (الزراعة الذاتية)، أو من متبرع مانح (الزراعة من الغير) بعد إعطاء العلاج الكيميائي بجرعة عالية يقتل نخاع العظم، ينقل النخاع إلى دم المريض عن طريق الوريد ليل محل خلايا الدم المريضة والسليمة التي تتلف بالعلاج الكيميائي المكثف.
ويحتاج المرضى الذين عولجوا من اللوكيميا لفحوص ومتابعة دورية للتأكد من عدم عودة السرطان بالإضافة إلى التأكد من عدم حدوث آثار جانبية قصيرة الأجل وطويلة لأجل قد تحدث من آثار العلاج.
واسمحولي ما ابغي اعطيكم محاضره بس هذي اشياء المفروض انه الواحد ينتبهلها في كتابه القصه.....
اما بالنسبه لمها .....بعدني ما عرفت كيف (وفيه داعي انك توضحلي) ....واتمنى انك تخبرني كيف عرفت شكله وهي ما عندها غير اسم (حمد)...وكيف اصلا عرفت انه في السيتي...هذا شي ثاني ...ما اعتقد انه ممكن يعرفه غير السحره والمشعوذين.....
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البارت التاسع عشر والاخير
روحت رفيعه سيده بعد جملتها الاخيره .. بس حمد زخها من ايدها يبغي يعرف السالفه ..
حمد : بلاج .. انزين فهميني الموضوع ..
وتفج رفيعه ايدها بقو وتقوله (( فجني )) وروحت بيتهم .. وخلت حمد مهموووم وما يعرف كل اللي يدور حوله .....
يزيد الشوق بفراقك ... ولا أدري سبب فرقاك
أحس القلب مشتاقك ... يحن ويرتجي لقياك
حبيبي ش الذي عاقك ... وغير في الهوى مبداك
أحيده يحن خفاّقك ... ومن هذا أنا أهواك
رميت في قلب أعواقك ... وتمنعني أجيب دواك
تصد وتقتل أشواقك ... حرام تصد عن مضناك
بعد وتزيد بفراقك ... ولا أدري سبب فرقاك
كانت أول ردة فعل من حمد أنه رد وركب السياره وسار.. ما يعرف وين؟؟ المهم أنه يبتعدعن الحاره .. طلع حمد من الحاره ... وقف عدال عرقوب .. نزل .. طلع تلفونه .. اتصل
حمد : الوووووووو
مها : ( مستاااااااااااااااااااااا ااااااااااااااااانسه ) مرحبا .. هلا والله
حمد : ممكن أعرف ليش انتي جيه ؟؟؟
مها : هاه.. أناا .. ليش؟
حمد : ممكن تفسريلي ليش سويتي هالموقف البايخ ..
مها : أي موقف.. حمد .. انته عن شو ترمس؟
حمد : لا تسوين عمرج ما تعرفين ...
مها : حمد .. شو فيك؟؟
حمد : ليش تسوييين لرفيعه ؟؟
مها : اهاااااا .. جيه السالفه..
حمد : ارمسي أحسلج .. من وين يبتي رقمهاا
مها : يبته وخلاص
حمد : (معصب) من وين ؟؟
مها : ( بتردد ) ذاك اليوم يوم شفتك في الستي.. وعقب ما طلعت لحـ ـ ـقتـ ـك...
حمد : ( معصب ) شوووووو لحقتيني شو هالقواة اللي فيج ..
مها : حمد ... خلني أكمل رمستيه ..
حمد : افففف قولي
مها : يوم لحقتك وصلت لين بيت بس انته نزلت ورديت وركبت ..
وتذكر حمد ذاك اليوم عقب ما طلع من الستي خطف على بيت قوم راشد ..
حمد : وعقب ..
مها : ( فيها صيحه ) تحيد ذاك اليوم .. آخر اتصال كان بيننا قبل لانتلاقى .. تحيد يوم كنت تحاول تبعدني عنك بأي طريقه .. ويبت سالفه رفيعه حجه عسب أبتعد .. وقلتلي أنك تحبها وانها ساكنه في نفس حاره قوم خالتك .. كنت أجذبك .. قلت أكيد هاذي حجه مالها وجود .. بس انصدمت يوم عرفت أن هالحجه لها صله بهالواقع ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك