رواية طحت طيحه في هواكم -23
مها : ( فيها صيحه ) تحيد ذاك اليوم .. آخر اتصال كان بيننا قبل لانتلاقى .. تحيد يوم كنت تحاول تبعدني عنك بأي طريقه .. ويبت سالفه رفيعه حجه عسب أبتعد .. وقلتلي أنك تحبها وانها ساكنه في نفس حاره قوم خالتك .. كنت أجذبك .. قلت أكيد هاذي حجه مالها وجود .. بس انصدمت يوم عرفت أن هالحجه لها صله بهالواقع ..
حمد : ................ ( تأثر مع رمستها وتم ساكت يسمعها )
مها : ( استهزاء + حزن ) اكتشفت أن ربيعتيه ساكنه في هالحاره .. وتخبرتها عن رفيعه .. وقالتلي انها تعرفها .. بس تصدق ؟؟ جذبتها .. وعسب أتأكد أكثر ما خليت بنت في الكليه ما سألتها ... كنت أسأل اللي أعرفها واللي ما أعرفها .. تخيل أني طول هالمده أسال .. وليتني ما سألت .. كانن كل ما يقولن لي ما أعرفها كنت أستانس وكل يوم واملي يكبر .. بس ذاك اليوم .. ذاك اليوم اللي نكّد عليه حياتي ... شفت بنت يالسه في الكلاس وتكتب واجبها .. سألتها .. وليتها ما ردت على سؤالي .. ليتها قالتلي ما أعرفها ولا في عمري ما سمعت عنها .. تعرف شو قالتلي .. قالتلي أنا رفيعه .. جذبتها .. بس راوتني أوراقها وبطاقه الكليه .. وتأكدت .. ومن هذاك اليوم والله أعلم بحالي ..
حمد : بس الحركه اللي سويتيها فيها مب حلوه ..
مها : واللي سويته فيه حركه حلوه .. هيه أكيد حلوه بالنسبه لك .. بس بالنسبه لي .. مووت .. تعرف شو يعني مووت ..
حمد : بس ما كان في داعي تسويلها ..
مها : حمد .. من بعد ما تأكدت من السالفه .. نفسيتي انجلبت .. كرهت الدنيا وما فيها .. اتصدق اني منومه في المستشفى من اربع أيام .. واليوم رخصوني .. والسبه انته .
حمد : الحمد لله على السلامه .. بس هذا هب سبب يخليج تسوين اللي سويتيه ...
مها : كانت نفسيتي أبد ما تسر .. وكنت مسوتلها وقلت اللي قلته وخلاص ..
حمد : والحين عايبنج هالوضع .. البنت انجلبت عليه .. استوت ترمسني من ورا خاطرها ... الله واعلم شو حاطه في بالها او في خاطرها الحين ....
مها : داريت خاطرها ولا فكرت ولو يوم تداري خاطريه ..
حمد : مهاااا لين متى بتتمين جيه ..
مها : ( باستهزاء ) مهااا .. اتصدق يا حمد .. أول مره أسمعك تنطق اسمي ...
حمد : ..................
مها : تحبها ؟!!
حمد : ......
مها : ( بإصرار ) تحب رفيعه ؟
حمد : يالله يالله بخليج
مها : الله يحفظك ..
بند حمد عن مها .. بند عنها وخلا السؤال بلا اجابه .. رد حمد البيت وكمل اليلسه .. بس بجسمه بليا عقله وتفكيره ...
وفي الميلس ..
حمد يالس عدال راشد ومنصور وحارب ويسولفون ويا محمد الشيبه ..ومانع يالس عدال بو راشد ويشوفون التلفزيون ويرمسون ..
مانع : ها يا عمي.. شو قلت ..
بو راشد : هاذي الساعه المباركه يا ولدي .. بشاور البنت وامها وبرد لك خبر..
مانع : ( مستانس ) يصيير خير عيل .. الاسبوع الياي بنيي انا واميه وابويه وبنخطبها رسمي .. وانته رمسها يوم بنييكم ..
بو راشد : خلاص .. جيه زين ..
مانع لو الود وده الحين يسير سيارته ويطلع العصاه ويسير في نص الحوي وييول .. هههه هذا خبيل .. أي شيء يسويه .. نش ودخل سيارته في الحوي .. وشغل المسجل .. وحط غنيه الرمش أريشه مالت حمد العامري .. وطّول على الآخر .. حتى السياره تمت تختض .. نزل .. وحتى من زود الربشه .. نسى العصاه في السياره .. رد وفج السياره وطلع العصاه .. وتم ايوول في نص الحوي .. والبنات استقطعن ما يعرفن شو السالفه .. ظهرن وسارن البلكونه .. وأحسن شيء أن محد بيلاحظهن والليت اللي عليهن مبند .. بس الخبيل مانع لاحظهن .. صد صوبهن وتم ييبس لهن والبنات ميتااات محلهن .. وبالأخص ميره .. عادي تعق عمرها من فوق البلكونه .. كل شيء جايز .. وتذكرت مانع والتلفون .. بس ما عبرت هالشيء .. ارتبشت وياه .. الشباب كلهم ظهروا يشوفون شو السالفه .. والأحلى أنهم ارتبشوا وياه ... كل واحد ياب عصاته .. واللي يايب السلاح (( الكلاشن )) وتم اييول .. حتى بو راشد ارتبش .. ولو ان كلهم ما يعرفون السالفه .. ومحمد الشيبه يحرك راسه وياهم .. وشوي أن بو حارب وخليفه يدشون .. انصدموا من اللي شافوه .. شو هالخباااااال .. بس هالشيء ما يمنع انهم يستانسون .. حتى هم ارتبشوا ..والحريم طلعن وتمن يتظاحكن على هالخبال .. ما شاء الله الكل اييول .. والسبب مانع .. ارتبش واربش الباجي وياه .. تستاهل يا مانع بن منصور ..
وفي بيت .. وفي نفس الحاره .. رفيعه في حجرتها وتصيح .. منصدمه في حمد .. كرهت اليوم اللي شافته وتعلقت فيه .. ليش يا حمد ليش ؟؟ شو مسويه فيك عسب تجازيني بهالشيء .. خيانه مره وحده .. خاف ربك .. خاف ربك ( وتمت تصيح )
مر اسبوووووووع بالضبط .. مانع وامه وابووووه ساروا دبي .. وخطبوا ميره ... وردوا العين .. بس قبل لا يركب السياره شاف البشكاره داشه البيت.. وطلع من مخباه ورقه ..
مانع : اييييييه ميري ما ادري كوماري ..
yes sirالبشكاره :
مانع : وابتلشنا .. الاخت ما ترمس الا بالانجليزي .. كيف أرمسها الحين ..
what ?? البشكاره :
مانع : هيه هاي فهمناها .. الله يسلمج عطي هالورقه حق ميره..
البشكاااره تمت تجلّب عيونها ...
مانع : هب منج .. من المكتب اللي شغلج ...انزين ..
what do you said ?? البشكاره :
مانع : ذس ( ويأشر على الورقه ) فور ميره
ok sir .. البشكاره :
مانع : بسرعه ..
وتمت البشكاره متصلبه ما تعرف شو السالفه ..
مانع : سيري سيري الله يخلييج
ويعطيها بو لابس ويركب سيارته وهووه مرتبش على الآخر..
بو مانع : شو بلاك ويا البشكاره ؟؟
مانع : هاااه .. لالا .. ماشي .. هاي ورقه راشد ناسنها في سيارتيه ذاك اليوم ..وقلت للبشكاره تعطيه اياها ..
ام مانع : وجيه ما عطيته وانته فياه داخل ...
مانع : نسيت .. الا الحين ذكرت ..
ويردون العين .......
ونرد لفاطمه .. خطيبه راشد وحرمته المستقبليه .. يوميا ترمس راشد .. يوميا بمعنى يوميا .. ولا يوم ما رمسته .. وهالشيء خلا راشد يتعلق بها .. لانه حصل في فاطمه اللي ما حصله في حصه .. يعني حصل في فاطمه الكلمااات الحلوه والاسلوب اللي يجذب واللي ما جد سمعهن وشافهن على حصه ... صح راشد تعلق بفاطمه .. بس مب لدرجه انه يحبها ..
ميره ومهره وبو راشد وام راشد وميوود يالسين في الصاله ويسولفون .. ويظحكون على مايد اللي يسوي حركات من الخاطر تظحك .. وشوي أن البشكاره تدش الصاله .. تدش ووياها خراب بيت ميره ..... سارت صوب ميره وعطتها الرساله .. والكل شاف البشكاره وهي تعطي ميره الرساله .. تعجبت ميره .. فجت الرساله وكل الانظار صوبها ... (( ميرووووه ... اليوم على الساعه عشر بسوييلج تلفون .. اذا قفطتيني شرات هاذييج المره .. يااااااااااااا ويلج ... بقولج شيء .. مانع ..)) فجت ميره عيونها مستقطعه .. وفي خاطرها ( يالله يعلني بلا حركتك البايخه يا مانع .. الحين شو اسوي .. يالفضيحه )
بو راشد : بلاج ميره .. شو في الورقه ومن منووه ؟؟
ميره : ( زايغه ) هااااه لا لا ابويه .. ما شيء .. هااي موووزووه بنت يرانا تبغي كتاب تفسير الأحلام ..
ام راشد : انزين يا بنتي قومي طرشيلها اياه وخليها تسلم على امها ..
ميره : ان شـ ـ ـ ـاء الله ..
وتقوم ميره وتحس في جسمها رجفه .. وتسير فوق .. تدخل حجرتها وتقفل الباب وراها .. وتيلس على مكتبها .. ويودت راسها ..( يالله يا مانع . بغيت تخرب بيتي اليوم ) ...
وصلت الساعه عشر .. الكل راقد ما عدا مهره ومايد يالسين في الصاله يلعبون بلاي استيشن .. ميره نزلت تحت .. وتمت عدال التلفون .. ونبهت لمهره ان لتلفون يوم بيصيح لا تشله لأنها بتشله من تحت . وقالت أن ربيعتها بتسويلها .. وشوي أن التلفون يصيح .. تشوف ميره الرقم .. وسيده تشل التلفون ..
ميره : يا السخيف يا التافه يا السخيف يالتافه يالباايخ
مانع : انزين ليش تعيدين الجمله مرتين .. ههههههههه ..
ميره : ( معصبه ) سخيييييييييييييييييييييف
مانع : شوي شوي انزين . شو بلاج ؟؟ شو سويت عسب تسبيني كل هالسب ..
ميره : تعرفت انك اليوم كنت بتتسب في انهم يدفنوني عدال نخلتنا اللي عدال الباب من اليمين
مانع : والخيييييييييييييييييبه .. بالتحديد النخله اللي عدال الباب من اليمين .. أنا كان في خاطريه النخله اللي عدال الباب من اليسار .. يالله .. ان شاء الله مره ثانيه ..
ميره : ويا راسك يالبااااااايخ .. يا السخيف يا شو أقول بعد .. اففففففف
مانع : أعصابج ماماتي .. ليش انزين ؟؟ ما حيدني مسوي شيء
ميره : وانك تعطي للبشكاره رساله هب شيء غلط ؟؟
مانع : لااااااا
ميره : وجدام اميه وابويه ؟؟
مانع : ( منصدم ) والله ..
ميره : عيل .. أتمصخر وياك انا ..
مانع : السموحه والله .. ما كنت أقصد .. وهيه الخبله ما عطتج اياها الا يوم الكل عندج
ميره : طالعه عليك تراها ..
مانع : هاااااه .. حدج عااااد .. من الصبح تسبين وانا ساكت .. ارحمي لسانج شوي ..خلي هالكمن حسنه الباجيات محلهن .. عنبووووو كله مره وحده ..
ميره : أقول الشيخ.. خلصن الخمس دقايق .. لا وزياده 17 ثانيه .. يالله باي
مانع : لا لا صبري بقولج شيء ..
ميره : سوري .. اسمحلي
وتبند في ويهه ..
مانع هنيه وصل حده ... ظيعت الوقت كله في السب وما خلته يرمس عن السالفه اللي يبغي يقولها لها .. يالله الحمد لله على كل حال ..
رفيعه لين الحين منصدمه .. وهالصدمه خلتها تقطع قوم عمها ... استوت ما تسير لهم وايد شرات قبل .... حتى ملجه حصه ما بتحظرها والسبه حمد .. وفي آخر لحظه غيرت رايها لأن حصه أصرت ان رفيعه تكون موجوده .. ورفيعه ما وافقت الا عشان حصه ولا لو الود ودها موول ما اتطييييح العين ..
يا اليوم المنتظر لخالد .. اليوم الخميس .. ملجته ..الكل في بيت سهيل .. والبيت زحمه حد طالع وحد داااااش .. وربشه .. البنات متعدلات وكل وحده أحلى عن الثانيه .. ماشاء الله عليهن .. وحصه .. متعدله بعد ويالسه في حجرتها .. وشوي أن رفيعه تدش عليها ..
رفيعه : ها العرووووس
حصه : اسكتي يا رفيعه .. دخيلج ..
رفيعه : هههههه بلاج ماماتي .. لازم تستانسين ..
حصه : ( في عيونها دمعه ) أستانس على شو ..
رفيعه : لا لالالا.. دخيلج حصيص .. هب وقته الحين ..
حست حصه بغصه في قلبها .. ما كانت تبغي تعرس .. وفي نفس الوقت ما كانت تبغي تظلم خالد وياها ... تظلم الانساان اللي كان غيث يبغي يقرب به .. بس .. انتظرت الريال اللي تباه .. انتظرت وانتظرت .. بس فالأخير انتهى هالحلم .. خلاص .. المفروووض ما تفكر فيه أبدااااااا .. آآآآآآخ بس
حصه : رفيعه ... حاسه بغصه في قلبي ..
رفيعه : عادي حبيبتي .. شعووور طبيعي ..
حصه : أي عادي أي بطيخ .. رفووع حاسه أن هالدنيا كلها .. ولااااااااااااا شيء
رفيعه : بلاج حصووص .. حشى .. عرس ولا مقصبه
حصه : ( نزلت راسها وتنهدت ونزلت دمعه .. هالدمعه الأخيره اللي راح تذرفها على الانسان اللي حبته طول عمرها .. الانسان اللي تريته وتريته .. بس فالأخير صارت لغيره .. آآآخ يالدنيا .. هالدمعه دمعه الشخص اللي ما يحق لها بعدين تفكر فيه أو حتى يخطر في بالها .. خلاص .. ((خلاص يعني كل شيء انتهى وراح .. خلاص يعني ما بقينا حبايب .. ))
رفيعه : حصه .. انتي ما تبين خالد ؟..
حصه : شو الفايده الحين ..
رفيعه : ( منصدمه ) خلاص يا حصه .. اذا ما تبينه محد بيغصبج عليه .. وأنا اللي بقول لام خالد انج ما تبين ولدها ..
ويوم توها بتطلع نشت حصه بسرعه ويودتها
حصه : تخبلتي انتي ..
رفيعه : هيه تخبلت .. ما أدري منو اللي تخبل الحين .. أنا ولا انتي اللي بتتخبلين وبتتزوجين واحد هب في خاطرج ..
حصه : انا ما قلت انه هب في خاطريه ..
رفيعه : عيل؟؟
حصه : ما تعودت عليه كزوج .. هوه غالي على قلبي بس مت تصورته وفي يوم من الأيام يكون ريلي ..
رفيعه : اها ثرها السالفه جيه .. عيل ماماتي ما في داعي نكنسل شيء .. مع الايام بتتعودين عليه .. ومن الحين اقولج .. ريلج ما عليه كلاام .. كافي ان امه فنانه ورمستها غاويه .. واسلوبهاااا ارووع ..
حصه : أونج تشجعيني
رفيعه : هيه نعم .. والحين تعالي بعدل الجحال اللي خربتيه ويا راسج
وعقب ما عدلتها ..
رفيعه : الله يحفظج غناتي .. قمر 15 ناقص واحد ههههه
حصه: ( تبتسم )ويا راسج
رفيعه : الله يوفجج حبيبي ..
وتبتسم حصه ..
رفيعه : ثلاث دقايق بس بزقر الربع وبنييب المسجل ويانا .. وبنجلب لج الحجره ..
وتطلع رفيعه وتزقر البنات وسارن الحجره وارتبشن من الخاطر .. وصح انها ملجه بس .. بس ما يمنع أن الشباب بعد يرتبشون .. وقفوا سيايرهم على الشارع المجابل .. ونزلوا ايوولون .. ومب واحد اثنين .. ما شاء الله نص شباب الحاره وياهم ..وعلى راسهم خالد .. اللي من خاطره مرتبش .. الكل ايووووول .. ما عدا راشد .. اللي هاليوم بالنسبه له يوم دفنه .. اليوم اللي بيودع اللي يحبها .. اليوم اللي يشوف فيه اللي يحبها تحل لواحد غيره .. اليوم اللي فيه بيودع الدنياا .. دنياه الأوليه .. وينسا حصه للأبد .. راشد يالس في الميلس ويا الشواب .. مع ان الشباب كلهم برع .. وشوي ان خالد وحمد ومانع والباجين يدشون ووياهم المطوع ... الكل يلس .. وشوي أن المطوع يفتح دفتره .. ويتجرب خالد من الدفتر وفي ايده القلم.. وهنيه يوقف راشد ويطلع برع .. ركب سيارته .. وكانوا الشباب بعدهم ايووولون برع .. راشد ما سوالهم سالفه .. شخط ذاك الوووويل وروح عنهم ... الكل تم يشوفه .. طلع راشد من الحاره .. وفي سيارته .. يسوووق بسرعه ... وهوه يصيح .. هيه يصيح .. يصيح من القهر اللي فيه .. ويصيح من الندم ومن كل شيء .. طلع من العين .. وصل دبي .. وكالعاده نزل الممزر .. كان فاضي .. يمكن بس شخصين يتمشون بس بعيد عنه .. تم راشد يطلع كل اللي في خاطره .. وشوي يطلع التلفوون ... ويتصل ..
فاطمه : فديتك والله ... ما أصدق انك مسولي .. فديت روحك أنا
راشد : ( نبره اصرار وتحدي ) فاطمه .. تزهبي ...ملجتنا الاسبوع الياي ..
فاطمه : ( منصدمه ) شووووو؟؟
راشد : ملجتنا الاسبوع الياي .. وباجر بيي وبتفق ويا هلج .. يالله مع السلامه ..
ويبند راشد التلفون .. وبالمره أغلقه عسب محد يسويله تلفون ..
وفي العين .. البنات مرتبشات وحاله .. وشوي أن حد يدق الباب .. لبسن البنات شيلهن ..
فجت ميره الباب وكان اللي يدق منصور..
منصور : السلام عليج
ميره : وعليكم السلام والرحمه
منصور : شحالج ميرووه ؟؟
ميره : بخير وسهاله .. كيف عرفتني؟
منصور : بالحظ هههههههه ..
ميره : ( تشوف الدفتر اللي في ايده ) هاه أشوفك شال دفتر تحديد المصير ..
منصور : ههههههه حلوه تحديد المصير هااااااي .. المهم .. عطي حصيص الدفتر خليها تووقع بسرعه .. المطوع مستعيل ..
ميره : امم اوكيه .. ترياني
وتبند الباب .. حصه من شافت الدفتر انتفظت ..
ميره : يالله حصوووووصي .. وقعي بسرعه المطوع مستعيل .. ( وتحط الدفتر جدامها والقلم في ايدها )
حصه : لالال .. غيرت رايي ما أبغي أعرس ..
وهنيه الكل تم يتظاحك عليها ....
مهره : ههههه شكلج يظحك حصيييص..
رفيعه : يالله ماماتي عن الدلع .. وقعي .. ولا تبيني أنا أوقع عنج..
حصه : هيه .. وقعي عني ..
رفيعه : من الله تبغينها .. يالله فديتج وقعي ..
حطت حصه القلم على الدفتر ويوم توها بتوقع .. تراوالها طيف الغالي .. حبيب القلب اللي من هاللحظه غصبا عنها لازم تنساه .. وقعت حصه .. وهيه توقع طاحت دمعه على الدفتره ..
رفيعه : ويييييه كلينكس بسرعه .. بسرعه ...
وتييب ميره الكلينكس وتمش الدمعه ..
ميره : ويا راسج خيستي دفترهم دموووع .. ههههههه
وهنيه وعقب ما وقعت حصه رفعت راسها .. شلت ميره الدفتر وعطته منصور ..
وهنيه الكل تم يباركلها ... وهم مستانسين .. وحصه تسوي عمرها مستانسه عسب محد يحس بها .. وشوي ان الباب يندق مره ثانيه .. بس هالمره فتحته رفيعه .. كانت البشكاره يايبه شيء .. شلته رفيعه مع انه ثجيل شوي .. ويوم دخلته الحجره الكل تفاجأ .. باااقه ورد عوووووووووده فيها ورود حمر روز وورود صغار بيض .. وفي صندوق صغير خشبي في نص الباقه .. يعني مسواي فيه مكان خصوصي .. حطت رفيعه الباقه على الطاوله وعطت البطاقه اللي فيها حق حصه ... قرت حصه البطاقه وكان مكتوب فيها (( افتحيها على الساعه ((12 ونص)) مع تحيات ..؟؟؟
انصدمت حصه من البطاقه .. اشمعنى 12 ونص .. ومنو هاللي مطرشنها ؟؟؟
وشوي أن مهره وشمه يدخلن وهن كانن طالعات قبل لا توصل الباقه..
مهره : حصووه الحقي
ميره : بسم الله بلاج
شمه : انا بقووووووووول .. الله يسلمج يقوولج حمد تزهبي .. عقب شوي بتنزلين الصاله عسب المعرس يسلم عليج ..
حصه : هااااااه .. يسلم عليه .. لا لا مستحيل ..
رفيعه : هههههههه هوه ما قال بياكلج .. قال بيسلم عليج..
حصه : لا لا ما أبغيه يسلم عليه .. خليه يروح بيتهم .
ميره : ههههههه اللي يسمعج يقووووول ياهل .. يالله تزهبي ..
وعقب عشر دقايق تدخل البشكاره ..
البشكاره : ماما حصه ... بابا حمد يريد انتي تحت داخل مجلس ..
حصه : خيبه تخيبج .. سيري سيري يالله ..
مهره : بلاج تقاشرتي عليها المسكينه ..
حصه : دخيلكن انزلن فيايه ..
رفيعه : هههههههه حلوه هالنكته ..
ميره : يالله يالله مدام حصه .. سيري عند ريلج .. خيستيه ...
توقف حصه .. وتمشي شوي شوي
مهره : طالعوا هاي .. عزااااااااات ما وصلتي اليوم .. يالله انقفظي ( بسرعه )
تنزل حصه تحت وتشوف حمد واقف جدام الباب الميلس (( الميلس الثاني )) ويالس يظحك على خالد ...
حمد : ما بغيتي تنزلين ..
وتمت حصه منزله راسها مستحيه على زايغه ..
ويوم وصلت جدام حمد ..
حمد : الله الله .. شو هالحلاااااه حصوه .. تيننين فديتج .. ومن الينب ( الجهه ) الثانيه .. خالد يتريا وهوه يتحرقص .. ويشوف حمد وهوه يرمس حصه .. وحصه كانت ورا اليدار .. يعني ما يشوفها ..
حمد : يالله حياتي حصه ..ردي حجرتج .. وارتاحي
هنيه عصب خالد على هالحركه .. ووقف .. وهنيه حمد ظحك من الخاطر عليه .. كان قاصد هالحركه وهوه
انه يظيج بخالد ..
حمد : أعصابك خلووود ..
وييود حمد حصه من ايدها ويدخلها الميلس .. هنيه تيبس خااااااالد ...
يلست حصه بعيد عن خالد شوي ..
حمد : اقول المعرس .. عندك عشر دقايق بس .. الحين الساعه 11 وخمس .. يعني على الساعه 11 وربع بيي.. يعني إحسب حسابك .. والحين يالله بخليكم.. ويطلع حمد ويلايم الباب .. (( خلاه شويه مفتوح ))
وهنيه حست حصه بالخوف ...
خالد : شـ ـ ـ ـحاااااااالج حـ ــ ـصـ ـ ـه ؟؟..
حصه : ( مرتبكه ) بخيــ ـ ــر الحمد لله ..
وتموا ساكتين شوي ..
خالد : حصه ..
حصه : نعم
خالد : انتي مقتنعه باللي نسويه ..
وهنيه عاااااد ارتبكت حصه ..
حصه :..............
خالد : ما جاوبتيني ؟؟
حصه : هـ ـ ـيه مـ ــ ـقتنـ ـعه ..وهنيه حس خالد براااااااااحه واستانس من الخاطر
خالد : حصه حبيت أقولج أنج دخلتــ.......... ( ويقطع رمستهم حمد )
حمد : ( مبتسم ) يالله أخ خالد خلص موعد الزياره ..
هنيه كان خالد بيقوم وبيكسر الباب على راس حمد ..
خالد : ( والشرار يطلع من عينه ) ممكن خمس دقايق بس ..
حمد : ( يهز راسه ) نوووووو وييييي .. يالله حبيبي .. الحين الساعه 10 و22 دقيقه .. استغفر الله أقصد 10 و23 دقيقه ..
هنيه ابتسمت حصه على حركات حمد ...
خالد : ( يطالع حمد بنص عين ) اوكيه .. خلاص .. تصبحين على خير يا حصه ..
حصه : وانته من اهله .. ويطلع خالد من الباب اللي ورا .. ووياه حمد .. وأول ما طلعوا تنهدت حصه وردت فوق .. وهنيه البنااااااات استلمنها بالأسئله ..
وبما أن الوقت كان متأخر .. فقرروا رواعي دبي يباتون في العين .. وحتى مانع واهله باتوا عند قوم حمد .. يعني البيت فل .. كله حركه .. البنات فوق .. في 4 حجر .. 1 كبيره و3 متوسطات .. البنات خذن الكبيره عسب تظمهن كلهن .. وام مانع وام راشد وميود في حجره .. وام حمد وعلاوي وام حارب في حجره بس اللي تحت .. وحجره لعنووده وشمه وام منصور ... والشباب كلهم في الميلس .. الحين الساعه 12 الحريم كلهن رقدن .. واليهااااااال بعد وشمه وياهم ..بس البنات لا .. كملن السهره .. وبعدهن لين الحين ما تلبسن .. مهره وميره وحصه ورفيعه .. كلهن طايحات على الشبريه .. كل وحده حاطه راسها على ريووول الثانيه .. وتمن يسولفن وينكتن على حصه ...
حصه : اوووووف منكن انتن .. ما عليه .. ياينكن الدووور .. وبتشوفن شو بسوييبكن ...
رفيعه : ههههههههه ما عليه .. يصير خير لين ذاك اليوم ...
مهره : ( تطالع ميره بطرف عينها ) ومن بعده هوووه؟
وتظرب ميره مهره على ريلها ..
حصه : شو سالفتكن انتن؟؟
رفيعه : شكلكن داسات عنا شيء؟؟ ارمسن يالله
ميره : هاااه .. لا افااا نحن ندس عنكم ... السالفه وما فيها اني يوعانه ..تعالوا نسير ناكل شيء ..
رفيعه : ( تهز راسها ) نو نو نو .. ما تطلعن من هنيه إلا عقب ما تخبرنا ؟؟
ميره : نخبركن شو ؟؟
حصه : اللي داساتنه عنا ..
مهره : اوكيه أنا بقولكن السااااااااالفه .. الله يسلمكن ............( وتحط ميره ايدها على ثم مهره ) وتبتسم للموجودين
ميره : صدقني ما في شيء يذكر حاليا ..
مهره تهز راسها وتعظ ايد ميره بالخفيف )
ميره : آآآآآآآآي عنلاتج .. لا تشوهين ايدي ... ورايه عرس
وهنيه ظحكت مهره من الخاطر .. ظحكه صدق قويه ..
مهره : روحج رمستي .. أنا ما قلت شيء ..
رفيعه : ( منصدمه ) ميروووووووووووووووووووووو ووووووووووه بتعرسين؟؟
ميره : هاااه .. أنا ؟؟
رفيعه : لا أنا ..
حصه : هيه بتعرس وبتاخذ منووووع ..
وهنيه الكل انصدم ..
ميره : وانتي شدرااااااااااج ؟؟
مهره : حصوه منو قالج
حصه : هوه بشحمه ولحمه قالي ..
رفيعه : هيه هيه هيه هيييييييييه .. الكل يدري وأنا آخر من يعلم .. أفاا والله يا بنات العم ..
ميره : السموحه غناتي .. كنت بخبرج .. بس والله انشغلت بملجه حصيص ..
حصه : (تبتسم ) عذر أقبح من ذنب ...
مهره : هيه صح ..
رفيعه : وانتي بعد وياها ..
مهره : انا مالي خص .. هيه المخطوبه مب أنا ..
رفيعه : انتي ولا هيه .. كلكن خاينات ..
ميره : رفوووووع عاااااد ... لا تتنيحسين عليه .. أصلا انا ما رديت عليهم ..
رفيعه : لا لا خلاص انا زعلانه..
ميره : اووووووووف بس .. خلاص ما بوافق عسب ترتاحين
رفيعه : لا لا يا ويلج ..
ميره : هههههههههه هيه جيه أبااااااااااااااج ..
حصه : ما شبعتن من الرمسه ..بسكن هذربان .. يالله سبووح ..
وتقوم حصه : أنا بسير حجرتيه بتسبح وبيي ..
وطلعت حصه وسارت صوب حجرتها.. وهيه الحجره الوحيده الفاضيه .. دشت حصه وقفلت الباب وراها .. ولا اراديا التفتت صوب الباقه .. وفجأة تشوف الساعه اللي على اليدار ... كانت الساعه 12 ونص وسبع دقايق .. تقربت صوب الصندوق .. فتحته .. شافت كرتون صغير مغلف وبطاقه وظرف رساله .. خذتهن وسارت فوق الشبريه ( السرير ) ما عرفت تفتح شو .. اول شيء فتحت البطاقه .. وكان مكتوب فيها ...
إلى غناتي ......
أول شيء .... ألف مبرووووووووك على الملجه ...
ثاني شيء ... انا مستانس لدرجه ما تخطر على بالج ..
ثالث شيء .. أتمنى أن الهديه تعيبج ..
رابع شيء : السموحه .. أدري خطي لوعه جبد .. بس يالله يمشي حاله ..
خامس شيء : فديتج .......
مع تحيات ........ خالد
هنيه انصدمت حصه ما كانت تتوقع انه هوه اللي مطرش هذا كله ... وشوي وتفتح الظرف وكان مكتوب فيه ...
لولا الحيا هليت ع الخد عبرات ... ثم صحت باعلى الصوت من زود مابي
لا تحسبون اني أببكي بحسرات ... والا ندم يفرض عليّه عذابي
بل طاب لي سعدي وتصريف الاوقات ... يوم الذي يهواه قلبي رضى بي
طلبت قربه .. حيث قربه مسرات ... وحيث بعده هو شقاي ومصابي
وابدى لي الترحيب .. واحيا لي اموات ... ورد لي فرحي وفايت شبابي
قال اعترف لك .. طلبتي انت بالذات ... ما شاقني غيرك بكل الرّوابي
وووو سوالم ..
الصراحه البيت الأخير هب حافظنه .. والسموحه منج ...
......................... .......
هنيه حست حصه بشيء غريب .. حست أن في انسان مهتم بها .. مهتم ابها ولدرجه انه يخطبها ويتزوجها ... غير عن اللي وعدها وما نفذ وعده ...
وشوي وتفتر عينها صوب الهديه ... ترددت .. تفتحها ولا؟؟
قررت تفتحها .. فتحتها شوي شوي .. ويوم شافت اللي فيه وقف شعر ايدها .. موبايل نوكيا ........ هاذي الهديه .. فتحت الكرتون .. شافت موبايل وبطاقه تلفون يديده وخط بعد .. وفيه ورقه بعد فتحت الورقه وشافت المكتوب فيها ..
(( أدريبج منصدمه ... لا تنصدمين ولا شياته .. والحين .. يالله أترياج لا اتخيسيني .. ولا تخافين ... رمست حمد ووافق .. يعني يعرف ان عندج موبايل .. وهوه اللي متنقيه ويايه بعد .. وعن الرقم .. اذا حلو أنا مختارنه ... وإذا مب حلو ترا اخوووج هوه اللي مختارنه .. وبس.. والحين .. يالله أترياج.. ما برقد إلا يوم تتصلين .. عاد انتي وظميرج ... (وكتب لها رقمه ))
وهنيه بندت حصه الرساله بسرعه .. وحست قلبها بيطلع من مكانه .... أتصل له .. لا لا طبعا لا .. وتمت ثلاث دقايق تقريبا تفكر في هالشيء .. وفي الاخير قررت ما تتصل بس بتركب البطاقه وبتبند التلفون .. ركبت حصه البطاقه .. ويوم شغلت الموبايل .. ياهااااااااا مسج .. ( مبرووووووك عليج التلفون الشيخه ) ويوم توها بتبند التلفون وصلها مسج ثاني ... ( خيستيني والله ) .. وهنيه حست حصه بأنها ظالمه خالد اللي يترياها .. قررت تطرش له مسج ... وشوي أن المسج يوصل لخالد .. هنيه خالد كان وده يفر التلفون على اليدار ويفتته 587989795 نتفه من الفرحه .. قبظ التلفون قرا المسج ... ( اسمحلي والله .. عندي بنات خالتي .... اسمحلي ) هنيه اعتفس ويه خالد ... بس فالأخير تفهم الوضع ... وقرر ما يزعجها .. بس طرشلها مسج .. ( عراحتج الشيخه ) بس قبل لا يطرش المسج كانت حصه غالقه التلفون .. قبظت حصه التلفون والرساله والبطاقه وحطتهن في صندوق داخل الكبت ... وعقب تسبحت وردت عند البنات اللي كانن متسبحات وخالصات قبلها ..
وتمن يكملن السوالف .. وشوي تفز ميره
ميره : هيييييييه .. عندي لكن فكره..
رفيعه ومهره وحصه : شوووو؟؟
ميره : ( تبتسم ) صبرن ...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك