رواية نهاية حبك اعدامي -10
مريم انصدمت من كلام ايمان ... خافت انها تعرف شي
مريم بخوف وربكه: شو فيه خالد ؟
ايمان: مريوم شوفيه كله مسبه وسرحان .. يقعد معانا بس عقله بمكان ثاني .. باين عليه الحب .. يا ويل حالي على ولد العم
مريم " يعني انا الغبيه من بينهم .. كلهم ملاحظين هالشي الا انا .. شو انا ماعندي احساس" .. افففف تضايقت مريم من نفسها وفضلت السكوت ..
ايمان: مرايم .. فكرج فارس من يكلم ؟
مريم مغمضه عيونها: ..............................
ايمان: مريوم خلج معاي
مريم على نفس الحال: ايمانو سكتي عني ..
ايمان: شو فيكم اليوم .. شكلكم كلكم تحبون فهالبيت .. وقامت من مكانها ..
مريم فتحت عيونها .. وتمت اطالع اختها لين اختفت في نهاية الممر .. استغربت وشكت في نفسها
دخل عليها فارس و ويهه متغير .. حست فيه مريم
مريم: فارس شو فيك ؟
فارس ويتنفس بصعوبه: ولا شي .. بس قومي اعتدلي في قعدتج
مريم: شوفيها قعدتي زين ؟ .. وكانت شبه منسدحه
فارس: يا بنت قومي .. سمعي الكلام
اعتدلت في قعدتها وهي مستغربه من اخوها
مريم: فارس شو مضايقك ؟
فارس بهدوء: اسف مريم .. بس هالمكالمه اللي جاتني قلبت كياني ..
مريم: عسى ما شر فارس ؟
فارس: مابي اضايقج فديتج .. لا تهتمين .. قولي لي وينها ام كشه ؟
مريم: راحت فوق
فارس: زين شوفي امي .. يلا وايد تاخرنا
مريم: انشالله
" يا ترى شو سر هالمكالمه اللي قلبت كيان فارس ؟ ومن المتصل؟ "
" راجع بشوقي ولهفتي من غربتي .. راجع لربعي وديرتي ومحبوبتي .. "
رجع علي من السفر فرحان .. بس انصدم باللي صار ..
على: محمد شلون انا اخر من يعلم ؟
محمد: امي حلفت علي ما وصل لك ولا خبر ..
علي: ليش ؟؟ وانا مو واحد منكم وفيكم .. ولا شو انا منسي .. ما عاد لي وجود بينكم
محمد: على اذكر ربك .. وحاول تفهم .. امي ما حبت تشغل بالك معانا .. عشان تركز في دراستك ولان هاذي اخر سنه لك .. افهم ياخي
علي: على العموم لما اوصل البيت لي كلام ثاني معاكم ..
محمد ما عجبه كلام علي بس سكت عنه: على خير .. انا الحين قريب من المطار ..
علي بدون نفس: مع السلامه .. وسكر من غير ما ينتظر رد اخوه
محمد: هاي شو فيه ؟؟ ما حشمني .. !! معليه معذور
وصل محمد المطار وقد نسى الحوار اللي دار بينه وبين اخوه
محمد فاتح ذراعه عشان يحضن اخوه: هلا والله بو حسن .. الحمدلله على السلامه
على مد يده و رد من غير نفس: الله يسلمك .. وين السياره عشان يودون الاغراض
محمد سلم على اخوه وهو مصدوم من الحركه: حياك السياره هناك .. مشوا هم الاثنين لين السياره بدون ما يتكلمون .. محمد انجرح من اخوه بس حط له عذر .. انه راجع من السفر ومتضايق من اللي صار .. لخوه خالد و ولد عمه جاسم ومحد بلغه .. بس محمد قال " انا الكبير ولازم اسامح " ركبوا السياره ومحمد حاول يلطف الجو المشحون
محمد: علوه .. شو اخبار مصر ؟
علي: .....................
محمد: علوه .. هي نحن هنا
علي او انه كان سرحان: ها .. شو تقول ما سمعتك
محمد عداها له: اقولك شو اخبار مصر
علي: الحمدلله بخير ..
محمد: متى بتطلع النتايج ؟
علي: اففففففف
محمد رفع حاجب: وليش افففففف؟
علي: يا خي ما تحس اني زهقان .. اكرمنا بسكوتك ..
محمد استغرب من علي: زين ليش تتكلم بهالطريقه ؟
علي: محمد ارجوك مافيني اعور راسي
محمد فضل انه يسكت لانه لو شد مع اخوه عادي عنده يوقف نص الشارع ويشوته برا السياره .. بس كبر عقله وحط لخوه اعذار مو عذر .. تموا ساكتين لين وصلوا البيت وكان في استقبالهم ام محمد
ام محمد: يا هلا .. الحمدلله على سلامتك يبه .. تعال اشم ريحتك
علي وانفجر في ويه امه: الحين خالد يصير له اللي صار ومحد يعطيني خبر .. وجاسم ولد عمي كان بيموت ومحد قالي .. خلاص سافرت عنكم تغربت تخشون علي ... سويتوني غريب بينكم ..
ام محمد انقلب ويهها: يت يبه انا موصيتهم ما يقولون لك ابيك تهتـــ ..... قطع كلامها وهو يصارخ عليها ..
علي: لا والله .. شو يهمكم بدراستي .. انا باخذ الشهاده مو انتوا
دخل محمد الحوش وكان ينزل الشنط من السياره وسمع الصراخ
محمد: شو فيكم ؟
ام محمد وخانقتها العبره: ولا شي .. خذ شناط اخوك ودهم داخل يبه
علي: لا خليه يسمع .. ليش ولا شي .. تتكلمين بلساني وانا موجود
محمد سكت علي بصرخه هزت البيت: خلاص .. انت شو فاكر نفسك .. ما حشمتني وعذرتك .. لكن امي المتلهفه عليك جي تستقبلها .. الله يلعن هالغربه اللي غيرتك .. مابي اسمعك تعاتب حد ولو عندك مخ بتفهم ليش بتفهم ليش ما حبينا نضيق عليك في غربتك ..
علي ومنزل راسه: انا رايح غرفتي
ام محمد ارتمت في احضان ولدها .. آآآه يا علي .. شو اللي غيرك ؟ ليش جي وانا امك .. ليش ؟
محمد وزعلان على دموع امه: اعذريه الغاليه .. حتى انا في السياره كان معصب علي .. عاد تعرفين علوه لي عصب .. بس قلبه كبير
ام محمد وتمسح دموعها: الله يهديه .. فديت عمرك يا محمد .. مافي مثلك .. قلبك علينا
محمد: الغاليه .. انتوا مني وفيني .. وعمر الظفر ما يطلع من اللحم ..
ام محمد: تعال يبه نروح داخل .. عشان اجهز الغدا لخوك
راح علي غرفته يرتاح .. لقاها مثل ما هي .. ماتغير فيها شي .. حذف نفسه على السرير وتم يفكر في الاحداث اللي صارت له .. كيف انه رد على امه واخوه بالطريقه الوقحه .. دخلت عليه اسماء اخته ..
اسماء: علوه .. رجعت
علي: اهلا اسامي .. شو اخبارج ؟
اسماء: طيبه .. وين كنت ؟
علي: كنت مسافر والحين رجعت خلاص ما سافر بعد
اسماء: امي كل يوم تصيح .. وتقول فديت علي ولدي ..
علي ابتسم لها: وحليلج اسومه .. زين يلا خليني اروح اتسبح وارتاح
اسماء: لا بقعد عندك ..
علي: لا .. روحي عند امي .. يلا
اسماء: عاد علوه .. خلني اقعد
علي عصب: قلت طلعي برا .. ماتفهمين
اسماء خافت منه وتمت تصيح: هئ هئ هئ هئ .. يمه .. هئ هئ .. سحبها من ايدها وطلعها من الغرفه وسكر الباب ..
علي: اففففففف .. ناقص ازعاج انا
طلع خالد من غرفته على صياح اسماء
اسماء: علوه .. هاوشني هئ هئ هئ .. وكانت تمسح دموعها
خالد عوره قلبه عليها: فديت دموعج انا .. الحين بنروح انا وانتي نضربه ..
اسماء: مابي اروح غرفته .. حتى ما حبه
خالد استغرب من ردة فعل اسماء وحركة علي .. راح غرفة علي بس ما لقاه لانه كان ياخذ شور
خذ اسماء ونزل معاها تحت لقى امه ومحمد
خالد: مرحبا .. ونزل اسماء اللي راحت تركض عند امها وصاحت زياده
ام محمد: ويه ويه .. فديت هالدموع .. ليش ماما تصيحين ؟
اسماء مو قادره تتكلم من الصياح: علـ .. علـ .. علوه .. هئ هئ هئ
خالد: تقول علي مهاوشها ..
ام محمد ما ستغربت: الله يهديه ..
خالد مستغرب: شو السالفه ؟؟
محمد: من رجع وهو معصب على الكل .. عشان محد قاله عنك ولا عن جاسم .. امي وصتنا ما نقوله .. خافت انه يهمل دراسته ويحاتي .. لكن اخوك مو كفو حشيمه
خالد: بل .. ليش عاد ؟ شوي شوي عليه
خالد: بل .. ليش عاد ؟ شوي شوي عليه
محمد: انا هد فيني وبلعناها .. اول ما صلنا البيت امي تكلمه وفش خلقه فيها .. ورقع صوته عليها مادرى عنه بو محمد والا قبضه الباب ..
ام محمد بخوف: وغلاتي عندك ما تقول لابوك شي
محمد: وليش ما قوله ؟
خالد: احسن عشان يتأدب .. ما هقيت علي جي .. صج لي عصب ما يفتكر في حد .. بس ما يرفع صوته عليج .. وضرب ايده على الارض من القهر ..
ام محمد بتوسل: فديت قلبك يا محمد وانت يا خالد .. لا يطلع هالكلام لابوكم ..
محمد + خالد: انشالله
خالد: بس عشان خاطرج بنعديها له .. والا كنت انا اللي بقبضه الباب .. لا يتمادى زياده عن اللزوم كلنا نعصب وتمر علينا ايام ما لنا خاطر حتى نكلم حد .. بس نراعي غيرنا .. وهالعلوه انا بسنعه
محمد: عندك اياه ..
خالد: صدمتني يا محمد بعلوه ..
محمد: اقولك انقطع ويهي في السياره اكلمه ولا يرد علي .. عذرته وقلت راجع من غربه والمفروض انه يعرف بمشاكل البيت .. بس هو ما قدر خوفنا عليه
خالد: ولا يهمك يا بو نايف .. امسحها فيني .. بعد الغدا بشوف شو سالفته
" حزين على حالي .. يا حالي انا .. مشتني هالدنيا .. فدروب العنا "
يوسف: خالي متأكد من اللي تسويه ؟
سلمان: يوسف .. كم مره .. ويقاطعه يوسف
يوسف: خالي .. مابيك تنجرح
سلمان بعفويه: ما عاد للجرح مكان
يوسف بحزن: الله يعينك .. على العموم انا هني انتظرك
سلمان: مو نازل معاي؟
يوسف: حلفت برحمة ابوي مادش هالبيت
سلمان بتوتر: الله يهديك يا يوسف .. قلبت كياني ..
يوسف: انت قدها .. بس لو تتراجع عن قرارك
سلمان: يوسف .. خلاص انا نازل
يوسف: الله وياك
نزل سلمان و وقف يتأمل الحوش اللي عاش فيه طفولته .. ما تغير فيه شي .. نفسه البيت الكبير اللي كان ماليه الحب .. رجعت به الذكريات لورا .. لما طاحت عينه على زاويه من زوايا البيت الكبير .. شاف بيت الطين اللي بناه هو واخوه راشد وابوهم .. تذكر لما ابوهم شافهم يبنون وساعدهم وشجعهم
واخته المرحومه لولوه "ام يوسف" كانت تسوي لهم السندويشات وتجيب لهم العصير وتعطيهم رايها في بيتهم الصغير .. سلمان كان عمره 12 سنه و راشد كان 15
بوسعيد اللي هو ابو سلمان: يعطيكم العافيه ..
سلمان: الله يعافيك يبه
راشد: شرايك في بيتنا يبه
بوسعيد: دامكم انتوا عليه .. اكيد حلو
راشد: يبه تعال شوف غرفتي وغرفة سلمان
بوسعيد: بعد كا واحد له غرفه .. ماشالله عليكم
سلمان: يبه .. يبه هاذي غرفتي
بوسعيد: انت مخك نظيف يا سلمان طالع على ابوك
راشد: صوبنا شوي ..
بوسعيد: عاد انت يا راشد ماشالله عليك رفعت الاساس بقوتك .. دخل بوسعيد البيت وكان صغير وايد على احجامهم مسوينه ولكل واحد غرفه متر في متر .. واو انهم مسوين صاله
بوسعيد: يلا .. انا مستعد اساعدكم نرفع الطوفه ونركب السقف ..
راشد فرحان: والله يبه .. سلمان تعال .. ابوي بيساعدنا ..
سلمان: الله .. مشكور يبه ..
دخلت عليهم لولوه: وانا وين غرفتي ؟ السلام عليكم .. شلونك يبه
بوسعيد: عليج السلام بنيتي .. شخبارج؟
لولوه: الحمدلله .. يعطيكم العافيه شباب
راشد + سلمان: الله يعافيج
لولوه: راشد وانا وين غرفتي ؟ وين بنام ؟؟
راشد لاوي بوزه: ما سوينا حسابج
سلمان ببرتءه: اخذي غرفتي لولو ..
لولوه: وبنتي الجوهره وين بتنام ..؟
سلمان: اخذي البيت كله ..
بوسعيد: الله يخليكم ذخر لاختكم
راشد: احلف سلمانوه .. يعني نتعب وهي تاخذ على الجاهز
لولوه: ول عليك يالزطي .. مابي خلاص
بوسعيد كان يشوف نقاشهم مع بعض ومستانس
سلمان: يه رشود .. خلها في غرفتي وانا بنام في الصاله
راشد: اففففف .. كيفك
لولوه: ريلي بيسافر وبجيكم مع عيالي ..
سلمان: بفرح: الله .. هي هي هي
وقطع عليه شريط ذكرياته صوت بنت صغيره
منيره: شتسوي في بيتنا ؟
سلمان التفت على الصوت: انتي من ؟
منيره: انت من ؟
سلمان: وين ابوج ؟
منيره: اول قولي انت من ولا بصارخ
سلمان شللي بيخلصني من هالمصيبه .. هالبنت نسخه من رشود اخوي .. وملسونه مثله
منيره وراحت تصارخ: بابا حرامي .. بابا الحق .. حرامي
سلمان: هيييي ... تعالي يالمينونه والله بلشه هالياهل
طلع راشد يركض: وقف مكانك .. هي .. وفجأه وقف راشد مكانه وبطل عيونه
سلمان: مستغرب !!!؟
راشد تغير لونه: وينك طول هالسنين ؟
سلمان: بنتم واقفين وايد هني
راشد: السموحه .. حياك البيت بيتك
سلمان: لا .. البيت بيتنا .. يا راشد
دخلوا الميلس ورفع سلمان راسه وشاف ان البيت تغير من داخل .. دخلت عليهم منيره بنت راشد
منيره: بابا .. هاذي الحرامي
راشد: عيب هذي عمج
منيره: بس عمي سعيد .. منو هاذي ؟
سلمان: الله يالدنيا .. حتى عيالكم ما يعرفون ان عندهم عم اسمه سلمان .. انمحيت من حياتكم ..
راشد يرقع: الله يهديك يا سلمان .. شهالكلام
سلمان: الله كريم .. طمني على اخبارك واخبار الاهل .. ؟
راشد: الحمدلله بخير
سلمان: الا سعيد وينه ؟
راشد: لاهي في مكتبه
سلمان: وين مكتبه ؟
راشد وصف لسلمان مكتب سعيد
سلمان: شخبار عيال لولوه ؟ صج اللي سمعته ؟
راشد بدى يعرق: هاا .. لولوه عطتك عمرها من 7 سنين .. انت ماتدري؟
سلمان بأستهزاء: الله يرحمها .. وعيالها ماتوا معاها ؟
راشد وماعرف بإيش يرد على اخوه: عيالها بخير ..
سلمان: وينهم عندكم فالبيت ؟
راشد وتمنى الارض تنشق وتبلعه: لا مو عندنا في بيت ابوهم .. قلنا لهم تعالوا عندنا ما بغوا
سلمان: اها .. عيل بروح ازورهم في بيت ابوهم واشوف اخبارهم
راشد وقام من مكانه: لا .. تعشى اول بعدين روح لهم
سلمان عرف من ردة فعل اخوه انه مرتبك فسوى نفسه مايعرف شي
سلمان: انت كريم وانا استاهل
راشد: ...........................
سلمان: وين رحت ليكون ما ستاهل ؟
راشد: لا لا تستاهل
سلمان: على العموم انا رايح مكتب سعيد الحين
راشد: اقعد يا ريال .. عشاك علينا
سلمان: بنات اختي ما يقصرون .. ويوسف ينتظرني عند الباب مابي اخليه ينتظر اكثر .. طلع سلمان خايب الظن .. تمنى لو سمع كلام يوسف .. وطلع من البيت الكبير بكل احباط وحزن وركب السياره مع يوسف
سلمان: السلام عليكم
يوسف: عليكم السلام .. وماحب يزيد ضيقة خاله وتم ساكت لين وصلوا البيت
نزل سلمان .. وراح غرفته على طول .. اما يوسف راح ياخذ له شو .. تم سلمان يفكر ... وعلى طول نزل تحت ينادي على يوسف
نزل سلمان .. وراح غرفته على طول .. اما يوسف راح ياخذ له شو .. تم سلمان يفكر ... وعلى طول نزل تحت ينادي على يوسف
الجوهره: هلا خالي .. يوسف ياخذ شور
سلمان: زين الله يرضى عليج لما يخلص قولي له يكشخ حده .. ورانا مشوار ضروري ..
الجوهره: انشالله خالي .. بس على وين العزم .. شو وراكم هااا ...
سلمان يضحك: هههههههههه .. بنروح نغازل ...
الجوهره: هههههه .. زين خالي اجي معاكم
سلمان: بنت .. شلون تجين معانا بعد ..
الجوهره: اصبر علي يا خالي .. ههههههه
سلمان: وش ناويه تسوين ؟؟ تعالي .. وين رايحه؟
الجوهره تركض: بنادي هنود
سلمان: لالالالا ... الا هنود ارجعي يا بنت
شوي ونزلوا الخوات وهنادي حشرت سلمان ..
هنادي: ها .. اشوف من روانا هالطلعات .. ما يجوز ما يجوز .. لا يا خالي صحصح معاي
سلمان وحط ايده على ويهه: يا ربي جوجو بذبحج ..
هنادي: لو سمحت اخوي كلامك معاي ..
سلمان مسك هنادي وحط ايده على فمها: بس بس .. والجوهره ميته من الضحك
هنادي وتشل يد خالها بقوه: لالالالا لا تحاول تسكتني .. ما خليك .. جوهره بسرعه جيبي غترتين لي ولج بنروح معاهم ..
سلمان والجوهره ميتين من الضحك على هنادي ..
سلمان: جوجو فديتج .. روحي شوفي اخوج
الجوهره: انشالله خالي .. راحت عند يوسف .. طقت الباب ..
الجوهره: يوسف .. يوسف ..
يوسف فتح الباب وهو لاف الفوطه على خصره وصدره كان مبلل بالماي: هلا .. شبغيتي ؟؟
الجوهره تمت اطالع يوسف: ماشالله عليك يا يوسف وش هالحلاه كلها .. عيني عليك بارده
يوسف انحرج: دشي .. شتبين ؟
الجوهره: خالي يقولك اكشخ .. لان وراكم مشوار ..
يوسف: مشوار ؟؟ اي مشوار ؟؟
الجوهره: مادري .. انا علي بلغتك ...
يوسف: انشالله .. عطيني 10 دقايق وبنزل
الجوهره: اوكي و تمت اطالع اخوها
يوسف منحرج: قلنا انشالله .. شطالعين ؟؟
الجوهره: الصراحه يا خوي .. احس ان الي بتتزوجها مو اي وحده .. وشكلها بتستخف عليك .. احسها دلوعه وانت بدلعها زياده .. ايه عليك يا خوي الله يكتب لك بنت الحلال اللي تستاهلك
يوسف مستغرب ومستانس في نفس الوقت: بسج سوالف .. آوت ..Out
الجوهره: ههههه .. وحليلك تستحي .. وطلعت بسرعه قبل ما يحذف عليها المخده ..
طلعت الجوهره وتم يوسف يتأمل نفسه .. واول من جى على باله هو عبدالعزيز .. وتذكر النظرات اللي كانت بينهم ..
يوسف يتنهد: آآآآه يا عبدالعزيز احسك قريب مني .. اتمنى تكون المفتاح لقلبي ..
جهز وكشخ ونزل تحت عندهم
هنادي: يه يه يه .. اخوي معرس .. شهالزين كله .. عاد متى بنشوفك معرس
يوسف منحرج " شفيهم خواتي يتغزلون فيني اليوم": .............................
الجوهره: هندوه سكتي عن المعرس .. اقصد يوسف
هنادي وسلمان: ههههههههههههههههه
سلمان: يوسف شخبار تركي ؟ ( يضيع السالفه.. لان يوسف كان منحرج )
يوسف: الحمدلله بخير .. امس كنت عنده .. واليوم بروح له فالليل
سلمان: بروح معاك اسلم عليه ..
يوسف: شرايك بعد مانخلص مشوارنا نمر عليه ؟
سلمان: حلو .. عشان نرجع البيت من وقت .. زين يوسف يبه يلا نحرك يبه
يوسف: سرينا ..
سلمان: ها بناتي تامرونا على شي؟
هنادي: لا سلامتك خالي .. الا جان بتتكرم علينا بكوفي لاتيه وفادج كيك .. مانقول لأ
الجوهره: لو سمحتي حددي ..
هنادي: ولا يهمج .. ما قول لأ
سلمان طالع هنادي بحنان: من عيوني الثنتين هنوده
هنادي استانست: هي هي هي .. مشكور خالي
يوسف: شكلنا مب طالعين
سلمان وسحب يوسف: يلا يلا ... كلت قلبي
يوسف: اعرف اجيبك هههههههههه
سلمان: مع السلامه بناتي .. لو احتجتوا شي اتصلوا .. و قفلوا عليكم الباب
البنات: انشالله
هنادي: فديته خالي ..
الجوهره: الحمدلله انه رجع لنا .. وانا اللي كنت مفتكره انه تخلى عنا مثل الباقي ..
هنادي: بس انا ماذكر مواقف خالي معانا .. وشكله وايد تغير
الجوهره: الغربه والهم غيروه ..
هنادي: مسكين ضاع عمره وهو ماخذ الشهاده ..
الجوهره: انشالله بيكمل
هنادي: وين يكمل ؟؟ خلاص كبر خالي
الجوهره: الدراسه مالها عمر معين يا هنادي
هنادي: ادري بس العقل يستوعب ببطئ مع الكبر
الجوهره: انشالله يكون خالي مفكر في هالشي ..
هنادي: اي شي؟؟
الجوهره: انه يكمل .. لاني احسه فاقد الامل في الحياة .. بس متصبر عشانا .. مع انه قضى معانا وقت قصير .. الا كم اسبوع بس بسرعه خذنا عليه وعرفناه
هنادي: الله يعينك يا خالي ويوفقك انشالله
في سيارة يوسف ...
يوسف: على وين خالي ؟
سلمان: روح على العنوان اللي هو ................ و وصف له وجهتهم
يوسف مستغرب: شو مودينا هناك ؟
سلمان: لازم اخلي لكل شي حد
يوسف: الله يهديك يا خالي .. مضيعة وقت على الفاضي .. صدقني ما راح تطلع بنتيجه
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك