رواية نهاية حبك اعدامي -12
فاضل: علي مادري شو مسوي بالريم .. وغرفتها مقفوله بس ماترد علي .. خايف عليها ارجوك تعال ..
خالد: انا جاي الحين ..
سكر فاضل من خالد وتم يطق الباب والريم ماترد .. خاف عليها .. وكسر باب الغرفه وتفاجأ بالمنظر.. الريم كانت طايح على الارض وشعرها مغطي ويها والدم مغرقها .. قعد عندها فاضل يحاول يقعدها .. شل شعرها عن ويهها وشاف ان الدم ينزل من خشمها و فمها ..
فاضل: الريم .. حبيبتي اختي قومي انا فاضل .. الريم .. ما تحركت الريم قام فاضل وجاب ماي بارد ورشه على ويها .. وبدت تصحصح وتون من الالم ..
الريم: آي .. آي ..
فاضل: اريامي .. فتحي عيونج .. اريامي
الريم بدت تستوعب: آآآي .. هدني .. قوم عني .. قوم
فاضل: الريم حبيبتي .. انا فاضل .. شوفيني
الريم صاحت: الحقني يا فاضل .. اخوك وحش .. شوف شو سوى فيني ..
في هاللحظه دخل خالد متخرع .. شاف شكل الريم ..
خالد: شو سوى هاذي .. قام من مكانه .. انا اوريك يا علوه .. قومي اوديج المستشفى
الريم: لا ماله داعي .. بس ابي ثلج وبقوم اغسل ويهي
فاضل: الحين بجيب لج فديتج
خالد: ليش ضربج ؟؟
الريم وهي تغسل ويها: شافني طالعه .. سألني وين بروح .. قلت له بيت عمي .. قالي ماتروحين قلت له اني مستأذنه من ابوي عصب وضربي .. وعقب اتصلت لي مريم وخذت التلفون عندي فالغرفه .. دش علي ويقولي من تكلمين سحب السماعه مني وكلم مريم ويقولها من انت وادري انك تقلد صوت بنت .. وتم يقولي اعترفي من هاذي اللي تكلمينه ... يشك فيني .. وتمت تصيح من القهر
خالد: المتخلف .. ماله حق يمد ايده .. لكن انا قلت باعلمه الادب قالت لي امي .. راجع من غربه اعذروه .. ما علي لا من امي ولا غيرها ..
الريم: انا ما راح اسكت له يا خالد .. ابوي لازم يعرف ..
خالد: اكيد لازم يعرف .. من حقج تأدبينه انتي بعد .. الحين باتصل فيه عشان اشوف سالفته .. بس طلبتج .. لا تقولين لأمي شي زين
الريم: انشالله
خالد: اشوف ويهج الحين .. آآه يعل يدك الكسر يا علوه .. زين يلا قومي اوديج بيت عمي
الريم: شو ... مستحيل اروح لهم جي مكفخه .. وبعدين ابي ارتاح .. راسي يعورني
خالد: زين على راحتج .. زين روحي ارتاحي في غرفتي .. لان باباج انكسر ..
فاضل: بجيب الدريول يصلحه الحين .. روحي غرفة خالد ارتاحي
الريم: زين ..
خالد: ولا تنسين تقولين لأبوي ..
الريم: انشالله .. طلع خالد وراح فاضل مع الريم غرفة خالد ..
فاضل: سمالله عليج .. هاذي مو صاحي من اول ما رجع من السفر واسمع خالد ينتقد تصرفاته ..
الريم: فضول بقولك شي .. سر بيني وبينك
فاضل: من عيوني ..
الريم: لما كنت ارتب اغراض علي .. شفت صور له مع بنات في مراقص .. وكان شكله مقرف مع لبسه وقصت شعره .. طاح من عيني .. اخوي يسوي جي .. انصدمت
فاضل: من صجج
الريم: اي .. وما نصحك تشوفه ..
فاضل: ما هقيت علي يسوي جي .. ورن تلفون فاضل
فاضل: مرحبا
مريم: هلا فاضل .. شو اخبار الريم ؟
فاضل: الحمدلله بخير .. هاج كلميها
الريم لا شعوريا: مريوم .. علوي اخوي وحش مو انسان
مريم: سمالله عليج حبيبتي .. شو يقولي تقلد صوت بنت ؟؟؟
الريم: امسحيها فيني يا مريوم
مريم: انا ما فتكرت بكلامه .. بس شلون يشك فيج
الريم: من الادب الزايد اللي فيه
مريم: ليكون مد ايده عليج ؟
الريم تصيح: اي .. آه لو تشوفين ويهي علم من ضربه .. خشن وما يرحم
مريم: ايه عليج فديتج .. زين انا وفطوم بنمرج ..
الريم وتمسح دموعها: والله ..
مريم: اي
الريم بفرح: حياكم .. وبسرعه تعالوا لا تتأخرون .. شوفي ايمان اذا بتجي بعد
مريم: انشالله .. على قولة المصريين مسافة السكه يا فندم .. يلا مع السلامه
الريم: ههههههههه .. مع السلامه
الريم: وحليلهم بنات عمي بيجون عندنا ..
فاضل: والله فيهم الخير
في بيت بوفارس ..
ايمان: على وين ؟؟
فاطمه: بيت عمي .. بتجين معانا؟
ايمان: اي .. بس البس عبايتي ..
مريم: يلا لا تتأخرين
طلعوا الخوات لبيت عمهم .. اول ما وصلوا شافوا خالد يتكلم بالتلفون وكان معصب ..
البنات: السلام عليكم
خالد: وعليكم السلام .. وعيونه ادور مريم من بينهم
فاطمه: شوي شوي على اعصابك ..
خالد: ههههههه تنكتين حضرتج .. وانهى المكالمه .. زين مع السلامه .. شخبارج فطيم؟
فاطمه: الحمدلله .. وانت شو مسوي ؟
خالد يتنهد: آآآه الحين بخير ..
فاطمه بخبث: وليش بس الحين ؟
خالد: صج عاد .. تستخفين دمج
فاطمه مبتسمه: وانا كله استخف دمي ..
خالد ابتسم لها وسلم على مريم وايمان: شلونكم بنات؟
مريم استحت ترد اما ايمان ردت عادي: هلا ولد العم .. انت شحالك ؟
خالد: الحمدلله .. خالد لاحظ هدوء مريم .. وتم يطالعها وينتظر منها كلمه او نظره على الاقل .. بس مريم كانت تتغلى .. وحست بالغيره من طريقة خالد مع فاطمه .. فاطمه لاحظت نظرات خالد لمريم وسحبت ايمان من ايدها
فاطمه: يلا نروح عند الريم .. ومشت بسرعه لان مريم كانت اخر وحده عشان تعطي خالد فرصه يكلمها ..
خالد بصوت واطي: مريم .. مريم
مريم: نعم
خالد: بل ليش جي نعم جافه منج
مريم: بغيت شي ولد عمي .. انا جايه عشان الريم
خالد مستغرب اسلوب مريم: زين شو فيج معصبه ؟
مريم: ومن قال اني معصبه
خالد: زين ليش تتكلمين بهالطريقه ..
مريم: وشلون تبيني اكلمك بعد ..
خالد تنرفز من اسلوبها: شو هالاسلوب اللي تكلمين فيه .. محد جبرج تكلميني ..
خالد بعصبيه: روحي حق بنت عمج .. الله يحفضج .. محد ماسكج.. ومشى جنبها وهو معصب ..
مريم استغربت من نفسها .. ليش تصرفت هالتصرف؟ راحت غرفة الريم ومالقتها وشافت باب غرفة خالد مفتوح وسمعت حشرت البنات في غرفته ..
مريم: شو يسون في غرفة خالد ؟؟ اففففف
خالد من وراها: مو عاجبتج غرفتي بعد ..
مريم خافت ولا شعوريا ضربت خالد على صدره: خوفتني .. ما تعرف تتكلم شوي شوي بعد
خالد استانس: اخرعج بعد مره ..
مريم انتبهت للي سوته ونزلت راسها من الاحراج
خالد قرب منها زياده: فديت اللي يستحون ..
مريم خافت وبعدت عنه ..
خالد بحزن .. خلاص روحي لهم الغرفه بنت عمي .. ومشى عنها ..
مريم استغربت من نفسها .. ليش جي سويت في خالد .. حرام .. دخلت على البنات .. وسلمت
مريم: اريامو شو اخوج جاي من الغابه
الريم وخانقتها العبره: شفتي علوه المتوحش ..
ايمان مشتطه: والله ما عرفتي له يا بنت عمي ..
الريم: انا بس قلت له اني استأذنت من ابوي طيرني بكف .. شلون بعد ما عرفت له
ايمان وتتفحص ويه الريم: والله متوحش الله يغربله
الريم: مالت عليه .. شلون يمد يده علي .. ابوي مارفع صوته علي .. هاذي يمد يده
فاطمه ببرود: الله يهديه .. ادعو له ..
ايمان: فطوم بارده
فاطمه: يعني شو تبينها تسوي .. تسبه خلاص الكلام ما ينفع الحين .. ادعوا له
ايمان: مريوم ليش ساكته ؟؟
مريم ارتبكت: هااا
فاطمه ابتسمت وطالعت الريم .. مريم نزلت راسها من المستحى
تموا البنات يواسون الريم ويحاولون ينسونها اللي صار لها .. في نفس الوقت خالد كان في الميلس بروحه .. يفكر في مريم واسلوبها معاه ..
خالد" ليش يا مريم هالاسلوب ؟؟ .. مادري كيف افسره .. تحبيني وتغارين علي ؟؟ او دلع لاني بديت اظهر لج مشاعري ؟؟ يالغاليه لو تسقيني السم راضي والله راضي .. يا علني مافقدج .. بس يا ليت تفهمين اني اموت فيج .." غمض عيونه وتم يفكر .. وفجأه حس بشخص واقف على راسه ويحس بانفاسه .. فتح عيونه وشافها مبتسمه له ..
البنت: وحشتني يا خالد ..
خالد كان خايف .. بس تغلب على خوفه: افففففف
البنت: وليش افففف ؟؟ مريم مب احلى ولا احسن مني
خالد رفع حاجب ويناظرها بثقه: ............................
البنت: باخذ منك مريم هههههههههه
خالد: لأ
البنت: صدقني باخذها جدام عيونك ... بخليك تصيح دم
خالد بخوف على بنت عمه: اعوذ بالله من الشيطان الرجيم .. واختفت البنت من جدام خالد .. وبسرعه راح فوق عشان يكلم مريم ..
طق الباب: الريم .. الريم ..
الريم: لحظه هاي خالد اخوي .. ومريم من سمعت حس وطاري خالد قلبها بدى يدق بسرعه
طلعت الريم لاخوها..
الريم: هلا خالد بغيت شي من غرفتك ؟
خالد: لا بس ابي مريم بنت عمي .. طلعيها من الغرفه ولاتقولين جدام البنات .. ضروري
الريم مستغربه : انشالله .. رجعت الغرفه وتمت اطلع مريم وتأشر لها بعينها انها تطلع برا ومريم في عالم ثاني مو معاهم .. الريم يأست
الريم: مريم حبيبتي .. ممكن تجيبن لي ثلج من المطبخ
مريم: من عيوني .. ونزلت المطبخ ولا كانت تدري شو ينتظرها تحت ..
نزلت مريم المطبخ وفي طريقها شافت خالد .. نزلت راسها وكملت دربها ..
خالد: ليش يا بنت عمي هالجفا ؟؟
مريم وقفت مكانها ولا ردت ..
خالد: ليش تعامليني جي ..
مريم باحراج: اي معامله؟
خالد: لا تسوين نفسج مو فاهمه شي
مريم: انا اسفه يا خالد
خالد: آآآه يا محلى اسمي لي نطقته شفاهج
مريم نزلت راسها: ...........
خالد: البنت طلعت لي ..
مريم: بخوف: هاااا
خالد: انتبهي لنفسج ارجوج ..
مريم: ليش انا انتبه لنفسي .. انت اللي لازم تخاف على تفسك
خالد ما حب يقولها كلام البنت: غلاتج عندي من غلاة نفسي علي
مريم انحرجت: خالد .. انت شو تقول
خالد بترجي: ارجوج انتبهي لنفسج لو لي غلا عندج
مريم: انشالله ولد عمي ..
خالد قرب منها وهمس في اذنها: الله يحفظج الغاليه ...
مريم حست برعشه في جسمها: ......................... مشت عند الثلاجه وخذت الثلج وكانت طالعه من المطبخ الا يسحبها خالد من قميصها
خالد: لحظه
مريم بخوف واستغراب: خالد انت شو تسوي .. اوعى لنفسك
خالد بتردد: انا احــ.............. آآآآه خلاص خلي الثلج و روحي عند البنات
مريم: الريم تبي الثلج
خالد: انا قلت لها اني ابيج تحت ..
مريم حطت الثلج على الطاوله ومشت بسرعه من جدام خالد .. وخالد واقف يتأملها ومبتسم .. راحت الغرفه وكانت هاديه وسرحانه ..
الساعه وحده ونص فالليل .. رن تلفون فارس ..
فارس: نعم
البنت: الله ينعم عليك .. قعدتك من النوم ؟؟
فارس: نقصتي علي نومي .. تعرفين الساعه كم الحين ؟؟ هاتي من الآخر .. اففففف
البنت صاحت بحزن: والله ما عرف شو اقولك .. وتمت تصيح بصوت مسموع
فارس اعتدل في قعدته: اختي عسى ما شر ؟؟ ليش تصيحين ؟؟
البنت: انا ... وسكتت
فارس: انتي شو؟؟ تكلمي حيرتيني الله يهديج
البنت: والله مو عارفه كيف ابدى بس .. انا محتاجه فلوس .. وصدقني برجعها لك .. واطلب اللي تبيه مقابل هالمبلغ .. انا مستعده اسوي لك واعطيك اللي تبيه ..
فارس فهم قصدها: انا مابي منج شي .. بس وين اهلج عنج ؟
البنت: ابوي متوفي واخواني صغار انا اكبرهم وامي ما تشتغل ولا هي متعلمه .. اخواني ماعندهم ملابس .. وتمر علينا ايام مانذوق العيشه في البيت .. ارجوك ساعدني .. و اوعدك ارد لك المبلغ اللي بتعطيني .. ارجوك الله يخليك ..
فارس مستغرب من الحاحها وترجيها: ما تاكلون بالايام ..
البنت: اي ما ناكل .. من الجوع نشرب ماي نسد فيه جوعنا ..
فارس منصدم من كلامها: زين كم البلغ اللي تبينه؟ و شلون اوصله لج ؟
البنت: انا ما راح اطلب منك مبلغ معين اللي تقدر عليه .. انت وشيمتك .. و بدليك البيت تجيبه لي
فارس: انشالله .. وكان يفكر في كلامها ومنصدم انهم يشربون الماي عشان يسدون فيه جوعهم ..
فارس: زين متى اوصلهم لج ؟
البنت بتوسل: الله يخليك الحين .. الله يخليك .. لنا 3 ايام ما كلنا شي .. ابي اجيب لاخواني خبز واسوي لهم سندويشات للمدرسه ..
فارس دمعت عينه: 3 ايام ما كلتوا شي !!!
البنت: اي والله .. اخوي الصغير تعبان
فارس: زين انتي شو اسمج ؟
البنت: اسمي مناف .. ادرس بالجامعه سنه ثانيه
فارس: والنعم يا مناف .. زين بقوم البس واول ما طلع من البيت باتصل لج توصفين لي البيت
مناف: خلاص .. انتظر اتصالك ..
فارس: مع السلامه .. سكر منها وتم يطالع الجوال .. هل انا احلم .. ليكون الشباب مسوين فيني مقلب؟ تعوذ من ابليس وقام لبس ملابسه وطلع مبلغ من الخزنه وطلع من البيت وكانت الساعه 2 ..
في السياره اتصل لها ..
فارس: السلام عليكم
مناف: عليكم السلام ...
فارس: ممكن توصفين لي البيت
مناف: انشالله .. وصفت له الطريق .. وفارس استغرب من الوصف دخل مكان بعيد عن البيوت .. مكان مظلم والبيوت اللي فيه مكسره وقديمه .. فالبدايه خاف ..
فارس: وين بيتكم ؟؟ البيوت اللي حولي مهجوره
مناف: لا مو مهجوره بس ماعندهم كهرباء .. عشان جي المنطقه مظلمه
فارس: وبيتكم اي واحد فيهم ؟؟
مناف: البيت اللي بابه حديد وجنبه شجرة اللوز ..
فارس انصدم"معقوله في ناس عايشين في هالبيوت .. هاي خرابه يالله .. يالله "
مناف: وين وصلت؟
فارس: انا عند الباب
مناف: الحين بطلع لك
فارس: زين .. نزل من السياره و وقف عند باب البيت اللي بالعافيه انفتح .. وشاف ملاك واقفه له عند الباب .. كانت جميله بشرتها بيضه وعيونها سود سواد الليل .. بس حزينه .. طالعت فارس ونزلت راسها من الخجل و فارس بعمره ما شاف بجمالها .. كانت متوقع يشوف العكس .. توقع انه يشوف وحده قذره وشكلها مو مرتب .. بس بالرغم من الفقر اللي عايشه فيه بس كانت مرتبه وعلى قدها ..
مناف منزله راسها: والله لو مو الحاجه .. ما طلبتك يا ولد الحلال
فارس من الصدمه يطالعها: هااا
مناف ما رفعت راسها: اسمحلي عنيتك في هالليل
فارس بعيون حايره: تفضلي .. ومد ايده بالظرف اللي فيه الفلوس
مناف مدت ايدها وشاف فارس البياض: مشكور .. ما قصرت .. الله يوفقك ويستر عليك ويسعدك وخنقتها العبره وسكتت
فارس: هالعيون ما تستاهل انج تجرحينها بدموعج
مناف منحرجه: ............................
فارس: زين ما عندج قرايب من صوب امج او ابوج؟
مناف: يمكن عندي ويمكن لأ
فارس: شلون ؟؟ بعد ردج دبلوماسي ..
مناف: الحياه تعلم .. من طرف ابوي ما عرف حد .. لكن امي عندها 3 خوات بس هم اغنياء وعمرهم ما سألوا فينا .. احنا بالنسبه لهم شي يتفشلون منه .. لان احنا فقراء .. منبوذين
فارس: الله الغني ..
مناف: ونعم بالله .. المهم انا لازم اروح الحين اوعدك ارجع لك المبلغ اول ما حصل فرصه والسموحه اني غلبتك معاي وقعدتك من نومك وطلعتك في هالليل ..
فارس: ولا يهمج .. و لو بغيتي اي شي ترا انا حاضر ولا تستحين يا مناف
مناف: الله يسلمك والله انت ولد حلال ..
فارس: الله يستر عليج وديري بالج على نفسج .. مع السلامه
مناف: الله وياك ..
سكرت الباب اللي بالعافيه تسكر لانه قديم .. ركب فارس السياره مصدوم من الموقف ويفكر في مناف .. ماشالله عليها جميله وقمر ... الله يستر عليها وعلى بنات المسلمين .. وصل البيت قبل اذان الفجر بشوي .. راح غرفته وصلى ركعتين وتم يدعي لمناف واهلها بالستر .. طلع من الغرفه يقعد اهله للصلاه .. طلع المسيد مع عبدالعزيز ..
بعد الصلاه ..
عبدالعزيز: فارس .. بتم هني
فارس: اي روح البيت .. ابي اقرى قرآن
عبدالعزيز: خلاص عيل .. مع السلامه ..
طلع عبدالعزيز من البيت متجه للمستشفى عند اخوه وابوه ..
عبدالعزيز: صباح الخير ..
جاسم: صباح النور
عبدالعزيز: ها بو محمد شو اخبارك؟
جاسم: الحمدلله .. بس انا بوسلطان
عبدالعزيز: سلامي عليك يا بو سلطان .. شي شي شي
جاسم: هههههههه
عبدالعزيز: وين ابوي وتركي ؟؟
جاسم: ابوي راح مع الدكتور .. وتركي يبدلون له الجبس
عبدالعزيز: جسوم .. تبي حليب
جاسم: اي
دخل عليهم بوفارس: هلا والله بو سعود
قام عبدالعزيز باس راس ابوه: شحالك يبه
بوفارس: الحمدلله ... اخباركم فالبيت ..
عبدالعزيز: الحمدلله بخير
بوفارس: تريقتوا يبه ؟
جاسم: انا بشرب حليب .. بعدين باتريق
عبدالعزيز: تريقت مع امي وايمان فالبيت
بوفارس: بالعافيه ..
عبدالعزيز: اصب لك حليب يبه
بوفارس: اي يبه
صب عبدالعزيز الحليب لابوه وقرب يهمس في اذنه ...
عبدالعزيز: بوفارس .. شو صار على موضوعي
بوفارس مبتسم: اليوم بكلم اختك مريم عشان تاخذ راي البنت .. سألنا عنها وعن اهلها والحمدلله .. ناس فيهم خير .. لاتشيل هم
عبدالعزيز مستانس: انشالله يبه
بوفارس: على شو مستعجل .. بعدك صغير ..
عبدالعزيز: البنت حبوبه
بوفارس بخبث: اخاف حبوبه بس
عبدالعزيز انحرج: ................
دخل عليهم تركي وكان يمشي بالعكاز ..
تركي: السلام عليكم
الكل: عليكم السلام
بوفارس: ها يبه .. ماشالله اليوم بالعكاز ..
تركي: اي الحمدلله
عبدالعزيز: يعطيك العافيه
تركي: الله يعافيك
تموا الشباب يسولفون .. وبوفارس طلع عنهم .. واتصل لمريم بنته
بوفارس: مرحبا مرايم
مريم: هلا بابا .. شحالك؟
بوفارس: الحمدلله .. في حد حولج مرايم؟
مريم: عندي امي وايمان وفارس
بوفارس: روحي بعيد عنهم ..
مريم طالعتهم بخبث: تبيني اروح بعيد عنهم بابا .. تبي تقولي سالفه ماتبي حد يعرف شي .. وراحت بعيد عنهم ..
فارس وايمان يطالعون مريم بفضول
بوفارس: ياللوتيه .. قولي لي بروحج الحين
مريم: اي
بوفارس: زين .. سمعي كلامي عدل وخليه بيني وبينج ..
مريم: انشالله
بوفارس: عندج صديقه اسمها نوره بنت محمد .... صح
مريم باستغراب: اي عندي .. ليش؟
بوفارس: ابيج تاخذين رايها في الزواج .. هل هي متقبله فكره الزواج .. والزوج نفسه قبل الزواج
مريم: بابا مو فاهمه شي
بوفارس: انا افهمج .. اخوج عبدالعزيز قرر يكمل نص دينه .. واختارها .. وانا سألت عن اهلها وما عليهم زود الصراحه .. نتشرف بنسبهم ..
مريم بوناسه: وااااو احلى خبر ..
بوفارس: هيييييي صبري عن الينون .. اول سوي اللي قلت لج عليه و لاتقولين لحد شي .. قيسي النبض عندها عشان نتقدم رسمي .. زين يمه
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك