رواية نهاية حبك اعدامي -34
المدير: انا حاس بموقفك يافندم بس انت لازم تتصرف ..
يوسف: انا مستعد اسوي اي شي .. بس اني اطلبهم فلوس مستحيل ..
المدير: ازاي يعني مستعد تعمل اي حاجه ؟
يوسف: ارتب لك المطعم بعد ما يطلعون الزباين .. اغسل صحون .. ماعندي مشكله ..
المدير منحرج: لأ عيب .. ازاي الكلام ده .. انت زبون عندنا ..
يوسف: بيني وبينك .. انا اصلا ماعندي فلوس .. والجماعه اختاروا المطعم واستحيت اقولهم لأ ..
المدير: ممممممممم .. طيب شوف حضرتك .. انت هات بطاقتك الشخصيه . وبكره تعال ادفع مافيش مشاكل
يوسف" هاذي كل شوي طلع لي بفكره": اقولك ماجبت محفظتي .. ولاعندي فلوس اصلا .. بس مستعد اغسل وانظف واكنس .. بس ادفع لاتقولي .. لان بصراحه ماعندي ..
المدير: مممممممم .. خلاص انا هدفع وانت اعتبره دين وسددهو لي اي وقت .. مفيش مشكله ..
يوسف" بانتحر .. آآآآه": لا لا دين ولاغيره .. حاول تفهم معاي ..
المدير: افهم ايه ..
يوسف: لاتعصب زين ..
المدير: اما مش معصب ..
يوسف: فلوس ماعندي ماعندي .. فتشني ..
وتم يوسف يتحايل على المدير .. والشباب يراقبونه من بعيد وعلي صورهم كم صوره ..
عبدالعزيز: شو سالفته بوخليفه .. شكله متمشكل ؟
خالد: الله يرجكم خل ندفع بلا هالعباله .. او انكم عايشين الدور ذكريات حلوه .. والله حاله ..
فاضل: اووه شوفوا يوسف جاي ومبتسم ..
يوسف: يلا يا جماعه بنغسل وانظف المطعم ..
فاضل: حبيبي والله بوخليفه .. يلا شباب .. علي شغل الكميرا ..
علي: جاهز ..
عبدالعزيز: سلااااااااام ..
خالد: الله يرجكم .. والله انتوا مقاليع ..
تم علي يصور الشباب وهم يغسلون الصحون .. ويمسحون الطاولات والارضيه .. وصورهم فيديو شوي .. بس اكثر شي خذ لهم لقطات وهم يلعبون بالصابون ويتزحلقون على الارض .. ويكتون على بعض معاي .. والموظفين اللي يشتغلون فالمطعم استانسوا عليهم وتموا يلعبون معاهم .. وتصورا معاهم .. بعد ماخلصوا .. راحوا الشباب يرتبون اعمارهم .. وفصخوا القفازات والمرايل اللي كانوا لابسينها .. واللي اصلا كانت روعه عليهم وهم كاشخين بالثياب .. بعد هالهيله والوناسه .. رتبوا اعمارهم وتصورا اخر صوره كلهم مع الموظفين وكان معاهم مدير المطعم اللي اكتشف لعبتهم فالاخير .. كان شكل حلو وهم واقفين مع كل اللي يشتغلون فالمطعم المدير: ايه يا جدعان ماتقولوا من البدايه كده ..
يوسف: ولا يهمك حقكم محفوظ ..
المدير: لأ عيب يا راجل المره دي خليها علينا ..
خالد: لا عيب والله .. تاخذها ..
المدير: لا والله مش حاخذها ..
علي: خذيها آخرها اطيبها ..
الشباب كلهم ماتوااا من الضحك على هالكلمه: هههااااااااااي .. ههههههههه .. ههههههههههههه
المدير: ازاي جبتها يا راجل .. حلوه منك والله العظيم ..
عبدالعزيز: آآآآه علووه الله يغربلك ..
علي: قاعدين تتعازمون .. الريال قالكم على حساب المطعم .. هاي اللي صج تحصل مره فالعمر ..
يوسف: اي والله ..
الشباب: هههههههههههههههه
خالد: جزاك الله خير ..
المدير: والله فرصه سعيده .. وخلينا نشوفكم مره ثانيه ان شاء الله ..
الشباب: ان شاء الله ..
المدير: بس قبل ماتروحوا في هديه رمزيه لكم من المطعم ..
فاضل: هديه .؟
المدير: آآه تي شيرتات واقلام ودفاتر ..
فاضل: حلو ماتقصرون .. عاد انا ابي مريله وكبوس الي يلبسها الطباخ ..
علي: فضول الله يغربلك فشلتنا ..
المدير: لا ومالو .. نجيب لو هو يستاهل .. اكثر واحد اشتغل فيكم ..
فاضل: احم احم .. عشان تعرفون ..
المدير وزع عليهم الهدايا .. وكان وايد مستانس منهم ..
المدير: عاوزين نشوف الصور ..
عبدالعزيز: ولا يهمك ..
علي: بس نطبعهم ونمرك تشوفهم ..
المدير: على قولتكم .. ما تقصروا والله ..
الشباب والمدير: ههههههههههه
خالد: كوووول اللهجه يالخليجي ..
المدير: الله يسلمك يافندم ..
طلعوا الشباب وكانوا مستانسين اخر وناسه .. وطول الدرب يتكلمون في سالفتة المطعهم ومغامرتهم هناك ..
خالد واخوانه رجعوا بيتهم اما يوسف كان راكب سيارة عبدالعزيز ومخلي سيارته في بيت بوفارس ..
وصلوا البيت .. و عبدالعزيز نازل من السياره وهو يضحك .. ويوسف كان مغطي فمه عشان مايطلع صوته ..
عبدالعزيز: بطني .. ماقدر اسكت ..
يوسف: بس تدري احلى يوم مر علي ..
عبدالعزيز: تعرف ..
يوسف: لا
عبدالعزيز: هههههههه ..
يوسف: كمل وبسك ضحك ..
عبدالعزيز: زين بكمل .. بس لاتضحكني ..
يوسف: زين زين ..
عبدالعزيز: في حياتي ماتونست هالوناسه .. صج انت ربشه ..
يوسف: تسلم تسلم يالربشه ..
يوسف وعبدالعزيز: هههههههههههههه
دخلوا الميلس عشان يريحون .. كل واحد حذف عمره على كرسي وتموا ساكتين فتره ..
يوسف: تدري عزيز .. ان ربعي مو مثلكم
عبدالعزيز: شلون ؟
يوسف: مممممم .. ربعي يونسون ويضحكون .. بس احسهم يجاملون .. انتوا غير .. احسكم وايد واضحين وعلى طبيعتكم .. ماتتصنعون الضحك او الكلام ..
عبدالعزيز: من طيب اصلك يا يوسف ..
اعتدل يوسف في قعتدته .. مسك غترته وحطها على كتفه .. فصخ القحفيه وتم يحك شعره ..
يوسف: آآه .. شعري كله صابون الله يغربلكم ..
عبدالعزيز: الحين يبيلك شور مضبوط ..
يوسف: اي والله .. زين علي ولد عمك متي بيجيب الصور ؟
عبدالعزيز: اتوقع بكره العصر او الليل ..
يوسف قام عشان يطلع: يلا بوسعود استأذن الحين ..
عبدالعزيز: وين بوخليفه ؟
يوسف: الساعه 1 ونص .. هلك نايمين وهلي مسوين لي تلفون كم مره .. وبكره دوام ..
عبدالعزيز: ولا يهمك البيت بيتك يا بوخليفه ..
يوسف: الله يسلمك .. وهو ماشي عند الباب .. اكد على ولد عمك عشان الصور ..
عبدالعزيز: افا عليك بدون ما تذكرني باكل قلبه .. عشان يطلعهم ..
يوسف: حلو .. ترتيب الموضوع من ناحيتك ..
عبدالعزيز: اعتمد ..
سلموا على بعض .. و عبدالعزيز وصل يوسف لين سيارته و ودعه .. خذ له شور سريع وحذف نفسه على السرير ونام بعمق من التعب
سلمان كان في المطار مع عبدالهادي .. ينتظرون وصول سميث البلاد ..
سلمان: تصدق اني مشتاق له ..
عبدالهادي: والله ايام لما كنا نطلع من مكان ونرتاح في مكان ..
سلمان: صقالله ذيك الايام ..
عبدالهادي: فيها الشين والزين ..
سلمان: مو جنه تاخر ؟ ما نزلت الطياره للحين ؟
عبدالهادي: الطياره نزلت .. بس يمكن متعطل في الجوازات او ينتظر شناطه ..
سلمان: هذا هو ..
عبدالهادي: الاشقر اللي معاه القهمه ..
سلمان: هههههههه .. اي ي ما يخلي حركات مع البادي قارد ..
عبدالهادي: على باله في امريكا احنا ..
سلمان وعبدالهادي: هههههههههههههه
لوح لهم سميث من بعيد .. قرب منهم وسلم عليهم .. كان لقائهم حار .. احضان كلها شوق ..
سميث: كيف الحال ؟
عبدالهادي: الحمدلله ..
سميث: اي مس يو
عبدالهادي: وين العربي وين ..
سميث: هههههههه .. شويه شويه .. والتفت على سلمان ..
سلمان حضن سميث: آآآآه .. سميث والله صرت جزء مني ..
سميث: اوووه سلمان ماي مان ..
خذوا اخبار بعض وتطمنوا على بعض .. عبدالهادي خذ معاه سميث عشان يرتاح في الفندق .. اما سلمان راح عند محمد وفارس في الشيشه لانه كان متواعد معاهم .. طلع من المطار و وصل عندهم الشيشه .. شافوه من بعيد وأشروا على بعض ..
سلمان: السلام عليكم يا شباب ..
محمد وفارس وباقي الشباب اللي على الطاوله: هلااااااا والله وعليكم السلام ..
سلمان: شخباركم بالربع ..؟
فارس: يسرك الحال .. انت علومك يا سلمان؟
سلمان: الحمدلله ..
محمد: وصل صاحبك ؟
سلمان: اي توه ..
محمد: الحمدلله على سلامته ..
سلمان: الله يسلمك .. باذن الله بكره بعرفكم عليه ..
فارس: هو سميث اللي شردكم من هناك .؟
سلمان: اي .. جزاه الله الف خير ..
محمد: الله يهديه ان شاء الله ..
سلمان: الا بقول فارس .. عندي مشروع وابي استشيرك فيه .. انت خبره في هالمجال
فارس: عيوني لك .. آمرني
سلمان: عندي مبلغ وفكرت افتح لي محل ابيع فيه شغلات اللي يحبونها المراهقين .. وانت تعرف شبابنا ميانين كل شي ياخذونه ..
محمد: اي شغلات يعني ؟
سلمان: مثل المداليات حق التلفون ولزقات السياير والدراجات .. وشفت التي شيرتات اللي يلبسهم فارس ويكتب عليهم بالعربي .. باجيب لي كم واحد متخصصين في هالمجال ..
فارس: والله فكره حلوه ..
محمد: لو محتاج راس مال ادخل معاك شريك واخذ نسبتبي ..
سلمان: والله خوش فكره .. لان محتاج راس مال اضيفه على اللي عندي .. ومابي يوسف يتدين .. الولد وراه عرس ..
محمد: وحليله يوسف .. بيعرس ؟
سلمان: لا بس انا افكر له للمستقبل .. خل يخلص دراسته وبشتغل له خطابه ..
محمد وفارس: ههااااااااااااااااااااي ..
تموا يسولفون في مشروعهم وكل منهم يعطي فكره للثاني .. رن تلفون فارس وكانت النغمه ( عالي مستواه ) محمد ابتسم والتفت على فارس .. فارس انحرج وسلمان فهم من نظرات محمد ان المتصل لفارس شخص يعز عليه .. قام فارس من مكانه وسلمان ومحمد طالعوا بعض ..
فارس: هلا والله ..
مناف: هلا فارس .. شحالك ؟
فارس: الحمدلله طيب .. انتي شو مسويه ؟
مناف: تمام .. انت وين ؟
فارس: فالشيشه مع الشباب ..
مناف: وانت ماتشبع من هالشيشه ؟
فارس: ههههه .. والله نتونس مع الشباب ..
مناف: اهاا .. زين مو جنه الوقت مأخر ..
فارس: تبيني اروح البيت ؟
مناف بصدمه: هااا
فارس: طلباتج اوامر .. تبين اروح البيت بحرك الحين .. تبيني اتم لعيونج اتم ..
مناف: لا .. على راحتك ..
فارس: والله اني بين ايدينج .. انتي أشري بس ..
مناف" فديت قلبه والله": زين انا بروح انام اوكي ..
فارس: فديت اللي تغير السالفه .. زين نوم العوافي يا قلبه انتي ..
مناف منحرجه: هههههه .. مع السلامه ..
فارس: سلااااااام
رجع للشباب وتموا لين الساعه 12 ونص .. سلمان استأذن لان بنات اخته اتصلوا فيه ..
سلمان: انا استأذن يالربع .. قعدتكم ما تنمل .. بس الاهل متصلين فيني .. الشيخ يوسف هايت وهم بروحهم فالبيت.. ماتعودت اخليهم بروحهم ..
محمد: بارك الله فيك ..
طلع سلمان وهو قلبه على بنات اخته .. اما محمد وفارس طلعوا من بعد سلمان بنص ساعه .. راحوا يحوطون الشوارع ..
محمد: نروح البحر ؟
فارس: شو طاري عليك ؟
محمد: مابي اسبح .. بس نتمشى على السيف ..
فارس: رووح يالرومنسي ..
محمد: ههههههههه
فارس: تعال ..
محمد: وين ..
فارس يضربه على كتفه: وجع ..
محمد: خخخخخخخخخخ .. زين قول
فارس: شو صار على موضوعك مع زوجتك ..
محمد تنهد: آآآه .. للحين ولا شي .. بكره بتصل فيها بشوف شو قرارها ..
فارس: الله يعينك يا حمودي ..
محمد: الله كريم ..
وصلوا عند البحر .. ونزلوا يتمشون .. كانوا حافين .. وامواج البحر تداعب اقدامهم بلطف .. كل واحد يمشي محاذي الثاني بس باله مع اللي شاغله .. محمد كان يفكر في مصيره مع ساره .. وفارس يفكر في مناف اللي خذت قلبه .. التفت محمد على فارس ..
محمد: فروس ..
فارس: هلا ..
محمد: تذكر لما كنا صغار ونبني بيوت عند السيف .؟
فارس: اي اذكر .. كان خالد اخوك فنان ..
محمد: خالد اخوي ماشاءالله عليه .. ما يمسك الشي في يده الا وطلع بابداع .. تذكر لما كان يخلط الطين بالماي ويسوي لنا محاربين .. وكنا نتبارى ..
فارس: اي اذكر .. الا على طاري خالد .. ماعندك خبر بالمستجدات اللي صارت ..
محمد: شو صاير ؟
فارس: نسيت اقولك انا بعد ..
محمد: عسى ما شر فروس ؟
فارس: لا اخبار حلوه .. خالد اخوك خطب اختي ..
محمد: والله .. حسبي الله ونعم الوكيل ..
فارس باستغراب: ليش ؟
محمد: كان ودي اكون موجود ..
فارس: يا ريال .. بتنحل .. وبعدين ما صار الا كلام يمكن البنت ماتبيه
محمد يمازح فارس: اخوي ما ينعاف .. صج طلعت له ذيك المزيونه .. بس غرشوب الولد ..
فارس يدز محمد فالبحر: يا خفة دمك ..
محمد: فروس اوريك .. ويسحب فارس وطاحوا ثنينهم فالماي .. وتموا يرشون على بعض الماي كأنهم يهال ..
فارس قعد على السيف وريوله يداعبها الموج: آآآآه يا حمودي .. يا ليت ايام الطفوله تنعاد ..
محمد قعد جنب فارس: اي والله ليتها تنعاد ..
فارس: شفت موج البحر شلون ما ينتهي ..
محمد: اي ..
فارس: حبي لمناف ماراح ينتهي ..
محمد: شفت البحر لي غصب وعلت امواجه ..
فارس: اي ..
محمد: هاي حبي لساره وانا غاضب عليها ..
فارس: شفت السماء الصافه بنجومها ..
محمد: اي ..
فارس: السماء الصافيه قلب مناف .. واعداد النجوم هو حبي لها ..
محمد: شفت رمال البحر ..
فارس: اي ..
محمد: شفتها لي جفت وتطايرت مع الهوا ..
فارس: اي ..
محمد: هاي حب ساره في قلبي .. بيتطاير من قلبي لو ما رجعت في قرارها ..
فارس: لا يا محمد .. حاول انك تكلمها .. لا تتسرع
محمد: انا مخليها على راحتها .. وهي اللي راكبه راسها .. جيتها بالطيب مانفع .. شكلي بأبتدى اهدد ..
فارس: تهدد ؟!!
محمد: اي .. بخيرها بين قرارها المجنون ..و عيالها .. وعاد هي لها حرية الاختيار ..
فارس: الله يهديها ..
محمد: آآمين .. زين قوم نحرك .. تأخر الوقت ..
فارس: الساعه كم الحين؟
محمد ويشوف ساعته: الساعه 2 الا ربع ..
فارس: بل صج اني هايت ..
محمد: من يومك انت هايت ..
فارس: صج عاد ..
محمد: ههههههههههههه
فارس: زين قم ولا بحرك عنك ..
محمد: زين زين ..
ركب السياره وحرك فارس .. وهم فالدرب طلب محمد من فارس يوقف عشان يطلب له اكل ..
محمد: فروس وقف ابي اخذ لي اكل
فارس: توك ماكل ..
محمد: نفسيتي تعبانه ..
فارس: مسكين اللي تفسيته تعبانه
محمد: اسكت عني ..
فارس: زين شو تبي تاكل؟
محمد: بيتزا ..
فارس: يا ويل حالي على البتزا
محمد: زين فروس .. شو رايك تجي تنام عندي الليله ..
فارس: مممممممم .. مشروع جيد .. بس لازم امر البيت اخذ لي ملابس .. ملابسي زفره من ماي البحر ..
محمد: زين بنمر بيتكم ..
فارس: كووول .. عيل نخلص من طلبك ونروح البيت ..
محمد: يسلمووو فروسي ..
فارس: سود الله ويهك .. شو فروسي
محمد: ادلعك ياخي ..
فارس: لحول يالدلع .. زين يلا اطلب خل نحرك ..
طلب محمد .. وبعدين الشباب توجهوا لبيت بوفارس .. وصلوا وفارس صف سيارته عند الباب ونزل يجيب له ملابس .. دخل البيت بهدوء .. دخل غرفته بسرعه وخذ له كم لبسه عالسريع وطلع .. وهو طالع شافه ابوه ..
بوفارس: على وين ؟
فارس: هلا يبه .. بروح مع الشباب .. وبسرعه مسك جواله وخشه ورا ظهره واتصل على محمد وخلى التلفون شغال عشان محمد يسمع الحوار ..
بوفارس: هالحزه وين رايحين ؟
فارس يعلي صوته عشان محمد يسمعه: رايحين نغاوص ..
بوفارس: في هالليل .. فروس شو وراك ؟
فارس: اقولك رايحين نغاوص .. الشباب ينتظروني ..
بوفارس: وينهم الشباب ..
فارس: ينتظرون عند المحطه .. انا جاي بروحي .. باخذ لي ملابس ورايح لهم .. بنتم لين الفير ان شاء الله ..
بوفارس: اهااا ..
فارس ماشي عن ابوه: زين انا طالع .. سلاااام ..
مشى وراه ابوه .. وفارس على اعصابه .. خايف ابوه يطلع وراه .. وبوفارس مشى ورا ولده عشان يسكر الباب الكبير من وراه .. فارس حس بثقل ريوله لما بوفارس وقف عند الباب .. التفت فارس على سيارته وشاف ان محمد مو موجود .. استغرب وحس بتوتر ..
فارس" حمود وين راح .. انا ناقص .. يا ليلي الليل "
فتح باب السياره وشاف محمد منخش فالسيت اللي ورا .. تطمن فارس وركب السياره بسرعه وحرك .. شاف ابوه من مراية السياره .. وكان بوفارس واقف يطالعه بشك .. فارس ابتعد عن البيت .. و وقف على طرف الشارع التفت على محمد ..
فارس: زين سويت حمودي .. كنا بننصاد ..
محمد: انت لما اتصلت .. وسمعت حشرتك مع ابوك .. قلت عمي شو مقعده هالوقت .. وعلى طول ركبت ورا ..
محمد: ابوك ذيب ما ينام ..
فارس: انا ماتوقعت انه يكون قاعد ؟ استغربت يوم شفته .. الظاهر ان رايح يشيك على جويسم .. ابوي اعرفه مو عوايده يقعد لي هالحزه ..
محمد: الحمدلله عدت على خير ..
فارس: اي والله ..
وصلوا شقة محمد .. وتعشى محمد .. وفارس راح ياخذ له شور .. بعد ما خلص محمد عشاه .. خذ له شور هو الثاني .. وفارس كان مسوي شاي له ولمحمد .. قعدوا يتابعون مباره ويسولفون شوي ..
محمد: فروس تأخر الوقت .. بتنام ولا تنتظر الاذان ..
فارس: لا بنام ..
محمد: عيل انا بتم انتظر الاذان وبقعدك معاي ..
فارس: لا .. مناف بتقعدني للصلاه ..
محمد بخبث: حركات .. بس خوش منبه للاذان
فارس: هههههههههه .. خلني انام زين ..
محمد: روح نام فالغرفه ..
فارس: لا بنام هني ..
محمد: اوكي على راحتك ..
تم محمد يقلب قنوات التلفزيون .. وفارس نام على طول من التعب ..
شمس يوم جديد .. شقت ظلمة امس بنورها الساطع ..
فتحت الجوهره عيونها بابتسامه عذبه من شفاها النديه .. خذت جوالها واتصلت بابراهيم ..
ابراهيم: هلا والله
الجوهره: صباحك حب ..
ابراهيم: صباحج ورد يا عروسه ..
الجوهره: شخبارك يا قلبي .؟
ابراهيم: مستانس والله .. ابي يوم الخميس يقرب بسرعه ..
الجوهره: برهوم .. بكره الخميس ..
ابراهيم: ادري .. بس احسه بعد سنه ..
الجوهره: هههههههه .. زين يلا قوم حق الدوام .. خل انزل اجهز لهم الريوق ..
ابراهيم: تدرين جوهرتي .. اول ما نملج كل يوم بحي افطر عندكم ..
الجوهره: فديت قلبك انا .. بس تفطر عندنا .. تعال ونام عندنا بعد ..
ابراهيم: ايه على جوهرتي انا .. زين حياتي ماعطلج عن شغلج حبيبتي ..
الجوهره: كلمني اول ما توصل المكتب ..
ابراهيم: من عيوني يا قلبي ..
الجوهره: فديت عيونه ..
سكرت من ابراهيم وبكل نشاط قامت تحضر الريوق وتقعدهم .. في المطعم تحت .. هنادي وسلمان يتناقشون ..
سلمان: هنود ..
هنادي: ها خالي ..
سلمان: متى بتروحين الجامعه ؟
هنادي: اول محاضره مالي نفس احضرها ..
سلمان: ليش؟
هنادي: لاعت جبدي .. بعدين البنات بيحضروني ..
سلمان: عليكم حركات بنات اليوم ..
هنادي: زين خالي .. ابي اشتري هديه حق جوجو .. وش تقترح علي ؟
سلمان: شرايج تاخذين لها ساعه ؟
هنادي: لا مالي خاطر على ساعه .. غيره ؟
سلمان: باوديج محل حق واحد اعرفه .. اخذي لها تعليقه .. عنده شغلات تجنن ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك