رواية نهاية حبك اعدامي -100
طلع يوسف صوب المصاعد .. اما سلمان ساعد هنادي عشان تتغطى .. طلعوا من الغرفه وهو ماسك يدها .. راحوا صوب المصاعد ويوسف كان ينتظرهم .. نزلوا للقاعه وهنادي حسة برهبة الموقف .. كانت تتنفس بتوتر وقلق .. يوسف اتصل فالجوهره عشان تستلم اختها وادخلها القاعه .. طلعت الجوهره وهي مبتسمه لاختها ..
سلمان: يه يه يه .. شهالزين يا جوجو ..
الجوهره: شنسوي يا خالي ..
يوسف: يا ويل حالكم يالنسايب ..
الجوهره: بايخ يوسف ..
الكل: هههههه ..
سلمان: زين احنا بنروح عند الباب عشان المعرس بيوصل بعد شوي .. انتبهي للتلفون ..
الجوهره: ان شاءالله ..
راحوا الشباب وطلعوا فاطمه و مريم عند هنادي .. دخلت هنادي على موسيقى هاديه وكل الانظار متجهه لها .. كانت نجمة الحفل بجمالها .. قعدت على الكوشه و البنات قاموا يرقصون جدامها من فرحتهم .. والكل راح يسلم عليها ويبارك لها .. بعد حوالي ساعه الا ربع .. دخل المعرس .. سلمان ويوسف دخلوا نواف .. راحوا صوب الكوشه وهنادي وقفت وهي منزله راسها .. قرب منها يوسف ورفع الطرحه عن ويها وباسها على جبهتها .. هنادي ماتت من الخجل .. وقف يوسف جنب هنادي و الجوهره وقفت جنب يوسف وتصورت معاهم .. وبعدين انضم لهم سلمان واخذت لهم لقطه عائليه حلوه ..
يوسف: نادي لي فاطمه ..
الجوهره: اعتق هالبنت ..
يوسف: ههههه .. ابي ياخذون لي لقطه معاها ..
الجوهره: اها .. قول جي .. والله انك عيار جننت االبنت
يوسف: ههههه
راحت صوب وفاطمه ..
الجوهره: المينون اخوي يبي يتصور معاج ..
فاطمه: استحي جدام الناس .. قولي له بعد ما يطلعون المعاريس بنتصور ..
الجوهره: زين حبيبتي ..
راحت صوب يوسف وقالت له هالكلام ..
يوسف: اخ منها .. بس قولي لها يا ويلها لو ما جات تتصور معاي ..
الجوهره: ههههه .. زين ..
سلمان اشر ليوسف عشان يطلعون .. طلعوا من القاعه وراحوا حق الشباب عند باب الفندق ..
فاضل: نذاله ..
يوسف: لا فاتك بصراحه ..
علي: حرام تسوي باخوي جي يا يوسف .. ما بينام الليله ..
الكل: هههههه
عبدالعزيز: من احلاهم يا بوخليفه ؟
خالد: عيب ..
فاضل: بس تكلم المطوع ..
علي ويوسف: ههههههه
خالد: فضول اصطلب ..
فاضل: ان شاءالله طال عمرك ..
فارس: مبروكين يا سلمان .. الله يهنيهم ..
سلمان: الله يبارك فيك .. والفال لك ..
فارس ابتسم ..
محمد: مبروك يا سلمان ..
سلمان: الله يبارك فيك ..
سلمان خذ فارس بعيد شوي عن الشباب ..
سلمان: عسى ماشر يا فارس .؟
فارس مبتسم: ما شر الغالي ..
سلمان: اشوفك دوم شارد وتفكر .. ليكون تحب ..
فارس اكتفى بابتسامه ..
سلمان: الله يوفقك .. وتمسك برايك ولا تخلي شي يفرق بينكم ..
فارس: جزاك الله خير ..
في القاعه نواف وهنادي قعدوا شوي وتصورا على الكوشه وبعدين طلعوا .. وهم طالعين زفوهم الحريم لين بابا القاعه .. ويوسف كان مرتز يبي فاطمه .. الجوهره ويوسف وصلوا هنادي ونواف للغرفه فوق .. يوسف كان يحن على الجوهره عشان فاطمه ..
الجوهره: والله انك اذيه يالمينون ..
يوسف: زين ابي اتصور معاها يلا وينها ..
الجوهره: تاكل القلب .. اصبر خل ادق لها .. هاي اذا سمعته ..
يوسف: اوهوووو..
الجوهره: تعالي يا فطيم ..
فاطمه: وين ؟
الجوهره: تعالي شوي برا القاعه عشان تتصورين مع بهي الطله ريلج ..
فاطمه: ههههه .. زين ..
طلعت فاطمه من القاعه وراحت صوب الممر عشان تتصور مع يوسف ..
عبدالعزيز شاف توأمه وراح صوبها ..
عبدالعزيز: وين رايح يا حلو ..
فاطمه خافت: عزيز خوفتني ..
عبدالعزيز مبتسم: هههههه .. سمالله عليج .. وين رايحه؟
فاطمه: عند يوسف ..
عبدالعزيز: لا ما تروحين ..
فاطمه باستغراب: ليش ؟
عبدالعزيز: بتذبحين الريال بهالحلاوه ..
فاطمه: ههههه ..
عبدالعزيز: زين ما يصير اتصور معاج ؟
فاطمه بحنان: تعال فديتك .. افا عليك ..
راحوا صوب يوسف .. الجوهره تغطت عدل وراحت صوب القاعه ..
يوسف" اخ منك يا عبدالعزيز شجايبك " ..
فاطمه: هلا يوسف ..
يوسف بأدب: هلا والله ..
عبدالعزيز: شدعوه يالبخيل ما تناديني اتصور معاك ..
يوسف: هههههه .. انا و زوجتي بنتصور انت شدخلك ..
عبدالعزيز: افااا .. هاي وانا مزوجك توأمي .. فطيم شوفي ريلج شو يسوي فيني ..
فاطمه: عاد هاذي عبدالعزيز الغالي .. توأم روحي ..
يوسف بهمس: من زينه ..
عبدالعزيز يهمس له: اوريك ياللوتي .. مسوي عمرك المأدب جدام اختي ..
فاطمه: زين بسكم سوالف المصوره تبي تروح فوق حق المعاريس ..
يوسف: زين يلا لا تعطلنا ..
عبدالعزيز: انت السبب ..
فاطمه: بسكم بسكم ..
الكل: ههههههه ..
المصوره: مين راح يتصور بالاول ؟
عبدالعزيز: اخذي لي صوره انا واختي .. وبعدين جماعيه وبامشي ..
يوسف" فديت اللي يقرى افكاري" ..
المصوره: اوكي .. تفضلي مدام .. خلي ايديك على كتف اخوكي ..
خذت لها لقطيتين مع توأمها ..
المصوره: يلا يا جماعه تجمعوا كلكم .. مدام انتي خليكي بالنص .. و حطي ايديكي على كتوف الشبان ..
فاطمه توسطت يوسف وعبدالعزيز .. والمصوره خذت لهم لقطه حلوه .. استأذن عبدالعزيز ويوسف استفرد بفاطمه مع المصوره ..
المصوره: حط ايك على كتف المدام واطلع بوجها ..
يوسف قرب من فاطمه وكان يطالعها بحنان وحط ايده على خصرها .. وفاطمه تفاعلت مع يوسف وعيونها كانت بعيون يوسف .. المصوره استغلت اندماجهم وهيمانهم ببعض وخذت كم لقطه عشوائيه ..
المصوره: يخزي العين .. بتجننوا .. طيب هلأ ممكن تحطي راسك على كتفه وتطلعي بعيونه ..
فاطمه: اوكي ..
فاطمه حطت راسها على كتفه بس يوسف غير الوضعيه ..
يوسف: حطي راسج على صدري .. ويدج على كتفي .. وطالعي تحت ..
فاطمه حست باحراج جدام المصوره ..
المصوره: اي حلوه الحركه كثير ..
فاطمه صوت اللي قال عنه يوسف ويوسف طوقها من خصرها وحضنها .. خذت المصوره اللقطه .. فاطمه حست بالاحراج ..
فاطمه: مشكوره حبوبه ..
المصوره: العفو يا حياتي .. بس باي غرفه العروسه ؟
يوسف: غرفه 504 ..
المصوره وهي تشل اغراضها: يسلمووو .. موفقين ..
يوسف: وياج ..
فاطمه: زين يوسف لازم اروح ..
يوسف: ودي اخطفج يا فطومتي .. شهالزين كله .. والله ذبحتيني ..
فاطمه ابتسمت بدلع مسكت يد يوسف وضغطت عليها بنعومه .. تركت يده بهدوء ومشت عنه رايحه القاعه .. يوسف تيبس مكانه وهو سرحان فيها .. اختفت عن نظره يوم دخلت القاعه .. خذ نفس عميق وراح صوب الشباب ..
عبدالعزيز: شدعوه كل هاي تتصور ؟ الحق يا فارس ..
فارس التفت عليهم: شسالفه ؟
عبدالعزيز: نسيبك مسوي نفسه صيه ..
فارس: ها بدينا من الحين يالنسيب ..
يوسف: ما عليك من اخوك العيار ..
فارس: ترا هي للحين عايشه في بيتنا ..
يوسف: اخ منكم .. ذليتوني ..
سلمان: هههههه .. عندكم اياه ..
فارس: خلاص يا يوسف .. خالك صرح لنا ..
يوسف: شدعوه شدعوه خالي .. يه طلعت مو شي ..
عبدالعزيز: فديته بوخليفه الا شي وشي وشي ..
الكل: ههههههه ..
.............
تموا الشباب يسولفون بوناسه وفرح .. وخالد من بينهم كان مستخف يبي يشوف مريم .. محمد كان يفكر في فاطمه .. ويحسد يوسف عليها .. المعاريس عاشوا احلى ليله فوق .. وباقي المعازيم تعشوا وتوكلوا .. كلن توجه لبيته .. الجوهره مر عليها ابراهيم .. ام فارس وبناتها توزعوا ما بين سيارة عبدالعزيز و بوفارس .. الريم راحت تنام بيت عمها عشان فارس .. ساره محمد كان ينتظرها .. الشباب (فاضل وعلي وسلطان) راحوا يتمشون شوي وبعدين رجعوا البيت .. فارس راح يتمشى عند البحر .. سلمان و يوسف رجعوا البيت .. اول ما دخلوا حسوا ان البيت مو حلو بدون البنات ..
سلمان: ملل ..
يوسف: مالي خاطر اقعد فالبيت ..
سلمان: ولا انا
يوسف: شرايك نروح بيت جوجو ؟
سلمان: لا خل البنت مع ريلها ..
يوسف: احنا مب نايمين معاهم .. بنام عندهم ..
سلمان: ههههه ..
يوسف: خل اتصل بجوجو ..
سلمان: زين ..
اتصل يوسف والجوهره ردت على طول ..
الجوهره بخوف: هلا يوسف ..
يوسف: شلونج اختي ؟
الجوهره: الحمدلله .. شفيكم يا يوسف ؟
يوسف مبتسم: ما فيني شي .. بس انتي ما نمتي للحين ؟
الجوهره: لا والله ..
ابراهيم قرب من الجوهره ..
ابراهيم: جهزي الغرفه حق اليهال ..
سلمان: هههههه .. طلعنا يهال ..
ابراهيم: هههههه ..
الجوهره تلخبطت: شفيكم ؟
ابراهيم: سلمان معاي عالخط ويوسف معاج .. حليلهم يخافون ينامون بروحهم ..
الكل: ههههههه ..
سلمان: يلا جهزوا غرفنا جاينكم ..
سكروا من بعض وتمت الجوهره تضحك على اخوها و خالها .. طلعوا من البيت و راحوا بيت الجوهره .. وصلوا و ابراهيم كان ينتظرهم فالحوش .. والجوهره كانت تجهز لهم الغرفه اللي بينامون فيها ..
سلمان: طلعتنا يهال جدام المدام ..
ابراهيم: ههههه ..
يوسف: والله البيت كئيب بدونهم ..
ابراهيم: حليلكم والله .. عيل متى بيسافرون معاريسكم ؟
سلمان: بعد بكره ان شاءالله ..
ابراهيم: المانيا ؟
سلمان: بأذن الله ..
ابراهيم: حياكم شباب ..
دخلوا الشباب والجوهره استقبلتهم بحب و حنان .. كانت مبتسمه لهم وترحب فيهم ..
الجوهره: هلا وغلا .. فديتكم نورتوا البيت ..
سلمان: البيت منور باهله ..
يوسف حضن الجوهره بشوق .. وسلمان وابراهيم استغربوا منه .. ابراهيم مسك سلمان وطلعوا من الصاله راحوا فوق .. تركوهم بروحهم .. الجوهره حضنت اخوها وصاحت .. تمت تكلمه وتمسح على ويهه ..
الجوهره: فديت قلبك يا خوي .. ليش هالحزن ؟
يوسف بحزن: فقدتكم فالبيت يا جوجو .. ابيكم ترجعون ..
الجوهره: فديت قلبك يا يوسف .. هاي سنة الحياة .. انا كل يوم امركم .. وهنوده بعد بتمركم ..
يوسف يمسح دموع اخته: ادري فديتج .. بس وجودكم فالبيت غير يا اختي ..
الجوهره: يعني انت عندك الماسه .. وتزعل ..
يوسف: فديت الماستي والله .. هي ضافت على حياتي الفرح .. بس وجودكم حولي اول ماقوم من النوم وقبل ما نام غير ..
الجوهره: فديت روحك يا يوسف .. انت بعد بتنشغل مع فطومه وبتنسانا ..
يوسف: عمري ما نساكم يا خواتي ..
الجوهره حضنت يوسف: فديتك يالغالي ..
يوسف: ترا حتى خالي زعلان .. من تزوجتي وهو كله يفكر ويدور فالبيت يفتح غرفتج ويشيك عليج ..
الجوهره صاحت: بس يا يوسف عورت قلبي والله ..
يوسف: فديت قلبك يالغاليه .. الله يوفقكم يا خواتي ..
الجوهره: فديت روحك والله ..
يوسف ابتسم: وين راحوا الشباب؟
الجوهره: راحوا فوق .. يلا نروح لهم ..
يوسف: يلا فديتج ..
راحوا فوق عند الشباب .. سلمان وابراهيم اشغلوا نفسهم بالتلفزيون لين ما دخلوا عليهم يوسف واخته ..
الجوهره: تبون اسوي لكم شي ؟
يوسف: متى بتنامون ؟
ابراهيم: تو الناس .. سهره شباب ..
سلمان: والله انك شي يا ابراهيم ..
الجوهره: هههههه ..
يوسف: سهره سهره ..
ابراهيم: زين شرايكم نروح نجيب شي من برا ؟
الجوهره: والله انا متعشيه .. وليش تجيبون من برا .. انا بسوي لكم اللي تبونه ..
سلمان: والله انا مابي اتعشى .. بس جان بنجيب مكسرات ولا ايس كريم ..
ابراهيم: زين تجي معاي سلمان ؟
سلمان: اوكي .. ها وشو في خاطركم يا جماعه ؟
الجوهره: ابي ايس كريم فانيلا مع مكسرات ..
يوسف: وانا ابي ايس كريم برتقال مع صوص الفراوله ..
سلمان: ما يهمكم .. مشينا يا ابراهيم ؟
ابراهيم: مشينا ..
ابراهيم راح الغرفه يلبس .. ولحقته الجوهره ..
ابراهيم مبتسم: فديت قلبج جوجو ..
الجوهره وهي تعطيه الثوب: حياتي يا ابراهيم .. بس هالله هالله بالمكسرات ..
ابراهيم: حاضرين لج ..
الجوهره: مادري شفيني هالايام كله في خاطري مكسرات ..
ابراهيم: ليكون حامل ؟
الجوهره مبتسمه: لا بدري على الحمل ..
ابراهيم باسها على جبهتها ورطلع من الغرفه .. الجوهره رتبت نفسها وطلعت وراه .. لقت يوسف قاعد يطالع التلفزيون .. قعدت معاه .. سلمان وابراهيم راحوا ياخذون الايس كريم ورجعوا .. تموا الحبايب سهرانين لين اذن الفجر .. الشباب راحوا يصلون فالمسيد وبعدين رجعوا وكلن نام بهدوء ..
كل العيون نامت من بعد احداث اليوم .. الا فارس اللي عيونه ما ذاقت النوم من حزنه وقلقه على مناف .. صلى الفجر في اقرب مسيد ورجع البيت .. مناف الفقيره اللي ماتعرف النوم .. صارت هي ودموعها يواسون بعض ..
يوم جديد وصباح حلو الكل حس فيه الا فارس اللي ما غمض له جفن .. الجوهره والشباب راحوا بيتهم عشان يجهزون للغدا .. هنادي ونواف قعدوا من النوم بنشاط .. تريقوا وتموا فالفندق لين الساعه 11 ونص .. طلعوا وراحوا بيت هنادي .. الكل استقبلهم بفروح وحب .. انقضى اليوم بفرح بالنسبه لعيلة سلمان ..
في بيت مناف كان الجو مشحون ..
ام مناف: وليش ترفضينه يا بنتي الريال ما عليه كلام مركز وتعليم وفي خير ..انا ابي الاحسن لج يا بنتي
مناف تصيح: يمه مابيه ..
ام مناف: يا بنتي ليش ؟
مناف: ابي اكمل دراستي واعتمد على نفسي .. بعدين بفكر فالزواج ..
ام مناف: يا بنتي هو ما راح يمنعج من دراستج .. وبعدين انت تدرين ان مب بيدج تقررين متى تتزوجين .. احنا في مجتمع الريال هو اللي يتقدم للبنت مو البنت تقرر من تبي ..
مناف: يمه اعرف كل هالكلام ..
ام مناف: دامج تعرفينه .. ليش ترفضين ؟ يا مناف انتي تعرفين وضعنا شلون .. لا اهل يسألون ولا غيره .. احنا نعتبر مقطوعين من شجره .. خالاتج تبروا مني عشان خذت ابوج ..
مناف بغيض: وش فيه ابوي يمه .؟
ام مناف: يا بنتي .. خواتي كل وحده فيهم تزوجت واحد في خير ونعمه .. ويوم ابوج تقدم لي رفضوا بس انا اصريت اخذه .. وقطعوني عشاني تزوجته ..
مناف: يمه بس انتي قلتي لي انكم ما كنتوا اغنياء ..
ام مناف: الله الغني يا بنتي .. احنا على قد حالنا .. بس خواتي كانوا وايد يطالعون فوق .. وكل وحده الله وفقها وانا الحمدلله الله وفقني مع ابوج الله يرحمه .. بس من بعد ما جبت نايف ابوج مرض .. والله ما كتب له عمر .. مناف: وبعدين محد سأل فينا وجينا هني .. آه يالقهر ..
ام مناف: يا بنتي احنا عندنا عزة نفسنا وكرامتنا ..
مناف: وهالشي اللي ابوي علمنا اياه ..
ام مناف: يا بنتي فكري عدل فالريال
مناف: يمه خلاص اتخذت قراري .. مابي اتزوج الحين ..
ام مناف: اللي تشوفينه يا بنتي .. مابي اضغط عليج زود .. وانتي تتحملين نتيجة قرارج ..
مناف نزلت راسها وحست بفرحه في قلبها .. ام مناف كانت حزينه بس ماحبت انها تضغط على بنتها وتركتها تقرر لمستقبلها .. طلعت من غرفة مناف وراحت تشيك على الشباب ..
عبدالله: فصول كلم فارس .. من زمان ما طلعنا معاه ..
فيصل: اي والله حتى هو ما مر علينا ..
اتصل فيصل بفارس .. فارس اول ما شاف الرقم ابتسم ..
فارس: هلا والله ..
فيصل: السلام عليكم ..
فارس: وعليكم السلام .. حيالله فيصل ..
فيصل: الله يحيك .. شخبارك ؟
فارس: الحمدلله .. اعلومكم ؟
فيصل: طيبين .. وينك ما شفناك من زمان ؟
فارس: فيك الخير يا فيصل .. والله انك ريال ..
فيصل حس بالاحراج .. واستانس من كلام فارس ..
فارس: بمركم اليوم ان شاءالله على الساعه 6 ونص ..
فيصل: حياك الله ..
عبدالله خذ التفون من يد فيصل ..
عبدالله: ههاااي ..
فارس: هههه .. هلا والله عبود شخبارك يا بطل ؟
عبدالله مبتسم: طيب ..
فارس: عيل ما في مدارس .. وناسه الحين كله لعب ..
عبدالله: ههااااي .. والله وناسه بدون المدارس ..
فارس: اليوم بجيكم .. تبون اجيب لكم شي وانا جاي ؟
عبدالله يفكر: مممم .. اي ..
فارس: شو تبي يبه ؟
عبدالله: ابي كوره قدم عشان العب فيها ..
فارس: ولا يهمك ..
عبدالله: مشكور فارس ..
فارس: ما يهمك .. لو خاطركم شي قولوا زين ..
عبدالله: زين .. والله انت طيب ..
فارس مبتسم: زين فديتك .. انتظروني الساعه 6 ونص ..
عبدالله: يااي..
فارس سكر من عبدالله وهو يضحك عليه ..
فارس: حليلك يا عبود .. على نياتك ..
انسدح على السرير وهو يفكر في مناف كان قاعد فالظلام بهدوء .. دخلت عليه امه ..
ام فارس: فارس يبه ..
فارس: هلا يمه ..
ام فارس: شو فيك ؟
فارس: ما فيني شي ..
ام فارس: وين ما فيك شي .. ويهك اصفر .. جسمك نحل .. عيونك ذبلت .. شو فيك يا يمه .. شوله قاعد في هالظلام .؟
فارس ابتسم: مافيني شي يمه ..
ام فارس: حتى الشركه ما قمت تروح ..
فارس: ما في شغل وايد هالايام ..
ام فارس ما قدرت تاخذ من ولدها لا حق ولا باطل .. استسلمت وطلعت عنه .. فارس تم على حاله .. قاعد فالظلام ومنسدح على السرير .. ام فارس راحت عند بوفارس ..
ام فارس: محمد ..
بوفارس: هلا يبه ..
ام فارس: فارس مب عاجبتني حالته ..
بوفارس: عسى ماشر ..
ام فارس: الولد فيه شي ..
بوفارس: ما فيه شي .. شو بيكون فيه ؟
ام فارس: والله اخاف حد لاعب بعقله و يحب ..
بوفارس: ولدج مب ياهل ينلعب بعقله ..
ام فارس: عيل ليش ما يبي يتزوج .. وكله حزنان ..
بوفارس: شو فيج يا حرمه .. الولد عنده خصوصيات .. بعد نتدخل في حياته .. مايصير ..
ام فارس: بعد ضناي ولازم اعرف شو فيه ؟
بوفارس: انتي لي تضايقتي من شي بينج وبين هلج ولا ربعج .. حد يتخل ويقولج لازم نعرف غصب .؟
ام فارس: مالهم حق ..
بوفارس: قلتيها .. مالهم حق .. يعني مالج حق تدخلين في حياة الولد .. هو كبير وعاقل .. وعقله يوزن بلد ماشاءالله عليه .. فارس ما ينقص عليه ويعرف يتصرف ..
ام فارس: والله اخاف وحده من هالفارطات لاعبين بعقله وطمعانين بفلوسه ..
بوفارس: وين راح فكرج .. وبعدين اي فلوس تتكلمين عنها .. الولد توه باول المشوار .. لا هو بصاحب الملاين ولا اللي يلعب بالفلوس لعب .. اذكري ربج وخلي عنج هالكلام ..
ام فارس: والله انت قلبك بارد .. الولد بيروح من ايدينا ..
بوفارس: الولد ما عليه شر .. وفضيها سيره ..
طلع من الغرفه وترك ام فارس تاكل بنفسها .. اذن المغرب طلع بوفارس مع عياله المسيد حق الصلاه .. وهم فالدرب بوفارس كان يكلم ولده ..
بوفارس: عسى ما شر يبه ؟
فارس مبتسم: ماشر يبه ..
بوفارس: الكل ملاحظ انك تعبان ..
فارس: مب تعبان والحمدلله ..
بوفارس: انا اقصد ان بالك مشغول .. انت تحب ؟
فارس منحرج: لا ما حب ..
بوفارس: انا ابوك يا فارس .. بحاول اساعدك لو قدرت ..
فارس مبتسم: ما تقصر يالغالي .. وادري انك بتساعدني .. بس لا تشغلون بالكم فيني ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك