رواية نهاية حبك اعدامي -101
طلع من الغرفه وترك ام فارس تاكل بنفسها .. اذن المغرب طلع بوفارس مع عياله المسيد حق الصلاه .. وهم فالدرب بوفارس كان يكلم ولده ..
بوفارس: عسى ما شر يبه ؟
فارس مبتسم: ماشر يبه ..
بوفارس: الكل ملاحظ انك تعبان ..
فارس: مب تعبان والحمدلله ..
بوفارس: انا اقصد ان بالك مشغول .. انت تحب ؟
فارس منحرج: لا ما حب ..
بوفارس: انا ابوك يا فارس .. بحاول اساعدك لو قدرت ..
فارس مبتسم: ما تقصر يالغالي .. وادري انك بتساعدني .. بس لا تشغلون بالكم فيني ..
بوفارس: على راحتك يبه .. بس انا موجود اي وقت ..
فارس حط يده على كتف ابوه: يسلم راسك الغالي .. وباس راس ابوه ..
دخلوا البيت وفارس راح غرفته على طول .. عبدالعزيز اتصل بيوسف ..
عبدالعزيز: حيالله النسيب ..
يوسف: هلا وغلا ..
عبدالعزيز: يعطيك العافيه ..
يوسف: الله يعافيك .. شحالك الغالي ؟
عبدالعزيز: طيب .. اعلومك انت ؟
يوسف: تمام ..
عبدالعزيز: انت وين ؟
يوسف: فالبيت .. وانت ؟
عبدالعزيز: والله فالبيت .. نتلاقى فالقهوه ؟
يوسف: شرايك تمرني الحين .. ونطلع بعد صلاة العشاء ..
عبدالعزيز: شوف .. انا بمر على يدي شوي .. بصلي العشاء وبجيك البيت ..
يوسف: خلاص انتظرك بعد صلاة العشاء ..
عبدالعزيز: بأذن الله ..
يوسف: مع السلامه ..
عبدالعزيز: الله وياك ..
سكر من يوسف وراح بيت يده .. اول مادخل لقى يده قاعد فالحوش .. ماسك الهوز ويرش الحوش بالماي ..
عبدالعزيز: شو تسوي يالكشخه ؟
الجد: ابرد الجو شوي ..
عبدالعزيز: كيف تبرد الجو بعد ؟
الجد: شو عرفكم .. انتوا عيال المكيفات ..
عبدالعزيز وهو نازل من السياره: ههه ..
الجد: تعال خل اعلمك يالعوي .. عيزت وانا اعلم فيك .. ما منك فايده ..
عبدالعزيز وهو يبوس راس يده: حشى حشى .. كل هاي فيني .. سمالله علي ..
الجد: لوع الله جبدك ..
عبدالعزيز: مقبوله منك ..
الجد: غصبن عنك ..
عبدالعزيز مبتسم: وين علمني شلون بتبرد الجو ؟
الجد: ارش ماي على الارض .. ولما يدور الهوا علينا .. يجينا هوا بارد .. نسمات تبرد على الويه ..
عبدالعزيز بخبث: اهااا .. زين هات الهوز خلني ارش الماي ..
الجد: زين هاك ..
عبدالعزيز خذ الهوز وتم يرش الماي بعيد .. كان يهوس على طرف الهوز ويطلع الهوز مثل النافوره ..
عبدالعزيز: والله فكره زينه ..
الجد: اقولك انتوا شعرفكم ..
عبدالعزيز: صج والله .. و رش يده بالماي ..
الجد: وجع يا عزوز ..
عبدالعزيز: هههه .. انا تقولي وجع .. اصبر علي يالشيبه .. و يرش يده بالماي ..
الجد راح بعيد وهو يصرخ على عبدالعزيز ..
الجد: عزوز الله لا يبارك فيك .. سبحتني ..
عبدالعزيز: ههههه .. اصبر علي ..
ركض ورا جده ويسبحه بالماي .. والجد كان معصب ويشرد من الماي .. وعبدالعزيز يضحك عليه بشماته ..
الجد: والله بالتهك بالخيزران .. وخر مناك يا عزوز ..
عبدالعزيز وهو يرش يده بالماي: عيد كلامك الشيخ ..
الجد وهو يمشي بعيد: عزوز ومره تاخذك ..
عبدالعزيز: ههااااي ..
طلعت لهم هيا .. شافتهم وماتت من الضحك على عبدالعزيز ..
هيا: عزوز اقعد عن ابوي ..
عبدالعزيز: متفرعن الاخ ..
الجد: حسابك بعدين ..
هيا: حرام عليك يا عزيز بيمرض ..
عبدالعزيز: لا تخافين عليه .. هاذي ما يمرض ..
الجد: حسبي الله ونعم الوكيل ..
هيا: زين تعال سلمي علي ..
عبدالعزيز: ان شاءالله ..
عبدالعزيز قط الهوز على الارض وراح يسلم على عمته .. الجد استغل الفرصه وخذ الهوز .. بدل ما يرش عبدالعزيز بروحه .. رش هيا وعبدالعزيز في نفس الوقت ..
هيا: وااي .. ليش يبه ؟
الجد: ووووي .. ابي ارش عزوز ..
الكل: هههه ..
الجد: انا ما ينلعب علي يا عزوز ..
عبدالعزيز ينرفز يده: عادي سبحني بالماي .. انا حران اصلا ..
الجد: يعلك العافيه يا عزوز ..
هيا: هههه ..
الجده: اللهم لك الحمد .. قله العقل مصيبه ..
هيا: انا ما عتقوني يا يمه ..
الجده: انهبل ابوج .. على باله توه بو 12 سنه .. قاعد يلعب فالماي ..
هيا: والله ابوي لي شاف عزوز يستخف ..
الجده: ثنينهم ميانين ..
تمت هيا وامها يطالعوا عبدالعزيز والجد .. لما تعبوا هم الثنين .. قعدوا على الدري اللي عند باب الصاله .. وهم مبللين .. تموا يسولفون شوي .. هيا جابت القهوه والشاي والفواكه .. قعدوا كلهم وتموا يسولفون .. هبت عليهم نسمة هوا .. وعبدالعزيز حس ببرودة المكان ..
عبدالعزيز: يا زين هالنمسه البارده .. والله تبرد على القلب ..
الجده: على ايامنا .. ما كان عندنا مكايفات .. كنا نرش الحوش بالماي .. وذيك الايام ما كنا نبلط بيوتنا .. الماي كان يتم فالطين اكثر ..
الجد: اي والله .. و في عز القيظ .. كنا ننام فوق السطح .. والله كنا نرش السطح بالماي و ننام ..
الجده: اي والله كانت نسمات الهوا حلوه ..
الجد: الحين هالمكيفات ذبحتنا .. عظامنا تكسرت منها ..
الجده: وين اول نمشي حفي فالبيت ولا نتويع .. يا زين الرمله لي مشينا عليها ..
هيا: اي والله ايام احلى من ايامنا ..
الجد: انتوا الا مدلعين ..
الكل: هههه ..
دخل عليهم بومحمد وبوفارس .. استغربوا من منظر الجد وعبدالعزيز ..
بومحمد: شو صاير ؟
الجده: ما تعرف اليهال بعد ..
الكل: هههه ..
الجد: ولدك يا محمد ابليس .. اول ما شافني شغل هوز الماي ورشني ..
عبدالعزيز مبطل عيونه: الله واكبر ..
الجد: وعليه علي انا ..
بوفارس: اي اعرفك يبه ما تسوي شي .. دوم في حالك ..
بومحمد: ايه عليك يبه .. عبدالعزيز يبيله خيزران .. وغمز حق عبدالعزيز ..
الجد: اي يبيله ..
عبدالعزيز همس لجده: كل شي بوقته حلو يا حلو ..
الجده: ولا خيزران ولا غيره .. ابوكم وتعرفونه ..
الجد: حليلي فقير .. لا تصدقون امكم ..
هيا: حالتكم حاله يا الشياب .. قعدوا فديتكم .. جان على هالثلاثه محنا بخالصين ..
بومحمد وبوفارس قعدوا .. هيا فنيلتهم وتموا يسولفون كلهم مع بعض .. عبدالعزيز استأذن عشان يروح البيت يبدل .. وبعدين بيتلاقى مع يوسف ..
فارس ومحمد كانوا مع فيصل وعبدالله .. فيصل وفارس ومحمد كانوا قاعدين عند الباب ويسولفون .. اما عبدالله كان مستانس ويلعب بالكوره اللي جابها فارس .. محمد كان يراقبهم بهدوء ..
فيصل: فارس انت تعبان ؟
فارس: لا .. ليش هالسؤال ؟
فيصل: ويهك مبين عليه التعب .. ما تاكل ؟
فارس ما عرف يرد علي فيصل .. تم ساكت فتره ..
فارس: ماكل وايد هالايام .. مشغول وايد
فيصل: يعطيك العافيه ..
فارس مبتسم: الله يعافيك ..
فيصل: بس مب زين عليك .. لازم تاكل ..
فارس مسح على راس فيصل: ان شاءالله يا فيصل ..
فيصل: بتسافر فارس ؟
فارس مبتسم: ان شاءالله ..
فيصل: وين بتروح ؟
فارس: ان شاءالله بنروح المكسيك ..
فيصل متعجب: وين هاي المكسيك بعد ؟
فارس: هههه .. بعيده عنا .. صوب امريكا ..
فيصل: اي ي ي ..
عبدالله: تعالوا العبوا معاي شوي ..
فارس: زين ..
راح صوب السياره وفصخ الغتره .. محمد وفيصل كانوا في فريق .. وفارس وعبدالله في فريق .. تموا يلعبون و فريق فارس فاز .. عبدالله كان طاير من الوناسه ..
فيصل: ما يصر .. ما نشوف عدل ..
عبدالله: افف من فريجنا كلش ما فيه نور ..
محمد: مره ثانيه بنلعب العصر ..
عبدالله: بس فزنا عليكم .. هههاااااي ..
الكل: هههههه ..
محمد: فيصل الله يرضى عليك جيب لنا ماي ..
فيصل مبتسم: ان شاءالله ..
راح داخل يجيب لهم الماي .. عبدالله تم يلعب فالكوره حولهم ..
محمد: شو صار على الموضوع ؟
فارس: ولا شي للحين ..
محمد: الله يعين .. ما كلمتها ؟
فارس: لا للحين .. مابي اكون سبب تعاستها .. مخليها على راحتها ..
محمد: ايه عليك يا فروس .. الله يعينك ..
فارس: آمين ..
فيصل: تفضلوا ..
فارس: جزاك الله خير ..
محمد: مشكور يبه ..
فيصل: عبود تبي ماي ؟
عبدالله: اي ..
تجمعوا كلهم حول بعض وشربوا الماي وتموا يسولفون لين الساعه 8 .. محمد وفارس استأذنوا ..
فارس: زين فيصل احنا بنحرك .. تبون شي ؟
فيصل: لا تسلم ..
عبدالله: فارس من زمان ما رحنا المجمع ..
فيصل ضربه: عبود ..
فارس مبتسم: ولا يهمك .. بنروح بعد بكره ..
فيصل منحرج: لا ماله داعي ..
فارس: شدعوه تستحي من يا فيصل .. انا اخوك الكبير ..
فيصل نزل راسه منحرج ..
محمد: شوفوا ترا فروس زطي .. طلبوا منه اللي تبونه قبل ما يطلع على حقيقته ..
فارس: افااا
الكل: ههههه ..
عبدالله: ههاااااي .. فارس طيب وايد ..
فارس مبتسم: فديت قلبك .. زين بعد بكره بمركم .. عبود عندي لك مفاجأه ..
عبدالله بفرح: شنو المفاجأه ؟
فارس: بعد بكره بتعرفها ..
عبدالله: ياااااي .. تم ينط من الوناسه ..
فيصل: ما تقصر يا فارس ..
فارس: حاضرين .. زين يلا دخلوا البيت يبه ..
فيصل: ان شاءالله ..
دخلوا البيت وفارس ومحمد حركوا ..
فارس: وايد تعلقت فيهم ..
محمد: مبين عليك .. هم اصلا يجننون الله يحفظهم .. بس فيصل وايد يستحي ..
فارس: وايد .. عبود عفوي ولو بغى شي بيقوله .. لكن فيصل عكسه يسكت وما يقول ..
محمد: بس عبود ماشاءالله عليه جريء .. اما فيصل عقله اكبر من سنه ..
فارس: والله من اللي شافه ..
محمد: بس موت اخوه ..
فارس: شوف موت اخوه الصغير كان شي متوقع ..
محمد عقد حواجبه: شلون ؟
فارس: لانه دوم يشوفه تعبان .. وفي الفتره الاخيره كانوا وايد ياخذونه المستشفى .. وفيصل كان عارف ان وضعهم ما راح يتغير .. فحط موت اخوه احتمال كبير و زعل عليه من قبل ما يموت .. يعني فالمستشفى كنت منصدم هدوئه فالبدايه .. بعدين صاح عليه بحزن .. و من معرفتي ومعاشرتي بفيصل فهمت شخصيته .. دوم يحط احتمالات لكل شي .. نفسه عزيزه وايد .. بس حياته بين المدرسه والبيت علمته اشياء وايد .. يعني فالبيت كان يشوف حالتهم كانت تمر عليهم ايام بدون اكل .. وتمر عليهم اعياد ما يلبسون فيها .. في حياته ما وجهه ريال .. ابوه توفى وهو صغير وما يذكره .. و هو مايعرف غير امه واخته واخوانه .. فالمدرسه الصبيان اللي بسنه يشوفهم عكس اللي يشوفه في بيتهم .. يعني اللي ولد عمه يفزع له .. ولا ابوه يجي المدرسه يفزع له .. هاي غير الدلع من جوالات وملابس وطلعات وسفرات .. يسمع الصبيان يقولون هالامور ويقارنها بوضعهم فالبيت .. انا متأكد انه الحين يفكر متى يكبر ويحقق كل اللي شافه في حياته .. لاحظ انه مو وايد شاطر بس يحاول انه يجيب اعلى الدرجات وينجح .. يبي يخلص دراسه بسرعه عشان يطلع من اللي هو فيه .. ويطلع امه واخوانه من اللي هم فيه .. فيصل يفكر على كبير ..
محمد: ماشاءالله عليه .. بس انت مو مقصر فيهم يا فارس ..
فارس: انا مو مقصر والله يعلم .. بس مثل ما قلت لك الولد نفسه عزيزه .. صج الحياه علمته ..
محمد: ماشاءالله عليه .. الله يعطيه على قد نيته ..
فارس: آمين ..
فارس وصل محمد بيتهم وراح البيت .. خذ له شور وحذف نفسه على السرير ..
...............
في بيت سلمان .. البيت كله ربع هنادي والجوهره واهل نواف .. كلهم رايحين يباركون حق هنادي ويسلمون عليها .. خلى البيت من الضيوف على الساعه 10 بالليل ..
هنادي: واااي تعبانه ..
الجوهره: فديت قلبج والله .. ماشاءالله البيت ما خلى من صديقاتج ..
هنادي: حليلهم والله فيهم الخير .. بعد اهل نواف ما قصروا ..
الجوهره: اي والله .. اخته وايد طيبه ..
هنادي: تجنن اخته ..
الجوهره: الله يوفقج يا هنوده ..
هنادي: وياج فديتج ..
دخل عليهم سلمان ..
سلمان: حيالله العرايس ..
هنادي والجوهره: الله يحيك ..
سلمان: يعطيكم العافيه ..
الجوهره: الله يعافيك ..
هنادي: خالي ..
سلمان: هلا يبه ..
هنادي: بقولك ..
سلمان مبتسم: قولي ..
هنادي: جوجو تزوجت فديتها .. وانا الحمدلله تزوجت .. ويوسف والله وفقه بفطومه .. ما بقى الا انت ..
سلمان: تو الناس ..
الجوهره: شدعوه تو الناس يا خالي .. انت في بالك حد ؟
سلمان: لا مافي بالي حد ..
هنادي: عيل ليش ما تبي تتزوج ؟
الجوهره: ما عليك زود يا خالي .. ولا عليك قصور .. ماشاءالله بديت مشروعك و ادخل منه شي حلو .. شناقصك طول بعرض .. و وسامه ..
سلمان: ههههه .. ويني و وين الوسامه .. بس ما فكر فالزواج الحين ..
هنادي: يا خالي الزواج ستر ..
سلمان: ادري فديت روحج .. خليني اكون نفسي بالاول ..
رن جوال هنادي ..
هنادي: هلا نواف ..
نواف: هلا حبيبتي .. خلصتي ؟
هنادي: اي .. انت وين ؟
نواف: انا قريب بيت ابوج ..
هنادي: تعال حياك ..
نواف: ان شاءالله .. زين انتظرج لا تتأخرين ..
هنادي: ولا يهمك ..
سكرت من زوجها .. وقامت تلبس عبايتها ..
الجوهره: بتروحين ؟
هنادي: اي نواف فالطريق ..
الجوهره: تو الناس اختي ..
هنادي: تعبانه والله ..
سلمان: يعطيكم العافيه يا بنات ما قصرتوا اليوم ..
البنات: الله يعافيك ..
سمعوا هرن فالحوش ..
هنادي: نواف وصل ..
سلمان قام: خل اطلع اسلم عليه ..
طلع سلمان عند نواف فالحوش .. هنادي والجوهره تموا شوي داخل وبعدين طلعت هنادي وركبت السياره .. سلموا على سلمان وطلعوا .. سلمان راح عند الجوهره ..
الجوهره: وين يوسف ؟
سلمان: عند المدام ..
الجوهره: هههههههه .. مب صاحي ذي ..
سلمان: هههههه .. ليش ؟
الجوهره: ما شفت شسوا فيها يوم العرس ..
سلمان: شسوا ؟
الجوهره: جننها .. كل شوي اتصلها تلفون اونه يبي شي .. يطلعها من الغرفه بس عشان يشوفها .. والبنت كل ما ترجع ويها متغير من الخجل ..
سلمان: ههههه .. حليله يوسف .. الله يوفقهم ..
الجوهره: آآآمين .. زين خالي توصلني البيت فديتك ..
سلمان: حاضرين .. متى تبين تروحين ؟
الجوهره: الحين ..
سلمان: زين يلا قومي لبسي وبروح اشغل السياره ..
الجوهره: ان شاءالله ..
سلمان: بارك الله فيج ..
طلع يشغل السياره والجوهره لبست عبايتها وطلعت وراه .. في سيارة سلمان ..
الجوهره: خالي ..
سلمان: عيونه انتي ..
الجوهره مبتسمه: فديت عيونك يا خالي .. تشوف لي اي محمصه على الدرب .. في خاطري مكسرات ..
سلمان: ان شاءالله فديتج ..
راحوا عند المحمصه ونزلوا ياخذون مكسرات .. خذوا مكسرات فرش وكان طعمها يجنن .. الجوهره وسلمان كانوا ياكلونها بتلذذ ..
الجوهره: وااااو وايد حلوه ..
سلمان: توهم محمصينها .. روعه
الجوهره: ممممممم .. بخلي ابراهيم يجيب لي منها كل يوم ..
سلمان مبتسم: افا عليج حاضريا يا بنت الغاليه ..
الجوهره: هههههه .. فديت روحك يا خالي .. ماتقصر ..
سلمان: ولا يهمج ..
كملوا دربهم لبيت الجوهره وهم مستمتعين بالمكسرات .. وصلت الجوهره البيت ونزل سلمان معاها شوي ..
سلمان: الله يحفظ لج ابراهيم .. مو مقصر معاج ..
الجوهره: شلون يا خالي ؟
سلمان: معتمد على نفسه .. وفر لج بيت .. وخدامه .. وقريب بيجيب لج دريول ..
الجوهره خنقتها العبره: اي والله يا خالي ابراهيم مو مقصر معاي .. لو اطلب المستحيل .. بيسويه عشاني ..
سلمان: ابراهيم ريال و ينشد فيه الظهر .. والله يوم تقدم لج .. كل ما اسال عنه امدحوه .. ما سألت عنه ريال الا قالي قربوه .. تراه قايم باهله وبربعه .. و محد سأله الا وعطاه .. الله يوفقكم يا الجوهره ..
الجوهره مبتسمه: الله يسلمك يا خالي ..
سلمان: وانتي يا جوجو حطي الريال في عيونج .. حفظيه في حضوره وغيابه .. احفظي حلاله وانصحيه .. وترسي له البيت عيال .. يلا نبي نشوف انتاجكم .. ودي اشل عيالكم والاعبهم ..
الجوهره: ان شاءالله يا خالي .. و لك مني اسمي واحد من عيالي سلمان ..
سلمان مبتسم: سلمان بيكون غلاه غير اخوانه ..
الجوهره: هههههه .. ابيه يطلع مثلك .. خلاص بعتمد عليك تربيه ..
سلمان: هههههه .. فديت روحج والله ..
الجوهره: خالي خذ راحتك بس بروح اودي عبايتي وبرجع ..
سلمان: زين ..
راحت الجوهره تعلق عبايتها فالغرفه الثانيه .. سلمان قعد فالصاله ودخل عليه ابراهيم ..
ابراهيم: السلام عليكم .. حيالله النسيب ..
سلمان مبتسم: عليكم السلام هلا والله ..
ابراهيم: شحالك ؟
سلمان: طيب الله يسلمك ..
دخلت عليهم الجوهره مبتسمه ..
الجوهره: هلا والله ..
ابراهيم: منور البيت ..
سلمان: بوجود من ؟ حدد موقفك ..
الكل: ههههههه ..
سلمان: يلا عيل استأذن ..
ابراهيم: وين يا ريال .؟
سلمان: اول شي وصلت لك الامانه .. ثاني شي تاخر الوقت ..
ابراهيم: عادي يا ريال ..
سلمان: تسلم الغالي .. وراي شغل الصبح ولازم اقعد من وقت ..
ابراهيم: على راحتك ..
ابراهيم وصل سلمان لين سيارته .. ودعه ورجع عند زوجته .. ابراهيم و الجوهره قضوا ليلتهم بهدوء ..
هنادي ونواف كانوا عايشين اسعد ليالي العمر .. نواف كان حاضن هنادي وكانوا يسولفون عن شهر العسل ..
هنادي: نواف ..
نواف: قولي حياتي ..
هنادي: ميونخ حلوه ؟
نواف: وايد حلوه .. انا مرتب لنا جدول حلو هناك ..
هنادي: وااااو ..
نواف: انا اعرف المانيا شارع شارع ..
هنادي: شكلك وايد كنت تروح
نواف: الوالد الله يرحمه كان دوم يروح للعلاج .. وتعرفين محد كان يعابله غيري .. وعرفت شوارعهم ومحلاتهم
هنادي: اها .. بس بيفوتني عرس اخت مرت يوسف اخوي ..
نواف: معليه شنسوي بعد .. لي رجعتي قدريهم ..
هنادي: اي اكيد ..
نواف: زين جهزتي كل شي للسفر ؟
هنادي: اي ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك