رواية نهاية حبك اعدامي -119
فاطمه ضحكت على اخوها وهي رايحه المطبخ .. فارس دخل سلم على يوسف ولعوزه شوي .. طلع وراح عند محمد ولد عمه .. ركب السياره وعيونه على محمد الحزين ..
فارس: هلا حمودي ..
محمد: هلا والله فروس ..
فارس: حرك يلا ..
محمد: ان شاءالله ..
فارس: وين تبي نقعد ؟
محمد: شو رايك نروح القهوه ؟
فارس: لا حالتك وايد صعبه .. خل نروح البحر ..
محمد: زين ..
طول الطريق ومحمد كان ساكت .. فارس احترم هدوء محمد وتم ساكت لين وصلوا البحر .. صف السياره ونزلوا يتمشون ..
محمد: فارس ..
فارس: هلا والله ..
محمد: حياتي صارت جحيم ..
فارس: ليش ؟
محمد: احس نفسي مب طايق زوجتي ..
فارس عقد حواجبه: ليش حمودي ؟ شو صار بينكم بعد ؟
محمد: من بعد ما رجعنا من المانيا .. وديتها بيت اهلها خليت اليهال معاها .. كلمني ابوي وقالي عشانك وعشان اليهال .. وهي لازم تشوف منك الزين وبتقدرك .. ومن هالكلام يا فروس ..
فارس: حلو الكلام ..
محمد: رجعتها البيت .. بس يا فروس لما رحت لها البيت حسيت اني مالي خاطر اشوفها .. ولا حتى اتكلم معاها .. بس رحت مجبور .. فروس انا حاس بالذنب .. يوم رحت اراضيها ما قلت لها ولا كلمه حلوه .. كنت جاف معاها .. وهي على نيتها المسيكنه .. كانت تتغزل فيني وتسمعني كلام حلو .. فروس تخيل لما رجعت البيت ورحت لها الغرفه .. كانت متعدله لي ومتكشخه وتنتظرني بشوق .. فروس بالعافيه جابلتها .. ونزلنا تحت عند اهلي .. الحين شردت من البيت .. آآه يا فارس .. ماقدر اعيش جي .. هي معوره قلبي .. بس في نفس الوقت ماقدر اجابلها ..
فارس: محمد اذكر ربك ولاتخلي الشيطان يلعب فيك .. خل عنك المجاملات .. اقعد معاها ناقشها حاول انك تقولها اللي في خاطرك .. وانت خذ مافي خاطرها ..
محمد: ماقدر .. والله للحين ماقدر انسى شكلها لما ركبت معاي السياره وهي فرحانه ان بنرجع البيت .. تدري يا فارس شو سويت ..
فارس: شو ؟
محمد: اول ما رجعنا حطيت اليهال في اسرتهم و رحت الفراش سويت نفسي نايم .. عورت قلبي يوم قربت مني وهي تشيك علي .. لمستني وانا بينت لها اني في نوم عميق .. غطتني ونامت جنبي .. والله ما كنت طايق قربها ..
فارس: تعوذ من ابليس يا محمد .. هالمشاكل لازم تصير بينك وبين زوجتك .. مافي احد مرتاح .. لازم تصبر عليها وهي بعد بتصبر عليك .. هي تحبك واكيد تتغلى عليك يا محمد .. ماعتقد انها بتخسرك وفي ذمتكم اثنين ..
محمد: والله مادري شو اقولك يا فارس ..
فارس: لا تقولي .. انت لازم تغير مافي داخلك .. لاتفكر في غيرها .. هي شريكت حياتك .. كلن يشوف حياته .. انت متزوج ملتزم بزوجه وعيال .. حمود مرتك الحين حامل .. فكر فاللي جاي بالطريق ..
محمد يتنهد: آآه .. والله اني افكر فيهم .. بس قلبي ماعاد لها ..
فارس بحده: غيرها راحوا يا محمد .. لهم حياتهم .. لا تتعلق بوهم .. لاتعشم نفسك عشان افكار انحطت في بالك .. اتركك غيرك يعيشون حياتهم .. ولو تعزهم صج .. لا تفكر فيهم ..
محمد " محد فاهمني الا انت يا فروس " ..
محمد: والله اني اتمنى لهم الخير ..
فارس: شيلهم من بالك يا محمد ..
محمد سكت ولارد على فارس .. تموا يتمشون على السيف .. محمد تم يفكر في كلام فارس .. وفارس تم يفكر في كلام محمد ..
محمد " فاطمه خذت قلبي يا فارس .. شلون تبيني انساها .. بس كلام فارس صح .. ساره عيشتني حب فاطمه "
فارس " ليش يا محمد تسوي بنفسك واهلك جي ؟ .. خل غيرك يعيش حياته .. انت ملتزم بزوجه وعيال .. وهالخلافات لازم بتصير في حياة كل ريال ومرته .. لذة الحياة بالمشاكل .. شلون الواحد يتعلم من من الدنيا .. لا تستلم يا محمد .. الله يهديك " ..
تموا يتمشون على السيف وهم ساكتين ..
محمد: فروس خل نقعد شوي ..
فارس: ان شاءالله ..
محمد: والله تعبان تعبان ..
فارس: ممممممم .. قبل ما نسافر المكسيك .. الوالد اقترح علينا نروح مكه ..
محمد مبتسم: خوش راي ..
فارس: قبل المدارس والدوامات خل نروح ..
محمد: خل نروح نتعبد ونستغفر بنا ..
فارس: نشوف الاهل ونرتب امورنا ..
محمد: بأذن الله ..
فارس: لازم تاخذ زوجتك معاك .. واحجزوا لكم غرفة بروحكم .. لازم تكونون قراب من بعض .. صارحها وخذ مافي خاطرها ..
محمد: ان شاءالله ..
فارس: عيالك خلهم هني عند اهلها ..
محمد: لا ماستغنى عنهم ..
فارس: حمود لا تتعذر .. يعني يوم سافرنا المكسيك مافتكرت فيهم ولا فيها ..
محمد نزل راسه منحرج ..
فارس: خلهم فالبلاد وانت و زوجتك تفاهم وحطوا النقاط على الحروف .. لا تتسرع و وازن الامور عدل ..
محمد: ان شاءالله ..
تموا فتره ساكتين يتأملون ضوء القمر المنعكس على امواج البحر الهاديه .. كانت الساعه 12 ونص لما محمد شاف الوقت في ساعته ..
محمد: جوالك معاك ؟
فارس: لا خليته بالسياره ..
فارس: زين يلا .. بس ليش سألت عن الجوال ؟
محمد: يمكن المدام تتصلك ..
فارس ومحمد: هههههههه ..
فارس: ما بتتصل ..
محمد: يا واثق .. زين ليش يعني ما راح تتصل ؟
فارس: لاني قلت لها مشغول ..
محمد: اي ي ي ..
فارس: بكره نورح نأثث ؟
محمد: حاضرين لك الغالي ..
فارس: حلو حلو ..
محمد: حلو على قلبي ..
فارس: لا قلبي ..
محمد: ولا تزعل .. بس على قلبي .. وانت اقلب ويهك ..
محمد وفارس: ههههههه ..
رجعوا متجهين لبيت بوفارس .. نزل فارس بيتهم وكانت سيارة يوسف موجوده فالحوش .. محمد كان يشوف السياره بحسره ..
محمد " والله ليتني مكانك يا يوسف .. ليتني مكانك " ..
فارس سلم على محمد ونزل .. طلع محمد اتجه لبيتهم وهو مغصوب .. دخل الحوش وراح غرفته .. شاف ان زوجته نايمه .. حس بالراحه .. بدل ملابسه وراح الصاله .. تم يقلب قنوات التلفزيون لين نام على الكرسي .. ساره وعت من نومها على الساعه 2 ونص .. استغربت انها ما لقت محمد فالفراش .. طلعت من الغرفه وراحت الصاله لقته نايم على الكرسي بعمق .. جابت لحاف وغطته .. باسته على جبهته ومسحت على راسه .. رجعت الغرفه ونامت ..
...............................
يوم جديد بنسماته وعبيره يطل عليهم .. مريم فتحت عيونها وابتسامة تفائل علت شفاها النديه .. التفت على خالد اللي كان نايم .. قربت منه وباسته على خده .. غطته وراحت تاخذ شور .. خلصت من الشور اللي عطاها نشاط .. قعدت خالد من النوم ..
مريم: خالد حبيبي ..
خالد: هممممم ..
مريم: قوم فديتك ..
خالد: الساعه كم ؟
مريم: الساعه 7 ونص ..
خالد: تو الناس .. قعديني الساعه 8 ..
مريم مبتسمه: ان شاءالله ..
طلعت من الغرفه ونزلت تحت عند مرت عمها .. لقتها قاعده بروحها .. تشرب حليب وتقرى الجريده ..
مريم: السلام عليكم ..
ام محمد مبتسمه: عليكم السلام .. هلا والله بنتي ..
مريم: شحالج عمتي ؟
ام محمد: الحمدلله ..
مريم: عيل وين الباقي ؟
ام محمد: البنات نايمين .. والشباب اللي فيهم للحين نايم واللي طلع ..
مريم: حليلهم ..
ام محمد: يمه اصب لج شاي ولا حليب ؟
مريم: انا بقوم اصب لي ..
دخلت عليهم ساره وعيالها وراها .. ركضوا عند يدتهم وطبوا في حضنها ..
ساره: السلام عليكم ..
ام محمد ومريم: وعليكم السلام ..
ام محمد: هلا يمه ساره ..
ساره باست راس ام محمد وقعدت جنبها ..
ساره: شحالج عمتي ..
ام محمد: الحمدلله طيبه ..
ساره: مرايم فديتج صبي لي معاج شاي ..
مريم: ان شاءالله ..
ام محمد: يلا تريقوا بناتي ..
مريم: يكفيني الحليب عمتي ..
ساره: انا ترقت مع محمد ..
ام محمد: بالعافيه ..
قعدوا ثلاثتهم مع بعض والتوأم كانوا يلعبون حولهم .. مريم راحت تقعد خالد على الساعه 8 .. دخلت عليه ومالقته في فراشه ..
مريم " فديته قعد بروحه " .. فتحت الكبت وجهزت له ملابسه .. طلعت له ثوبه والغتره والقحفيه .. نزلت تحت تجيب الفحم عشان تبخر خالد .. طلع من الحمام وشاف ملابسه مجهزه على الكرسي .. سمع حس مريم وهي جايه الغرفه .. انخش ورا الباب وترك باب الحمام مفتوح .. دخلت مريم ومالقت خالد ..
مريم: خالد .. خالد .. يه وين راح .. دخلت الحمام وشافته فاضي .. وقف خالد وراها وطوقها بايدينه المبلله ..
خالد: صباح الحب يا حبي ..
مريم مبتسمه: صباحك عسل ..
خالد: فديت رحيتج والله ..
مريم ابتعدت عنه: يلا حبيبي بدل عشان ما تتأخر ..
خالد مبتسم: حاضرين مدام ..
مريم: هههههه .. شو مدام ..
خالد: كيفي ..
مريم وخالد: هههههه ..
خالد لبس وكشخ ومريم حطت البخر تحته عشان تبخيره .. عطرته وباسته على خده ..
مريم: فديت روحك يا خالد .. الله يوفقك ..
خالد مبتسم: فديت روحج يالغاليه ..
مريم سمعت صوت ياهل والتفت صوب الباب .. عقدت حواجبها وصدت ..
خالد: شو فيج ؟
مريم: كأني سمعت صوت ياهل ؟
خالد: يمكن عيال محمد اخوي ..
مريم: يمكن ..
خالد عدل غترته ونزل مع مريم تحت .. سلم على امه ومريم صبت له شاي خذه معاه وهو طالع .. مريم راحت ترتب غرفتها .. فتحت الدريشه تغلغلت اشعة الشمس داخل الغرفه نقت جو الغرفه .. رتبت السرير وسمعت حد يدخل الغرفه .. راحت صوب الباب وما لقت حد .. طلعت عند باب الغرفه التفتت يمين ويسار ومالقت حد .. استغربت ورجعت الغرفه .. وهي مندمجه في ترتيب الغرفه سمعت صوت الماي فالحمام .. راحت الحمام تشيك .. مالقت شي .. شيكت على ولف الماي كان مسكر .. استغربت وحست برعشه في جسمها .. سكرت باب الحمام واتصلت بخالد على طول ..
خالد: هلا حبيبتي ..
مريم: خالد ..
خالد: شو فيج ؟
مريم: خالد في شي غريب فالغرفه ..
خالد عقد حواجبه: شي غريب ؟! مثل شو ؟
مريم: وانا ارتب سمعت صوت الماي بالحمام .. ولما رحت اشيك مالقيت شي ..
خالد: لا حبيبتي يمكن يتهيء لج .. تعوذي من ابليس .. روحي تحت عند امي ..
مريم بخوف: ان شاءالله ..
خالد حس بخوفها: زين باجي البيت اشيك بنفسي ..
مريم بتردد: لا خالد ماله داعي ..
خالد: حياتي انتي ابي اطمنج ..
مريم: لا مو مشكله الحين بنزل تحت ..
خالد: زين لا تروحين الغرفه لين ارجع من الدوام .. مو مطول اليوم ..
مريم: زين حبيبي ..
سكرت من خالد وهي تتلفت حواليها .. تذكرت سالفة خالد مع الجنيه ..
مريم " هاي اللي انا خايفه منه " ..
طلعت من الغرفه وراحت تحت عند عمتها .. خالد تم يفكر في مريم ويحاتيها .. خلص شغله بسرعه وراح البيت .. اول ما دخل الصاله شاف مريم قاعده بروحها .. التفت عليه مبتسمه ..
مريم: هلا والله
خالد مبتسم: شو اخبارج ؟
مريم: الحمدلله ..
خالد مسك يدها وابتسم ..
خالد: يلا نروح فوق ..
مريم: زين ..
طلعوا ثنينهم الغرفه ومريم كانت تتباطئ في مشيتها .. خالد كان حاس فيها .. فتح باب الغرفه وكانت الغرفه عاديه ما فيها شي .. مريم تطمنت بوجود خالد جنبها .. راحت صوب الكبت وطلعت له ملابس البيت وخذت ثوبه وغترته وعلقتهم ..
خالد: شو مسويه لنا غدا اليوم يا مدام ؟
مريم مبتسمه: مممممم .. مسوين لكم دجاج مشوي ..
خالد: افا .. وانا قلت باكل من هالايدين الحلوات ..
مريم بدلع: عاد خالد ..
خالد حضنها بقوه: فديت دلوعتي والله ..
مريم همست في اذنه: احبك يا خالد ..
خالد مبتسم: وانا اموت فيج ..
مريم: زين اجيب لك الغدا هني .. لان محد موجود ..
خالد: ممممم .. الساعه كم الحين ؟
مريم: الساعه 12 ونص ..
خالد: بدري على ما الكل يجتمع ..
مريم: تبي اجيب لك الغدا عشان تقيل وترتاح شوي ..
خالد: زين ..
مريم: من عيوني ..
خالد: فديت عيونج والله ..
مريم ابتسمت لخالد وهي طالعه .. خالد حذف نفسه على السرير وتم يفكر في مريم
خالد " الله يستر جان ما تطلع لها .. فديت قلبها مريم الرقيقه " ..
مريم جابت الاكل وخالد تغدا .. قيل عشان يرجع الشركه العصر ..
فارس كان يسولف مع مناف ..
فارس: يا قلبه ..
مناف: هلا حبيبي ..
فارس: وين سرحتي ؟
مناف: ولا مكان ..
فارس: مممممم .. شو اللي تفكرين فيه ؟
مناف: فيك ..
فارس: اموت انا في كلامج ..
مناف انحرجت وسكتت ..
فارس: زين حياتي امرج اليوم ..
مناف: ممممم .. متى عاد ؟
فارس: الساعه 10 يناسبج ؟
مناف: مممممم .. خلها 11 احسن ..
فارس: حاضرين لج الغاليه .. كم مناف عندي انا ..
مناف: فديت روحك يا فارس ..
تموا ساكتين فتره ..
مناف: زين فارس ..
فارس: يا لبيه ..
مناف: فديتك .. شسويتوا في المكسيك .. قولي مغامراتكم ؟
فارس: طال عمرج تونسنا وناسه مابعدها .. والناس هناك كانوا وايد طيبين .. اغلبهم بسطاء من اهالي القرى ..
مناف: زين ..
فارس: ضيفونا وماقصروا .. مره كلنا عند وحده عجوز .. مسكينه ضروسها مكسره ولما تتكلم اللي معانا بالعافيه كان يفهم لها .. فكانت تقول شي وتأشر على حلجها .. وهو يهز راسه ويقول اوكي .. قلنا له شو تقولك .. قالنا انها بتسوي اكل .. قلنا حلو بناكل ..
مناف مبتسمه: زين ..
فارس: وكل شوي كانت تأشر على حلجها واحنا كلنا نهز روسنا ونقول اوكي .. المهم راحت تجهز لنا الاكل .. بعد ما خلصت نادتها على غرفة الطعام .. رحنا وكل منها يتشهى الاكل لان ريحته طيبه .. قعدنا وجابت كراسي زود ماشاءالله كان فوق ال6 اشخاص .. المهم قعدنا واستعدينا للاكل .. اخوي حط اللقمه في حلجه واشوف ويهه احمر وكان يطالعنا وشوي وينفجر .. المهم انا و ولد عمي حطينا اول لقمه في حلوجنا الا ولد عمي يقول حار حار .. وتم متحرقص .. شرب كوب الماي كامل .. وكل منا تحرقص من حرورة الاكل ..
مناف: ههههه ..
فارس: اقولج ما تم فلفل فالمكسيك ما حطته ..
مناف: شدعوه .. ههههه
فارس: بس ذوقيه انتي .. والله يطلع الدخان من راسج ..
مناف: ههههه ..
فارس: بعد هالحروقه اللي صادتنا .. كلنا افترينا على السلطات وكلناها ..
مناف: هههههه .. حليلكم والله ..
فارس: بس يوم ما ينسي .. تحرقصنا صح .. تلهلبت السنتنا .. ما كلت شي كل ذاك اليوم
مناف: ليش ؟
مناف: لساني ماحس فيه تخدر ..
مناف: سمالله عليك حبيبي ..
فارس: ايه عليج لي قلتي حبيبي ..
مناف استحت وما ردت ..
فارس: حبيبتي ..
مناف: هلا ..
فارس: ماقدر اصبر اكثر ..
مناف: عن ايش ؟
فارس: عنج يا قلبه .. قريب بكلم اهلي .. واستعدي بيمرون عليكم ..
مناف انحرجت وفي نفس الوقت كانت طايره من الفرحه ..
مناف " فديت قلبك يا فارس " ..
فارس: ان شاءالله بتحبين اهلي .. عندي 3 خوات يجنون .. ثنتين فالجامعه و وحده تدرس رايحه ثاني ثانوي .. عندي اخوي الصغير يجنن حجمه يضحك ..
مناف: هههههه .. شلون بعد حجمه يضحك ؟
فارس: ههههههه . عمره 9 سنوات ولو تشوفينه تقولين عمره 6 سنوات .. صغيرون ..
مناف: حليله .. الله يحفظه ..
فارس: وعندي اخو اصغر من يدرس بالجامعه ..
مناف: يعني انتوا 3 اولاد و 3 بنات ؟
فارس: عليج نور .. وانا بكر امي وابوي ..
مناف: فديتك انته ..
فارس: باموت يا ناس على الغزل ..
مناف بدلع: فارس ..
فارس: يا قلب فارس انتي .. زين تبين تقعدين بيت اهلي ولا نجهز الشقه ونروح هناك على طول ..
مناف بخجل: مادري ..
فارس: اموت فالحياويه والله ..
مناف " والله احبك يا فارس .. الله لا يحرمني منك " ..
فارس: زين عيل اول ما يستوي الكلام بين الحريم على طول بامرج وبنروح نختار اثاث غرفة النوم ..
مناف: ان شاءالله فديتك ..
فارس: و كل يوم بمر عليج عشان اشوف ويهج الحلو ..
مناف عضت شفتها: فديت قلبك يا فارس ..
تم فارس يسولف مع مناف ويقولها شو بيسوي بعد ما يملج بها .. مر يومين على هالاحداث .. فارس راح عند امه عشان يكلمها بموضوع مناف ..
.....................
باقي من الوقت لي عندك ربع ساعه .. واروح واغيب عنك طول الايامِ " ..
كانت الساعه 10 الصبح .. فارس دخل البيت ولقى امه قاعده تقرى الجريده .. سلم عليها وقعد جنبها .. ام فارس استغربت دخول فارس البيت هالوقت ..
ام فارس مبتسمه: فديت هالويه المنور والله ..
فارس: الله يحيج الغاليه ..
ام فارس: شعندك طالع هالحزه يبه ؟
فارس: جاي اتكلم معاج ..
ام فارس بوناسه " فديت قلبك يا فارس ..الله يريح قلبك " ..
ام فارس: قول ابوي ..
فارس رطب شفايفه وتنفس بعمق ..
فارس: الغاليه انا قررت اكمل نص ديني ..
ام فارس بفرح: يعل الله يكملك بعقلك .. قول آمين ..
فارس مبتسم: آمين .. وباس راس امه ..
ام فارس مبتسمه: زين يبه .. قولي شو مواصفات البنت اللي تبي نخطبها لك ..
فارس بلع ريقه بصعوبه ..
فارس: ممممم .. يمه انا .. انا ..
ام فارس: انت شو يبه .. قول ..
فارس: انا في بالي وحده ..
ام فارس مبتسمه: فديت قلبه ولدي الغالي .. زين ما قلت لي من تكون هالبنت اللي امها داعيه لها ..
فارس: هههههه .. شدعوه انا فارس ..
ام فارس: والنعم يا فارس .. والله البنت اللي بتوافق عليك اشهد ان الله موفقها ..
فارس: تسلمين لي الغاليه ..
ام فارس: زين ما قلت لي من بنته ؟
فارس: ممممممم .. والله شفتها وعجبتني البنت ..
ام فارس عقدت حواجبها: فارس وين شايفها ؟
فارس: تذكرين يوم ترقد الجسمي ؟
ام فارس: اي يبه ..
فارس: شفتها فالمستشفى .. وعجبتني بصراحه .. جمال واخلاق ..
ام فارس: زين من ابوها ومن امها ؟ من خوالها وعمامها ؟
فارس: ماعرف يمه .. بس البنت دشت راسي وابيها ..
ام فارس: احم .. فارس انت تكلمها ؟
فارس: اكلمها ؟ قصدج تلفون ؟
ام فارس: اي ..
فارس: لا ماكلمها ..
ام فارس: زين ما تعرف من تكون ومن اهلها .. يبه لازم نسأل عنها ..
فارس: انا بجيب لكم اسمها الكامل وانتوا سألوا عنها على راحتكم ..
ام فارس بشك: فارس انت تعرفها ؟
فارس: لا يمه .. قلت لج ماعرفها ..
ام فارس تمت اطالع فارس بشك .. فارس توتر وتم يفرك ايدينه ببعض ..
ام فارس: زين جيب لنا اسم البنت خل نسأل عنها .. وبعدين من وين بتجيب اسمها ؟
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك