رواية نهاية حبك اعدامي -120
ام فارس: زين ما تعرف من تكون ومن اهلها .. يبه لازم نسأل عنها ..
فارس: انا بجيب لكم اسمها الكامل وانتوا سألوا عنها على راحتكم ..
ام فارس بشك: فارس انت تعرفها ؟
فارس: لا يمه .. قلت لج ماعرفها ..
ام فارس تمت اطالع فارس بشك .. فارس توتر وتم يفرك ايدينه ببعض ..
ام فارس: زين جيب لنا اسم البنت خل نسأل عنها .. وبعدين من وين بتجيب اسمها ؟
فارس بقلق: يمه .. احنا ريايل ولي بغينا الشي بنوصله ..
ام فارس: اي ي ي .. زين ..
فارس: لاتقولين لاحد كلش ..
ام فارس: ابوك لازم يدري ..
فارس: اي مو مشكله .. بس انا اقصد خواتي ولا عمتي ..
ام فارس: ليش يبه .. خل يفرحون ..
فارس: اول سألي عن البنت وبعدين بنقولهم ..
ام فارس: يه .. ماعندك سالفه .. لازم ابلغ يدتك وعمتك على الاقل ..
فارس: زين .. بس لاتجيبين طاري لمرت عمي ولا عمي ..
ام فارس مستغربه: ليش ؟
فارس: يمه لا تقولين وبس ..
ام فارس: زين زين .. حشى كلتنا ..
فارس: هههههه ..
ام فارس: زين قولي يبه ..
فارس: شو اقولج الغاليه .. آمريني ..
ام فارس: البنت حلوه ؟
فارس: قمر 14 ..
ام فارس: حليلك يا فارس .. زين تحسها شايفه خير ونعمه ؟
فارس " هااا .. هاي اللي كنت خايف منه " ..
فارس: مادري يمه .. انا بس شفتها .. شلون بعد نعرف ان الواحد شايف خير من نشوفه ؟
ام فارس: ما عليك من هالكلام .. احنا بنسأل ..
فارس: يمه ترا البنت انا شاريها .. لو من تكون ..
ام فارس " والله شكلك شايف لك شوف اي فارس .. الله يستر منك بس " ..
ام فارس: يصير خير ان شاءالله ..
فارس: زين عيل اترخص انا ..
ام فارس: وين يبه ؟
فارس: برجع الشركه اكمل شغلي ..
ام فارس مبتسمه: الله يوفقك وين ما تخطي يا يبه ..
فارس باس امه .. سلم عليها وطلع من البيت وهو فرحان بس متوتر شوي .. اتصل بمحمد يبشره بالخبر الحلو ..
محمد: حياتي ..
فارس: يا قلبي ..
محمد: هلاو الله بالهصوت ..
فارس: ماقدر استحمل بعدك عني .. انت وين ؟
محمد: والله فالدوام ..
فارس: اطله يا عيوني .. مشتاق لك موت ..
محمد: واااي عليك ماقدر استحمل .. اجيك طيران الحين ..
محمد وفارس: هههههههه ..
فارس: شلونك ولد العم ؟
محمد: الحمدلله .. اعلومك ؟
فارس: تمام تمام تمام ..
محمد: وليش تمام ثلاث مرات ؟
فارس: احم احم ..
محمد: لا تقول ..
فارس: توني طالع من عندها ..
محمد بوناسه: وااااااو .. زين شلون كانت ردة فعلها ..
فارس: بغت اطير من الوناسه .. فديتها وايد استانست ..
محمد: كووووول والله .. زين انت وينك الحين ؟
فارس: طالع من البيت بروح الشركه .. مرني المكتب ..
محمد: حاضرين الغالي ..
فارس: سلامي عليك .. الدوام عندك خرابيط ..
محمد: لو سمحت احترم نفسك .. انا مضبط مديري ..
فارس: حلاه عليك والله ..
محمد: عيل شلون عيل ..
فارس: شغل عدل ..
محمد: اعجبك ..
فارس: تعجبني بس مو وايد ..
محمد: رح لوع الله جبدك بس .. خلني اطلع واجي اجابل ويهك ..
فارس: غصبن عنك ..
محمد: صدقني مجبور ..
فارس ومحمد: ههههههه ..
محمد: يلا الغالي القاك قريب ..
سكر محمد وهو فرحان للخبريه اللي سمعها من فارس .. طلع من الدوام وراح عنده ..
ريما بنت سلمان خذت على الكل بسرعه فالبيت .. وخاصه الجوهره ..
ريما: عميمه جوجو ..
الجوهره: هلا حبيبتي ..
ريما: ليش بابا بالليل يطلع اصوات ؟
الجوهره عقدت حواجبها: اصوات ؟ شلون ؟
ريما: يعني كأنه يصيح .. اخاف يعوره شي مسكين
الجوهره " آيه عليك يا خالي .. يون من الهم اللي فيه .. الله يعينك يا خالي سلمان " ..
الجوهره: يمكن في شي يعوره .. انتي لو سمعتيه مره ثانيه .. قعديه من النوم ..
ريما: ان شاءالله ..
الجوهره: وين عمج يوسف ؟
ريما: راح مع صديقه ..
الجوهره: زين ابوج وينه ؟
ريما: بابا يتسبح ..
الجوهره: وهالثنين الواحد ما يعتمد عليهم .. مخلينج بروحج ..
ريما كانت اطالع الجوهره ومو فاهمه شي .. ابتسمت لها الجوهره .. مسكت يدها وراحوا فوق غرفة سلمان ..
ريما: عميمه جوجو
الجوهره: هلا عميمه ريما ..
ريما والجوهره: هههههه ..
الجوهره: قولي حبيبتي ..
ريما: انتي في بطنج بيبي ؟
الجوهره مبتسمه: اي حبيبتي ..
ريما: بنت ولا ولد ؟
الجوهره: مممممم .. ماعرف ..
قعدوا ثنتينهم على السرير يسولفون .. طلع سلمان من الحمام لاف الفوطه على خصره .. شافهم وابتسم ..
سلمان: الا جوجو هني اليوم ..
الجوهره عقدت حواجبها: الحين بسألك انت وذاك الهايت ..
سلمان مبتسم: من الهايت ؟
الجوهره: خالي .. شلون تخلون ريما بروحها فالبيت .؟!
سلمان: وين بروحها .. انا موجود ..
الجوهره: وين موجود يا خالي .. اول ما جيت لقيتها بروحها فالصاله ..
سلمان: وخير يعني .. انتي قلتي فالصاله مو فالشارع ..
الجوهره: يه خالي لو طلعت وانت ماتدري .. ولا حد دخل البيت ..
سلمان ضحك: ههههههه .. ليش مكبره الموضوع .. بعدين باب الحوش كان مسكر .. من بيدخل عليها ولا هي شاللي بيطلعها بروحها من غير ما تستأذن مني .. الدنيا بخير حبيبتي ..
الجوهره: لا تخلونها بروحها خالي ..
سلمان: زين زين .. ريما تعالي المج وحشتيني ..
ريما ابتسمت لابوها ونطت عليها .. حضنها سلمان وباسها على خدها .. ريما خذت المشط وتمت تمشط شعر سلمان الطويل .. سلمان كان لابس شورت قصير وفانيله بدون يدين .. ريما انتبهت لجرح كبير على ظهر سلمان ..
ريما: بابا شنو هاي ؟
سلمان: وين بابا ؟
ريما حطت يدها على العلامه اللي بظهر ابوها ..
ريما: هاي بابا ..
سلمان: طحت و انجرح ظهري ..
الجوهره: وين ؟
ريما: هني عميمه ..
الجوهره شافت العلامه اللي بظهر خالها واستغربت ..
الجوهره: شمنه يا خالي ؟
سلمان بهمس: يوم كنت بالسجن ..
الجوهره برقه: شلون استوت لك ؟
سلمان: من الضرب ..
الجوهره خنقتها العبره .. تمت تفحص العلامه وهي متأثره .. ريما كانت تقلد حركات الجوهره وتتفحص العلامه اللي بظهر ابوها .. باست ابوها على ظهره وحضنته .. سلمان استانس على حركتها ..
سلمان: زين ريما .. يلا سوي شعري ..
ريما: زين ..
ريما لمت شعر سلمان وربطته بالاستيك .. نزلت مع عمتها وابوها تحت .. تموا قاعدين فالصاله يسولفون ..
سلمان: اخبارج مع ابراهيم ؟
الجوهره مبتسمه: الحمدلله يا خالي .. مب مقصر معاي .. حاطني فوق راسه ..
سلمان: الله يوفقكم ان شاءالله .. اي شهر انتي الحين ؟
الجوهره: توني فالرابع ..
سلمان: الله يسهل عليج ..
الجوهره: تسلم يا خالي .. زين قولي خالي انت مو ناوي تتزوج ؟
سلمان: مادري والله .. الحين مافكر .. وبعدين اخاف على ريما ..
الجوهره باستغراب: شلون خايف عليها ؟
سلمان: اخاف اخذ وحده تلتها بعدين .. كفايه السنين اللي ابتعدت عنها ..
الجوهره: انا معاك في هاذي يا خالي .. بس لاتفقد الامل ..
سلمان: الحين مابي افكر فالموضوع .. انتي وهنوده موجودين .. وريما حبتكم وايد ..
سلمان حضن ريما وخنقته العبره .. الجوهره شافت الحزن في عيون خالها .. مسحت على راس ريما وراحت تسوي شاي و قهوه .. دخل يوسف وشاف سلمان يلعب مع ريما .. تم يطالعم ومستانس على لمتهم الحلوه ..
.............
يوسف: السلام عليكم ..
سلمان التفت مبتسم: عليكم السلام ورحمة الله .. هلا يوسف ..
يوسف: هلا خالي .. شولونج ريما ؟
ريما مبتسمه: الحمدلله .. وين رحت؟
يوسف: رحت مع صديقي ..
ريما: مره ثانيه عادي اروح معاكم؟
يوسف: انا ما عندي مشكله .. شوفي بابا لو وافق باخذج معاي ..
ريما التفت على ابوها مبتسمه .. مسكت يده وضغطت عليها ..
ريما: بابا عادي اروح مع عمي؟
سلمان باس يدها: عادي حبيبتي ..
يوسف: بكره بروح عند زوجتي وباخذج معاي .. عندهم بنت صغيره قدكج اسمها أسماء ..
ريما بفرح: واااااو واخيرا بلعب مع بنات قدي ..
يوسف وسلمان: ههههههه
دخلت الجوهره على ضحك سلمان و يوسف ..
الجوهره: ضحكونا معاكم .. سلمان قال للجوهره السالفه ..
الجوهره مبتسمه: حليلج يا ريما .. والله يحق لج تقولين هالكلما .. دام ابوج سلمان وعمج يوسف ..
ريما كانت اطالع الجوهره وهي مبتسمه ولا فاهمه شي ..
سلمان و يوسف: شقصدج ؟
الجوهره: ههههه .. يعني الشيخ يوسف طالع واشيخ سلمان داش يتسبح ..
سلمان: ردينا على هالسالفه ..
الجوهره: اي ردينا ..
يوسف: انتوا يالحريم وايد تحاتون ..
الجوهره: والله انتوا مادري شلون تفكرون .. يعني ماخفتوا على البنت يســ ...
يقاطعها سلمان: يا بنت الحلال البنت ان شاءالله ما عليها شر ..
الجوهره: انا باخذها عندي وبخليكم بروحكم ..
ريما: لا ابي بابا .. وحضنت ابوها ؟..
سلمان حضنها: ما بغيت اشم ريحتها تحرميني منها بعد .. ايه عليها والله .. هاذي ريما الغاليه
يوسف: بلا افلام انت وبنتك ..
الكل: هههههههه ..
تموا يسولفون مع بعض بفرح و وناسه .. هاليوم مر حلو على الكل .. واليوم اللي بعده واللي بعده .. مر اسبوع على كل الاحداث اللي عشنها .. من خطوة فارس لخطبة مناف .. و خوف مريم من المجهول .. ريما وسلمان .. فاطمه ويوسف ..
كل الحسن فعيونه .. في ويهه وحياه .. الناس ما يسونه لي عالي مستواه "
فارس مبتسم: فديت حبيبتي مناف .. خلاص قريب بنكون مع بعض ..
مناف باحراج: فديتك يا فارس ..
فارس: حبيبتي قولي لي ..
مناف: شاقولك حبيبي ؟
فارس: اول ما افتح عيوني الصبح شو بشوف ؟
مناف تستعبك: بتشوف شقف الغرفه ..
فارس: ههههههه .. منافو قولي لي ..
مناف: ههههه .. شاقولك ..
فارس: حبيبتي ابي اول مافتح عيوني اشوف ابتسامتج الحلوه ..
مناف: فديت قلبك يا فارس .. الله لا يحرمني منك .. الله يكتبنا من نصيب بعض .. ومابخليك تقعد وتنام الا اونت تشوفني ..
فارس: الله على هالكلام .. ابيج اليوم قبل بكره .. مشتاق لانفاسج .. مشتاق للمساتج .. مشتاق لحنانج .. مشتاق احط راسي بحضنج .. مشتاق ايدي تحضن ايدينج .. مشتاق لعيونج .. مشتاق لشوفج .. آه يا مناف .. انا باستخف والسبب انتي ..
مناف بدلع: فارس ..
فارس: يا ربي جننتني هالبنت .. وماتبيني استخف بعد ..
مناف " فديت جنونك يا فارس .. الله لا يحرمني منك " ..
فارس: كلمت امي عنج ..
مناف بصدمه: ها .. فارس شقلت لها ..
فارس: قلت لها ابي اتزوج مناف اجمل بنت فالعالم ..
مناف بخوف: فارس عاد قولي شقلت لها ؟ ليكون قلت لها اني اكلمك ؟
فارس: لا لا لا لا .. بس قلت لها ابي اتزوج بنت شفتها .. قالت لي خل نسأل عنها اول .. وعطتها اسمج .. الحين امي تسوي تحريتها وبترد علي ..
مناف: شلون ؟
فارس: بتسأل عنج وعن اهلج ..
مناف: اي ي ي ..
مناف " بس لو فارس تقدم لي من بيسأل عنه ؟ من عندي بالهدنيا يسأل لي عنه ؟ خالاتي ما يعترفون فينا .. ياربي شاسوي؟ " ..
فارس: حياتي ..
مناف: هلا يا قلبي ..
فارس: والله اني انسان محظوظ ..
مناف: ليش ؟
فارس مبتسم: لاني قلبج ..
مناف بفرح: انت قلبي وكلي يا فارس ..
فارس: حياتي والله ..
مناف: امس انت مكلم فيصل ؟
فارس: اي .. ليش ؟
مناف: وين بتروحون ؟
فارس: بنروح بنصيع مني مناك ..
مناف: وين بتهيتون ؟
فارس: يمكن نروح ساحة الاستعراض ..
مناف: شنو يعني ساحة الاستعراض ؟
فارس: هاي كلام كبار توج صغيره عليه ..
مناف: عااااد
فارس: لا ثمووود ..
مناف و فارس: هههههه ..
تم فارس يسولف مع مناف ويلعوزها .. بوفارس طق عليه الباب .. فارس سكر من مناف وراح يفتح الباب لابوه ..
فارس مبتسم: هلا يبه .. حياك
بوفارس: سكر الباب وراك ..
فارس باستغراب: ان شاءالله ..
دخل بوفارس الغرفه وقعد على الكرسي وجابل التلفزيون .. فارس قعد على الكرسي الثاني و انتظر ابوه يتكلم ..
بوفارس: فارس امس امك كلمتني ..
فارس مبتسم: عن شو يبه ؟
بوفارس: عن موضوع الزواج ..
فارس رفع حواجبه: زين ..
بوفارس: امك .. نزل راسه وتم ساكت ..
فارس عقد حواجبه: شو فيها امي ؟
بوفارس: يا فارس هالبنت اللي انت تبيها .. وسكت مره ثانيه ..
فارس: شو فيها البنت اللي ابيها ؟
بوفارس طالع فارس وابتسم ..
فارس: يبه تكلم طيرت قلبي ..
بوفارس: هالبنت يا فارس .. وطقت عليهم ام فارس الباب ..
فارس: لحظه يبه اشوف امي ..
بوفارس: زين ..
راح فارس فتح الباب حق امه .. دخلت ام فارس واستغربت وجود بوفارس ..
ام فارس مبتسمه: وانا اقول وينك ..
بوفارس: توني جاي عند فارس ..
ام فارس: فارس ناد فطيم الله يرضى عليك ..
فارس: ان شاءالله الغاليه ..
طلع فارس من الغرفه ينادي فاطمه
" تحسون خربت عليكم السالفه .. تبون تعرفون بوفارس شو يبي يقول لفارس صح؟ .. هههههههه "
فاطمه كانت في عالم يوسف ..
فاطمه: تصدق حبيبي ..
يوسف: قولي يا قلبي ..
فاطمه: فكرة ان ما نسوي عرس راقة لي ..
يوسف: انا اقول لو تجهزين نفسج خلال شهرين ثلاث ..
فاطمه: ممممممم .. والله فكره ..
يوسف: توني بادي في ترتيب البيت .. العمال ليل نهار يشتغلون عندنا فالبيت ..
فاطمه: يعني متى بيجهز البيت ؟
يوسف: يبيله بالضبط شهر ونص .. يعني بعد ما تجهزين بيكون البيت خالص بس نتظر نورج يالغاليه ..
فاطمه عضت شفتها: فديت قلبك والله .. كفايه نورك انت ..
يوسف: حياتي ..
فاطمه: قول حبيبي ..
يوسف: متى نروح نختار اثاث ؟
فاطمه: مادري عنك حبيبي .. بس للحين ما خلص البيت
يوسف: مو شرط .. نروح نشوف الاثاث .. وبعدين نختار اول ما تخلص الغرفه الرئيسيه .. احم غرفتنا ..
فاطمه: فديتك والله .. بس خالك وبنته وين بيتمون ؟
يوسف: في غرفة تحت خذها خالي وريما معاه .. بعد ما يخلصون من فوق .. بيسكرون الميلس الداخلي على داخل البيت وبيسون غرفتين كبار بحماماتهم .. وحده حق خالي والثانيه حق ريما .. وبنسوي ميلس خارجي للشباب ..
فاطمه: اهااا .. والله ترتيب ..
يوسف: فديتج انتي والله .. زين ما قلتي لي متى نروح ؟
فاطمه: مادري عنك ..
يوسف: متى جامعتكم ؟
فاطمه: يبيلنا بعد 3 اسابيع على الدوام ..
يوسف: حلو .. خل نستغل الوقت ونطلع نشوف اثاث ..
فاطمه: ما يهمك .. بس سمعت ان يمكن نروح مكه ..
يوسف: والله ..
فاطمه: هالكلام سمعته من اسبوع .. مادري عنهم للحين ما قرروا ..
يوسف: حلو .. بجي معاكم .. في خاطري اعتمر ..
فاطمه: الله يكتب لك ان شاءالله ..
يوسف: وياج يالغاليه ..
فاطمه: حبيبي ..
يوسف: حياتي انتي قولي ..
فاطمه: شو رايك توديني وتاخذ لي ايس كريم ..
يوسف: حاضرين لج الغاليه .. من عيوني الثنتين .. لبسي بامرج الحين ..
فاطمه: زين بس بروح اقول لابوي انك بتمرني ..
يوسف: انتظر اتصالج حياتي ..
فاطمه: زين حبيبي .. مع السلامه ..
يوسف: الله وياج ..
سكرت من يوسف وطلعت من الغرفه رايحه غرفة امها وابوها .. وهي طالعه ناداها فارس ..
فارس: فطيم ..
فاطمه التفت عليه مبتسمه: هلا فارس ..
فارس: تعالي امي تبيج بغرفتي ..
فاطمه: ان شاءالله .. بس اول بقول لابوي شي ..
فارس: ابوي بغرفتي بعد ..
فاطمه: زين يلا عيل ..
راحت ورا فارس ودخلوا الغرفه ..
بوفارس مبتسم: هلا وغلا ..
فاطمه باست راس ابوها وقعدت جنبه ..
فاطمه: شلونك يبه ؟
بوفارس: الحمدلله ..
ام فارس: زين يا فطيم .. اخوج فارس قرر انه يتزوج ..
فاطمه بوناسه: والله .. مبروك يا فارس ..
فارس مبتسم: الله يبارك فيج ..
فاطمه: عاد انا في باله وحده وبصراحه تناسب فارس .. جميله ومأدبه واللي يشوفها تدخل قلبه ..
ام فارس: لا يمه اخوج في بال
ه وحده واحنا بنسأل عنها ..
فاطمه بخيبة امل: والله .. ولوت بوزها .. زين من تكون ؟ و وين شفتها ؟
بوفارس: شافها فالمستشفى .. وتكون بنت فلان الفلاني ..
فاطمه " ليكون هاي البنت اللي خذت قلب اخوي .. بس ليش يقول انه شافها فالمستشفى ؟ "
بوفارس: ما مر عليج هالاسم من قبل ؟
فاطمه: لا والله .. زين البنت شو اسمها ؟
فارس " تعالوا شوفوا سمها محفور بقلبي " ..
فارس: ماعرف اسمها .. بس اعرف اسم ابوها وعيلتها ..
فاطمه: اهاا ..
ام فارس: انا سألت كم وحده اعرفهم وماعرفوا من بيته هذول ..
فارس " الله يستر من امي بس " ..
بوفارس: بنسأل عن ابوها احنا .. وبنجيب لكم الخبر هاليومين ..
ام فارس: ان شاءالله ..
تموا فتره يناقشون موضوع زواج فارس .. وبوفارس يطالع فارس وعيونه مليانه كلام .. فاطمه استأذنت من ابوها واخوها .. عشان تروح مع يوسف ..
فاطمه: بابا ..
بوفارس: عيونه انتي ..
فاطمه مبتسمه: فديت عيونك .. بيمر علي يوسف شوي وبنطلع ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك