رواية نهاية حبك اعدامي -133
فارس قعد جنب عمه: بارك الله فيك يا محمد رتب يبه ..
بومحمد التفت على فارس: صج والله .. قم انت بعد ..
نقز فارس من الكرسي ورجع المخدات على الكراسي ويا محمد .. اما محمد كان يضحك على فارس واستعباطه اللي ما مشى على عمه .. بعد ما رتبوا قعدوا جنب بومحمد اللي كان يراقبهم وهم يرتبون ..
بومحمد: ميانين انتوا ؟
فارس: يا عمي من دخلت وانت تهزئ فينا .. حمودي بوعيال .. وانا ريال ..
محمد: انت قريب بتتزوج ان شاءالله ..
فارس ابتسم بحزن ومارد ..
بومحمد: فارس يبه شو صار على موضوع زواجك ؟
فارس: تأجل شوي لين بعد عرس فطيم ..
بومحمد هز راسه: ايوه .. زين وليش التأجيل .. عجلوا يبه ..
محمد " آه لو تدري بس " ..
فارس: مشغولين مع تجهيزات العرس ..
بومحمد: حط يده على ريول فارس: عجل يبه ..
فارس نزل راسه: ان شاءالله ..
بومحمد: زين يالميانين ما قلتوا لي .. شو هاللي سويتوه من شوي .. على بالكم اني نسيت الموضوع ..
فارس: بل عمي .. ما تخليها في خاطرك ..
بومحمد:بلا هذره زايده ..
محمد: يبه دخلوا علينا اسماء وفهد وقلنا نلاعبهم شوي ..
اسماء تمت اطالع محمد باستغراب .. ومحمد مبتسم لها لانه حس انها بتقول شي ..
اسماء: بابا .. انا سمعت واحد يصرخ وناديت فهد ودخلنا هني .. ولقينا محمد يضرب فارس بالمخده .. واول ماشافونا لعبونا وياهم ..
بومحمد تم يطالع فارس ومحمد .. الشباب نزلوا روسهم ..
محمد: احم ..
بومحمد: وجع .. يهال انتوا .. لا وتكذبون بعد ؟
فارس: لا عمي احنا ما كذبنا ..
بومحمد يقاطعه: صج عاد ..
محمد: استهدي بالله الغالي ..
بومحمد: ريايل شكبركم تكذبون ..
محمد: الله يهديك الغالي ..
بومحمد: ولا كمله خلاص ..
فارس " شو فيه عمي يهزئ؟ "
بومحمد شل اسماء وفهد تعلق على ظهره وطلع عنهم من غير ما يتكلم .. محمد وفارس التفتوا على بعض باستغراب ..
فارس: ابيه شو فيه ابوك ؟
محمد: شدراني .. شكله معصب وحط حرته فينا ..
محمد وفارس: هههههههههههه ..
تموا يضحكون على بومحمد واسلوبه ..
فارس: ههههههه .. والله ابوك اليوم حالته صعبه ..
محمد: ههههههه .. مادري شو سالفته اليوم ..
فارس: نتف ويوهنا ..
فارس: قم نطلع ليرجع ابوك ويصفقنا ..
محمد: اي يلا بسرعه ..
طلعوا من الميلس وركبوا سيارة فارس وهم يضحكون على الموقف اللي صار لهم .. طلعوا من بيت بومحمد متجهين الى الشيشه ..
محمد: اخبارك فروس ؟
فارس: الحمدلله ..
محمد: اخبارها ؟
فارس يتهرب: كلمت سلمان ؟
محمد: اهم شي اللي يغير الموضوع ..
فارس التفت على محمد وابتسم له .. صد ومارد على محمد .. كملوا دربهم للشيشه بكل هدوء .. وصلوا الشيشه وسلموا على الشباب وتجمعوا كلهم ..
خالد: حيالله بوالفوارس ..
فارس مبتسم: الله يحيك يالنسيب .. شحالك الغالي ؟
خالد مبتسم: طيب طاب حالك ..
سلمان: شحالكم يا شباب ؟
محمد وفارس: تمام التمام ..
فارس سحب كرسي وقعد بين سلمان وعلي .. التفت على سلمان وخذ الزقاره اللي بيده .. خذ له نفس ورجع الزقاره حق سلمان .. محمد استغرب حركة فارس .. تم يطالعه وفارس متجاهل نظرات محمد له ..
فاضل: شباب يبيله العزبه ..
يوسف: اي والله يبيله ..
علي وعبدالعزيز: اي والله ..
فاضل: شو رايكم شباب ؟
فارس: حر يا جماعه ؟
فاضل: حلاته .. زين في بركه تبرد علينا شوي ..
عبدالعزيز: وفي مكيفات بعد ..
محمد: بس نروح بروحنا شباب ..
خالد: حلو ليش لأ ..
تموا الشباب يتناقشون بموضوع العزبه ويرتبون للرحله ..
فارس يكلم سلمان: تونست بنتك ذاك اليوم ؟
سلمان مبتسم: اي وايد .. حبت الخيول مع انها كانت وايد خايفه منها ..
فارس: ليش تخاف من الخيول .؟
سلمان: لان في امريكا صاحبي الامريكي طاح من الخيل جدامها .. و خافت من الخيول شوي ..
فارس: اها ..
سلمان: بس تونست وايد على البانشي بهدلتها عليه ..
فارس: ههههه .. زين رحتوا بروحكم انت وياها ؟
سلمان: اي بروحنا ..
فارس: ما راحوا اهلك معاك ؟
سلمان: بنات اختي مرتبطين بازواجهم .. ويوسف وصلنا ورجع ..
فارس: ليش ما قعد معاكم يوسف ؟
سلمان: انا طردته ..
فارس: ههههههه .. مسكين ليش ؟
سلمان: مطفر في ريما .. دوم يلعوزها ويصيحها ..
فارس: افا عليك بيجيب عيال .. وانت وريما تولوهم ..
سلمان: ذاك اليوم قلت له هالكلام .. حشرني ..
فارس وسلمان: ههههههههه ..
محمد قرب منهم: احم .. what did I miss?
فارس اونه يدلع: ولا شي ..
سلمان: هههههه
محمد: فديت اللي يدلعون ..
فارس: وخر مناك ..
محمد: يا قلبي انته .. اموت فالدلع والله ..
سلمان: حلاه عليكم يا عصافير الحب انتوا ..
محمد وفارس: ههههههه ..
سلمان: ها اتفقتوا ؟
يوسف: ايوه اتفقنا .. بس بشرط ما تجيب بنتك السنداره ..
سلمان: هاذي بتوصل قبلك ..
فارس: هههههه ..
يوسف: بنشوف ..
علي: فارس بتجيب عبود وفيصل ..
فارس ابتسم: ان شاءالله ..
سلمان: بتباتون ؟
فاضل: بإذن الله ..
سلمان: انا ماعتقد ..
فارس: افا .. ليش ؟
سلمان: بنتي بتكون معانا ..
محمد: زين نرجعها المغرب ونكمل السهره ..
سلمان: مادري والله .. سالفه الا رايحين راجعين ..
سلمان: يمكن ما جيبها .. كلنا ريايل مع من بتم ..
محمد: اختي اسماء بتكون موجوده .. هي تحب بنتك وايد .. وبنرجعهم مع بعض ..
يوسف: لا تجيبها خلها تولي ..
سلمان: وايد يغار من بنتي ..
يوسف: من حلاتها اغار منها ام كشه ..
سلمان: ههااااي .. في احلامك توصل مواصيل كشتها ..
يوسف: اول مره اشوف وحده تقوم من النوم وراسها صاير مرتين فوق بعض ..
فاضل و علي و عبدالعزيز: ههههههه ..
سلمان: فديت شعرها ..
فارس: زين خلاص اتفقنا ..
سلمان: بإذن الله ..
فاضل: شباب فضوا نفسكم حق الويك اند ..
عبدالعزيز: يا سلام .. جاهزين ..
علي: بوالزوز .. لاتنسى اللي اتفقنا عيه ..
عبدالعزيز ابتسم بخبث: ولا يهمك افا عليك ..
فاضل مبتسم: كل شي جاهز ..
علي: سلامي عليكم ..
يوسف: شسالفه ؟
علي: اشيك اذا رتبوا الشغل هناك ..
يوسف: لا ما بنقصر احنا ان شاءالله ..
علي: انت ما عليك زود .. انت اللي المفروض ما تسوي شي كلش ..
يوسف: لا عيب ما يصير جي .
عبدالعزيز وفاضل طالعوا بعض وابتسموا بخبث ..
علي: لا الحبيب .. انت وراك عرس ولازم تضبط امورك .. خلها علينا ..
يوسف مبتسم: ما تقصرون يا عيال العم ..
عبدالعزيز " والله ماتدري شو اللي ينتظرك يا بوخليفه .. "
تموا الشباب سهرتهم لين وقت متأخر .. محمد وفارس استأذنوا وراح محمد يوصل فارس لشقته .. وهم فالدرب محمد كلم فارس عن حركة الزقاره ..
محمد: فروس ..
فارس يلعب في شنبه: هلا ..
محمد: ليش دخنت ؟
فارس ابتسم: بس ..
محمد: فروس انت مب مجبور ادخن ؟
فارس: و مب مجبور مادخن ..
محمد: زين ليش دخنت ؟ وشو اللذه اللي عطتك اياها الزقاره ؟
فارس: ليش دخنت .. والله جات على بالي ودخنت .. واللذه اللي خذتها من الزقاره .. ولاشي .. مافيها لذه ..
محمد: زين ليش تسوي جي ؟
فارس: حمود انت شايفني كل يوم ادخن ؟
محمد: لأ ..
فارس: عيل فضها سيره الله يلعن اليهود ..
محمد: ان شاءالله ..
سكتوا ثنينهم وكملوا دربهم لشقة فارس .. نزل محمد من سيارة فارس وركب سيارته .. ودع فارس وراح البيت وهو يفكر في كلام فارس ..
محمد " فروس بدى يتمرد .. ليش يسوي بنفسه جي ؟ استسلم ولا شو سالفته ؟ " تم محمد يفكر في فارس ويحاتيه .. اما فارس دخل الشقه واتصل بمناف ..
مناف: هلا ..
فارس: قلبه انتي ..
مناف مبتسمه: كل هاي شوي وبتتصل ؟
فارس: حياته انتي ..
مناف: ليش تأخرت حبيبي ؟
فارس: عمره انتي ..
مناف: عااااااااد فارس رد علي ..
فارس: فارس بشحمه ولحمه تحت امرج يا اميرت البنات وشيختهم كلهم ..
مناف انحرجت وماردت على فارس ..
فارس: اموت في خجلها يا ناس .. احبها وربي احبها ..
مناف عضت شفتها: زين شسويت اليوم ؟
فارس: مع الشباب .. وانتي شو سويتي ؟
مناف: كنت اراجع دروسي .. مابقى لي الا امتحانين وبنخلص هالكورس ..
فارس: الله يوفقج حياتي ..
مناف: وياك حبيبي ..
فارس: فيصل كلم امج عن العزبه ؟
مناف: اي ..
فارس: وامج وافقت ؟
مناف مبتسمه: وهي تقدر ترد فيصل وانت فالسالفه ..
فارس ابتسم: حليلها امج .. احسن الحين ؟
مناف تنهدت: لا والله .. احسها كل يوم تتردى حالتها ..
فارس: انتي ما تقعدين معاها ؟
مناف: بلا اقعد معاها .. اخذ كتبي واقعد معاهم فالحوش ولا الصاله .. بس امي تكون ساكته ..
فارس: حاولي تسوين لها جو فالبيت ..
مناف: احاول يا فارس .. بس هي ما تتكلم .. لما احاول افتح معاها موضوع .. ترد على قد السؤال ..
فارس: الله يصبرها ..
مناف: ان شاءالله ..
تموا ساكتين فتره .. مناف خذت نفس عميق وتكلمت ..
مناف: فارس ..
فارس: عمره انتي ..
مناف: ممكن اطلب منك طلب ؟
فارس مبتسم: كلي لج يا مناف ..
مناف: بعد اسبوعين عرس وحده من صديقاتي ..
فارس: زين ..
مناف: و وانا وعدتها اني بحضر بعد ما استأذنت من امي ..
فارس: زين ..
مناف: ممكن اطرش لي السايق ؟
فارس: فديت قلبج والله .. ما طلبتي شي ..
مناف: ما تقصر فديت قلبك ..
فارس تنهد: آآآه .. ما بغت تطلع منج هالكلمه ..
مناف ابتسمت: عااااد .
فارس: باستخف من دلعها يا ناس ..
مناف: زين ممممممم .. ابي السايق ينتظرني لاني ما راح اطول هناك ..
فارس: ولا يهمج ..
مناف: بس بسلم عليها وبطلع ..
فارس: تحت امرج احنا ..
مناف: مشكور حبيبي ..
فارس: زين امج بتروح معاج ؟
مناف: اي لازم .. مستحيل تخليني بروحي ..
فارس: واخوانج ؟
مناف: هممممم .. بخليهم معاك اذا مافيها احراج ؟
فارس: فديت قلبج .. فعيوني فيصل وعبود .. هذول اخواني الصغار ..
مناف: والله يا فارس ماعرف شاقولك ..
فارس: ما بينا هالكلام يا قلبه ..
مناف: زين فديتك .. الحين بروح اكمل دراستي ..
فارس: زين حياتي .. ركزي في دراستج وشدي حيلج ..
مناف: ان شاءالله .. يلا مع السلامه ..
فارس: الله يحفظج ..
سكر فارس من مناف وتم يفكر فيها ..
فارس " آه يا مناف .. احسج تتسألين عن سبب سكوتي عن الموضوع مره وحده .. الله يستر .. بس احنا لبعض يا قلب مناف " ..
اما مناف فتحت كتبها وتمت تذاكر بتركيز ..
مر هالاسبوع بسلام وكل البنات خلصوا امتحاناتهم .. اليوم هو الخميس .. والشباب كلهم تجمعوا في بيت بوفارس الا فارس .. اتصل له محمد ..
محمد: وينك حبيبي ؟
فارس: موجود ..
محمد: وين موجود ؟ كلنا في بيتكم ..
فارس: زين خلصوا ونتلاقى عند المحطه .. ولا بسبقكم على العزبه ..
محمد: شو هالكلام فروس .. تعال هني زين ..
فارس بكل برود: لأ ..
محمد هز راسه: الله يهديك يا فارس ..
فارس: زين جهزتوا لكل شي ؟
محمد: اي ..
فارس: حلو .. عيل بمر على فيصل وعبود وبسبقكم على هناك ..
محمد: اللي تشوفه ..
فارس: سلام ..
محمد: الله وياك ..
محمد " الله يستر منك يا فارس " ..
فارس اتجه لبيت مناف .. اتصل بفيصل اول ما وصل عند بيتهم ..
فارس: ها فيصل يبه جهزتوا ؟
فيصل مبتسم: اي جاهزين .. بس امي تبي تكلمك .. ممكن تنزل ..
فارس: ان شاءالله ..
سكر فارس من فيصل وفصخ الكبوس اللي كان لابسها .. غلغل اصابعه في شعره وطالع نفسه فالمرايه .. نزل من السياره و وقف على يمين الباب ينتظر ام مناف .. طلع له عبدالله وهو يركض ..
................
الجزء الاخير
عبدالله بفرح: ههاااااااااااااي ..
فارس فتح له ذراعينه مبتسم: هلاااااا ..
عبدالله حضن فارس وباسه .. فارس قرص خدود عبدالله ونزله ..
فارس: شو اخبارك عبود ؟
عبدالله: طيب .. يلا متى بنروح ؟
فارس مبتسم: اصبر شوي ..
عبدالله: زين .. بحط شنطتي فالسياره ..
فارس: بارك الله فيك ..
طلع فيصل عند الباب وامه وراه ..
ام مناف: هلا فارس يبه ..
فارس منزل راسه: السلام عليكم ..
ام مناف: عليكم السلام .. شلونك يبه ؟
فارس رفع راسه مبتسم: طيب الله يسلمج .. اعلومج انتي ؟
ام فارس طالعت فارس باستغراب: الحمدلله يبه ..
فارس ابتسم لها والتفت صوب عبدالله اللي كان فالسياره .. اما ام مناف فكانت تتفكر في فارس .. اول مره تحط عيونها بعيونه ..
ام مناف خذت نفس: فارس يبه ما وصيك على عيالي ..
فارس: اخواني فعيوني يا ام فيصل ..
ام مناف بحزن: بارك الله فيك يبه .. الله يخليك لاهلك ..
فارس حس بالحزن في صوت ام مناف ..
فارس: الله يسلمج يمه ..
ام مناف موجهه كلامها لفيصل: فيصل لا تلعوزون الريال ..
فارس: يمه انا اخوهم الكبير .. اعتبريني ولدج ..
ام مناف مبتسمه: ولا يهمك يبه .. يا فيصل يبه لاتلعوزون اخوكم ..
فيصل مبتسم: ان شاءالله ..
فارس وايد استانس على كلام ام فارس .. فيصل سلم على امه وراح السياره .. ام مناف نادت على عبدالله ..
ام مناف: عبود .. تعال سلم علي يبه ..
عبدالله فتح الدريشه وطلع راسه: مووووح .. بس سلمت عليج ..
ام مناف ضحكت على ولدها: فديت قلبك انته .. الله يحفظكم ..
فارس: تآمريني على شي يمه ؟
ام مناف: تحملوا بانفسكم يبه ..
فارس: ان شاءالله ..
ركب فارس السياره وحركوا متجهين الى العزبه ..
الشباب في بيت بوفارس رتبوا امورهم .. سلمان ومحمد ركبوا سياره وحده وطلعوا .. عبدالعزيز وعلي ويوسف وفاضل ركبوا سياره وحده ولحقوهم .. بس قبل ما يطلعون ام فارس نادت على عبدالعزيز ..
ام فارس: تحملوا باعماركم يبه ..
عبدالعزيز: ان شاءالله يمه ..
ام فارس بتردد: ممممم .. وسكتت
عبدالعزيز: شو فيج يمه ؟
ام فارس: مممممم .. اخوك وينه ؟
عبدالعزيز: جرك قبلنا ..
ام فارس: اي .. زين تحملوا بنفسكم يبه ..
عبدالعزيز باس امه على راسها وطلع .. امه عورت قلبه ..
عبدالعزيز " الله يهديكم .. مسكينه ام قلبها على فارس .. ادري ان فارس مشتاق لامي .. بس ثنينهم معاندين ويكابرون .. لاحول ولا قوة الا بالله"
ركب عبدالعزيز السياره مع الشباب .. علي اللي كان يسوق وعبدالعزيز قعد جنبه .. فاضل ويوسف كانوا قاعدين ورا .. علي شغل الراديوا وطول على الصوت حده .. ارتبشوا الشباب وطلعوا من بيت بوفارس متجهين للعزبه ..
كانت الساعه 12 لما وصلوا العزبه .. الصبيان كانوا مجهزين الغدا للشباب .. تغدوا وبعدين كلن اتجه لنشاطه .. فارس ركب الخيل وراح برا العزبه بروحه .. محمد وسلمان كانوا فالاستراحه يطالعون التلفزيون ويشيشون .. اسماء وريما كانوا يسبحون .. فيصل وجاسم وسلطان وفهد كانوا يلعبون بلاي ستيشن داخل .. يوسف كان يتمشى ويسولف مع فاطمه .. علي و عبدالعزيز وفاضل كانت عندهم شنطه سوده وكانوا يتكلمون بهدوء وحذر وكان عبدالله معاهم .. كانوا ناوين ليوسف نيه مو حلوه .. مرت الساعات والشباب على حالهم وكلن بنشاطه .. فارس رجع العزبه .. ورجع الخيل الاسطبل .. محمد اول ما شافه راح له ..
محمد: وين كنت ؟
فارس التفت مبتسم: كنت اتمشى ..
محمد: اهاا ..
فارس: شو سويتوا؟
محمد: البنات متنقعين فالماي من وصلنا .. والشباب داخل ولا تحركوا .. بس تدري شاك في اخوك ..
فارس رفع حاجب: بوسعود ؟
محمد: اي ..
فارس: في شو ؟
محمد: هو وعلوه وفضول وراهم شي ..
فارس ابتسم: ليش لأ .. كل شي جايز ..
محمد: كل شي اتوقعه منهم ..
فارس: تصدق اني جوعان ..
محمد: فروس شو فيك ؟ الساعه 1 متغدي ..
فارس: ضاربني جوع مب طبيعي .. مع اني الحمدلله تغديت عدل ..
محمد: زين تعال كل لك حاجه ..
فارس: بخلي الصبي يسوي لي سندويش ..
راحوا عند الاستراحه وفارس طاحت عينه على فاضل وهو يكلم علي .. اللي اول ما شاف فارس سكت .. فارس ومحمد طالعوا بعض ورفعوا حاجب ..
فاضل بهمس: بعدين بعدين ..
تجمعوا الشباب كلهم فالاستراحه وتموا يسولفون لين أذن المغرب .. صلوا جماعه وراحوا داخل عشان يلعبون بلاي ستيشن .. على الساعه 8 سلمان ومحمد خذوا اسماء وريما ورجعوهم البيت .. في هالاثناء كانوا الشباب يتحدون بعض في العزبه على البلاي ستيشن ..
في بيت بوفارس مريم وايمان والريم ومريم قاعدين مع بعض في غرفة فاطمه ..
ايمان: مريوم المصمم خلص فستانج ؟
مريم: اي من اسبوع استلمته ..
ايمان: من ورانا ؟
مريم: ليش؟
ايمان: امس تقولين ما خلصه لج ..
يتبع ,,,
اللهم لك الحمد حتى ترضى وإذا رضيت وبعد الرضى ,,, اضف تعليقك