رواية نهاية حبك اعدامي -132
راحت المطبخ وسوت عصير برتقال لفارس .. عبدالله نادا فيصل عشان يشل العصير .. خذ فيصل العصير وراح عند السياره ..
عبدالله: ابي عصير ..
فيصل: روح داخل خذ لك ..
فارس: خذ يبه اشرب معاي ..
عبدالله: لا بروح حق مناف بقولها تسوي لي نفسك ..
فارس " فديت مناف اللي سوت لي هالعصير والله .. ليتني هالكاس اللي لمسته بيدينها " ..
فيصل: خلصنا زين روح ..
عبدالله: اف منك ..
نزل وهو معصب .. فارس التفت على فيصل ..
فارس: شو فيك تزف اخوك جي .؟
فيصل: لانه يبط الجبد ..
فارس: شو مسوي ؟
فيصل: يعني فشلنا الحين طالع بصروال وفانيله ..
فارس مبتسم: زين شو فيها عادي ..
فيصل: لا عيب المفروض يحترمك شلون يستقبلك جي ..
فارس: عدل كلامك .. بس ليش تهاوشه انت ..؟
فيصل سكت ومارد على فارس .. فارس كان حاس ان فيصل في قلبه شي ..
فارس: في خاطرك شي ؟
فيصل طالع صوب الدريشه و سرح .. فارس استغرب .. توه بيسأله مره ثانيه الا عبدالله داخل عليهم وبيده العصير
عبدالله: ههااااااي .. مناف سوت لي نفس عصيرك ..
فارس مبتسم: بالعافيه .. يلا نحرك شباب ..
عبدالله بوناسه: اي يلا ..
فيصل فضل الصمت .. حرك فارس من فريجهم وراحوا يتمشون فالشوارع .. فيصل وعبدالله تموا يسولفون .. أذن العشاء ونزلوا المسيد يصلون .. راحوا يتعشون في مطعم على دربهم .. كل منهم طلب له طبق وتموا يسولفون ..
.................
فارس: شو اخباركم مع المدارس؟
عبدالله: وناسه ..
فيصل: ملل ..
فارس: ليش ملل ؟
فيصل: دراسه و واجبات ..
فارس: هههههه .. توك بأول المشوار ..
فيصل: ادري ..
فارس: جدامك درب ..
عبدالله: وانا ؟
فيصل بعصبيه: عبود يالملقوف اسكت ..
عبدالله طالع اخوه باحراج وامتلت عيونه بالدموع .. نزل راسه وتم يشبك اصابعه ببعض .. فارس استغرب من اسلوب فيصل الجاف مع اخوه .. حب انه يغير الجو شوي ..
فارس: شو رايكم نروح العزبه نهاية هالاسبوع ؟
عبدالله ببرأه: الله وناسه .. اي خل نروح ..
فيصل: اي وناسه ..
فارس: خلاص ان شاءالله بنروح والشباب كلهم بيكونون هناك ..
عبدالله: علي بعد بيجي ؟
فارس مبتسم: اي لازم ..
عبدالله: الله بنركب البانشي ؟
فارس: ان شاءالله ..
فيصل: احمد وسلطان وجاسم بيجون بعد ؟
فارس: هذول اول ناس هناك ..
فيصل: احلى شي والله ..
فارس: اول ما ترجع البيت كل
م امك و استأذن منها ..
فيصل: ان شاءالله ..
وصل طلبهم وكل منهم كل بهدوء وأدب .. خلصوا وفارس وصلهم البيت .. فالدرب عبدالله نام .. فارس استغل الفرصه وتكلم مع فيصل ..
فارس: فيصل ..
فيصل مبتسم: هلا ..
فارس: شو فيك ؟
فيصل: مافيني شي ..
فارس: ليش صاير عصبي جي ؟ ماخبرك تزف عبود جي ولا تفشله جي ؟
فيصل نزل راسه: مسكين عبود يكسر الخاطر ..
فارس: ليش ؟
فيصل: ازفه ولا يزعل مني ..
فارس: بس انت ليش تسوي جي ؟ شو اللي مضايقك ؟
فيصل: ولا شي ..
سكت فيصل والتفت صوب الدريشه .. فارس سكت عنه وخلاه على راحته .. فيصل خذ نفس عميق والتفت على فارس ..
فيصل: فارس ممكن آخذ رايك بشي ؟
فارس: تفضل ..
فيصل: انت اكبر اخوانك صح ؟
فارس مستغرب: اي نعم انا اكبرهم ..
فيصل: زين تخيل ان عندك اخت اكبر منك وتحترمها وايد ..
فارس: زين ..
فيصل: تخيل انك في يوم شفتها تتكلم فالتلفون فالليل .. شبتسوي ؟
فارس دارت فيه الدنيا من سمع هالكلام .. تلخبط وماعرف يرد على فيصل .. تم ساكت فتره .. والافكار تروح وتجي عليه ..
فارس: متى فالليل يعني ؟
فيصل: وقت متأخر يعني الساعه 1 فالليل ؟
فارس بتوتر: مممممم .. اول شي لازم احكم عقلي ..
فيصل يقاطعه: لحظه ما فهمت قصدي ..
فارس: تفضل قول ..
فيصل: يعني اختك تكون اكبر منك بوايد .. وماتقدر تقولها شي لانك اصغر منها .. بس تنصدم انها تتكلم فالليل بالتلفون ..
فارس زاد توتره وحس انه مايشوف الشارع جدامه ..
فارس: والله اول شي ما بفكر في اختي تفكير سيء ..
فيصل: شلون ؟
فارس: يعني لو اني شفتها تتكلم فالليل ما بقول تكلم واحد .. لازم احط احتمالات و احسن النيه ..
فيصل: زين شلون ..
فارس: اختي اللي اكبر مني اكيد بحترمها .. اول شي اسويه اني اكلمها بكل هدوء .. اقولها والله يا فلانه انا شفتج تتكلمين فالتلفون فالليل .. واستغربت من هالمكالمه .. شو سببها وهل كانت ضروريه بحيث انج تكلمتي هالوقت ؟ انتظر ردها وبردها اقرر شو بسوي ..
فيصل: زين لو كذبت عليك ؟
فارس: دام انا اعرف اختي واعرف تربيتها بعرف لو كذبت او لأ ..
فيصل سكت مره ثانيه وصد صوب الدريشه .. فارس تم يفكر ويحاتي ..
فارس: زين ليش سألتني هالسؤال يا فيصل ؟
فيصل: ها .. لا واحد من ربعي صارت له هالسالفه وسألني شيسوي .. عاد انت اخوي الكبير وانا احب اقلدك في كل شي .. فقلت اسألك لانك عاقل وتعرف تتصرف ..
فارس تنفس بعمق: زين رفيجك ذي شو اللي صار له بالضبط .. ممكن اعرف ؟
فيصل: زين بس هالكلام بينا ..
فارس: ان شاءالله ..
فيصل: رفيجي يقول انه مره قعد من النوم فالليل وكان يبي الحمام .. وهو مار صوب غرفة اخته سمعها تتكلم فالتلفون وتضحك ..
فارس: زين ..
فيصل: وانصدم ..
فارس: زين شو اللي فكر فيه رفيج في ذيك اللحظه . ؟
فيصل: فكر اخته من تكلم هالوقت .. وهي نادر ما تتكلم فالتلفون طول اليوم .. ليش يعني تكلمت هالوقت ؟
فارس: زين يمكن كانت مكالمه ضروريه .. ليش رفيجك ما فكر بهالشي ؟
فيصل: يعني تعرف انا ريال .. اقصد رفيجي ريال .. واول شي بيجي في باله في هالموقف انها تكلم واحد هالوقت ..
فارس " ماشاءالله عليك يا فيصل " ..
فارس: مو كل الريايل يفكرون جي ..
فيصل: شلون ؟
فارس: يعني انا لو سمعت او شفت اختي تتكلم هالوقت ما راح افكر في شي سيء هاي اول شي .. وماراح ادخل عليها اسألها من تكلمين ..
فيصل: ليش ؟
فارس: لاني اعرف تربيتها وانا واثق فيها ..
فيصل اقتنع بكلام فارس ..
فارس: لازم تصفي النيه يا فيصل .. بس بسألك سؤال ..
فيصل: تفضل ..
فارس: رفيجك سمع اخته تتكلم فالتلفون مره ثانيه ؟
فيصل: لا بس هاي المره الوحيده ..
فارس: ومن متى صايره هالسالفه حق رفيجك ؟
فيصل: هالسالفه لها كم اسبوع ..
فارس: اها .. شوف دام ما شاف شي عليها لازم ما يشك .. وبعدين لو تكرر هالموقف خله يتشجع ويكلمها ..
فيصل: بس هو اصغر منها بواليد هو قدي وهي تقريبا 20 عمرها ..
فارس: بعد ما يمنع انه يكلمها ..
فيصل: مممممم .. زين بس هو حس بأحساس غريب ناحيتها ..
فارس: شلون ؟
فيصل: يعني هي اكبر منه ودوم يشوفها قدوه له .. يحس كأنها طاحت من عيونه ..
فارس " هاي اللي كنت خايف منه " ..
فارس: يعني تحس ان صورتها اهتزت جدامك صح ..
فيصل: لا هي ما طاحت من عيوني .. اقصد من عيونه بس يعني نفس اللي زعل عليها ..
فارس: فاهم قصدك .. رفيجك وايد حساس .. بقولك عنه شي ..
فيصل: زين ..
فارس: رفيجك ذي يحب اهله وايد .. ويخاف عليهم .. ويزعل لزعلهم .. ويحزن لحزنهم .. صح ..
فيصل باستغراب: عدل كلامك .. بس شلون عرفت ؟
فارس: من كلامك عنه ..
فيصل: اي ي ي ..
فارس: قوله دام امنه يحب اهله ويخاف عليهم خله يحافظ عليهم ويحكم عقله و يوزن الامور صح .. وما يتأخذ اي قرار من غير ما يفكر فيه عدل .. لا يقسى ولا يخلي مشاعره تتحكم فيه ..
فيصل: اها ..
فارس: قوله هالكلام ..
فيصل مبتسم: ان شاءالله ..
فيصل حط يده تحت خده وسرح وهو يطالع الدريشه .. فارس تم يفكر في كلام فيصل ونفسيته ..
فارس حط يده على شنبه " يعني فيصل شو ممكن سمع ؟ ايه عليج يا مناف فديت قلبج .. كله ولا اطيحين من عيون اخوانج .. لازم اكلمها وانبها " ..
وصلوا عند بيت مناف .. نزل فيصل وراح ينادي مناف عشان تشل عبدالله اللي كان نايم .. فارس شله و وقف ينتظر عند الباب ..
فيصل: مناف .. منااااف ..
مناف: شفيك تصرخ ..
فيصل: تعالي شلي عبود ..
مناف بتوتر: ها .. وينه ؟
فيصل: عند الريال ..
مناف " فديت الريال والله " ..
مناف: زين بس البس عبايتي وبجيك ..
فيصل: وين امي ؟
مناف: امي في غرفتها .. زين شرايك تقولها تاخذ عبود ؟
فيصل: بشوفها .. بس انتي تعرفين امي ريولها تعورها وبتقولج انتي ..
مناف: زين روح شوف امي اول ..
فيصل: زين زين ..
راح فيصل عند امه اللي كانت فالغرفه وماسكه ثياب نايف وتصيح .. وقف فيصل عند الباب متأثر بموقف امه .. اول مره يشوف امه بهالحاله .. نزل راسه وراح غرفة مناف ..
فيصل بحزن: يلا روحي جيبي عبود .. طولنا على الريال ..
مناف: وامي وينها ؟
فيصل: نايمه ..
مناف وهي تلبس عبايتها: ان شاءالله الحين بجيبه .. يلا تعال معاي انت بعد ..
فيصل: بروح اتطمن على امي زين ..
مناف بخوف: زين ..
لبست عبايتها بسرعه وراحت صوب الباب .. من ورا الباب وقفت اطالع فارس اللي كان شايل عبدالله ويتأمل ملامحه ومبتسم .. زادت دقات قلب مناف .. عدلت شيلتها وفتحت الباب .. فارس سمع صوت الباب ورفع راسه اول ما شاف مناف ابتسم لها بحزن .. مناف حست ان قلب فارس متروس .. تذكرت لما سكرت منه التلفون وهي زعلانه على مزحه .. مشت بخطوات بطيئه وعيونها فالارض .. اما فارس فكان يطالعها .. قربت منه و مدت يدها عشان تاخذ اخوها منه ..
فارس: فديت الدلوعه والله ..
مناف كانت منزله راسها ومنحرجه من فارس ..
فارس: يا قلبه ليش هالزعل .؟
مناف بصوت واطي: مب زعلانه ..
فارس مبتسم: اموت فالدلوعه انا .. حياتي والله ..
مناف ماتت من الخجل .. فارس قرب اخوها لها وشلته .. كانت منزله راسها من الخجل .. صدت بترجع البيت .. مشى فارس جنب مناف و وقف جدامها .. مناف خافت من حركة فارس .. خافت ان يطلع فيصل ولا امها ويشوفونهم .. ارتبكت مناف ..
مناف: فارس الله يخليك اخاف فيصل اخوي ولا امي يشوفونا ..
فارس قرب منها: خير يعني لو شافونا ؟
مناف بصوت واطي: ابيه .. الله يخليك خلني ادخل ..
فارس قرب ويهه من ويها: لا باخطفج يالدلوعه ..
مناف غرقت عيونها: لا فارس ارجوك ..
فارس يتكلم بجديه: سمعي اول ما تدخلين البيت اتصلي لي ضروري .. ابيج في موضوع مهم ..
مناف بخوف: شصاير ؟
فارس: انتي اتصلي وبقولج .. لا تتأخرين زين ..
مناف: ان شاءالله ..
مشى فارس جنب مناف وهو معديها من صوب اليسار ..و بيده اليمين مسح على ويهها .. مناف ارتبكت وكانت بطيح وهي تمشي .. فارس تركها وركب الرنج الاسود .. تم يراقبها وهي داخله .. كان قلبه يتقطع عليها ..
فارس " فديت قلبج يا مناف .. تلقينها من من ولا من .. امي ومعارضه زواجنا .. فيصل ومنصدم فيج .. فديت روحج .. متى اخطفج يا اميرتي الدلوعه يا احلى بنت فالعالم " ..
.....................
فارس طلع من صوب بيت مناف .. طلع على الشارع العام .. انتظر اتصال مناف وتم يسوق بهدوء .. اتصلت مناف واول ما شاف الرقم رد ..
فارس: فديت النسمه اللي من انفاسج حسيتها على يدي ..
مناف بخجل: اهلين ..
فارس: للحين زعلانه يا قلبه ؟
مناف بدلع: اي زعلانه ..
فارس بصراخ: اموووووت فالدلع .. اراضيج يالزعلانه ..
مناف: ليش تصرخ يا مينون ..
فارس مبتسم: انا مينون فيج يا مناف .. انتي حياتي وقلبي وكل شي فيني ..
مناف: فديت روحك يا فارس ..
فارس: يعني مب زعلان يا عسل ..
مناف: انا آسفه ..
فارس: ليش تتأسفين يا قلبه ؟
مناف: حسيت نفسي سخيفه اليوم ..
فارس: اموت فيج بكل حالاتج يا قلبه ..
مناف منحرجه: والله ما ستاهل هالتعامل منك ..
فارس: وليش يا حبي؟
مناف: انت طيب يا فارس ..
فارس: فديت قلبج .. انا معاج انسان ثاني .. انتي كلي يا مناف .. مو نصي .. كلي كلي كلي ..
مناف: فديت قلبك والله .. كلامك يحرجني زود .. والله اني كنت سخيفه معاك ..
فارس: حياتي والله .. بس بسألج ليش صحتي يالدلوعه ؟
مناف تنهدت: آآه يا فارس .. امي هاليومين معوره قلبي وايد ..
فارس عقد حواجبه: ليش ؟ شو فيها ؟
مناف: كل ما ادخل عليها الغرفه فالليل .. القاها ماسكه ملابس نايف اخوي وتصيح ..
فارس: يا قلبها المسكينه ..
مناف: والله معوره قلبي فديتها ..
فارس: الله يصبرها ..
مناف وفارس تموا ساكتين فتره .. فارس كان يفكر هل يقولها عن فيصل ولا يأجل الموضوع ..
مناف: وين رحتوا اليوم ؟
فارس: تلفلفنا فالشوارع شوي .. وبعدين نزلنا نتعشى في مطعم على الدرب ..
مناف: اها ..
فارس: زين حياتي شوي وباتصل لج .. ولد عمي متصلي على الخط الثاني ..
مناف: زين حبيبي ..
سكر فارس ورد على محمد ولد عمه ..
محمد: انت وين يالهايت ؟
فارس: اشتقت لي يا قلبي ..
محمد: جدا جدا ..
فارس: احم احم ..
محمد: عن الحركات ..
فارس اونه يتكلم جد: خير الشيخ شو تبي ؟
محمد: هييييييي .. شوي شوي يا خطير ..
فارس: غصبن عنك خطير ..
محمد: فروس انا اكبر منك و احشمني ..
فارس: همممممم .. الموضوع جاري التفكير ..
محمد: وجع !
فارس: هههههههه ..
محمد: انت وين ؟
فارس: رايح بيتي ..
محمد: وين كنت ؟
فارس: تحقيق هو ؟
محمد: كيفي ..
فارس بعبط: تغار علي حمودي ..
محمد: فارق زين ..
فارس: ههههههه .. ابيه حمود تكلمني وانت منحرج .. هالكثر تموت فيني ..
محمد: فروس لاتغير الموضوع ..
فارس: يا حمود فكر معاي شويه ..
محمد: فروس لعوزتني ..
فارس: هههههههههه ..
محمد: كلمه ثانيه وبسكر فويهك ..
فارس مبتسم: زين زين .. آمرني يا قلبي ..
محمد لاوي بوزه: ما يآمر عليك العدو ..
فارس: فديت الدلوع ..
محمد: لاحول ولا قوة الا بالله ..
فارس: وايد دلعتك انا .. لازم اخفف شوي ..
محمد تنرفز: فروس خلاص ..
فارس: هههههه .. خلاص ما راح العوزك .. قول اللي في خاطرك ..
محمد: افففف .. نسيت شو كنت ابي اقول ..
فارس كان بيضحك بس مسك نفسه .. تم ساكت ومحمد كان معصب ..
محمد: يعني اتصلك عشان شي .. وانت تستخف دمك مع ويهك .. اقولك شي وتغير لي الموضوع .. عورت راسي ياخي .. حتى نسيت ليش متصلك ..
سكت محمد وفارس انتظره يتكلم .. لما شاف ان محمد مقفل .. استخف دمه وقال ..
فارس: حليلك يالحمدي .. جنك عيوز ماكلين عشاها ..
محمد عصب: اوهوووووووو ..
فارس مات من الضحك .. محمد تنرفز وسكر التلفون .. فارس تم يضحك على محمد .. كمل دريه لين بيت عمه .. وصل بيت عمه وكانت الساعه 9 بالضبط .. دخل الحوش واتصل بمحمد .. محمد شاف رقم فارس ورد ..
محمد: خير !
فارس: يا قلبي عليك ..
محمد: لاحول ولا قوة الا بالله ..
فارس: حياتي انته ..
محمد بهمس: هالكلام قوله لها ..
فارس ضحك بصوت عالي: هههاااااااااااااااي ..
محمد: وجع يا فروس والله لو انك جدامي يصفقك ..
فارس: غالي والطلب رخيص .. طل من الدريشه شوي ..
محمد راح صوب الدريشه .. فتح الستاره وطل منها .. شاف فارس يطالعه والتلفون في اذنه .. مبتسم ويلوح له بيده .. محمد اول ما شافه سكر التلفون وركض برا بسرعه .. فارس نزل الحوش عشان يستقبل محمد .. فارس اول ما شاف محمد يركض صوبه .. ركب السياره وقفل البيبان ..
محم يلهث: فروس .. بطل الباب احسن لك ..
فارس يضحك: هههههه .. لا يبه ... انت ثاير وحالتك صعبه ..
محمد: فروس بطل ولا بكسر الجامه ..
فارس: لا يبه .. شوف ويهك شلون صاير احمر .. اخاف منك ..
محمد: فروس بطل بالطيب .. ولا باستخدم القوه ..
فارس: خف علينا يا شمشون الجبار ..
محمد بصوت عالي: فرووووووس ..
فارس فتح الباب بكل هدوء .. محمد مسكه من ملابسه ونزله .. سحبه لين الميلس وسكر الباب ..
فارس: عمي ابي ابند السياره ..
محمد: ولا كلمه .. قفلت بي يا فروس ..
فارس: حياتي انته .. سمالله على اعصابك ..
محمد: اسكت ..
فارس: هييييي .. على بالك انا خايف منك .. وخر مناك زين ..
فارس دز محمد على الكرسي وحذف عليه المخده .. محمد قام وسحب فارس .. سدحه على الارض وقعد على بطنه خذ المخده وحطها على ويه فارس ..
فارس: الحقوني بيخنقني هالمينون ..
محمد: هههههههه .. على بالك بفكك مني يا فروس ..
فارس: يا ويل حالي .. قوم عني يالدب ..
محمد: من الدب يا غصين البان ..
فارس: هههاااااااااااي ..
تموا على هالحال لين دخلوا عليهم اسماء و فهد .. شافوهم على هالحال وطبوا عليهم .. تموا كلهم يلعبون بالمخدات ويضحكون .. عفسوا الميلس فوق تحت .. دخل عليهم بومحمد مستغرب من المكان ..
بومحمد: شو صاير ؟
محمد اول ما شاف ابوه وقف وسكر زرار الثوب .. فارس راح صوب عمه وسلم عليه ..
بومحمد: يهال انتوا تعفسون المكان جي ؟
فارس مبتسم: شدعوه عمي ..
بومحمد: عقاب لكم .. رتبوا الميلس ..
فارس: والخدم ياخذون رواتب على الفاضي ..
بومحمد: هالكلام قوله في بيتكم ..
فارس منحرج: بل ..
بومحمد: بلك المطر ..
اسماء: بابا ..
بومحمد مبتسم: انا تعبانه شلني ..
بومحمد شلها: تعالي فديتج .. فهد يبه تعال اشليك انت بعد ..
فهد ابتسم وراح عند ابوه .. تعلق فهد على ظهر ابوه واسماء في حضن ابوها ..
بومحمد: يلا يالشيوخ رتبوا ..
محمد: ان شاءالله يبه ..
فارس قعد جنب عمه: بارك الله فيك يا محمد رتب يبه ..
بومحمد التفت على فارس: صج والله .. قم انت بعد ..
نقز فارس من الكرسي ورجع المخدات على الكراسي ويا محمد .. اما محمد كان يضحك على فارس واستعباطه اللي ما مشى على عمه .. بعد ما رتبوا قعدوا جنب بومحمد اللي كان يراقبهم وهم يرتبون ..
بومحمد: ميانين انتوا ؟
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك