رواية نهاية حبك اعدامي -131
فاطمه: اي والله .. تدرين ما بقى شي على يوم العرس وابي اتهيء نفسيا قبلها بفتره ..
لطيفه: عدل كلامج ..
مناف: الله يوفقج فديتج ..
فاطمه مبتسمه: وياج حبيبتي .. والفال لج ..
لطيفه ومريم: آآمين ..
مناف ابتسمت لهم وكانت تفكر في فارس ..
مناف " فديتك يا فارس .. ليش طالت السالفه ؟ " ..
مناف شافت ساعتها: اوه تأخرت على المحاضره ..
مريم: اي محاضره ؟
مناف: هالمحاضره الدكتور بيلخص لنا فيها الكتاب حق الامتحان ..
مريم: اها ..
لطيفه: خلج من سوالفهم روحي لحقي على محاضرتج ..
مناف مبتسمه: مع السلامه بنات ..
البنات: الله وياج ..
راحت مناف بسرعه متجهه لقاعة المحاضره .. اول مادخلت انصدمت بالدكتور اللي قاعد ينتظر فالقاعه .. هي افتكرت انها غلطت فالقاعه وطلعت .. راحت صوب القاعه الثانيه وشافت دكتور ثاني يمتحن طالبات .. فتحت جدولها تتأكد واستغربت .. سمت بالرحمن ودخلت القاعه .. كان الدكتور حامد يراقبها وهي داخله .. طبعا من بعد ما رفضته مناف ما تواجهت معاه هالكورس الا اليوم .. كانت القاعه شبه خاليه من البنات .. قعدت على الكرسي اللي بالصف الثالث .. فتحت كتابها وحاولت انها تشغل نفسها فيه .. والدكتور حامد ماشل عينه من عليها .. اكتملت القاعه ودخلوا كل البنات .. تكلم الدكتور ..
حامد: السلام عليكم .. طبعا مستغربين وجودي .. بس لان دكتور الماده اعتذر و وكلني بمهمة تلخيص الماده معاكم لإمتحان الاسبوع الجاي .. طبعا ببدى معاكم التلخيص من الدروس الاخيره لين الدروس الاولى ..
مناف " اها .. يعني دكتور الماده ما بغى يعتذر الا على هالمحاضره المهمه .. الله يهديه بس " ..
تم الدكتور يلخص الماده والبنات متابعين معاه .. خلصت المحاضره ومناف كانت اول من ترك القاعه .. كانت حاسه بالتوتر والقلق .. الدكتور حامد طالها وهي طالعه بسرعه ومنزله راسها ..
حامد " الله على الخجل .. ماشاءالله عليها " ..
فاطمه رجعت البيت وكانت مرتاحه ان قدامها 15 يوم قبل اليوم الموعود .. كانت في غرفتها واطالع اغراضها وشنطها .. دخلت عليها عمتها هيا ..
فاطمه: هلا عميمه ..
هيا: فديت عروستنا الحلوه ..
فاطمه: حلاة دنياج عميمه ..
هيا: جهزتي كل شناطج ؟
فاطمه: اي ..
هيا: الاسبوع الجاي انا وامج بنروح نرتبهم لج فالغرفه ..
فاطمه: ماتقصرين عميمه ..
هيا: فديت قلبج انتي .. الفال ان شاءالله حق ايمان والريم فديتهم ..
فاطمه: آمين ..
هيا: الا فارس وينه ؟ صار لي كم يوم اجيكم ولا اشوفه ..
فاطمه توترت: فارس .. الله يخليج يا عميمه .. اذا احنا ماقمنا نشوفه هالايام ..
هيا: ليش شعنده ؟
فاطمه: لاهي مع اشغاله .. ويجهز مع يوسف وعبدالعزيز ..
هيا: فديت قلبه والله .. وحشني ..
فاطمه: ليش هو ما مركم ؟
هيا: بلا يمرنا فديته .. بس استغربت هاليومين من امركم ولا اشوفه ..
فاطمه: ما ينلام فديته مشغول ..
هيا: الله يعطيه الصحه والعافيه ..
فاطمه: آمين " آه لو تدرين بفارس يا عمتي " ..
هيا: اخبار القاعه والتجهيزات ؟
فاطمه: امي وانتي ما قصرتوا .. امس كلمتني مالت الطاولات تقول ان الكاسات اللي طلبتها وصلت ..
هيا: زين الحمدلله ..
فاطمه: لا ماشاءالله عليها هالبنت توقيتها مضبوط ..
هيا: حليلها والله .. في عرس مريم ما قصرت والله .. شفتي شلون رتبت لنا القاعه ونسقتها ..
فاطمه: عشان جي انا اخترتها ..
هيا: ان شاءالله نشوف قاعتج مثل ما تخيلناها وخططنا لها ..
فاطمه مبتسمه: ان شاءالله ..
تمت هيا مع فاطمه يسولفون عن امور العرس والتجهيزات ..
الساعه 4 العصر .. مناف كانت واقفه عند مواقف الباصات تنتظر الوقت يمر عشان ترجع البيت .. كانت تسولف مع فارس ..
مناف: وين بتروح حبيبي ؟
فارس: بروح عند يدتي ..
مناف: اشوفك هالكم يوم دوم عند يدتك ..
فارس: هي تتصلي عشان اقعد معاه ونحش في خلق الله ..
مناف: ههههه .. عليك سوالف
فارس: فديت هالضحكه يعلها دوم ..
مناف نزلت راسها وتكلمت بصوت واطي: حياتي والله ..
..................
فارس: فديت همسج يا قلبه ..
مناف: تدري من كم يوم امي تسأل فيصل عنك ..
فارس مبتسم: والله .. شو سألته ؟
مناف: سألته عنك وعن اخبارك ..
فارس: اها .. حليلها عمتي .. اقصد امج ..
مناف انحرجت وسكتت ..
فارس: فديت قلبها الخجوله ..
مناف: زين حبيبي الباص وصل .. خل اروح لان البنات تجمعوا كلهم ..
فارس: تحملي على نفسج يا قلبه ..
مناف: ان شاءالله حبيبي ..
سكرت مناف من فارس وتوجهت للباص .. اما فارس فتوجه لبيت يده .. دخل الحوش وشاف سيارة عبدالعزيز .. نزل ودخل الصاله ولقى عبدالعزيز والجد واقفين جدام المرايه ويعدلون في غترهم ..
فارس: على وين ؟
الجد التفت بخوف: وجع يا فروس خرعتني .. على بالي ابوك ..
عبدالعزيز: صوتك نفس صوت ابوي ..
فارس: لا تغيرون الموضوع .. على وين هالحزه ؟
الجد: مالك خص ..
فارس: بل ..
عبدالعزيز: لقط ويهك ..
الجد: انت اصلا شو جايبك هالحزه ؟
فارس: نتفتني يا يدي ..
الجد: الناس ترتاح وتقيل .. وانت تناقز لي من مكان لي مكان .. ماعندك سالفه ..
دخلت عليهم الجده ..
الجده: دامك تقول هالكلام .. شو اللي مهيتك مع هالياهل عزوز ..
عبدالعزيز: بل ..
فارس بشماته: لقط ويهك ..
الجد: احنا عندنا شغل ريايل ..
الجده: لا صدقت شغل الريايل ..
فارس: اموت فيها والله ..
قرب من يدته وباس راسها ..
الجده: لا ومتدهن ومتدخن بالعود الزين .. شهالشغل ها .. علمني ..
الجد سحب عبدالعزيز: قم نروح عنهم .. اخوك ويه نحس علينا ..
الجده: ويهه نحس .. الا كشف فعايلك ..
الجد طلع و وراه عبدالعزيز وسكر الباب ..
فارس قرب من يدته وباس راسها مره ثانه بس سحب راسها بقوه ..
الجده: الله يلعن اليهود عورت راسي انت بعد ..
فارس: هههههه .. آمين ..
الجده: اقعد خل انادي الخدامه تجيب القهوه ..
راحت الجده المطبخ ورجعت مره ثانيه عند فارس فالصاله .. الخدامه حطت القهوه وراحت .. الجده قلطت فارس وصبت له القهوه وقدمت له التمر .. فارس تم يسولف معاها شوي وبعدين هي فتحت معاه موضوع العرس ..
الجده: شو صار على موضوع خطوبتك ؟
فارس: ولا شي ..
الجده: شوله ؟
فارس خذ نفس: آآآه .. والله ماعرف شو اقولج يدتي ..
الجده عقدت حواجبها: شو فيك يبه .. ليش الحزن بصوتك ؟
فارس: يدتي .. امي رافضه البنت ..
الجده تخصرت: ويه .. ليش زين ؟
فارس: امي تقول ان هالبنت مو من ثوبنا ..
الجده: يعل ثوب امك الشق .. شو هالكلام بعد ..
فارس: انا سكت عن الموضوع الحين عشان عرس فطيم .. ولا كلمت حد فالموضوع ..
الجده: بس ابوك قالنا من زمان عن هالموضوع ولا شفنا اي رد ..
فارس: اي الموضوع من زمان صاير .. والرد جاني على طول من امي .. بس انا ما حبيت اناقش امي فالموضوع
الجده: شو بعد اناقش ؟ تكلم عربي ..
فارس: هههههه .. يمه انا اتكلم عربي .. اناقش يعني اتكلم فالموضوع ..
الجده: قصدك تشوف رايي امك بالموضوع ؟
فارس: ايوه عليج نور ..
الجده: زين .. قولي امك سألت عن البنت واهلها ؟
فارس: اي سألت و بلسانها قالت لي ان البنت ما عليها كلام واهلها الكل مدح فيهم .. بس ما رضت فيها عشانهم على قد حالهم ..
الجده: هاي مب عذر .. وامك ذي بسنعها ..
فارس: بس يدتي طلبتج ..
الجده: قول ابوي انته ..
فارس: لا تكلمين حد فهالموضوع الحين ..
الجده: شوله ؟
فارس: مابي اسوي مشاكل .. ومابقى شي على عرس فطيم .. عقب العرس بنقعد ونتكلم ..
الجده: عيوني لك ..
فارس مبتسم: تسلم لي عيونك ..
الجده: الا بسألك ..
فارس: هلا ..
الجده: انت تعرف هالبنت ؟
فارس ويهه صار احمر: ها .. لا ماعرفها يدتي .. بس شفتها كم مره وعجبتني .. مأدبه ومحتشمه و حلوه بعد ..
الجده تلعوز فارس: علينا هالكلام .. شفتها برا .. يبه انت من يرن تلفونك انخطف لونك .. تقولي شايفها برا ..
فارس ضحك باحراج: لا شدعوه ..
الجده: هات من الآخر يالعفريت ..
فارس: هههههه .. صدقيني ماعرفها ..
الجده: ما تقص علي انا ..
فارس يغير الموضوع: تدرين يدتي ..
الجده: قول ابوي ..
فارس: انا مستغرب من ابوي ..
الجده: شو فيه ابوك ؟
فارس: ما كلم امي فالموضوع واحس في قلبه كلام ..
الجده: امس الظهر ابوك عندي ما شفت عليه شي ..
فارس: هو جاني وقالي ان امي مب راضيه .. وبعدين كان بيقولي شي ثاني بس سكت بدخلت امي علينا .. وللحين ماقدرت اكلمه واعرف منه شي .. احسه يتهرب مني ..
الجده: ضيعتني يا صبي .. شو يعني يتهرب منك ؟
فارس: هههههه .. يعني يتصدد ما يبي يكلمني ..
الجده تفكر: همممممم .. ابوك مقدور عليه بصيده لك اليوم ولا بكره لي مر علي .. بس امك بسنعها عقب العرس .. على بالك باسكت عن كلامها اللي ماله معنى .. اي والله مب من ثوبنا ..
فارس: يدتي شو قلت لج من شوي ..
الجده: شو ؟
فارس: لا تفتحين الموضوع مع اي حد الا بعد عرس فطيم الله يخليج ..
الجده: اوهو .. شغلت قلبي وقهرتني وتبيني اسكت ..
فارس: عشان خاطري ..
الجده: ولا يهمك .. عقب عرس اختك بمسك امك وابوك وبعقد معاهم ..
فارس: عفيه يدتي والله ..
الجده: زين اشرب هالفنيال ..
فارس: بسي والله اكتفيت ..
الجده: انت شلون صاير كلامك بعد ؟
فارس باستغراب: اي كلام يدتي ؟
الجده الا اناقش .. ولا اكتفيت .. يبه تكلم عدل ..
فارس: انا اتكلم عدل .. بس انتي مال اول شعرفج ..
الجده: وجع يا فروس .. اركد لا اكسر هالدله على راسك ..
فارس: هههههه .. زين زين ..
رن جوال فارس وكانت الرنه عالي مستواه .. على طول كتم الرنه و حط التلفون على جنب .. الجده تمت اطالع فارس بتحدي ..
الجده: رد .. ليش سكرت ؟
فارس: احم .. لا هم سكروا بسرعه ..
الجده: وليش يسكرون بسرعه ؟
فارس: يلعوزوني ..
الجده: من هذول اللي يلعوزونك ؟
فارس: الربع ..
الجده: فروس هات من الآخر احسن لك ..
فارس يضحك: هههههه .. شو تبين اقولج يدتي ..
الجده: انت على بالك صدقتك يوم تقول انك شايفها .. انا اقطع يدي اذا انت مب عاشقها ..
فارس: شو فيها لو عشقت ؟
الجده: اعشق يبه محد قالك ما تعشق .. دام القلب اختار .. اعشق وحب ..
فارس: الله على كلامج اللي يبرد الخاطر يا يدتي ..
الجده: زين قولي انت تحبها ؟
فارس مبتسم: لا .. بس شاريها ..
الجده " راسه يابس مب راضي يتكلم "
الجده: بعد عرس اختك بتنحل الامور بأذن الله ..
فارس عض شفته " آمسن " ..
فارس: زين الغاليه انا اترخص الحين ..
الجده: بتروح الحين .. كلهم بعد شوي بيجون اقعد زين ..
فارس: عندي شغل ضروري .. وبعد شوي بيأذن بصلي فالمسيد ..
الجده: زين روح صل وتعال ..
فارس: عندي شغل .. بمرج وقت ثاني ان شاءالله ..
الجده: ما يندرى شو هالشغل ..
فارس ابتسم لها .. قرب منها وباسها على راسها وطلع .. الجده كانت تفكر في فارس وتعلقه فالبنت اللي يبغيها ..
...................
طلع فارس واتصل بمناف يتطمن عليها ..
فارس: يا قلبه ..
مناف: هلا حبيبي ..
فارس بشوق: آمريني ..
مناف: ما يآمر عليك العدر .. بس اشتقت لك ..
فارس: لا تلوميني لي ذبت فيج يا بنت .. ذبحني شوقج ..
مناف انحرجت وتمت ساكته فتره ..
مناف: شخبارك حبيبي ؟
فارس: طيب .. متى وصلتي البيت ؟
مناف: ممممم .. لي نص ساعه تقريبا ..
فارس: يعطيج العافيه ..
مناف: الله يعافيك .. انت وين الحين ؟
فارس: جايكم ..
مناف: جاينا ؟
فارس: اي .. مو عاجبج يعني ..
مناف: ههههه .. ما قلت شي .. بس استغربت ..
فارس: بمر على الشباب شوي ..
مناف مبتسمه: اها .. انا قلت متعني عشاني ..
فارس يلعوزها: وايد شايفه نفسج علي انتي ..
مناف بصدمه: ها ..
فارس: سمعتيني ..
مناف بقلق: شتقصد بكلامك ؟
فارس: اعتقد كلامي واضح .. انتي وايد شايفه نفسج علي ..
مناف صاحت: انا ..
فارس تخرع لما سمعها تصيح: كنت امزح معاج ..
مناف تصيح: لا خلاص قلت كلامك ..
فارس: حياتي انتي والله كنت امزح معاج ..
مانف سكتت وماردت على فارس وتمت تصيح ..
فارس بخوف: انا آسف يا قلبه .. كنت امازحج شوي ..
مناف ما ردت على فارس .. تم فارس يراضيها ويترجاها تتكلم وترد عليه ..
فارس منحرج: حبيبتي ردي علي الله يخليج ..
مناف: .........
فارس بتوسل: والله كنت امزح .. ردي يعلي الله يخليج ..
مناف: انا بسكر الحين ..
فارس: لا ماتسكرين
مناف تمسح دموعها: بسكر الحين .. اتصلي انت بعدين ..
فارس يتوسل مره ثانيه: حبيبي لا تسكرين والله كنت امزح معاج ..
مناف بحزن: قلت لك باسكر واتصلي بعدين يا فارس ..
فارس متلوم: خلاص اللي تشوفينه ..
سكرت مناف من غير ما تسلم .. فارس استغرب موقف مناف ..
فارس " كله الا زعل مناف الغاليه "
قرب من بيتهم واتصل بفيصل ..
فيصل: هلا والله ..
فارس: هلا ابوي انته .. شو اخباركم ؟
فيصل: الحمدلله .. اخبارك انت ؟
فارس: يسرك الحال .. انت فالبيت ؟
فيصل: اي فالبيت ..
فارس: زين انا عند الباب ..
فيصل بوناسه: الحين بجيك ..
فارس مبتسم: انتظركم ..
سكر فيصل وراح يلبس بسرعه عشان يطلع لفارس .. شافته ام مناف ..
ام مناف: فيصل وين بتروح يبه ؟
فيصل: فارس عند الباب ..
ام مناف: حليله هالريال والله ..
فيصل: يمه نادي عبود عشان يلبس ويلحقني عند الباب ..
ام مناف مبتسمه: ان شاءالله يبه ..
فيصل طلع عند الباب وركب السياره مع فارس .. ام مناف بلغت عبدالله بوجود فارس ..
عبدالله بوناسه: والله ..
ام مناف: اي يبه الريال عند الباب ..
عبدالله ركض عند الباب من غير ما يبدل ملابسه .. فتح باب السياره وضحك ضحكته الحلوه ..
عبدالله: ههاااااي ..
فارس مبتسم: هلاااا ..
فيصل تفشل من عبدالله اخوه لانه كان طالع بصروال وفانيله ..
فيصل: عبود فشلتنا طالع جي .. ليش ما بدلت ؟
عبدالله طالعه بنظره وصد عنه يسولف مع فارس ..
عبدالله: وينك من زمان ما شفناك ؟
فارس: كنت مشغول شوي ..
عبدالله: زين شرايك نتمشى بالسياره ؟
فارس: يلا يبه اركب ورا ..
فيصل: لا خل يروح يبدل ملابسه اول ..
عبدالله: مابي ابدل ..
فارس مستاني على عبدالله وعلى برأته ..
فارس: عادي خله .. يلا عبود يبه اركب ورا ..
فيصل نزل وسحب عبدالله بقوه ودخله البيت عشان يبدل ملابسه .. فارس كان يطالعهم ومستانس عليهم .. دخلوا البيت وفيصل يزف عبدالله ..
فيصل: فشلتنا ..
عبدالله: يه شنو فشلتك .. ملابسي نظيفه وجديده .. فارس اللي شاريهم لي ..
فيصل: ما قلنا شي .. جي تستقبل الريال بملابس البيت .. عيب ما تستحي انت ..
عبدالله: كيفي زين ..
فيصل: زين دش بدل خلصنا ..
ام مناف سمعت صراخهم وطلعت من غرفتها ..
ام مناف: شفيكم ؟
عبدالله عصب وراح يركض عند امه وحضنها ..
عبدالله: فصول يهاوشني ..
حضن امه وصاح .. ام مناف حضنته وابتسمت لفيصل اللي كان معصب على اخوه ..
ام مناف: بس حبيبي .. لا تصيح فديت دموعك ..
عبدالله: قولي له لا يزف مره ثانيه ..
ام مناف: بقوله حبيبي بس لاتزعل نفسك انت ..
طالعت فيصل وسألته ليش مهاوش اخوه ..
ام مناف: ليش يبه تزف اخوك ؟
فيصل: فشلنا طال عند الباب بصروال وفانيله ..
ام مناف ضحكت: هههههه .. فديت قلبه عبادي حبيبي .. مافيها شي يبه ..
فيصل: شنو ما فيها شي .. عيب يطلع جي يستقبل الريال ..
عبدالله يمسح دموعه: قلت لك فارس شاري لي هالصروال جديد مب قديم ..
ام مناف حزنت على كلام عبدالله ..
ام مناف: معليه حبيبي عبادي لا تصيح .. عدل كلام اخوك .. لازم تستقبل الناس بملابس مرتبه ..
عبدالله باس رقبة امه: زين يمه ..
فيصل: زين يالدلوع خلصنا الريال ينطرنا برا ..
ام مناف: فيصل يبه عن العصبيه .. انا بلبسه الحين ..
فيصل: بسرعه لان بنطلع ..
ام مناف: فيصل يبه ناد اختك ..
فيصل: ان شاءالله ..
راح فيصل ينادي مناف وام مناف راحت تلبس عبدالله ..
فيصل طق الباب: مناف .. مناف ..
مناف: نعم ..
فيصل: امي تبيج تعالي ..
مناف" ابيه مو وقته يا يمه .. عيوني متنفخه وصايره حمر " ..
مناف: ان شاءالله الحين جايه ..
راح فيصل عند فارس ومناف طلعت من الغرفه وراحت عند امها ..
مناف: نعم يمه ..
ام مناف وهي تلبس عبدالله: يمه سوي شي بارد الريال واقف عند الباب ..
مناف" فديت قربه والله"
مناف: ان شاءالله يمه ..
راحت المطبخ وسوت عصير برتقال لفارس .. عبدالله نادا فيصل عشان يشل العصير .. خذ فيصل العصير وراح عند السياره ..
عبدالله: ابي عصير ..
فيصل: روح داخل خذ لك ..
فارس: خذ يبه اشرب معاي ..
عبدالله: لا بروح حق مناف بقولها تسوي لي نفسك ..
فارس " فديت مناف اللي سوت لي هالعصير والله .. ليتني هالكاس اللي لمسته بيدينها " ..
فيصل: خلصنا زين روح ..
عبدالله: اف منك ..
نزل وهو معصب .. فارس التفت على فيصل ..
فارس: شو فيك تزف اخوك جي .؟
فيصل: لانه يبط الجبد ..
فارس: شو مسوي ؟
فيصل: يعني فشلنا الحين طالع بصروال وفانيله ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك