رواية نهاية حبك اعدامي -88
فارس سمع ضحكهم ودخل عندهم .. ما كان يدري ان الريم معاهم ..
فارس: يه يه يه .. شو هالضحك .؟
الريم اول ما شافت فارس انحرجت وسكتت ..
مريم: فارس شوفهم يتمسخرون علي ..
فارس: افااا .. من اللي يتمسخر عليج ؟
مريم: ايمانو وريمو ..
فارس مبتسم: شحالج الريم ؟
الريم و ويها صار احمر اول ما كلمها فارس ..
الريم: الحمدلله ..
فارس: بعدين ليش تتمسخرين على اختي ..
الريم كانت ميته من الخجل ..
الريم: مو انا .. هاي ايمان ..
فارس: ام كشه وبعدين معاج ..
ايمان: شو فيني .. اختك هاذي دلوعه ..
فارس: اي اخت فيهم .. حددي .. الريم ولا مريم ..
هالكلام كان صاعقه بالنسبه للريم ..
ايمان: من غير ريمو ام الطنايز ..
الريم راحت عالم ثاني من كلام فارس ..
فارس: اريام صج انتي راعية طنايز ؟
الريم متلخبطه: أأأ أنا ..
فارس: ههههه .. لا انا ..
الكل: ههههههه ..
الريم ضحكت معاهم بس مجامله ..
دخلت عليهم فاطمه ..
فاطمه: شو فاتني ؟
فارس: هلا وغلا بفطيم ..
ايمان: لو سمحتي مريم ابتعدي شوي ..
مريم: ليش ؟
ايمان: خلاص وصلت الدلع ..
فارس: هههههه ..
ايمان: لما تجي فطوم انتي انتهى دورج ..
الكل: هههههه ..
فارس: على وين ؟
فاطمه: بنطلع نتمشى شوي ..
فارس: من بيوديكم ؟
فاطمه: مع ماما وبابا ..
فارس: اها .. زين انا ما عطلكم توأمي ينتظرني تحت ..
مريم: اهم شي توأمك ..
ايمان: من محمد .. خل اروح له عشان يدافع عني .. ايه عليه محد يفازع لي الا هو ..
الكل: هههههه ..
فاطمه: ايمانو متى بتخلصين ..
ايمان: زين بس بصلي ..
فارس: زين خواتي اخليكم تاخذون راحتكم ..
الكل: الله وياك ..
نزل فارس عند محمد اللي كان مع ام فارس فالصاله .. على فكره ام فارس وايد تحب محمد ..
ام فارس: كلم فارس يا يبه ..
محمد: من عيوني الغاليه .. انتي تامرين ..
ام فارس: ما يأمر عليك العدو فديتك ..
دخل عليهم فارس: هااااا .. شو تقولون ؟
محمد: ما نقول شي .. كنا نسولف ..
فارس: لا اكيد كنتوا تحشون فيني ..
محمد: من حلاتك نحش فيك ..
ام فارس: ههههههه .. فديته فارس الغالي .. هاذي مزيون مافي مثله ..
فارس: عاشت امي والله ..
محمد: امك تجاملك .. لانها تعرف انك مستاء من شكلك ..
الكل: هههههه ..
فارس: قم قم قم .. انت مو كفو حشيمه ..
محمد: شوفيه يطردني ..
ام فارس: اقعد عن الينون يا فارس .. خل الولد ..
محمد: شوف قالت لك خل الولد .. يعني انا توني صغير ..
فارس: انت مشكلتك صعبه مع العمر .. زين قم يلا ..
ام فارس: وين ؟
فارس: بنطلع ..
محمد: يمه شوفيه ما يخليني اقعد معاج .. يغار منج تصدقين ..
ام فارس: ههههه ..
محمد: يلا يمه نستأذن ..
ام فارس: الله يحفظكم يبه ..
طلعوا من الصاله وركبوا ( الرنج الاسود ) .. وهم فالسياره محمد كان يكلم فارس عن امه ..
محمد: اقولك فروس ..
فارس: هلا ..
محمد: تدري قبل ما تدخل علينا .. امك شو كانت تقول لي ؟
فارس: شو ؟
محمد: تقولي كلم فارس عشان يعرس ..
فارس التف على محمد: زين كمل ..
محمد: والله عورت قلبي مسكينه .. انت ما كلمتهم عنها ؟
فارس: لا والله للحين ..
محمد: لي متى بتنتظر ؟
فارس: والله مادري .. كل ماقول بروح اكلم امي .. اعوذ بالله تصيدني ضيقه وينقبض صدري ..
محمد: زين انت قلت لي انك استخرت وارتحت ..
فارس: صحيح ..
محمد: زين استخير اكثر من مره ..
فارس: والله استخرت وايد .. اكون مرتاح .. بس من اعزم اني اكلم الوالده ينقبض صدري يا محمد ..
محمد: لا حول الله .. زين شو بتسوي الحين ؟
فارس: بانتظر شوي .. على فكره انا ما كلمتها عن هالموضوع .
محمد: ليش ؟
فارس: لي كلمت امي وابوي بقولها ..
محمد: زين فروس البنت مالها عيال عم ولا غيره ؟
فارس: اعتقد .. بس اهلها ما يسألون فيهم ..
محمد: لا حول ولا قوة الا بالله .. ليش الناس صارت جي .. الحمدلله ان احنا على قلب واحد ..
فارس: اي والله الحمدلله ..
محمد: زين انت فكر فالموضوع عدل وكلم اهلك ..
فارس: ان شاءالله ..
وصلوا المجمع .. وراحوا المحل ياخذون الاغراض .. خلصوا من المحل راحوا البحر .. صلوا وبدلوا ملابسهم ونزلوا البحر يسبحون ..
محمد: الموج عالي اليوم ..
فارس: بروح اولع ليتات السياره ..
محمد: زين .. وجيب البجلي معاك ..
راح فارس ولع ليتات السياره الاماميه .. رجع البحر عند محمد ..
فارس: تذكر الاسبوع اللي فات لما جيت البحر الفجر ..
محمد: اي ..
فارس: كنت اسولف معاها قبل ما جي البحر .. وكانت متخرعه ..
محمد: ههههه .. ليش ؟
فارس: تقولي انت ما تخاف من الظلام .. وما تخاف يعضك شي .. اقولها مثل شو ؟ الا تقول سمك القرش ..
فارس ومحمد: هههههههه ..
فارس: مت عليها من الضحك .. قلت لها اي سمك قرش ..
محمد: حلوه هاذي سمك قرش .. وحليلها ..
فارس: حمودي نغاوص شوي ..
محمد: يلا ..
غاضوا فالبحر وهم مشغلين البجلي .. محمد وفارس يحبون منظر البحر باضاءة البجلي .. شكل الاحياء البحريه بالليل غير النهار .. طلعوا على السطح وتموا يسولفون وهم يسبحون ..
محمد: بارك لي فروس ..
فارس مبتسم: مبروك حبيب قلبي ..
محمد: زوجتي حامل ..
فارس بفرح: مبروح يا بونايف ..
محمد: ودي اجيب عيال وايد ..
فارس: الله يرزقك يا حمودي .. ويقدرك على تربيتهم ..
محمد: آمين .. والفال لك يا فروس .. نشوف عيالك يلعبون مع عيالي ..
فارس: الله يسمع منك ..
محمد: الله ايسر امورك ..
فارس: ان شاءالله ..
محمد: زين خل نرجع السيف .. لان الموج علا ..
فارس: تسابق ؟
محمد: قدام يا ولد ..
تسابقوا لين السيف .. ومحمد وصل قبل فارس .. انسدحوا على السيف يتأملون النجوم فالسماء .. بعد ما استرخوا على السيف رجعوا بيت بوفارس .. محمد كان ينتظر الريم ترجع ..
فارس: قوم تعال غرفتي ..
محمد: يلا ..
راحوا غرفة فارس ..
فارس: حمودي تبي تتسبح ؟
محمد: لا بروح البيت باتسبح وبنام على طول ..
فارس: على راحتك .. زين انا باخذ شور سريع وراجع لك ..
محمد: اوكي ..
دخل فارس الحمام .. ومحمد انسدح على الكرسي وشغل التلفزيون .. طلع فارس ومحمد كان يتابع فلم عربي ..
محمد: اتصل شوفهم وين ؟
فارس: الريم ما عندها جوال ؟
محمد: لأ ..
فارس: زين ..
اتصل حق فاطمه ..
فاطمه: هلا فارس ..
فارس: انتوا وين ؟
فاطمه: فالكوفي شوب ..
فارس: لحظه شوي .. التفت على محمد .. للحين فالكوفي شوب ..
محمد: زين قولهم يرجعون اريام البيت ..
فارس: يقول محمد رجعوا الريم البيت ..
فاطمه: ان شاءالله ..
فارس: سلام اختي ..
فاطمه: مع السلامه ..
محمد: زين متى بتودي لها الاغراض ؟
فارس: مادري .. ما كلمتها للحين ؟
محمد: اهاا .. زين انا بروح البيت .. ولقائنا غدا ..
فارس: بأذن الله ..
طلع محمد من غرفة فارس وفارس طلع معاه .. وصله لين سيارته .. ودعه ودخل البيت .. حذف نفسه على السرير وخذ جواله واتصل بحبيبة قلبه مناف ..
مناف: هلا حياتي ..
فارس: فديت هالصوت والله ..
مناف: شتسوي حبيبي ؟
فارس: والله توني راجع من البحر ..
مناف: انت ما تخاف ..
فارس: ههههه .. ولد عمي في خاطره يروح البحر .. قلت له ما خليها في خاطرك .. ورحنا مع بعض ..
مناف: بس اليوم دار علينا هوا ..
فارس: اي الموج كان عالي .. وارتفع زياده .. بس طلعنا يوم ارتفع ..
مناف: حبيبي لاتروح فالليل .. الله يخليك ..
فارس يغير الموضوع: زين بقولج شي حياتي ..
مناف: قول فديت قلبك ..
فارس: اول شي قولي طلعت نتيجة الامتحان ولا للحين ؟
مناف: اي طلعت ..
فارس: ها بشري يا قلبه ..
مناف: ناجحه والدرجه زينه .. الحمدلله ..
فارس: كم نسبتج ؟
مناف: لا حبيبي مافي نسب .. عطاني الدكتور B+ ..
فارس: مبروك يا قلبي تستاهلين والله ..
مناف: الله يبارك فيك حبيبي .. زين قول شعندك ؟
فارس: ممممممم .. جايب لج غرض ..
مناف عقدت حواجبها: غرض ؟
فارس: اي حبيبتي .. شي شفته وقلت يناسبج .. وخذته لج ..
مناف: حبيبي ..
فارس: سمعيني اول يا قلبه ..
مناف: قول ..
فارس: هديه بسيطه مني لج ..
مناف: يا فارس ماله داعي ..
فارس: يعني بترديني ..؟
مناف: مستحيل اردك بس قلت لك من قبل ماله داعي ..
فارس: اعتبريها اخر هديه ..
مناف: آخ منك انت .. زين ..
فارس مبتسم: حياتي والله .. بسألج حياتي ..
مناف: تفضل ..
فارس: متى بتخلصين امتحاناتج ؟
مناف: باقي لي 5 مواد بعد واخلص ..
فارس: وايد والله ..
مناف: انا ماخذه ساعات وايد هالكورس .. عشان ماخذ صيفي ..
فارس: اهاا .. يعني هالصيفيه انتي فري ..
مناف: هههههه .. اي فري هالصيفيه ..
مناف وفارس: ههههههههه ..
فارس: فديت هالضحكه اللي ترد فيني الروح ..
مناف: مبتسمه: فديت قلبك يا فارس ..
فارس: زين بكره امر اجيب الاغراض ..
مناف: حياتي .. انت قلت غرض .. شلون تحولوا اغراض ؟!!..
فارس: اي انا اقصد هالغرض ..
مناف: ممممممم ..
فارس: زين متى امر ؟
مناف: بكره تعال .. بس انا بقولك الساعه كم ..
فارس: ان شاءالله يالغاليه ..
مناف: شبتسوي بكره انت ؟ شعندك ؟
فارس: ماعندي شي .. بس الشركه .. وبمر على الشباب ..
مناف: زين انا بكلمك وبقولك متى ..
فارس: حاضرين لج .. آآآآه ..
مناف: سمالله عليك حبيبي ..
فارس: تعرفين تهمزين ..
مناف: يعني ..
فارس: واللي يسلمج .. تعالي همزين .. ظهري يعورني والله ..
مناف: زين الحين باجيك ..
فارس ومناف: ههههههه ..
فارس: الساعه كم الحين حياتي ؟
مناف: الحين الساعه 10 ونص ..
فارس: اوه بدري الوقت والله ..
مناف: ليش ؟
فارس: احس اني ابي انام ..
مناف: زين نام فديتك .. متى تبيني اقعدك ؟
فارس: لا بكره الصبح ما عندي شغل وايد .. الا شغل الشركه .. عادي اروح الشركه اي وقت ..
مناف: عيل شاللي يمنعك تنام الحين ؟
فارس: مو شي انام من وقت ..
مناف: زين نام الحين وقوم الصبح من وقت ..
فارس: ما عندي شغل الصبح .. باتملل .. زين شو رايج امرج ونروح البحر ..
مناف: لا والله ..
فارس: مالج عذر .. بنروح الصبح مافي شي يخوف ..
مناف: لا لا لا لا
فارس: طلعتي خوافه ..
مناف: ههههه ..
فارس: زين تعرفين تسبحين ؟
مناف: لا والله ..
فارس: زين فرصه عشان اعلمج ..
مناف: لا مابي ..
فارس: فديت الدلوعه والله ..
مناف: زين متى بتنام ؟
فارس: مادري والله .. يمكن اطلع اتمشى شوي ..
مناف: زين انا بذاكر شوي .. وبما اخذ بريك باتصلك ..
فارس: زين حياتي ..
مناف: اتصل لي قبل ما تنام ..
فارس: ممممم .. اوكي ..
مناف: يلا حبيبي ..
فارس: الله يحفظج الغاليه ..
مناف: وياك يا قلبي ..
سكر منها وتم يطالع التلفزيون شوي .. تملل وماعرف شو يسوي .. قرر انه يطلع يحوط فالشوارع .. اما مناف جابلت كتبها وقعدت تدرس ..
" يشهد الله الوفا فيك هو سر الهوى .. ولا يا مكثر قلوب(ن) محبتها سراب "
طبعا كلكم مستغربين من الغموض اللي بحياة فاطمه ويوسف .. و ودكم تعرفون سر المفاجأه اللي برسالة يوسف والرد اللي ينتظره يوسف من فاطمه .. طبعا فاطمه ما وصلتها رسالة يوسف .. ممممم .. خلكم معاي شوي وبتعرفون اللي قاعد يصير .. اول شي بقولكم مفاجأة يوسف لفاطمه .. كانت رسالته لها كالتالي ..
(( حبيبة قلبي فاطمه ..
خلاص انا اتخذت قرار وما راح اتراجع عنه .. انتي لي وانا لج .. قريب بدخل من الباب .. وبنكون اسعد عروسين ان شءالله .. حبيبة قلبي .. انتظر ردج على رسالتي ..
محبج .. يوسف )) ..
هالرساله وصلت لشخص من العيله قبل ما توصل ليد فاطمه .. فقرر هالشخص انه يكتب رساله ليوسف وفاطمه كانت رسالته لفاطمه كالتالي ..
(( فاطمه يا من اغلي بهالدنيا .. ذبحج الحب يا قلبي .. انتي بنت وانجرفتي ورا مشاعرج .. و هالشي ما راح يغير نظرتي لج .. لاني اعرف انج متربيه عدل .. انتي تخافين ربج في كل شي .. ويوسف قال انه بيدخل من الباب .. واحنا في انتظار خطوته ..
محبج للابد ....... )) ..
هالشخص كتب الرساله وحطها في نفس المكان اللي اتفقوا عليه .. وكان ينتظر فاطمه تاخذها .. واليوم فاطمه مرت تشيك على المكان .. ولقت الرساله .. كانت فرحانه انها لقت الرساله .. بس ما كانت تدري بمحتواها .. خذت الرساله فتحتها وقرتها .. قرت اول سطر وانصدمت .. حست ان الدم وقف في جسمها .. طوت الرساله وبسرعه ركضت غرفتها .. سكرت الباب وفتحت الرساله تقراها بتمعن .. كانت تقرى الرساله وقلبها يخفق بسرعه .. ماتت من الخوف .. تلخبطت .. حست بضيقه في صدرها .. رفعت راسها تتلفت حواليها .. كانت في حاله لا تحسد عليها .. ما عرفت كيف تتصرف .. قعدت على الارض والرساله بيدها .. تشتت تفكيرها .. قرت الرساله فوق الـ 10 مرات .. وهي مو مستوعبه الكلمات اللي تقراها ..
فاطمه " انا في احلم ولا في دنيا الواقع ؟ هاي الرساله من يوسف ولا من من ؟ يوسف يكتب اسمه .. هالرساله بدون اسم .. في حد عرف بمكان الرسايل .. من يكون هالشخص ؟ وليش كتب لي رساله ؟ هل هو من بيتنا ولا برا بيتنا ؟ " .. غمضت عيونها و حصنت ريولها وهي تفكر .. كانت مو عارفه شو تسوي .. تصيح ولا تضحك .. حست ان الدنيا تدور فيها .. قامت وقعدت على السرير وطلعت الصندوق اللي فيه رسايل يوسف .. فتحت آخر رساله منه .. وكانت كالتالي ..
(( حياتي فطومتي ..
وحشتيني .. شفتي الشباب البايخين كنسلوا سفرتنا مصر .. آآآه مقهور منهم .. بس تدرين احيانا اقول احسن ما سافرنا .. عشان اكون قريب منج .. مع اني كنت ناوي اجيب معاي الاهرامات هديه لج .. هههههه .. انتي تستاهلين والله .. على فكره حبيبتي .. في بالي شي ودي اقوله لج .. بس اول ابي اتأكد منه .. وفالرساله الجايبه بقولج اياه .. اعتبريه مفاجأه او خبر حلو .. انتظر ردج يالغاليه ..
محبج يوسف ..))
تمت فاطمه تقرى الرساله وهي محتاره ..
فاطمه " ليكون طول هالوقت كل الرسايل مو من يوسف ؟ من ممكن يسوي جي ؟ وليش؟ " .. فاطمه صدعت من كثر التفكير .. فتحت الرساله المجهوله وقعدت تقراها مرات ومرات .. تمت تقرى بالرساله لين غطت عينها على الفراش .. نامت وهي ماسكه الرساله المجهوله بيدها ..
( يا ترى من يكون هالشخص ؟ وليش تصرف بهالطريقه ؟ ) ..
...............
في بيت سلمان .. هنادي ويوسف والجوهره وابراهيم كلهم متجمعين فالصاله ..
سلمان: اخبارج مع الدوام جوجو ؟
الجوهره: الحمدلله .. بس كنا مرتاحين ..
الكل: هههههه
هنادي: الله يعينج ياختي ..
الجوهره: المدرسه صدعه وتعب والله ..
ابراهيم: كلها كم سنه وتتقاعدين ..
يوسف: ليش كم عمرج اختي ؟
ابراهيم ويوسف: هههههه
الجوهره: لا والله .. تعيبون علي .. سمالله عليكم يالشياب ..
يوسف: حددي .. انا توني 24 سنه .. جان النسيب عدى السن القانوني ..
الكل: هههههه ..
هنادي رن جوالها .. ونواف كان متصل لها .. شافت شاشة الجوال .. قامت عنهم وردت عليه ..
نواف: السلام عليكم ..
هنادي: عليكم السلام .. هلا والله
نواف: شلونج حبيبتي ؟
هنادي: الحمدلله بخير ..
نواف: وين انتي ؟
هنادي: فاليبت ..
نواف: امرج نطلع نتمشى شوي .. ضايق صدري حيل ..
هنادي بخوف: سمالله عليك نواف شفيك ؟
نواف: والله مادري .. بس ودي اقعد مع احد واسولف ..
هنادي: خلاص حبيبي بس البس واجهز وباتصلك ..
نواف: بارك الله فيج يبه ..
هنادي: الله وياك حبيبي ..
سكرت من نواف وكانت تحاتيه وخايفه عليه .. دخلت عليهم الصاله ونادت خالها ..
هنادي: خالي تعال شوي ..
سلمان: ان شاءالله ..
راح لها ..
سلمان: شفيج يبه ؟
هنادي: مافيني شي .. بس كلمني نواف وبيمر علي .. بنروح شوي نتمشى ..
سلمان مبتسم: زين يبه هاذي ريلج .. واخذي راحتج معاه ..
هنادي مبتسمه: فديتك يا خالي .. زي عيل بروح البس على ما يجي نواف ..
سلمان بفرح: الله يحفظكم ..
رجع سلمان الصاله وهنادي راحت تلبس .. خلصت واتصلت بنواف .. مر عليها وطلعوا يتمشون .. كانت الساعه 7 العشاء ..
هنادي: شفيك حبيبي ؟
نواف: احس بضيقه ..
هنادي: سمالله عليك .. زين خل ننزل نشرب شي ..
نواف: ان شاءالله حياتي ..
راحوا كوفي شوب .. خذوا لهم طاوله على جنب .. وقعدوا يسولفون .. ابراهيم كان متضايق من موضوع صار له بالشغل بس ماحب يقوله لهنادي الا يوم دخلوا الكوفي شوب
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك