رواية نهاية حبك اعدامي -89
هنادي: مافيني شي .. بس كلمني نواف وبيمر علي .. بنروح شوي نتمشى ..
سلمان مبتسم: زين يبه هاذي ريلج .. واخذي راحتج معاه ..
هنادي مبتسمه: فديتك يا خالي .. زي عيل بروح البس على ما يجي نواف ..
سلمان بفرح: الله يحفظكم ..
رجع سلمان الصاله وهنادي راحت تلبس .. خلصت واتصلت بنواف .. مر عليها وطلعوا يتمشون .. كانت الساعه 7 العشاء ..
هنادي: شفيك حبيبي ؟
نواف: احس بضيقه ..
هنادي: سمالله عليك .. زين خل ننزل نشرب شي ..
نواف: ان شاءالله حياتي ..
راحوا كوفي شوب .. خذوا لهم طاوله على جنب .. وقعدوا يسولفون .. ابراهيم كان متضايق من موضوع صار له بالشغل بس ماحب يقوله لهنادي الا يوم دخلوا الكوفي شوب .. هنادي طلبت عصير ليمون بالنعناع .. ونواف طلب له شاي .. قعدوا مجابلين بعض ونواف يناظر عيون هنادي بشوق ..
نواف: جهزتي كل شي حبيبتي ؟
هنادي: تقريبا .. بس باقي لي بعض الاشياء الثانويه ..
نواف: خلصتي من الفستان ؟
هنادي: اي خلصت البروفات .. بيجهز قبل موعد العرس باسبوع ..
نواف: ليش قبل باسبوع ؟
هنادي: حبيبي .. هالخيايط ما ينضمنون .. مستحيل اقولهم موعد العرس بالضبط .. وايد عرايس انكبوا مع هالخيايط .. تخيل بعضهم يسلمونهم الفساتين يوم العرس الصبح ..
نواف: بل ..
هنادي: انا قلت له قبل موعد العرس باسبوع ..
نواف: عدل شغلج حبيبتي .. زين ناقصج شي حياتي ؟
هنادي: لا الحمدلله مو ناقصني شي ..
نواف: حبيبتي لا تستحين قولي ترا عادي ..
هنادي مبتسمه: فديت عمرك .. انت مو مقصر والله ..
نواف: والله من غلاج ودي افرش لج الارض ذهب ..
هناي بخجل: حياتي يا نواف ..
نواف شرب رشفة شاي من الكوب .. ورفع راسه يطالع هنادي ..
نواف: هنادي بقولج شي مضيق علي عيشتي ..
هنادي بخوف: قول فديتك ..
نواف: انا حاس بالذنب ..
هنادي: ليش ؟
نواف: صارت مشكله في المحل .. وفصلت واحد ماله ذنب .. وهو فقير ومحتاج .. طردته من المحل .. والحين اكتشفت انه بريء وماله خص بالسالفه ..
هنادي: شسالفه بالضبط ؟
نواف: عندي بالمحل مجموعة عمال .. وتعرفين الالماسات لو انسرق منها شي الكل يتعاقب .. انا كنت اشيك على المجوهرات والعقود اللي بالخزنه ولاحظت بعض العقود اختفت .. لما جمعتهم وسألتهم ثلاثه منهم اتهموا هالريال وانا ما صدقت فالبدايه .. لان من وظفت هالريال وما شفت من وراه الا كل خير .. فتشت مكتبه ولقيت كم عقد عنده .. انا انصدمت .. مو مصدق هالانسان يخون .. اتخذت الاجراءات اللازمه .. فصلته وعطته المقسوم وراح حتى وانا اعطيه فلوسه مو مصدق .. بس ربي كشف الثلاثه اللي اتهموه .. من بعد هالسالفه ركبت كيمرات صغيره في زوايا صغيره فالمحل كامل محد قدر يميزها .. وكشفتهم ..
هنادي متأثره: زين ..
نواف: والله تنفست بعمق .. دخلت عليهم وكفختهم ثلاثتهم من القهر اللي فيني .. اتصلت بالشرطه وقطيتهم فالسجن .. بس الحين الريال اللي فصلته ابي ارجعه المحل ومو عارف شلون ..
هنادي: بسيطه يا قلبي ..
نواف: شلون ؟
هنادي: انت ما غلطت .. لان الادله كانت ضده .. بس ربي كشف الحراميه .. انت اتصل له تلفون وقوله اللي صار كله ..
نواف: يعني اعتذر له ؟
هنادي: مو عيب تعتذر له ..
نواف: ادري .. بس منحرج منه ..
هنادي: انت بتكلمه فالتلفون ما راح تقابله ..
نواف: ممممم .. خلاص بتوكل ..
هنادي مبتسمه: فديتك يا نواف..
نواف: والله هم وانزاح .. فديت يا هنوده ..
هنادي منحرجه: الحمدلله انك ارتحت الحين ..
نواف: من غيرج شكنت بسوي ..
هنادي: انا موجوده فديتك .. اي وقت تكون متضايق ولا عندك مشكله .. بتلقاني موجوده عشانك ..
نواف: الله لا يحرمني منج ..
تموا يسولفون مع بعض بوناسه .. و نواف وايد ارتاح لما قال لهنادي اللي مضايقه .. حب اهتمامها بكل ما يخصه .. و ردها وحلولها كانت رائعه بالنسبه له .. تطمن على شريكة حياته .. كان فرحان بهنادي وايد ..
فاطمه حالتها حاله من بعد ما قرت الرساله .. لها يومين محد يشوفها .. تروح الجامعه وترجع البيت وعلى طول تدخل غرفتها وماتطلع منها .. الكل حاط في باله انها تدرس للامتحانات .. عشان جي محد كان يزعجها .. فاطمه كانت تتفكر في ابوها واخوانها ..
فاطمه " يعني لا بابا ولا فارس ولا عزيز متغيرين .. كلهم عادين وطبيعين .. عيال عمي محد مرنا علينا منهم الا محمد وخالد .. وبعد هم طبيعين .. يا ربي من يكون هالشخص .؟" .. فاطمه ذبحها التفكير .. كانت تدرس شوي وكل ما تتذكر السالفه تسرح وتنسى نفسها .. مر على هالاحداث تقريبا يومين ..
يوسف كان وايد قلق على فاطمه .. فجأه انقطعت اخبارها .. ولا يعرف عنها شي .. وهو على نار ينتظر رسالتها
يوسف " فديت قلبها ؟ شاللي مأخرها ..؟ ليش ماردت على رسالتي .. ليكون على بالها اني العب عليها او اكذب عليها .. الله يستر بس " .. رن جوال يوسف وكان عبدالعزيز متصله ..
يوسف: هلا والله
عبدالعزيز: شحالك بوخليفه ..
يوسف: طيب الله يسم .. اعلومك ؟
عبدالعزيز: تمام .. انت وين ؟
يوسف: فالبيت ..
عبدالعزيز: مشغول ؟
يوسف: لا والله
عبدالعزيز: شو رايك نطلع .. نروح سينما ..
يوسف: ليش لا ..
عبدالعزيز: حلو ..
يوسف: اي فلم ؟
عبدالعزيز: مادري .. علوه بيقطع التذاكر .. بس كنت ابي اتأكد لو بتجي معانا ..
يوسف: افا عليك الغالي .. ماردك ..
عبدالعزيز مبتسم: تسلم لي والله .. زين امرك ؟
يوسف: لا انا بجي بيتكم .. وبنطلع بسيارتي او سيارتك ..
عبدالعزيز: اوكي ..
سكر يوسف وهو يفكر في فاطمه .. لبس وطلع من البيت .. راح بيت بوفارس .. اتصل بعبدالعزيز وهو عند الباب ..
عبدالعزيز: هلا والله بوخليفه ..
يوسف: انا عند الباب ..
عبدالعزيز: ادخل الميلس الحين بنزل لك ..
نزل يوسف وراح صوب الميلس .. شيك على مكان رسايلهم ولقى رساله .. خذها ودخل الميلس .. توه بيفتح الرساله دخل عليه بوفارس .. حط الرساله في جيبه وقام يسلم على بوفارس ..
بوفارس: السلام عليكم ..
يوسف: عليكم السلام ..
بوفارس: شحالك يبه ؟
يوسف: طيب الله يسلمك .. شخباركم ؟
بوفارس: الحمدلله طيبين ..
يوسف: عساكم دوم ..
بوفارس مبتسم: الله يسلمك .. شحاله سلمان ؟
يوسف: طيب الحمدلله ..
بوفارس: وينه ما يبين هالايام ؟
يوسف: مشغول مع المحل ..
بوفارس: الله يوفقه ان شاءالله .. وعقبال ما نشوفك مشارك خالك وتساعده ..
يوسف ابتسم: الله يسلمك الغالي ..
دخل عليهم عبدالعزيز ..
عبدالعزيز: السلام عليكم ..
يوسف و بوفارس: عليكم السلام ..
قرب عبدالعزيز وباس راس ابوه .. وراح يسلم على يوسف ..
بوفارس: شلون مخلي الريال فالميلس بروحه ؟
عبدالعزيز: كنت البس يبه ..
بوفارس: هالكثر تلبس ..
يوسف: ههههه .. عادي اصلا توني واصل .. ما صار لي 5 دقايق ..
بوفارس: وين بتروحون ؟
عبدالعزيز: بنروح السينما ..
بوفارس: ما تشبعون هياته انتوا ؟
يوسف وعبدالعزيز: ههههههه
عبدالعزيز: ما عندنا شي ..
بوفارس: شو اخبار دراستك يا يوسف ؟
يوسف: خلاص هالكورس بتخرج ..
بوفارس مبتسم: اووووه تستاهل .. خلاص بتفتك من الجامعه وبترتاح ..
يوسف: الله يسلمك .. اي والله بافتك .. هم وانزاح .. الحين بتفرغ لنفسي عدل ..
بوفارس: الله يوفقك ان شاءالله ..
يوسف: وياك ان شاءالله .. وعقبال عبدالعزيز ..
بوفارس: ان شاءالله ..
دخل عليهم فارس وكان يطالع يوسف بنظره غريبه .. دخل وراه محمد واخوانه ..
فارس: السلام عليكم ..
الكل: عليكم السلام ..
محمد واخوانه سلموا على عمهم وبعدين على يوسف ..
فارس: شحالك بوخليفه ؟
يوسف: طيب .. وانت علومك يا بونايف ؟
فارس: الحمدلله طيب ..
علي: يلا شباب ..
محمد: على وين شباب ؟
فاضل: بنروح السينما ..
محمد: خونه ..
فارس: ياللي ما تستحون على ويوهكم ..
علي: ليش ليش ؟
محمد: ما قلتوا بنعزم التوأم محمد وفارس ..
فارس: والله انكم نذول ..
بوفارس يطالعهم وهو ميت من الضحك ..
فاضل: انتوا تحبون اتدعسون .. مادري وين تروحون ..
فارس: شو فيها يعني لو رفعت السمعه وقلت فارس بنروح السينما ..
محمد: ايه عليك يا فارس .. قم قم اعزمك على تلفزيون بيتنا .. بلا تذاكر ولا مخاسير ..
الكل: ههههههه ..
بوفارس قام بيطلع: الله يساعدكم كلكم ..
الشباب: ههههههه ..
يوسف: زين ولا تزعلون تعالوا معانا ودفعوا لنا حق التذاكر والاكل .. بعد شتبون ..
فاضل وعبدالعزيز: ههاااااااي ..
علي: حلوه منك يا بوخليفه ..
فارس: صج والله .. اوانكم قطعتونا ..
يوسف: انا اقترحت عليكم وانتوا اللي ما بغيتوا ..
علي: يلا شباب نروح عنهم ..
محمد: لو خالد هني جان ماقصر عزمنا على حسابه ..
عبدالعزيز: بوبلاش كثر منه ..
علي: يمه منكم يالزطاطوه ..
فارس: هههههه ..
فاضل: زين يلا العرض ما زال ساري .. بتجون ولا شلون ؟
فارس: انت ماعندك مذهب .. شو بعد بتجون ولا شلون ..
محمد: ايه عليك يا فروس .. قم قم اعزمك على تلفزيون بيتنا .. بلا تذاكر ولا مخاسير ..
علي: بعد ..
الكل: ههههههه ..
يوسف: زين يلا شباب .. على حسابي ..
فارس: ما تقصر بوخليفه .. بس ورانا مشوار ..
فاضل: اقولكم يتدعسون ..
محمد: يغارون منا ..
فارس: حدهم ..
علي: اقول .. يلا شباب ..
محمد: الله يحفظكم .. وان شاءالله يطلع الفلم سخيف ..
فارس: هههههه
فاضل: حتى لو طلع سخيف عادي ..
يوسف: حالتكم صعبه ..
عبدالعزيز: يلا شباب ..
فارس ومحمد: سلام ..
...............
طلعوا الشباب الاربعه في سياره وحده .. كلهم ركبوا سيارة يوسف .. فارس ومحمد تموا فالميلس شوي وبعدين طلعوا يتمشون .. الشباب راحوا السينما وتونسوا وايد .. بعد هالوناسه كلن توجه لبيته .. يوسف كان متحرقص يبي يقرى رد فاطمه على رسالته .. اول مادخل البيت استلمه سلمان وتم يسولف معاه يمكن نص ساعه .. ويوسف يكلمه بس باله مع الرساله ..
يوسف: زين خالي بروح اخذ لي شور وببدل وبرجع لك ..
سلمان: زين انتظرك ..
راح يوسف غرفته سكر الباب وطلع الرساله من جيبه .. قرب الرساله من خشمه عشان يستنشق ريحة فاطمه .. عقد حواجبه لانه ما شم الريحه اللي تعود عليها .. فتح الرساله وهو مبتسم .. قرى الرساله و ابتسامته بدت تختفي .. بدى يتنفس بسرعه .. حس بالتوتر والقلق .. عرق و ويهه صار احمر .. قعد على السرير وهو مستغرب من اللي قراه .. كانت الرساله الموجهه ليوسف مشابه للرساله اللي وصلت فاطمه .. كانت كالتالي ..
(( الغالي يوسف ..
انت كونك شخص محترم .. مصلي وتخاف ربك .. قلبك تعلق بفاطمه .. وانت قررت انك تدخل من الباب .. فاعتقد انها بانتظار هالخطوه منك .. لا تخيب ظنها فيك .. وظني انا بعد .. ابغي اكون اول من يبارك لك ..
تحياتي .... )) ..
يوسف بلع ريقه بصعوبه .. قرى الرساله مره ثانيه .. ماعرف كيف يعبر عن شعوره ..
يوسف " من ممكن يكون هالشخص .. يالله طحت من عينهم ؟ بس من يكون هالشخص ؟ وهل ممكن انه قرى غير اخر رساله طرشتها ؟ ومن متى يراقبنا ويعرف بهالشي ؟ وليش كتب لي رساله وما واجهني ؟" ..
تساؤلات وايد كانت في بال يوسف .. تم قاعد على السرير يفكر ويقلب الافكار في مخه ..
يوسف " معقوله يكون عبدالعزيز ؟ او فارس؟ او بوفارس ؟ ولا حد من عيال عمها ؟ بس اليوم كلهم معاي وكانوا طبيعين مثل كل يوم .. فارس كان طبيعي ويضحك معاي .. بوفارس دخل الميلس وقعد يسولف معاي .. عبدالعزيز طول الاسبوع معاه ولا حسيت بتغير من ناحيته .. فاضل وعلي مثل ما هم ؟ محمد بعد عادي وطبيعي معاي .. من ممكن يكون هالشخص ؟ معقوله تكون احد خواتها او امها ؟ لا مستحيل .. يالله اللي مستغرب منه ليش كتب لي رساله ما جاني و واجهني ؟ وش الغرض من كتابته للرساله ؟ هل فاطمه تدري او لأ ؟ من متى كان يدري هالشخص ؟ يا ربي وش اللي يصير حولي ؟ معقوله يكون خالي سلمان ؟ لا لا لا .. هو ما يروح بيت بوفارس وايد .. من ممكن يكون هالشخص ؟ " .. تم يوسف يفكر ويفكر .. سلمان طق الباب ودخل .. يوسف على طول خبى الرساله في الدرج .. سلمان حس ان يوسف فيه شي .. كان متلخبط ومو على بعضه ..
سلمان: وينك تأخرت يا ريال ..
يوسف: ها ..
سلمان: للحين ما تسبحت ؟
يوسف: ها .. لا كنت اتكلم فالتلفون .. الحين بتسبح ..
سلمان " اي تلفون اللي تتكلم فيه يا يوسف .. تلفونك تحت فالصاله .. شسالفته هالولد ؟" ..
سلمان: زين خلص عشان نتكلم في موضوعك ..
يوسف: ان شاءالله ..
سلمان طلع وراح عند هنادي .. يوسف خذ له شور سريع وانضم لهم ..
سلمان: نعيما ..
يوسف: الله ينعم عليك ..
سلمان: عن اذنج هنوده ..
هنادي: عندكم اذاني .. شتبون في اذني ..
سلمان: هههههه .. تصبحين على خير ..
هنادي: وانت بخير خالي ..
طلعوا الشباب وراحوا غرفة يوسف ..
سلمان: شفيك يوسف .. احسك مو على بعضك ؟
يوسف: مصدع ..
سلمان فهم ان يوسف ما يبي يتكلم في اي شي ..
سلمان: زين عيل ارتاح انت .. وبخصوص موضوعك ووقت ما ترتاح نتكلم فيه ..
يوسف: اسمحلي خالي ..
سلمان مبتسم: مسموح الغالي .. يلا يبه تصبح على خير ..
يوسف: وانت بخير خالي ..
طلع سلمان وهو يفكر في يوسف .. اما يوسف المسكين ماقدر ينام من كثر التفكير ..
( يا ترى من يكون هالشخص ؟ وهل يوسف بيوفي بوعده لفاطمه ؟ )
" قالت انت السهد قلت الليل جاني .. والليالي كيف تصبر عن قمرها .. قالت انت العمر وايامي ثواني .. والثواني طولت كيف اختصرها " ..
الساعه 2 ونص بالليل .. يوسف حايس في غرفته مو عارف يقعد على حيله .. يقرى الرساله ومتوتر .. خايف ان فاطمه صار لها شي .. خايف ان فاطمه اهلها دروا .. تم يفكر ويفكر .. ما غمض له جفن .. طلع من الغرفه وراح صوب غرفة سلمان .. طبعا سلمان هو والليل صاروا اصحاب .. كان سلمان يقرى كتاب على ضوء خفيف فالغرفه .. دخل عليه يوسف ولقاه قاعد .. سلمان سكر الكتاب وتم يطالع يوسف القلق .. يوسف تقدم من السرير وقعد جنب خاله ..
سلمان: قولي وش في خاطرك يبه ..
يوسف نزل راسه و زفر زفرة قلق ..
يوسف: خالي انا لازم اروح اخطب فاطمه ..
سلمان مبتسم: ان شاءالله .. هالاسبوع نروج لهم ..
يوسف: اقرب وقت الله يخليك ..
سلمان: حاضرين لك والله .. بس شفيك قلق ومتوتر ؟
يوسف: ها .. قلق .. لاني مستحي منك شوي ..
سلمان: افا عليك يا بوخليفه .. واخيرا بنفرح فيك .. الله يوفقك بفاطمه اختيارك ..
يوسف ابتسم: الله يسلمك يا خالي ..
يوسف حس بالراحه شوي لانه تأكد ان مو خاله سلمان اللي كتب له الرساله ..
سلمان: يوسف ممكن اسألك سؤال ؟
يوسف بخوف: تفضل ..
سلمان: لو رحنا بيت بوفارس وقالوا ان البنت محيره لاحد عيال عمها .. لا تزعل ..
يقاطعه يوسف: لا خالي ارجوك لا تخوفني ..
سلمان استغرب من ردة فعل يوسف ..
يوسف " ليكون اهلها دروا و بيزوجونها واحد من عيال عمها غصبن عنها .. باموت لو صار هالشي " ..
سلمان: شفيك يوسف .. انت مو على بعضك من رجعت من برا .. شصاير ؟
يوسف: ما فيني شي .. بس الله يخليك خالي لا تخوفني ..
سلمان ما حب يناقش يوسف المتوتر ..
سلمان: ان شاءالله .. زين متى نروح لهم ؟
يوسف: اول كلم بوفارس ونحدد يوم نزورهم فيه ..
سلمان: ان شاءالله ..
يوسف قام من مكانه بيطلع ..
يوسف: مشكور خالي .. وعقبالك ..
سلمان اكتفى بابتسامه ..
يوسف: تصبح على خير .. لو قعدت لين الفجر قعدني ..
سلمان: بأذن الله ..
طلع يوسف وهو يفكر في خاله والغموض اللي يحيط سلمان .. دخل الغرفه وشاف الرساله .. بلع ريقه بصعوبه خذ الرساله حطها مع باقي رسايل فاطمه .. انسدح على السرير وحاول ينام بس كان متوتر ويفكر في الموضوع وايد .. لان اللي حيره هو الشخص اللي كاتب الرساله ..
يوسف " يالله يا ترى من يكون هالشخص .. فشله شلون بجابلهم .. المشكله مو عارف من يكون .. بس اتمنى ما صار شي على حبيبة قلبي فطومه .. ايه عليها الرقيقه .. بس انا بدخل من الباب باذن الله" ..
يوسف الحيران تم يفكر طول الليل .. اما فاطمه اللي كانت في عالم ثاني .. حالتها حاله البنت ..
طلعت الشمس معلنه عن بدء يوم جديد .. خالد فتح عيونه على رنة الموبايل .. مريم كانت متصله تقعده للدوام ..
خالد: هلا حبيبتي ..
مريم: صباح الخير حبيبي ..
خالد: صباح المرايم والله ..
مريم مبتسمه: فديت قلبك .. يلا حبيبي صحصح الساعه 6 بالضبط ..
خالد: ان شاءالله يا قلبي ..
مريم: عفيه فديت قلبك .. كلمني لي وصلت المكتب ..
خالد: ان شاءالله ..
سكرت من خالد وهي مبتسمه .. قامت ونزلت عند امها وابوها .. دخلت وسلمت عليهم ..
ام فارس: مرايم يمه .. جيبي الحليب من الثلاجه ..
مريم: ان شاءالله ..
بوفارس: شو اخبارج مع خالد يا عروسه ؟
مريم منحرجه: الحمدلله ..
بوفارس: كل شي تمام ؟
مريم: الحمدلله كل شي تمام ..
بوفارس: الله يهنيكم ان شاءالله .. والفال حق الباقي ..
ام فارس: آمين يا رب العالمين ..
بوفارس: زين خلصتي جهازج ولا بعدج ؟
مريم: تقريبا ..
بوفارس: شو باقي لج ؟
مريم: الفستان .. والعقد .. وبعض الاشياء مثل ملابس وعطور ..
بوفارس: عسى مو قاصرج شي يمه ؟
مريم: الحمدلله مو قاصرني شي .. وخالد ما يقصر ..
بوفارس: يسلم راسه ولد اخوي ..
ام فارس: والله ما عليه قصور .. ورايته بيضه الولد .. قايم في بنتي وحاطها بعيونه ..
بوفارس: خالد ريال الله يحفظه ..
مريم كانت تسمع تمدح امها وابوها في خالد .. وكانت طايره من الوناسه .. دخلت عليهم ايمان و وراها عبدالعزيز ..
ايمان: بابا حبيبي .. وباست راسه ..
بوفارس مبتسم: هلا والله حبيبة ابوها ..
ايمان: اليوم عندي امتحان .. ادعوا لي ..
بوفارس: موفقه يالغاليه ..
عبدالعزيز: وين جسوم ؟
ام فارس: راقد ..
عبدالعزيز: سمالله عليه تعبان ولا فيه شي ؟
بوفارس: لا ما فيه شي .. الولد أجز .. خلص امتحاناته امس ..
ايمان: يا حظه والله ..
عبدالعزيز: ما بقى على امتحاناتج شي انتي بعد ..
ايمان: باقي لي اسبوع بس .. بس احسه طويل وايد ..
مريم: بيمر بسرعه بتشوفين .. بس لان عندج دراسه وامتحانات تحسين الوقت ثقيل ..
ايمان: الا احس الوقت يغلس علي ..
الكل: ههههههه ..
ام فارس: الله يوفقج يمه ..
بوفارس: متى بتطلع نتايج جسوم ؟
ام فارس: الاسبوع الجاي ..
دخلت عليهم فاطمه و وراها فارس .. سلموا على امهم وابوهم وقعدوا يتريقون .. فاطمه ما كانت على بعضها .. صبت لها حليب وتمت تشرب بهدوء .. وفارس كان اهدى منها ..
بوفارس: شعندك قاعد من وقت اليوم ؟
فارس: ابي اخلص اشغال المكتب .. بنأثث ولازم اشرف على العمال .. واراقبهم ..
فاطمه من سمعت كلمة ( اراقبهم ) بدت تتنفس بخوف ..
بوفارس: يعطيك العافيه ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك