رواية اسيرة البدر -9
.:. مرت الايام ليمن يه موعد الملجه .. ملجة خليفه من غدير .. الاهل كلهم كانوا مجتمعين ابيت العروس .. الحريم بالصاله والريايل بالميلس .. كانت سلوى وعلى كثر ما تقدر اتبين نفسها سعيده ومستانسه جدام الناس .. بس للاسف كانت اتحس بالحزن والالم .:.
.:. لميا كانت اتسولف مع امنه عن دراستها ابلبنان .. ونجلا ونور كانوا يسولفون عن خليفه وشلون اهو مستانس من هالملجه .. داليا كانت اتسولف وتبتسم مع ام خليفه وام فواز وام دانه .. اما عن الدانه كانت بالحوش اتلف وتدور بنفسها .. خايفه تدخل البيت وتختلط بالناس مع انهم كانوا اهلها بس هم كانت خايفه .. كانت اتحس ان البنات بيعلقون على شكلها واهي متعدله وهم طالعه مو ليمن هناك .. ومن الاساس ما كانت تبي تحظر الملجه بس امها الحت عليها بالحظور .:.
.:. اما عن غدير كانت تتعدل وتتزين بالدار واخوها البدر كان معاها .:.
التفتت له غدير تسال : بدور .. انت شمقعدك معاي اهني ؟؟ ليش مو بالميلس مع الريايل ؟؟
سال بدر : ليش ان شالله انا مضايقج بشي ؟؟
ابتسمت له : اكيد مو امضايقني بس استغربت انك مو بالميلس يعني
بدر : سلامتج والله بس متملل
غدير ( تسال ) : يعني ناوي تنزل معاي ؟؟
بدر : ان شالله
ضحكت غدير : انا اخبر ابنيه تنزل مع العروس للملجه ومو ريال
بدر : عاد انا بغير هالقاعده
.:. وبعدها قرب البدر يم الدريشه وشاف الدانه بنت عمه واقفه بالحوش وتتامل المرسيدس بيدها .:.
استغرب البدر واحتار : شتسوي الدانه بنفسها بالحوش ؟؟
سالت غدير : اكو شي يا البدر ؟؟ قلت شي ؟؟
بدر : سلامتج .. بس اسمحيلي بنزل تحت قبلج .. اكو شغله ابي اسويها
غدير ( بابتسامه ) : مو مشكله .. والله معاك
.:. وبعدها ابتسم لغدير وفتج باب الدار ونزل تحت وطلع من الباب الخلفي للحوش وقرب من الدانه اللي كانت واقفه عند المرسيدس .:.
.:. وفجاه .:.
سال البدر : لهدرجه عاجبتج السياره ؟؟
تخرعت الدانه والتفتت له : بدر !! خرعتني
ابتسم بدر : اسف والله .. بس شفتج من الدريشه وانتي تتمشين بروحج بالحوش واستغربت ليش انج مو بالصاله مع الحريم
دانه ( بتلعثم ) : اممم .. حسيت ان الجو حلو وحبيت اتمشى
سال بدر : تتمشين بروحج ؟؟ وبيوم الملجه ؟؟
وبعدها استفسر : الا ما قلتيلي يا الدانه انتي ليش كنسلتي ملجتنا بعد ما كنتي موافقه ؟؟
.:. تضايقت دانه من هالسؤال وتذكرت محتوى الرسال وحست بالحزن والالم بس ما بينت هالشي .:.
دانه : اعتقد ان عمي بوبدر قالك اني استخرت كذا مره وما ارتحت للملجه
وسالت : وليش تسال ؟؟ انت لهدرجه كنت تبيني ؟؟
توهق بدر : انا ؟؟
دانه : اي انت
بدر : والله ما ادري شاقولج يا دانه
استفهمت دانه : شنو ؟؟ اكو شي بخاطرك تبي اتقوله وما قلته بيوم الخطبه ؟؟
ابتسم بدر : سلامتج يا بنت عمي .. ماكو شي
وبعدها سال : لهدرجه عاجبتج السياره ؟؟
ابتسمت دانه : ليش اهي سيارتك ؟؟
بدر : اي والله
دانه : ما شالله حلوه وهم كشخه .. انا عموما احب المرسيدس بس ما قلتلي متى شريتها ؟؟
بدر : والله يا الدانه انا ما شريتها .. هالسياره تقدمت لي هديه ابيوم ميلادي
استفسرت دانه : من منو ؟؟
بدر : من شخص اعتقد انه عزيز بالنسبه لي
.:. تعجبت الدانه وهم استغربت .. شلون تكون عزيزه عليه وهو ليمن الحين ما عرفها وما شافها ؟؟ .:.
سالت الدانه : ومنو هالشخص ؟؟
بدر : بتصدقيني اذا قلتلج ما ادري ؟؟
دانه ( مستفهمه ) : ما تدري ؟؟
بدر : اي والله ما ادري
دانه ( تسال ) : شلون ما تدري وانت اتقول ان السياره من شخص عزيز بالنسبه لك ؟؟
بدر : السالفه امعقده شويه .. واعتقد انج ما راح تفهمين شي .. بس اتمنى منج ان لو اي شخص اسالج عن المرسيدس قوليله ان البدر ربحها من كوبونات المطاعم حلو ؟؟
ضحكت دانه : وشكو كوبونات المطاعم بالشخص العزيز الحين ؟؟
بدر : مو قلتلج السالفه امعقده شويه
ابتسمت دانه :ok تم .. اذا اي شخص سالني عن السياره بقوله هديه من شخص عزيز
تخرع البدر من هالرد : شنو ؟؟
ضحكت دانه : اتغشمر معاك .. اشفيك تخرعت ؟؟ اذا اي شخص سالني بقوله انك ربحتها من الكوبونات حلو ؟؟
ابتسم بدر : حلو
وسال : والحين ما تبين تدخلين بالصاله مع الحريم ؟؟
تضايقت دانه : اذا انت بتدخل ادخل .. اما انا بتم اهني
استغرب بدر وسال : اكو شي يا الدانه ؟؟ ليش ما تبين تدخلين ؟؟
ما اعرفت شتقول : قلتلك الجو حلو
تعجب بدر وهم سال : اكو شي يا الدانه ؟؟
دانه : ماكو شي .. قلتلك الجو حلو وبس .. انت ليش حنان ؟؟
ضحك بدر : الحين انا حنان ؟؟
دانه : اي والله حنان .. عدت السؤال علي اكثر من مره وهم اقولك ماكو شي
بدر : السموحه منج .. ليكون تسندرتي ؟؟
دانه ( بابتسامه ) : ابد
***************
.:. اما بالبيت .. كانت غدير توها نازله من الدار .. ناداها ابوها عشان تلبس شيلتها وتدخل الميلس عشان يملج الملا .. خليفه كان قاعد على يسار الملا .. دخلت غدير الميلس وسلمت واهي مستحيه ومنزله راسها .. وقعدت على يمين الملا .:.
.:. بوبدر وبوخليفه وبوفواز وبوالدانه وابوهم الكبير وهم خالد اخو خليفه ونايف ولد داليا وفواز المتخلف كانوا كلهم هذول مجتمعين بالميلس عشان الملجه .:.
***************
ابتسم البدر وقال : اسمحيلي يا الدانه بس انا لازم اروح الميلس الحين .. اعتقد انهم بيملجون الحين
ابتسمت دانه بالمثل : الله معاك
.:. وبعدها دخل البدر الميلس وشاف ان كل شي زاهب وان الملا بيملج الحين .:.
سال نايف : انت وين كنت يا البدر ؟
بدر : بالحوش
استغرب نايف : وشتسوي بالحوش ؟؟
بدر : سلامتك والله .. كنت اشم هوا
.:. وبعدها .:.
التفتت الملا لغدير يسال : انتي موافقه يا ابنيتي يا غدير على خليفه ؟؟
ردتت مستحيه : اي
وبعدها التفت الملا لخليفه يسال : وانت يا ولدي يا خليفه موافق ؟؟
ابتسم خليفه : اكيد موافق
.:. ارتاحت غدير من يوم سمعت رد خليفه اللي طمنها وحست ان بالفعل خليفه يبيها ومو مغصوب عليها مثل ما كانت شاكه .:.
.:. وبعدها .:.
سال الملا : وين الشهود ؟؟ نبي 4 شهود
ابتسم بوخليفه : انا واخوي بوبدر ونايف والبدر
الملا : على بركة الله ان شالله
.:. كانوا البنات نجلا ونور ولميا وامنه متلصقين عند الباب يسمعون ويشوفون كل شي .. ما استحملوا اللقافه وحبوا يتجسسون .. اما عن سلوى كانت بزاويا حاسه بالحزن .. والدانه ليما الحين بالحوش .. وفجاه .. انفتح باب الميلس بالغلط ونجلا ونور ولميا ومعاهم امون طاحوا وتحنقلوا بالميلس جدام الريايل .:.
صرخت داليا : يا عيب الشووم !!
وحطت سلوى ايدها على ويهها من الفشله : الله يغربل ابليسكم يا بنات
تخرع الملا : بسم الله الرحمن الرحيم .. شسالفه ؟؟
وضحك البدر : يا شين اللقافه والله
.:. وبعدها .:.
توهقت امنه : ابيه
وتخرعت لميا : اشصار ؟؟
وما استوعبت نجلا : شيايبنا اهني ؟؟
وتفشلت نور : حسبي الله عليكم .. من لقافتنا طحنا بالميلس
.:. بعد هالمشهد ماتت غدير من الضحك .. وتعجب خليفه من هالموقف وهو ساكت .. وتفشلوا الريايل جدام الملا .:.
بوبدر ( وهو معصبب ) : انتوا شتسون اهني ؟؟ هاا ؟؟
ابتسمت امنه من الوهقه وخربطت : ياتت رياح قويه وقطتنا عندكم بالغلط يا عمي !!
تفشلت لميا وسحبت ايد البنات : يالله تعاالوااا بررره
.:. وبعدها طلت لميا ويه البنات وهم متفشلين من هالموقف المحرج وكل وحده قعدت اتلوم الثانيه انها السبب .:.
امنه : كله منج يا نجول .. دستي على ريولي بالغلط وطحت
ردتت نجلا : قومي انزييين .. انا شكو الحين ؟؟ نور اهي اللي كانت وراج ومو انا
وعصبت نور : انجبيييي .. لمووي السبب اهي اللي فتحت الباب بالغلط
تعجبت لميا : احلفي عااد ؟؟ الحيين بتحطون اللوم على انا !؟
.:. وبعدها .:.
بسكم عااد .. كلكم غلطانين .. محد قالكم تتليقفون
ردتت امنه : والله يا سلوى ما قدرنا نستحمل .. نبي انشوف شيصير
سالت سلوى : اشمعنى انا استحملت
امنه : ما ادري
وقالت لميا : ممكن تنسون السالفه لو سمحتوا ؟؟
.:. بعد ما ملجوا .:.
راح الملا .. وطلعوا الريايل من الميلس مخلين خليفه ويه غدير بروحهم عشان ياخذون راحتهم بالسوالف .:.
سال خليفه مبتسم : ليش منزله راسج ؟؟
ردتت واهي مستحيه : استحي
ضحك خليفه : اشدعوه غدور ؟؟ انا ولد عمج
غدير : يعني لو ولد عمي ما استحي ؟؟ مو ريال ؟؟
خليفه : اكييد ريال بس هم ولد عمج
.:. سكتت غدير وما علقت .:.
سال خليفه : ما قلتيلي تبين انسافر على طول بدون عرس ؟؟
غدير ( بتردد ) : امم والله ما ادري .. انت شتقول ؟؟ انسوي عرس او ماله داعي يعني ؟؟
خليفه : انا اسالج انتي
غدير : وانا سالتك انت
ضحك خليفه : بس انا سالج قبل .. ها شقلتي ؟؟
ابتسمت غدير : امم .. تعطيني مده افكر ؟؟ يومين او 3 ؟؟
ابتسم خليفه بالمثل : اخذي راحتج
احنا ملجنا على غدير وخلصنا وانتي ليمن الحين بالحوش ؟؟
استانست دانه : يعني خلاص خلصنا ؟؟ بنرد البيت ؟؟
الحلقة 18 .:.
احنا ملجنا على غدير وخلصنا وانتي ليمن الحين بالحوش ؟؟
استانست دانه : يعني خلاص خلصنا ؟؟ بنرد البيت ؟؟
استغرب بدر : وانتي شفيج مستعيله عالبيت ؟؟
دانه : امم .. سلامتك بس انا تعبانه شوي
سال بدر : سلامتج يا الدانه .. شفيج ؟؟
ابتسمت دانه : الله يسلمك .. ماكو شي والله بس جسمي مرهق شوي
.:. وفجاه .:.
انتي وينج يا الدانه ؟؟ من اول ما دخلنا البيت ليمن الحين وانتي ما بينتي ؟؟ ها ؟؟
التفتت الدانه : هلا يمه .. اكاني اهني بالحوش
سالت امها مستفهمه : وشتسوين من مساعه بالحوش ؟؟ ما اتقولين شتسوين ؟؟
توهقت دانه : ماكو والله .. بس كنت اتمشى
تعجبت امها : تتمشين ؟؟ واحنا عندنا ملجه ؟؟ تتمسخرين انتي ؟؟
.:. وبعدها .:.
تليقفت البدر : اشفيج على الدانه يا مرت عمي ؟؟ انا اللي قلت لها اتيي الحوش كنت ابيها اتشوف سيارتي اليديده
استغربت امها : اشدعوه يا البدر ؟؟ من مساعه عااد ؟؟
بدر : اممم تقدرين اتقولين ان هم كنا انسولف شوي
استانست ام الدانه : افهم من كلامك انكم راح تملجون يعني ؟؟
انصدم بدر : نملج ؟؟
وتضايقت دانه : يمه شنو هالحجي هذا ؟؟ احنا بس كنا انسولف سوالف عاديه مالها خص بالملجه .. وبعدين سالفة الملجه هذي اعتقد انها تسكرت للابد
وبعدها حب البدر انه يغير الجو شويه وسال : اشرايكم ادوركم بالسياره ؟؟
ابتسمت الدانه : انا ما عندي مانع بالمره
وردتت امها : بالنسبه لي ما اعتقد اني بدور معاكم .. انا رايحه للحريم الحين .. دوروا بنفسكم
تخرعت الدانه : وانا يا يمه ؟؟ بتخليني بنفسي ويه بدر ؟؟
ضحك بدر : اشدعوه يا الدانه باكلج انا ؟؟
انحرجت دانه : مو عن والله .. بس فشله
ابتسم بدر : مو فشله ولا شي .. ويالله اركبي السياره خل اندور شوي وبعدها انرد البيت
.:. كانت سعادة الدانه وبالرغم من كل شي ما تنوصف .. اهي بالسياره تدور بنفسها مع البدر .. بالسياره المرسيدس اللي اهدته اياها بيوم ميلاده .. كانت ساكته ومستحيه واهو كان يبتسم ويسولف معاها .:.
سال بدر : ما اشتغلتي ليمن الحين يا دانه ؟؟
ردتت وهي مستحيه : ليما الحين
بدر ( مستفهم ) : وشناويه اتسوين ؟؟
دانه : ما ادري والله
وابتسمت وسالت : ليش السؤال ؟؟
بدر : سلامتج والله .. اهو مجرد سؤال واسف اذا حسيتيه تطفل او شي
دانه : بالعكس
وبعدها سال بدر : وين تبينا نتمشى الحين ؟؟
دانه ( بابتسامه ) : المكان اللي تبيه
وقالت بقلبها مستانسه : مو مهم المكان ما دامي معاك الحين يا البدر
سال بدر : شرايج بالبحر ؟؟
دانه : تقصد الكورنيش يعني ؟؟
بدر : لا .. اقصد البحر اللي عند الريتس
تخرعت دانه : ابيييه .. واييد ابعييد .. شيودينا اهناك ؟؟
ضحك البدر :okok خلاص مو رايحين هناك .. شفيج متخرعه ؟؟ قلتلج ما باكلج انا
انحرجت دانه : اسفه
ابتسم البدر : ماله داعي الاسف
وبعدها سال : انزين اشرايج نتمشى بشارع النصر ؟؟
استغربت دانه : هم بعييد .. وبعدين انت اشفيك اتوديني اماكن مشبوهه ؟؟
تعجب البدر : اماكن مشبوهه ؟؟
دانه : اي .. البحر اخر الدنيا .. والنصر شارع الشباب .. بالله عليك شيودينا هناك ؟؟
ضحك بدر : ماكو والله .. بس هذول الاماكن اللي دوم اتردد لهم
دانه : تتردد لهم لما اتكون بروحك او مع ربعك ومو معاي انا
تاسف البدر : اسف والله .. هم مو قصدي شي
ابتسمت وقالت : وهم ما كان له داعي الاسف .. انت ما سويت شي
ابتسم بدر بالمثل وسال : المهم وين تبينا نتمشى الحين ؟؟
دانه : انا اقول نتمشى بالشوارع وبعدها انرد البيت
بدر : اللي اتشوفينه
دانه ( بابنسامه ) : تسلم
بدر : الله يسلمج
.:. يا محلاه من يوم للدانه اللي حست ان الحزن والالم اختفوا باليوم هذا لمجرد انها مع البدر .. اما بالنسبه لسلوى وبعد ما خلصت الملجه وانتهى اليوم دخلت دارها اتصيح ميته .. حاولت انها تكتم كل الحزن والالم اللي كانت اتحسه .. ولما املجوا وخلصوا وكل واحد راح لبيته ما قدرت تكتم اكثر وطلعت كل المكتوب بقلبها .. كانت اتصيح بحرقه ليما ابتلت المخده بالدموع .:.
سلوى ( وهي اتصيح ) : انا السبب ليش اني ما قلت لك من قبل اني احبك يا خليفه .. انا السبب .. بس الندم ما يفيد الحين بشي
********
.:.باليوم التالي .:.
.:. عالساعه 8 الصبح .:.
.:. كانت الشيخه نجلا تسولف بالتليفون .:.
نجلا : سالم .. قلت لك ما اقدر اشوفك .. وللمره المليون اقولك .. انا صج اني اكلم شباب بس ما اطلع معاهم .. وما اعرف شي اسمه حب
سالم : انزين يمكن لو شفتيني اتحبيني انا ؟؟
نجلا : قلتلك ما افكر بشي اسمه حب .. ومهما سويت ما راح اطلع معاك لو شنو اتسوي فاهم ؟؟
تعب سالم : يعني مافي امل ؟؟
نجلا : بالمره
عصب سالم : عيل انجلعي
عصبت نجلا اهي الثانيه : انت اللي انجلع يا الحقيير
وبسرعه سكرت الخط : مالت علييك
***************
.:. وبالبنك .:.
.:. ابشغل نايف ولد داليا .. كان قاعد يحط حسابات بالكمبيوتر وفجاه ياته ابنيه وهي تبتسم .:.
البنت : السلام عليكم اخوي
رد نايف : هلا والله .. وعليكم السلام
البنت ( تسال ) : انت نايف سعود ؟؟
نايف : اي نعم .. هذا انا
ابتسمت البنت وقالت : انا ليلي وقالوا لي بالرسبشن ايي اهني
سال نايف : اهاا .. انتي الموظفه اليديده ؟؟
ليلي ( بابتسامه ) : اي
نايف : يا هلا والله
ليلى : هلا فيك اخوي تسلم والله
نايف : الله يسلمج
.:. وبعدها .:.
سالت ليلي : في اشيا بالكمبيوتر معقده واخاف لو تعبثت فيها اعفس الدنيا .. ما عليك امر لو اتعلمني شويه
ابتسم نايف : ان شالله
***************
يمه .. نايف كلم ابوي وقاله عن سفرتي حق لبنان او ليمن الحين ؟؟
لهلا ما كلمو
عصبت امنه : وشينطر يعني ؟؟ ليش ما كلمه ؟؟ هاا ؟؟
داليا : انا ما اليت لنايف شي عن هيدا الموضوع
امنه ( تستفسر ) : وليش ليمن الحين ما قلتيله ؟؟ وسالتيه ؟؟
داليا : وليه ما بتساليه لنايف لحالك ؟؟
امنه : ما ابي .. انتي اساليه .. وعفييه يمه قوليله يكلم ابوي بسرعه .. انا قاعده على اعصابي والله ابي اشوف شبيقول
تنهدت داليا : ok ok بشوف
**************
*هذا للحسابات .. وهذا للتثبيت .. وهذا تلغين فيه الحساب ..والباقي انتي اتعرفينهم
ابتسمت ليلى : تسلم يا اخوي يا نايف
ابتسم نايف بالمثل : الله يسلمج .. ما سوينا شي .. ولو
ليلى ( تسال ) : انت من متى تشتغل اهني ؟؟
نايف : من اول ما خلصت الثانويه ما يبت نسبه فشتغلت اهني
ليلى ( بابتسامه ) : وانا هم نفسك .. توني امخلصه الثانويه .. وللاسف ما يبت نسبه واكاني اشتغلت اهني
نايف : الله يوفقج ان شالله
ليلى : ويوفقك معاي
نايف : تسلمين .. والحين بسج سوالف والتفتي لشغلج لا يطب علينا المدير وانتي توج يديده ما صار لج ساعه ويخصم علينا الراتب
ضحكت ليلى : ان شالله .. بس عفيه اخوي نايف لا تحسبني ثرثاره او من هالقبيل .. انا بس كنت اسالك عن الشغل والله
ابتسم نايف : ادري
.:. وبعدها راحت ليلى لمكتبها امجابله نايف .. وبدت بالشغل اللي حسته مسلي وحلو .:.
***************
.:. ابيت بوبدر .:.
.:. ابدار البدر .. قام من النوم بنفسه واستغرب ان ماكو مسج واصله من اسيرته .:.
سال نفسه : اشله ما طرشتلي شي اليوم ؟؟
وتنهد واستنتج : اكيد ليمن الحين زعلانه مني ومتضايقه بسبب الحركه بيوم المكتبه .. بس انا والله العظيم ما كنت اقصد شي .. كل اللي كنت ابيه اني اشوفها واعرف منو هالبنت ؟؟
***************
.:. كانت الدانه توها قايمه من النوم ولهسبب ما طرشت للبدر شي .. كانت مستانسه من امس يوم اركبت المرسيدس مع البدر وتموا يتمشون بالشوارع .. فراحت عليها نومه وما قامت غير الحين .. واول ما قامت دخلت الحمام وغسلت ويهها وبسرعه امسحته بالمنشفه .. وطلعت من الحمام وفتحت الكمبيوتر عشان تكتب للبدر مسج .:.
.:. بعد ما قام البدر من النوم وغسل ويها ولبس ثيابه طلع من الدار بيروح الجامعه عشان يشوف نتيجته لو اسمه مكتوب مع المتخرجين او لا .. وتوه راكب المرسيدس الا يرن موبايله نغمة المسج .. استانس لما شاف ان المسج من اسيرته .:.
فتح المسج وقراه : صباح النور يا البدر .. اسفه طولت عليك .. بالعاده اقومك من صباح الله خير .. بس اتمنى انك قايم الحين .. انا بس حبيت اقولك ما تتصور شكثر انا مستانسه من امس واليوم .. وانت السبب بالشي هذا
تعجب بدر واستغرب : دوم هالوناسه ان شالله .. بس شكو انا السبب ؟؟
***************
.:. من كثر البجي اللي بجته سلوى بسبب الملجه امس ما نامت عدل وليمن الحين ما قامت من النوم .. انفتح باب دارها بشويش وبعدها تسكر هم بشويش وانقفل .. خطوات خفيفه اتقرب من صوب سريرها وهي نايمه ومو حاسه بشي .. ايد خشنه لمست جسمها وهي لابسه قميص نوم .:.
همس بوبدر بشويش : والله يا سلوى .. وهذي حلفه انج بتكونين لي بيوم من الايام
.:. وبعدها ابعد ايده وقام من عندها وفتح باب الدار وطلع بره .:.
ادمعت عيون سلوى : حتى النوم ما اقدر ارتاح فيه ؟؟ بس والله .. وهذي حلفه انك ما بتقدر تلمسني بيوم مثل ما انت مخطط يا بوبدر
***************
*****.:. لما وصل بدر الجامعه بسرعه راح صوب النتايج عشان يشوف اسمه .:.
غمض عيونه وتمنى : يالله عسى اسمي يكون مع المتخرجين .. امين
.:. وتم امغمض عيونه ليمن انتبه له رفيجه حسن .:.
ضحك حسن : بدور .. يعني ليمن متى بتم امغمض عيونك ؟؟ شلون بتشوف النتيجه وانت امغمض ؟؟ هاا ؟؟
رد البدر وهو ليمن الحين امغمض : هذا مو كانه صوتك يا حسون ؟؟ هلا حسون .. والله ما ادري شاقولك يا معود .. خايف ابطل عيوني وانصدم بالرسوب المر
حسن : عيل خلك امغمض وانا بشوف النتيجه لك
وسال : بس ما قلتلي كم رقم قيدك ؟؟
.:.
الحلقة 19 .:.
.:. بالجامعه .:.
رد البدر وهو ليمن الحين امغمض : هذا مو كانه صوتك يا حسون ؟؟ هلا حسون .. والله ما ادري شاقولك يا معود .. خايف ابطل عيوني وانصدم بالرسوب المر
حسن : عيل خلك امغمض وانا بشوف النتيجه لك
وسال : بس ما قلتلي كم رقم قيدك ؟؟
بدر : 6767
حسن : اشكر فنك .. حتى رقم قيدك حلو
بدر ( خايف من الحسد ) : قول ما شالله لا ارسب الحين بسبتك
حسن : الحين اشدخل هذا بذاك ؟؟ على العموم .. خلك امغمض ليمن اقولك النتيجه
***************
.:. عالساعه 2 الظهر .. توه نايف راد البيت من بعد ما خلص من دوامه بالبنك .. شافته امه داليا ونادته .:.
داليا : نايف .. تعا لهون
استفهم نايف : هلا يمه .. اكو شي ؟؟
داليا : ايه .. بادي اياك ابشي
نايف : امري ؟
داليا : بادي احكي معك بخصوص امنه وعن سفرها للدراسه ابلبنان
سال نايف : يعني شلون ؟؟ تبين اتشوفين رايي لو كنت موافق على هالشي ؟؟
داليا : مو هيدا الشي .. سواء وافئت انتا او ما وافئت .. الكلمه الاولى اتكون البياك .. ولهيدا الشي انا بادي اياك اتروح البياك وتسئلوا عن هالسفر
تضايق نايف : اسمحيلي يمه .. اسف .. ما اقدر اسوي هالشي .. مثل ما انتي عارفه ان علاقتنا بالوالد انقطعت من سنين .. وانا الصراحه نسيت ان عندي ابو وهم عايش .. والحين وبكل بساطه تبيني اروح له عشان اساله عن رايه بسفرة امنه ؟؟ ومنو يكون اصلا عشان نساله عن رايه ؟؟ اهو من زمان مو داري عنا !! واعتقد انه نسى ان عنده عيال منج .. فماله حق يتدخل الحين بحياتنا .. واذا على سفرة امنه انا عن نفسي ما عندي مانع .. وراح اوقع من بداله
تنهدت داليا : كل هالشي انا بعرفو .. بس مهما يكون هيدا بياك
عصب نايف : بياك وبياك .. ذبحتيني ابياك !! ليش اهو حسسنا ان اهو ابونا بيوم عشان انحط له اهميه واهتمام عشان نعمل له حساب ؟؟ وللمره الثانيه اقولج يا يمه اهو ماله حق يتدخل بحياتنا وهو ناسينا من سنين .. احنا حتى اخواني من مرته الثانيه ما انعرفهم .. يعني عفييه انسي هالفكره موليه لاني ما بروح له .. واذا على امون طمنيها وقوليلها ان نايف موافق
***************
يبه احبك
رد ابوه وهو يقرا الجريده : حبتك العافيه
يبه انت ليش بارد معاي جذي ؟؟ اقولك احبك اتقولي حبتك العافيه ؟؟ على الاقل قولي انا هم احبك يا حبيبي
عصب ابوه : فوازوو اذا ينونك وتخلفك اشتغلوا الحين روح جربه مع غيري .. انا مشغول ومو فاضيلك
فواز :ok انت بس قولي انا هم احبك واوعدك اني بخليك
تنرفز ابوه : فواز .. قلتلك عن الينون
تنهد فواز : يبه انت اشفيك ؟؟ ليش ما اتحبني ؟؟
بوفواز : ومنو قالك اني ما احبك ؟؟ مو انت ولدي وشي طبيعي احبك
استانس فواز وسال : يعني يصير الابو يحب ويتزوج ولده ؟؟
انصدم ابوه : شنو !!
***************
. توه البدر راد البيت من بعد ما شاف النتيجه .. دخل الصاله وما شاف غير داليا وكانت اتشوف تليفزيون وتشرب شاي .:.
سال البدر : اشلونج مرت ابوي ؟؟
داليا ( بابتسامه ) : امنيحا .. انت كيفيك ؟؟
وبعدها سالت : ايه صحيح شو عالنتيجه ؟؟ تخرجت ؟؟
رد البدر : مو هذا اهو .. للاسف .. انا
تخرعت داليا : شوو ؟؟ ما تخرجت ؟؟
بدر ( يسال ) : اول شي وين الجماعه ؟؟
داليا : بياك بالدار .. وغدير بالمطبخ .. وسلوى وامنه ونايف ابظن بالدار
تنهد البدر : ممكن وما عليج امر اتنادينهم يا مرت ابوي ؟؟
***************
جوزيف .. انا بفكر ابسافر فرنسا ادروس هونيك
استغرب جوزيف : شو هيدا الحكي يا ساندرا ؟؟ وانا ؟؟ بظل لحالي هون ؟؟
ساندرا ( تسال ) : وشو يعني ؟؟
جوزيف : شو .. وشو يعني ؟؟
ساندرا : اممم .. ok ارجع انت سافر لبنان مع الماما والبابا .. اما انا عن جد ابسافر فرنسا
جوزيف : مستحيل
سالت ساندرا : وشو هوا هيدا المستحيل ؟؟
جوزيف : مستحيل ارجع لبنان بعد ما اتعبت وانا ابشوف عمل هون بقطر وهلا باديك
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك