رواية انا حر ما انهان والحر ما يرجع لشخص يهينه -33
رديت لورا لا ارادي اتهيأ لي اني سمعت مطر ولا هي صج قالت مطر .. دارت الدنيا فيني بس يودت روحي
كملت بوقاحه : انتي فرقتيني عن مطر ... انا و مطر ننحب بعض
ما كنت ابا اسمعها عايشه استخفت من اجهضت ولا تتكلم جد ... عطيتها ظهري كنت ابا اروح حجرتي اتم ابروحي .. ما اتحمل خلااص ... كل يوم حد يطري لي سالفه عايشه و مطر ..
زختني من اجتوفي : تعالي ما خلصنا كلامنا
افتريت صوبها و قلتها باحتقار : شو تبين تقولين اكثر ما سدج
حسيت بها بتصيح : انا و مطر نحب بعض و ما تزوجج الا علشان يبعد شك طارق و امه عن حبنا
غضمت اعيوني بعذاب صح صح مطر كذا مره يلمح لي بس ما كنت افهم قصده ..
قلتها و انا بعدني مغمضه اعيوني : هديني مب طايقتنج ...
بس هي رصت ع اجتوفي و قالت : لا بتسمعين كل كلمه في خاطري
فتحت اعيوني اطالعها و قلتها : انتي ما تستحين ع ويهج ...
عايشه بدت تهاجمني : قولي الي بتقولينه عني انا خلااص ما اتحمل قرب مطر منج يوم جفتكم من ساعه في الحوي كنت بتخبل
تذكرت امس فقلت : علشان جي صحتي البارحه في لمستشفى
بكل وقاحه قالت : هي ما اطيقه اجوفه قربج ...
لاعت جبدي منها و الله لو رجعت برجع بويهاا.. لان هاي الانسان وايد وصخه ماشي فرق بينها و بين الحقاره و الزباله
قلتها بكل احتقار : و الله انج ما تستاهلين طارق ..هالانسان صدق شيخج ..
قالت بكل جرأه : دام عايبنج طارق خذيه شو تبين في مطر ..
ارتجفت من الغيض من كلامها الي كان شرات لسعة نار حرقتني ...افكارها وصخه ..رفعت ايدي و عطيتها كف من الخاطر و يا ليته بردت النار الي شبت في قلبي ..ما توقعت ردت فعلي لانها صرخت متألمه و حطت ايدها ع خدها ...يودت روحي من اتفل عليها بس انا ما اوصخ روحي بوحده شراتها
افتريت عنها كنت بنزل بس لحقتني و زختني من شيلتي
و قالت بعصبيه : تعالي ما خلصت كلامي
حاولت ايير شيلتي بس ما قدرت لاني كنت بموقف الاضعف ...
دزتني لليدار وواجهتني و قالت : مطر ما يحبج افهمي
صرخت عليها : وخري عن دربي ..
عايشه بانفعال : مطر يحبني و انتي فرقتي من بينا ..
قلتها بنبره هاديه اغايضها : يوم مطر بيقول ابعد عن دروبه هذيج الساعه ببعد ..
عايشه و جنه استفزتها نبره صوتي دزتني مره بقوه ع ليدار
و قالت : تدرين انه ما بقولج
قلتها بنفس النبره اغايضها : لانه يحبني و يباني "واشرت ع روحي " انـــــــــــــــــــــــا
حسيت ان عايشه فولت زختني من اجتوفي و حاولت ادزني عرفت انها اتبا اتفرني من فوق السطح
طالعتها بخوف يوم جفت شيطان الغيره بعيونها
قلتها بخوف : يا المينونه بطيح
حاولت اتمسك بها بس هي كانت تبعدني عنها تبا اتدزني
و صرخت علي : هدي مطر ودريه....
صديت لورا دارت الدنيا فيني يوم جفت الارض رديت اطالعها
بس هي كانت مصره : ودري مطر
ودزتني اكثر
غمضت اعيوني و قلت : عايشه اعقلي
عايشه معانده : لا ودري مطر
حسيت صج بطيح حاولت ابعدها عني بس ما قدرت عنبوه توها ظاهره من المستشفى و جي قوتها حاولت ادزها بس ما قدرت كنت بصيح بس يودت روحي
هزتني و كأني خلااص بطيح : بتودرين مطر
ما عرفت شو اقولها اسكتها و اقولها هي خلااص بودره و هو فعلا انا شو ابا بمطر اذا صج الي يباها عايشه ما جذبت دوم يقول بتزوج الي احبها ..يعني طلعت عايشه .. حسيت بطعم الخيانه و الغدر .. حسيت بألم بصدري ..شسوي شو الحل
فتحت اعيوني اصرخ يوم هزتني حسيت خلااص اني بطيح باي لحظه
علشان جي سكت ما رديت عليها
هي اتقول بهستيريه : ودري مطر ودرييييييييييييييييييه ..
نقزنا انا و عايشه يوم سمعنا حس مطر : عايشه
صحت من جفت مطر بس هي كانت بتفرني تحت عفد صوبنا مطر و دزها بعيد ما صدقت مطر جريب مني دفنت ويهي بصدره اصيح و ارتجف من الخوف و صدق حسيت بالامان يوم لوى عليه
حتى عايشه من جافت مطر صاحت
مطر يسكتني : انتي بخير
هزيت راسي بمعنى هي و قلته : كانت بتفرني المينونه
عايشه اتصيح : ليش تبا اتزيد عذابي
مطر : مب بهاي الطريقه نحن ما اتفجنا جي
عايشه بغيض اول مره اخاف من شكل ويها : ما اتحمل اكثر ..تعبت خلااص
و يلست اطالعني باحتقار و جنها بتجتلني ارتجفت فحطيت راسي ع صدر مطر
قلته اترجاه : خلنا ننزل
عايشه تجدمت منا : مطر انت خلااص ما تقدر تستغنى عنها
مطر : عايشه بس عاد مب وقته
عايشه : قولها كيف علاقتنا كبيره
شهقت هاي ما تستحي يا ليتها بعد مب معرسه
مطر يرني صوبه : يلا ميثه انروح
حسيت براحه كنت متاكده ان مطر ما بتخلى عني و ان مطر عقله مب صغير يربع ورا هاي الي مب متربيه ...
بس عايشه وقفت بطريجنا
قلت حق مطر : خبر عليها زوجها
بس مطر طنشني و عايشه بعد
عايشه : الحينه تختار بيني و بينها
مطر جنه يكتم غيضه : بس عايشه مب وقته
عايشه معانده : لا تباني ولا ما تباني خبرها تراها مب مصدقه ..
رصيت ع ايد مطر بس مطر تم جامد ابمكانه
و قال : عايشه انزلي يلا
عايشه معانده : تباني ولا لاء
خوفتني ملامح مطر الجامده ما اعرف شو يدور في باله ..
عايشه و جنها بتصيح : تباني ولا لاء ..قول ليش سكت
مطر بصوت واطي : بس عايشه
عايشه : لا قولها انك تحبني قولها ولا خايف منها
قلت : مطر خلنا ننزل
عايشه : ليش خايفه من انه يسمعج
قلتها : من شو اخاف انتي وحده مريضه ..مطر يباني و انا اباه
مطر بنبره جاده : لا ميثه انا ما اصبر عن عايشه
حسيت جنه حد صفعني ع ويهي ..حسيت بالم بجرح كبير في قلبي ..ييرت ايدي من حضن ايده و طالعت عايشه جفتها تبتسم بانتصار
بس مطر ما سده السجاجين الي طعني فيها بقلبي ما سده
رجعت وخاطري مطعون يحر الجرح لما يكون على ايدك يا اغلى الناس
نزلت راسي بالارض عيل ليش تزوجتني .. شو تبا فيني ...ليش تبا اتضرني ..انا بشو ضريتك .. عمري ما بنسى لك هالموقف يا مطر ..احتقرتهم اثنينتهم حسيت بثجل بريولي
و انسحبت يلست ايير ريولي بالصعوبه مدري كيف وصلت حجرتي قفلت علي الباب و انا بداخلي مجروحه مهمومه .. شسوي اصيح ..؟؟ شو الي بتغير ؟؟ من تزوجته و بالاول الايام و هو محتشر علي ..احب غيرج و بتزوج غيرج ..
حضنت لمخده و صحت بصوت عالي جني ياهل .. يلست اصيح منهاره ..مب علشان مطر يحب غيري ..علشان كرامتي الي هانها جدام عايشه .. كانت بتذبحني ..بس علشان اودر مطر .. حلال عليج اشبعي فيه
مسحت دموعي حسيت بالتعب من كثر ما اصيح ..
تنهدت بعذاب حاولت ارقد بس متى العيون المتعبات يغمض لها جفن ..
حسيت راسي بنفجر ...نشيت من مكاني و رحت الحمام اتغسلت ..و كأن الموقف الي مر علي جنه كان حلم ...
بس صدق انا غبيه ..كل شي واضح .. و عزه و مطر و تصرفات عايشه و تنغيزاتها كلها اتلمح انهم يحبون بعض يحبون بعض عضيت ع شفايفي امنع دموعي اتهل ..
و كان عقلي رافض الفكره علشان جي كنت اتجاهل .. بس اليوم كل شي وضح ..
حسيت اني انا و طارق ضحية خيانه ...تنهدت بعذاب .. شو الي يهم الحينه ..مطر من اولها قال انه يحب غيري حق شو اصيح و اتعب روحي ...
رحت صوب المنظره .. بلعت ريجي شكل ويهي فضيع ..كيف برد اطلع لهم ما اقدر ملامح ويهي فضيعه .. سمعت اصوات برع ربعت الحمام و قفلت علي الباب بسرعه .. ما لي خاطر اجابل ويهه ابد .. يضربني و خذ عني بيت ابوي و فوق هاه كله امبهدلني
شهقت امنع دموعي اتهل مره ثانيه حسيت انه سمع شهقتي
نقزت يوم جفت مقبض الباب يتحرك ...
ياني صوته : ميثه
ما رديت عليه حسيت اني بحياتي ما كرهت انسان كثر ما كرهت هالمطر ...
دق الباب : افتحيي
قلته بكل غيض : انجلع
صخ شويه عقب قال : افتحي بكسر الباب ترا
قلته بسرعه : اكسره شو تبا فيني ..يا ال**** ..
مطر تم يحرك مقبض الباب بقوه : افتحي اقولج
صرخت و يلست اتناقز و اصيح يوم تذكرت الموقف : انجلع من ويهي انجلع ...
يلست اصيح بصوت عالي ...يلست فتره طويله في الحمام ما اعرف كم من مده .. عقب حسيت اني بختنق ..و مب رايمه اتنفس علشان جي ظهرت من الحمام ... كانت الغرفه فاضيه .. ارتحت يوم جفته محد ..
يلست اتسحب لين ما وصلت شبريتي ... غمضت اعيوني .. حسيت ابروده ..خفت لا امرض ..
يلست ادور لي ادول بين الادراج .. خذت لي حبتين .. و غمضت اعيوني .. سمعت صوت من ورا الدريشه الي ورا شبريتي ..
مدري ليش تذككرت الليالي الي مرت علي يوم كنت اسمع اصوات .. غريزتي قالت لي انها عايشه و لان اليوم الي ترقدت فيه بالمستشفى ابد محد روعني ...
غمضت اعيوني يوم سمعت ضربه مره ثانيه طنشت كنت بايعه الدنيا و ما فيها ... شو بيصير فيني بعد اكثر ما صار لي
بس رديت و فجيت اعيوني يوم سمعت
حس سعود يزرقرني : ميثه اني راقده ..؟؟
عضيت ع شفايفي حتى سعود يعرف بس ما بغى يقول لي حضنت المخده و دفنت نفسي تحت اللحاف و يلست اصيح بصوت عالي ..متألمه ...
نشيت عقب نص ساعه متروعه .. حسيت بروحي بطيح بحفره ...يلست ابسرعه ... بعده حزة العصر ... نشيت من مكاني مب عارفه شسوي ولا وين اروح .. رديت الحمام تغسلت و طلعت فكرت اطلع من الحجره ما ابا اتم بهاي الحجره ...
شليت البودره علشان اخفي الحزن الي ظاهر بملامح ويهي بس ما اعرف استخدم هالسوالف .. انا اشكثر مشتريه مكياج ما استخدمته غير مره ويا منيره فريت البودره بعصبيه ... شليت شيلتي و طلعت من حجرتي ... صديت لا ارادي صوب قفص الحمام مال سعود من جافني سعود فر الي بيده و ربع صوبي ..
صديت عنه الصوب الثاني و يلست ع عتبة باب حجرتي
سعود : ميثه كنتي راقده ؟؟
ما رديت عليه تميت صاده
قال باسف : زعلانه مني ؟؟
بعد ما رديت خفت اذا تكلمت بصيح ...فتميت ساكته ...
سعود : و الله ما سويت شي يضايج .. حتى اليوم حزة الغدا ولد خالوه محمد يعق علي نغزات بس انا لبسته لاني وعدتج ما اسوي مشاكل
بعد تميت ساكته يا ليتك اتعرف شو فيني يا سعود
بس سعود تم يقول : و صليت الفير و الظهر و العصر بالمسيد و الله
قلته بحزن: اتصلي علشان ترضى ربك مب ترضيني
سعود تم ساكت عقب قال : زين انا شو سويت
همست : ولا شي
سعود : عيل ها الي اسمه مطر ..
عضيت ع شفايفي امنع دموعي تحدر ...
بس سعود ما خلني بحالي : ميثه ما احب اجوفج مضايجه
محد لي بها الدنيا ..اشكي لمنوه ولا اخبر منوه ..ما تحملت .. دفنت راسي و يلست اصيح منهاره ...
سعود مب عارف شو يسوي تم واقف جريب مني و محتار
رفعت راسي و قلته بعذاب : ليش ما قلت لي ان مطر يحب عايشه
اتغير شكل سعود و جنه ما توقع مني اعرف
قلته : سالتك قبل و قلت لي لا
حسيت سعود مب عارف و مرتبك ..
رديت دفنت ويهي بحضن بيدي و اصيح ..
سعود : بتمين اتصيح شو يفيدج
قلته بألم و حسره : وين اروح ما عندي مكان ..حتى بيت ابوي خذه حقه "وصحت " قال بسكن فيه حبيبته يعني عايشه
سعود : يا ليت اقدر اسوي لج شي
صحت لاني اعرف محد بسوي لي شي ابد ...مسحت دموعي
سعود : ما بتفيدج امسحيها
قلته : الله يعينه طارق
سعود رد ابسرعه : طارق يستاهل
طالعته فكمل: هو شاكك و ساكت و مخلي حرمته ع هواها يخاف ع زعلها يستاهل ..
سكت ما كملت
بس قال : و انتي بعد اللوم عليج
طالعته بحده بس سعود كمل : انا بقولج الصدق
قلته : شو بتقول اكثر
سعود: انا اصلا دوم كنت اجوف مطر و عايشه يتجابلون ابروحهم في المطبخ او ورا البيت كذا مره زخيتهم
ترجيته : سعود خلااص لا اتعذبني
سعود ولا جني ترجيته : ها قبل ما يتزوجج
ميثه : ما فرقت
سعود : امبلى الحينه ما اجوفهم مطر ما قام يجابل عايشه شرات اول
قلته : بس يحبها ..
سعود : الحق عليج
وقفت ابسرعه مب متحمله كلام سعود
بس سعود قال بسرعه : بتخليه يتزوجها
قلته بكل صدق : اخوك ما يهمني
سعود : زين ميثه لا تضايجين
ابتسمت بالم : بحاول
سعود : زين اقهريه
قلته : كافي لو يجوفني ارمسك لحينه بنهد علي
سعود هز راسه : لا ميثه .. اتعدلي اكشخي مطر يحب كل شي حلو
قلته بدون اهتمام : ما عاد يهمني خليه يشبع بحرمة اخوه
سعود و جنه غمضته : ميثه
طالعته فقال : لا تطلعين من حياتنا ..انا مالي ذنب
ما عرفت شو ارد عليه سكت ..
كمل : دخيلج...لو تزوج مطر عايشه
قلته بسرعه : بتطلق من اخوك
سعود : بتزوجيني
طالعته يوم جفت ملامح ويهه البريئه فضحكت غصبن عني : ههههههههههههههههههههههههههههه
سعود طالعني مستغرب
عقب قال : اصبري سنتين غير هالسنه بتخرج من المدرسه و عقب اربع سنوات جامعه ولا خمس عقب بشتغل الين ما اكون نفسي 4 او خمس سنوات غيرها عقب بخطبج
كان يسولف و انا اضحك عليه ههههههههههههههههههههههه
سعود : ليش تضحكين
قلته : هههههههههههههههههه انت تعرف كم بيكون عمري ...
سعود : عادي شو يعني
ميثه : اذا يبت بنت بزوجها لك
سعود استانس : و الله زين
ضحكت مره ثانيه : ههههههههههههههههههههههه
يلست اكح من كثر ما اضحك ..
سعود : صحه صحه
سكت عقب قلت بنبره عاديه : اتصدق ابد ما توقعت اني اضحك جي و الله
سعود مستانس : جفتي كيف وجودي مهم في حياتج
قلته بسرعه : وااااااايد
ابتسمت له قلته : يأّن المغرب
سعود : الحينه بروح اصلي ما يهمج
قلته : الله يهديك ..يلا روح صلي
هز راسه و قال : لا تضايجين
قلته : ان شاء الله و"و ابتسمت له "
و قلت في خاطري الدنيا بعدها ابخير.. دشيت حجرتي اقصد حجرة مطر ما عاد لي مكان هني ..
عقب ما صليت المغرب صرحت الصالة ... سمعت يدوه محتشره داخل حجرتها ..ابتسمت رغم جراحي ردت الحياة بها البيت ...
افتريت صوب حجرتها جفت عزوه يالسه اتمشط شعرها بقوه و اتيييره لها غمضتني ...
صرخت : عزه شو اتسوين
نقزت عزه يوم جافتني و قالت : شو اسوي امشط شعر يدوه
يدوه اتصيح : قطعتني هاي البنيه ..اتصلي بمنيره خليها تاخذني بيتهم ما اتحمل العيشه هني بتموتيني هاي
رحت صوبها شليت شيلتها و غطيت شعرها حضنتها اخفف عنها ..لوت عزوه بوزها وحطت ايدينها بوسطها و جنه مب عايبنها ...
طالعتها بعصبيه و قلتها : خافي ربج
عزه : ما يخصج ..
يدوه تترجاني : يمه ميثه
تميت اطالع عزه بغيض : تدرين لو خبرت عليج شو بيصير بج
رفعت حياتها و قالت بكل وقاحه : شو بتقولين يعني
يدوه تترجاني : يمه ميثه ..
حضنتها اسكتها و قلت حق عزه : و الله يا عزه اذا جفتج مره ثانيه اتأذينها بفضحج
تغيرت ملامح ويها
يدوه : يمه الميث يمه
قلت حق عزه : و الله اني اتكلم جد
عزه : كيفي اكرها ما ادانيها هاي العيوز ..
وقفت و جابلتها و قلتها اذكرها : احيدج اتحبينهم الشواب
يدوه مدة أيدها لي تترجاني يوم ابتعدت عنها : يمه ميثه سمعيني ميثه
عزه : زين ما عليه تذكري كلامج .. ان ما خليت مطور يروغج من البيت
قلتها من كل قلبي : و الله اتسوين خير ..
عزه اتهدد : ما عليه .."طالعت يدوه وظهرت من الحجره "
يدوه : يمه ميثه
رديت صوبها و لويت عليها : ها يدوه امري
يدوه: ضربتني ضرب ...
بستها ع راسها و صحت بمراراه يوم قالت : اتصلي بمنيره اتيي تاخذني ما عندي مكان غير بيتها
قلتها و انا اصيح : انا بتم معاج هني ..انا بعد مالي مكان ..
يدوه : فديتج يمه الغريب يعطف عليك و الجريب شوفي شو يسوي فيك ..
هديتها : ما عليه الله كريم
وقف زختني : لا اتخليني بترد اتي
طمنتها : لا تحاتين ما بتقولج شي بروح اسوي لج عشى
يدوه : ما ابى شي "يرتني من كندورتي " يلسي هني معاي اقولج ..
ابتسمت و قلتها : زين خليني امشط شعرج ...
رتبت شعرها و عدلته يدوه : هي جي يمشطون الشعر و حسبي الله عليج يا عزوه ..يا بنت امج ..
ضحكت هههههههههه بس ماتت الضحكه فيني يوم انفج باب الحجره و جفت طارق واقف ع الباب صديت عنه بس هو دش الغرفه ...غمضني هالانسان ما يعرف حرمته شو مفكره اتسوي فيه ..الله يعينك ع اخوك و حرمتك ..
وقفت ابسرعه كنت بظهر لان ما اقدر احط عيني بعيونه انا و طارق مضروبين بنفس السهم ...
طارق : سلاام عليكم
ردينا : عليكم السلام ..
طارق : هلا بعيوزنا توه ما نور البيت
يدوه : عيز حيلك قول امين ..
طارق : خاطري اتحبيني لو يوم واحد بس
وقفت كنت بطلع اخليهم ع راحتهم بس طارق : وين ميثه يلسي انا مب غريب
كانت نظرات بالارض : لا بروح حجرتي
زختني يدوه من ثوبي : تعالي لا تخليني ابروحي
طارق : وين اتخليج بروحج عندها ريل اتجابله بعده
رديت و يلست جريب من يدوه
يدوه: اص انته ولا اتسوي اعلوم يا ولد امك
طارق يتشكى : جفتي ميثه كيف تعاملني ما اتحبني
ابتسمت ما رمت ارد عليه شو اقوله مالي ويهه ارمسه احس اذا جفته بصيح ...علشان جي كنت اتجاهله
دش سعود : انا ادوركم ..
يدوه : عمى بعينكك يا العيار من متى انت اتدور علي
سعود يحط ايده بويهه اونه انحرج : آآآآآآآآآآآآآآآي ويهي
ضحكني : ههههههههههههه
طارق : سعود مدري شبلاها هاي العيوز ما اتحبنا
ياه سعود و يلست جريب يدوه و حط راسه بحضنها
سعود : ربي ما يحرمني من هالحضن
ضربته بظهره : قوم عني يلا قم
طارق : مستانس بو فيصل ..
عدل بيلسه و محطي ايده مكان ضربته يدوه : آآآخخخخخخ يعور مب ايد عليج مب هينه شيول
يدوه اترمسني : جفتي محد يسال عني علشان انتي هني بس يسون روحهم مهتمين فيني
طارق : افااااااااااا
سعود : نييهايهاهياهياهاهاها ابصراحه هي انا ما اجذب
ضحكنا : ههههههههههههه
يدوه : انتوا اضحكوا اختكم بغت تجتلني ضربتني قطعت شعري آآي يا راسي
طارق : توه شلاتج ..
سعود حرج: و الله انا ما برتاح الا يوم بقص ايدها
يدوه تحمست : كفوا ولدي ريااااااااال من ظهر رياااااااااااااااال ...
سعود غمز لي : دهنت سيرها ..
طالعنا ام مطر يوم دشت علينا : شعندكم متيمعين هني
يدوه: شو تغارين عيالي هذيلاا ..
حاست بوزها ام مطر : كنا مفتكين منج ...
يدوه : انتي ما غيرج اتطرشين عزه علشان تعذبني ...
ام مطر محرجه : يالله لا تتبلين ع بنتي
يدوه : بنتج حيه
طارق : امايه الله يهداج
ام مطر : اص انته بعد معاها و الله لو مب اخو ك مطر جان عقيتها عند درام الزباله
سعود : بعقج وراها
يدوه تحمست : رياااااااااااااااااااااال ولد ريااااااااااااااال
ما عيبني رد سعود خزيته بنظراتي ففهم علي اني متضايجه منه
ام مطر : خلها تنفعك العيوز محد يباني بها البيت محد ..!!
طارق : فديتج و انا وين سرت
ام مطر : انته لو تحبني و تبا راحتي كننت سويت الي اباه ..
هز راسه طارق محتار مب عارف يرضي منو
ام مطر : وينها اسم الله عليها ..ست الحسن و الدلال ...
طارق شكله منحرج مني : وديتها بيت خالتها
ام مطر روحه بلا رده
يدوه : انتي شفيج ع بنت الناس ما تبينها روغيها من البيت
ام مطر اتنافخ : افففففففففف قم طارق نرمس برع قم يمه ...
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك