رواية انا حر ما انهان والحر ما يرجع لشخص يهينه -34
ام مطر : انته لو تحبني و تبا راحتي كننت سويت الي اباه ..
هز راسه طارق محتار مب عارف يرضي منو
ام مطر : وينها اسم الله عليها ..ست الحسن و الدلال ...
طارق شكله منحرج مني : وديتها بيت خالتها
ام مطر روحه بلا رده
يدوه : انتي شفيج ع بنت الناس ما تبينها روغيها من البيت
ام مطر اتنافخ : افففففففففف قم طارق نرمس برع قم يمه ...
يدوه : قم يالله روح ورا امك يا ولد امك
طارق : و الله شو هاي العيوز الحينه سعود ما يتنطق بكلمه الاصرخت ريال ولد ريال و حليلي انا قابضه لي ولد امك حشى من هاي العيوز
ام مطر : طارق يمه تعال فديتك ابا ارمسك
وقف طارق : من اعيوني
يدوه : روح الحقها عمى بعيونكم
ابتسمت ع يدوه وناسه يحليلها محد يعرف قدرها بها البيت
سعود : يدوه شسوت فيج عزوه ؟؟
يدوه ردت اتصيح و تحكي السالفه اكثر عن مره و تعيدها .. الله يهديك يا سعود رديت فتحت السالفه ..ما صدقت اسكتها ..
ما كان لي نفس اتعشى ... راح سعود يتعشى ام انا يلست عند يدوه كنت اراقبها يوم تاكل
سالتني : شس مضاينج يمه
هزيت راسي بمعنى ماشي
قلت : امبلى بس جان مطر خبريني دواه عندي ..و جان عزه سكتي عني ما اروم عليها
قلتها : لا اتخافين ما بتسوي لج شي مره ثاني .. اوعدج ..
صخت و يلست اتكمل اكلها .. عقب ساعات صار البيت هدوء .. قررت ارقد عند يدوه ووايد افكار كانت تدور في بالي ... بس قلت اشاور منيره قبل.. يدوه رقدت من حطت راسها ع المخده اما انا حاولت ارقد و كل ما اغفل تذكرت الي صار الظهر .. غطيت ويهي بيدي احاول ابعد هاي الذكرى المره .. سمعت صوت باب ينفتح قلبي تم يرقع من الخوف حسيت انه مطر .. و فاحت ريحة الزقاير و يا ريحة عطره ...
صديت الصوب الثاني و تغطيت ارتجف ..ما ابا اجوفه .. ما ادانيه .. اكرهه .. هالانسان ما يحس ولا عنده مشاعر ولا اخلاق ..غمضت اعيوني يوم وطي صوبي
هزني برقه : ميثه
سكت ما رديت عليه ... ما كنت طايجه قربه ..
هزني مره ثانيه : قومي يلا انروح حجرتنا ..
ما رديت كنت اتصارع مع مشاعري ..
قال لي : ادري انج مب راقده نشي ترا بشلج و الله ..
بالفعل حاول يشلني بس ع طول يلست و جابلته .. ما كنت اجوف ملامح ويهه ولا هو لان الحجره مظلمه .. كنت اجوف بريق اعيونه ...
تم يطالعني يحاول يجوف ملامح ويهي
بس انا قطعت عليه حبل افكاره : شو تبا فيني
زخني من اجتوفي : يالله قومي
بعدت ايده بعصبيه و صكيت ع اسناني و قلته بغيض : انت ما تستحي ع ويهك لك ويهه بعد ياي اترمسني عقب الي سويته و قلته
اسلوبها ذكرني بايام اول ما عرفتها و قبل ما اتزوجها
قلتها : تعالي نرمس داخل حجرتنا هني يدوه راقده
رديت عليه بنفس الاسلوب : انا ما اباك .. روح لـ عايشه شو تبا فيني
زخني ع طول من لحيتي و رص عليها غمضت اعيوني متألمه
قلته و انا اتعذب تحت ايده : بس مستقوى عليه
جربني من ويهه و قال : لا تلعبين باعصابي ..
زخيت ايده الي زاخه ويهي و حاولت ابعده عني بس ما رمت
ذكرني : بعدني ريلج
قلته بعناد : ع ورقه بس ..من تزوجتك و انته اتقول لي غبيه و متخلفه لكن الحينه احسن شي سويته ان خليت زواجنا بورقه بس لانك ما تستاهل اتكون انت الي ............
قاطعني بعصبيه بس كتم غيضه : جب ميثه ...
يدوه تجلب متضايجه : ميثه ميثه
التفتنا لها انا و مطر انطالعها ..ابتعد عني مطر قبل ما اتجوفنا يدوه
مطر بصوت واطي : عيبج قومتيها من رقادها
سكت عنه ..
مطر معاندو طفران : قومي يلا صدعتي براسي ..برقد وراي دوام
رديت انسدحت ع الفراش بس بداخلي خوف كبير منه ..انا فعلا مب طايقتنه خلاص عفته ...
شهقت يوم شلني يلست ارافس علشان ينزلني ...بس هو طنشني ..
اضطريت اقول بصوت عالي : نزلني ما ابا اروح معاك ...
نزلني ع طول يوم نشت يدوه : شو عندكم انتوا تلعبون باخر الليل خلونا نرقد شو ها الحاله ..
نزلني مطر ع طول ..ربعت صوب يدوه و يلست وراها احتمي فيها ... حط مطر ايده بوسطه مب عايبنه الوضع
قلت بخوف : يدوه ابا اتم عندج
مطر شكله طفر : قومي اقولج ...
يدوه : شو تبا بها خلها عندي ها ليله ترقد روح يالله ..
طالعني مطر بغيض ...و ظهر من الحجره .. زختني يدوه من ايدي
يدوه: يالله ارقدي يمه ..
دفنت ويهي بصدر يدوه و يلست اصيح متعذبه ..
يدوه تضحك : ههههههههه معذبنج ولد ابوه
انا ميته قهر و يدوه تضحك علي شسوي يا عالم ...
يدوه اتهديني : ارقدي الحينه ها الليله بموت من فراقج و بتأدب
قلتها و انا اصيح : يدوه انتي ما تعرفين شي ...
يدوه : ارقدي الحينه و باجر يصير خير .
ما توقعت من احط راسي ارقد ع طول ..
تجلبت الصبح بكسل ... يوم انفتح ليت الحجره ... يلست اغطي ع اعيوني متضايجه
كانت يدوه : يلا قومي روحي تغسلي و تعالي نتريق يلا
ابتسمت لقيت لي وحده غير سعود اتونسني بها البيت ..دشيت حمام حجره يدوه اتغسلت .. و ظهرت من حجرتها رايحه حجرتي ..من ظهرت من الصاله التفت صوب باب الحوي ..جفت عزه واقفه عدال باب البيت ..
زقرتها : عزه
صكرت باب الحوي ع طول و ارتبكت
قلتها : ليش ما رحتي المدرسه
قالت من غير ما اتطالعني : تعبانه ..
و خطفتني رايحه حجرتها
قلتها : عزه
وقفت من غير ما تطالعني قلتها : حرام الي اتسوينه ..فكري باهلج
طالعتني : انا ما اسوي شي غلط
قلتها : متأكده
عزه ترد باحتقار: هي ..و بدال ما تنصحيني انصحي عمرج .. مب تهدين ريلج و ترقدين بحجره و هو بحجره
قلتها : مشكوره ع النصيحه
وسرت عنها ..عزه تضيع و الواحد ما يسكت عنها ..بس منو يهتم فيها سعود يوم زخها مره .. و ضربها كلهم وقفوا ضده لدرجه ان مطر حرق ايده .. انا مالي خص فيهم ..
دشيت حجرتي و عقب ما تغسلت و بدلت ملابسي .. ظهرت و رحت الصاله كانت يدوه تطالع التلفزيون ..
و ام مطر راقده بعدها و عزه بحجرها اكيد مجابله النت ... شليت تلفون البيت و اتصلت بـ منيره .
منيره : هلا ميثه امريني
قلتها : ابا اطلب منج طلب
منيره : امري
قلتها : بيني و بينج
منيره : الله اسرار قولي
ضحكت : هههههههه اقولج ابا ادش دوره اتعلم فيها المكياج
منيره : و الله فكره حلوه ..اخيرا بديتي تطورين هههههههه
قلتها : هي علشان اغايض اخوج
منيره : خل عنج ..
قلتها : ما ابا مطر يعرف ..هو ما بخليني اطلع من البيت ابروحي .. بس اذا كنت وياج عادي
منيره : خلااص ميثوه انا بتصل بالصالونو بجوف الدوره بكم
قلتها : اقل مده عالاقل اتعلم ع اساسيات
منيره متحمسه : ما يهمج ..بردلج خبر
ذكرتها : بيني و بينج
صكرت عنها طوال فتره الصبح حتى لضحى كنت يالسه في الصاله مع يدوه ..
عقب ما نشت ام مطر من رقادها رايحه المطبخ تطبخ .. نشيت انا رايحه حجرتي ... يوم لمحت عايشه ظاهره من حجرتها و يايه الصاله ..
قبل ما اطلع سمعت صوتها : شحالج ميثه
طنشتها كملت دربي بس لحقتني : بس ان شاء الله نفسيتج اتكون احسن ..
وقفت بويهي صديت عنها ما ابا اطالع شيفتها ..
عايشه : وينج امس من عقب الغدا ما بينتي شو صار بج
قلتها : شو تبين ؟؟
عايشه ابرود تحاول تستزفزني : سلامتج نظر عيني .. بس ما قلتي بتحضرين عرسنا " طالعتها فقالت " اقصد عرسي و عرس مطر ..
قلتها من غير نفس : تطلقي بالاول عقب يصير خير ..
عايشه تضحك : ههههههههه يومين بالكثير تراني مستعيله اكثر عنج .. الا ما قلتي بيت ابوج ينفع للسكن ولا ع قولت مطوري يباله صيانه
كرهتها و كرهت نبره صوتها و كرهت مطر الي قاعد يخطط و يحلم مع غيري و في بيت ابوي .. خطفتها و رحت حجرتي و انا كارهتنهاا ..
قفلت علي الباب و يلست اصيح ..دموع قهر و غيض .. دموع ظلم و الم ..شسوي .. كيف اطلع من ها المصيبه .ما اقدر كل يوم اجابل عايشه و اتعق علي كلامها البايخ .. عمري ما راح اسامحك يا مطر .. انا بخبر طارق ..بكل الي اعرفه و الي يصير يصير
طلعت من حجرتي قبل ما يرجع مطر من الدوام .. و رحت حجره يدوه .. كانت ملامح ويهي شاحبه ....
دشت علي ام مطر : ميثه تعالي تغدي
قلتها : ما اشتهي
ام مطر : بلاج جي مستويه بسم الله لا يكون تتوحمين
قلتها و انا ابتسم بألم : لا ما اظن
يدوه : خليها ابروحها ظهري من حجرتي يالله
ام مطر : و الله العظيم لو مب عيالي جان فريتج برع ...يا العيوز كافي تحملتج سنين و الي سويته فيني
يدوه : نسيت اعلومج و سوالفج ...خليني ساكته
ام مطر : المصايب كلها كانت من ورا ظهرج ..حسبي الله و نعم الوكيل
و ظهرت من الحجره ...
سالت يدوه : شو السالفه
يدوه : ما عليج منها حرمه لغايه هاي مثل ما اتحن ع طارق يطلق حرمته انا كنت احن على ولدي يطلقها
بلعت ريجي ..عيل شبلاهم ما يحنون ع مطر انه يطلقني ...
يتني منيره لعصر و ظهرنا رحنا الصالون شرات ما اتفجنا .. و اتفجنا اخذ دوره مكثفه مدة اسبوعين .. لساعتين .. اتعلم فيها ..و حتى منيره كانت تبا ...
استانست وايد ...ردينا حزة المغرب ... كان مطر كل شويه يدقدق حق منيره متى بنرد ووين طالعين .. بس منيره ما طاعت اتخبره و كانت اتقوله نحن بالسوق..
من دشيت البيت اتفاجأت انه واقفني و يالس يدور في الحوي ...
ياه صوبي بسرعه و كان محرج : اخيرا شرفتي
الله يسامحك يوم بحقي اخطيت ولا انا ما اسامحك الدهر كله..
لبسته قلبي كان يدق يوم زخني من ذراعي : تعالي هني ارمسج
قلته : هدني شو تبا فيني ..
مطر بعصبيه : ميثه لا تستفزيني تسمعين ..
قلته بخوف : مالك حق علي .
ييرني صوب حجرتنا يوم سمع حس امه واصل عندنا ..
دخلني لحجره و دزني ع الشبريه ..
مطر : حق شو تظهرين من البيت من غير ما اتقولين
قلته : ما جفتك و ما بغيت ارد منيره ..
حذرني : لا تخليني اسوي شي تندمين عليه
قلته : اكثر عن جي شو .. "تطنزت عليه " مب كافي بيت ابوي الي قاعد تبنيه حق عايشه
طالعني بنظرات ما فهمتها
و قال : تمي هني ولا تظهرين من الحجره و ان رديت و جفتج محد يا ويلج ..
و تم يطالعني بنظرات غيض .. رن موبايله تميت اطالعه بنظرات ابين له اني اعرف ان المتصله هي عايشه قلبي ياكلني من الغيره ...بس ما كان بيدي غير اني اكتم احزاني و احفظ كرامتي و لي ما يباك لا اتصيح تباه ..
رحت صوب الصاله عقب ما ظهر مطر بساعات من حجرتي ..
جابلني طارق و عايشه ظاهرين من الصاله
طارق : شحالج ميثه
قلته : بخير
و خطفتهم كرهت نظرات عايشه ...
دشيت الصاله سمعت ام مطر محتشره : يبا يغايضني رايح يسهر وياها برع ..يبا يقهرني
سلمت : السلام عليكم ..
الي في الصاله : عليكم السلام ...
يدوه : و انتي شو حارنج خليهم يتعشون و يسهرون برع
ام مطر : محد يرفع لي الضغط بها البيت غير هالعيوز
يدوه : عيز حيلج
سعود : ميثه تلعبين وياي بلاستيشن من زمان ما لعبنا
يلست و قلته : مالي خاطر ..
سعود: اتخافين اغلبج
يدوه: جايفنها ياهل تلعب وياك انته بعد
سعود مطنش يدوه : بس لعبه ميثوه ..
غمضني ارده ابتسمت له و قلت : اوكى ..
يلست العب مع اسعود و نسيت الوقت الي مر ..و خلال هاي الفتره مطر موليه ما رد البيت من بعد ما تجاوفنا
عقب ما تعشينا و خلصنا ..
رحت حجره يدوه طبعا عزوه موليه ما جفت ويهها .. حتى ام مطر كانت مضايجه لان عزه ما قامت تنجاف كله بحجرتها و قافله عليها الباب ...
اهم شي ان يدوه مرتاحه من اذيتها .. ..تجلبت وايد حتى ما عرفت كم من لوقت ..
يدوه : شبلاج يمه ما ترقدين
قلتها : مدري
يدوه : شو مسوي بج مطر
قلتها بألم : ماشي
يدوه: انا الف مره قلتله ما يضرج بشي انتي يتيمه
تنهدت بعذاب ..ودي اصرخ و اقول كل الناس شو قال لي مطر فوق السطح و جدام حرمة اخوه ..غصه واقفه لي هني مب رايمه اتنفس منها ..
يدوه: ارقدي ارقدي ها الطفس ما يعرف قدرج انا براويه .. "وصخت "
حسيت يدوه رقدت و تميت انا اتجلب .. حتى سمعت خطوات ارتجفت و اندسيت تحت لحافي ها مطر .. ما اباه ايي صوبي ..
غمضت اعيوني يوم انفج باب الحجره و يا صوبي .. هزني : ميثه
طنشته قال : انتي كل يوم بترقدين هني شو
التفت له و قلته بغيض: هي لين ما تطلقني ..
مطر صك ع اسنانه : ما بطلقج ..و لو طلقتج وين بتروحين
يلست مقهوره منه : عندي بيزاتي مال بيت ابوي ولا بعد سرقتها مني
زخني من جتوفي وييرتي معاه بالغصب صرخت : ما اباك ما ابااك ...هدني ..
ما كان يسمعني مطر فج باب حجره يدوه ..يسحبني بالغصب
صحت بعذاب : انا ما اباك غصب
ارتحت يوم سمعت حس يدوه : شو تبا بها خلها
مطر يطالعني بعصبيه: زين جي قومتيها ..
قلته : ما اباك ...
يدوه : اقولك خلها ترقد عندي
ييرني لبرع الحجره بقوه ...وقف مطرووقفت عداله منصدمين بـ عايشه و طارق الي كانوا يايين من برع ...و يطالعونا مستغربين ..!!
((الجـــــــــــــــــــــزء السـابع و العشــــــــــــــــــرين ...))
حسبي الله ع الذي كان السبب في ضيعتي ..بسمتي صارت حنين و ضحكتي هي دمعتي ...
طارق : مطر شو مستوي
سكت مطر ما رد عليه بس تم يطالع عايشه و يرد يطالع طارق ما اعرف شو استوا به
قلت ابسرعه : هذي ها الي تحبها و تحبك روح لها شو تبا فيني
طالعني مطر بنظرات يسكتني ..خفت من نظراته ربعت وراا يدوه ..
طارق مستغرب : هاه .. ميثه شو اتقولين ؟؟
مطر رد دش حجره يدوه يبا ياخذني صحت
و قلته : ما ابى اروح معاك
مطر محرج: مب ع كيفج
دش طارق و لحقته عايشه الي كانت متسليه بالموقف ..
طارق حاول يهدي مطر زخه
من اجتوفه : مطر خف ع البنيه
ابتعد عنه مطر جنه متجزز منه و مطنش الكل
امرني : طوفي جدامي
يدوه : شو يعني الليله ما برقد جنكم يهال تضاربون محد متوفج بها البيت مب منكم من امك لا بارك الله فيها ..
ترجيت يدووه و دموعي اتهل : ما ابا اروح معاه
طارق : ميثه تحريتج عاقل
عايشه زخت ايد طارق و قالت ابرود : حياتي مالنا شغل خلهم يحلون مشاكلهم ابروحهم
كرهتها هاي المنافقه ودي اقول طارق كل شي بس مدري شو الي مانعني
تجدم مطر و جنه طفر : يلا نشي ...
يدوه زختني من ايدي : روحي معاه
قلتها و انا اصيح : ما ابى ما ابى انا مالي حد بها الدنيا لو كان لي اهل جان ما يلست عندكم
حضنتني يدوه : وفديتج انا اهلج "طالعت مطر" مسود الويه انت شو مسوي فيها
مطر جنه طفر : ميثه بس عاد
عايشه ابرود: طارق ما اتحمل مثل هالمواقف خلنا انروح حجرتنا
ما تحملت كلامها فقلت بقهر : يدوه متفج ويا حرمة اخوه انهم يتزوجون ..
مطر ابسرعه : جب اسكتي
يدوه :منوحرمة اخوه
طارق بطل اعيونه مصدوم
صحت يوم جفت طارق قلته : انا اسفه بس ها الي صار امس اختار حرمتك علي متفجين ع الزواج عقب ما تطلق منك
يدوه: شووووو .. منوه حرمة اخوه
عايشه مرتبكه : انتي شو اتخربطين طارق لا اتصدقها ...
يدوه : مسود الويه تبا اسوي شرات ابوك و اخوه تضاربون ع حرمه و فرقت من بينكم ..
صخينا كلنا من كلام يدوه و ما كان ينسمع شي غير صياحي ...صار هدوء تعابير ويه مطر و طارق و عايشه حتى انا شرات شي الي صعقنا ...
يدوه بنفعال : تبا اتهد بيتك و حرمتك علشان حرمة ع ذمة اخوك سود الله ويهك ..
نزل مطر راسه اما انا تاكدت اني ما غلطت يوم رمست و تكلمت و طلعت كل غيضي ...
طارق : منو ابوي و اخوه
يدوه: انت اص ولا كلمه لو ريال جان ما هديت الخيط و المخيط حق حرمتك و تربع ورا اخوك و انت لا تدري
طارق حسيته بصيح و يطالع عايشه الي كانت ملامح ويها خايفه و اتطالع مطر و جنه تباه ينقذها ..
حسيت دوري انتهى هني و اعلنت الصمت عقب ما فجرت كل الكلام الي في قلبي ...
يدوه : تدري يا مطر ان ابوك جتل اخوه عقب ما امك حملت منه ...
دارت الدنيا فيني و مطر جنه حد صفعه ع ويهه بس طارق تهيأ لي انه ارتجف و عايشه للحظه حسيت انها انسانه خاليه من المشاعر و الاحساس ..
كملت يدوه محرجه : يعني لازم افضح امك علشان اتهون عن هاي الجلبه .."اشرت حق عايشه "
عايشه زخت طارق من ذراعه : خلنا انروح من هني
بس طارق بعد ذراعه عنها بعصبيه و طالعها بنظرات حاده
يدوه: الحينه بغيته يوم انفضحتي ...
قلت بسرعه و انا صوتي مليان حزن: متفج يسكنها بيت ابوي ..
طالعني مطر بنظرات حاده بس كنت حاسه بالامان و انا واقفه ورا يدوه
يدوه: جلب شرات عمه .. حتى اظني الي عقته عايشه ولده النذل
نقزت يوم صرخ طارق : يدوه حرام عليج طول عمري و انا متحمل اهانتج ولد امك بس مب جي حرام عليج
يدوه : هي نعم انت ولد امك ولا ما سالت روحك ليش امك مدلعتنك اثرك ولد حرااااااااااااام ..
ع طول زخيت يدوه من جتوفها : بس يدوه لا اتقولين جي
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك