رواية انا حر ما انهان والحر ما يرجع لشخص يهينه -35

رواية انا حر ما انهان والحر ما يرجع لشخص يهينه - غرام

رواية انا حر ما انهان والحر ما يرجع لشخص يهينه -35

قلت بسرعه و انا صوتي مليان حزن: متفج يسكنها بيت ابوي ..

طالعني مطر بنظرات حاده بس كنت حاسه بالامان و انا واقفه ورا يدوه

يدوه: جلب شرات عمه .. حتى اظني الي عقته عايشه ولده النذل

نقزت يوم صرخ طارق : يدوه حرام عليج طول عمري و انا متحمل اهانتج ولد امك بس مب جي حرام عليج

يدوه : هي نعم انت ولد امك ولا ما سالت روحك ليش امك مدلعتنك اثرك ولد حرااااااااااااام ..

ع طول زخيت يدوه من جتوفها : بس يدوه لا اتقولين جي

شل طارق غتره من ع راسه و جنه مب متحكم بتصرفاته و حطها بحلجه يعضها يمنع غيضه ...

عايشه مصدومه : شو انا زوجي ولد حرام ..

يدوه : استغفر الله العظيم من كل ذنب عظيم لا بارك الله فيكم ..

اول مره احس بضعف و قلبي ينتفض من داخلي .. ما سوت ميثه خير يوم فضحتني جدام يدوه .. طارت افكاري يوم طارق قعد يرتجف بعصبيه و حركته الغريبه انه يعض غتره كأنه يبلع غيضه .. رحت صوبه طوال حياتي كنت اكرهه ..كنت احسه مأخذ كل شي مني امايه و عايشه ... بس ما هان عليه اجوف حاله جي .. رحت صوبه حضنته انبهه بلي هو فيه

هزيته : طارق طارق

طارق جنه مب حاس بروحه ....ييريت الغتره من عنه

صاح طارق بصوت عالي : ولد حرام ..انا ولد حرام ؟؟؟

دزيته ع اليدار اهديه : يدوه ابروحها اتخربط

يدوه : لا ما اخربط ... طارق ولد عمك مب اخوك ولا ليش ابوك جتل عمك ...

صرخت ع يدوه وهذي اول مر ه اسويهاه : بس سكتـي "طالعت ميثه الي مقهور منها " سكتيها لازغتها

يدوه : هي خفت لا تكون شرات عمك و تحمل حرمة اخوك ..

طالعت طارق: و الله العظيم اني بحياتي ما تقربت منها ...

طارق دموعه تهل: ولد حرام ..؟؟؟

دزني حاولت ازخه بس اول مره طارق يقدر علي و يبعدني عنه ربع صوب حجرة امايه لحقته .. دش ع امايه و عفد عليها فوق الشبريه .

.نقزت امايه متروعه : بسم الله ..

طارق يحضن ويهه امايه بقوه : انا ولد حرام

شهقت امايه اتطالعني و تطالع طارق و جنها تقنع روحها انها مب حلم ..هزت راسها بمعنى لا

طارق يهزها : انا ولد حرام ؟؟

جنه امايه لسانها انربط و انا كنت احاول اهدي طارق

صرخ عليها طارق : انطقي ليش ساكته ..

نشت امايه من ع الشبريه وربعت صوب حجره يدوه ..لحقها طارق و انا صرت ضايع ما بين امايه و طارق .. كل مني انا الي وصلت الامور ..لو ما قلت ميثه اني ابا ارتبط بعايشه ما صار الي صار ...

دشت امايه حجره يدوه و ع طول عفدت عليها اتييرها : طلعي من بيتي ..

يدوه اتصرخ : بيت ولدي ..هديني ..

كانت ميثه اتحاول تبعد امايه عن يدوه و انا قدرت اني ايير امايه و ابعدها بعيد .. حسيت هالليله ما بتخلص و ما بيطلع علينا النهار .. زاد الطين بله يوم جفت سعود و عزه واقفين برع و جنهم بدوامه ..

طارق كان بواد يبا يظهر الرمسه من امايه و امايه تبا اتروغ يدوه و صرنا كلنا بدوامه ... حتى طاحت امايه غشيانه ..

صرخت : عزه يبي ماي بسرعه ..

طارق بس همه يعرف شو سالفته قاعد يهز امايه ارمسي و انطقي ليش ساكته ...

و قلت حق سعود : اتصل بـ منيره خل اتيي بسرعه ...

حسيت اني محتاج لمنيره بها الموقف و عبدالرحمن علشان يهدي طارق الي استخف علينا ...ما ارتحت الا يوم يت منيره و كانت خايفه : شو مستوي "صرخت يوم جافت امايه طايحه"

قلتها بغيض : يايبيينج تفزعين علينا مب تزيدنا

منيره : شو مستوي ؟؟

وقفت : جوفي امايه "طالعت سعود " ظهروا من حجره يدوه ودوها حجرتها ..

زخيت طارق الي كان يصيح جنه بنت ..بس عاندني بس اجبرته ووديته بالغصب حجره سعود و قفلت عليه الباب ... رحت دخلت عبدالرحمن حق طارق علشان يهديه بس عبدالرحمن مب عارف شو السالفه بس شكله كان يعرف انه شي جايد مستوي بها البيت ..

خليت عبدالرحمن مع طارق يهديه و انا رحت عند امايه في حجرتها حسيت انها صارت احسن رغم انها كانت منهاره .. بس مثيه حسابها عندي بعدين ..

امايه : وين نظر عيني وين حبيبي

قلتها : طارق بخير عنده عبدالرحمن

امايه اتصيح: حسبي الله و نعم الوكيل ع يدتك ما ابا اجوفها فـ بيتي ظهرها من هني .. ترا و الله اطلع من البيت ..

قلتها : منيره ودي يدوه وياج البيت

منيره : شو مستوي ؟؟

قلتها و اعيوني ع امايه : اسالي امج

امايه يلست و جنها بمحكمه تدافع عن روحها : و انا شو يخصني ..شو ذنبي ..

قلتها : طول عمري انا احس حبج لطارق وراه شي

عصبت علي و هي اتصيح بانفعال: ما وراه شي طارق اخوكم يدتكم اتقص عليكم

منيره شكلها بتستخف: شو بلااه طارق قاعد يصيح جنه حرمه ..

امايه : فديت ولدي يبووه لي يبوه احضنه بصدري ..

مطر: امايه شو سالفه طارق ؟؟

عضت ع شفايفها بالم حسره و جنها تتألم للذكرى

ما فيني صبر قلتها : شو سالفه عمي ؟

قالت بصوت واطي : بو طارق

شهقت منيره و طاحت ع طول

فتنت عليها : لا اتزيدنا انتي بعد خلينا نعرف شو السالفه ..

غطت امايه ويهي بيدها وردت اتصيح

حضنتها منور و يلسوا هنتيناتهم .. يصيحون ..اففففففففففففففف هالحريم ما ادانيهم يوم يقعدون يصيحون

مسكت اعصابي امايه : و الله يا مطر انا مالي ذنب مالي ذنب

قلتها بغيض و انا اجوف امايه بعيوني انها غلطانه : ككيف مالج ذنب كيف؟؟

امايه جن كلامي استفزها : عمك كان سكران ..و انا كنت في البيت ابروحي ..

منيره: ابوي و يدوه و يدي

امايه : يدج كان متوفي عاد .. يدوتج كانت طالعه مع ابوج "صاحت" ترجيتهم ياخذوني معاهم يدتج ما رضت ابوك كان يبا ياخذني بس يدتكم مأثره عليه

سالتها : وين

امايه : كانوا رايحين صوب قطر ...

قلتها : يدوه قالت نغزتني بالرمسه اني اسوي شرات عمي و احب حرمة طارق

انفعلت امايه من كلامي: ما احب عمك ولا كان بينا شي ..موليه ..يدتك امطلعه علي هاي الرمسه لانها كانت السبب

منيره مستغربه : كانت السبب !!

امايه بحزن: لانها ما رضت اروح وياهم ...

هزيت راسي مب مصدق مستحيل

بس امايه قطعت شكي يوم قالت : لو كانت علاقه بيني و بين عمكم جان ما يااه سعود ولا عزه ...

سكت محتار ليش ؟؟ شو السالفه اصلا ..كيف انجلب كل شي بحياتنا ...علشان جي يدوه و امايه دوم بضرابه ..

سالتها : عيل ليش تحبين طارق اكثر عنا ..

امايه حرجت عليه هالمره لانها حست اني استفزها : طارق اخوكم

رديت عليها بعصبيه : من الام و بس

بس هي وقفت ابسرعه منفعله : بس اخوكم .. حبيته لان اول ما ربيته خذوه عني بعيد اسبوع كامل حرموني منه ..تخبلت لولا حنيت ابوك ..و انه كسر كلام امه جان طارق الحينه الله اعلم بحاله ..

منيره غطت ايدده بويها و يلست اتصيح بصوت عالي ..تنهدت بعذاب رفعت شعري عن يبهتي بعصبيه يالله اصدق منو ...بس اشفق ع حال طارق ..

امايه : يدكم كان مسافر الهند ..و وصلنا خبر ان السفينه الي رايحه صوب الهند اختربت منهم مات و منهم راحوا صوب قطر....

يدتك من سمعت هالخبر اتخبلت واصرت الا اتروح مع ابوك صوب قطر... ترجيتهم اروح وياهم لان ما عندي حد اتم هني و كنت خايفه من عمكم لانه دوم مب وعيه و سكران ...

منيره تمسح دموعها : يدوه ليش ماخذتج ليش ما طاعت؟؟

امايه بنبره ألم : جفت الويل منها اذا قلت هي قالت لا و اذا لا قالت هي تعاندني بكل شي ...

وقفت و جن جبدي لاعت من هاي السالفه و ما ودي اعرفها خلااص كافي الي سمعته بس

جذبني كلام امايه يوم قالت : عقب شهرين ردوا يدتك و ابوك و جثه يدتك مالقوها

عضيت ع شفايفها بحسره : اكتشفوا اني حامل ..و ع طول عرفوا من عمكم

كرهت امايه حسيتها انسانه واطيه بس هي مالها ذنب ... بالي صار بس ها ما يشفع لها ...

كملت : ابوك تخبل و ع طول راح يدور ع عمك يبا يجتله بس بالصدفه لقوه ميت فوق اليبل ... و يدتك تمت اتحرض ابوك الا يطلقني... "طالعتنا بنظرات رجاء و امل " بس ابوكم يعرف اني مالي ذنب و كيف كانت يدتكم رافضه اروح معاهم ...انا ما يخصني ما يخصني ...

وقفت رايح صوب االباب اجوف حال طارق بس

امايه زقرتني : مطر ..

طالعتها بنظرات المصدوم المخدوع باي نظرات تقدرون اتسمونها صدق الدنيا تدور ... و الايام تعيد القصه نفسها بس باختلاف بعض الامور ...

امايه : دخيلك داري ع اخوك "صاحت" ها اخوكم ابوك حضنه و رباه حاله من حالكم ...

طلعت من عندها ...جفت عزه بويهي واقفه ورا الباب و كانها كانت تسمع كل شي .. ملامح ويها و دموعها الي تهل بصمت اكددتت لي هالشيء .. كنت بعاتبها .. بس هي عفدت علي و حضنتني اتصيح ...لويت عليها اخفف عنها

قلتها : بس خلااص روحي ارقدي ..

رفعت راسها و طالعتني و سالتني : اخاف انا بعد اطلع

صدمني ككلامها بس حرجت عليها : عزه

ردت دفنت ويها بصدري اتصيح قلتها : ما اباج اتعيدين هاي الرمسه مره ثانيه .. و طارق اخونا ما في شي تغير ... سمعتيني

رفعت راسها و هزته برضى ابتسمت اخفف عنها : يلا روحي حجرتج الحينه ...

ظهرت من الصاله جفت سعود راقد ع الكنبه هزيته : سعود

يلس ع طول حسيت صدق هالليله ما بتمر ع خير طالعني بنظرات عتب و لوم

قلته : روح حجرتك ..

سعود يرمس بغيض: طارق راقد هناك ..

تميت اطالعه احاول افهم سبب نظراته لي بس سكت عنه كنت بروح حجرة يدتي بس وقفنـي

كلامه : كل منك انته السبب

التفت و طالعته بس سعود كمل كلامه : انت سبب كل الي صار ..

تجدمت منه عدل بيلسته سعود متروع مني بس حسيت بعد يبا يواجهني ..

سالته : بشو انا السبب ؟؟ خبرني

سعود : لو ما كنت اتحب عايشه ماصار الي صار

كنت بصفعه...صفعه اطيح ضرسه بس يودت روحي دزيته ع راسه

وقلت : انخمد ولا اتقول كلام ما اتعرفه

رحت عنه بس رد و قال : انا اعرف كل شي

وقفت و التفت صوبه صرخت عليه : ..انخمد اقولك ...

سعود و جنه لسانه ياكله الا يرمس : انا عرف من زمان ان طارق مب اخونا .. و اعرف انك تحب عايشه و تواعدها دوم في المطبخ .. حتى اعرف .............

ما تحملت كلامه زخيته من رقبته ووقفته تغيرت ملامح سعود و صار خايف كنت بالفعل مصدوم من كلامه كيف يعرف و معقوله ما قال حد .. مستحيل ما قال حق ميثه طلع مب هين هالسعود

زغته : منو خبرك؟

سعود مب رايم يرمس : كنت اسمع دوم امايه و يدوه يتضاربون علي هاي السالفه و كل وحده اتلوم الثانيه

هديته لان ويهه احمر بس سالته : و ليش ما قلت ..

سكت ما رد علي صرخت عليه : ليش ما قلت ؟؟؟؟؟؟؟؟؟؟؟؟؟؟؟؟؟؟؟؟

سعود قال بسرعه : لان طارق اخوي و احبه اكثر عنك و كنت اتمنى انك تكون انت الي مب اخونا مب طارق

حسيت بغيره شبت بصدري .. ما يودت عمري كفخته فطاح عالارض متألم ... عفدت عليه اضربه و جني اطلع كل غيضي فيه بس زخني عبدالرحمن الي ظهر من حجرة سعود

عبدالرحمن: مطر الله يهداك ..

طالعت سعود بنظرات غضب بس سعود قال و هو يصيح: انا ما بعيش بها البيت ..

صرخت عليه: جب و لا كلمه منو قام يرمس بعد ..

عبدالرحمن : خلااص مطر ..طارق رقد ما فينا انوعيه مره ثانيه خله باحزانه و جراحه ..

طالعت سعود بنظرات عصبيه و رحت عنه صوب حجره يدوه .. فتحت الباب جفت يدوه راقده و ميثه يالسه فوق راسها .. نقزت يوم جافتني و طالعتني بخوف .. اتعرف انها السبب بكل الي صار ..بس مدري ليش كرهتها و كرهت اجوفها و او اني ارمسها .. صكرت الباب ع طول ..ورحت حجرتي اجمع افكاري و اعيد في بالي كل الي صار و استوا ...))فتحت اعيوني ..بعذاب يلست و كان الي صار البارحه كله حلم .. نظرات مطر يوم دش علي الحجره ما فارجتني .. و كأنه يلومني بكل الي صار .. مب جنه الغلط منه و من عايشه ... جفت الصباح طالع ..و الدنيا صارت نور ... بعد ظلام الليل .و الي صار ... ظهرت من حجره يدوه ... جفت سعود راقد بالصاله ..ما راح المدرسه !! سمعت حس بدر ولد منيره قاعد يصيح في حجره ام مطر .. الظاهر ان منيره تمت هني راقده .. البيت كان هادي عكس امس بالمره ...

رحت حجرتي .. كانت افكاري بين نظرات مطر .. و بين طارق ..ما يستاهل الي ياه شو بسوي الحينه ..كيف بعيش ويا اهله و كل نظراتهم له بتكون انت بن حرام .. ارتجف قلبي .. يوم دشيت حجرتي و طارت كل افكاري يوم جفت مطر راقد ع الكنبه ..اليوم الكل خذ اجازه بعد الي صار البارحه ..

ما توقعت بفضيحتي لـ عايشه و مطر ..رد الماضي و انفتحت اوراقه و انكشف كل شي مستور .. و مجهول .. ما اعرف شو الي صار بين مطر و امه و منيره كل الي اعرفه اني يلست اهون على يدوه عقب ما انهارت البارحه و كانت متندمه اني قالت كل شي .. بس قدرت اني اخليها ترقد ...

دشيت الحمام و تغسلت ..طلعت صليت الفير .. مع ان الوقت كان متاخر .. ما اعرف مطر كيف بعاملني ولا شو بسويه فيني ..يمكن يطلقني ..بس وين بروح ..؟؟

جفت مطر يتحرك فوق الكنبه متضايج ... خفت لا ينش و انا بعدني مب مستعده اني اواجهه .. بدلت ملابسي و طلعت من حجرتي ...تفاجأت ب طارق برع الحوي ..و شايل معاه شنطه صغيره .. تقطع قلبي ع حاله وع ملامح ويهه

زقرته : طارق ..

التفت لي و ابتسم بألم : ميثه ..

قلته : وين رايح"طالعت الشنطه الي بيده"

سكت عقب قال : ما ادري

قلته : كيف ما تدري ...

طارق جنه يبا يحبس دموعه : مالي مكان هني ...

حسيت بروحي بصيح يوم قال هالكلمتين

طارق: كيف اطالع اخواني و امي بحس بنظراتهم غير

قلته: لا اتقول جي ..ا

طالعني دمعت اعيونه بس ابتسم : مشكوره ميثه ..لولاج بتم طول عمري مخدوع

بلعت ريجي و قلت : انا ما كان قصدي...

طارق قاطعني : اعرف العذاب الي اتعيشنه ان ريلج يحب وحده غيرج .. انا و انتي انجرحنا من اقرب شخصين لنا ..

ترجيته : طارق دخيلك امك و اخوانك محتاجينك ..

هز راسه بعنى لا و قال : يمكن خذت كفايتي اكثر عن اخواني ...

طالعته مب فاهمه قصده فقال : كنت دلوع امايه ..

قلته: لو سرت اتعرف شو بيكون حال امك ..حرام عليك ..

تنهد طارق: صدقيني ما اروم اعيش بوسطهم ما اقدر ..

التفتنا لباب الصاله يوم انفتح ..يلست اطالع طارق يوم جفنا عايشه تظهر من الصاله ...

عايشه : صباح الخير "تطالعني و تطالع طارق "

طنشها طارق : مشكوره ميثه مره ثانيه ..

كنت بروح بس عايشه : لحظه انا من البارحه ما رقدت احاتيك و انت قاعد لي مع هاي ..

طنشها طارق و تم يطالعني : ميثه ...لو بيدي كنت خذتج معاي و حافظة عليج لان محد يعرف قيمتج

ارتجفت يوم سمعت كلام طارق مدري ليش تمنيت مطر يقول لي ها الكلام ...

عايشه : دام عايبتنك ليش ما تاخذها ...

لاحظت ان طارق موليه ماحط اعيونهه بويهه عايشه كانت نظراته كلها علي .

عايشه : انا ما اعيش مع ولد حرام طلقني ولا بسوي لك خلع

شهقت و قلت بسرعه : يا ال****ه ..

طارق ابتسم بألم و قال لي : ميثه حرام اتوصخين لسانج بوحده مثل هاي ..

عايشه و كأن كلام طارق يستفزها صرخت بصوت عالي جنها تتأمر عليه : طلقني

حسيت مكاني غلط كنت بخطفهم و بروحهم خلهم يتفاهمون بروحهم .. بس يبست ابمكاني .. يوم طارق عفد ع عايشه وزخها من شعرها و هي كانت اتصارخ .. رديت لورا مب عارفه شو اسوي ... صدمني طارق

يلس يسحبها من شعرها ..

همست بخوف : طارق

بس صخيت يوم يوم سحبها صوب باب حجرتي ..

و هي اتصارخ : هدني يا ولد الحرام

كانت تحاول تضربه بس طارق مب معطنها فرصه .. ما عرفت كيف اتصرف ولا شو اسوي ... انصعقت يوم طارق تم يدق باب حجرتي بقوه وحط عايشه تحت ريوله

ترجيته : طارق

كانت عايشه اتحاول اتقوم من الارض بس طارق كان يضربها و يدوسها ..حتى حست بتعب ..و انهارت .. فتح مطر باب لحجره ..تفاجأ بالموقف الي صار .. بغيت اهرب من اعيونه بس جافني ... تم واقف يطالع الموقف مستغرب ..

عايشه : مطر الحقني مطر ...

رديت لا ارادي لورا حتى لصقت اباب الصاله ...

مطر : طارق !!

طارق تفل ع عايشه و قالها : انتي طاااااالق ..

وزخها من شعرها و فرها حق مطر : اشبع فيها ...

التفت لي : اسف ميثه بس انتي تستاهلين الاحسن

وشل شنطته وراح صوب باب الحوي بخطوات ثانبته و جنه مب متندم ..وقفت عايشه ورا مطر

اتصيح : جفت ال**** ولد الحرام شو سوا فيني ؟؟

كنت بروح داخل بس فضولي ذبحني تميت واقفه اطالع الموقف ...جفت مطر يلبس عايشه و يربع وراا طارق

زخه من جتوفه : طارق وين رايح ..

طارق بعد ايده مطر "تالم مطر بداخله الحينه بس حس بمشاعر طارق يوم كان يسوي له نفس الحركه و يبعد ايده عنه جنه متجززز منها"

طارق : ارض الله واسعه

مطر : ها بيتك

طارق : مالي مكان ..

مطر : ما فكرت بامايه .. تباها تموت

صخ طارق بس عقب قال : ما اقدر اتم بها البيت ..

مطر: زين بعطيك مفاتيح شقتي خذها و تم هناك .. لي ما ترتاح و ترجع هني

ابتسم طارق : تذكر هذاك اليوم يوم امايه راغتني انا و عايشه و ترجيتك تعطيني مفتاح شقتك بس ما رضيت

صخ مطر لحظات عقب قال : انسى هالموضوع .. اترياا بروح اييب لك مفتاتيح الشقه ..

دش مطر داخل حجرته و طنش عايشه الي كانت اتصيح وواقفه عدال باب الححجره .. بس طارق طلع من البيت و ما اتريا مطر ..و انا دشيت الصاله ...مب مستوعبه الي صار طارق طلق عايشه .. دق قلبي .. ربعت حجره يدوه و يلست اصيح بمراراه الحينه بتزوجها مطر .. و انا ؟؟ ليش ما يباني ؟؟ ليش يحبها ؟؟

انا ابا مطر اباه لي بروحي بس قلبه مب معاي ... هو ما يباني ... دفنت راسي تحت اللحاف اتمنى كل الي صار حلم و كابوس انش منه ....

نشيت ع صوت صياح و صراخ .. تروعت و حسيت بالخوف .. جفت يدوه محد ... بالغرفه .. ظهرت برع .. جفت ام مطر يالسه بالصاله اتصيح وياها عزه .. و سعود يالس...طالعتهم مستغربه ..

سالتهم بخوف : شو مستوي ...؟

ام مطر اتصيح بمراره حسيت هالانسانه وايد متعذبه ..رحت صوبها و حضنتها ...

ام مطر ترجتني : اتصلي بمطر جوفيه وينه

دق قلبي بخوف: وينه مطر ..؟؟شو مستوي فيه ..؟

سعود : طارق طلع من البيت و مطر يدوره من الصبح

همست و انا اتذكر الموقف الي صار الصبح : طارق طلق عايشه

ام مطر : طلقها و غاب عني مدري وين راح ولدي ... ابا ولدي ...

حضنتها غمضتني وايد حتى يوم قالت : حسبي الله ع يدتكم فرقت اخوكم عنكم ..

سالت سعوود : وين يدوه

رد علي : خذتها منيره بيتهم ..

تنهدت بيوم و ليله كل شي تغير ..

دش علينا مطر ..طالعني بنفس النظرات يلومني انا ..بس شكله كان تعبان .. و كانت بيده ورقه ...

نشت ام مطر من مكانها و ربعت صوبه بس مطر تجاهلها فر الورقه ع الطاوله و يلس ع الكنبه و جن هم الدنيا كله فوق راسه .. يستاهل هو الي يابه حق عمره ..

ام مطر : وينه طارق ..

مطر بنبره تعب : طارق خلااص سافر ..

شهقت ام مطر جنها ما صدقت : وين سافر ..."وغطتت اعيونها اتصيح"

عدل بيلسه و طالع الارض حاولت اقرا تعابير ويهه بس ما قدرت ...حسيتها حزين ضايع مب عارف شو يسوي ...

عزوه : امايه يعني ما بنجوف طارق خلااص

ام مطر اتصيح : يا ويلي حالي ... يا نظر عيني حسبي الله و نعم الوكيل ...

ما تحملت اجوفها جي رحت صوبها و حضنتها اهديها ...

قلتها : خلااص عموه فتره و ان شاء الله بيرجع مرده بيته و اهله و ناسه ..

نقزت يوم مطر هاجمني : مب انتي اساس المصايب كلها ..

ما طالعته بس بداخلي قلبي كان يرقع من الخوف ..

عزه ما صدقت : هي من دشت البيت و انجلب كل شي..

تمنيت سعود ما يرمس او يفكر يدافع عني بس نش من مكانه و راح حجرته متضايج ..

عزه : ما رضى عليها

ام مطر اتصيح : بسكم انا مب ناقصتنكم حرام عليكم ..

مطر ولا جنه حد رمس: ارتحتي الحينه عيبج الي صار

طالعته بنظرات كرهه ليش هو نسى شو الي سوا فيني ..حس بجرحه و ما حس بكرامتي الي هانها جدام عايشه خل تنفعه الحينه ..

ام مطر اتصيح : بس مطر بس لا تذبحني ..شو يخصها ميثه ..

مطر بنظرات اتهام : اهي الي خبرت طارق عني و عن..............."سكت جنه انتبه لروحه"

قلته : كمل ليش سكت عنك و عن عايشه ..

مطر بعناد : هي عني و عن عايشه و هذي ها ورقة طلاقها " شلها من ع الطاوله و فرها بويهي "

ام مطر وقفت ع طول : ورقه طلاقها

"شلتها بسرعه بس انا و مطر كنت نتطالع بعض بنظرات و كل واحد له تعبيره "

مطر تجدم مني فرديت لورا خايفه ما يسوي حساب انه يبهدلني جدام اهله ..

قال لي بكل قوة عين : الحينه بتزوجها ..

ام مطر صرخت عليه : انت ما تستحي ع ويهك ...

يتبع ,,,

👇👇👇