بارت من

رواية انا حر ما انهان والحر ما يرجع لشخص يهينه -48

رواية انا حر ما انهان والحر ما يرجع لشخص يهينه - غرام

رواية انا حر ما انهان والحر ما يرجع لشخص يهينه -48

في يوم .. كنت عند سعود اطالع طيوره ...
سعود : ميثه ما تستغربين فهود ما قام ايي بيتنا
صح من جفته اخر مره قطع قلته : ليش انت ما اتزورهم
سعود : مالي خاطر ..
طارق: السلام عليكم
ردينا : عليك السلام ..
طارق: منيره ما يت اليوم عيل ؟؟
قلته : طالعه مع ريلها و ماخذه عزوه وياها ..
سعود يسال : من توفت امايه و مطر ما اجوفه في البيت الا نادر
طالعني طارق بس تجاهلت نظراته و قلت : بروح المطبخ
ما توقعت يلحقني طارق تفاجات بوجوده وراي
طارق: ميثه ليش مطر ما ايي البيت
قلته باسف: لاهي في بيته ويا حرمته وولده
طارق: انتي عايبنج جي حياتج
قلته و انا احاول اشغل روحي بغسيل الصحون : ما اقدر اهد سعود و عزه محد عندهم .
سالني : انتي الظاهر نسيتي كلامي هذاك اليوم
صح نسيته ولا خطر ع بالي ابد .. ما رديت عليه ما كان عندي جواب ...
طارق: تبين اثبت لج ان مطر ما يستاهل تعاشرينه
قلته و انا بصيح: شسوي في شي تم ما سواه فيني مطر من جفته في المستشفى ويا ولده و حرمته ما قمت اجوفه بالمره ..
طارق بنبره حنيه : زين ودريه
يلست ع الكرسي اصيح كيف اودره و انا احبه ...بس صدقه لي متى بضيع حياتي معاه .. مسحت دموعي
طارق : لا اتصيحين ترا ما منه فايده
سكت غصبن عني ...قلته : لو انفصلت عنه ما بقدر اجوف سعود ..و عزه ..لو عزه تكرهني ..ولا تكلمني بس احس صارت جزء من مسؤلياتي ..
طارق: ارتبطي فيني..
نزلت نظراتي بالارض بس انا احب مطر ..
كمل كلامه : مب ايقول يحب عايشه خل يتزوجها و يشبع فيها ..
قلته : بس هو معرس "دمعت" حتى انا ما اعرف من متى ماخذنها
طارق: كنت بسال عنها بس فكرت فيها مطر جي حياته كله بنات و حب و كلام فاضي لو سالت بتعب
كلامه كان يجرحني يعذبني و ين كلامه في صلاله وين لمساته وين حبه ..وين نظراته الي كانت تذبحني معقوله كله جذب و تمثيل معقووووووووووووله فيه بشر جي ..
طارق: ليش سكتي شو رايج ؟؟
نقزنا يوم سمعنا حس مطر بنبره جافه: رايها ابـشو ؟؟ ..
اول مره احط اعيوني بعيونه من هذاك اليوم ...........!!
لا تفتكر قلبي يلين وتعود في ساعه وحين في خاطري بس كلمتين اللي ما يبانا مانباه.. ياما على امرك مشيت تجرح وعمري ماشكيت رضيت والله مارضيت كل تعذب في هواه




(الحلقــــــة الرابــ 4 ــعة و الثــ 3ـلاثــــون .)
بين هم الحقيقة وبين حلم الخيال ضاع عمري وأنا اتبع في حياتي مصير كل ماقلت أبصبر صار صبري محال بين عين بصيرة وبين كف قصير
طنشت مطر متعمده و سالت طارق : اسوي لك شي تشربه ؟
طارق بنبره هاديه : لا مشكوره انا بظهر الحينه ..
مطر مقهور: شو خربت عليكم سوالفكم .
طنشته بس حسيت ان نظراته الجاسيه بتاكلني ..
طالعت طارق كنت اباه ينقذني فوقف طارق و قال : لا ابدا بس كنت اشاورها في شي و اخذ رايها
بطلت حلجي تخبل طارق ..طالعته بنظرات خوف بس هو ابتسم يطمني .. تم قلبي يرقع ..من الزيغه
مطر يتجتف : اقدر اعرف ها الشيء؟؟
طارق باستفزاز : طبعا مب سر ولا شي ?
ترجيت طارق لا يفضحني فقلت : طارق !
خزني مطر بنظرات يوم نطقت باسم طارق
طارق : كنت اشاور ميثه اذا ارجع عايشه ولا لاء لاني ناوي اردها "سكت شويه جنه متردد عقب كمل " اكتشفت اني احبها
تفاجات من كلام طارق بس طالعت مطر الي تغيرت ملامح
ويهه ..بسرعه و جنه ماي بارد انجب عليه ..ليش طارق سوا جي ..شو يبا يعذبني بس ..
طارق يطالعني : السموحه انا اترخص
و طالعني بنظرات شكيت انه يقصد جوفي كيف مطر بعده متعلق بعايشه حتى لو كان متزوج غيري .. حسيت بتعب و ضيااع ..
عقب ما ظهر طارق من المطبخ ..كنت بلحقه و اقوله لا اتخليني مع هالانسان وحدي .. بتطلق منه و بعيش معاك ع الاقل جفت بطارق الاخلااق و الاحترام و الامان ما جفته عند مطر ..
بس مطر منعني و زخني من ذراعي .. حسيت بحرقه مكان لمساته ما قدرت امنعه او ابعده عني لاني اشتقت للمساته كرهت روحي كيف يذلني و يهيني و كيف مشاعري بكل برود تستسلم له و تحن له بكل سهوله
رفعت راسي اطالعه بغيض سالني : وين رايحه ؟؟
قلته بعصبية و انا احاول ابتعد عنه : ما يخصك
مطر بملامح جامده : كافي الي فيني لا اتزيديني ميثه
ابتعدت عنه وقلته : انا و انت مستحيل نستمر ويا بعض دام عندك حياه ثانيه و حرمه و بيت و ياهل "عضت ع شفايفي و قلت بعذاب" و سكنتها في بيت ابوي بعد
مطر ساكنت منزل نظراته بالارض فكملت : و فوق ها ما سالت عني ولا اهتميت من توفت امك
مطر و كانه مخنوق : غصبن عني
قلته بقسوه : لولا سعود و عزوه كنت رفعت عليك قضيه من زمان
طالعني و كأن في عالم ثاني فقلته : انت انتهيت من حياتي خلااص ..وو للابد ."مشيت دموعي بظهر ايدي و قلته " مالي رجعه لو شو يصير "تجدمت منه وقلته بنبره جافه " للابببببببببببببد ..
و ظهرت من المطبخ خليته بروحه واقف هناك بعالمه و رحت حجرة يدوه اقصد صارت حجرتي .. و قفلت علي الباب و يلست اصيح منهاره ..شسوي؟؟؟ شو الحل؟؟ .. عقلي يقولي اتبعي طارق و
قلبي يقولي اترتيي مطر .. مطر مب وحده بحياته الا هنتين و الله يعلم منو بعد ..
رفعت راسي ع صوت حشرة و ضرابه .. نشيت ابسرعه من مكاني و ربعت برع.. جفت سعود قاعد يضرب عزه يالله سعود كوبي من مطر ... اذا نوى ع شيء لازم يسويه
حاولت ابعد سعود عن عزوه بس بسم الله سعود ولاجنه حد جدام زين ما صفعني ...ولا ياني بكس منه
وقفت امبينهم و قلت : خلاااااص بس
سعود : هذي بتفضحناالي ما تستحي ...
بلعت ريجي و ارتجفت من الغيض انا مب ناقصه ...
قلته : سعود خلااص ترا و الله جد ازعل منك
سعود متجاهل كلامي و يرمس عزوه : صايعه بخبر عليج مطر ..
عزوه اتصيح و خايفه طبعا ما بترد ما عندها حد يدافع عنها مطر و لا طارق و انا ما اسوي شي
قلته : سعوووووووود بس عاد ..
سعود ويهه محمر من القهر : هذي باجر بتفضحنا
حاولت اوصل عزه حجرتها .. و اول ما دشت قالت : محد يعيش بها البيت "صرخت بصوت عالي " بشرد من هالبيت و بتجوووفوووون " وصكرت البااب بقوه "
تميت اطالع اسعود بس بعده شكله يبا يكسر باب حجرتها
ترجيته: خلااص سعود ..بس
سعود: بجتلها و الله ..
بلعت ريجي عيل لو جفت انا الي جفته شو بتسوي فيها ...
قلته : هدي خلااص ... توها ياايه مع منيره شو تبا فيها
سعود محرج: اصلا ما طلعت مع منيره
قلته : خلااص بس عاد لا اتزيدني ..روح خبر اخوك عنها الضرب ما يفيدها و انت ما بتقدر عليها
سعود : اخبر منو ؟ مطر قام ايي بيتنا اصلا ..؟؟
قلته بعذاب : عندك طارق فهد عبدالرحمن بس انت لا تتصرف بشيء كل شي بيطيح ع راسك ..
سعود يتنفس بغيض : انا بروح بيت خالي احمد ... فهود مواعدنا ياخذنا المنار
قلته : زين بس لا اتحير ترا انا و عزوه اراوحنا في البيت
شكله بعده كان محرج لانه ما رد علي و عطاني ظهره رايح حجرته ...شكله يبا يغير ملابسه ..
تنفست بعذاب صدقه مطر نسى مسؤلياته بها البيت خاصه عقب ما جفته بالمستشفى مع حرمته و وولده ..خلاااااااااااص ما اروم اتحمل ما اقدر اصيح
تعععععععععععععبت ...
رن تلفون الصاله رحت يلست جريب منه بس ما رديت ما كان لي خاطر افكاري كلها منصبه صوب علاقتي و حياتي بـ مطر .. كيف يقول بصلاله يحبني و بالفعل اثبت لي هالشيء و الحينه يتجاهلني و منو هاي الي متزوجنها ؟؟ و متى خذها اصلا ؟؟
يلست افرك يبهتي و جني ابا اطير كل الافكار الي فيها .. من عقب ام مطر صار البيت ثجيل و هادي .. حتى يدوه ما اطيع اتيي بهالبيت ..وزادة عقب الي سوته فيها عزوه الله يهديها بس
سمعت دقه ع باب الصاله وقفت متروعه و خاصه ان محد في البيت .. بطلت اعيوني اطالع الباب شويه و انفتح بتردد ..شهقت يوم جفت عوااش واقفه ابويهي هاي شو يايبنها ..ناقصه انا يا ناس !
عايشه مبتسمه : توقعت اجوفج هني
قلتها : خير ..!!

عائشه اتطالع تلفون الصاله : اتصل جي ما اتردين كنت ابا

ارمسج "ورفعت حياتها تتمصخر" و انتي ما عندج موبايل
يلست ع الكنبه و قلتها : ما بينا شي ينقال ..يلا فارجي
دشت و قالت : ابا اقولج شي و اذكرج بشي
وقفت ابسرعه انا مب ناقصتنها بس هي كانت اتجوفني جان اتقول: جنج كنتي اتصيحين ؟؟
خطفتها كنت بروح حجره يدوه بس لحقتني ..: ما خلصت رمستي ..
ما رديت عليها فزختني من اجتوفي و خلتني اواجها قلتها بغيض: انتي شو اتبين ؟؟
عواش: سمعت طارق يبا يردني
غمضت اعيوني .. مطر مسرعه وصل لها الرمسه قلتها : شسوي لج ؟؟
ابتسمت عواش مستانسه : فديتني يحبوني
طالعتها بنظرات كنت بفقع اعيونها الغبيه بس خلها اتولي ..
عايشه : قلتلج ب،ـ صلاله مطر بس يتجرب منج علشان امه تتاكد ان ما صار شي بيني و بينه ..لكن الحينه عقب ما توفت امه بتزوجني
قلتها و انا قلبي مليان جروح : عليج بالعافية ..اشبعي فيه ما عاد يهمني
عايشه : هههههههههههه اتقصين علي و لا ع روحج هههههههههه
كنت بصيح ثاني مره عايشه توقف بويهي و انا مهزوزه ضعيفه جدامهااا..كنت بقولها مطر مرتبط بانسانه غيرج و عنده ولد بس مدري شو الي منعني ...
عايشه : انا اسفه يا عمري ...بس قلتلج من زمان مطر يحبني ..
كرهت كلامها ... فكملت اتقول : عاد متى بقرر بالزواج ..الله اعلم بس حلف محد بياخذني غيره ...
ما تدري ان مطر طلع من خاطري خلااص ...
التفتنا لـ صوت اسعود : ايه عقربه شو اتسوين هني ؟؟؟
عائشه تطالعني و اترد حق سعود: اتطمن ع احوالكم
سعود : يالله طوفي برع برع ..
نزلت راسي بالارض غاشتني دموعي ..
عائشه رافعه خشمها : انت مطر ما عرف يربيك
سعود : خخخخخخخخخخ خل يربي روحه قبل ...يالله برع برع ...
طارق : سعود عيب ...
متى يااه طارق !
سعود: هذي امايه رايغتنها من البيت
عائشه بقوة عين : الحمدلله ع السلامه طارق ..
طارق جنه طنشها ..كنت اسمع السوالف بس ما رفعت راسي من ع الارض اخاف يجوفون دمعتي ...بس جنه ..سعود قعد يدزها ههههه سعوود دفش ..
عائشه تبعد سعود عنها : اصبر ان ما خبرت عليك مطر ..
سعود : برع برع ..
رفعت راسي طاحت عيوني بعيون طارق مسحت دمعتي .بطرف صبعي
عطيته ظهري كنت بروح حجرتي بس سمعته يقول لي : ليش خليتها تجرحج
ما قدرت ارمس ربعت حجرتي و يلست اصيح ..منهاره ..انقهرت من ضعفي جدام عايشه و مقهوره من كل شي ..كل شي ضدي ...تنهدت بعذاب .. شو اتفيد دموعي .. شو يفيد حزني و همي ..اصلا مطر ودرني خلااص ..و انا الي قاصه ع روحي ..
و اوني اترياه ...و انه يحبني خدعني بصلاله بس علشان يونس روحه ..حسيت بضيجه و اني مخنوقه بس ما قدرت اطلع من حجرتي ..منو بنقذني منه طارق ؟؟ ولا اخوي جمال ..
مالت عليه من اخ .. حتى خطر ع بالي وليد فديته ما جفته غير هذاك اليوم في المستشفى يوم تعور ...
حطيت ايدي بحضني اتذكرت هذيج الليله ... ساعات الفير يوم حضني شخص ..يلست ع طول هذي المشاعر الي حسيتها صوب هالغريب نفسها و جريبه من المشاعر الي احسها صوب مطر يوم يكون جريب مني و حتى بعيد اتوله عليه ...
غمضت اعيوني و كانه كان حلم ...ولا اتمنى يظهر بيوم ينقذني من العذاب الي انا فيه ..
في اليوم الثاني الصبح ..عقب ما تغسلت .. رحت حجرة مطر اشيل باجي اغراضي لاني قررت خلااص اروح بيت خالوه عقب ما امر اليوم المحكمة و ارفع عليه قضية طلاق ...نقزت يوم جفت سعود يالس بالصاله عفد عليه ..
شهقت : شو فيك
سالني بلهفه : وين رايحه
طالعتني ما قدرت ارد عليه كرر سؤاله : وين
قلته بصوت واطي : مالي مكان هني
سعو بألم : و انا !!
رفعت راسي غمضني فقلته : انت و عزوه مب محتاييني ..عندكم طارق
سعود: ميثه دخيلج حرام عليج ..محد عندنا في البيت
نزلت راسي و قلته : ما اقدر انا وايد اتعذب هني ...
سعود: من شو ..مطر ما اييي البيت خلااص ..
قلته: و حياتي لي متى بتم جي انا ما اقدر اسفه
سعود حسيته وايد متعلق فيني : ميثه دخيلج ..
عطيته ظهري عادي يأثر فيني و يخليني اغير رايي و خاصه اذا تميت اسمع رمسته ..لحقني يترجاني بس انا دشيت حجرة مطر ..فجيت الكبت و ظهرت باجي ملابسي .. و لمحت ع التسريحة جووزاين سفر .. ياني الفضول و فجيته ..جواز مطر و الثاني تعلقت اعيوني يوم جفت صورة عايشة ..ارتجفت رديت الجواز ابسرعه
مكانه يوم جفت مطر ظاهر من الحمام و شكله كان مستعيل ..انصدم و تم واقف يطالعني ... و كانه ما توقع يجوفني حتى انا ما توقعت اجوفه ..بلعت ريجي ..طالعني عقب طالع
الجواز..ما قال لي شي طنشني و راح يلبس ثيابه .. و انا مب عارفه شو اسوي شو يسوي جواز عايشه عنده ..؟؟؟
قلته و الفضول بجتلني : وين بتروح
قال بكل وقاحه : المحكمه
قلته بعذاب : انت متفج معاها البارحه كانت هني ..
رفع حياته و قال بغرور : لا و الله
عصبت عليه و قلته : مسرع نقلت لها الخبر ان طارق يبا يردها ..
ابتسم و قال : قلت اسبقه
عفدت عليه كنت ابا اشمخ ويهه بس رد لورا و ابتعد عني بسرعه ..
قلته بقهر : طلقني ..طلقني ..
طالعني بطل حلجه و قال ابرود : انتي طا......"وسكت"
حسيت قلبي يدق بقوه و جسمي يرتجف ..
بس عقب قال : مب احينه عقب ما املج بعايشه
دارت فيني الدنيا بس يودت روحي و قلته : انت شو تبا فيني ليش ما اطلقني ..؟؟
تجدم مني رديت خطوه لورا حسيت جسمي صار حار .. بس هو كانت خطواته مني بكل ثقه .. زخني من لحيتي و رفع راسي علشان اطالعه حسيته جريب مني و انفاسه تحرقني غمضت اعيوني و انا ميته من خيانه احاسيسي لها الحيوان ..بلعت ريجي بصعوبه ما اقدر اعيش من دونه اباه كل ذره فيني تباااه ...
بس لحظات بطلت اعيوني يوم قال : علشان الحاله الي انتي فيها الحينه كل ما اكون بقربج
فج ايده عني و ابتعد ..شل الجوازات و انا قاعده اتصارع مع مشاعري
رن موبايله ...شله قلته اتطنز عليه : روح تاخرت عليها
قال ابرود: لا فديتج ها خليفه الشاهد الاول ..
شليت المنبه و فريته له بقوه تمنيت اييه ع راسه بس قدر يطلع منها و يبعد نفسه
همست : انا اكرهك ..."وصحت "
بس هو ما صد صوبي ولا طالعني ... ظهر من الحجره ع طول .. يلست عالارض و صحت بصوت عالي جني ياهل .. شكيت انه سمع حسي ..يلست اصيح حتى انهد حيلي .. شليت بروحي و رحت الحمام دارت الدننيا فيني ..طحت عالارض حسيت بضربه ع شفايفي بس جني كنت متكهربه ..
مرات اجوف الدنيا ادور بعيوني و مرات ارد لطبيعتي ..حاولت اقوم بس ما قدرت ..و كل ما احاول انش من مكاني ..ارجع و اطيح ..شكيت ان صار لي هبوط ..
يلست احبي حتى طلعت من الحمام ...رحت صوب الثلاجه و انا ممدده عالارض .. ناولت دبة الماي .. و يلست اشرب و ارش بويهي حتى حسيت برجفه .. مدري كم من الوقت مر ..حتى حسيت بروحي رديت لطبيعتي ...
راسي بنفجر من الصداع ...حاولت قد ما اقدر اكتم عبراتي الي اتهل ...يوم حسيتا ني ابخير ..
شليت شيلتي .. و رحت صوب شنطتي ما اروم اتم بها البيت لي ماي رجع مطر و معاه عواشي ... الله يعينها الي ساكنه في بيت ابوي ...و يعين ولدها ..
زخيت باب الكبت علشان ما اطيح ... و قبل ما اوصل لباب ..انفج باب الحجرة بعصبيه ...حتى شهقت و جفت مطر شكله منهااار وقفت اطالعه انا بحلم ولا بعلم يمكن تهيأ لي يمكن اكون حلمانه . وقفت اطالعه . جفته يحشر عمره بزاوية بين الشبريه و التسريحه و يلس جنه ياهل يصيح بصوت عالي ...قلبي وقف اول مره بحياتي اجوف ريال جي يصيح !!
بحياتي ما توقعت اجوف مطر جي يصيح .. حتى يوم توفت امه ما طاح جي ... يلست ع الكنبه اراقبه كان مغطي ويهه و يصيح بحراره ...شو السالفه يا هالعالم ..شبلاه لا يكون حد مات بعد !! يلست اراقبه مش مستمتعه لا لانه قاعد يتالم بس مستغربه ليش جي منهار شو مستوي به ؟؟؟
رحت صوبه و انا بروحي راسي يدور من يواسيني و يخفف عني يلست عالارض
همست: مطر ؟؟

ولا كأني موووجوده ..كان يهز بروحه جنه ياهل و حاط ايده بوسط راسه و يصيح

زخيت ايده ابصراحه اشفقت ع حاله : مطر ..مطر ..شو مستوي ..عايشه ماتت !!
بعد ايده عن ايدي و دسها جنه ياهل و يصيح .. ما تحملت اجوفه جي ..حطيت ايدي ع راسه امسح ع شعره و حتى اني يلست اصيح وياه ولا اعرف شو سالفته بس كنت متأثره بحالته ..
يوم قعدت امسح ع راسه رفع راسه و حضني بقوه يصيح ...
خفت ارمسه و يبتعد عني ...فسكت اسمع صياحه .. تمينا فتره ع هالحاله و الله كسري بقسم نصين عورني بس تحملت حتى شكيت انه ممكن رقد فهمست : مطر حبيبي ..
رفع راسه ع طول قال : مالي حظ
مب فاهمه شي مسحت دموعه بحنان و قلته : فديتك ..
تعلق فيني شكيت للحظه انه مطر رد عشرين سنه لورا قال و هو يصيح : انا تعبااان
طالعته و انا مب مصدقه الي قاعد يستوي !!
فاجاني يوم عفد علي و حضن ويهي بيده و قال بتملك : انتي ما اتحسين فيني ..ما تبيني
غصبنا عني تجربت منه و لصقت فيه و قلت بعذاب : و الله اني ميته عليك ..
سكت يوم جفته يعض ع شفايفه و كانه يبا يمنع دموعه انها تحدر بس ما تحمل و رد صاح
هزيته برقه : مطر اهدي ..
ابتعد عني و تميت بمكاني اطالعه ..قام و رد يلس بزاويه ثانيه بعيد عني و قعد عالارض يصيح مره ثانيه
كان مغطي ويهه ما يبى يراويني دموعه بس انا ما اعرف شو مستوي ؟؟به ..خفت عليه وايبد ..ما شي غير اني اتصل باي حد يقدر يرمسه .. بس منو ..!!
رحت صوب التلفون و انا مرتبكه و ابروحه الي فيني كافيني .. بس يايه صوبي و جنه جثه شهقت بخوف ..
قلته بخوف: بتصل بحد يج...
يرن عن التلفون و فره بالارض جنه ياااااااااااااااااااهل تكسر قطعه قطعه ..
و صرخ علي بصوت عالي : لا ترمسين ويا حد .."زخني من رقبتي " يا ويلج ان خبرتي حد
وربع برع جنه مينون حتى ماخذ سويج سيارته .. لحقته ..بس ما قدرت وقفت ابمكاني و دارت فيني الدنيا ..صحت بصوت عالي ..مطر مطر ...رديت داخل الحجرة .و راسي بنفجر شو مستوي به ..عايشه رفضته و انصدم ؟؟؟ حرمته

يتبع ,,,

👇👇👇

تعليقات