رواية انا حر ما انهان والحر ما يرجع لشخص يهينه -49
وربع برع جنه مينون حتى ماخذ سويج سيارته .. لحقته ..بس ما قدرت وقفت ابمكاني و دارت فيني الدنيا ..صحت بصوت عالي ..مطر مطر ...رديت داخل الحجرة .و راسي بنفجر شو مستوي به ..عايشه رفضته و انصدم ؟؟؟ حرمته كشفته انه بتزوج وودرته ؟؟؟ ليش قال اني ما احس فيه ؟؟؟ كان يكلمني بغرور و نفسه بخشمه ؟؟ رد البيت منهار !!! شو مستوي .و اتمددت ع الشبريه ...اتامل التلفون المتكسر .. ما يباني اخبر حد ليش يمكن يصلح الوضع بس بهو الحاله مستحيل ..؟؟ بس يوم مرت الساعات ما تحملت حسيت راسي بنفجر و غير اني قمت احاتيه وين بيروح و من دون سياره ..... رحت الصاله و اتصلت بمنيره ..
منيره : هلا و الله
قلته بخوف: منيره تعالي بسرعه ..و خلي ريلج ايي لحقي علي .."عضيت ع شفايفي بقوه "
سعود وقف ع راسي مستغرب و كان ظاهر من حجرته
منيره متروعه : شو شو مستوي ؟؟
صرخت : تعالي بسرعه ..تعالي ..
وصكرت عنها ..سعود: شو مطر ضربج ؟؟
وقفت و رحت صوب سعود : سعود ..روح برع جوف مطر وينه ..ياني و حالته حالها
سعود : شو فيه ها شيطان ما يحس
هزيته بعصبيه : مب وقتتتتتتتتتتتتتته سعود اتصل بـ طارق و جوفه وين ..دخيلك ..
طلع سعود برع الصاله و انا يلست في الصاله اكل ابروحي ...ظهرت عزه من حجرتها كاشخه و جنها تبا تطلع
وقفت بويها قالت ابرود : انتي كل اتصيحين ؟
سالتها بخشونه: وين رايحه
عزه مستقويه : ما يخصج ..
قلتها : مب سادنج البارحه تكفيخ سعود ما اتوبين ..
عزه بتحدي : ما يهمني شي انا ادور سعادتي و ها البيت ما جفت فيه الا الضرب
ذكرتها : مطر مدلعنج بس انتي ما فيج خير
قهرتني يوم قالت : وينه مطر الحينه حتى انتي حرمته مب سال عنج ..
دزيتها بقوه صوب حجرتها : طوفي حجرتج ..
ردت دزتني : قومي مب انتي الي تتحكم فيني
قلتها بغيض و انا اهاجمها : متحمله و صابره ع اخوج علشانج و علشاان سعود طوفي داخل
عزه واجهتني : اقولج ما يخصج فيني
ما تحملت طولت لسانها ووقاحتها .. بكل قوتي دزيتها داخل حجرتها و هي كانت اتصارعني .. مدري هذيج الساعه من وين يتني القوه رغم الحاله الي انا فيها و الصداع الي بفجر مخي .. بس قدرت افرها بحجرتها و اقفل عليها الباب يلست ادق الباب بهستيرية ..بس طنشتها ..
رد سعود يطالع حجره عزه : شو فيها هاي
تنهدت : ماشي كانت تبا تطلع منعتها
سعود مبتسم: حرمه جي اباج
ذكرته : شو عن سياره مطر ؟
قال : سيارته برع بس هو محد ..
شهقت بخوف : وين رااح ..
سعود يطالع حجره عزوه : يمكن حد مر عليه
قلته و انا اكيده : لا لا ربع برع شرات الخبله ما اعرف شو سالفته ...
سعود : شبلاها هاي بتكسر الباب
يلست ع الكنبه اصيح : سعود انا ميته ع اخوك و انت قاعد تستهبل علي ..
سعود خذ الموقف بجديه : ليش شو فيه ؟
دش طارق : شو السالفه ..؟؟
سعود : مدري ميثه اتقول مطر تخبل !
طنشت تعليق سعود و رفعت راسي اترجا طارق: اول مره اجوفه يصيح شرات اليهال ..عقب طلع برع الحجره يركض شرات المينون
طارق: وين راح سياييره موجوده برع
يلست و قلت بيأس : ما اعرف .. اصلا مدري ليش هو بهالحاله ..
دشت منيره متروعه تربع : شو شو مستوي ؟
طارق متأففف : نحن ناقصين ..؟؟
عضيت ع شفايفي بحيره شو مستوي ...
طارق يسال منيره : عبدالرحمن برع
منيره و الحيره و الخوف بعيونها : هي بس شو مستوي
طارق : بنطلع اندور عليه .
سعود لحقه : بيي وياكم
طارق : لا انت تم هني لازم يكون ريال موجود بهالبيت المنحوس ...
حسيت اسعود استانس من تعليق طارق يوم قال ريال .. و قعد ع طول ع الكنبه جنه ما صدق حد قاله لا اتروح و حط ريل ع ريل
منيره اتهزني : ميثه شبلاه مطر
مدري ليش سالتها : عايشه وين ؟؟
عقدت حياتها: ما ادري اتصدقين ..؟؟
قلتها : ليش مب ساكنه وياكم
منيره : هي بس يمكن راقده ما اعرف ابصراحه ..شو يخص عايشه الحينه ؟؟
رجعت اصيح : كان طالع و ناوي يملج ع عايشه شايل معاه جوازها
منيره مصدومه: مستحيل
صحت بمراره : و الله العظيم جفت جوازها حتى ما همته دموعي ...
حضنتني منيره فصحت بصوت عالي : انا تعبانه مقدر اتحمل خلااص ..
منيره اتهديني : خلااص ميثه ...
لمحت اسعود يطلع من الصاله ع طول من جاف دموعي ..تحدر بمراره ... مسحت منيره دموعي
قلتها : سمعت كلامج .. و حاولت اخليه ما يجوف غيري
منيره بنبره اشفاق : ها الي جفناه كلنا بصلاله
قلتها و انا متألمه : كان يخدعنا متفج مع عايشه علشان ترضى عنها امج و عقب يتزوجها .. "ر جعت اصيح " و الحينه من سمع طارق يبا يردها تخبل و يبا يتزوجها ..
منيره : فديتج لا اتصيحين ..ما اظن مطر يسويها
قلتها بعذاب : و غير ها حضرته معرس من قبل و عنده ولد
منيره جنه حد صفعها ع ويهها : شو .. لا لا مستحيل مطر ما يسويها
قلتها بغيض : امبلى جفته حتى طارق جافها و مسكنها في بيت ابوي بيت ابوي الي سرقه عني
منيره : لا تظلمين مطر ..انتي ما اتعرفين
قاطعتها و قلتها :بس منيره لا اتزيديني دخيلج ..اخوج تحملته وايد و ما عاد فيني خلاص
ذكرتني : عيل ليش منهاره من شويه و خايفه عليه تدورينه
خذت نفس صدق ما لاحظت اني مهتمه بحاله فقلت ابرر حق منيره و حق روحي : يمكن لاني اول مره بحياتي اجوف انسان جي منهار و يصيح بصوت عالي ..جنه ياهل ..
منيره : ليييييييش شو صار ..انا لازم اجوف عايشه اكيد هي اتعرف
قلتها بعذاب : يمكن غيرت رايها و صدمه قراره و انهار
منيره: ميثه للاسف انتي قاعده تصدميني فيج
طالعتها مب فاهمه كلامها فقالت : انتي موليه للاسف ما اتعرفين مطر .. موليه
خذت نفس ووسكت عنها ..منيره ما اتعرف كيف حياتي مع اخوها علشان جي تدافع عنه ..
ظهرت منيره موبايلها وجنها تبا تتصل حق عايشه لانها صكرت بعصبية
و قالت : مغلللللللللللللللق .
ردت اتصلت بعبدالرحمن و انا احس راسي بنفجر يوم قالت لي ع لسان عبدالرحمن : ما لقوه ..
وقفت منيره : ما اصبر بروح اجوف عايشه في بيتنا و شو سالفتها .
قلتها : منيره اختج في حجرتها .. تضاربت معاها من ساعه
طالعتني منيره فككملت: ما ادري وين كانت تبا تظهر ما خليتها
منيره باسى : مدري شو صار بها البيت انا ما اقدر اتحمل خلااص ..بس ادعي ربي ان يخلي زوجي يتحمل مشاكل اهلي
نزلت راسي بالارض فكملت: ريلي بطفش مني .
وطلعت .. يلست ابمكاني ..اتريا الاخبار ولا حد يتصل بس ما كان في شي ...رحت لـ سعود و طلبت منه يتصل ب، طارق علشان يعرف الاخبار .. بس طارق قال انه مالقوه باي مكان ...
مدري ليش هامني مطر عقب كل الي سواه فيني و باعني ...لها الدرجه انا ما عندي كرامه ... تنهدت ... الله يستر من الياي بس بعد كل ها ما بيغير قراري ...
طلعت رايحه صوب المطبخ .. تذكرت ام مطر .. رديت ع طول ما حبيت ا دش المطبخ اساس من يوم احترقت عموه الله يرححمها و اا نا خلاص قطعت هالمطبخ ..بس كنت احس بيووع ...
سعود : ميثه
نقزت و طالعت وراي : روعتج "و ابتسم"
تجاهلت ابتسامته و سالته: اتصل بـ طارق
سعود: يصلون و لو شي اخبار كان اتصل ابروحه ..؟
تنهدت عقب قلت .. يوعانه
سعود: حتى انا يوعان ..
قلته : زين روح صل شو اتريا ؟؟
سعود عفس وييهه : تعبان انا اليوم
قلته بنبره جافه : سعود روح صل انت مب ياهل ..ما اباك اتكون شرات ..............."سكت"
كمل عني : مطر ..
بلعت ريجي و قلته : روح صل احسن لك ..
عطيته ظهري ... سمعته يقول : زين مستويه معصبيه محد يروم يرمسج
ابتسمت ع تعليقه ... رحت حجرة مطر..اتيددت و صليت ... حطيت راسي ع الكنبه حسيت بالتعب ...يلست افكر وين بيكون رااح ..ليش قال اني ما احس فيه انا مقصره معاه !! الغريب كل ما اقرر اني بروح المحكمة يستوي شي ..مدري ليش فجاه خطر علي بيت ابوي يمكن مطر راح لها .. او يمكن هي اتكون السبب ... نشيت كنت بتصل حق سلمى بس جفت التلقون ما فيه حياه .. مطر ما رحمه .. رحت الصاله و اتصلت بسلمى لانها هي الوحيده الي تقدر توصلني هناك في بيت ابوي ..
صدعت براسي سلمى ويا اسئلتها ذبحتني .. بس انا ما قلتها ان مطر فيه شي .. ولا قلتها انه منهار .. في البدايه ما طاعت اتوديني خافت لا اسوي مشاكل مع الحرمه الي جفتها في بيت ابوي اخيرا يوم قلتها انها طلعت من بيت ابوي و بروح اجوف البيت .. اقتنعت و يتني ذلتني عنبوه ...
سلمى يوم جافتني : ليش شكلج جي
ما طلعتها قلتها : ماشي
سلمى: ما يصير جي ميثه ..ابصراحه حياتج مب حياه
تنهدت وقلتها : مب وقته سلمى وديني بيت ابوي دخيلج
سلمى تطنز : زين بخمس دراهم .."و حركت سيارتها "
ما اتخيلوا المشاعر الي احس فيها و انا اطالع بيت ابوي و اتخيل ان مطر قاعد مع حرمته وولده .. و الله كرهت افكاري و كل شي بس مجبوره ..غصبن علي ابا اتطمن عليه .. و الله يهنيه بحياته ...
سلمى : ما تبين تنزلين ..
انتبهت ان سلمى واقفه عند الباب فقلت : لا بنزل
سلمى :بنزل وراج ..
قلتها بسرعه : لا لا ما يحتاي " سبقتها و نزلت "
تجدمت وقفت مجابله الباب حطيت ايدي ع قلبي كم بتتحمل يا قلب ..دقيت الجرس باصابع ترتجف ... دقيت اكثر عن مره .. وقفت يوم ياني صوتها : زيييييييين "عقب قالت " منو ؟؟
قلتها : انا ..ميثه ..
فجت الباب انصدمت يوم جافتني عقب قالت و كانها تعرفين : هلا ميثه "مدت ايدها " شحالج
طنشت ايدها و قلتها : ابا اتكلم مع مطر ..
نزلت ايدها منحرجه وقالت و كانها منحرجه : مطر محد "ووطت صوتها " بعده ما رد من برع
حسيت ا لغيره بتاكل قلبي ..بس جبرت روحي اسالها : متى كان موجود
قالت بسرعه : الصبح بس "سالتني " ليش في شي؟؟
نزلت نظراتي بالارض عيل وين رااح .. فصح ملح و ذاب ..يا خوفي صار فيه شي
رفعت راسي اطالعها يوم قالت : ميثه في شي ؟
هزيت راسي بمعنى لا ورديت لورا
بس هي اصرت : انا حرمته و من حقي اعرف شو فيه مطر ؟؟ اتصل به يعطيني مغلق
طالعتها باحتقار حتى انها انحرجت ..صديت عنها و رديت ركبت سياره سلمى ..
سلمى اتعاتبي : عيل اتقولين محد ساكن في بيت ابوج يا الجذابه
سندت راسي ع السيت انا بعالم و سلمى بعالم ثاني ...غمضت اعيوني و صوتها يتردد في بالي " انا حرمته و من حقي اعرف " "انا حرمته و من حقي اعرف "
سلمى قالت : اتخليني الواحد يحرم يفكر بالزواج
قلتها ع طول: احسن .. لا اتعرسين ..
سلمى : ول لها الدرجه
تذكرت الزاويه الي لقيت فيها الشاب و قلت : تمي تحلمين بانسان ما تعرفينه احسن من انج ترتبطين و تزوجين ترا الاحلام اريح و احلى بوايد
سلمى رافعه حياتها : ميثه شو اتخربطين ؟؟
بلعت ريجي و قلتها : ماشي ...عطيني موبايلج ..شويه ..
ناولتني موبايلها و دقيت بيت منيره لاني ما اعرف رقم موبايلها .. ردت علي ع طول
قلتها : منيره
سالتني بسرعه : شو جافوه
تنهدت و قلتها : لا ما كلمتي عبدالرحمن
منيره : اتصل به ما يرد علي ...
سالتها : جفتي عايشه سالتيها
منيره سكت شويه عقب قالت : عايشه محد في البيت .. سالت عنها عبدالرحمن قال يمكن في بيت خالتها اتصلت هناك محد يرد علي ...غريبه مطر و عايشه مختفيين !!
قلت ابسرعه : ما اظن بيكونون ويا بعض لان مطر راد البيت و حالته حاله ..استبعد ها الشي منيره
منيره : زين هدي ميثه ..حتى انا ما اظن يكونون ويا بعض بس ما اعرف و الله ...
قلتها : خلااص بصكر اذا في شي اتصل ع تلفون بيتكم ها رقم سلمى
منيره :/ ان شاء الله حبيبتي بس هالله هالله بعمرج
قلتها : ان شاء الله
عقب ما صكرت سلمى : شو سالفتكم بتخبلون فيني ترا
قلتها اتطنز : سلامتج من الخبال
عقب ما وصلنا بيت مطر قلتها تنزل بس ما رضت لانها مرتبطه بموعد مع خالوه في العياده .. دشيت البيت و انا كلي امل ان جافوا مطر .. و ارتحت وايد و ما خاب ظني يوم جفت سعود يترياني في الحوي و ياه صوبي
قلته و قلبي يدق : شوه
سعود : وين رحتي دورت عليج ؟؟ ع بالي رحتي بيت خالتج
قلته بسرعه : سرت مشوار شو الاخبار
سعود : ماشي يديد ..حتى بالعزبه ما حصلوه و ربعه الحينه يدورون عليه بعد ...
طاحت شنطتي من ايدي فاقده الامل اني ممكن اجوف مطر مره ثانيه عقب الحاله الي كان عليها ...
تاه الفكر و الأمر ضاع من حيلتي...وأضنت جروح القلب يا الرفقان ..والدمع من كثره حرقلي وجنتي...يا من معين,مضنى شكى الحرمان ...خلي رحل و ظلمت بعده ديرتي
دومي في ذكره مهاجر النسيان ...لا من خبر صوبه بيشفي علتي..و لا من بشاره تطفي الولهان
( ,.الحلقة الخامـسـ 5 ــة و الثــ3ـــــلاثون ).:"؛
رحت حجرتي و انا مب عارفه شسوي الوقت يمر و الظلام عم الامارات و مطر للحينه ماله حس ولا خبر ...قاومت الرقاد يمكن حد يبشرني بجوفته ...
غمضت اعيوني و انا اتذكر كلام سعود ايمر في بالي يوم قال محد بتم في هالبيت .. صدق و كانه حد مسوي لهم شي ... الكل يصارخ ما بنعيش هني بنطلع من هالبيت ...
سعود و عزه و مطر و يدوه طلعت و طارق طلع و ام مطر راحت عالم ثاني ....و انا شو مصيري شو بيكون ... تنهدت بس اتطمن ع مطر .. ع الرغم كل الي سوااه فيني ..عقب اودع هالبيت باحزانه و الالامه .و ذكرياته بحلوها و مره ..
نشيت و انا احس اني شبعانه رقاد .. بس يوم تذكرت الجو الي نحن عايشينه .. نقزت ابسرعه اجوف الساعه و ادعي بداخلي انهم جافوا مطر ... شليت الساعه انصدمت يوم جفت الساعه 3 الفير .. بطلت اعيوني الوقت ما يمر ..
و محد رد لي خبر قمت من شبريتي و رحت توضيت و صليت ركعتين اترجا ربي و ادعي انه يحفظ مطر و يرده لبيته سالم ..صحت بمراراه و انا اسجد و ادعي ربي ..تميت اصلي و اقرا قران حتى اذان الفير ... صليت الفير ..
عقب ظهرت الصاله متردده اتصل بـ منيره ولا لا ء.. عقب اتصلت بها و انا متلومه اتصل بها الوقت ..
ردت منيره بكسل: الوو
بلعت ريجي و قلت : اسمحيلي منور ارمسج بها الوقت
منيره : لا عادي كنت ارضع بدر .. شو انتي شكلج ما رقدتي
قلتها " رقدت شويه شو ماشي اخبار عن مطر
منيره : ابصراحه ماشي ...
قلتها بخوف : ليش ما يخبرون الشرطه ...
منيره : هدي ميثه
رصيت ع سماعه التلفون : يمكن يسوي بروحه شي انتوا ما جفتوه امس كيف كانت حالته
منيره : ترا خبروا ربيعه خليفه
قاطعتها : البارحه طرا لي هالاسم ..
منيره: هي ها رفيجه بالدوام ... المهم قالوا لازم يكمل 24 ساعه بس خليفه مطمن اونه مطر ما ينخاف عليها
وقفت و قلت بغيض : منيره محد جاف مطر كيف حالته ..
منيره: اعرف حبيبتي بس ما عليج ...انا قلبي متطمن و الله ..
سكت ما عاد اقدر اقولها شي ...
عقب قلتها : خلااص ما عليه بس اذا استوا شي طمنيني ..
منيره : فالج الطيب اكيد ...اممممممممم
قلت ابسرعه : شو ؟؟
منيره : ما سالتيني عن عايشه
بلعت ريجي و قلتها : شو فيها .. لقيتوها ..!!
منيره : عبدالرحمن مودنها بيت اهلها
قلت: خالتها ؟
منيره : لا ..طلعت يدوه اتعرف عنها عيال عمومه في الشارجه .. شلها وداها لهم لانه يقول خلااص ما يقدر يتحمل مسؤليتها القهر انه ما قالي و كل ما اسئله يقول ما ادري الين ما الحيت عليه ..
قلت بخوف كبير: لا يكون مطر جي حالته علشان عبدالرحمن بعد عايشه عنه
منيره جنها حرجت : ميثووووووووه لو كنتي جدامي كنت ضربتج و الله ..
حرجت عليها : انتي دوم ادافعين عن اخووج و حتى انج اتجوفينه كيف مراويني الويل بس انا الي خايفه عليه ..
منيره : زين ليش معصبه انتي الحينه ؟؟
قلتها بغيض : ماشي يالله بصكر لو في شي خبريني
منيره: ميثه زعلتي
قلتها ابسرعه : لا مع السلامه ..
منيره : مع السلامه ..
صكرت عنها التلفون ووقفت ابسرعه ..حسيت بروحي مخنوقه و مب عارفه شسوي .. فتحت باب الصاله و طلعت برع ..غريبه عايشه تختفي و مطر يختفي بعد بنفس الوقت و اليوم ..في شي ؟؟ يمكن كان يمثل علي !! ما اظن ..
عيل ليش مب مهتمين و يخبرون الشرطه تدورونه ...بس استبعد ان مطر يمثل اصلا مستحيل .. و الي مثل قوة شخصيته مستحيل ينهار جي الا اذا كان سبب جايد و قوي
و انا عذرهم لانهم ما جافوه كيف كان يصيح و يكفخ بروحه .. يلست بالحوى رفعت راسي اطالع السماء رووعه الجو .. حلو الوقت ساعات الفير تميت بالحوي اراقب الشمس لي ما تطلع ...
راقبتها بصمت غمضت اعيوني مب متحمله اشعتها ...رحت المطبخ اسوي لهم ريوووق ..محد بياكل غير سعود و عزه ... بس مطر وين راسي بنفجر و انا افكر فيه ..تعبت خلااص ...
دشيت الصاله شغلت التلفون و يلست اجلب قنوات التلفون فكرت اتصل بـ طارق بس استحيت و غير ها ما اعرف رقمه
..انفتح باب حجره عزوه افتريت صوبها اطالعها من فوق لـ تحت ..
طنشتني رايحه الحمام و انا رحت ازقر الشغاله اتحط
اربوق ..يلست ادق الباب حق اسعود علشان ينش بس شكله
مب راضي ما اعرف متى رقد البارحه ..
رديت الصاله .. استغربت يوم جفت عزوه لابسه ثياب المدرسه و ظاهره
قلتها مستغربه :وين رايحه انتي ؟؟؟
عزه مطنشتني فزخيتها من جتوفها وسديت عنها باب الصاله قالت محرجه : لابسه ثياب المدرسه يعني وين بروح
تطنزت عليها : أي مدرسه هاي تفتح يوم السبت !!
ارتبكت عزوه عقب قالت: ابله الانجليزي مسويه لنا تقويه
رفعت حياتي : لا و الله و من متى ان شاء الله تهتمين بالدراسه ..
عزه منقهره : اوووه طوفي من ويهي ما يخصج فيني ...
دزيتها و قلتها : عزوه انتبهي حق روحج ..الي قاعده اتسوين جنون ..
عزه تبتسم ابرود : اعرف مصلحتي
بطلت اعيوني : أي مصلحه ... انتي موليه لاهي بحياتج ما تدرين عن أي شي قاعد يستوي بها البيت
عزه بعدم اهتمام: ما يهمني
قلتها بعذاب: لازم تهتمين ..اخوج مطر من البارحه طالع من البيت و محد يدري عنه
قالت مب مهتمه : شو يعني دوم هو برع و محد يدري به ..
ضربتها ع جتوفها انبها :انتي شو فيج ليش جي ..
سمعت موبايلها يرن رنه فقالت مرتبكه و تحاول ادزني : يالله انا تاخرت ...
ما قدرت ايود روحي يودتها من جتوفي فقالت عزوه: ما بتكررين موقف البارحه
قلتها بغيض: و الله انا متحمله اخوج علشان سعود و علشانج بس
عزه بعصبيه: محد طلب منج و بعدين منو عطاج الحق "دزت ايدي وخري"
ابتعدت عنها و رحت وقفت عند باب الصاله اسد عليها الدرب و قلتها : مب لازم حد يطلب مني يوم الكل لاهي عنج انا بتولاج
عزه محمره من الغيض: انتي شو اتحرين عمرج قومي من ويهي ..
عليت صوتي : سعووود
شفت الخوف بويهها : انتي شو تبين ..
طالعت شنطتها يوم رن موبايلها رنه وحده ..
تطنزت عليها : شو هاي علامه انه برع ؟؟
ردت تطنز بقواه عين : و الله و صرتي تعرفين حق الموبايلات
و تجدمت تحاول تهاجمني تبعدني عن الباب .. عزه لو كانت صغيره و بنيتها بعدها ضعيفه بس جراتها معطتنها قوة كبير ... بس انا ما بضعف و خاصه بها الموقف ..عفدت عليها و دزيتها بقوه خليتها متعلقه ما بين اليدار و باب الصاله
حطت ايدها ع ظهرها : أأأأأأأأي يا الهبله عورتيني ..
قلتها بعصبيه : تستاهلين .. و هذي اخر مره تمدين ايدج ع اكبر منج ..انا ولا يدوه ولا حتى منيره..
عطيتها ظهري كنت بظهر برع الصاله ...يوم جافتني اشيل المفتاح .. هاجمتني من ورا و يلست اتيير شعري .. صرخت متألمه .. و طحت عالارض .. حسيت بضعف قدرت انها تخطفني و و كانت بتطلع برع الصاله تربع ..حتى انها فرت شنطة المدرسه عالارض مب مهتمه بس همها تظهر من البيت ..
زخيت ريولهاا و انا احس ان الصداع بذبحني من ييرت شعري هاي المستقويه ..تعثرت عزوه و طاحت عالارض
حسيتها بتصيح متالمه : ركبتي .. أأأأأأأأأأأأأأي بخبر عليج مطر يكسر راسج ...
زقرت الشغاله بصوت عالي و انا انش من مكاني .. لاني اعرف لو اصارخ من اليوم لباجر سعود ما بيرد علي ...يت الشغاله تربع بسرعه .. كانت عزوه تحاول اتنش من مكانها ..
و الله كنت مستغربه منها كيف مستقويه و راكبه راسها بكل وقاحه !!
صرخت بهستيريه يوم سمعت موبايل عزه يرن ثالث رنه بس ها المره طول : ماااري مااري ..
يت تربع وقفت الشغاله مستغربه و بنفس الوقت مب عارفه شو اتسوي يوم جافت عزوه طايحه عالارض اتصارع تبا اتنش من مكانها .. و انا واقفه ارتب شعري
الشغاله مصدومه: مدااام
قلتها بعصبيه مبالغه فيها علشان اتخاف : تعالي ساعديني
زخيت عزوه من ذراعها يلست اتصارخ عزوه معترضه : خوزي عني مالج شغل فيني
قلتها : بعد صرخي علشان سعود ينش و يريحني
صخت و حسيت انها كانت من تايهه و ضايعه ...ساعدتني الشغاله فريتها داخل حجرتها ... و شلت عنها ..مفتاح حجرتها .. و قلت الشغاله : يالله ظهري ..
عزوه كانت تربع : يا الخايسه ..
شكلها ردت لطبيعتها يوم جفتها تربع بسهوله صوبي .. قفلت عليها باب حجرتها قبل ما توصل صوبي .. حسيتا بروحي شريره بس هاي ما ايي وياها الا جي
عزوه اتصيح: فجي الباب جايفه امايه ماتت تتحكمين فيني ..
قلت بقلبي و الله محد ضيعكم غيرها من مطر الين انتي استغفر الله .. الله يرحمها ..الشغاله بعدها واقفه مستغربه
قلتها : خلااص روحي ..
شليت شيلتي الطايحه عالارض ...و لبستها .. و رحت برع الصاله ..ترددت في البدايه بس شجعت روحي و رحت صوب باب الحوي.. و فجيته ابكل جرأه .. مثل ما توقعت كان يترياها برع ..ظهرت بكل وقاحه .. ورحت صوب سيارته ..حسيته في البدايه كان بتحرك بس شكله غير راييه ..
نزل الدريشه كان قلبي يدق و الله لو جافني مطر بجتلني ...و الله من جف شيفته حسيت بالاشمئزاز من صوبه كيف عزوه متعلقه فيه !!! الغتره من صوب و العقال من صوب لا بعد رافع راسه علشان يطالعني يوم يرمس امغطي اعيونه بغتره
فولت و ارتفع ضغطي يوم قال ابرود : ميثه !!
يتبع ,,,
👇👇👇

اللهم لك الحمد حتى ترضى وإذا رضيت وبعد الرضى ,,, اضف تعليقك