رواية يالبى قلبك -24
في مكه ..البنات كانو سهرانين وعلى الساعه 3 الفجر قالوا
العنود: شرايكم ننزل للحرم
الهنوف: الحين أحس اني دايخه
العنود: قومي بس أي دايخه ما بقى شي على الفجر لايكون بتنامين كان أذبحج
الهنوف: حشى كلتيني حتى لو كان فيني نوم بيطير
الابدور داخله عليهم: السلام عليكم
الكل : وعليكم السلام
بدور: شفيكم تتخانقون
الهنوف: حظرة الانسه تبي تنزل
بدور: يالله وناسه الحين الحرم فاضي والجو حلو
العنود تمد لسانها على الهنوف: شفتي ... يلا عميمه ننزل
ريم: واحنا
بدور: حتى انتو كلنا ننزل
العنود: يلا زين قومو توضوا
قامو البنات يتوضون وبدور قاعده تاكل البطاطس وفاتحه التلفزيون
العنود: عميمه احنا لبسنا عباياتنا وانتي الىالان ما سويتي شي
بدور وهي تقوم: يالله يالله هذاني قمت انتم اسبقوني
العنود: طيب احنا نستناج تحت
بدور وهي رايحه للحمام : انزين
طلعت العنود والهنوف ...ريم ودانه توهم طالعين
دانه : وينهم
ريم: العنود بتصبر أكيد طلعت
دانه : بس عميمه هنا مابعد راحت
الا يدق التلفون حق الجناح ...
دانه : غريبه منو داق
ريم: تلقينها العنود داقه من تحت تقول وينكم
دانه: ما ادري بشوف _ وترفع_ نعم
رفعه: نعم الله عليج وينكم ما تردون على جوالاتكم
دانه: هلا والله رفعه
رفعه: هلا فيج
دانه: والله ما ادري ما دق عندنا شي يمكن مافي شبكه
رفعه: مانمتو الى الحين
دانه: لا الحين بننزل للحرم شرايج تجين معنا
رفعه: الحين
دانه: ايه الحين
رفعه: طيب بس قبل لا تطلعون مرو علي
دانه: يلا نلبس عباياتنا ونجيج
ؤفعه: يلا استناكم
ريم: شفيها رفعه
دانه: ولا شي بس تقول ليش ماتردون على الجوالات
ريم: بتروح
دانه: أي يلا نطلع لها
طلعو ريم ودانه عشان يمرون على رفعه ويروحون
طلعت بدور نادتهم ولا احد موجود: الله يغربلهم راحو وخلوني يلا بس خل انزل لهم
ريم ودانه وقفوا قدام غرفة رفعه وما حبو يطقون عشان ما يزعجون اهلها وقعدو ينتظرون
ريم: واحنا بنقعد نستنى
دانه: لا والله اجل تبيني اطق الباب واذا فتح واحد من اهلها
ريم: واحد من اهلها والا خايفه يفتح حبيب القلب
دانه :أقول استحي
الا ينفتح الباب ويطلع حمد شافهم واستغرب نزل راسه ومشى الا رفعه وراه
رفعه: هلا دانوه ليش ما طقيتي الباب
حمد يوم سمع اسمها ابتسم
دانه: خفت ازعج اهلج
رفعه: لا عادي هذا حمد قال حتى هو بينزل
ريم: وانتي قاعده بروحج ليش مانزلتي عندنا
رفعه: لا قاعده اسولف مع حمد
دانه في قلبها : فديييته
وقفو عند المصعد ويوم فتح دخلو كلهم وحمد معهم ورفعه تتكلم مع حمد وهو كان صاد عن البنات شوي
وريم تنغز في دانه ...
طلعو وحمد راح في طريق وهم في طريق .. دانه لفت وجهها جهة حمد وفي نفس الوقت حمد كان لاف وجهه عليهم وشافها دانه تفشلت : ياويلي الحين شنو بيقول عني صدق اني ما استحي ..
راحو للبنات
بدور: وينكم انا على بالي نزلتو
رفعه: راحو يمرون علي
بدور: رفعه
رفعه: أي ادق عليكم على الجوالات ما احد يرد
العنود: يو والله ما وصلنا شيي
بدور: انزين يلا يلا خل نروح للحرم وقفتنا مالها داعي
وهم يتمشون
الهنوف: تعالوا بنات أخاف يقومون من النوم ويقعدون يحاتونا ما قلنا لهم
بدور: لا تخافين قلت لامي
العنود: اشوه عشان ناخذ راحتا ونتاخر
قعدو البنات يصلون ويتوترون عقب قعدوالي تسولف والا تقرا قران والي ساكته وتفكر
العنود: رفعه متى بيجون اهلج
رفعه: ان شاء الله بكره
بدور: لقيتو حجز؟
رفعه: أي
العنود: عسى بنفس الفندق؟؟
رفعه: لا مالقينا بس خذنا لهم هنا قريب
بدور: يو حسافه
رفعه: زيين بعد لقينا ..
اذن الفجر عقب صلو وطلعو
قعدو يتمشون
العنود: شرايكم ناخذ لنا فطور
بدور: كل شي موجود فوق
الهنوف: بس الفول
بدور: الله يغربلكم فول الحين
العنود: عادي يلا بس _ لفت وجهها على ريم ودانه_ انتم ما تشبعون سوالف بسكم
ريم: اسم الله عليج
المهم راحو البنات وخذو لهم الي مشتهينه وطلعو فوق للجناح وفطرو وعلى الساعه 6ونص قالت رفعه انها بتروح لغرفتهم فوق 0والعصر يتقابلون طلعت وسكرت الباب الى سلمان في وجهها
رفعه: صباح الخير
سلمان: هلا والله صباح الفل والياسمين انتي عندنا وانا ما ادري
رفعه: شفت جيت مع البنات بعد الفجر وفطرنا مع بعض
سلمان: بالعافيه
رفعه: الله يعافيك ... انت توك تجي من الحرم
سلمان : ايه بروح افطر مع أمي وابوي أكيد الحين يقعدون
رفعه: اوكي انا بطلع فوق انام تامر بشي
سلمان: امممممممممممممم<< وهو يفكر
رفعه: هههههههه
سلمان: ان شاء الله دوم الضحه لا ياقلبي مابي الا سلامتج
رفعه: يلا مع السلامه
سلمان : تعالي بطلع معاج اوصلج
رفعه: لا لا والي يسلمك احنا ناقصين... بعدين من البعد كله طابق
سلمان: هههههههه اوكي يلا مع السلامه
راحت رفعه ودخل سلمان ..
البنات نامو لين الظهر ..أول من صحى العنود صلت وقعدت في الصاله وانسدحت على الكنب وهي دايخه شوي الا جات بدور : السلام عليكم
العنود: هلا والله وعليكم السلام صح النوم
بدور: ماشبعت نوم احس جسمي متكسر
العنود: ولا انا صليت وجيت وانسدحت هنا
بدور: قامت الهنوف
العنود: والله ماادري قومتها وطلعت من الغرفه
الا تجي دلال: السلام
بدور والعنود: وعليكم السلام
دلال: ابشركم
بدور+العنود: وشو
دلال: منى رجعت
العنود: حلفيييي
بدور: فديتها الخايسه ولا تدق
دلال : وصلت أمس في الليل توها داقه تسلم عليكم .. تقول دقت عليج وجوالج مقفل
بدور: يووو صح مافيه شحن بروح اشحنه واكلمها
العنود: جدتي درت
دلال: أكييد اول وحده
شوي الا جاو البنات كلهم ودقو على منى وتحمد لها السلامه وقعدو يسولفون
العنود: بقوم أدق على رفعوه أشوفها قامت .. وراحت لغرفتها خذت جوالها الا تشوف رساله من رقم غريب ..
لي قلب محد هز عرشه ولا جاه **ومحد تجرأ يطلع في كتابه
كم مر من عنده حبايب بدنياه **وكم واحد ينثر لقلبي إعجابه
لكن قلبي محد منهم أغراه **كل الوجوه اللي تمره تشابه
إلا أنت صوتك كل ماقلت بنساه **أحس لك وحشه وقدر ومهابه
اأول ما قرأت الرساله قلبها دق العنود قامت تطالع في الرقم هالرقم مو غريب علي بس حق منو ياربي وقعدت تتذكر الا الهنوف داخله عليها
الهنوف: كل هذا تكلمين رفعه
العنود: بسم الله
الهنوف: هههههههه خرعتج
العنود: ايوا خرعتيني
الهنوف: بلاج سرحااانه عقلج ماادري وين طاير
العنود وتأشر على راسها: عقلي هنا موجود لا تخافين ما طار
الهنوف: أي واضح انزين تعالي دقيتي على رفعه
العنود: هذاني قاعده أدق... الو .. هلا والله ... صح النوم ...هههههه لا تخافين احنا تونا مالنا الا نص ساعه من قمنا ..اي بننزل الحين نصلي العصر هناك ....تعالي ماقلت لج ترى منى رجعت .... أمس في الليل .. اوكي ...يلا سلام
الهنوف: ها بتجي
العنود: قالت تسبح وتبدل وتجي طلعوالبنات واستانسو وقعدو يحوسون لين الساعه 9...
بدور: يلا بنات خل نتعشى ونرجع
العنود: تو الناس
بدور: أي تو الناس يالله يمدينا نتعشى ونرجع بعدين نسيتي بكره بنروح الطايف
الهنوف: قولي والله
بدور: أي والله
دلال: ونااااسه عاد الطايف بررد ومطر
رفعه: متى بتروحون
بدور: أكيد الفجر
العنود: يلا ويانا
رفعه: حلفي
بدور: أي والله من جد يلا والله وناسه بعدين في الليل بنرجع ماراح ننام
رفعه: ياعمري تسلمون بس بكره بيجون أهلي مو حلوه ما اكون موجوده اخاف البنات يزعلون
الهنوف: بيجون بكره ؟؟
رفعه: أي واخيرا
العنود: زييين اجل بتستانسون مع بعض
رفعه: حسافه كان خاطري تكنون معنا
دلال: لا تخافين كلها يوم الي بعده بنكون معاكم وتنغثون
رفعه: افااا والله بالعكس تونسونا ..
العنود: هههههه عشان يكمل الهبال ها رفعه
رفعه: هههههه
راحو البنات تعشو وعلى الساعه 10ونص راحو لجناحهم بعد ما سلمو على رفعه ..
صلو الفجر تحركو للطايف وهالمره الي كان يسوق فيهم الجد ... يوم وصلو لطريق الشفا
العنود : الله المناظر تجنن كلها جبال .. وتفتح كاميراتها وبدت تصور
الهنوف: بس بدرت الصحفيه
العنود: انتي شحارج
فتحت العنود الشباك
الكل: الله
بدووور: الله يجنن الجو
دلال: يهبببل ماشاء الله
ريم: ياحسره على جونا هذا وهم بالصيف كذا شلون في الشتا
الجد: هذا الطايف كذا اجل اذا شفتو ابها شتقولون
العنود: وناااااسه
الهنوف: ياااي شوفو التلفريك
العنود: صباح الخير من زمان قاعده اصوره
بدور: قربي قربي المسافه شوفي من داخله
العنود: ههههه لاتخافين سويتها بس مو مرره واضح
دانه: جدييييييي
الجد: هلا
دانه: ترى نبي نركب التلفريك
العنود: اكييييييد وانا اول وحده
الجد: يابناتي اخاف عليكم تطيحون والا يصير لكم شي
بدور: يبىىى ان شاء الله مايصير الا كل خير
الهنوف: الله ونااسه بس لو طاح التلفريك واحنا فيه
دلال: يمىىىىى ياويل قلبي
العنود: ويصير لنا زي هذاك الفلم الهندي هاه الهنوف
الهنوف: أي وااحد
العنود: هذاك الي يوم جات بتطيح البطله من التلفريك ويجي البطل يساعدها ماادري من وين طلع وتغمز لها
الهنوف : وش تقصدين
العنود: ههههههه ولا شي
ريم وتساسر العنود : أقول استحو ترى جدي موجود
العنود: ههههه وييييي نسييت روحي
الا يسموعون صوت هرن لفو وجهم الا محمد وسلمان وراهم ريم ودانه الي كانو ورى قامو ياشرون لهم العنود لفت بالكاميرا وهي تصور محمد وسلمان وشهووده الي قاعده في الوسط وتاشر لهم وهبال وضحك ...
الجده : الله يهداهم هالبنات
سلمان: ههههه خليهم يستانسون يمى
الجده: شكبرهم الي يشوفهم شيقول الي في كبرهم متزوجين وعندهم عيال بعد
محمد ابتسم
سلمان انتبه لسلمان ولف وجهه: قول والله
محمد: على وشو
سلمان: ما ادري عنك انت وهالابتسامه الي شاقه وجهك ... بعدين يمى بذمتج العنود مع خبالها وجه زواج خل تفرغ كل طاقتها في الهبال عقب زوجوها
محمد: هههههههههه عاد الي يشوف انت الي الحين بطلت هبال
سلمان: ولا تفكر اني ابطل
في سيارة البنات
العنود: فديييته عمي والله انه يهبل
الهنوف: ايه بلاه مسايرنا بهبالنا
ريم: لا يفوتكم حمووود العنود ركزي الكاميرا عليه هههه
العنود: مسوي نفسه رزه ومؤدب ترى عارفين حقيقتك خذ راحتك بالهبال
دانه: ههههههههههه لو يسمعج
الجد:والله هالولد ماادري متى بيعقل حاط راسه براسكم وانتو بعد استحو الي يشوفكم شنو بيقول
العنود: جدي مااحد بيشوف السياره مظلله
بدور: ههههههههه خوش عذر
الهنوف: واااااو مطر مطر
العنود وشباكها مفتوح اهي والبنات : يلاااا بنااااات طق يامطر طق
البنات كلهم : طق
وقامو يغنون وهبال
العنود: جدي والي يعافيك خل ننزل
الجد: أي استني نشوف لنا مكان عدل
دلال: ونااااسه مو قادره اصبر ابي انزل
شوي الا نزلو ويشوفون قرود وقام الهبال مع الضحك تمو لين الظهر وهم يحوسون عقب خذو لهم غرفه و تغدو و ارتاحو فيها والعصر حركو مره ثانيه وطبعا على طول راحو للملاهي ويوم قربت الدنيا تظلم ركبو التلفريك ...
البنات كلهم ركبو في تلفريك ويا عمهم سلمان واباقي ركبو في تلفريك ثاني وكانو على طول ورى بعض ..
يوم ركبو وتحرك..
دلال: ياربيي خايفه
العنود: يووو لا تخافون ما راح يصير شي وطبعا وهي ماسكه الكاميرا وتصور
الهنوف: الله المنظر يجنن من هنا
سلمان: والله اول مره أشوف بنات مب خوافات
بدور: ليييه حسبالك كل البنات خوافات
سلمان: لا بس الدلع وانتي اخبر
بدور: مااالت
الكل: بديييينا
العنود: ياااهو لا تتخانقون ترى احنا في الجو
بدور: هههههههه واذا يعني
الهنوف: يصير شي ما شيات واحنا نبتلش
ريم: لا لا عمي عاقل ماراح يسوي شي
سلمان: هههههههههه كل هذا خايفين سلمان خذ جواله وقام يحوس فيه << يرسل لرفعه رساااله >>
البنات يسولفون العنود وقفت وقامت تطالع في الجهه الي راجعين .. وطبعا كانت موجهه الكاميرا وشافت شي ما صدقت رفعت عيونها عن شاشه الكاميرا وقامت تطالع وفيها الضحكه ومو قادره تمسكها قامت طقت الهنوف برجلها وغمزت لها لفت الهنوف بسرعه وحطت يدها على فمها انتبهو البنات لفو على المكان الي كانت العنود والهنوف يطالعون فيه والكل قام يضحك
سلمان: بسم الله شفيكم
الكل : هههههههههههههههههههههههههه ميت من الضحك
سلمان: شفيكم أكيد تضحكون علي
العنود وعيونها تدمع من الضحك وقعدت على الارض لانها مو قادره تمسك روحها
سلمان : يوووو اشفيج استجنيتي
بدور: لا لا سلماااني مافي شي
سلمان بطناز: هههه لا والله كل هالضحك كذاا بدون سبب
العنود: يا عمري مسااااكيين
ريم: شكلهم في شهر العسل
سلمان ابتسامه على وجهه من الكلام الي يقولونه وهو مو فاهم شي : من هم
الهنوف: عمي ما عليك منهم
سلمان: بتقولون يعني بتقولون
دلال: لااااااا بنااات اذبحكم
دانه: هههههههه روحي ذبحيهم هم احنا شكو
سلمان: بنااات شالسالفه
العنود: ههههههه وهي تاخذ نفس عمي انا بقولك
الكل: لااااااااااااااا
سلمان: الااااااا بتقول العنود ما عليج منهم قولي
الهنوف: انزين كيفج قولي بس مو الحين بعدين اذا صرتو بروحكم
العنود: اوكي خلاص عمي بعدين اقولك
سلمان وهو يهز راسه: والله انتو ما يندرى وش وراكم مو تنسييين
العنود: لا تخاف
<<<< شنو تتوقعون شافو ؟؟؟؟؟>>>
وصلو الجهه الثانيه تمو شوي وعقب رجعو بس غيرو اماكنهم البنات انقسمو صار النص مع خلود وفوزيه والجد والنص الثاني مع محمد وسلمان ...
بعد مانزلو وهم يدورون الا يطق جوال الهنوف خذت جواله : ندىىىى ...ألو
ندى: هلا السلام عليكم
الهنوف: هلا والله وعليكم السلام الحمد لله على السلااامه
ندى : الله يسلمج شخبارج
الهنوف:" الحمد لله انتي شخبارج شمسويه
ندى: والله الحمد لله مستانسه
الهنوف: شخبار عبدالله
ندى: بخير الحمد لله يسلم عليج
الهنوف : الله يسلمه تحمديله السلامه متى وصلتو
ندى: أمس في الليل
الهنوف : وتوج تكلمين
ندى: والله وصلنا تعبانيين على طول رحنا للشقه واليوم رحت اسلم على امي وابوي وخالتي وعمي
الهنوف: ندووووش ونااااسه تعالي
العنود تصارخ: حمد لله على السلامه يالعرووس تعالي كملي شهر العسل معانا
ندى: ههههههه هذا العنود عطيني اياها
الهنوف: هاج
العنود: هلا والله بالغلا شخبارج حمد لله على السلامه
ندى: هههههههههه بشويش صبرج علي
العنود: شسوي مشتاقه لج
ندى: ههههه تشتاق لج العافيه هاه مستانسين
العنود: افا عليج والمطر والبرد فوقنا شلون ما نستانس
ندى: مطر ؟؟
العنود: أي احنا بالطايف هاج جدتي معاج
كلمت ندى الجده والجد وهم عبدالله كلم وسلم عليهم .. والعنود دقت على اخوها وتحمدت له السلامه
بعد ما تعشو وعينو خير رجعو لمكه وقررو وهم رايحين لابها يمرون الطايف مره ثانيه لانهم ما شبعو منها ..
الساعه 12 في الليل في الخبر ...
عبدالله : أقول حبيبتي
ندى: هلا
عبدالله:شرايج نروح لهم مكه
ندى والابتسامه على وجهها : صدق
عبدالله: الله لهالدرجه خاطرج تروحين طيب ليش ما تقولين لي
ندى: لا بس ما حبيت اثقل عليك واتعبك احنا تونا جايين من سفر
عبدالله: تعبج راحه انت امري وتدللي كل الي في خاطرج قوليه
ندى: ياعمري انت تسلم حبيبي
عبدالله: بس لا تقولين لهم نخليها مفاجأه
ندى : هههه اوكي ولا يهمك يابو المفاجأت انت من عيوووني
عبدالله: تسلملي عيووونج ... يلا قومي ننام
نرجع لمكه .... أول ما رجعو كلن دخل الحمام وخذ له دش بالدور بعد ما نقعو روحهم بالماي والمطر ...عشان كل وحده دااايخه وواصله حدها من النوم العنود هي الوحيده الي انسدحت في الصاله وبعد ما طلعت اخر وحده من الحمام الي هي بدور قومتها دخلت العنود وخذت دش طلعت وصلت الشفع وانسدحت على سريرها خذت جوالها والنوم في عيونها عشان تحط المنبه الا تشوف رساله قرأتها على السريع
تدري من أنا ...؟
واحد ماتتوقعه ..
خذ مهله
وفكر
00:03
00:02
00:01
ها .... ما عرفتني
والا اكيييييد ناسيني
((أنا اللي ))
منتظر موعد عيونك
مشتهي معك الكلام
منتهي قلبي بدونك
عيشتي بعدك ظلام
شافت الرقم ...
ياربييي من ذا أوووو كيفه ... ضبطت المنبه على الفجر الي ماكان باقي عليه الا ساعه ونامت ..
البنات ما راحو للحرم قامو صلو ورجعو نامو قامو قبل الظهر بشوي وراحو للحرم صلو وجابو غداهم ورجعو وقعدو يسولفون في الصاله ... العنود وبدور كانو عند الشباب مع الجده ..
الجد : ها شرايكم بكره والا بعد بكره تبونا نحرك
العنود: والله الصراحه مكه ما ينشبع منها وناااسه
بدور: توج تدرين
سلمان: والله احنا ما قلنا نبي رايكم هاه متى تبونا نمشي بكره والا بعده
بدور: يمه كلتنا
العنود: ها جدي انت متى خاطرك نحرك من مكه
الجد: والله متى ما بغيتو حركنا
الجده : انا اقول نحرك قبل الزحمه
محمد: يعني بعد بكره الاربعاء
الجد : شرايكم نصلي الجمعه في الحرم وعقب نحرك
العنود: أي والله أحسن خل نكمل أسبوع لا حقين على أبها
الجده: والله براحتكم خلاص
سلمان: احسن الجمعه
العنود تطالعه وتغمز له : أي مب لله بس عشان الحبايب
سلمان : أنا بقوم أريح شوي اذا اذن العصر قوموني
العنود مبتسمه وتقول في قلبها ..فشله والله اني ما استحي جدي وجدتي موجودين وأقول كذا ..
الا يلف سلمان عليها وهو مبتسم ويهز راسه بالايجاب
العنود مبتسمه وفي قلبها : أشوه
العصر البنات نزلو وتقابلو مع اهل رفعه واجتمعو البنات ..
مرو هاليومين والبنات مستانسين موووت أكثر من أول ونومهم قام يقل لانهم كله مجتمعين مع بعض حتى ام عبد العزيز <<الجده>> وخلود كانو يتجمعون مع الحريم ..
يوم الاربعاء الصباح وصلو اهل الخبر << عبدالعزيز وزوجته وعبد الرحمن وزوجته وعبدالله وندى >>
اعتمروا عقب راحو للفندق يرتاحون ....
المغرب .. في قسم البنات
بدور: ريمو والا دانوه وحده تقوم تفتح الباب
ريم قامت تفتح الباب : أكيد عمي
ساره : السلام عليكم
ريم والابتسامه علىوجهها : وعليكم السلام .. يمى خالتي
ساره: أي شفيج .
ريم: ولا شي شهالمفاجأه الحلو ه حياااكم
ندى: اهلين ريموو
ريم: هلا والله بمرت اخوي
\دخلو ..
بدور: هل والله نورتو ولا تقولون انكم بتجون.. هلا ندووووش شخبارج
فاطمه: بغينا نسويها مفاجأه لكم
الا الي داخل يسمعون الحس ويطلعون
العنود وهي متفاجأه : يمى .. خالتي ... ندى
الهنوف: وانا اقول من هالحريم الي جايين توقعتهم أهل رفعه
بدور راحت نادت امها من داخل وجات وسلمت عليهم .. عقب راحت هي والبنات يسلمون على الرجال
الكل استانس بهالمفاجأه الحلوه قعدو شوي عقب نزلو للحرم
عقب ما خلصو صلاةالعشاء
الجده : الا شخبار ام جاسم
فاطمه( أم الهنوف): والله الحمد لله بخير وصلو أمس
ساره( ام العنود) :ما دقو عليكم
العنود: جاو مكه
(ام العنود) : أي أمس وصلو
الهنوف: يا حليلهم والله ولا ندري عنهم
خلود: يمكن انشغلو والا شي
العنود: من الي جا يمى
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك