رواية بين ثنايا الايام -13
قالت : انتي من وين عرفتي مشعل
بالله عليكم مو مفروض انا اللي اسأل .. انا اللي اقول لها من وين مشعل عرفني .. وليه خطبني انا بالذات
شافتني ساكته .. قالت لي : خلاص حبيبتي براحتك
قلت لها : لا مو كــ
قاطعتني وقالت : لا عادي خلاص .. يللا نرجع
** حنان **
مو اول قلت لكم .. 1- شينه .. 2- ماتعرف تتكلم .. اظيفوا عليهم صفه بعد 3- ماعندها اسلوب
الحين حنا مجتمعات .. وجالسات نسولف .. تاخذها وتروح ليه .. قسم بالله ماعندها اسلوب
قلت للهنوف : هنووفه .. وش رايك بالحركه
قالت لي .. وهي مشغوله تركب الالعاب اللي طلعو لرغد ووليد بكند سوربريز : اي حركه
قلت لها : غبيه انتي .. مالاحظتي انها مقهوره بلمتنا مع بعض .. وحبت تخرب علينا .. ماشفتيها قبل سرحانه تفكر بطريقه .. عشان تاخذ نجود منا .. هذي حاقده .. لازم مانسمح لها تفرقنا
ناظرتني وهي اقده حواجبها : حنان .. مو لهذي الدرجه .. وين جالسين حنا تفرقنا وتخرب لمتنا .. تبي تكلم اخت زوجها بموضوع .. هي حره
ضربتها على راسها .. وقلت لها : كم مره بفهم فيك .. كم مره بقول لك لا تصيرين خبله .. الله خلق لك عقل .. عشان تفكرين فيه .. بس وش اقول .. الغبي غبي مهما تفهم فيه
نزلت راسها وسكتت .. وش اسوي فيها ذي انا .. ابي مصلحتها .. القطو ياكل عشاها وهي ساكته
قلت لها : ردي علي .. انا اكلمك
قالت : رغــد ولــيد اقربوا ركبت الالعاب
حطيت يدي على ذقني .. وقلت بتفكير : من وين طالعه لنا هالرهف
قالت رغد : من اقرب زباله
استغربت جواب رغد .. فقلت لها : ليه قلتي كذا
قالت رغد : لانها منافقه .. تسوي طيبه قدام ،،، ماكملت كلامها لان الهنوف حطت يدها على فمها ،،،
وقالت لها : رغد عيب .. هذي زوجة ابوك واكبر منك .. وفي مقام امك
شلت يد الهنوف بقوه : روحــــــي منــــــــــاك زيــــن .. مابقى الا هذي تصير بمكان ... امها المرحومه.. رغوده ماعليك منها كملي
افففف جات رهف مع نجود .. انا اللي افهمه شي واحد .. رغد ماتحب رهف .. وهذا الشي لمصلحتي
قلت لهم : وين رحتو تأخرتوا
قالت نجود : لابس رهوف كانت تقول لي عن سالفه
طلعت ام مشعل وقالت لنا : يابنات اذن المغرب .. صلاة صلاة .. والرجاجيل بيصلون وبيطلعون الحديقه
ودخلنا البيت كلنا نصلي
بيت مشعل .. الساعه 7:00 مساءً
___________
** نجـود **
واخيراً رحت عن البنات .. مستحيل اضيع فرصة اني اشوف فيصل .. اكيد تقولون اي فيصل .. الله يطول عمركم .. فيصل هذا ولد عمتي ..اخو حنان والهنوف.. بوصفه لكم امممم متوسط الطول وضعيف شوي .. بس ملامحه حلوه مره يعني وسيم وشعره ناعم بني عيونه لونها بني فاتح ومرسومه وخشمه طويل وحلو .. لاتقولون هذي ماتستحي حافظه مواصفات الرجال .. بس لان حنا مع بعض من يوم كنا صغار .. المهم اللي اعرفه ان الشباب طلعوا الحديقه .. ابي اشوف فيصل لو من بعيد .. تحجبت للضروره .. و طلعت من باب الصاله .. مالقيتهم .. الظاهر جالسين من الجهة الثانيه .. اذا طلعت من باب الصاله .. ولفيت عشان اروح الجهة الثانيه .. بيشوفوني .. وانا ابي مكان * اشوف وما انشاف * وين عاد .. ايه مجلس الرجال يطل على الحديقه .. بروح هناك .. بس ما ابي البنات يشوفوني .. لازم امشي بخفه وحذر .. ايه وصلت لباب للمجلس بأمان .. سمعت صوت خالتي فاطمه من وراي وش هالحظ
قالت لي : نجود حبيبتي .. عاد روحي قولي للخدمه .. تجي تنظف مجلس الحريم
وهذا وقته اروح واجي ؟
قلت لها : ان شاء الله خالتي
رحت وقلت لها .. ورجعت لمجلس الرجال .. بس هالمره دخلت على طول .. عشان لا احد يقول لي .. روحي وتعالي وودي وجيبي .. قفلت الباب وراي .. فتحت دريشة المجلس .. وينهم .. ما اشف شي .. ايه هذا هم .. بس ما اشوف الا نص وجييهم.. مافيه الا سلطان زوج شجن اشوف وجهه كله .. لانه نخله .. الاشجار اللي هنا تغطي علي .. فكره .. دام الاشجار يغطون علي .. فأكيد يغطون عليهم بعد .. بطلع من الدريشه مابيشوفوني .. بنزل وبطلطل عليهم .. واذا تورطت مره مره بدخل الحمام (( الله يكرمكم )) اللي بره ..عند باب المجلس الخارجي ..
فتحت الدريشه شوي شوي .. زين ماطلعت صوت .. وصرت الحين جالسه عليها .. اذا ظليت كذا .. بيشوفون نص وجهي .. نزلت راسي .. بس المسافه بعيده شوي من هنا للارض .. لفيت نفسي عشان انزل بالعكس .. كنت ماده رجلي على اخر شي .. احاول المس الارض .. ايه لمست الارض .. حطيت رجليني الثنتين .. وقفت على الارض .. وتنهدت براحه .. لفيت نفسي .. المصيبه .. لقيت فـــــيــــــــــصــل في جـــــهـــــي
بيت ابويوسف .. الساعه : 7:00 مساءً
** محمد **
كنت جالس بالصاله .. مع سعد .. اشوف التلفزيون .. افرفر بين القنوات .. وقفت على اغنية عادل محمود
.
.
اوعدني عني ماتغيب
تبقى هنا جنبي قريب
محتاج انا مثلك حبيبي
يفهم عيوني وضحكتي
****
فيك انت حلمي من زمان
وانت الهوى وادفى الحنان
تلقى معاك روحي الامان
ياحلى بشر في دنيتي
****
وحــدك أبيـك
والله أبيـك
بس تكفى طمني عليك
مابي احــد احد يشغــل عينيـك
وأمــــــوت أنا من غيرتي
.
.
كنت داخل جو مع الاغنيه .. بس تلفون البيت خرب علي هالجو .. رفعت سماعة التلفون .. كانت اختي رهف
قالت لي : السلام عليكم
قلت لها : وعليكم السلام ورحمة الله وبركاته .. هلا رهف
قالت : اخبارك محمد
قلت : تمام .. وانتي
قالت لي : مو بخير
قلت : افاااا وليه
قالت لي : ماتستحي على وجهك انت
وش فيها هذي بسم الله الرحمن الرحيم
قلت لها : وشو رهف
قالت وشكلها معصبه : قالولك ما ادري عنك .. الريم ماتبيك
اكيد عرفت رهف باللي بيني وبين الريم .. ريوم قالت لها بكل شي
لحظه مهبول انا .. هههههههه اصلاً وش اللي بيني وبين الريم
قالت : رد .. تكلم لو فيك خير .. فشلتني الله يفشل وجهك .. الحين وين اودي وجهي من الريم
قلت لها بكل براءه : ليـــــه .. ليـه كل هذا .. وش سويت انا
قالت وعلى صوتها شوي : اسال نفسك .. زاعج البنت اتصالات
اتصالات ؟ وش تخربط ذي : اي اتصالات
قالت لي : اسكت ولا كلمه .. متفشله مره مع الريم.. مو قادره احط وجهي بوجهها .. اكيد بتقول اخوي يغازل بنات .. الوووووووو .. الوووووو .. محمد رد .. وينك
قلت : مو انتي قلتي لي اسكت ولا كلمه
قالت : محمد اكلمك جد
قلت لها : وانا اكلمك جد .. وش قالت لك الريم
قالت لي : بقول لك بكل السالفه .. انا يوم ادق لك ذيك المره .. تذكر
قلت : اذكر .. ويعني .. ايــــــــــــــــــــه صـــــح .. لا تقوليلي دقيتي على من جوال الريم
قلت له : وشلون ماتدري .. مسوي رقم الريم مو عندك
’’ يوم تدق علي .. انا كنت نايم ..وماحطيت في بالي .. ماركزت’’
كملت : الريم حافظه اسمك في جوالها بــ المغثه
لا حطمت قلبي رهف .. معقوله طول هالفتره انا كنت غاث الريم .. انا على بالي مستانسه بالرسايل .. صحيح انا دلخ .. مستحيل وحده بتستانس برسايل ما تدري من اللي مرسلها
قالت : محمد قول لي وش السالفه
قلت لها بكل السالفه من طأ طأ .. للسلام عليكم
قالت لي : انت يعني الحين تحب الريم
قلت لها : اكيد ولا على بالك انا تبع بنات
قالت لي بكل جديه : طيب متى بتخطبها
الله اخطبها .. حلمي ان الريم تصير زوجتي .. قلت لها : ظنك توافق
قالت لي : ترا الريم يجونها خطاطيب من كل مكان .. بنت الكل يتمناها .. يعني لو ماخطبتها الحين .. بتروح عليك .. مو بعدين تجلس تتندم
قلت لها : طيب المهر غالي ؟ .................. وينها ذي وش فيها قالت باي وقفلت .. ليكون سؤالي فيه شي !!
ناظرت بجنبي .. شفت سعد جالس بجنبي .. ويناظرني بتركيز .. ويقول لي : متى بتخطب الريم !!!؟؟؟
بيت مشعل .. الساعه:7:30 مساءً
____________
** فيـصل **
هذي بنت عمتي نجود .. وش فيها.. طار عقلها ؟.. شكلها وهي نازله بكل حذر .. يضحك .. انا مسكت ضحكتي ما حبيت افشلها
فقلت لها بجديه : وش تسوين هنا
كانت متوتره وخايف .. وتناظر يمين وشمال وورا وقدام .. وفي كل جهة
قلت لها : انا اسألك .. وش فيك
ناظرت تحت وسكتت .. انا مبتسم على اخر شي .. ماابي اضحك
عندي فكره دامها كذا.. تتراجف وحالتها حاله .. بخوفها .. سويت نفسي بروح .. ومستعجل
قلت لها : بروح بقول لاخوك مشعل
مسكت طرف كمي بقوه .. وقالت بأنفعال : لا لا لا الله يخليك .. انا انا انا بروح لحالي .. لا تقول لاخوي مشعل
انفجرت من الضحك هههههههههههه نذل انا صح
اشرت لها بصبعي .. وقلت : ماراح اعلم عليك بشرط
تركت طرف كمي وقالت : وشهو
قلت لها : قولي لي .. وش تسوين هنا
قالت لي بتوتر وهي منزله راسهه : انا .. كـ كنت كنت بشوف اذا اخوي محتاج شي ولا لا
قلت لها : واللي يبي يشوف اخوه محتاج شي اولا .. يجي من الدريشه مثل الحراميه ,, اشرت على الدريشه ,,
لفت وجهها عني .. وقالت : ايه انا احب اجي من الدريشه
تكتفت وسندت نفسي على الجدار .. وقلت لها وانا مأشر على الدريشه : طيب وانا اقولك..مشعل مو محتاج شي .. يللا ارجعي من الدريشه يا القطوه يا الحراميه
قالت لي بعصبيه : انا مو قطوه ولا حراميه
قلت لها : والله مايدخلون من الدرايش الا القطاوه والحراميه ههههههههههههه
قالت : والله الحرامي هو اللي يتمشى في بيت مو بيتهم لحاله
شهقت وقلت لها : تطرديني
حطت يدها على فمها .. وفتحت عيونها بقوه وقالت : مو قصدي كذا
بضحك عليها .. وبلعب باعصابها مره ثانيه .. عقدت حواجبي .. وقلت لها : والله القصد واضح .. وانا اسف على الازعاج
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك