رواية لمني بشوق واحضني -28

رواية لمني بشوق واحضني - غرام


رواية لمني بشوق واحضني -28

رنا :-لاتنسى

ناصر :-ان شاء الله
وطلع من عندهم ...معه شعورين
فرحان لان اخته مستانسه في حياتها ومحطم لان الي هواها قلبه متزوجه
هزء نفسه ..البنت يوم كانت مو متزوجه ماقد فكرت فيها جاي الحين تفكر ...
ركب سيارته ومشى عشان يجهز اغراضه وراه سفر طويل ..
(الجزء الثاني)
دخل سعود الجناح والساعه كانت تقريبا خمس الا ربع العصر ...
لقى المكان هاجد ...
دخل الغرفه لقى نوف للان نايمه ...
هز راسه اكره ماعليه النوم الكثير ...
نزل مفتاحه وقال وهو يدخل الغرفه :-نوف
ماصحت
قرب منها :-نوف
فتحت عيونها :-نعم
سعود :-قومي الوقت تاخر
حطت الغطاء على راسها :-طيب
سعود :-يالله قومي
عصبت :-طيب
لاكنها ماتحركت سحب عنها الغطاء جلست وصرخت فيه :-اووووووووووووووف ماتشوفني نايمه
انهبل من قلة ادبها قال بنبره جمدتها :-لاتعلين صوتك علي انا ماني باصغر عيالك
خافت من قلب وطار ابو النوم ...
طلع من الغرفه عشان تبدل ملابسها ..قامت غصب وبدلت ملابسها ...
مالها خلق تحط مكياج ولاشي مشطت شعرها القصير ...
طلعت لقته جالس على الكراسي ويناظر برنامج ومندمج فيه ..
رفعت التلفون :الو الروم سيرفس ...............
وجلس تطلب فطور متاخر انهبل منه سعود منه ...
جلست جنبه ..وقالت تتافف :-غير القناه ملل
مستحيل مو مصدق طينه هالاداميه هذي تصرفات وحده عاقله متزوجه ...عطاها الريموت بيشوف وش بتسوي ..
فرفرت على القنوات ...ومالقت الي تبي رمت الريموت وجلست تتافف
ارتفع ضغط سعود زواجه من الماس حماه من شوفة هالطبايع ونساه وجودها ..
التفت يمها وقال وهو رافع حاجب :-وش تقترحين حتى تفكيني من التافف
عصبت وقالت :- من بيلومني ياخي ولاكني متزوجه
رفع حاجب وقال يستهزء :- وليش ما انتي بحاسه انك متزوجه فيه عقد يثبت هالشي
تهورت :-عارفه بس.....................
شافته يناظرها من فوق لتحت وجمدت وولع وجهها شكلي طحت بمطب قوي!!
سعود :-ايوه كملي
ارتفع ضغطها :- حتى هدايا مثل كل الرجال ما قدمت لي
مانسى سعود هالشي لكنه اهدا زوجته الي تزوجها برغبته وبخاطره ..وهو ماهو بحاس بأي رابط او واجب تجاهها خلي ابوه يهديها مو هو الي تكفل بكل شي
لكن جرح المشاعر ماهو من اطباعه ..
طلع بوكه من جيبه وطلع خمس الاف ريال قال وهو يمدها لها :-مانسيت بس انا ما اعرف وش تحبين خذي هالفلوس وجيبي الي تبين
ماصدقت خبر بركه منه هالشي اخذتها
تذكرت وقالت له :-ايه بس الماسوه مهديها طقم الماس صباحيتكم
مايدري وش الي جاه لكنه وقف بسرعه ومسكها مع يدها وقال يهزها وهو معصب:-لاتجيبين سيرتها فاهمه ابد
خافت موت وجمدت ...:-ط...طيب
وصل الفطور وراح يفتح الباب ...
حط لها الفطور وكان من بينه البيض الي مايواطنه ...
وقف وقال:- بطلع شوي بغيتي شي
كانت مندمجه بالاكل :-لا
وطلع وكبده تلوع عليه من ريحة البيض ..
لاحول ماهو بقادر يجلس معها بمكان واحد حاسه انه بيجيه شي ...
دق جواله على بيت اهله بيتطمن على امه مايدري عنها من امس ..
دق ودق ودق ومحدن رد
قال يكلم نفسه :-غريبه
رجع دق مره ثانيه ردت عليه الشغاله
قال :-نادي ماما ام سعود
الشغاله :- ماما تعبان واجد
انهبل سعود :-هاه
الشغاله :-هذا سكر ارتفع واجد
سعود :-وينها
الشغاله :-روه البارح مستشفى والهين هي هنا
سكرت الجوال بسرعه وركض بينزل لكنه تذكر مفتاحه رجع ودخل
قال لنوف :-بروح بيت ابوي
نوف :-ليه
قال وهو ياخذ مفتاحه :-امي تعبانه
كملت اكلها :-ماتشوف شر
جمد في مكانه :-هذا الي قدرك ربي عليه
ناظرته وجت بترد لكنه سفهها وطلع ...
*

><في بيت عم راكان ابو سعد ><
قالت ساره وهي رايحه راجعه من القهر :-شفيكم ما تتكلمون طردني من بيته تخيلوا
ناظروا عمانها في بعض وانتظروا اابوها يتكلم صحيح السالفه صار لها اسبوعين لكن ساره مشعلله نارها وماراح تطفي الا اذا انتقمت من دانه وتذلها مثل ما ذلتها
قال عمها محمد :-هاه ياخوي شقولك
قالت ساره وهي شوي وتقطع شعرها :-اقولكم ذلني وطردني
قال عمها بدربحقد (اصغرهم سن ومقنعينه ان راكان ماخذ حلالهم) :-انتم وافقوا بس والله مايصبح عليه الصبح وهو حي
هنا تكلم ابو سعد وقال :-حنا ما حنا بمجرمين ياولد حنا نبي حلالنا بس وان سمعتك تقول هالكلام راح تندم
بدر :-بس------------------
ابو سعد :-لاتجلس تبسبس مجنون انت تذبح الرجال وين حنا فيه
قالت بقلب اسود :- والله الموت قليل عليه
ابوها :-انثبري لو انك سنعه ماطلقك
انصدمت من كلام ابوها :-يبه
ابو سعد :-وحطبه
عصبت ساره :-البلا منه مو مني معقد مره وبدوي صح
ابوها :-قومي اذلفي عن وجهي والاربع مدري الخمس زواجات الي فاتن من السبب في نهايتها
حمر وجهها وسكتت
كمل ابوها :-مصيره بيخطي خطا نقدر منه ناخذ حلالنا
ساره اخر مافي راسها الحين الثروه قالت لهم :-طيب وانا
ابوها :-وانتي علامك
ساره (شوي وتقطع شعرها) :- وكرامتي
ابوها :-لايكثر هرجك انتي الي جبتيه لعمرك
انقهرت من كلام ابوها وطلعت غرفتها ..تحسبهم راح يحلون مشكلتها طلع ماعندهم سالفه
جلست على سريرها بغرفتها :-اشوف فيك يوم يادانه
طلعت صوره لراكان عندها وجلست تتاملها ودموع القهر تغسل وجهها
قالت تكلم الصوره :-احبك وربي وعرفت اني اخطيت ليه ماتصدقني
من زود العصبيه ضربت بالصوره في الجدار وتكسر بروازها مية قطعه ..
جلست تبكي بصوت عالي ...
دخلت امها الغرفه بسرعه وشافت الصوره طايحه والبرواز مكسور..
جلست جنب بنتها الي كانت تبكي من قلب وشعرها طايح على وجهها وضامه يدينها على صدرها وترتجف مع كل شهقه تطلع منها
قالت امها :-يمه علامك
ساره :-ذبحني ذبحني
خافت امها :-وشهو الي ذبحك
ساره :-ذبحني حبه
عرفت امها ان ساره لاحطت شي بالها وماحصلته خلاص توسوس به ..
قالت امها وهي تمسح وجهها :-يمه ماتلاحظين انكم نكدتوا عليه حياته سنين
في لحظه ضعف ..
ساره :-كيف
حاولت امها تقنعها تتركه بحاله لان ساره لو اقتنعت فيه امل انها تقنع ابوها :-يمه تخيلي نفسك في مكانه كان بغربه وعمره 24 سنه مات ابوه ورجع الديره مكسور القلب وتخيلي كان ابوك وعمانك قالبين الدنيا يبون ياخذون حلاله ويطردون امه من البيت الكبير
قالت ساره :-يمه عمي عطى حلاله كله لمرته وولده
امها :-كيفه
ساره (رجعت لطبيعتها) :-لا مو على كيفه
امها :-يمه هذا حلاله
قالت ساره وهي متاثره بابوها :-عم ابوي الله يرحمه ابو ام راكان عطى ثروته لعمي عبدالرحمن (ابو راكان) وجحد ابوي وعماني
انقهرت امها من جحودهم وقالت بقهر :-مو صحيح ابوك وعمانك اخذوا نصيبهم
ساره :-بس عمي غير
امها :-طبعا غير لازم يكون غير
ساره :-ليه لازم يكون غير
قالت امها :-يمه عمك اخذ نصيبه ونصيب زوجته الي هي بنت عمك الوحيده واغلب الثروه لها
ساره (مازالت معنده) :-حتى اصلا الظلم من الاساس من جدي العود الي فضل من البدايه احد على احد
امها :-يمه الجشع مو زين وحنا مالله قاصر علينا بشي ويمكن الي معنا كثر الي مع راكان
ساره :-حتى حتى هذا حلالنا
ارتفع ضغط امها من هالسيره الي ماراح تنتهي :-ساره هالموضوع له فوق العشر سنين خلاص ماتملون
قالت والحقد ذابحها :-لو تمر مو عشر سنين عشرين سنه حلالنا بناخذه وفوقه زياده مدري ليش احساسي يقول لي ان هاليوم قريب
ناظرتها امها نظرة من غسل يده من صلاح شي ..
وش بتصلح ساره عمرها 28 سنه صلاحها متاخر ومافيه امل ..وكلت امرها لله وطلعت من الغرفه ؟؟
وهي تقول :-ياخوفي لايجي يوم تندمون فيه على كل شي
وطلعت بعيد عن هبال ساره ومزاجها المتقلب ..
×

><في بيت راكان ><
كان راكان جالس سرحان ويفكر ...فتح جهازه وجلس يشتغل
دخلت دانه معها كاسين كابتشينو وتغني وشكلها مبسوطه ...
ناظرها راكان وهو مبتسم من شكلها وروقانها سالها :-وش هالمود الحلو
ابتسمت :-هههههههههههههههه لو تعرف السبب ما لمتني
عدل جلسته وقال :-يالله علميني عشان احكم
عطته كاسه وقالت وهي تجلس :-ههههههههه بسالك سؤال قبل وابي جوابك
ابتسم :-اسالي (يستهبل) بس لاتقولين شكثر انا احبك لانك عارفه ولاني مليت من هالسؤال
دانه :-هههههههههههه احلف يالله من حظك اني مروقه ولا كان -----------------
راكان :-عارف انام بالمكتب الليله
دانه :-هههههههههههههههههههههههه
كملت :-شف لو رجال بيوم صباحيته ترك عروسه وراح لزوجته الاوليه وش بتفكر فيه
فكر شوي وقال :-انه يحب الاوليه بس هذا شي مو معقول لانه لو يحبه ماراح يتزوج اساسا عليها
غمزت له دانه :-هههههههههههههههههه واذا كان مغصوب
راكان :-اجل الله يعينه بيكون مثل الشبعان الي يجبرونه ياكل وماله قدره لو مجامله
نزل كاسه وهو تو يستوعب :-ههههههههههههههه لاتقولين سعود
هزت راسها
راكان :-هههههههههههههههههه والله يافيكم سحر يابنات ابو خالد
ناظرته بعيون ذبلانه :-صدق
انهبل راكان وبغت ينكب كاس الكابتشينو عليه
دانه :-هههههههههههههههههههههه ترفق على عمرك
قال من قلب :-ارحميني لو سمحتي وراي شغل لا فوق راسي ..
نزلت كاسها ووقفت
راكان :-قلت عندي شغل مو قومي اطلعي
قالت تستهبل :-من صدقك بطلع بجلس اساعدك عندي فضول شغلك ممتع مره
وقف يسحب لها كرسي جنبه وقال :-ايه امسكي الاداره يومين ان لقيتيه ممتع تعالي صفقيني
دانه :-هههههههههههههههههههههه فكره حلوه
ناظرها :-احلفي بس
دانه :-مايحتاج يالله والله ركوني علمني جد
ذاب راكان :-لاقلتي ركوني اتخدر تدرين
حمرت خدودها وقالت وهي تضمه وتتعلق بيده :-عن حركاتك ويالله علمني عشان اساعدك والله امل وانت تشتغل فنفس الوقت انت تتاخر بالليل عشان تخلص اشغالك
راكان :-ههههههههههههههه طيب مو لازم محاضره
جلست جنبه وجلس يشرح لها ..كل شي بالتفصيل الممل ومن زود الحماس جلست تكتب كل شي يقوله لها ..
ناظرها وهي جديه :-من صدقك بتتعلمين شغلي
دانه :-مو حلالنا واحد وبعدين شغلك نفس تخصصي تقريبا
ابتسم راكان :-تمام طيب ياشريكتي فيه 3 معلومات ابيك تحطينها براسك مدامك جديه
دانه :-الي هي
راكان (قلب جدي) :-اولا - السريه مهمه مره الشغل ماتجيبين سيرته لاحد اطلاقا حتى لو ينذكر اسم شركه وتقولين اعرفها او قد سمعت باسمها
انهبلت دانه :-للدرجه ذي
هز راسه :-طبعا حنا نتكلم عن صفقات عن تنافس بسوق عالمي تقريبا ولاعدائنا جواسيس بكل مكان ولازم الواحد ينتبه بسبب كلمه قبل سنه خسرنا حوالي خمسة ملايين
طلعت عيون دانه قدام
وكمل :-بس الحمد لله قدرنا نعوض خسايرنا ونزيد ارباحنا الحياه مدرسه تكاليفها غاليه
كانت دانه مندمجه معه مره بجوه ...
كمل :-المعلومه الثانيه لاتثقين باحد ابد ماعدا شخص الي هو محمد صديقي بس وغيره لا
دانه :-ليش
مانسى راكان ذاك اليوم ولاحظت دانه انه تضايق لكنه قال :-اول مامسكت شغل ابوي كنا نخسر وحنا واثقين من ربحنا بالاخير طلع موظف عندنا يشتغل خاين ويسرب معلوماتنا لعماني واعدائي
دانه تضايقت حيل :-افا
راكان :-الي يقهر مو تسريب المعلومات الفلوس تروح وتجي الي يقهر انه معاصر لابوي وعمه الله يرحمهم من بعدها ماصرت اثق باحد وهذا اسلم لي الصراحه عن التحطيمات والصدمات
قالت له وعيونها بعيونه :-سجنته
راكان :-لا
دانه :-ليه
راكان :-الذل الي واجهه اكبر واصعب من اي عقاب لما طردته قدام الكل
قالت :-ماخفت يحقدون عليك الموظفين
ابتسم وقال :-لا ماخفت لاني عطيته تقاعده كامل ولو غيري كان يحق له مايعطيه قرش واحد
دانه حقدت عليه من الي يقدر يخون راكان :-مايستاهل لانه خاين
راكان :-عارف بس زوجته مالها ذنب وهي مره كبيره بالسن ومريضه وتحتاج لادويه معينه الصراحه ان موصي ناس يشوفون لي احواله بين فتره وفتره
تعجبت دانه :-بعد كل الي سواه
هز راســـــــــــــــــــــــــــــــــــه
هي تحبه وحبته من اول موقف جمعهم الي هو بمزرعه ابوها ..حلمت به ليله ورى ليله ..صورته مافارقت خيالها لاليل ولانهار..تزوجته وعاشت معه وعرفته اكثر وحبته اكثر واكثر
كل يوم تكتشف عن شخصيته اشياء كثيره كانت تجهلها ..شد انتباهها كرمه ومراعاته من البدايه من الي سواه لسوير من حبه لصديقه من مراعاته لامه الي ارضعته والي تحبه حب ماينوصف ...حتى عمامه الي بامكانه انه يدمرهم كلهم مازال ساكت عنهم صونآ للحم والدم ولانهم من ريحة ابوه وبالاخير سالفة الشايب الي خان العشره وباعها بالرخيص لكنه سامحه لسببين عمره الي قضاه في خدمة ابوه وجده والسبب الثاني مرض زوجته واحتياجه لكل ريال عشان مصاريف علاجها ، والله اعلم وش يخبي بعد من هالطيبه ومن هالحنيه الممزوجه بقسوة الرجوله والهيمنه والشخصيه المسيطره
من مثله بس من يجمع هالاخلاق كلها في زمن مافيه اخلاق الا ناس على الاصابع ينعدون
ناظرته وهو يناظرها وهو ساكت متأمل ..
هو فيه غير الحب شعور اقوى واسمى والله لوفيه لينطبق على الي بقلبها له ..
من الي رجع لها ثقتها بنفسها ...؟؟
هو
من الي حببها فيه وفي طبايعه ...؟؟
هو
من الي يسوى عيونها من اول واخر احلامها ..؟
هو
قال بحب :-وش تفكرين فيه
ناظرته بعيون دامعه :-افكر في ان امي داعيلتي بليلة القدر لاني تزوجتك
ابتسم :-طيب ليش الدموع
قالت وهي تمسك يده :-لاني احبك تصدق
قال يمزح :-توني ادري
دانه :-هههههههههههه مشكله الصراحه
قرب منها :-لامشكله ولاشي
قالت تمزح عشان تخفف عبرتها :-باقي المعلومه الثالثه
ضحك :-عارف ماتنسين شي انتي
طلعت عيونها قدام وقالت :-الا نسيت ام محمد شخبارها وبنتها ورى ماجات عندنا يا الله كيف نسيت
راكان :-بنات عمك متزوجات ورى بعض غير المشاكل الي صارت بعذرك يوم نسيتي
دانه :-طيب
راكان :-اضطر محمد ياخذها معهم
دانه :-ليه
راكان :-عيت تجي هنا
دانه :-ليه
راكان :-من الي فهمته من محمد انها رافضه لسببين
دانه :-الي هم
راكان :-لانها ماتقدر تفارق امها
كبرت مررررررررررررررررره بعين دانه
كمل :-الثاني لانها مستحيه من وجودي
كبرت اكثرررررررررررررر بعين دانه
دانه :-طيب وش صار
راكان :-قدم محمد رحلته لانه حجز ثلاث مقاعد وسافروا سوى والله يعينه لانه بيكون بهمين
دانه :-ان شاء الله ماتواجهه متاعب
راكان :-ان صار وواجهته مشاكل اخذت اول طياره ولحقته
يكفيها فخر انها زوجة راكان ............الصديق الوفي ، الابن البار ،
سبحان الله قلبه من ذهـــــــــــــــــــــــــــــــــــب
قال :-المهم نرجع للنقطه الاخيره
دانه :-ok
قال بجديه :-قبل كل شي اقفلي باب المكتب
مافهمت ولاشي لكنها سوت الي قال لها عليه راحت وقفلت الباب ..ورجعت جلست وقف جلس على ركبه بالارض الرخاميه وهي مو فاهمه شي من الي قاعد يسويه وشوي الا ويوخر تحفه كبيره ويرفع شي وتطلع تحته خزانة حديد وقفت وجت عنده وهي مو مصدقه الي تشوفه ...
قالت :-وش ذا
قال :-هذا خزنه حديد المستندات والاوراق المهمه مره احطها فيها ومايعرف عن وجودها بهالكون احد غيري انا وامي لانها تذكرها من ايام الوالد وعلمتني بمكانها بعد وفاته وقدرت اثبت حقي بالملكيه من وصية ابوي والا كان ماحصلت شي الا بعد سنين بسبب المحاكم الي يقضي عمر الواحد وحكمها ما طلع سكر كل شي ورجعه مكانه
وقف وقال وهو يمسح يده بمنديل :-اكبر سر بحياتي عرفتيه لاني انا وانتي واحد ولان ثقتي فيك مالها حد اعرف ان الفلوس شي مايهمك لكن تذكري هذا حلالنا وحلال عيالنا اذا ربي رزقنا بهم ولازم نحافظ عليه شي حطيه ببالك وثقي فيه مال احد عندي حق ابد واظنك عرفتي طبعي وعرفتي اني ما اكل حق احد
بلمت دانه وضاع كل الكلام ..قالت بضيق :-بدا كلامك يخوفني
ابتسم وقال :-تو وناسه شغلي
ابتسمت وقالت :-الله يقدرني وماتندم في يوم على ثقتك فيني
قال بثقه :-ماراح اندم
**

><في بيت ابو سعود><
دخل سعود عليهم وكانن البنات جالسات بالصاله الي تحت
انهبلت هنادي :-سعود
التفتت منال :-من
وقفت هنادي وراحت تركض له :-اهلين وسهلين شو هالنور
كان سعود مرتبش وخايف بس من شوفته لملامح خواته كنه ارتاح شوي صحيح اشكالهن مو طبيعيه كالعاده بس على الاقل ما قلبنها مناحه وهذي بشارة خير ..
قال سعود :-هلا امي شفيها
هنادي :-كيف دريت ابوي منبه علينا مانعلمك
سعود :-دريت من الشغاله امي وين
هنادي :-بغرفتها -----و ---------------------
ماعطاها وقت تكمل وطلع لغرفتها بسرعة البرق ..
منال :-علمتيه ان الماس هنا
هنادي :-ههههههههههه لا بس مفاجاه حلوه وعشان يعرف ان الناس اجناس وانهم معادن
منال :-هههههههههههههه صدقتي
دق باب غرفة ام سعود وكانت الماس جالسه معها والخوف شوي ويشلها يوم علمتها هنادي ..
خافت الماس يكون واحد من العيال وراحت تزين غطاها على وجهها
قالت ام سعود :-من
"انـــــــــــــــــــــــــــــــــا"
ارتقص قلب الماس
سعود ..!!
نزلت غطى وجهها وراحت للباب
فتحته وهي مبتسمه وعيونها تلمع ..
قالت بدلع :-هلا وغلا بحبيب القلب والروح والعين
جمد سعود من الصدمه :-الماس
الماس (تمزح) :-الظاهر الا اذا كان لي شبيه
سعود :-هههههههههههههههههه
وخرت له عشان يدخل ...
جلس يم امه ومسك يدها :-سلامتك يالغاليه
امه :-مابي الا العافيه يمه علامك مخترع
سعود :-انتي الغاليه شلون ما اخترع
امه :-مثل ماتشوف انا بخير
من قلب :- دوم مو يوم
جلست الماس جنبه وقالت له :-شف ياسعود رافضه تاخذ علاجها
ناظرها سعود :-مانبي دلع لازم تاخذين علاجك
طبعا سعود الكبير وحبيب قلبها طاعته واخذت دواها ..وجلس معها لين نامت
طلع هو والماس من الغرفه ..
مسكته وقالت :-شده وزالت الحمد لله
ابتسم وقال :- الحمد لله
قالت له :-قبل لاتسال كل الموضوع ارتفاع بالسكر والحمد لله لما توازن سكرها طلعوها البيت
سعود :-الا متى صار كل هذا
الماس (بغصه) :-بعد العرس البارح
سعود :- ومحد قال لي
قالت الماس كالعاده (تدور لعمها بالتحديد الاعذار) :-مايبون يشغلونك عن.........عن.........
سكتت مو قادره تنطقها ..
فهم قصدها وسكت ...
سعود :-الا متى جيتي انا تاركك قبل ساعه
ابتسمت وقالت :-دقيت على هنادي وعلمتني وجيت بسرعه
(يحبها من شي هيــــــــــــــــــــــــــــن)
قال وهو يتامل وجهها الحلو :-اصيله يابنت العم
ابتسمت وقالت تعاتبه :-امك امي يالغالي ولانسيت مواثيقنا
تنهد وقال :-انســــــــــــــــــــــــــاها كيف انســـــــــــــــــــــــاها هو الي يعاهدك بشي يقدر ينســـــــــى عهده وميثاقه ما اقول الا ..............
حطت يدها على فمه لايكمل

يتبع ,,,,
👇👇👇
أحدث أقدم