رواية اعترافات رجل -6

رواية اعترافات رجل -6

أنا ما ألومج ..أنا أعرف راشد ...وشفته مع كثير ..وأعرف شلون يمثل الحب بكل بساطه ..بس ألوم سذاجتج ..واستسلامج .....
رغد ــ يعني تقنعني انك ما حبيت أبد ؟؟ ما جربت الحب شلون يعمي العيون والقلب ويلغي العقل ؟؟ شلون الروح تحترق بناره ؟؟
سكت ..أنا آخر واحد أتكلم عن السذاجه ..لاني اكبر ساذج ...شلون لمتها ؟؟
ـــ رغد .. ما انتبهت لعلاقة جواهر فيج ؟؟
رغد ــ جواهر ؟؟؟ شدخل جواهر بجواب سؤالي؟؟
ـــ هي الجواب ...
رغد ـ ما ادري نظراتها كانت حزينه وماكانت تآخذ و تعطي معاي ..

 تربيت في هالبيت أنا وأمي وجواهر ..أخواني الباقين كل في بلد ..جواهر بنت خالتي ..أصغر مني بسنتين ..من عشر سنوات ...كنا عايشين في هالبيت مع امي ومنال .وأنت شفتي جواهر .. كانت نسخة ميرفت أمين ..حتى في شعرها كنا عايسين في هالبيت بعد ما تزوجت امها ..وتركتها معانا ..وماكان بينا حاجز ..حبيتها ..حبيت جواهر من كل قلبي ..وبادلتني الحب ..كنا نجلس ساعات نتكلم ..منال كانت صغيرة فما فهمت اللي بيني وبينها ..كنت عاشق ..وخطتت أني أخطبها ..توفت زوجه فالح ام طلال ومها ..والعايله كلها انشغلت بهالمصيبه ..كانو عياله صغار وايد ..وبينهم رضيعه ..بعد شهرين ..ماشفت خلالهم جواهر لانشغالها برعايه الصغار ..تفاجأت بخبر خطبه ..خطبه جواهر وفالح .الحب اللي تتكلمين عنه ..عمى عيوني ..وتهاوشت مع فالح ..غلطت عليه ..وكنت أتصرف بدون وعي ..ولما طلعت غرفتي صادفت جواهر في طريقي ..صفعتني ..ويوم ذكرتها بحبنا صفعتني مرة ثانية ..جمدت في مكاني ..قالت لي بكلمات أقسى من صخر ..أنها ما تتشرف بواحد اناني ..تزوجت جواهر بفالح ..أنا غرقت في بحر الكره ...لليوم كل ما اتذكر كلمة أحبك من ششفايفها يفز قلبي ..وأكرهها من جديد ..من عشر سنوات وأنا عدو المرأة ..كرهت كل الحريم ..مريت بتجارب سطحيه عززت هالكره ..وعزفت عن الزواج لين أجبرتيني ..وكرهت الحريم زياده ..أنا وفالح ماتكلمنا من زمان ..لين تزوجت ..ياني يبارك ..ويات جاهر وكلمتها كانت باهته..عاهدت نفسي ما اذكرها ..وأحاول أنساها .بس مب بإيدي ..لليوم ..حبها متغلل في روحي ..وكرهها متمكن مني ..يمكن في عزاء لنفسي لما اشوف عيال اخوي ينادونها يمه ..جربت الحب اللي تكلمتي عنه ..وكان أسوأ تجربه مرت علي ..أتعذب كل ما أشوف أخوي ..ضميري يأنبني ..هو اللي سرق مني سعادتي ..وما ألومه ...جواهر تخلت عني ..تخلت عني رغم كل كلامها ..

رفعت راسي وطالعت ملامح رغد اللي كانت باهته ..

رغد ــ وأنا اللي ظنيت أني سبب حزنك وقسوتك ..

كانت رغد هي أول انسان أبوح له بعلاقتي بجواهر ..الكل كان يعرف اني كنت ابيها ..وحلفت ما اتزوج غيرها ..لكن محد درى باللي في قلبي من عذاب ..

قلت لها ..

ــــ تعادلنا ..

استغربت ,,وعقدت حواجبها ..

ـــ انتي تعرفين سري ..وأنا أعرف سرج ..

نزلت راسها وقالت ــ انا مب فخورة بسري ..وأتمنى أني أشطب هالصفحة من حياتي .. وبالنسبة لسرك ..بكون بير غميج ..ومابتكلم عنه ..

قمت ..ابتسمت ..

مر شهر ..وأنا ورغد في هدنه صلح ...ما نتعرض لبعض .في المكتب ..ليال تحاول جهدها أنها تكسر رايي فيها كل ما يالها ..وتصير أكثر عناد بس مستواها تحسن جدا...

وفجأة تأزمت الأمور ...

دخلت علي منال المكتب وهي معصبه ..

ـــ شيابج المكتب ؟؟

منال ــ يوسف ..ليش مانع رغد من الطلعه ؟؟ وللحين ما يبت لها خدامه ولا دريول ؟؟؟؟

من شهر وأنا أماطل منال ومريم ..ما يدرون أني ما أوثق برغد ..فما يبت لها الدريول ..وكنت بعاقبها بالشغل والطبخ .

قاطعت منال أفكاري ـ الخدامه وتيي خلال يومين ..والدريل وين دريول أمي القديم رجعه لكفالتك ..

ــ منال أنا ما أبي خدامه . ..والدريول أنا أودي رغد وأييبها ..والطلعه أنا ما منعتها عن شي ..هي ما تبي تطلع ..

منال ــ دق عليها قول لها تطلع معاي الكوافير ..

ــ زين ..تف=ضلي الحين لان عندي موعد ...

منال ــ زين دق عليها أول قدامي ...واييه ..البنت بتدخل واحد وعشرين سنه الاسبوع اللي ياي ..نبي حفلة عيد ميلاد ضخمه ..

ــ اعذريني منال ..بس الاحتفال مقصور بينا ..أول عيد بينا ..

كان عذر سخيف لكنه أقنع منال ...اللي اطلعت ..وتعثرت بالكرسي ..رجع لذاكرتي موقف قديم ..كنا طالعين أنا وأمي المرحومة ومنال وجواهر ..وكانت المرة الاولى اللي تلبس فيها جواهر عباة ..واشترتها طويله وايد ..وكنا رايحين الكورنيش ..

جواهر ــ آه يوسف الجو شاعري ..

كانت امي مشغول مع منال فما انتبهت لي وأنا أقول لها ..

ــ خذا الجو من نسيمج عطر ..أحلى من ريحة الورد والفجر ..جواهر من نداج غار المطر ..ومن بسمة شفاج زعل القمر .

سرقتي منه كل النور والسحر.. ولاجل عيونج رضى بالغدر.

جواهر ــ الله ..روعه ..يوسف من قالها ؟؟

ــ أنا ..بس ما أدري عن الوزن ..بس دامج أنتي في البيت ..فأنا واثق أنج بتضبطين الوزن ..جواهر انا ما قلت لج ؟؟

جواهر ــ ما قلت ؟؟ ..ايش ؟؟؟

يوسف ـ أحبج ..وامي تناديج ..

لفت علشان تروح لامي دقايق الا وأحس بشي يجر بدشداشتي للأرض وألاقيها طايحه متعثره في عباتها ..

ـــ قومي فشلتينا الله يفشلج ..قومي شوف الناس شلون يطالعونج ..قومي ..

جواهر ــ العباة تحت ريولي ما أقدر ..فديتك يوسف ارفعني ..

ــ عى الاقل هدي ثوبي ..بيتقطع ..

جواهر ـ وأطيح على الارض لا يا عيوني ..

سمير ــ استاذ ..أستاذ ...

ــ نعم ..

سمير ــ صاحب الموعد حضر واليوم عندك محكمة ..

ــ دخله بعد خمس دقايق ..بسوي تلفون مهم ..

طلع سمير اللي قطع أفكاري ..أنا عاهدت نفسي ..ليش فجأة الذكريات تهاجمني ؟؟ انسى هالاسم ...انسى هالاسم ...

اتصلت في رغد وقلت لها تروح مع منال بس ما تتأخر ...

الفصل الخامس .

ما أروح البيت إلا لما أغلس على ليال ...هذي كانت نيتي ..

دخلت بعد ما طلبتها ..

ــ ليال روحي السد ..في هناك موكل يدفع الاتعاب ..هذا عنوانه بالعاده أودي سمير بس بحتاجه اليوم أكثر منج ..حطي الفلوس في البنك برقم الحساب اللي في البطاقه ..

ليال ــ بس ما عندي سياره ..

ـــ انتي تسوقين صح ؟؟وين سيارتج ؟؟

ليال ــ ما عندي سياره بس عندي ليسن ...للحين ما اشتريت سيارة لي هذي سياره خالي ..اللي كنت اسوق بين فترة وفترة ..

ـــ خذي سويج سيارتي ..وتوكلي ...

وأعطيتها المفاتيح كانت مترددة ...وتمنيت أني ما أعطيتها المفاتيح ....

بعد ربع ساعه اتصل فيني عيسى زميل المهنه ..

عيسى ــ السلام عليكم ..شلونك يوسف ؟؟

ــ الحمدالله وأنت شخبارك ؟؟

عيسى ـــ الحمدالله كل الأمور بخير ..ها شلون ليال ؟؟

ــ عبقرية ..لها مستقبل واعد ..شكلي بوظفها عندي في المكتب..

عيسى ــ يا أخي أنت تزوجت الحين ..شيل هالفكره من راسك ولاتجيب لنفسك وجع راس ..

ـــ لا أنا زوجتي مب غيورة لها الدرجة ..

عيسى ــ هم جذي أول الزواج ..انطر شوي وتنفتح عليكم أبواب جهنم ...

ضحكت ..

عيسى ــ تعال مرني المكتب خل نتغدى مع بعض ..

ـــ كان ودي بس سيارتي مب معاي ..

عيسى ــ بمرك الحين ..ونروح للمطعم..

ــ بس ها على حسابك ...

عيسى ــ لا تخاف ..الحساب مدفوع سلفا ..خلص شغلك ربع ساعه وأكون عند الباب ...

ــ ناطرك ...

طول الساعتين والنصف اللي مروا كنت مع عيسى ..بعدين مرينا محل حلويات وكوفي و شربنا كابتشينو ...

عيسى ــ يوسف أنا ما أنصحك تتأخر عن المدام ..

ــ آيييه ..

عيسى ـ شقصد بإي هذي ؟؟

ضحكت ..

عيسى ــ قول ..قول شقصدك ؟؟؟

ـــ أكيد أنت تأخرت على المدام فتبي تفتك مني ..

ضحك عيسى ـــ لعيونك ماني متصل فيها وماني مرجعك للبيت لين الساعه وحده في الليل ..

ــ لا عيسى ..أنا ملتزم ...ما أقدر لسهره صباحي ..

عيسى ــ ها ..أشوف أنت اللي اعتذرت هالمرة ..

ـــ صدق عيسى يا أخوي أنك ما تقصر ..بس المدام بروحها في البيت ...وسيارتي مع ليال..أجلها ليوم ثاني ..

عيسى ــ لا .. الليلة يعني الليله ..

ـــ لا عيسى الله يخليك بظل معاك لين الساعه أربع ..وايد ..

عيسى ــ يوم ثاني ؟

ــ أكيد ..وبتكون السهره على حسابي ..خلينا نسمع أم كلثوم ..

حطيت شريط لسه فاكر ....وذبنا مع الالحان ..وفجأة صرخنا مع بعض ..(( كان زماااان كان زماااان ))

فتحت الباب ولقيت رغد غرقانه في دموعها ..ما استغربت صراحه من تزوجتها مايمر يوم من غير ما تنزل هالدموع ..أصلا بستغرب اذا شفتها تضحك أكثر من استغرابي اذا شفتها تصيح ...

ــ رغد ...

فزت وقامت تصرخ ...وتطالعني بنظرات خوف ورعب ...

ــ رغد ..شفيج ؟؟

رغد ــ لا لا لاااااااااااااااااااااااااا ,,,ما أبي أموت ..ما أبي أموت ..لا يوسف ..لا ...

دموعها اربع أربع والخوف والفزع اللي فيها ..حسيت أن في شي غريب .,,

ـــ رغد ...عن ايش تتكلمين ؟؟؟

رغد ــ آسفه يوسف ..آسفه ..ذنبك في رقبتي ..آسفه ...بس لا أرجوك ..

قربت منها أبي أمسك يدها وأفهم اللي تقوله ..وهي تبتعد ..ولما مسكت يدها طاحت غشيانه ..

موقف غريب جدا .. شلتها من على الارض وحطيتها على الكرسي ..وركضت وطلعت الكلونيا وغرقتها فيها ..

فتحت عيونها مرتعبه ..مسكت يدها ..

ــ رغد أنا يوسف ..شفيج ؟؟ ليش كنتي تصيحين ؟؟؟

رغد ــ أنت ما مت ؟؟؟؟؟

عقدت حواجبي ــ لا ..ها أنا قدامج ... وأنت ماسكه يدي ..شفيج ؟؟؟؟؟ شصار ...

مسحت دموعها واحضنتي بقوة ...تفاجأت ..وبدت تتلمس وجهي وهي مب مصدقه ..واضحكت ..ورد اعتفس ويهها ..وقالت ..

ــ اتصلوا فيني وقالوا انك مت ..سيارتك محترقه على الطريق ..

ليال ....أول شي طرا على بالي ...

ــ رغد مافيني شي ...هذا انا قدامج ...أنا بروح الحين خلج هنا بتصل في منال تيي وتم معاج ..

وعلى طول طلعت تلفوني وركبت سيارتي المرسيدس بو عيون المركونه في الكراج ..

انتبهت أن التلفون كان مغلق ..

فتحته وانهالت المسجات علي ...على طول اتصلت في منال اللي كانت تصيح بقوة ...وطمنتها اني ما مت ...وأن في سوء فهم ..

منال ــ بس لقوا سيارتك ...

ـــ اييه أنا سلفت سيارتي لواحد ...طمني الكل علي ..اوكي وروحي لرغد تراها منهاره من شافتني على بالها ملك الموت ياي ياخذها ...

ضحكت منال ..ــ الحمدالله على سلامتك ..والحمدالله ماصار لك شي ...

ــ اوكي ر وحي لرغد ...

انحصر كل تفكيري في ليال ..مابسامح نفسي اذا صار لها شي ...أنا السبب ..كان لازم يعني هالموقف السخيف ..

أول ماوصلت المستشفى ..وسألت قال لي الدكتور انها نجت بمعجزة ..والحمدالله ..ولما سألت عنها ..أشاروا لي على غرفه ..

دخلت ..ولقيت ليال وشعرها الاسود الطويل منسدل على كتوفها وهي تطالع اصبعها الخنصر ..اللي كان مجبس ..

تنحنحت..فحطت الشيله على راسها ..

دخلت ــ السلام عليكم ..

ليال ـ وعليكم السلام ...

ــ حمدالله على السلامة انت بخير ؟؟ عسى مافيج شي جايد ؟؟

ليال ـــ لا الحمدالله ؟؟قدرت أطلع من السياره في الوقت المناسب ..

ــ الحمدالله على لامتج ...ممكن تقولين لي شصار بالضبط؟؟؟

ليال ــ السياره اللي صدمت فيها كانت طالعه من طريق فرعي لرئيسي بسرعه كبيره ..فاصطدمت فيني ..أنا آسفه ..سيارتك يا استاذ احترقت ..وسائق السيارة الثانيه هو وصاحبه توفوا ...على طول ..أناقدرت أطلع من السياره قبل لاتحترق كنت رابطه الحزام فما تأثرت لما اتقلبت السيارة .. ....والصدمه يات في جهة الراكب مب جهه السايق ..والحمدالله قدرت افتح الباب ..

للحظات تخيلت ليال كأنها في فيلم هندي ..بعباتها وشيلتها شلون قدرت تطلع ؟؟؟

ليال ـ استاذ .آسفه لاني ..خربت السيارة ..

ــ مش مهم السيارة المهم أنج طلعتي بصحه وسلامه كلمتي أهلج ؟؟

هزت راسها ــ مايقدرون ييوني ..بيحاولون المغرب ..

ــ ما بيرخصونج ؟؟

ليال ــ رخصوني ..من ساعتين وهم نازلين فيني تحاليل وفحوصات مب مصدقين اني طلعت بسلامه ..بس لما يجون أهلي ..أروح معاهم ...

ــ قومي بوصلج ...

ما اعترضت ليال ..يمكن لأن كل عظمة في جسمها مرتضه! وتبي ترجع البيت وترتاح ...

ــ وين بيتج؟؟؟

ليال ــ في المطار ..

طول الطريق وحنا ساكتين ..ليال في عالم وأنا في عالم ثاني .

ليال ــ ادخل من هنا استاذ ..وأشرت على طريق فرعي ,,دقايق وقالت ــ أنا بنزل هنا ...

ــ وين بيتج ..

ليال ــ هذا ...

وأشرت على بيت قديم بابه ازرق مليان صدأ جنبه شجره سدر كبيره ...البيت قديم جدا وفي تصدع بجدرانه ..

ليال ــ تفضل استاذ معقوله وصلت لين الباب وماتدخل ؟؟ تفضل ..

ما مانعت ..تبعتها ...وأنصدمت بالبيت من داخل ..كان مشطب جديد وابوابه زجاجيه وحديقته روعه ..ولما دخلت الديوانيه كانت فخمة جدا ..فرق بين واجهه البيت ودداخل البيت ..

جلست ...دقايق ودخل ولد ..مراهق ...

قال ــ أنت المحامي اللي تشتغل عنده ليلى ؟؟؟

ليلى ...ولا ليال ؟؟

قلت ــ وعليكم السلام اييه يبه انا .

الولد ــ متى تدفع لها معاشها ؟؟

ــ عبود ...يلا ادخل داخل .يلا ...

دخلت بنت لافه شيلة الصلاة على راسها ...

ــ السلام عليكم .اعذرني يا أخوي الولد مب مأدب ..شتشرب جاي ولا عصير ؟؟

ــ قلاس ماي لو سمحتي ..

دخلت ليال..أو ليلى الديوانيه وبيدها صينيه فيها عصير ..

ـــ تفضل ,,

ــ شكرا ,,,

ليال ــ هذي العنود أختي العوده ... والولد هو ابنها عبدالله ملسون ..اعذره ..ياهل غبي ..

ــ لا ..ماله داعي تعذرين .. عن اذنج أنا بترخص الحين ..

ليال ــ بدري ...اشرب العصير استاذ ...

ـــ لا ...مافيني ..بعدين أنت تعبانه وتوج طالعه من حادث بمعجزة ..ارتاحي ولا تتن المكتب طول الايام اللي جاييه ..خذي راحه ثلاثة أيام ..

ليال ــ بس يا أستاذ ..

ــ بدون بس ..خلاص ..مرة ثانية حمدالله على السلامة ..عن اذنج ..

ليال ــ اذنك معك استاذ,, حياك الله ..

أول ما طلعت من البيت حسيت كأن هم وانزاح عن صدري ...رجعت البيت ولقيت رغد جالسه مع منال ,.,,

نزلت راسها مستحية مني ..ماقدرت أمسك نفسي وضحكت ..منال ــ هلا أخوي ..ها ..شاللي صار ..

ـــ أبد ...كنت مسلف السيارة لناس ..وسووا فيها حادث الحمدالله ما صار لهم شي بس السيارة ..راحت فيها ..

منال ــ تفداهم ...في الحديد ولا في ارواحهم ..لو صار لهم شي كان ذنبهم في رقبتنا ..

اييه والله كلام منال صحيح ..لو صار لهم شي كان ذنب ليال في رقبتي ..

غيرنا الموضوع وتكلمنا في أشياء وايده ..كانت رغد ساكته ..والهدوء مخليها روعه ..

أسبوع later

____

كنت أتكلم مع سمير عن اللي طلعناه في هالشهرين اللي راحو ..وكان مبلغ محرز ...وصيت سمير بجزء منه لليال . كجائزة على جهودها ...وجزء له ..والباقي ..يحطه في الحساب ...

وداومت ليال ..ماكانت مثل قبل بالحيوية والنشاط ...كانت مثقلة بالهموم ..وكنت محتار ليش؟؟؟

رجعت البيت ..وخلال هالأسبوع رغد تعلمت شوي في الطبخ ..وكانت الاطباق اللي تسويها ممتازة ..بس الطبخ أثر على مظهرها شوي ..ما تعتني بنفسها مثل بداية الزواج ..أنا عاذرها لاني شفت جدولها اليومي ..تصحى من الصبح تنظف الغرف وتنظف الصالات والممرات ..وتسوي الريوق وتشيل الصحون وتنظف المطبخ وتغسل الملابس وتكويها وترجع للمطبخ تسوي الغدا وبعد الغدا الجاي والقهوة والحلو وبعدين تنظف المطبخ مرة ثانية من آثار الغدا تآخذ فترة راحه ساعتين بعدين ترجع وترتب البيت وبعدين العشا وتنظيف المطبخ وغسل الحمامات وأنتوا بكرامه وتجمع الملابس الوسخه علشان تغسلها اليوم الثاني و تحط راسها وتنام ..طبعا البيت كبير مكون من ثلاث صالات وديوانيه وثمان غرف ..وثمان حمامات غير المطبخ الكبير ..وماشكت أبد ...وما قالت أبي خدامه .... كأنه شي مسلم به .. هذا ببساطة كان جزء من انتقامي ..فما هانت علي ..خصوصا أني أعاتب اذا شفت شي غير مرتب ...رغم جهودها المضنية..

***

بعد قيلوتي المعتادة ..تفآجأت برغد في الغرفة ...

ــ شفيه ؟؟

رغد ــ أختك منال ونورة وجواهر ومريم تحت ..يبونك في موضوع خاص ..

ــ لا يكون يبون يكلموني عن الخدامة ؟؟؟

رغد ــ لا ..ليش يكلمونك أنا ما اشتكيت وماطلبت شي ..بس اتصلوا وقالوا ان موضوع خاص بينك وبينهم ...وهم الحين تحت ..في الصالة الجانبية ..

ــ اوكي روحي أغير ملابسي واشوفهم ..

قمت ولبست ملابسي ..جواهر ..جواهر في بيتي وتبي مني موضوع خاص ؟؟؟؟جواهر ..جواهر ..

دقايق طقت رغد الباب ..

ــ نعم ..

دخلت رغد ..ــ ليش كل الكشخة والعطر القوي ؟؟ علشان جواهر يعني ؟؟

ــ لا ..بطلع بعد ما أشوف شيبون ..

رغد ــ ممكن أسأل وين ؟؟

ــ للقهوة ...راسي يعورني وأبي أدخن شيشه ...

رغد ـ وكل هالكشخة علشان القهوة ؟؟

ــ لا ...بسهر مع عيسى ..

حسيت أني أحط أعذار أي كلام ..لكن ظن رغد صحيح ..كل هذا علشان جواهر ..خليها تشوف شضيعت على عمرها ..

رغد ــ ييت أستعجلك ..ضيفتهم الشاي والقهوة والحلو ...وبكون في غرفتي ..اذا تبي شي ..

ــ يعطيج العافيه ...

نزلت راسها وراحت ..طلعت من غرفتي و رحت للصالة ..

تنحنحت قبل لا أدخل ..

منال ــ حيااك أخوي ...

دخلت ..كانت جواهر جالسة في الطرف من كنبه مزدوجة .. ...ونورة ومريم على كنبه مزدوجة و منال على كنبه مفرده ..كل ذرة في جسمي كانت تبي تقودني أجلس جنبها ..لكني امتنعت ..وجلست قرب منال على كنبه مفرده ..

وتجاهلت الانسانه اللي كل ذرة في جسمي تصرخ أكرهج يا حبي ..

بعد ما سألتهم عن الحال والعيال ..سادت فترة صمت ..

ــ خحير ..ليش محتشرين كلكم ..شالموضوع المهم ..اللي خلاكم تطلعون رغد نور عيني من الجلسه ؟؟

(طبعا الغزل كان استهبال مني علشن أغيض جواهر )اللي ماوقفت رجولها عن الحركة ..وللحظة حسيتها اسحبت كل الهوا اللي في الصالة..

منال ــ لو انها نور عيونك ماصارت سيرتك على كل لسان .

طبعا ردة فعلي كانت أن علامة استفهام ضخمة انرسمت فوق راسي ....

ــ منال شتقولين ؟؟

مريم ــ يوسف , أنت بحسبة أخوي .ومن فاحت الريحه وحنا يينا نعدل الأمور ..

يتبع ,,,

👇👇👇

تعديل المقال