رواية اعترافات رجل -7

رواية اعترافات رجل - غرام


رواية اعترافات رجل -7

فاحة الريحة ؟؟ لايكون اعرفوا بسالفة رغد ؟؟؟ ارتبكت ..انتابتني هزة خفيفة ..ما تكلمت وعقدت حواجبي ...ناطر اللي باقي .

مريم ـ البنية يقولون خوش بنيه ..ومحد تكلم عنها أبد صاينه نفسها ..

محاولة استغفال مني ــ عن ايش تتكلمين ؟؟

مريم ــ عن المتدربة ..

كأنه جبل وانزاح عن صدري ...تنهدت ..

ــ شفيها ليال ؟؟

منال ــ يعني ما تدري أن سالفتكم صايره الحدث الرئيسي في الدواوين ؟؟

ــ حتى الديوان الأميري ؟؟

منال ــ الله يخليك يوسف لا تتطنز ...

ــ سمعي نفسج أول وبعدين تعالي تكلمي ..

منال ــ يعني ما تبي تصحح الغلط ؟؟؟

هني تفتح مخي شوي ــ أي غلط أختي المصون ؟؟

منال ــ أنت وليال ..سالفتكم على كل لسان ..شلون يا أخوي ما خبرتك مال هالسوالف ؟؟..شلون تلعب بعقل البنت وانت توك متزوج ..وزوجتك أحلى منها ؟؟...

ــ يعني انتوا من صجكم تتكلمون ؟

مريم ـ اييه يوسف من صجنا كنت أمس أنا وجواهر في مجلس أم علي وهي ام الاخبار وقالت لي حماج ريحته فاحت ..هو والمتدربة اللي عنده .. وقالت لي خلي يستر على البنت لانها زينه ..مب مالت خرابيط وشايله أمها وأختها ..

انفلت مني لساني ــ مب كافيني أني تزوجت ...

للحظة سكت ..كنت بفضح رغد ...كنت بقول تزوجت علشان الفضيحة؟؟؟ سكت واستعذت من الشيطان غمضت عيوني وحاولت أرتب كلامي ..

ــ أنا زوجة وحدة كافيه علي ..وبالنسبة للمتدربة مافي شي بيني وبينها ..وبنت ممتازة وما عندها هالخرابيط ..

منال ــ بس ما في دخان من غير نار ..

ــ يمكن النار اللي تتكلمين عنها هي السيارة ..

منال ــ أي سيارة ..

ــ أنا مو قلت لكم اني سلفت سيارتي حق ناس اللي صار لها الحادث من اسبوع ؟؟

منال ـ قلت لي ..اييه ..

ــ كانت ليال ..طرشتها تيب أوراق من زبون ..

مريم ــ بس ؟؟

ــ بس ...البنت أصلا أنا ما أتعامل معاها غير بطريقه رسمية ..

منال ــ وزين والفضيحة وسمعة البنت ؟؟

ــ وأنا شدخلني ؟؟ مالي شغل أنا البنت ما قربت ناحيتها ..وأنتي ومريم لازم تكذبون هالكلام ..

جواهر ــ زين ليش كانت هناك يوم طحت في المستشفى ومارضت تروح ؟؟

أخيرا سمعت صوتها ...بعد ما كانت تهز راسها بس ..

وقلت ــ لنفس السبب اللي رحتي فيه للمستشفى مع مها ..كانت تتطمن علي لاغير ...

صار ويهها يقط لون ولون ..ونزلت راسها ...مانعتني من أشوف ردة فعلها ..

مريم ــ والحل الحين ..تدري أن ام ليال متصلة في منال ؟؟


ـــ ليش ؟؟

منال ـ ما فهمت شي بس ..قالت كفوا شركم عنا ..

ــ بس ؟؟

منال ــ بس ..

ـــ زين منال ..بروح وياج بعد شوي بيت ليال..نوضح لها السالفة ..

منال ـ وتعرف بيتها وين وتقول مالي علاقة فيها ..

ــ منال موظفة عندي شلون ما اعرف وين ساكنه .؟؟

جواهر ــ هي متدربةو لا موظفة ؟؟

ــ دام أدفع لها معاش الإثنين ...

فهمت الحين شسبب الحيرة اللي فيها جواهر ..سببها شي اسمه الغيرة ..أي غيرة هذي ؟؟ ليش ما غارت من رغد ؟؟

منال ــ يوسف ..وين سرحت ؟؟

ــ شكنت تقولين ؟.؟

منال ــ كنت أقول زين أن رغد ما تحب تطلع ولا المسكينه شبت نار ...

ابتسمت ..رغد ما تحب تطلع ؟؟ رغد لولا اني أمرتها انها ما تخطو طوبة بره البيت من دوني والا هي هياته ..تذكرت كلمات صالح اخوها (بتذلك من كثر ما تحب تتمشى ..ييب لها دريول أحسن من وجع الراس )..هذا انت يبت لها دريول ..وغلطت ..من وراكم ..

منال ــ وين تسرح أخوي ؟؟

مريم ــ عن اذنكم الحين بنروح ...

عيوني كانت متعلقة في جواهر ..لين ما اقرصتني منال وغمزت لي ...أني أوقف بحلقة ..

نورة ــ عن اذنك خوي يوسف ...

ـــ هلا نورة ..ما سمعت رايج اليوم ..

نورة ــ انا صراحة ما ادري ..لان مااسمعت اي اشاعات ..

ــ اذا سمعني منصور اخوي بيذبحني بس ..تسلمين أحسن من اخت يات تتهمني وما قالت اشاعات ...ما في ثقة في اخوها ولا الثانيات ..ناسيات العشرة اللي بينا ..

مريم ـ خوي يوسف .. سامحنا حنا قلنا مافي دخان من غير نار ..

هزيت راسي وقلت ــ اييه ..مسموحات ..أدري الغيرة علي ما خلتكم تشوف طريقكم ..

ما ادري ليش اهتز قلبي من التفاتة جواهر ..كان ودي أقول لها اي كنت قاصدج ..

منال ــ يلا نروح الحين ..بس خليني اسلم على رغد وينها ؟؟

وكانت توجه كلامها لي ..

ــ في غرفتــ...في الغرفة بناديها ..نطري شوي ..

قبل لا ادخل سمعتها تغني ...أحبك وأسهر أيام وليالي ...لسعد الفهد ..

دخلت ،،

رغد ــ هلا ..راحو؟؟

ــ لا ..منال تبي تسلم عليج ..ما تصدقين ليش يايين ...يبوني أغطي فضيحة وحده وأتزوجها كأن مب كافيني اللي ياني ..

رغد ابلعت ريقها ــ وأنت ووافقت ؟

ــ هذا اللي ناقص خفت أنفضح من وراج انفضحت من ورا غيرج ..لو أدري ماكان تزوجتج ...

سكتت ..

ــ انزلي اختي تبي تسلم عليج ..

رغد ـ ممكن تتعذر لها وتقول لها ان في الحمام ؟؟

ــ مثل ما تبين ...

نزلت ..الحين عرفت ليش ليال مهمومة هاليومين اللي راحوا ..ولقيت زوجات أخواني مكانهم ما اطلعوا ..وكانوا يتساسرون ..

مريم ــ كنا نبي نسلم على رغد ..وينها ؟.؟

ــ أعتقد تتسبح .يلا منال ..نروح لبيت ام ليال ..

منال ــ يلا ..نروح ..

وسقت السيارة وأنا أحاول أفكر شقول لمنال لما تسألني شلون دليت البيت بالضبط ..

والسؤال اللي خفت منه سألتني اياه ...طنشت وقلت بعدين أقولج ..

طقينا الباب ..ويا عبدالله وفتح الباب ..

ــ قول لجدتك ان في ريال يبي يكلمها ..

عبدالله ــ حياك استاذ ادخل الميلس ..

ودخل الولد وأنا دخلت مع منال الميلس ..

منال ــ شدراك انها يدته ؟؟ مب امه ؟؟

ما عرفت شرد ..عاد يبت منال الملاحظة القوية معاي لونها مريم ما فكرت اصلا ..

ــ أعرف ...وبس ..

لحظات دخلت وحده خمسينية ..لابسه بطولتها وعباتها ..

ــ السلام عليكم ..

ـــ وعليكم السلام ..

منال ـ وعليكم السلام ..

ام ليال ــ تفضلوا ..قبل لا تتكلمون شتبون نضايفكم ؟؟

ــ لا ..ما جينا للضيافة ,,جينا نوضح سوء فهم صار ..

منال ــ اييه يا خاله ..

ام ليال ــ لا والله تدخلون بيتي وما تتضايفون ..لحظة ..عنود عنود ..يمه وين الشاي والماي ..والعصير ..

ــ ماله داعي يا خاله ...خلينا نتكلم ..

أم ليال ــ خير يا ولدي ..ان كنت ياي تخطب ..أنا بنتي ليلى مخطوبة وخالصة ..والعنود . ما تبي زواج ..

ليال مخطوبة ؟؟؟ ...عقدت حواجبي و التقت نظراتي بمنال ..

ليال ادخلت الميلس في هذيج اللحظة ..

ــ يمه ...استاذ يوسف ..

اعتفست ملامح ام ليال ..

وقفت ـ اهلا ليال .أنا اليوم سمعت من اختي منال عن سوء الفهم اللي صاير ..وقلنا نيي نحله ...وأوضح لامج انج مجرد متدربة عندي واني ما تعديت علاقة المدير بموظفه ..والكلام اللي داير مجرد اشاعات ..

منال ــ اييه يا خاله اخوي يوسف مب مال خرابيط وريال مالي مركزه ومتزوج وسعيد مع زوجته ...وهو حلف لي انه ما تعدى الحدود بينه وبين ليال ..

ام ليال ــ زين يا ولدي بيضت ويهك ..وبنتي لعنود اتصلت في اختك وهي على بالها كلام الناس هو الصحيح ,, خبله ما وثقت باختها ...

منال ـــ يا خاله انا يايه اأكد لج ان الكلام مب صحيح ..وأنا واثقة من اخوي وواثقة من ليال..

ام ليال ـ بنتي ليلى وانا ربيتها عدل ..واعرفها ما تغلط ..وهي شرحت لي السبب اللي خلا الناس يتقولون عليها ..

منال ــ خلاص ..على جذي حنا نستأذن ..

ليال ـ لا معقولة ..لازم تتضايفون ..وكافي ان استاذ يوسف لما يا آخر مرة ما عزمناه على العشا ..

طبعا تتخيلون ملامح منال ..ونظراتها ..

منال ــ لا اعذريني انا خليت عيال في البيت واخوي يوسف زوجته بروحها ..مرة ثانية انشاءالله لما تخلصين التدريب وتصيرين محامية كبيره ..

ليال ــ جذي مسموحة..بس ها لاتنسين العزومة ..تراها سارية المفعول ..

منال ــ انشاء الله ..

طلعنا من البيت وأول ما ركبت السيارة وكانت تبي تنطق منال قاطعتها ـــ ولا كلمة ..أنا يبتها من المستشفى مرة وحده ..وأنتي سمعتيها مارضيت أطول ,,ما ابي منج ولا حرف ..

سكتت منال ,,ووصلتها للبيت ..ورجعت البيت ..كان مثل ماتركته ..الصحون والدلال مكانها ..والباب الداخلي مثل ما خليته مفتوح .. صعدت فوق ..غرفتي مثل ماهي ما رتبتها رغد ..الفراش مبهدل وملابسي على الارض ..

فتحت باب غرفتها ..وماكانت موجودة .. بس باب الحمام مقفول ..

ــ رغد ...رغد ..رغد افتحي الباب واطلعي .. محد رد ..والهدوء في الحمام مب طبيعي ..طقيت الباب مرة ثانية ...رغد اطلعي لا اكسر الباب ..

محد رد ..الهواجس انتابتني ..ونستني كل شي .تذكرت اني قلت كلام لها ..أصنفه تحت مسمى الاهانه ..رغد ..

ـــ رغد ..رغد ..

كل شي على مكانه ..وأنا طلعت من ساعة ونص ..يمكن اكثر يمكن اقل ..لايكون سوت في نفسها شي ..طبعا مو مثل الافلام ادفع الباب وينكسر ..لانه مستحيل الباب من خشب ثقيل لكن فيه زجاج ..

كسرت الزجاج ..وكان تقريبا مثل شياك صغير في الباب ..الذهول خلاني اتحرك بدون وعي وافتح الباب ..كانت ممدة في وسط بركة دم ..انتبهت لقيت جرح في يدها في معصمها ..الغبية ..السكين في ايدها الثانية... الغبية ..

مسكت غترتي ولفيتها حول ايدها وضغطت بقوة ..فيها نبض ..بس انزفت وايد ..

ــ ليش يا رغد ..ليش بعتي آخرتج بدنياج ؟؟ ليش هانت عليج نفسج ..

رفعتها عن أرض الحمام وحطيتها على السرير ..وطلعت لها عباة ولفيتها بها ..ونقلتها للسيارة ..وأنا أمشي شي غرق عيوني ..بطرف ثوبي ..


كنت سرحان بحالتها ..لين ما طبطبت على كتفي يد ..

التفت ..كانت الممرضة ..

ــ sir why you crying?

كراينق؟؟؟ مسحت ويههي ..هذا الشي اللي غرق عيوني ..

-ــ how is she ?

المرضة ــ she is fine ..the doctor want to talk with you before he calling the police..-

بوليس؟؟ ــ وير؟؟

ــ in there ,,second room ..

thanks-

دخلت للدكتور ....

ــ ها دكتور شلون رغد ؟؟

الدكتور ــ كويسه لحد دلوقت حضرتك جوزها ؟

ــ اييه دكتور .. انا يوسف ..

الدكتور ـ كل حادثه انا مضطر أبلغ عنها الشرطه ...وعلى ما يبدو دي حادثه ..انتحار ..صح ولا كلامي غلط ..

قلت له ــ دكتور المسكينه على بالها اني مت ..يالها خبر كذبة ابريل اني مت ..ارجوك دكتور أنا مستعد لكل طلباتك بس ..تغطي على الموضوع ..

الدكتور ــ يعني ..مش مشاكل نفسيه ؟؟

ــ لا ..سوء فهم ...

الدكتور ــ بشوف الموضوع مجرد ما تقوم بالسلامة ..

ــ انا بنقلها من هالمستشفى لمستشفى خاص ..

الدكتور ــ لو عايز تنقلها ..مافيش مشكله بس لازم نبلغ ..

ــ دكتور أنا بنقلها ..هي حالتها حرجة ؟؟

الدكتور ــ لاء على الاطلاق كمية الدم اللي فقدتها مش كتير لدرجة الاعياء ..وتقدر تعوضه خلال ايام ..هي دلوقت على المغذي .والجرح مش عميق ..متوسط العمق بجراحه قدرنا نرجعه زي ما كان ...

ــ بس كان في دم وايد في الحمام وين اجرحت نفسها ..

الدكتور ــ لا ..يمكن ..لكن مافيش حاجة حاجة مانقدرش نسيطر عليها ..لان الجرح بسيط انا بعتبره حادث عادي ..وبتغاضى عن هالموضوع بس انصحك تنقلها مستشفى خاص علشان ما تكترش الاسئله عنها ..

شكرت الدكتور ..وقمت باجرائات النقل بسرعه ..

رغد رهبة فكرة موتج خلت دموعي تهل ..ودموعي مانزلت من توفت امي ..ما ادري شلون اقارنج بأمي ..وانتي ماتسوين التراب اللي تمشي عليه ..

آآآآآآآه يا رغد ..انصدمت اليوم واكتشفت انج جبانه ...ليش ؟؟ ليش؟؟


الفصل السادس .

ماقدرت أمنع يدي من اللعب بشعرها الكستنائي اللي تحت الكبوس ...شلت الكبوس وبديت أمسح ..وأرتب ..هي نايمه الحين ..والدكتور مابيمر عليها لين الساعه ثمان الصبح ..

رغد ..شذنبي أتحمل ذنبج ؟؟ ليش ارخصتي بعمرج بعد كل اللي سويتيه علشان تعيشين ..رجعت ولبستها الكبوس وطلعت من المستشفى ...طلعت والهواجس أعلنت حربها في مخي ..

هالحزة كل الناس رقود إلا العزاب ..ليش لاء ..من زمان مارحت ديوانية خالد ...من تزوجت ...بياكلوني ويقولون صرت مثل غيرك ..بس حاليا أنا محتاج تغيير جو ..محتاج أهرب من الهواجس والافكار اللي غزت مخي ..

دخلت الديوانيه وكان فيها أربع شباب ..(خالد يشتغل في التلفزيون ودوامه مسائي ..سلمان مهندس مدني عنده مكتبه الخاص قاسم موظف في وزارة التربيه . سعد طبيب له عيادته الخاصه والبشوات كلهم عزاب )

خالد ـــ أهلا وسهلا ....بخوي يوسف هلا هلا تفضل ..

ـــ زاد فضلك السلام عليكم ياجماعه .

الكل = وعليك السلام ورحمة الله ..

خالد ــ قلنا انك بتحطم القاعدة بس طلعت مثلك مثل غيرك ...

طبعا قاعدة عدم السهر للمتزوجين ..

ـــ خلود بكره تعرس ونشوف ياترى بتكسر القاعدة ولا لاء؟؟

قاسم ــ حياك تشرب ؟؟

ـــ لا ..ما اقرب هالاشياء .. بس اذا عندك سيجاره عطيني ..

قاسم ــ ممتاز ...خلود شاريه من الفندق ..معتق ..

ــ ما اشرب خمر ...بس عطني سيجاره اذا مستخسر فيني قلاس الماي ..صار لي مدة مادخنت ..

قاسم ــ أعطيك عيوني لو تبي ..

ـــ تسلم لي عيونك بس سيجاره ...

أعطاني قاسم السيجارة ..لاحظت ان سعد جالس بعيد ..وسلمان منسدح على الارض ..

ــ سعد شلونك ؟

خالد ــ سعد يي ييلس هناك ويطالع التلفزيون لايشرب ولاياكل ..

ـــ معلش خلود دكتور ...خايف على صحته ...


فتحت عيوني ..وأنا دايخ ..خذ مني خمس دقايق يلا عرفت المكان حولي ..شقة ..شقة مين ؟؟ ما أدري ..قمت وأنا أحس بصداع قوي ..وكل شي حولي يتمايل ..

ــ صباح الخير ...

التفت ..ولقيت سعد شايل بيده صينيه فيها ريوق ...

ــ صباح النور ..راسي يعورني يا دكتور ..أنا شلون ييت هنا ؟؟

سعد ــ أنا يبتك أمس معاي من ديوانية خالد ..

ديزانيه خالد ..آخر شي أذكره أن خالد عطاني سيجاره ثانية ..سعد ..شصاير ...

سعد ــ يبتك بعد مادخلت الجو ..

ــ جو .؟؟ أي جو ..

سعد ــ كل ..تريق وبعدين أتكلم معاك ...بروح الحين أمر العيادة ..برجع بعد عشر دقايق وتكون هنا لاتطلع ..محتاج أكلمك ..

ــ ممكن تسلفني ثياب ؟؟ من امس وهالملابس علي ..ما غيرتها ..

سعد ــ الدولاب داخل بالغرفة ..خذ اللي تبيه ..والحمام في الغرفة خذ شاور سريع لو تبي ..

تقريبا ..مامكنت مركز ..تسبحت ولبست ثوب من ثياب سعد اللي كانت واسعه علي شوي ..رغد ..نسيت رغد الحين تكون صحت ..طالعت الساعة احدعش ونص الظهر ..طلعت ورقة عليها رقم دكتورها ...وقال انها ماصحت لين الحين ..شيكت جوالي ...اووف الظاهر سمير قالب الدنيا علي ..واحد وثلاثين مس كول ..والرسائل عشرة ..ومثل ماتوقعت تقريبا كلها من سمير و من جاسم ومنال ..

اتصلت في سمير ــ ألو السلام عليكم ..

سمير ــ وعليكم السلام يابيه ..قلقتنا عليك ..

ــ كنت نايم ..وتلفوني بمكان ثاني ..شصار لكم في المكتب ؟؟

سمير ــ استاذ آنسة ليال تكفلت تقريبا بالمواعيد والقضايا ..وأنا أجلت الكبيرة ليوم ثاني ..أنت فين أستاذ في البيت ؟؟

ـــ لا ..مب في البيت ...في ...الشــ...الشاليه ..ما بحضر اليوم ..تكفل انت وليال بكل شي ..

سمير ــ حاضر يا أستاذ ...

اتصلت في جاسم ومنال وقلت لهم اني بره البيت مع منال ..

طلعت الصالة وكان سعد يصب لنفسه كاسة جاي ,,

سعد ـ ها تذكرت شصار أمس .؟

شصار أمس؟؟؟

ــ كنت في ديوانية خالد ..وسهرنا بس ما أذكر شي ثاني ...

سعد ــ أصب لك جاي ؟؟

ــ ياليت يمكن يروح هالصداع الغريب ..

سعد ــ هالصداع من السجاير اللي كنت تدخنها أمس..

ـــ عمر السجاير ماسببت لي صداع ,,

سعد ــ شكلك ماتذكر شي بالمرة ..

ــ أذكر ايش؟؟؟؟

سعد ــ اللي شربته أمس كان حشيش ..

عقد حواجبي ..وغمضت عيوني ..الحين فهمت سبب هالصداع ..

ــ بس كانت سجاير عاديه ..ماكنت ملفوفة ..

سعد ــ لا ..كانت ملفوفة ..بس انت كان مخك في مكان ثاني ..والحمدالله ان خالد وسلمان كانوا تقريبا مغمى عليهم من السكر وإلا ..

ــ وإلا ايش ؟؟

سعد ــ سمعوا قصة حياتك ..

حسيت أن الدنيا لفت فيني ..قصة حياتي .؟؟ معقولة وصلت لدرجة اللي انسى نفسي وأنا أتكلم ؟؟ حسيت أن درجة حرارتي ارتفعت ..وأن الاحراج متغلغل في دمي ..

سعد ــ لاتخاف يوسف ..محد سمعك ..البشوات كانوا نايمين وأنا أول ماشفتك بديت تفقد السيطرة يبتك هنا ..هي للحين في المستشفى ؟؟

كانت هالجملة هي اللي قصمت ظهري ..يعني قلت كل شي..ما أدري ليش ما قدرت أمسك نفسي وأمسك دموعي..

ــ شقلت بالضبط يا سعد ؟؟

سعد ــ قلت لي عن وحده اسمها جواهر ..وعن وحده اسمها رغد..وأنها في المستشفى الحين ..

ــ بس ؟

سعد ــ تقريبا ..تتكلم شلون فالح أخوك تزوجها ..مين انت ماحددت ..ورغد شلون قهرتك وشلون بتنتقم منها ..وآخر اسم ذكرته كان ليلى ..ليلى مخطوبة لمين ؟؟ تقريبا ..هذي كانت جملتك ..

سكت ..يالله ..يالله ....ياالله ..قمت من مكاني أدور سيجاره . لاني لو تميت جذي بيصير فيني شي .سيجارة ..ولقيت علبة على طاولة جانبية ..طلعت سيجاره وولعتها وصرت أسحب النفس ورا الثاني ..القلق اللي فيني والاحراج والقهر...محتاج جرعة تهدئة ...


سعد ــ يوسف ..أنا دكتور ..وتعودت أني أسمع مشاكل الناس ..وأنا رفيجك من أيام الجامعة ..وكنت رفيج راشد ..الله يرحمه ..

حسيت أن الطعنات تتوجه لقلبي بدون توقف ..الطعنة ورا الثانية ..بلا هوادة مثل مايقولون ..

ـــ سعد ارحمني ...خليني انسى ..

سعد ــ ليش علشان تروح وتحشش مرة ثانية وتفضح نفسك؟؟

ــ سعد انا اللي فيني كافيني ..

سعد ــ يوسف ..تعال معاي العيادة ..

ــ لا ..

سعد ــ يوسف عيادتي مب بعيده في الشقة اللي تحت ..تعال ..

وتحركت رجولي مع اني احلف اني في هذيج اللحظة كنت خالي من كل طاقة ..تحركت رجولي بدون وعي مني..

وسكت ..واستلمني سعد ..

سعد ــ اوقف على الميزان ..

ووقفت ..

يتبع ,,,,
👇👇👇
أحدث أقدم