بداية الرواية

رواية اعترافات رجل -8

رواية اعترافات رجل - غرام

رواية اعترافات رجل -8

يعد ــ خمسة وسبعين كيلو بس؟؟
مارديت .بس انا في الفترة اللي راحتت غيرت ملابسي لانها صارت وسيعة ..
تأكد من طولي ...
سعد ــ طول نفس ماهو...مية وثمانين سم ..ماكان وزنك تسعين ؟؟؟
هزيت راسي ــ كان ...
سعد ــ الحين في كم شهر خسرت خمس طعش كيلو ؟؟ مسوي ريجيم؟
هزيت راسي بلا ..
سعد ــ الحين يوم كنت مع الصبي وتاكل وجبتين في اليوم كان وزنك تسعين .ولما تزوجت ضعفت؟؟؟ عكس الناس ؟؟
ــ لا والله المسكينه كانت تطبخ ...بس أنا شهيتي قلت ..
سعد ــ عطني اصبعك اشوف السكري عندك ...
ــ آي ...
سعد ــ ابي دم ..فغزيتك بالابرة ..
ــ استأذن أول مرة ثانية ...
انتظر لحظات..
سعد ــ طبيعي ..اشوف الضغط ..
لحظات ..ــ منخفض شوي ..
ـــ سعد ..لازم تطلع فيني علة؟؟
سعد ــ لا ..مو القصد ..بس ..أبي أتأكد ..في أعراض معينة تحس فيها....
ــ أحس بالذنب ..والفشيلة منك ..
سعد ــ لا ..هذي أعراض الشياب ..عند لك خبر مزعج ..انضميت رسميا لنادي المسنين ..
ــ والله احس عمري كبرت عشرين سنة زيادة ..
سعد ــ بس ؟؟
ابتسمت ...
سعد ــ تكلم ..ليش رغد سوت جي في عمرها؟
ــ قبل لا اطلع من البيت قلت لها كلام جارح ..وكنت كل ما ياتني فرصة ما اقصر معاها بالاهانات ..يمكن ..ملت ..وتعبت من الذل ..فيأست ببساطة ..
سعد ــ هي شينة؟؟ قبيحة؟؟
ــ أحلى مني ومنك...أحلى من ..ميرفت أمين..
طبعا قصدي كان مفهوم ..لكن سعد ..مافهم ..
سعد ــ حلوة ميرفت أمين ..أحلى منها؟؟...حلو ..
ــ لايروح مخك لبعيد ولاتتخيلها ..
ضحك سعد ..ــ تغار؟
مارديت لانه كان سؤال سخيف ..
ــ سخيف ..
سعد ــ شوف ..أنصحك ..أنك تراعي الله في هالبنت ..دام ظروفها خلت راشد يتوسط لك علشان تتزوجها ..
حاولت اكتم ضحكة ..هيووووووووج في قلبي لكني ماقدرت..
ـــ هههههههههههههههههههههههههههههه ..هيهيهي هوهوهوهو هاهاهاهاعهاختف بخ...هههههههو,,,
سعد ــ شفيك؟؟؟
ـــ ههههههه ..الله يقطع ابليسك خرعتني ..مافي شي ..
قمت من مكاني وفجأة كل الهم انزاح عني ..كنت متضايق من نفسي اني قلت لسعد كل شي ..بس الحمدالله ...طلعت متوهم ..واللي قلته لسعد شي بسيط ..
ــ امانة سعد ..الكلام اللي صار خله بيني وبينك ..لانه يخرب بيوت ..وأنا ما ابي أخرب بيوت ..
سعد ــ أي كلام..
ــ اي جي تعجبني ...عن اذنك الحين ..
سعد ــ بس أمانه يوسف ..ليش ضحكت؟؟؟
ـــ تذكرت شي ..وضحكت عليه شي ما ينقال ..
سعد ــ عجيب كل هالضحك من ذكرى ..
ــ لا..من وردة الجزائرية ...
طلعت من عند سعد وأنا أحس براحة ..لان اللحظات اللي راحو كانت قاسية علي ..قاسية ...
للمستشفى ..وكانت رغد صاحية ..
ــ حمدالله على السلامة ..
كانت نظراتها ضايعه ..وماتطالع لمكان محدد ..ويهها شاحب ..هزت راسها اي كلام ..وحسيت الدمعة تلالي في عيونها ..كرهت نفسي ...لها الدرجة؟؟ شلون تحولت بليلة وحدة لهالألم ..الألم اللي احسه بأنفاسها ..
اختلى فيني الطبيب ..ونصحني بعلاج نفسي لها ..بالأحرى مصحة نفسية ..لكني أكدت له انها ما تحتاج ..
رخصها الطبيب ..خذتها للبيت ..وهي سرحانة ..حاولت الطف الجو ..
ــ شتبين تتغدين؟؟
امحق تلطيف جو ..المصيبة انها ماردت ..حاولت ارقع ..
ــ خوفتيني عليج ..الحمدالله انج قمتي بالسلامة.
ماردت ...ـــ رغد ..الطبيب قال لازم ادخلج مصحة ..بس ان عندي احساس انج بتكونين بخير ..
للحظة ماصدقت نفسي لما نطقت بالكلام هذا ..احساس بخير؟؟؟كلمات نكرة ..ضربوا موقع حساس في كرامتي ..
اخير لي أسكت ..ما اقدر اخليها في البيت بروحها وان خذيتها لاختي تكثر الاسئلة ..المصيبة ..اني ما اشوف اهلها وايد ..مايزورونها ولايتصلون فيها ..ولاهي تطلب مني اني آخذها لهم ..بتصل بعد شوي بصالح ..بشوف صرفة ..
وصلتها لين غرفتها ونزلت تحت ..واتصلت في صالح .
ــ السلام عليكم بالنسيب اللي لايزور ولايسأل ..
صالح ــ مين؟؟ يوسف ؟؟ اسكت اسكت .انا على الاقل ما اقول لهل مرتي اني ما احب الزيارات ..
ــ ومن الجريء اللي يقول جذي ؟؟
صالح ـ انت ..رغد قالت لي انك ماتحب الزيارات ولا العيال ولاالضيوف ..وماعندك وقت حتى تسير ..وياي تشره علينا؟؟
كانت صدمة عنيفة لي ..
ــ بس ..لحظة انا بيتي مفتوح لكل الضيوف وعيال اخواني مسوينه منتزه ..يات عليكم؟؟ لالا ..شكلي بطلق اختك لانها ترووج عني اشاعات غير صحيحة ..
صالح ــ والناس يطلقون حريمهم علشان جذي؟؟
ــ لا ..هالاشاعة خطيرة ..انا من سلالة حاتم الطائي ..ما ارضى ....
صالح ــ عيل بزورك اليوم انا واختي سلوى ..
ـــ ياليت ..خصوصا ان رغد صار معاها حادث بسيط في المطبخ ..
صالح ــ عسى ما تأذت ..
ــ انجرحت يدها ..توني رجعت من المستشفى ..يالله مر علينا انت والاهل ..وأنا عازمكم على العشا ..
صالح ــ نيي انشاءالله ..مع السلامة الحين..
ليش رغد منعت اهلها من زيارتها؟؟ معقول؟؟ يعني ماتبي تثقل علي؟؟
لااراديا دقيت على منال ..
ــ منول هالو..
منال ــ اييه ..
ــ شفيج؟؟
منال ــ من كنا صغار كل ماتقول لي هلو معناها تبي شي مني ..
ضحكت ..وصج كنت ابي شي منها ..
ــ اي والله ابي شي منج ..
منال ــ آمر ماتغلى عليك عيوني,,
ــ تسلم عيونج بس ما ابيهم ..بس ابي طباخج وخدامتج اعيريهم لي ..اليوم عازم اهل رغد ..وما ابيها تشتغل ..
منال ــ قلنا لك ليش بالش حرمتك بالشغل بس ماسمعت منا ..بس زين انك عزمتهم ..لانه فشيله ماتعزم الناس وهم نسايبك ..بطرشهم لك ..و بتفاهم مع الطباخ شيطبخ حق العزومة ..لانه مايفهم عربي ولاانجليزي ..بس انت ذقت طباخه ..
ـ ذقته ..ممتاز ..
منال ــ وهذا اللي مصبرنا ..المهم ..شتبي لحم ولا دياي؟؟
ـــ الاثنين ..
منال ــ تبي شوربات وسلطات وحلو؟؟
ـــ يستحسن ..
منال ــ وين رغد ..
ـــ الحين فوق مدري وين ..ابيه كله على ذوقج رغد مب خبرة مثلج ..
منال ــ كم عدد المعزومين ؟؟
ـــ خليها عزومة حق سبع اشخاص ..وشخص زيادة ..
منال ـ انشاءالله الحين اتفاهم مع الخدامة تشرح للطباخ بعدين ارتب كل شي وأطرشه لك ..
منال خبرة في ترتيب العزومات ..وياما بيضت ويههي قدام ربعي ..
طلعت فوق لعند رغد ..اللي كانت جالسة على سريرها ..
ـــ رغد ..الليلة هلج بيزورونا ..وزعلت منج انج قلتي لهم اني ما احب الزيارات بس ما بنتفاهم الحين بعدين لما تقومين بالسلامة ..قلت لهم انج جحرحت يدج في المطبخ ..
قامت رغد من السرير ..
ـــ وين رايحة؟؟
رغد ــ اسوي العشا ..
ــ استريحي ..تدبرت هالشي ..انتي استريحي في سريرج ..وبس ..
اسكتت ..ماقالت شي ..مامنعت يدي من ان تمسك شعرها ووامسح عليه .شعرها ..اكثر شي يجذبني فيها ..لونه ..ريحته ..نعومته ..شيء لايقاوم ..
انتبهت لدموعها ..فقلت ــ رغد ما ابي دموع ..حياتنا مرة بما فيه الكفاية علشان نضيف لها طعم دموعج ..خلاص ..الليلة ما ابي دموع ..ولثمت راسها ..وطلعت من عندها ..

خلال ساعة وصل طباخ وخدامة منال . الخدامة رتبت البيت والطباخ اهتم بالأكل ..جلست أسترخي في ساعة مع نفسي ...
فكرت بكل اللي صار ..وحسيت أني بديت افقد مبادئي ..وكرامتي ..شلون سمحت لنفسي بتدخين الحشيش ؟؟ شلون وسخت اسم عائلتي بالزواج من رغد .؟؟؟شلون رضخت للأمر ؟؟ كنت خايف من الفضيحة ..لكن الفضيحة ياتني من طريق ثاني ..شغلي ..رغم اني غبت يوم ..بس أحس أني من زمن ماأخلصت فيه ..رغد ..شسوي فيج الحين؟؟ أحس انج مثل الهم الثقيل ..اللي ماله حل ...أطلقج؟؟ زواجنا عمره شهور قليلة ..وللحين ما انتقمت منج مثل ما تستحقين ..توقعتج قوية ..لكنج انهرت ..والحين ؟؟ ..من زمان ما شفت التلفزيون ولا الأخبار ..أقوم ..اروح غرفتي واريح ..بلا هم بلا نكد ..
ما أدري ليش ريولي خذتني لين غرفة رغد ..ووصلني صوتها ...
(( رجعت لك ياورق أشكي لك مجروح ..
كتمت فيك أسراري لما انحرمت البوح ...
وخنقت كل آهات و صرخات قلبي المذبوح...
أعشقه أعشقه ولا لي في هواه إلا الجروح ..
حبيبي الغالي قلبه القاسي ترك قلبي ينوح ..
اغفر لي ارحمني أنا الغلطان ومنك السموح ...
بس ياليت تحن علي بنظرة ترد فيني الروح ...
أرجوك يا كاتم أسراري ..يادفتري المفتوح ....
وصل له حبي واعتذاري مع حمام الدوح ..))
غليت من داخل وأنا أسمع كلامها ..كل هذا لراشد؟؟ للحين ما تبتي؟؟؟يمكن علشان جي حاولت تنتحر؟؟؟ زين يا رغد ..اصبري علي ...ما أدري شلون مرت علي اللحظات والساعات ..وأقبل المسا ..طلعت من الغرفة وأنا كاشخ ..بأي لحظة يدخل صالح وأهله ..قصدي أهل رغد...
مرت علي الدقايق سريعة ..ولبست قناع السعادة ...لما دخل صالح وثلاث أفراد من عائلته محمد وحامد وعبدالله..وأخته سلوى ..سلوى الاخت الصغرى لرغد ..تماثل رغد في الجمال ...والرقة والنعومة ..وخجولة جدا لدرجة انها ما ترفع عينها في عيون القاعدين..
صالح ــ يوسف ..شخبار المكتب ؟؟
تذكرت المكتب ..اليوم أنا ما كلمت سمير ولا ليال ..صح ليال ..مخطوبة لمين؟؟
صالح ــ يوسف ...
ـــ تذكرت الحين اني ما اتصلت في المكتب اليوم ..بس الأمور ممتازة ..
صالح ـــ من حسن الحظ ان بكرة اجازة...
صحيح بكرة اجازة ما أدري شلون فقدت الاحساس بالأيام ..
ـ بشوف رغد ليش ما نزلت ..عن اذنكم ..
صعدت فوق ..ماطقيت الباب ..دخلت على طول وكانت رغد في أبهى طلة ...كانت جميلة لدرجة الجنون ..حسيت أن كل ذرة في جسمي انتفضت ..
ــــ هلج هنا ..
رغد ــ الحين انزل ..
تصريفه ...يعني روح وأنا أيي وراك ..لكن ..الاهبل اللي هو أنا ما تحرك خطوة ..وحطيت نفسي في موقف سخيف ...
رغد ــ نعم يوسف بغيت شي؟؟
تنهدت مثل الغبي وأنا أقول ــ لا ,,,\
وأطلع من الغرفة وانا مبهور ,,,اتذكر عيونها العسلية وشعرها اللي سدلته على ظهرها ولا البدلة اللي لابستها ..يمكن هالشي هو اللي مصبرني عليج يارغد ..انج قطعة ..قطعة فريدة بجمالها ...
ـــ تأخرت عليكم ..
صالح ــ كنا نسولف عن بيت محمد ...
سلوى ــ أستاذ يوسف ..شرايك في أجار البيوت هاليومين؟؟
ـــ ماشي حاله ..بس المكسب مب قوي ..لان البيت عمره محدود والمؤجرين بيستهلكون كل الخدمات اللي فيه ..فيضطر المؤجر بعدين يدفع الدبل علشان الصيانة ..
محمد ــ بس أنا صرفت وايد على البيت ..البنيان والتشطيب ديلوكس ..أبي على الاقل أستفيد منه ..أو على الأقل أدبر فلوس التأثيث ..
صالح ــ وين رغد؟؟
ــ الحين بتنزل ..
سلوى ــ فيه مانع أروح لها ؟؟
ـــ الحين تنزل ..بأي لحظة ..
ونزلت ...من زمان ماشفتها بطلة حلوة ...
ارسمت قناع السعادة وبسمة الفرح على ويهها ..واستقبلت اخوانها بالأحضان ...
سلوى ــ معقولة ما أشوفج من شهر ونص؟؟
رغد ــ عاد الظرووف ..
صالح ــ يوسف لها الدرجة خليتها تكرهنا ؟؟
ــ أنا مالي شغل ..الصلاحيات بيدها ...وأنا الفترة اللي راحت انشغلت بقضية ...
رغد ــ أخواني اعذروني ..بس هالفترة كنت محتاجه أتعود على الجو ..
صالح ــ حشى ..وحنا بنخرب عليج المود؟؟
ضحكت وضحكت رغد ..ضحكة مصطنعة ..
وبدت السوالف ..والتمثيل ..وناقشوا مسألة تأجير محمد لبيته ..وكان راي رغد من رايي ...انها مجرد خسارة في معظم الاوقات ..خاصة اذا بيسكن البيت في المستقبل ..
لحظات وقال عبدالله ـــ تدرون أن بو علي ذبح بنته سمية؟؟ صايدينها تكلم واحد ..
محمد ــ تستاهل الذبح وأكثر ..
صالح ــ لا إاله إلا الله ..حرام عليه ...
حامد ــ اذا البنت صايعة تستاهل الذبح ..
طبعا ما بوصف الألوان اللي غزت وجهه رغد ..وخلتها ساكنة وجامدة ..وسلوى تقريبا انلدغت من نفس السالفة ..
ــ أنا أشوف أنه تسرع بهالشي ..
محمد ــ يوسف ..شقصدك؟؟؟
ـــ أنا أقول دام كان في امكانية انه يزوج البنت ..لهاالشاب ..ما ستر عليها بدل الذبح ؟؟ خصوصا ان الامر ما تعدى مكالمات هاتفية ..
محمد ــ لا يوسف ..اللي سواه هو الصح ..البنت ما انذبحت إلا وراها شي جايد ..
ـــ لا تحط في ذمتك..يمكن تكون أشرف مني ومنك ..بس القدر ظلمها ..لاتحط في ذمتك ..والله يرحمها ..
طالعت رغد اللي حسيت انها ارتاحت من كلامي ..وتطالعني بنظرة ما فهمتها هل كانت امتنان ام استخفاف ؟؟ انا يتهيأ لي انها نظرة استخفاف ..لاني انا نفسي لو طليت في المنظرة كان نظرت لنفسي هالنظرة ..وين الرجولة؟؟ وين الكرامة؟؟؟
مرت الامسية على خير ..والعشا كان أفضل مايكون..
سلوى ـــ كل عام وأنت بخير ..
رغد ــ وأنت بخير تسلمين لي ..
ودعوا بعض عند الباب ...التفت لرغد بعد ما راحوا ..
ــ ليش باركت لج؟؟
رغد ــ أمس كان عيد ميلادي ...
طلعت رغد فوق ..تذكررت ..منال من اسبوع قالت لي شي عن هالموضوع ..وأمس كان عيد ميلادها وانا نزلت فيها اهانات ...يمكن علشان هالسبب حاولت تنتحر؟؟؟
هالويك ايند كان متعب جدا ...يوم كان مع محمد ومريم ويوم مع منال و جاسم ...
من الصبح توجهت للمكتب وأنا مستعجل ..أبي أسأل ليال ..من سعيد الحظ؟ ..بس ..
ــ صباح الخير سمير ..
سمير ــ صباح الخير استاذ ..
ــ سمير أجندة اليوم مع آنسة ليال أبيهم في مكتبي ..
سمير ــ سبقوك يا أستاذ ..وهما داخل دلوقت ..
دخلت وكانت جالسة على الكرسي بكل هدوء ,,,
ـــ السلام عليكم ..
ليال ـ وعليكم ..
ــ شلونج اليوم؟
ليال ــ الحمدالله ..أستاذ لازم نروح المحكمة اليوم ..
ــ في أي قضية؟؟
ليال ـ قضية سالم عامر ..أنا حضرت كل شي المرافعة والاوراق الرسمية ,,
ـــ آنسة ليال ,, أنا في هالقضية خلصت كل شي ..بس باقي اني أوقف قدام القاضي وأطلعه براءة,, بس ما عندي مانع انج تطلعيني على مرافعتج..
وأعطتني ملف في يدها ..ألقيت نظرة سريعة عليه ...#
بعد لحظات ــ آنسة ليال ... ما اشتغلتي بضمير ..
ليال ـ استاذ طول الليل وأنا أكتب فيها ,,,
عقدت حواجبي ــ الليل ؟؟ تدرين شلون بطلعه براءه؟؟ لان زميله في الشغل هو اللي زور الورق ..وهالشي انا اكتشفته من اسبوع ..وخبير خطوط ساعدني ..ولا تتوقعين اني بسهر طول الليل علشان أبرئ موكلي بأفكاري بس ..هذا مب امتحان ...حطي الاجندة وتفضلي ..
كالعادة ..طلعت ليال وأنا أحس انها معصبة ..
مسكت الاجندة وبديت شغلي ..
نسيت أني من الصبح كنت احاتي خطيب ليال المنتظر ..
كالعادة ..الشغل المتراكم يسبب الصداع ...بس بمجرد الانتهاء منه ..أنا بخير .اتصلت في موكلين تأخرت عليهم في الرد واعتذرت ..
مرت الساعات كأنها دقايق ..ومريت المحكمة .ومثل ما توقعت طلع موكلي براءه ...كان انجاز آخر يضاف لإنجازاتي ..
ـــ تفضل,,,
دخلت آنسة ليال للمكتب ..
ـــ نعم ؟؟
ليال ــاستاذ العقود الي طلبت مني اني اكتبها ..تفضل ..
ــ حطيها عندج ..ماقلتي لي من الخطيب؟؟
ابلعت ريقها ــ منافي خطيب تفركش كل شي استاذ ..
ـــ في ثلاثة أيام؟؟
ليال ــ مالنا نصيب استاذ ...عن اذنك..
ما ادري ليش فرحت ..لكني عبست وقلت ــ لحظة ..
ليال ــ نعم استاذ ..
ـــ جلسي بناقش صيغ العقود معاج .
ليال ــ بس اتاذ انا سويتها مثل ما كتبتها بالمسودة ,,ما ضفت شي لها علشان نناقشه ..
ــ آنسة ليال ..ما تبين تتعلمين شلون تصيغين العقود؟ انا صج خليتج انتي تكتبينهم ..بس لازم منج انتي انج تيين وتطلبين مني شرح لما فيها ..
ليال ــ واضحة مثل الشمس ..ما يحتاج شرح ..
ـــ أنا اللي يقول شاللي يحتاج واللي مانحتاج ..وكم مرة نبهتج اني رافض تسييرج للأمور ضد رغبتي ..تفضلي اجلسي ..وباشرح لج سواء كنت محتاجة ولا لأ..
وجلست قدامي وخلال ساعة شرحت البنود وشلون تصيغها وعلى أي أساس ونوع القضية وأهم شي ماتتعرض للخداع ..و..و..و..الخ...
وكانت مبهورة بهالدرس ..ورغبتها انها تعرف اكثر فهمت منها انها ماكانت تعرف شي عن هالدرس سوى الاشياء السطحية ..
التقت عيونا أكثر من مرة ومرت علينا لحظة صمت أكثر من مرة ..بس ..حسيت بانجذاب ناحية ليال ..أو غموض ..شي ..غامض فيها يجذبني ...ايش بالضبط ؟؟ هذا الشي اللي كنت جاهله ..
ليال ــ شكرا استاذ ..
ــ تفضلي لمكتبج ..وأبي منج حل الواجب ..
ابتسمت ابتسامة مشرقة وهي تقول ــ حاضر استاذ ..
ركبت سيارتي و رجعت البيت ..بعد يوم حافل ..كنت من التعب اني نسيت الجوع ..ودخلت غرفتي ومددت جسمي ونمت .
فتحت عيوني ..وكانت الساعة سبع ونص بالليل ..و وقرصني الجوع بقوة ..تقريبا أنا صايم اليوم ..ما تريقت رحت بدون ريوق ..وماحسيت بشهية ..فماذقت شي أبد ..
طلعت ومريت المطبخ وأكلت كل شي لقيته قدامي ..
رغد ــ يوسف ..
ــ نعم ..
ماكنت شايفها من امس ..
رغد ــ يوسف ..أحط لك الغدا ؟
ــ لا ..أكلت ..
رغد ـــ يوسف ..صار لي شهرين ..أبي اقولك ..شي .بس ما قدرت ..
ـــ شي مثل ايش تبين خدامة؟؟
يتبع ,,,,
👇👇👇
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -