رواية مهلا ياقدر -11


رواية مهلا ياقدر -11

رواية مهلا ياقدر -11

موظفه مع مايا بشركة الا ا نها عايشة حياتها وماتحب النكد .. واذا فيه حكاية حزينة تقوم توقف وتقول:ازا فيه بكا ودموع ماراح اجلس ..

رجعنا للبيت انا وخالتي مبسوطات بعد ماغيرنا جو واستانسنا .. وحصلنا جدتي نايمه .. والله اني انقهر اذا رحنا مكان وتركناها بالبيت بس المشكله هي ماتقدر على السهر ومومتعودة واذا اخذناها معانا خربطت علينا كل شوي تقول يلا نرجع تعبت ..!

قررنا نعزم جدتي بمطعم قريب تصميمه بيت عربي من البيوت السورية القديمة وأكلهم تقليدي .. فيه مجدرة وفيه كبه نية اللي جدتي تحبها وفيه شيش برك وانواع الشوربات والمشاوي .. بجد جدتي ماراح تنسى هذي السهرة ..
قلت لها : خلاص جدتي اذا حسيتي نفسك طفشانه خلي خالتي تجيبك هنا ..
: لك يابنتي كل مابروح مكان معك مابئدر ارجع له وانتي مش هون بيزكرني فيك ومابرتاح فيه
: يوووه خلاص ماراح اروح معاك لأي مكان حلو معاك عشان تقدرين تجين له اذا رحت
: هههههههههههههههه لا يابنتي مش الئصد .. بس انا مابحب اطلع الا معك .. بعدين انتي ياللي بتخلي المكان حلو
: لك تسلمي لي يااحلى جدة بالدنيا ههههههههههههه

واحنا راجعين لقينا شباب سعوديين حاولوا يتلزقون فينا ويكلمونا بس مالتفتنا لهم ..وانا ماتكلمت ولا طالعت فيهم ... بس اسمعهم يرمون علينا كلام ويبون يتعرفون .. ياشين بعض السعوديين اذا راحوا برا .. بجد وقاحه وقلت ادب ماقد شفتها ..
مافكونا من شرهم الين اتصلت خالتي سمر على زوجها اللي ارسل زميله لأنه كان مشغول مايقدر يجي .. وجا زميله وعرفنا على نفسه اسمه عبود .. بس طويل وعليه عضلات مو على قد اسمه ..ذكرني بابو عنتر وشجاعته ؟؟ اول ماشافوه حاسبوا وطلعوا وهو وصلنا للبيت ..


جلست عند جدتي ثلاثه اسابيع كل لحظة يتردد كلام مهند في راسي .. حتى نبرة صوته اللي باين انها تريقه كأني اسمعها بكل وقت ... والله ونجح بانتقامه .... نغص علي وناستي في سوريا ..وهو هناك مرتاح ....وانا اللي كنت بقهره وانغص عليه اجي انبسط هنا بالرغم انه معترض واخليه يموت قهر اني مااهتميت فيه ... بس صار العكس هو كلمني وهزأني ونغص علي وعاش حياته ..

بالرغم اني طفشانه عند جدتي الا اني ماابغى ارجع للسعودية لأن مو بس ذكرى مهند بتقعد في راسي الا بيصير طاريه وسيرته عندي باستمرار .. خالي كلمني كذا مرة عشان ارجع يقول ارجعي بس اترجاه اجلس شوية كمان الين جات الدراسه ورجعت غصب ..
استقبلني خالي سامي في المطار لأن خالي ناصر كان مشغول وماكان في جده بالمرة .. كنت مااتكلم كثير بالسيارة الا اذا سألني خالي سامي ارد .. آخر شي سألني فيني شي قلت له اني مرهقه وسهرانه ومانمت وأصلاً انا كذابه نايمه طول الليل ..الله يسامحني بس .. لولا اني ماابغى احد يحقق معاي ولا يشك ان سبب همي مهند كان ماكذبت بس ماابي مشاكل ووجع راس ..
كملنا طريقنا وانا ساكته ووصلنا البيت ... سلمت على هدى .. بجد مشتاقة لها ولعيالها اخذت ديوم الصغيرة وبوست فيها وحضنتها وجات ياسمين وحضنتني ونفس الشي أسامه بس بسام جلس يناظرني من بعيد .. ورحت عنده انا بنفسي وسلمت عليه وحضنته بقوة وشلته من على الأرض .. احب بسام كثير احبه لأنه صورة مصغرة من خالي حتى بعض حركاته تذكرني بخالي .. اخذتهم معاي عشان اعطيهم هداياهم كنت جايبة لهم ملابس وألعاب كثيرة .. وجبت لهدى بناطيل وبلايز وتنانير وصنادل الله يكرمكم وثلاثه فساتين روعه .. انا طول الفترة اللي كنت فيها بسوريا اشتري لنفسي اذا نزلت السوق مع خالتي .. بس لمن رحت اشتري لهم هدايا على آخر اربعه ايام كنت أي شي اشوفه حلو آخذه لهدى .. حتى خالتي فادية مااشتريت لها الا ثلاث بلايز وصنادل تناسبها زي هند وغادة .. وجبت لعيالهم العاب
.. جلست مع هدى وسولفت معاها قلت لها كيف قضيت الأيام هناك ... كلمتها عن بعض البنات اللي عرفتهن وخالتي سمر صاحبتها .. وعن دلال جدتي لي وعن الأشياء اللي ونستني هناك واللي ضايقتني ..
جيت بروح لغرفتي لأني لسه ماطلعت قال هدى : صحيح ترى مهند يبي زواجكم بدري .
: شو ..؟ حسيت بكلمة هدى كأنها شي طاح على راسي
: والله يقول بعد رمضان بس خالك قال استنى لين ديمه تجي وانه هو مو موافق عشان امتحاناتك ..
: والله مو بكيفه حتى الصيف الجاي ماني موافقه مو رمضان .. هه ماشاء الله عليه احلامه كبيرة هذا .
: اسكتي ياديمه خالك يقول مصر على الزواج بعد رمضان
: والله لو تقطعوني مارحت معاه .. واذا يبي يسوي زواجه خله يسويه بس بدوني انا .

رحت لغرفتي اخذت شور وبدلت لبست بيجامه واسعه بكم طويل وجلست افكر وحلفت من قلبي انه لايمكن اوافق ولا اخرج من بيت خالي بعد رمضان .. والله يستهبل هذا ..؟ هذا من اولها نكد علي .. الله يساعدني على الأيام الجاية ..

ماقدرت انام حاولت حاولت حاولت بس مافيه فايده .. بعدين نزلت تحت عند هدى لقيتها جالسه على التلفزيون وعندها شاهي ومكسرات وجلست معاها اشرب شاهي بعد ساعه دخل علينا خالي وحضني على طول وسلم علي وانا سلمت على راسه ويده مرة واحشني خالي .. ياربي احبه كثير ...هذا الانسان اهلي كلهم .. هذا اغلى شي في دنيتي عساني ماابكيه ..
جلس على الكنبه ولف يده من وراي وجلس يسولف معاي ويسألني فين رحت وكيف ايامي هناك انبسطت ولا لا ويسألني عن ناس يعرفهم من جيران جدتي ..
كان يسألني وانا ارد عليه باختصار من القهر اللي فيني من تصرفات مهند
ناظرت بخالي بعدين قلت : خالي الله يخليك بطلب منك طلب
: آمري من عندي اغلى منك ..؟
: الله يخليك لاتفتح معاي موضوع الزواج السنه هذي
طالع بهدى وتنفس بعمق قال : ممممممممم قالت لك هدى .. انا اصلاً ماني موافق وشلون بتختبرين وانتي عروس .. بعدين هذي ماجستير مو لعب اطفال .. بس زوجك متهور ومو في عقله ..
حسيت صوتي مخنوق قلت : خالي لاتقول لي شي بخصوص هالموضوع .
انتبه خالي اني راح ابكي قال : ولا يهمك نغلق الكلام في هذا الموضوع طول السنه وانا مالي دخل .. تفاهمي انتي وياه بعدين تعالوا قولوا لي
نزلت دموعي غصب وقلت : اذا بدت الاجازة الصيفيه الجاية يصير خير لكن قبلها مستحيل
قفلنا الموضوع بالمرة بعد ماهداني خالي وغير السالفه ...
بعد يومين قالت لي هدى ان خالي كلم مهند اني رافضه حتى الكلام بالموضوع هذا .. وان مهند زعل وعصب قال انه بيسوي زواجه بداية الصيف رضيت ولا مارضيت ..
ضحكت عليه وانا احسه معصب خله يذوق شي من اللي اذوق اذا قال لي شي ..
مر علينا الترم كله وانا ماارد على اتصالاته ابداً ولا رديت على أي رقم غريب خايفه يطلع هو .. واذا رديت على ريم مااتكلم الا اذا ريم قالت الو ارد ... واذا ماتكلمت اقفل لأنه مرة كلمني من جوالها وقفلت على طول ماخليته يتكلم وقفلت جوالي يومين ..
ادري اني المفروض مااسوي كذا بس هو اللي اجبرني .. مااقدر بصراحه اعيش بقهر وابكي بعد كلمتين منه يهيني ويذكرني انه مايبغاني بس خطبني عشان يكسر راسي لأني رفضته .
كنت مطمنه طول الترم لأن مستواي حلو من الاختبارات الدوريه اللي كلها فل مارك الحمد لله ....

جا رمضان وزارونا اهل مهند ثلاث مرات وافطروا عندنا كانت امه بلسم لعمايله معاي .. تحبني وتدعي لي .. لدرجة ان ريم تقول والله ياديمه انها صارت تدعي لك اكثر من مني انا وسميرة ومهند خاصة بعد ماعرفت انك ماخليتيه ياخذ بيت مستقل اللي اغلب البنات يطلبونه ..
وانا ضحكت ودعيت لها وقلت ماابغى احرمها من ولدها اللي تحبه لو يوم واحد ... الله يقدرني وارد لام مهند معالمتها الطيبة بجد تحرجني من كثر ماتعالمني زين وانا واثقة انها بتعاملني احسن من كذا اذا جيتها ....
عزمونا مرتين وخالي وهدى راحوا لهم وانا اعتذرت بالدراسه والاختبارات ومرة عزمونا في العشر الأواخر بعد الاجازة بس تحججت ان لمى بتجيني وقلت للمى غصب عنها تجي تفطر عندي عشان خالي مايشك ....وجات عندي من العصر .. هذي لمى صديقة عمري من يوم عرفتها مااحتجت لها وخذلتني .. حتى بعد ماتزوجت عسى الله لايفرق بيننا .. !
قضينا العيد في بيت جدتي الله يرحمها بالطايف زي كل سنه .. انا الوحيده اللي عيدي كان نكد وحزن لأن هذا اول عيد لي وابوي مو فيه .. كان كل عيد يجي لبيت جدتي يعيد علينا ويعطيني الف ريال عيديه .. وياخذني عصر اليوم الثاني انا واخواني للملاهي ونتمشى ونتعشى برا مانرجع الا آخر الليل ينزلني ببيت جدتي ويروح هو واخواني لبيته .. الله يرحمك يبه اشتاقلك وللحين مو مصدقه اني ماراح اشوفك .. احس اني بصحى يوم من الأيام والاقيه جاي يسلم علي .. استغفر الله العظيم ....
رحت اليوم الثاني لبيت عمتي صالحه وانا اصلاً عيدت عليها امس بس اليوم جيت آخذ اخواني نروح نتمشى زي ماعودهم ابوي الله يرحمه .. رحنا حديقة الملك فهد وجلست مع منار اللي اخذتها معاي هي واختها اماني ورحنا مع سواقهم.. وانبسطوا ولعبوا ومنار لعبت مع عادل وسديم واختها هديل لكن انا ماتحركت من مكاني الا اذا بغيت اجيب لي شي اشربه .. كان عناد يلعب بألعاب الكترونية بعدين جا وجلس معاي وهو متضايق من منار ولعبها كأنها طفلة وفيه شباب يطالعون فيها أخيراً قال نزليها بنمشي ولا نزلتها انا .. اشرت لمنار وجات على طول لأنها تضايقت من الشباب وجلست معانا بعد ماقام عناد .. ياقلبي ياعناد مسوي نفسه رجال كبير ولو انه توه دخل 16 بس يارب اشوفه احسن الناس وكبره بقدره وقيمته بين الناس وعندك يارب ...
قضينا اربعه ايام بالطايف وكان اللي يميز العيد هذا خالي محمد واهله اللي قضوه معانا ..
كانت جلساتنا مع بعض حلوة وزوجات اخوالي كأنهن اخوات .. ومافيه بينهن مشاكل ولا غيرة ولله الحمد .. خاصة ان خالتي فادية ماتسمح بأي مشكلة بينا بأوامر من خالي ناصر من اول ماتزوجوا اخوالي .. وكانت ام رامي زوجة خالي محمد بمثابة ام الجميع هنا .. حنونة وطيبه وخالي كمان فيه طيبة خيالية وحنون على عياله وعلى اخوانه وعلينا كلنا
لمن سلمت عليه قال لي والله ياديمه اني زعلت لمن رفضتي رامي بس يوم قال ناصر ديمه تقول مافيه اخت تتزوج اخوها اني حبيتك اكثر واعتبرتك مثل عيالي وأعز
سلمت على راسه وقلت : انت بمكانة ابوي الله يطول بعمرك ,, وجلس يسولف لي عن رامي والشروط اللي لازم تكون في البنت اللي يبيها اهم شي تكون ملتزمه لأنه ماشاء الله عليه ملتزوم وحافظ القرآن . ماعلقت الا بــ :عسى الله يوفقه ويسعده ويرزقه باللي تستاهله .

مرت الأربع ايام حلوة بس عدم وجود ابوي الله يرحمه هو اللي مضايقني ..
جات الاختبارت وكانت نتايجي عال الحمد لله .. كان عندي ست مواد كلها جبت فيها اعلى من 97 ماعدا مادة وحده اخذت فيها 94 بس راضية الحمد لله ..

كملت اختباراتي الدوريه والحمد لله كلها فل مارك
انشغلت اسبوعين وانا من اول مااجي ابدا اكتب الين الساعه 9 انزل اتعشى بعدين اطلع اذاكر شوية وأراجع ثم انام ..
كان يوم اربعاء جيت من الجامعه تعبانه ووراي جهد وكتابة لقيت هدى بالمطبخ سلمت عليها وسألتها
: شو ..؟ تشتغلين ياهدوو .؟ احد بيجي ..؟
اخذت لها ملعقه وقعدت تذوق الحلى اللي سوته الشغاله وحطته بالثلاجه وهي تقول: ام مهند اتصلت تقول بتجي .. وطالعت فيني قالت مهند اعطى خالك المهر عارفه
قلت بلا مبالاة : لا ماقالي
راحت تغسل يدينها وقالت: اصلاً ماعاد احد يشوفك عشان يقولك شي
نزلت راسي بقهر وضيق قلت لها : الله يعين خلاص هانت
ناظرتني هدى بحزن قالت : أي هانت ياديمه وانتي بتخلصين دراسه من هنا وتتزوجين من هنا .. تدرين ماجلست معاك من زمان ..
لويت فمي وقلت : طيب هذولا لازم اقابلهم
: طبعا ديمه عيب ماتقابلينهم بعدين هي جاية عشانك تقول طالما انها ماتجيني في بيتي ولا اتدق عليّ بجيها انا
: الله يسعدها والله اني حبيتها بس الوقت وانا نفسي ماا..... سكت خفت اتهور واقول اللي بقلبي لهدى ثم اتورط .
: ما ايش ..؟ كملي ليه ساكته ..؟ مارديت عليها بعدين قالت : عموما ياديمه هي تحبك وباين انها طيبه ..
تنهت بعمق وانا اقول: آه بس يالاجازة ليتني اخلص من هنا واروح من هنا لجدتي
: ههههههههههههههههههههه لايكون بتشردين
سحبت كرسي وجلست عليه قلت بنفاد صبر: آه بس لو ماابغى افشل خالي كان اشرد
سمعت خالي يضحك من وراي وهو يقول : اخيراً لقيناك ياست ديمه
واخذني بيدي للصاله
جلست معاه وانا مسويه نفسي عادية مافيني شي
ناظرني بجدية : ايوه ليه بتشردين الحين اللي يشوفك يقول مهند بلوة بنحذفك عليه تراه انسان طيب لأبعد الحدود
مشوشة ياناس ماابي سيرته مااحب احد يكلمني عنه غمضت عيوني وهزيت راسي معترضه على كلام خالي بس ماتكلمت ...................
سمعت خالي يقول : تدرين انه اعطاني مهرك
فتحت عيوني وقلت : دريت من هدى الحين
: يعني خلاص لازم تنزلين السوق ماعندك وقت
: بنزل بكرة ان شاء الله انا وهدى
: خالتك ازعجتني تقول بنزل معاها
: جزاها الله خير خلها تنزل عني
: لا محد ينزل عنك كل اغراضك تشترينها على ذوقك فاهمه ..؟
: اوكي بس لاتعصب .. قلتها وانا ابتسم ابغى اهدي خالي .. بالرغم ان خالي حنون وبحياته مازعلني او ضربني او قسى علي بس اخاف اذا عصب ولا رفع صوته عليّ .. اصلاً اكره شي عندي انه يزعل او يعصب ..
تنفس بقوة كأنه يهدي نفسه لأنه معترض على كل تصرفاتي واحسه يجاريني بيشوف آخرتها معاي : طيب تراني حولت المبلغ لحسابك 100 الف
: شو ..؟ ليه 100 الف محد طلب منه هالمبلغ
رجع راسه على الكنب وطالع فوق قال : والله انا قلت خمسين وابوه حلف ان مهر ديمه 100 الف
: اهم شي مو بكرة يكون مديون وانا السبب
:هههههههههههههههههههههههههههه لا تطمني مهند راتبه كبير وابوه مبسوط .. وامس اخذ خمسين الف على عملية بسيطه اجراها لواحد بالمستشفى
مارديت على خالي واستأذنت منه بروح ابدل

دخلت غرفتي على طول وبدلت لبست بيجامه مريحه شورت وبدي واسع لونها سماوي ونمت .. وصحيت قبل المغرب .. بسرعه اخذت لي شور ورحت لبست تنورة سودا طويلة وبلوزة موف وداخل مهاها اللون الاسود بخطوط رفيعه على شكل دوائر وهي من الحرير وكانت واسعه وصدرها مفتوح .. حطيت مكياج خفيف وقلوس موف ولميت شعري ومسكته بشباصة بعد ماطلعت منه خصلت من ورى ونزلت خصلة كبيرة شوي من قدام جبتها على جنب ولفيتها من ورى اذني ..نزلت سلمت عليهم حصلت خالتي ام صالح ( ام هدى ) عندنا .. مع ام مهند اللي باين انها تحبني كثير وسلمت علي بحرارة واعتذرت منها لأني مقصرة مااكلمها ولاجيتها في بيتها قالت :يابنتي عارفين ظروفك ومهند يطمني عليك ويقول انك بخير بس الدروس شاغلتك ..
سكت بعد ماجابت سيرته كانت ريم معاها وجلست اسولف معاها عن الجامعه والبحث .. وهي تقول لي عن الروتين اللي هي عايشته و الملل والطفش بحياتها وأشرت عليها تدرس دورة حاسب آلي او تجميل منها تشغل وقتها بشي مفيد ومنها تكتسب دورات وتتعلم يمكن بكرة تتوظف فيها .. وأخذت ريم كلامي باهتمام وبعين الاعتبار قالت بتقول لابوها
بعدين قالت : ديمه جهزتي ولا لسه ترى ماباقي عن زواجكم شي
: خلاص من بكرة بنزل السوق
: الله يعينك ترى بتتعبين
: لاان شاء الله ماراح اتعب كلها كم مشوار واخلص خاصة اني منظمه
: ماشاء الله عليك اشوى مني .. انا اذا كنت بحضر زواج اجلس الف السوق اسبوعين عشان الاقي الفستان ثم الجزمه والاكسسوار اللي يمشي معاه .. اخلي كل اهل البيت يعانون هههههههه مو زواجي والله لاخذ خمسه شهور ماخلصت نص اغراضي
: هههههههههههه لا بعدين انزلي معاي اعلمك كيف تشترين
: اوكي ومنكم نستفيد ياحرم اخي المصون هههههههههه
ناظرتها بنظرة لو بكيفي قصيت لسانها بس هي مسكينه مالها ذنب في اللي يسويه اخوها ..

تعشت عندنا ام مهند واستانست مع خالتي ام صالح .. بالرغم انهن ماعرفن بعض الا عندنا بس صارن صاحبات ويزورن بعض باستمرار من يوم جوا اهل مهند لجده .. ام هدى اعتبرها بمكانة امي ولا جدتي .. تذكرني بجدتي الله يرحمها لأن كانت علاقتها فيها قوية ومن صغرهن صديقات ويحبن بعض كثير .. عشان كذا ارتاح لمن اشوفها احسني اشوف جدتي عايشة الله يرحمها ويعافي ام هدى ويخليها لعيالها ...
اما عند الرجال تعشى خالي مع ابو مهند وابو صالح ويوم جات الساعه 11 استاذنوا ابوصالح وابو مهند وراحوا بعد مانادوا على حريمهم ...

هالمرة مهند ماجا ولا سمعت سيرته بس على الساعه 11 سمعت ريم تكلمه :هلا مهند كيفك ..؟................ متى بترجع للبيت ..؟ ..................طيب قبل تروح للبيت مر عليّ عند ديمه لأني بسهر معاها ................ ايوه جالسة معاي ............ بخير بتكلمها ؟ ......... اوكي
التفتت لي قالت خذي مهند بيكلمك .. شو يكلمني صاحي هذا ولايبغاني افشله قدام الناس .. قلت لها بصوت واطي : مااقدر اكلمه الحين بعدين اكلمه .وتبسمت . وكملت :استحي منكم ..وأشرت عليها وعلى هدى اللي تناظر فيني متحمسة لردة فعلي لأنها تدري اني مااكلمه .. بس ريم اكيد ماتدري وتحسبه يكلمني ..
رجعت ريم تكلمه : مهند البنت مستحيه منا .. ماتبي تكلمك قدامنا هههههههههههه
قمت بسرعه وأخذت معاي صينية القهوة عشان اجيب غيرها والقهوة اصلاً جديدة بس ابغى اروح ماابغى احرجه او يحرجني وانا داخله المطبخ وامشي بشويش سمعتها تقول ..راحت والله مشغولة .. خلاص شوي اذا جيت ادخل سلم عليها وشوفها بالمرة عاد الليلة ديمه غير ماشاء الله عليها غير ........... ههههههههههههههه طيب باي

وصلت للمطبخ وانا افكر بهالورطه والهبلة ريم اللي خليتها تجلس وورطتني .. ليتني خليتها تروح مع امها ومالحيت عليها تسهر عندنا .. ياربي كيف مافكرت ان مهند يمكن يجي عشانها ..!
رجعت للبنات بعد ماقلت للشغالة تجدد القهوة وجلست وانا احس اني مرتبكة مو من مهند مرتبكة من ريم ماابغاها تعرف ان بيني وبين اخوها حركات وعناد وتحدي .. خاصة انها تحسب امورنا اوكي ومبسوطين شكله يوصل لهم اخباري على اني اكلمه ..
البنات يسولفون وديمه بعالمها افكر كيف افتك من هالورطه .. لقيتها الحمد لله بس عساها تزبط .
شفت هدى وريم يضحكن علي وريم تقول : اللي ماخذ عقلك للحين ماوصل تراه في الطريق ههههههههههههههه...
: ها ..؟ هههههههههههه تفكيرك ماادري كيف جاي
: تفكيري بمحله واذا غلطانه حطي عينك بعيني
: هههههههههههههه
قربت الساعه على ثلاث ودق جوال ريم وردت : هلا مهند .................. طيب بتدخل انت ؟ ............ اجل بنطلع لك في الحوش بعد نص ساعه ..........
سمعتها تقول نطلع وحسيت الأرض تلف فيني ..؟ من اللي نطلع لايكون تقصدني .. من جدها هذي .. قمت قبل لاتكمل واستاذنت اني بطلع فوق وارجع وطلعت لغرفتي .. بسرعه دخلت الحمام وأخذت شور وطلعت لبست بيجامه ولفيت المنشفة على شعري ونزلت مرة ثانيه عند ريم ..عادي خلها تشوفني كذا .. عاد شعري طويل وكثير ويبغا له ساعه اما اسشوره عشان ينشف ولا اخلي المنشفه عليه ساعه وعيب اترك ريم اكثر من كذا ..
تفاجأت ريم فيني قالت بزعل : يوه شو سويتي تبغين مهند يشوفك كذا ..؟
فتحت عيوني وسويت نفسي بريئة ياناس علمني حتى على التمثيل : ليه بيجي هو ..؟
قالت بقهر : شوف هذي ..؟ ماشفتيني كلمته ؟
هزيت اكتافي وانا بمنتهى البرائة قدامهم : ماانتبهت
: طبعا صعبة تقابلين حبيب القلب بالشكل هذا
: هههههههههههههههه طبعا صعب
: اجل بقوله انك ماتقدرين تشوفينه اليوم
مسكت الزرار اللي في بلوزتها قلت بتودد : ماتقصرين ريوم اخدمك في الأفراح والمناسبات الحرجه ان شاء الله هههههههههههه
ضحكت ريم وصدقت مسكينه ... قالت : تعالي .. ليه ماتدقين عليه وتعتذرين له بنفسك .
: لاوالله .. اش تبغيني اقول ... اقول آسفه لابسه بيجامه وشعري كله موية وماابغاك تشوفني بهذا الشكل
التفتت ريم على هدى وقالت : بالله ياهدى هذا شكل وحده مخطوبة وزواجها بعد شهر .. مو مهتمه لخطيبها ولا تسأل عنه او تجيب سيرته ...
ناظرت فيني هدى وكأنها تأكد على كلامها وابتسمت بعدين قالت : ديمه عاقلة مو خفيفه
ضحكت انا وقلت : شكراً يازوجة خالي العزيزة
ضحكنا كلنا ودق مهند على ريم وردت عليه : هلا مهند ............ يالله طالعه ......... ممممم لا لاتنزل ديمه بتنام الحين ومو مجهزة نفسها عشان تقابلك
ايوه قبل شوي كانت قمر وغير بس الحين حاست كل شي ومجهزة للنوم مو لك ............ ههههههههههه طيب الله يوفقكم . ........... خلاص جاية باي
لبست عبايتها وانا نفسي ادري اش قال لمن ضحكت .. بس ريم ماخلتني افكر كثير قالت : مهند يقول هانت كلها شهر .. وتقابلني 24 ساعه .
ماعلقت ولا حتى ابتسمت بس رحت بعيد ياربي اش قصده شهر واوريها على اللي تسويه ..؟ .. ولا شهر واربيها من جديد .. ؟ ولا شهر واصير على كيفي ؟ بأي وقت اشوفها وماعادت تتحجج بشي ...!
سمعت ريم تقول : هيه الأخت فين راحت
: هلا ريومه قلتي شي ..؟
: ادري حبيب القلب اخذك منا
: هههههههههههههه بغيتي شي
: كنت اقول مع السلامه وكلمينا .... ولا اقولك هاتي رقمك ..!
: اممممممم جوالي فوق استني دقيقه اجيبه لك .... كنت عارفه انها ماراح تستنى لأن مهند يدق عليها ويقفل
: فيه احد مو حافظ رقمه هذا وانتي مصرية تاكلين الكتب ... غطت شعرها وقالت ..: خلاص ديوم دقي علي اذا طلعتي لغرفتك ورقمي عند هدى خذيه منها
: ههههههههههههه اوكي ولا يهمك
خرجت ريم ورجعت لهدى اللي احس ان براسها مية الف سؤال بس تحترمني وماسألتني لأنها عارفة انها ماراح تاخذ مني أي كلمة
قلت لها تصبحين على خير وطلعت لغرفتي ورحت اكمل كتابة البحث حقي استنى الصلاة

صليت الفجر ونمت بعدها .. صحيت الساعه 2 الظهر ونزلت بعد ماصليت وبدلت ملابسي
حصلت بسام وياسمين جالسين على التلفزيون .. سلمت عليهم وحضنتهم قال بسام : ديمه انا احبك كثير زي ماما .. بس ازعل اذا بتروحين عند مهند
استغربت من كلام بسام قلت له: من قالك اني بروح عند مهند ..؟
: مهند سألني عنك قال تحبها قلت ايوه قال انا باخذها عندي
: مممممممم بروح عنده وبخليكم تجون عندي وأجي عندكم وووووووو ماكنت ادري ايش اقوله وغيرت الموضوع قلت : افطرتوا
: ايوه انا وياسمين صحينا بدري بس أسامه وديمه نوامين مايصحون بدري زينا
: بروح اصحيهم واصحي بابا وماما كمان
مريت على الشغالة قلت جهزي الغدا وطلعت فوق اصحي النايمين .. صحيت ديوم بدلع وأسامه جلست اضحكه وهو نايم واحاول اشيله واسوي اني مااقدر وانو قوي وهذا حلم اسامه انه يصير اقوى انسان بالدنيا .. صحوا وأخذت ديمه معاي ورحت لعند غرفة خالي وهدى .. دقيت الباب وسمعت صوت هدى باين انها صاحية ودخلت ديوم عليهم ورجعت ادري انها بتنط على خالي على طول وتزعجه ناديت على هدى قلت ان الغدا جاهز وانا مرة جيعانه واستناكم تحت ..
نزلت تحت ونزلوا بعدي بشوية كان خالي يشيل ديمه وينططها فوق وهي تضحك جلس بعد ماسلم وجلست هدى بجنبه وانا مقابله لهم
قال : اليوم بيوديك السواق انتي وهدى للسوق ..و التفت لهدى وكمل .. هدى تقول ان مافيه وقت ..
قلت : بنروح بس محتارة ابدا بأيش
تدخلت هدى : انا اقول اليوم نروح ندور على الفستان وأحسن تشترين جاهز لاتفصلين ماعاد يمديك وانت مو فاضيه كل شوي عند الخياطه


يتبع ,,,,
👇👇👇
أحدث أقدم