رواية مهلا ياقدر -12


رواية مهلا ياقدر -12

رواية مهلا ياقدر -12

:اذا قدرنا نلاقي فستان بسرعه بروح بوتيك ناريمان عندها موديلات قالت لي وحده من البنات وتصاميم عالمية روعه

: اوكي نروح نشوف مو خسرانين شي ..!
خالي وكأنه تذكر شي : الذهب .. انتظروا لاتشترونه الحين .. فادية تقول انها بتختار لك على ذوقها
ضحكت هدى وقالت : الله يعينك ياديمه الحين بتشتري لك من النوع الثقيل قلايد وحزام ليه لأن فادية تقول اهم شي في جهاز العروس الذهب ولازم يكون ثقيل وغالي مو شرط فخم وأنيق وناعم
خالي بكل جدية : وهي صادقه فادية .. بدال ماتحط فلوسها بالخرابيط تحطها بذهب اضمن واحسن
قلت وانا اضحك : خالي صاير تفكيرك مادي .. انا عني ماراح البس ذهب الا اذا كان شي ناعم وخفيف
قال خالي بجدية : حلو اشتري شي ناعم وخفيف واشتري شي ثقيل يمكن تحتاجينه بعدين لاقدر الله ..!
قلت وانا اأشر على عيوني وابتسم : ابشر ياخالي من عيوني الثنتين اللي تبيه يصير .....
تغدينا وجلسنا بالصالة وبعد العصر طلعت مع هدى للسوق مع السواق ... مادرت الا محلين او ثلاثه الا حصلت فستان روعه .. كان ابيض على فضي ناعم وبسيط جاي من فوق على الصدر ضيق وفيه علاقي كريستال من جهة وحدة يوصل للكتف من ورا .. والصدر فيه كريستال لامع وفصوص كبيرة شوي لامعه بقوة .. كان اللون الفضي خيالي .. ومن تحت كان التصميم ناعم بس القماش نفسه فخم وفيه كريستال اخف من اللي بالصدر وطويل من ورا شوية والطرحه كانت اروع شي بالفستان لونها فضي فيها اقراص كريستال دائرية كبيرة شويه ومتباعده عن بعض .. وهي طبقه وحدة من القماش طويلة لأسفل الفستان تتثبت على الراس وتنزل على الراس .. احسني مو قادرة اوصفها لأنها مبهرة بمعنى الكلمه .. بس مااعجبت خالتي فادية في البداية.. تقول كأنها شرشف صلاة مرصع بالكريستال .. بس بعد مالبست الفستان بالبيت والطرحة معاه اعجبها كثير ..!
رحت انا وهدى لبوتيك ناريمان كان خيالي وأخذنا تنانير وبلايز وبناطيل وبديهات بعدها رجعنا للبيت


يوم الجمعه ماقدرت انزل ولا باقي الاسبوع لأني ارجع من الجامعه لأني ارجع اذاكر وأكتب رسالتي اللي كان موضوعها " من المسئول عن اتزان الشخصية "
الاسبوع اللي بعده كانت خالتي عندنا .. طبعاً مايحتاج اقولكم انها وبختني كثير اني مانزلت السوق الا مرة وحده وان باقي لي اشياء كثير .. نزلت معاها الاربعاء واشترينا الذهب والله لايوريكم شالت لي كوم ذهب اربعه اطقم .. وقلاده كبيرة مالها أي داعي بس جاريتها لأن خالي يبغى كذا وحزام .. وكم خاتم على ذوق خالتي وأساور ناعمه وهادية اكثر شي عجبني هي ...!وكم سلسال ناعم كمان
رجعنا للبيت ويوم الخميس ماكنت ابغى اروح لأني طفشت من السوق وخالتي اصرت علي وعصبت وهددتني انها بتكلم خالي وتقول اني مستهترة وماعندي احساس ومو متحمسه لزواجي كأنه زواج بنت الجيران .. !عاد انا مو ناقصة وخالي ناصر من النوع اللي يدلعني صحيح بس اذا زودتها والله ليوريني ..
رحت مع خالتي واشتريت الجزم والشنط بالرغم ان كل اغراضي اللي عندي الحين جديده ومايحتاج اجيب جديد بس خالتي ماعندها عروس لازم كل شي جديد ..!
اشترينا كمان اكسسوارات وعبايات وطرح .. قالت باقي الفساتين واني مااخذت ملابس كفايه بس انا ماعاد فيني امشي بصراحه رجولي تكسرت .. وخالتي انفعلت وقالت
: اجل الله يعينك .. الاسبوع هذا ماني رايحه وراح ننزل كل يوم لأن الامتحانات على الأبواب وحضرتك اعرفك مابتنزلين ايام الاختبارات
قلت باستسلام : خلاص ولا يهمك الاسبوع هذا اكمل بس خلينا نرجع ..!
صرنا ننزل كل يوم اشتريت المكياج والعطورات وكريمات بدي ووجه وكمان اشتريت الملابس الداخلية والبيجامات
رجعنا للبيت قالت خالتي باقي قمصان النوم بنخلي لها يوم كامل صرخت انا : لا والف لا مستحيل والله لو ماادري اش يصير الا قمصان النوم .. .. كلهم استغربوا ... بعدين لحقت على نفسي و قلت : لاتخافون بشتري بس انا ولينا صاحبتي تعرف اماكن حلوة وأشياء ناعمه غير نعومي ..!وابتسمت ثم قلت : بعدين هذي اشياء خاصة لاتحرجوني ..
خالتي كانت شاكة بتصرفاتي وكل شوي تقول انتي موطبيعيه اللي يشوفك يقول انك ماخذة شايب ومغصوبة عليه .. انا بصراحه ضحكت على تعليقها ..وبقلبي اقول لو تدرين وش فيني ياخالتي .. انا فيني هم قد الجبل وانتم فرحانين وتسحبوني من سوق لسوق كأني بروح للجنه اللي تحلم فيها أي بنت وانا في الحقيقه بروح لعناد مهند وتحديه لي وغروره واحتقاره واهانته آآآه بس لوتدرين ياخالتي فادية . . لوتدرين ياهدى اللي متأكدة انك عارفه اني مو متحمسه لاللزواج ولا لمهند نفسه .

حجزت عند المشغل اللي اتعامل معاه واللي سويت مكياج ملكتي فيه ..
رجعت خالتي فادية للطايف .. وكل يوم تتصل فيني وتسألني اذا اشتريت القمصان ولا لا ..؟ وانا كل شوي اقول اليوم بنزل هو كله محل واحد آخذ كم واحد والباقي بعد الزواج ..
كنت اضحك عليهم وأوهمهم ان حياتي مع مهند راح تكون عادية ولا حلوة ...!
رحت عند لمى اللي ولدت وجابت بنت سمتها "ديمه" على اسمي وحاولت اخليها تغيره بس رفضت ومااعطتني فرصة للنقاش لأنها خلاص قررت وزوجها وافق ..
جلست معاها بعد ماعاتبتني لأني ماعدت اكلمها زي اول وانا اعتذرت بتجهيزات الزواج قالت : والله زعلانه منك تحددون الزواج مافكرتي فيني واني في فترة نفاس ..
قلت بتريقه : من قال ان لي دخل بتحديد موعده
فتحت عيونها لمى قالت : كيف مالك دخل مو زواجك
ضحكت وقلت لها : لا حبيبتي هذا زواج مهند وهو الوحيد اللي يقرر ويفرض وخالي يجاريه على كل شي ..
قالت بأسى : بجد ياديمه الله يعينك
: ماعليك لموي احضري تكونين خلصتي اسبوعين وزياده اهم شي تقدرين تتحركين وتمشين وديومه الصغيرونه ماراح يجيها الا العافية ..
: ان شاء الله بحاول احضر
: لا مو تحاولين اذا ماجيتي معاي ماراح اكلمك ..
: لا جد ديمه بإذن الله راح اجي مااتخيل انك تتزوجين ومااكون معاك
: اهم شي احضري لاتسوين ولا شي عاذرتك بس ابغى اشوفك في ليلة زي هذي
: خلاص من عيوني
خرجت من عند لمى على الساعه 8 المغرب واتصلت على روان وقلت اني راح اطلع معاها للسوق ابغى اشتري لي كم فستان وهي ذوقها روعه .. لأني مااشتريت مع خالتي الا ثلاثه وذوق خالتي مايناسبني واذا جيت اشتري شي على ذوقي تقول مايصلح جاريتها والحين ابغى اشتري على ذوقي .. وصلت عندها وخرجنا مع بعض بعد مااتصلت على خالي وقلت له .. وقلت لهدى اني بروح اشتري القمصان... ورحنا انا وروان لأكثر من مجمع واشتريت فساتين مرة رايقه وحلوة .. رجعت للبيت معاي اكياس وخرجت لغرفتي على طول وناديت هدى تجي تشوف الفساتين وقستها وهي عندي : واو ياديمه وربي رووعه اوف لويشوفك مهند بس بالشكل هذا والله لينهبل
: هذا ذوق روان .... غيرت طبعا الموضوع ماابي سيرته ولااتخيل نفسي البس عشانه

مرت اسبوعين الاختبارات كنت اواصل اغلب الأيام لأني مصرة اكمل الدرجات ماحاولت اضيق على نفسي وأفكر بشي راح يأثر على مذاركتي .. الحمد لله عدت على خير وأخيراً انتهت الاختبارات ..
لو اقول لكم انه كل ماخطر على بالي الزواج ولا جات فكرة اني بتزوج مهند قريب احس اني ابغى امسك الوقت لايتحرك ماابغى اليوم يمر وينتهي ويجي يوم ثاني ويقرب موعد الزواج .. صحيح جاريت اللي حولي وهم فرحانين لي بس انا بقلبي شي ثاني ..
خلاص هذا آخر اسبوع لي ببيت خالي وانا ديمه البنت اللي عايشة بعز خالها ودلاله .. اذا جيته بعد الاسبوع هذا راح اجي ضيفه ولفترة معينه وارجع الا في حالة وحده وهي اني انفصل عن مهند وهذا اللي اتوقعه ... !
رجعت للبيت وانا على قد ماني فرحانة اني انتهيت من اختباراتي على قد ماني زعلانه
دخلت الصالة وحصلت خالي ناصر جالس عنده اوراق كثيرة ويكتب شكلها للمدرسة او عقود تابعه لمكتب العقار حقه .. ! سلمت عليه ورد علي وهو مشغول .. ماحبيت اقطع عليه شغله وجيت ابغى اطلع بس ناداني وهو مشغول : ديمه تعالي لاتروحين انتظري لين اخلص ابيك بموضوع .
: حاضر
جلست على الكنبة وانا اقول بقلبي الله يستر .. احترت من خالي اش يبغى .. جا في راسي مليون شي .. الحين راح اعرف كل شي ليه اتعب نفسي ..
كمل خالي اوراقه وخلصها بعد حوالي نص ساعه
قال وهو يحس بارتياح وابتسم لي : هلا ديمتي ها كيفك ..؟ وكيف امتحاناتك ..؟
: الحمد لله بخير وامتحاناتي كلها عال
: الحمد لله .. وين تبغين شهر العسل
: ها ..؟ مو لازم شهر عسل
: لاوالله بكيفك هو ؟ ديمه تراني صبرت على دلعك كثير .. ترى لو غيري كان كسر راسك عشان الدلع هذا
: حتى انت ياخالي ..؟
ناظرني خالي قال : وشو حتى انا ..؟ وش قصدك ..؟
: ولا شي ..؟ طالما مو بكيفي ليه تشاورني
: مهند يقول اسألها وين تبيه
: ماابيه .
فتح عيونه وهو يناظرني وقال بصوت عالي: ايش ... وش فيك انتي تستهبلين ولا خلاص شفتيني ساكت
: اقصد ماابغى شهر عسل برا مو لازم ماشبع سفر وغربه خلنا نقضيه هنا بالسعوديه احسن
حسيت خالي ارتاح لأنه غمض عيونه شوي بعدين قال : والله هذا عين العقل بس انا ابيك تروحين شهر عسل حالك حال بنات الناس انا اقول روحوا كندا وماليزيا ولا اسبانيا ولا فرنسا مافيه احلى من هالدول
: لا لا ياخالي انا ماتهمني الشكليات بالعكس هنا احلى والمفروض هو يستغل اجازته ويقضيها بالبلد مو اول ماياخذ اجازة يرجع يسافر
: هو راضي ماعليك اهم شي انتي
:انا مهمني هنا بجده بمكه برا بأي مكان عادي .. بس ارجع واقول لو مانسافر احسن
: بكيفك بس ليه انا حاس انك منتي مبسوطه
: يعني بطلع من بيتك وتبغاني اصير مبسوطه ...... قلتها ودموعي في عيوني وصوتي مخنوق ..
: هههههههههههه لا تقولين هالكلام محد بيزعل على طلعتك كثري بس هذي الحياة وانتي هنا بجده اذا بغيتي تجين ولا اشتقت لك كل مافي الأمر مشوار مايكلف عشر دقايق
: ليه بيتهم فين ..؟
: بينا وبينهم تقريباً ربع ساعه اذا مافيه زحمه
: ياالله يعني بعيد شويه
: لابعيد ولا شي اجل تبين تسكنين بجنب اهلك
: تصدق خالي ...؟ لوماكنت ماابغى افرق بينه وبين اهله كان قلت نستاجر بنفس حينا ..
: ههههههههههههههههههههههه ماعليك اذا بغيتي تجين تعالي على طول واذا ماقدرتي ولا كان مهند مشغول لايردك الا التلفون دقي علي ونجيك ناخذك ولا نزورك
: الله لايحرمني منك ويخليك لي
: ويسعدك ياديوم واشوف عيالك واربيهم مثل ماربيتك من غير شر على امهم وابوهم
: انت عزي ياخالي وسندي بهالدنيا واذا ربيت عيالي اشهد انهم بيطلعون رجال عساني ماانحرم منك
دخلت علينا هدى قالت : ماشاء الله وش هالكلام الحلو ديوم عطينا شويه ولا خالك مافيه امل ننافسك بكلامه لك ..
ضحك خالي من كلام هدى وقال : عاد انتي ياام بسام محد ماخذ من الكلام الحلو كثرك

قمت وانا اضحك قلت: بروح ابدل ملابسي وارجع اتغدى معاكم ..
: يالله ننتظرك .. قاله خالي وهو يقوم يروح للطاولة اللي حطوا عليها الشغالات الغدا

بدلت ملابسي ولبست قميص قطني لنص الساق وأكمام قصيرة ونزلت .. وتغدينا بعد ماجوا بسام وأسامه وياسمين من عند التلفزيون اللي محطوط لهم بغرفة خاصة تحت ..!

اليوم الأربعاء صحيت الساعه وحده الظهر عشان اشوف درجاتي بالنت .. اووه الحمد لله كل درجاتي روعه اقلها كانت 97 من ميه وهي مادة واحدة الباقيه مادتين 98 ومادة 100 من 100 وومادتين 99 من ميه الحمد لله رضا من ربي ..
ارسلت لخالي درجاتي كلها بأسماء المواد وآخر الرسالة كتبت وش رايك في بنتك..؟ ماقدرت اكلمه وأزعجه لأنه نايم وانا بصراحه ماحبيت اقول لأحد قبله


قمت غسلت وصليت الظهر وأخذت دوش ولبست لأن جدتي بتوصل اليوم هي وخالتي سمر مع خالي ايمن وزوجته .. وخالي محمد موجود بالطايف عشان بيحضر زواجي بس ماراح يجي الا بكره بس هند وغادة بيجون اليوم بالليل لأن عندنا عشا لجدتي اميرة ...
شفت هدى خارجة من قسمهم وهي تبتسم جايتني : مبروك ياديمه مو غريبة عليك ..
:ههههههههههههه عرفتي الله يبارك فيك
: يالله اليوم بتروحين للمشغل
: لا جدتي بتجي خليها بكرة
: مايصير لازم تروحين اليوم يابنت سوي الحمام اليوم احسن ترى المفروض انك مسويته من امس ولا قبله بس انتي كسوله عاد لازم تروحين اليوم
: وجدتي وخالتي وسهى اللي بيجون عشاني
: لاحقة عليهم بعدين هم عارفين انك عروس يالله ديمه تكفين لاتعاندين
: مو مسألة عناد ياهدى بس بجد مو حلوة اترك اهلي اللي بيجون من بعيد
: والله مافيها شي بعدين خالتك هنا بتقابلهم وانا موجوده وهند وغادة خلاص لاتشيلين هم
: اوكي بروح اجل بعد شوي
رحت للصالون وسويت حمام مغربي وبخار وسلمت نفسي ليليان اللي دايماً تنبسط على مكياجي ولا الشغل معاي تقول اني مااتعبها وان بشرتي سهل التعامل معها .. اخيراً صبغت شعري بني فاتح ودخلت معاه خصل صغيرة مرة لونها ثلجي وأكدت على ليليان انها ماتكبر الخصل وفعلاً اتقنت اللي ابغاه طلعت الخصل ناعمه وخفيه وكأنها خيوط ثلجيه ناعمه داخله على اللون البني الفاتح ..
رجعت للبيت على الساعه 9 بالليل واول ماشفت جدتي حضنتها بسرعه وخالتي نفس الشي .. وسلمت على سهى زوجة خالي ايمن اللي اعتبرها زي خالتي سمر
جلسنا مع بعض وهذي مو اول مرة يجون عندنا في بيتنا .. خاصة خالي ايمن اللي يجينا اذا حصل فرصة لأنه في الرياض ويقدر يجي بالسيارة

جلست معاهم الين جات الساعه 4 الفجر وكانت جدتي تعبانه دخلوا غرفة الضيوف وناموا ونامت معاهم غادة لأن فيها اربع سراير وغرفة خالتي فاديه فيها سريرين نامت فيها هند معاها .. انا طلعت لغرفتي وقلبي بدا يدق قربت الساعة اللي ماادري كيف راح تكون بس اللي ادري عنه انها ساعه ماراح اكون فيها مبسوطه .. وكل هاللي سويته مو عشاني فرحانه ولا لأني ابغى مهند يشوفني حلوة .. لا بالعكس انا فكرت في اهلي في اهل مهند اللي مالهم ذنب ان عروس ولدهم ماتهتم ولا تجي بشكل عادي وماتتكلف عشانه .. وفكرت بالناس اللي راح يجون ماابغاهم يتكلمون علينا خاصة انهم يدرون ان مهند دفع مهري 100 الف فما ابغاهم يقولون ان خالي مااعطاني ولا انه قصر معاي ..
حاولت انام ماقدرت .. جلست اتقلب الين الساعه 11 الصباح ارق وتفكير و مهند اللي راح ارتبط فيه وانا اكرهه .. ايوه اكرهه لأنه بإمكانه يطلبني بإسلوب احلى ..بإمكانه يتمكن من قلبي لأنه مو ناقصه شي بس هو ماحاول وشكله مايبغى ..
كنت احلم اني اتزوج انسان مهم في المجتمع .. تكون شخصيته قويه يحسسني بالحنان والأمان ويقدر ديمه اللي انا واثقة انها بنت الكل يحلم فيها .. ماني مغرورة بس انا الحمد لله فيني كل الصفات اللي يتمنونها اغلب الرجال .. ماعدا شغل البيت طبعا وهذا مو عيب اقدر اتعلمه بسهولة والشغاله تكفي .. انا جميلة ،، عاقلة ،، محترمه وخلوقة ،، مثقفة وشهادتي كبيرة ومتفوقه ،، اصل وحسب ونسب وعز الحمد لله
كان النوم قريب مني لأني حسيت بتعب بس دق الجوال وطرد النوم شفته رقم عمتي صالحه
رديت بتعب : هلا والله
: هلا ديمه كيفك يابنتي
: الحمد لله انتي كيفك ياعمه
: بخير من ربي .. ليه صوتك تعبان فيك شي
: لاعمتي بس ماقدرت انام للحين
:ههههههههههههه لاتخافين هذا يصير لأي عروس المهم الحين خذي لك ثلاث ساعات قبل تروحين للصالون حتى مايبين عليك الارهاق الليله
: ان شاء الله .. متى بتجين
: اخوك هو اللي قومني اتصل عليك وبيمشينا الحين يقول بشوفها قبل زحمة الناس
: ياعمر اخته ياعناد كيفه هو ياعمه وكيف عادل وسديم
: هذولي نعمة ربي علي كلهم بخير ياوجه الخير
: الله يسعدك ياعمه ويكتب لك الأجر ويخليك لنا ام حنون وقلبك كبير .
: ويسعدك يابنتي والله لوتدرين انهم مغيرين لي حياتي وعوضوني اللي ربي حرمني منه الحمد لله على كل حال
: ماتدرين عن امهم
: هههههههههههههه ابشرك انخطبت ووافقت وزواجها بالصيف
: شو ..؟ ومن هذا اللي خطبها ..؟
: ولد خالتها مساعد عنده حرميتن وهي الثالثه
: الله يرزقها ليتها تتزوج لاتجيك بكرة تقول هاتي عيالي
: ههههههههههههه والله هذا كلامي ..طيب يمه مااطول عليك نامي زي ماقلت لك والليلة ان شاء الله اشوفك
: على خير يارب سلمي لي على اخواني عندك خاصة عناد
: يوصل ... مع السلامه ..
: بحفظ الله

قفلت من عمتي وحطيت جوالي صامت ونمت .. كان نومي بتعب كل شوي اصحى واذا نمت اتحلم بأحلام مزعجه
صحيت وانا احسني مصدعه ومرهقة وتمنيت اني مانمت هالنومة المزعجه بس يالله اسمه اني نمت ..دقت علي عمتي قالت ان عناد جا مع عمه ياسر وقالت لي ادق عليه عشان اذا ماقابلني راح يزعل .. دقيت على عمي حصلته بالمجلس حقنا ..
كانت الساعه خمسه العصر وجاتني خالتي معصبه تقول يالله للمشغل
قمت بكسل واستحميت ولبست بنطلون جينز وبدي كحلي علاقي وقصير ولبست عبايتي ومريت المجلس سلمت على عناد اللي حضنته وكثير بعدين سلمت على عمي ياسر .. وقلت اني مشغولة قال عناد : اناا بوديك للمشغل مع السواق
قلت له : اوكي يالله نمشي انا جاهزة
ورحت مع عناد اللي ركب ورى معاي عشان اسولف معاه براحتي بدون مايسمعنا السواق
.. جلس يسولف لي طول الطريق عن عمتي وعبدالوهاب وطيبتهم وانه مرتاح نفسياً .. فرحت كثير لكلامه وقعدت اوصيه على نفسه واذكره في كلام ابوي الله يرحمه عنه
وأوصيه على عادل وسديم .. ووعدني انه راح يكون قد المسئولية وانه رجال قد الثقه . وقعد يقول لي عن مغامرتاه في الحي حقهم والمدرسة ودرجاته ..
وصلت للفندق على الساعه سته تقريباً دخلت جناح العروس ومعاي ليليان ..
اما خالتي والبنات راحوا عند الصالون يسوون مكياجهم هناك الا هدى جات معاي وسوت مكياجها قبلي بعدين بدت ليليان في مكياجي على الساعه 8 وطلبت منها تسوي لي تسريحه ناعمه تناسب الفستان وقلت لها ماترفع شعري على فوق لأني مااحب الستايل هذا .. لفت لي شعري على ورى بطريقه روعه وبيد محترفه ودخلت الشعر مع بعض كانت الصبغه بصراحه جناان .. طولت ليليان وهي تشتغل وتخلص مرحلة وتبدا مرحله بالمكياج احس كل هذا ماله داعي بس يالله مكياج العروس عشان مميز ويطول على قولتها .. اخيراً خلصت الساعه الحين 11 وماراح انزف قبل 2 او حتى 3 لبست فستاني اللي طلع مع المكياج والتسريحه روعه ..ولبست الجزمه الفضية اللامعه والعالية شويه... ولبست طقم الالماس معاه والخاتم ..تذكرت شي ... لا لا لا كيف نسيت ... ياويلي نسيت اجيب الدبلة معاي .. ورطه صدق .. اصلاً الدبه مالبستها من ليلة الملكه واذا احد سألني عنها اقول واسعه علي .. الحين اذا جا المفروض يخرج الخاتم من يدي اليسار ويحطه بيدي اليمين .. ياربي اش اقول له .. ماخطر في بالي الخاتم ونسيت شي اسمه دبله ..
دقيت على هدى لأني لو قلت لخالتي بتعصب علي وانا مو ناقصتها .. !
: هلا ديمه خلصتي
: تعالي هدى تكفين محتاجة لك بسرعه
دقيقه وحده بس الا هدى عندي : هلا ديمه خير فيك شي واو ماشاء الله تبارك الله وربي انك اجمل عروس شفتها بحياتي حصنتي نفسك
: ايوه هدى لاتخافين بس انا في ورطه ومحد بيساعدني الا انتي خالتي لو تدري بتعصب علي وتزعل
: شو فيه وقفتي قلبي ؟
: الدبلة نسيتها
: يووووه معقولة انتي
: هدى لاتعاتبين انا قلت لك عشانك ارحم من خالتي تكفين هدى ايش الحل
: مممممممممممم طيب لاتخافين بروح للبيت
: بعيد البيت اخاف يطب الحين علي وانتي ماجيتي
: لا ماعليك بكلم ناصر مايدخله لين اقول له بقوله ماخلصت اوكي ..؟
: اوكي الله يسعدك ياهدى ويخليك .
: يسعدك انتي يالله باخذ عبايتي
اخذت عبايتها اللي كانت حاطتها عندي ودقت على السواق وخرجت من عندي
كل شوي ادق عليها لين وصلت للبيت .. وعلمتها بمكانها وبأية درج ..
دخلت علي لمى وحضنتني وجابت معاها ديومة الصغنونة كنت بموت عليها احسها بنتي .. كانت صغنطوطه نظرها بكل مكان ماتقدر تثبته جلست تبكي وأخذتها امها قالت : ماعليه ديمه نفسي اجلس معاك بس بنتي شكلها بردانه عندك جليد مو تكييف
: اوكي حياتي روحي ومعذورة اهم شي ديومه لاتتعب
: يلا مبروك ويارب يسعدك ويهنيك
: الله كريم
جات منار بنت خالي محمد وامها وهنادي اختها وسلموا علي وكل وحده عبرت باعجابها عني بطريقتها .. قالت منار .: يارب اكون مكان ديمه بعد شهرين ثلاثه ..
ردت امها : بنت استحي على وجهك وش هالكلام
: يمه تعبت من العزوبية بستقر
ضحكنا من منار اللي كانت لابسه فستان كحلي قصير مطلعها رهيبة وتسريحتها كانت روعه .. قلت لها : ماشاء الله عليك منار انتي الليلة قمر
: من جد ديمه يعني اروح استعرض اقول من تخطب ..
:ههههههههههههههههههههههه
راحوا اهل خالي محمد لمن دخلوا علي صاحباتي روان وليلى وندى وزينه ولينا وعفاف سلموا علي وباركوا لي وجلسوا عندي شويه .. كانت روان جايبة معاها معجنات فطاير بالجبنه واللحمة والخضار .. وعصير الربيع حوالي ست علب ضحكت عليها لأنها معبيه شنطة البراء اكل وعصير .. قالت :هذا عشانك عارفه ماراح تاكلين ..
: تصدقين مااكلت شي من البارحه ... اصلاً مافيه وقت من اول ماصحيت وخالتي تقول تأخرتي يادووب بسرعه قمت لبست وجيت هنا
: يالله كلي .. انتي قمر ماشاء الله عليك ياديمه بجد مين قده مهند ياخذ وحده بهذا الجمال وفستانك مرة مرة يجنن .. ولا الطرجة واو عليها ..
تدخلت ليلى : بجد ياديمه فستانك ومكياجك وتسريحتك بالرغم انها ناعمه الا انها موطبيعيه بخلي الكوافيرة حقتك تسوي لاختي مكياجها وشعرها في زواجها ..
: واذا تبين الفستان حلال عليك ههههههههههههههه
: تسلمين حبيبتي فستانك جنان بس اختي امتن منك ماراح يزبط عليها بس باخذه عشان اسوي نفس الموديل
: الله يسعدها ويتمم لها على خير .
كانت خالتي تجي عندي تعدل شي فيني وتروح .. وترجع مع عاملة تجيب لي عصير ولا قهوة وحلا .. ماكنت اقدر آكل شي بس اخذت حبة فطيرة بالجبنه عشان روان وشربت شوية عصير ..
جات جدتي عندي وتصورت معاي وكمان خالتي سمر تصورت معاها هي وجدتي ولوحدنا .. الشبه بيني وبين خالتي سمر كبير سبحان الله ..
اجبرتني جدتي اشرب قهوة وآخذ حبه شكولا ... وعشانها شربت قهوة وأكلت شكولا
الحين الساعه وحده وربع اتصلت هدى قالت انها وصلت الفندق اوف اخيراً
دخلت هدى علي وفيدها العلبة حقت الدبلة اللي كنت حاطتها فيها .. اوه الحمد لله ماصدقت اني شفتها ماادري ليه مهند يخوفني هالقد ... لا لا مايخوفني بس ماابغى مشكله او انه يمسك علي شي من اول ليله

قمت شيكت على نفسي كنت واو الحمد لله وجوا البنات خالتي فادية وهند وغاده وهدى تصورنا مع بعض وأكثر وحدة تصورت معاها هدى .. وجو اهله وتصوروا معاي لوحدي
جات اللحظة الحرجة ...!
اتصل خالي قال انه جاي مع مهند وماجد وسامي وياسر وعناد
قبضني قلبي لمن سمعت سيرته وانه بيدخل الحين عندي قلت عشان ابرر لهدى توتري : اوف كل هذولا ..؟
: تكفين ديمه لاتنغصين على ناصر طلبتك لاتبكين اذا شفتي مهند .. انا حاسة انك


يتبع ,,,,,
👇👇👇
أحدث أقدم